Иегова слерди токунадып салар

1. Вавилонныҥ олјозында болгон еврейлердиҥ јӱрӱми кандый болгонын куучындап беригер.

ЕВРЕЙЛЕР кӧп јылдардыҥ туркунына Иеговага удура кинчек эткендер. Оныҥ учун олорды Вавилонныҥ улузы јерин јуулап алала, айдуга апарган (2 Лет. 36:15, 16, 20, 21). Олордыҥ јӱрӱми ӧскӧ јерде кандый болгон? Бир јанынаҥ кӧрзӧ, олордыҥ јадын-јӱрӱми кемјок ло болгон (Иер. 29:4—7). Је бир јанынаҥ сананза, олор олјодо јӱрерге кӱӱнзебеген эмей. Ол олјодо болгон бир еврей: «Бис Вавилонныҥ сууларыныҥ јанында отурып, Сионды эске алынып, ыйлашканыс» — деп бичиген (Сар. 137:1). Чын, олорго токунаду сӱреен керектӱ болгон. Је олор токунадуны кайдаҥ алар эди?

2, 3. а) Иегова олјодогы еврейлерди канайып токунаткан? б) Бу јӧрмӧлдӧ нени шӱӱжерис?

² Иегова — «токунал береечи Кудай» (2 Кор. 1:3). Ол бойыныҥ ишчилерин сӱӱп јат. Анайда ок олорго болуш керек болзо, јанында болорго кӱӱнзейт. Иегова еврейлер Вавилон дӧӧн олјого барза, анда олордыҥ кезиги јастыразын алынып, ойто Кудайга бажырарга кӱӱнзеер деп билер болгон (Иса. 59:20). Оныҥ учун Иегова олјоноҥ 100 јыл кире озо, Исайяны судурлар бичизин деген. Ол оны нениҥ учун бичиткен? Анда: «Токунадыгар, албатымды токунадыгар — деп, слердиҥ Кудайыгар айдат» — деген сӧстӧр бар (Иса. 40:1). Исайяныҥ бичигинде олјодо јӱрген еврейлерди токунадатан шӱӱлтелер кӧп болгон.

³ Кезикте бистерге база токунал керек болуп јат. Бу јӧрмӧлдӧ Иегова еврей албатыны канайып токунатканын кӧрӱп ийерис: 1) кем бурузын алынар, оныҥ јаманын таштаар деген; 2) бойыныҥ ишчилерине ижемји берген; 3) келер ӧйдӧҥ коркыбаска болушкан. Анайда ок Иегова бисти бӱгӱн канайып токунадат деп шӱӱжип ийерис.

ИЕГОВА ЈАМАНЫСТЫ ТАШТАЙТ

4. Иегова олјодогы Израиль албатыны канайып килеген? (Исайя 55:7).

⁴ Иегова Израиль албатыныҥ кинчегин таштап салар деп сӧзин берген. (Исайя 55:7 кычырыгар.) Ол бойыныҥ албатызына: «Мен сени килеерим, јажын-чакка сени сӱӱрим» — деп айткан (Иса. 54:8). Иегова олорды канайып килеген? Израиль албаты Вавилонныҥ олјозына кӧп кинчектеринеҥ улам барган да болзо, је Иегова олорды јажын-чакка олјодо јӱрбес деп сӧзин берген (Иса. 40:2). Кинчегин алынып турган израильтяндарды бу сӧстӧр сӱреен тыҥ токунаткан болор.

5. Иегова ишчилериниҥ јаманын таштаарга белен деп, бис нениҥ учун бӱдӱп јадыс?

⁵ Бис неге ӱренедис? Иегова ишчилериниҥ јаманын таштаарга белен. Алдында ӧйдӧ олјодо болгон еврейлердиҥ јаманын таштаган болордо, бӱгӱнги кӱнде бистиҥ кинчектеристи таштайтан шылтактар ондо оноҥ до кӧп. Исайяныҥ судурларыныҥ кийнинеҥ канча јӱс јылдар ӧдӧрдӧ, Иегова бойыныҥ сӱӱген уулын јерге ийген. Иисус Христостыҥ толынты тайылгазы бистиҥ кинчектеристи таштаарга ла олорды чек јок эдип саларга тӧзӧлгӧ болот (Иса. 1:18; Ап. ижи 3:19, сноска; Эф. 1:7). Иегова кандый килемкей Кудай!

6. Иегова бистиҥ јастыраларысты канайып кӧрӧт? Бу биске кандый токунаду берет? (Јурукты база кӧрӱгер.)

⁶ Исайя 55:7-деги сӧстӧр бойын јинип турган улусты токунадып салар аргалу. Кезик улус бойыныҥ бурузын алынып тӱзединген де болзо, је тӱҥей ле јинип јат. Анчада ла кинчектиҥ кийнинеҥ шыралап турза. Је бис кинчегисти алынып тӱзединген болзоос, Иегова бистиҥ јаманысты таштап койгон деп, алаҥзыбас керек. Бистерге јастыраларыска Иегова ла чылап кӧрӧр керек. Иегова јаманысты таштап салган болзо, ол оны ойто качан да эске алынбай јат. (Иеремия 31:34 тӱҥдештиригер.) Иегова алдында ӧйдӧ болгон немеге ајару этпей, эмдиги ӧйдӧ нени эдип турганыска ајару эдип јат (Иез. 33:14—16). Удабас ла бистиҥ килемкей Кудайыс эткен кинчектеристеҥ улам болгон кӱчтеристи, бастыразын јажын-чакка јоголтып салар.

7. Кинчегисти аксагалдарга куучындаарга биске не болужар?

⁷ Је бис кинчегисти јажырып турганыстаҥ улам јинип турган болзоос, канайдар? Агару Бичик бисти аксагалдарга баштанзын деп кӱӱнзедет (Иак. 5:14, 15). Кинчегисти аксагалдарга куучындаарга јеҥил эмес болот. Је биске не болужар? Кинчегисти акту јӱрегистеҥ алынганыс болужар. Анайда ок Иегова килемкей Кудай деп ундыбас керек. Оныҥ учун слерге болужатан аксагалдар база јалакай ла килемкей болор. А́ртурa деп карындаштыҥ учуралын кӧрӱп ийектер. Ол куучындайт: «Мен бир јыл кире ӧйдиҥ туркунына порнография кӧрӱп турган болгом. Је оноҥ уйат керегинде куучын-эрмек угала, ӱйиме ле аксагалдарга кинчегимди ӱзе куучындап бергем. Оныҥ кийнинеҥ бир канча кире јеҥил боло берген. Кинчектиҥ уур јӱги јок болуп калган деп сескем. Је тӱҥей ле бойымнаҥ јескинип турган болгом. Оныҥ учун аксагалдар меге, Иегова мени сӱӱп турган, ол менеҥ чӧкӧбӧгӧн, тӱҥей ле мениҥ најым болорго турган деп, эске алындыргандар. Олордыҥ јылу сӧстӧри мениҥ јӱрегимди томултып саларда, Иегова чыннаҥ ла мениҥ јастырамды таштап койгон деп бӱде бергем». А́ртур бӱгӱн јуунда текши пионер ле болушчы ишчи болот. Айдарда, бис кинчегисти алынып турган болзоос, Иегова јаманысты таштап салар деп, бир де алаҥзыбас керек!

ИЕГОВА БИСКЕ ИЖЕМЈИ БЕРЕТ

8. а) Иегова олјодогы еврейлерге кандый ижемји берген? б) Исайя 40:29—31 кинчегин алынган еврейлердиҥ кӱӱнин канайып кӧдӱрген?

⁸ Олјодо болгон еврейлер тӧрӧл јерине качан да јанбас ла олордыҥ айалгазы качан да солынбас болор деп сананган болор. Нениҥ учун дезе Вавилонныҥ империязы олјого алган улусты качан да кайра јандырбайтан (Иса. 14:17). Је Иегованыҥ кӧзине Вавилон тоозын ошкош болгон (Иса. 40:15). Ӱрӱп ле ийзеҥ јок болуп калар! Оныҥ учун Иегова бойыныҥ албатызын олјоноҥ јайымдап аларга сананганына кем де буудак эдип болбос (Иса. 44:26; 55:12). Иегованыҥ айткан сӧстӧри еврейлерге сӱреен јаан токунал берген. Је Исайяныҥ судурларында еврейлер јаҥыс ла токунал алар эмес, је анайда ок «Иеговага иженип тургандар јаҥыдаҥ ийде-кӱч алынар» деп айдылган сӧстӧр база бар болгон. (Исайя 40:29—31 кычырыгар.) Бу токунал берип турган сӧстӧрдӧҥ улам еврейлер ийде-кӱч алынып, «мӱркӱттер чилеп канаттарын јайып» учкандый болгон.

9. Еврейлер Иегова албатызын јайымдаар деп нениҥ учун бӱткен?

⁹ Олјодо болгон еврей албаты Иегованыҥ айткан сӧзине нениҥ учун бӱдер аргалу болгон? Нениҥ учун дезе бӱдӱп калган судурлар бар болгон. Еврейлер Ассирия Израильдиҥ он уктаҥ турган тӱндӱк јерлерин јуулап алала, албатызын ӧскӧ јерлерге кӧчӱргенин билген болгон (Иса. 8:4). Анайда ок Вавилон Иерусалимди јуулайла, албатызын айдуга апарганын олор база кӧргӧн (Иса. 39:5—7). База бир кӧргӧни — Седекия каанды, кӧзин ойоло, Вавилон дӧӧн айдуга апарганы болгон (Иер. 39:7; Иез. 12:12, 13). Бу ӱзе Иегованыҥ айткан судурлары бӱдӱп калганын еврей албаты билетен болгон (Иса. 42:9; 46:10). Оныҥ учун Иегова албатызын јайымдаар деп, олордыҥ бӱдӱмјизи тыҥыган.

10. Бу калганчы кӱндерде ижемјибисти јылыйтпаска нени эдер керек?

¹⁰ Бис неге ӱренедис? Бис бӱгӱнги кӱнде кӱч ӧйлӧрдӧ јададыс. Коркышту кӱчтӱ ӧштӱлер биске удурлажып јат. Је андый да болзо, биске ийде-кӱч берип турган ла токунал берип турган ижемји бар. Оныҥ учун ӧйинеҥ ӧткӱре санааркабас керек. Иегова биске недеҥ де коркыбайтан ла чыннаҥ ла јажын-чакка амыр јӱретен јӱрӱм берерим деп сӧзин берген. Бу ижемји бистиҥ санаабыста јарт кӧрӱнип турган болор керек. Бистиҥ ижемји кирлӱ кӧзнӧктий ошкош болуп калза, келер ӧйди јарт кӧрбӧй барарыс. Оныҥ учун «кӧзнӧгис» ару болзын деп нени эдер керек? Келер ӧйдӧ слердиҥ јӱрӱмигер кандый болор деп, јаантайын сананып туругар, бу керегинде статьялар кычырып туругар, видеолор кӧрӱп туругар, кожоҥдор угуп туругар. Анайда ок Иеговага слер анчада ла нени сакып турганаарды куучындап туругар.

11. Бир эјеге кӱчтерди ӧдӧргӧ не болужат?

¹¹ Ижемји канайып болужып турганы ла токунадып турганы керегинде јаан оорулу Джой деп эје куучындаган: «Кезикте кӱчтер бир уунда урулып келзе, бастыра санааркаштарымды Иеговага куучындап јадым. Нениҥ учун дезе ол мени сӱреен јакшы оҥдоп јат деп билерим. Иегова меге јаантайын „артыкташкан кӱч“ берип турган» (2 Кор. 4:7). Анайда ок Джой бойын райда деп кӧрӱп: «Бир де кижи: „Мен оору“ — деп айтпас» — деген сӧстӧрди шӱӱп сананат (Иса. 33:24). Анайып ла бис бойыстыҥ сезимдеристи Иеговага ӱзе куучындап, ижемјис керегинде шӱӱп сананып турзаас, кандый ла кӱчтерди ӧдӧ берерис.

12. Бисте Иегованыҥ айтканына бӱдетен кандый шылтактар бар? (Јурукты база кӧрӱгер.)

¹² Бисте еврейлерде ле чилеп Иегованыҥ айтканына бӱдетен шылтактар сӱреен кӧп. Бисти айландыра канча кире судурлар бӱдӱп турганы керегинде сананып ийектер. Темдектезе, Даниил «та неде де бек, та неде де бортык болор» башкару болотоны керегинде айткан (Дан. 2:42, 43). Бис бу телекейлик державаныҥ ӧйинде јададыс. Анайда ок башка-башка јерлерде јерсилкиништер болуп турганын угадыс. База бир судурла болзо, «ончо албатыларга» сӱӱнчилӱ јар јарлалып турганын кӧрӧдис (Матф. 24:7, 14). Бу да, ӧскӧ дӧ судурлардыҥ бӱткенин кӧрӱп, Иегованыҥ айтканы кыйалта јогынаҥ бӱдӱп калар деп, оноҥ тыҥ бӱдӱп јадыс.

ИЕГОВА КЕЛЕР ӦЙДӦҤ КОРКЫБАСКА БОЛУЖАТ

13. а) Јайымдалыштыҥ чек ле алдында еврейлерде кандый кӱчтер болгон? б) Олјодогы еврейлерди Иегова канайып токунаткан? (Исайя 41:10—13).

¹³ Иегова Израиль албатыга сӱреен јакшы ижемји берген де болзо, је чек ле јайымдалыштыҥ алдында олорго коркышту кӱч болор деп айткан. Нениҥ учун дезе судурла болзо, Вавилонды јуулап келеткен черӱ озо баштап јанында албатыларды јуулаар, оноҥ Вавилон дӧӧн келер (Иса. 41:2—5). Мынаҥ улам Израиль албаты коркый берердеҥ айабас болгон. Је Иегова олорды токунадып: «Коркыба, нениҥ учун дезе мен сенле кожо, ајыктанба, нениҥ учун дезе мен сениҥ Кудайыҥ» — деп айткан. (Исайя 41:10—13 кычырыгар.) «Мен сениҥ Кудайыҥ» деп айтканыла Иегова нени айдарга сананган? Иегова олорго: «Слер меге бажырар учурлу» — деп айдарга сананбаган. Израиль албаты оны тегин де билер болгон. Је бу сӧстӧрлӧ болзо, Иегова: «Мен јаантайын слердиҥ јаныгарда, мен слерге јаантайын болужарым» — деп айдарга сананган (Сар. 118:6).

14. Иегова олјодогы еврейлерди токунадарга база нени эткен?

¹⁴ Иегова олјодогы еврейлерге база канайып болушкан? Олорго Иегова бойыныҥ ийде-кӱчин, ойгорын эске алындырган. Темдектезе, олорды јылдыстарлу теҥерини кӧрзин деп кӱӱнзеткен. Јылдыстарды јӱк ле јайап койгонын эмес, је олордыҥ кажызын ла ады-јолыла адап турганын айткан (Иса. 40:25—28). Иегова кажы ла ишчизиниҥ адын билер. Ол јылдыстарды јайап турарда, бойыныҥ албатызына болужарга канайып кӱчи јетпейтен? Айдарда, еврейлерде коркыйтан, санааркайтан шылтактар бир де болбогон.

15. Иегова олјодогы еврейлерди озодоҥ канайып белетеген?

¹⁵ Анайда ок олјоноҥ јайымдалатан ӧй јууктап келетсе, нени эдер керек деп, Иегова бойыныҥ ишчилерине озодоҥ айдып салган. Исайя 26:20-де Кудай мынайып айткан: «Мениҥ албатым, тӧриндеги кыптарыҥа кирип, эжиктерди бӧктӧп ал. Мениҥ чугулым ӧтпӧгӧнчӧ, бир эмеш ӧйгӧ јажынып ал». Кир деп каан Вавилонды јуулаарга кирип келерде, еврей албаты Иегованыҥ айтканы аайынча јажынып алган болор. Јилбилӱ немези дезе Ксенофо́нт деп јебрен грек тӱӱкичиниҥ айтканыла болзо, Кир бойыныҥ јуучылдарына «тышкары јӱрген кажы ла кижини ӧлтӱрип салзын» деп јакарып салган. Мынаҥ улам бӱдӱн каланыҥ ичинде коркышту јаан шакпырт башталган! Је еврейлер Иегованыҥ сӧзин укканынаҥ улам амыр јерде тирӱ арткан.

16. Биске нениҥ учун келер ӧйгӧ ӧйинеҥ ӧткӱре санааркабас керек? (Јурукты база кӧрӱгер.)

¹⁶ Бис неге ӱренедис? Удабас улу тӱбек башталар — кижиликтиҥ тӱӱкизинде мындый кӱч ӧйлӧр качан да болбогон. Ол ӧйдӧ улус тыҥ чаксыраар. Је Иегованыҥ ишчилери шакпырабас. «Јайымыгар јууктап келеткен» деген сӧстӧрди бис билерис, оныҥ учун коркыбай јадыс (Лука 21:28). Бистиҥ Кудайыс — Иегова! Керек дезе албатылардыҥ коалициязы да биске табарза, бис Иеговага иженерис. Ол бисти ангелдер ажыра корулаар ла башкартулар берер. Бу башкартуларды канайып аларыс? Бу сурак эм тургуза јарт эмес, је байла, јуундар ажыра алар болбойыс. «Тӧриндеги кыптар» дегени, байла, јуундарды темдектеп турган болор. Анда бис коруда болорыс. Ол ӧйгӧ бис канайып белетенип аларыс? Ака-эјелерисле кожо јуук колбуларлу болзоос, анайда ок организациязыныҥ берген башкартуларын тузаланып турзаас, бу организацияла Иегова башкарып турган деп алаҥзыбай турзаас (Евр. 10:24, 25; 13:17).

17. Иегованаҥ токунаду аларга нени эдер керек?

¹⁷ Вавилонныҥ олјозында болгон еврейлердиҥ јӱрӱми јеҥил эмес болордо, Иегова олорды токунадып салган. Бис база Кудайыстыҥ болужына иженер аргалу. Оныҥ учун кандый да кӱчтер болотон болзо, токунадуны Иегованаҥ бедирегер. Иегованыҥ сӱӱжин ле јалакайын бир де ундыбагар. Ижемјигер бек болзын. Анайда ок недеҥ де коркыбагар, нениҥ учун дезе слердиҥ Кудайаар — Иегова.