Nen rwo ni rwom ma pire tek

1. Wacikara niwinjara nenedi pi rwom ma Yehova umiyo iwa mi rwo i bang’e?

WATIE ku foyofoc lee kum Jacwic mi polo ku ng’om umiyo iwa rwom ma warwo ko i bang’e. Kepar: Wacopo koro lembe mir adundewa ni Yehova i saa moko ci man i dhok de moko ci, m’umbe nilar cike nia wabiweco i bang’e. Waromo rwo i bang’e nang’ wan’i odyath kunoke i otkol, ma nwang’u cwinywa tek nia Wegwa ma jamer biwinjowa. Watie ku foyofoc lee pi giramiya maeno.

2. Ubimo Daudi unyutho nenedi nia eneno rwo ni gin ma pire teki?

² Ubimo Daudi ugam uneno rwo ni gin ma pire tek. Ewero ni Yehova kumae: “Wek rwo para idh i weng’i calu udok ma ng’wice ng’ar.” (Zab. 141:1, 2) I rundi pa Daudi, udok ma ng’wice ng’ar ma julam gibed githiero ni lam, ubino gin ma juyiko ku mukuni ma lee. (Ai 30:34, 35) Daudi umito epar i lembe m’eciyero ni Yehova cuu, tap calu ma jubed juyiko udok ma ng’wice ng’ar de ku mukuni. Eno tie bende gin ma wabemito. Wabemito rwo mwa ufoy i Yehova.

3. Wacikara nibedo ku pidoic ma nenedi kinde ma waberwo i bang’ Yehova, man ke pirang’o?

³ Ka waberwo i bang’ Yehova, wacikara ngo nirwo i bang’e calu ve wabeweco i bang’ adiyo mwa. Ento ukwayu wanyuth woro ma thuth ire kinde ma waberwo. Par pi ginmawokiwang’ ma taluijo ma Isaya, Ezekiel, Daniel, man Yohana gineno. Ginmawokiwang’ ma ginenone ubed ukoc, re lembe moko nuti m’urombo i kindgi. Gin ceke gikoro nia Yehova utie Ubimo ma dwong’ ma wang’uijo. Jabila Isaya ‘uneno [Yehova] ujany wi komker, malu malu man m’utingre.’ (Isa. 6:1-3) Ezekiel ke uneno Yehova ubedo iwi magali, man der udhoke “calu danyu.” (Ezek. 1:26-28) Daniel lundo uneno “Ng’atu m’uti mi ceng’” ma kendi pare tar calu pei man lebmac m’uliel ubeai kud i komker pare. (Dan. 7:9, 10) Yohana ke uneno Yehova ubedo iwi komker ma piny moko ma ve kidi ma emerod udhoke calu danyu. (Nyu. 4:2-4) Ka waparu pi dwong’ pa Yehova ma kaporne mbe, wiwa poy pi rwom ma dit ma watie ko mi coro ceng’ini kude ni kadhu kud i rwo, man nia pire tie tek nirwo i bang’e ku woro. Dong’ wacopo rwo pi lembang’o?

“DONG’ UKWAYU WURWO KUMAE”

4. Lembe ma kwong’a ma Yesu yero i rwo mi lapor ma nwang’ere i Matayo 6:9, 10, ubeponjowa ku lembang’o?

⁴ Som Matayo 6:9, 10. Kinde ma Yesu ubino ponjo iwi got, eponjo julub pare ku kite mi rwo i ayi ma foyo i Mungu. I ng’ey m’eyero nia “dong’ ukwayu wurwo kumae,” lembe ma kwong’a ma pigi tek m’ekwanu ubino lembe m’utie ku winjiri ku lembakeca pa Yehova: Nyinge bed leng’, Ker pare ubin kara unyoth judegi pa Mungu ceke; man mugisa ma Mungu bikelo iwi ng’om ni kodhi dhanu ceke i nindo m’ubino. Ka waberoyo lembe maeno i rwo mwa, wanyutho nia yeny pa Mungu tie gin ma pire tek i kwo mwa.

5. Nyo ka waberwo pi yeny mwa giwa de Yehova winjowa?

⁵ I ng’ey lembe m’umulo kum lembakeca pa Mungu, Yesu udok unyutho nia pire tie tek nirwo pi yeny mwa giwa. Wacopo kwayu Yehova umii iwa cam ma kubang’ ceng’, ewek dubo mwa, egwokwa kud wapodh i abidhe, man ebodhwa kud i cing’ ng’atu ma rac. (Mat. 6:11-13) Ka wabekwayu Yehova pi lembe maeno, eno nyutho nia wajengara i wiye man wamito wanyay anyong’a i iye.

6. Nyo wacopo rwo kende kende pi lembe ma juweco pigi irwo mi lapori? Kekor.

⁶ Yesu ukwayu ngo julubne nia giyer tap tap wec m’eyero i rwo mi lapor. I saa mange m’ebino rwo, eweco pi peko ma tung’ tung’ m’ubino mulo kume saa maeca. (Mat. 26:39, 42; Yoh. 17:1-26) Calu en, wan de wacopo rwo i kum lembe moko ci m’ubedieng’o cwinywa. Ka wabemaku yub moko, waromo kwayu Mungu umii iwa rieko man ng’eyong’ec. (Zab. 119:33, 34) Tek wacicaku tic moko i dilo pa Mungu ma wanwang’u nia timo tie tek iwa, wacopo kwayu Mungu ukonywa wanyang’ i ayi ma watim ko tije. (Rie. 2:6) Junyodo romo rwo pir awiya migi, awiya de romo rwo pi junyodo migi, man wan ceke wacikara nirwo pi juponj Biblia mwa man pi ju ma waberweyo igi lembanyong’a. Re rwo mwa ucikere ngo nijik i kwayukwac kende.

7. Pirang’o wacikara nipaku Yehova i rwo mwa?

⁷ Mito ngo wawil nipaku Yehova i rwo mwa. Ng’atu moko mbe m’uromo ku pak ma sagu Mungu mwa. kum ‘eber man ebedo ayika mi weko dubo.’ Etie bende ‘Mungu mi kisa man mi bero, ebedo yo ni ng’eicwiny, man edit i mer mi bero ku lemandha.’ (Zab. 86:5, 15) Watie ku thelembe ma cuu mi paku Yehova pi kite pare, man pi gin m’ebetimo.

8. Wacopo foyo Yehova pi lembe moko ma kanigi? (Zaburi 104:12-15, 24)

⁸ M’umedo paku Yehova i rwo mwa, wafoye bende pi gin ma wang’uijo m’ebemiyo iwa. Ku lapor, wacopo foye pi rangi ma tung’ tung’ mi thiwe ma wabeneno, pi kit cam ma mit ma wendgi kwanere ngo, man pi jurimo ma beco ma watie ko. Wegwa ma jamer umiyo iwa piny maeno ceke, man mange de dupa kara wabed kud anyong’a. (Som Zaburi 104:12-15, 24.) M’usagu zoo, wabedwoko foyofoc ire pi cam mi tipo m’ebemiyo iwa man pi genogen ma wang’uijo ma watie ko pi nindo m’ubino.

9. Lembang’o ma copo konyowa kara kud wawil nidwoko foyofoc ni Yehova? (1 Juthesaloniki 5:17, 18)

⁹ Wacopo wil yot yot nidwoko foyofoc ni Yehova pi lembe ceke m’ebetimo iwa. Ang’o ma copo konyi kara wii kud uwil? Icopo rieyo lembe m’ikwayu pigi, man nineno kite ma Yehova udwoko ko wang’gi i ng’eye. Man i ng’eye dwok foyofoc ire i rwo pi kony pare. (Som 1 Juthesaloniki 5:17, 18.) Kepar pi lembe ma e: Ka jumange ubefoyowa, wawinjara ma ber man wanwang’u nia jumaruwa. Kumeno bende, anyong’a nego Yehova ka wabedwoko foyofoc ire pi wang’ rwo mwa m’edwoko. (Kol. 3:15) Nyo thelembe mange de nuti ma pire tek ma wacopo foyo ko Mungu mwa?

FOY YEHOVA PI WODE

10. Nimakere ku 1 Pethro 2:21, pirang’o wacikara nifoyo Yehova pi Wode m’eoro iwi ng’omi?

¹⁰ Som 1 Pethro 2:21. Wacikara nifoyo Yehova pi Wode m’emaru m’eoro ubin uponjwa. Ponjo lembe iwi Yesu ketho wang’eyo lembe lee iwi Yehova, man ayi ma wacopo nyayu ko anyong’a i iye. Tek wabenyutho yiyoyic i lam pa Kristu, wabedo ku winjiri ma ceng’ini ku Yehova Mungu, man wakwo ku kwiyocwiny kude.​—Rum. 5:1.

11. Pirang’o wabed warwo i nying’ Yesu?

¹¹ Wafoyo Yehova i rwo nikadhu kud i bang’ Wode. Yesu re m’utie yo ma Yehova ubetiyo ko pi nidwoko wang’ kwac mwa. Yehova winjo man edwoko wang’ rwo ma jukwaye ko i nying’ Yesu. Yesu uwacu kumae: “Gin moko ci ma tek wukwayu ku nyinga, abitimo gin maeno kara Wego unwang’ dwong’ ni kum Wod.”​—Yoh. 14:13, 14.

12. Wafoyo Yehova pi Wode pi thelembe mange ma kani?

¹² Yehova weko kier mwa i ukungu mi lam mi jamgony ma Yesu uthiero. Lembagora ukoro pi Yesu nia etie ‘jalam [mwa] ma dit . . . m’ubedo yor i cing’ mir acwic mi komker pa Mungu ma dit i polo.’ (Ebr. 8:1) Yesu tie “jakony [mwa] ma n’i karacelo ku Wego.” (1 Yoh. 2:1) Wabedwoko foyofoc lee ni Yehova pi jalam ma dit m’ubenyang’ i kum ng’ico mwa, man ‘m’ubekwayu piwa’! (Rum. 8:34; Ebr. 4:15) Ka nang’ Yesu uthiero ngo lam, e nwang’u nicoro i vut Yehova nikadhu kud i rwo de copere ngo iwa, pilembe watie ku kum mi dubo. Calu m’ing’eyo, foyofoc ma wadwoko ni Yehova copo tundo ngo i kadhiri mi giramiya ma pire tek m’emiyo iwa, niwacu Wode m’emaru!

RWO PIR UMEGO KU NYIMEGO PERI

13. Yesu unyutho nenedi nia emaru julubne i uthieno mi wang’ tho pare?

¹³ Yesu urwo pi saa ma lee pi julubne i uthieno m’i wang’ tho pare, ekwayu nia Won ‘ugwokgi ni ng’atu ma rac.’ (Yoh. 17:15) Eno ubenyutho nia Yesu umarugi lee! Kadok eng’eyo nia i ng’eye nyanok ebisendere lee de, re ebino dieng’ asu pi julub pare.

14. Wacopo nyutho nenedi nia wamaru umego ku nyimego mwa?

¹⁴ Pi nilubo lapor pa Yesu, mito ngo waketh wiwa kwa i kum yeny mwa giwa. Ento ukwayu wabed warwo thiri thiri pir umego ku nyimego mwa. Ka wabetimo kumeno, nwang’u wabeworo lembe ma Yesu ung’olo nia wamarara i kindwa man nwang’u wanyutho ni Yehova nia wamaru juyic wadwa. (Yoh. 13:34) Nirwo pir umego ku nyimego mwa utie ngo bayu saa. Lembe pa Mungu uyero nia “kwayukwac pa won bedopwe utie ku tego lee.”​—Yak. 5:16.

15. Pirang’o mito wabed warwo pi juyic wadwa?

¹⁵ Mito warwo pi juyic wadwa, pilembe gibenwang’iri ku peko dupa. Wacopo kwayu Yehova ukonygi gicir remokum, gicir peko ma wok rek, gicir lwiny, gicir ragedo, kunoke peko mange ma ginwang’iri ko. Waromo rwo bende pir umego ku nyimego mwa ma gimiyiri pi nikonyo ju ma gitie i peko maenogi. Saa moko nyo ing’eyo jugine moko m’ubenwang’iri ku kit peko maeno. Nyo ecibedo ber ungo nia ikwan nying’gi i rwo peri ma segi? Wanyutho mer mandha mir umego nwang’u wabekwayu Yehova ukonygi gicir peko migi.

16. Pirang’o ukwayu warwo pi ju ma gibetelo wiwa?

¹⁶ Ju ma gibetelo wiwa i cokiri de gifoyo lee ka waberwo pigi man rwone konyogi. Jakwenda Paulo unwang’u nia eno tie lemandha. Ekiewo kumae: “Wurwo bende pira kara wec umiyere ira kinde m’abeyabu dhoga, wek kara atuc niweco ku tegocwiny pi niketho jung’ey pi lembamung’a ma leng’ mi lembanyong’a.” (Efe. 6:19) Tin de watie kud umego dupa ma gibetimo tic ma tek pi nitelo wiwa. Wanyutho nia wamarugi nwang’u wabekwayu Yehova ukonygi i tic migi.

KA JUKWAYUWA NIA WARWO I WANG’ DHANU

17-18. Jucopo kwayuwa nia warwo i saa ma kani, man mito ngo wawil i kum lembang’o ke?

¹⁷ Saa moko, jucopo kwayuwa nia warwo pi jumange. Ku lapor, nyamego moko m’ubetelo wi ponji mi Biblia copo kwayu nyamego ma gicidho kude nia erwo. Nyamego ma gicidho kudene saa moko nwang’u eng’eyo ngo japonj Bibliane cuu, pieno ecopo maru nidaru ku rwo ma tokcen. I ayi maeno re m’eromo ng’eyo cuu gin m’umito eyer i rwo pare pi japonj Biblia.

¹⁸ Jucopo kwayu umego moko nia urwo i wang’ dhanu pi tic mi lembanyong’a kunoke i coko. Umego m’unwang’u rwom maeno ucikere ngo niwil pi lembakeca mi cokone. Jucikiri ngo nitiyo ku rwo pi nimiyo juk kunoke atwong’a ni cokiri. Pi coko ma pol ma jutimo i cokiri, dakika ma juketho pi rwo man wer utie abic kende, pieno, mito ngo umego ma jukwayu nia urwo uyer ‘wec lee,’ asagane i rwo mi caku coko.​—Mat. 6:7.

KETH RWO I KABEDO MA KWONG’A I KWO PERI

19. Ang’o ma bikonyowa kara wabed ayika pi nindo mi pokolembe pa Yehova?

¹⁹ Mito waketh rwo ubed i kabedo ma kwong’a i kwo mwa, pilembe ceng’ mi pokolembe pa Yehova ni ceng’ini. Pi lembuno, Yesu uwacu kumae: “Dong’ wubed ma wubekiyo man ma wubetimo kwayukwac saa ceke, kara wutund niboth kud i gin maeni ceke ma bitimere.” (Luka 21:36) Andha, rwo ma thiri thiri bikonyowa nibedo nger i thenge mi tipo, kara nindo mi pokolembe pa Mungu kud urubwa rek.

20. Rwo mwa copo bedo ve lam mir udok ma ng’wice ng’ar nenedi?

²⁰ Waweco iwi lembang’ogi? Waweco akeca iwi rwom mwa mi rwo. Gin ma pire tek akeca ma wacikara nirwo pire, utie lembe m’utie ku winjiri ku lembakeca pa Yehova. Bende, mito wadwok foyofoc pi Wod Mungu man pi Ker pare, man warwo pi juyic wadwa. Man wacopo rwo bende pi yeny mwa mi kum ku mi tipo. Ka wabeparu cuu pi gin ma wabeciyero i rwo mwa, eca nyutho nia waneno rwone ni rwom ma dit. Wec mwa bibedo ve lam mir udok ma ng’wice ngar ni Yehova, niwacu ma “nyayu mutoro i ie.”​—Rie. 15:8.