Owa it Katapusan ro Pagpalangga it Dyos

1-2. Ano ro kalisdanan nga ginaatubang it mga Cristyano?

IMADYINA ro sangka baroto sa tunga it eawod habang mabaskog ro bagyo. Ginahampak ra it mabaskog nga humbak ag nagahapay-hapay. Nagasunod-sunod ra sa humbak, euwas eang kon may maghueog it angkla. Ro angkla hay nagabulig para mangin balanse ag indi maanod ro baroto kon may bagyo.

² Kon nagaatubang ka it malisud nga problema, basi mabatyagan mo nga pareho ka sa rayang baroto. Ing emosyon hay madasig man nga nagabag-o. Basi sa rayang adlaw, sigurado ka nga palangga ag ginabuligan ka ni Jehova. Pero pagkasunod nga adlaw, nagaduda ka kon nakikita na pa ing sitwasyon. (Sal. 10:1; 13:1) Posibleng may amigo ka nga nagpalig-on kimo, ag naumpawan ka it makadali. (Hulu. 17:17; 25:11) Pero nagduda ka eon man kon buligan ka ni Jehova. Posibleng maisip mo pa ngani nga bukon ka it palangga ni Jehova. Paalin mo mahueog ro angkla para mangin malig-on ka kon nagaatubang it kalisdanan? Buot hambaeon, paalin ka makasigurado ag makapabilin nga sigurado nga palangga ka ni Jehova ag buligan ka nana?

3. Base sa Salmo 31:7 ag 136:1, ano ro buot hambaeon it “mainunongon nga pagpalangga,” ag ham-an si Jehova ro pinakamayad nga halimbawa kara? (Tan-awa man ro piktyur.)

³ Ro sangka paagi para mangin malig-on ka kon nagaatubang it kalisdanan hay ro pagdumdom it mainunongon nga pagpalangga ni Jehova. (Basaha ro Salmo 31:7; 136:1.) Ro termino nga “mainunongon nga pagpalangga” hay nagatukoy sa madaeum ag owa it katapusan nga pagpalangga it sangka persona sa iba. Si Jehova ro pinakamayad nga halimbawa sa pagpakita kara. Ro matuod, ginasugid it Biblia nga imaw hay “bugana sa mainunongon nga pagpalangga.” (Ex. 34:6, 7) Nagasugid man ra parti kay Jehova: “Bugana ka sa mainunongon nga pagpalangga sa tanan nga nagatawag kimo.” (Sal. 86:5) Isipa ro ginapasalig kara katon: Indi gid pag-aywanan ni Jehova ro anang matutom nga mga alagad! Ngani ro pagdumdom nga mainunongon si Jehova hay makabulig kimo nga mangin malig-on kon nagaatubang it kalisdanan.​—Sal. 23:4.

DUMDOMA NGA RO PAGPALANGGA NI JEHOVA HAY SAMBILOG SA PANGUNA NGA MGA GINATURO IT BIBLIA

4. Magtao it mga halimbawa it panguna nga mga ginaturo it Biblia, ag ieksplikar kon ham-an nagapati gid kita kara.

⁴ Ro sambato pa nga paagi para mangin malig-on kon nagaatubang it kalisdanan hay ro pagdumdom nga ro pagpalangga ni Jehova hay sambilog sa panguna nga mga ginaturo it Biblia. Ano ing maisip kon mabatian mo ro pamisaea nga “panguna nga mga ginaturo it Biblia”? Posibleng maisip mo ro mga kamatuoran nga natun-an mo sa Bisaea it Dyos. Halimbawa, natun-an mo nga ro pangaean it Dyos hay Jehova, ro bugtong nga Unga it Dyos hay si Jesus, ro mga patay hay owa eon it nasayran, ag mangin paraiso ro eugta kon siin mabuhi ro mga tawo sa owa’t katapusan. (Sal. 83:18; Man. 9:5; Juan 3:16; Pah. 21:3, 4) Kon ginpatihan mo eon nga matuod rayang mga pagturo, indi ka eon madaling mapapati it iba. Ham-an? Dahil naintindihan mo nga rayang mga pagturo hay may masaligan nga mga ebidensya. Tun-an ta kon paalin ro pagpalangga ni Jehova nga sambilog sa panguna nga mga ginaturo it Biblia hay makabulig kimo nga maduea ro pagduda nga owa nagakabaeaka si Jehova o owa na nakikita ing ginaatubang nga kalisdanan.

5. Paalin masikway it sangka tawo ro saea nga mga pagturo?

⁵ Kat nag-umpisa kang magtuon it Biblia, ano ro nakabulig kimo nga masikway ro saea nga mga pagturo? Posibleng nakabulig kimo ro pagkumpara sa ginturo kimo it ing relihiyon sa mga ginaturo it Biblia. Isipa rayang halimbawa: Dati, nagapati ka nga si Jesus ro Eabing Gamhanan nga Dyos. Pero kat nagtuon ka it Biblia, napaisip ka, ‘Matuod gid man baea ra?’ Pagkatapos mong usisaon ro mga ebidensya sa Biblia, napamatud-an mo nga saea gali rayang pagpati. Ngani, owa mo eon ginpatihan rayang saea nga pagturo, ag nagpati ka eon sa kamatuoran halin sa Biblia nga si Jesus ro “panganay . . . sa tanan nga mga tinuga,” ag ro “bugtong nga Unga it Dyos.” (Col. 1:15; Juan 3:18) Syempre, ro saea nga mga pagturo hay posibleng “malig-on gid” ag malisud aywanan. (2 Cor. 10:4, 5, Ro Bag-o nga Kasugtanan, TAP) Pero kat natun-an mo eon ro kamatuoran, owa ka eon nagpati sa dati mong ginapatihan.​—Fil. 3:13.

6. Ham-an makasalig ka nga owa it katapusan ro mainunongon nga pagpalangga ni Jehova?

⁶ Pwede mo mang usisaon ro ginaturo it Biblia parti sa pagpalangga ni Jehova. Kon nagaatubang ka it kalisdanan ag nagaumpisa nga magduda sa pagpalangga ni Jehova, pangutan-a ing sarili, ‘Tama baea ang ginaisip ngara?’ Pwede mong ikumpara ing mga pagduda parti sa pagpalangga ni Jehova sa ginahambae it Salmo 136:1, ro tema nga teksto it rayang artikulo. Ham-an ginahambae ni Jehova nga ro anang pagpalangga hay “mainunongon”? Ag ham-an ginhambae it 26 nga beses sa rayang salmo nga ro “anang mainunongon nga pagpalangga hay owa it katapusan”? Sa gintalakay eon naton, ro mainunongon nga pagpalangga ni Jehova para sa anang katawhan hay sambilog sa panguna nga mga ginaturo it Biblia, pareho sa iba pang kamatuoran nga ginpatihan mo eon. Ro pagpati nga owa ka it pueos kay Jehova o bukon ka nana it palangga hay bukon gid it matuod. Indi ron pagpatihi, kon paano nga owa mo ginapatihan ro iba pang saea nga mga pagturo!

7. Magtao it pila nga mga teksto sa Biblia nga nagapamatuod it pagpalangga ni Jehova.

⁷ Abung pamatuod sa Biblia it pagpalangga ni Jehova. Halimbawa, ginhambae ni Jesus sa anang mga sumoeunod: “Mas eabaw pa kamo kahaega kaysa sa mga maya.” (Mat. 10:31) Si Jehova mismo hay naghambae sa anang katawhan: “Pabakuron ko ikaw, huo, buligan ko ikaw, buytan ko ikaw it akong tuo nga alima it pagkamatarung.” (Isa. 41:10) Tan-awa kon mauno kasigurado ruyong mga pamisaea. Owa naghambae si Jesus nga ‘Basi mas eabaw pa kamo kahaega,’ ag owa man naghambae si Jehova nga ‘Pwede ko ikaw buligan.’ Kundi, ginhambae nanda: “Mas eabaw pa kamo kahaega” ag “Buligan ko ikaw.” Kon nagaduda ka sa pagpalangga ni Jehova dahil sa ing ginatubang nga kalisdanan, rayang mga teksto hay makabulig kimo bukon eang it para mabatyagan nga palangga ka ni Jehova kundi para mangin kumbinsido nga palangga ka gid nana. Ro ginahambae it rayang mga teksto hay masaligan gid. Kon ipangamuyo mo kay Jehova ing mga pagduda ag pamaeandungan rayang mga teksto, mahambae mo man ro ginahambae sa 1 Juan 4:16, Ro Bag-o nga Kasugtanan, TAP: “Hasayran naton ag ginapatihan nga ginahigugma gid kita it Dyos.”a

8. Ano ing obrahon kon nagaduda ka kon amat nga palangga ka ni Jehova?

⁸ Ano ing obrahon kon nagaduda ka kon amat nga palangga ka ni Jehova? Ikumpara ing ginabatyag sa kon ano ing nasayran. Ro baeatyagon hay nagabag-o, pero ro kamatuoran hay owa gid nagabag-o. Ro pagpalangga ni Jehova hay sangka kamatuoran nga ginaturo katon it Biblia. Kon owa naton ra ginapatihan, matsa ginabalewala naton ro pinakaimportante nga ugali ni Jehova—ro anang pagpalangga.​—1 Juan 4:8.

PAMAEANDUNGI RO PAGPALANGGA KIMO NI JEHOVA

9-10. Ano ro ginatukoy ni Jesus kat ginhambae na nga “ro Ama mismo nagahigugma kinyo,” sa Juan 16:26, 27? (Tan-awa man ro piktyur.)

⁹ May matun-an pa kita parti sa pagpalangga ni Jehova kon usisaon naton ro ginhambae ni Jesus sa anang mga sumoeunod: “Ro Ama mismo nagahigugma kinyo.” (Basaha ro Juan 16:26, 27.) Owa ra ginhambae ni Jesus para eang mapasadya ro anang mga disipulo. Ro matuod, kon basahon naton ro mga bersikulo bago rayang teksto, matun-an naton nga owa ginatukoy ni Jesus ro baeatyagon it anang mga disipulo. Kundi, ginatukoy na ro parti sa pangamuyo.

¹⁰ Ginhambae ni Jesus sa anang mga disipulo nga dapat mangamuyo sanda paagi kana, bukon it kana mismo. (Juan 16:23, 24) Importante gid nga masayran nanda ron. Kat nabanhaw si Jesus, posibleng gusto it anang mga disipulo nga mangamuyo kana. Dahil sa pagkamatuod, amigo man nanda si Jesus. Posibleng gin-isip nanda nga dahil palangga sanda ni Jesus, pamatian na ro andang mga pangabay ag hinyuon ro anang Ama nga buligan sanda. Pero, naghambae si Jesus kanda nga indi dapat sanda mag-isip kara. Ham-an? Dahil ginhambae na kanda: “Ro Ama mismo nagahigugma kinyo.” Rayang kamatuoran hay kaibahan sa panguna nga mga ginaturo it Biblia parti sa pangamuyo. Isipa kon paalin ra naaplikar kimo: Paagi sa ing pagtuon it Biblia, nakilaea mo ag ginpalangga si Jesus. (Juan 14:21) Pero pareho it mga disipulo ku unang siglo, makasalig ka nga pamatian it Dyos ro imong pangamuyo dahil sayod mo nga imaw “mismo nagahigugma [kimo].” Ginapamatud-an mo nga nagapati ka sa rayang pamisaea kon nagapangamuyo ka kay Jehova.​—1 Juan 5:14.

SAYURA RO GINAHALINAN IT MGA PAGDUDA

11. Ham-an gusto ni Satanas nga magduda kita sa pagpalangga ni Jehova?

¹¹ Siin halin ro mga pagduda parti sa sa pagpalangga ni Jehova? Posibleng hambaeon mo nga naghalin ra kay Satanas, ag matuod man ron. Dahil ro Yawa hay “nagausoy it anang tueokbon,” ag gusto na magduda kita sa pagpalangga ni Jehova. (1 Ped. 5:8) Pero, ro pagpalangga ni Jehova hay nagpahueag Kana nga itao ro pangtubos, kon siin gusto ni Satanas nga ipabatyag katon nga owa kita nagakabagay nga magbenepisyo kara. (Heb. 2:9) Pero sin-o ro naila kon magduda kita sa pagpalangga ni Jehova? Si Satanas. Ag sin-o ro mangin masadya kon magpundo kita sa pag-alagad kay Jehova? Si Satanas man gihapon. Gusto ni Satanas nga isipon naton nga bukon kita it palangga ni Jehova. Pero bukon ra it matuod dahil imaw ta ro bukon it palangga ni Jehova. Ag sambilog ra sa pinakaepektibo nga ‘pagpangdaya’ ni Satanas, nga ipabatyag katon nga kita ro bukon it nagakabagay sa pagpalangga ni Jehova ag ginhukman eon kita. (Efe. 6:11) Kon sayod naton ro ginaobra nga pagpangdaya it atong kaaway, mangin mas determinado kita nga ‘suk-ean ro Yawa.’—Sant. 4:7.

12-13. Paalin nangin rason ro namana natong saea para magduda kita sa pagpalangga ni Jehova?

¹² May sambilog pa nga rason kon ham-an nagaduda kita sa pagpalangga ni Jehova. Ano ra? Ro atong namana nga saea. (Sal. 51:5; Roma 5:12) Dahil sa saea, naapektuhan ro atong mayad nga relasyon sa Dyos. Naapektuhan man kara ro atong isip, baeatyagon, ag pang-eawas.

¹³ Ro saea hay may negatibo nga epekto sa atong emosyon, ngani nagabatyag kita it pagkakonsensya, kabaeaka, pagkaduea it kompyansa, ag kahuya. Mabatyagan naton ra kon nakaobra kita it saea. Ag mabatyagan man naton ra dahil sayod naton nga bukon kita it perpekto, kon siin iba gid ra sa orihinal nga pagkatuga it Dyos sa mga tawo. (Roma 8:20, 21) Pareho sa saeakyan nga indi makadaeagan it mayad dahil kupos ro kariton, indi man naton magamit ro atong bilog nga ikasarang dahil bukon kita it perpekto. Ngani, owa eon kita nangawa kon ham-an nagaduda kita kon amat sa pagpalangga ni Jehova. Kon mabatyagan naton ra, dapat tandaan naton nga si Jehova hay “gamhanan ag daeayawon nga Dyos, nga . . . nagapakita it mainunongon nga pagpalangga sa mga nagapalangga kana ag nagatuman it anang mga sugo.”​—Neh. 1:5.

14. Paalin ro pagpamaeandong sa pangtubos makabulig katon nga maduea ro pagduda nga palangga kita ni Jehova? (Roma 5:8) (Tan-awa man ro kahon nga “Mangin Alerto Agud Indi Kita ‘Mapataeang it Saea.’”)

¹⁴ Kon amat, posibleng nagabatyag kita nga owa kita nagakabagay sa pagpalangga ni Jehova. Ag matuod gid man nga owa kita nagakabagay kara, ngani espesyal gid ro anang pagpalangga para katon. Kon sa aton eang nga sarili, indi naton mabaton ro pagpalangga ni Jehova. Pero dahil palangga na kita, gintao na ro pangtubos para mapatawad ro atong mga saea. (1 Juan 4:10) Tandai man nga nag-agto si Jesus sa eugta buko’t para euwason ro perpektong mga tawo kundi para euwason ro mga makasasaea. (Basaha ro Roma 5:8.) Owa it bisan sin-o katon ro makaobra it mga bagay it perpekto, ag owa man ra ginapaabot ni Jehova katon. Kon maintindihan naton nga ro atong namana nga saea ro rason kon ham-an nagaduda kita sa pagpalangga ni Jehova, mangin mas determinado kita nga suk-ean ra.​—Roma 7:24, 25.

PADAYON NGA MANGIN MAINUNONGON

15-16. Kon padayon kita nga mangin mainunongon kay Jehova, sa ano kita makasigurado, ag ham-an? (2 Samuel 22:26)

¹⁵ Gusto ni Jehova nga obrahon naton ro tama nga desisyon paagi “sa pag-unong kana.” (Deut. 30:19, 20) Kon obrahon naton ra, makasigurado kita nga mangin mainunongon man imaw katon. (Basaha ro 2 Samuel 22:26.) Kon padayon kita nga mangin mainunongon kay Jehova, makasalig kita nga buligan na kitang makatiis sa maskin alin man nga sitwasyon.

¹⁶ Sa gintalakay eon naton, abu kitang rason para magpabilin nga malig-on kon makaatubang kita it mga kalisdanan. Sayod naton nga palangga kita ni Jehova ag buligan na gid kita. Raya ro ginaturo katon it Biblia. Kon makabatyag kita it pagduda sa anang pagpalangga, pwede natong dumdomon kon ano ro atong nasayran parti sa pagpalangga ni Jehova kaysa magpukos sa kon ano ro atong ginabatyag. Kabay padayon kitang mangin kumbinsido sa kamatuoran nga ginaturo it Biblia nga ro mainunongon nga pagpalangga ni Jehova hay owa it katapusan.