LEKSYON 56
Buligi nga Maghiusa ro Kongregasyon
Kon kaibahan naton ro atong mga igmanghod, mabatyagan naton ro nabatyagan ni Haring David: “Mayad ag manami gid kon ro mga igmanghod hay mag-ieiba nga nagahiusa!” (Salmo 133:1) Ro paghiusa naton hay owa eang natabuan. Ro kada isaea katon hay pwedeng magpakita kara.
1. Ano ro espesyal sa katawhan it Dyos?
Kon mag-attend ka sa ibang kongregasyon sa iba nga lugar, basi indi mo maintindihan ro andang linggwahe, pero mabatyagan mo gihapon ro andang pag-abiabi ag pagpalangga. Ham-an? Tungod maskin siin man kami, paeareho eang nga publikasyon ro ginagamit namon sa pagtuon it Biblia. Ag ginatinguhaan namon nga magpakita it pagpalangga sa kada isaea. Maskin siin kami nagaestar, tanan kami hay ‘nagatawag sa pangaean ni Jehova, ag nagaalagad kana nga nahiusa.’—Sofonias 3:9.
2. Ano ing pwedeng obrahon agud may paghiusa?
“Maghigugmaanan kamo it hantop sa inyong mga tagipusoon.” (1 Pedro 1:22) Paano mo ra maobra? Imbes nga magpukos sa negatibo nga ugali it iba, tan-awa ro andang manami nga mga ugali. Tinguhai nga makig-iba sa mga igmanghod nga may iba-ibang ginhalinan, kaysa makig-iba sa kapareho mo eang it interes. Ag kinahang-ean man natong dueaon ro pagpaeabi sa iba.—Basaha ro 1 Pedro 2:17.a
3. Ano ing obrahon kon may una kamo nga indi pagkaintindihan it kapareho mo nga Cristyano?
Nagahiusa kita, pero bukon man kita it perpekto. Kon amat basi magsunggod kita o makasakit it baeatyagon it iba. Ngani ginahambaean kita it Bisaea it Dyos nga padayon nga “magpaeasensyahan . . . sa kada isaea,” dugang pa: “Magpinatawaran kamo pareho nga ro Ginuo nagpatawad kinyo.” (Basaha ro Colosas 3:13.) Nagakasaea kita pirme kay Jehova, pero ginapatawad na gihapon kita. Ngani gusto na man nga patawaron naton ro atong mga igmanghod. Kon narealisar mo nga nakasakit ka it iba, mag-obra it paagi agud maayos ra.—Basaha ro Mateo 5:23, 24.b
TUN-I PA GID
Tun-i kon paano ka makabulig agud may paghiusa ag kalinong sa kongregasyon.
Ano ing obrahon para makipag-ayos?
4. Likawi nga magpaeabi
Gusto natong palanggaon ro tanan nga igmanghod. Pero kon iba ro andang ginhalinan, basi malisdan kita nga batunon sanda. Ano ro makabulig? Basaha ro Binuhatan 10:34, 35, ag talakaya rayon rayang mga pangutana:
Ginabaton ni Jehova ro tanan nga klasi it tawo bilang anang mga Saksi. Paano mo imaw matuead nga batunon man ro tanan nga klasi it tawo?
Ano nga pagpaeabi ro may una sa inyong lugar nga gusto mong likawan?
Basaha ro 2 Corinto 6:11-13, ag talakaya rayon rayang pangutana:
Kon kimo, paano ka mangin maeapit sa mga igmanghod nga iba ro ginhalinan?
5. Kinabubut-on nga magpatawad ag makipag-ayos
Kinabubut-on kita nga ginapatawad ni Jehova maskin pa indi na kinahang-ean ro atong pagpatawad. Basaha ro Salmo 86:5, ag talakaya rayon rayang mga pangutana:
Paano magpatawad si Jehova?
Ham-an nagapasaeamat ka sa anang pagpatawad?
Sa anong sitwasyon malisdan kita nga makipag-ayos sa iba?
Paano naton matuead si Jehova ag makapabilin nga nahiusa sa atong mga igmanghod? Basaha ro Hulubaton 19:11, ag talakaya rayon rayang pangutana:
Kon may nagpaugot kimo, ano ing obrahon agud mangin maayos ro sitwasyon?
Kon amat, mapaugot man naton ro iba. Ano ro atong obrahon kon matabo ra? Tan-awa ro VIDEO, ag talakaya rayon rayang pangutana.
Sa video, ano ro gin-obra it sister para makipag-ayos?
6. Tan-awa ro mayad sa imong mga igmanghod
Habang mas nagaeapit kita sa atong mga igmanghod, makita naton ro andang manami nga mga ugali ag ro andang mga kaeuyahon. Paano kita makapukos sa andang manami nga mga ugali? Tan-awa ro VIDEO, ag talakaya rayon rayang pangutana.
Ano ro makabulig kimo nga makita ro manami nga mga ugali it imong igmanghod?
Nagapukos si Jehova sa atong manami nga mga ugali. Basaha ro 2 Cronica 16:9a, ag talakaya rayon rayang pangutana:
Ano ing nabatyagan tungod nagapukos si Jehova sa ing manami nga mga ugali?
Maskin may depekto ro manami nga dyamante, maeahaeon man gihapon ra. Bukon man it perpekto ro tanan nga mga igmanghod, pero espesyal man gihapon sanda para kay Jehova
KON MAY MAGHAMBAE: “Patawaron ko eang imaw, kon imaw ro unang magpangayo it pasensya.”
Ham-an dapat kita magpatawad sa iba?
SUMARYO
Makabulig ka sa paghiusa it kongregasyon kon mangin mapinatawaron ka ag magpakita it pagpalangga sa ing mga igmanghod.
Review
Paano mo likawan nga magpaeabi sa iba?
Ano ing obrahon kon may indi kamo pagkaintindihan it kapareho mo nga Cristyano?
Ham-an gusto mong tuearon ro halimbawa ni Jehova sa pagpatawad sa iba?
SAYURA
Tun-i kon paano ro ilustrasyon ni Jesus makabulig katon nga likawan nga hukman ro iba.
Kinahang-ean baea naton nga mangayo it pasensya kon owa man kita it haobra nga saea?
Tan-awa kon paalin nanda natun-an nga indi magpasueabi sa iba.
Tun-i kon paano mo ayuson ro personal nga problema sa iba, bago pa raya makaapekto sa kongregasyon.
“Husaya ang mga Indi Paghangpanay Paagi sa Gugma” (Ang Lalantawan, Mayo 2016)