4. የተፈጠርነው በመከራ የተሞላ ሕይወት እንድንኖር ነው?

ይህን ማወቅ ለምን አስፈለገ?

የዚህ ጥያቄ መልስ ለሕይወት ባለን አመለካከት ላይ ለውጥ ያመጣል።

ሊታሰብባቸው የሚገቡ ነጥቦች

ዓለማችንን ውብ አድርጎ የፈጠረው አምላክ በመከራ የተሞላ ሕይወት እንድንመራ ይፈልጋል ብሎ ማሰብ ምክንያታዊ ነው?

ሃይማኖተኛ ያልሆኑ ሰዎች በዓለም ላይ ያለውን መከራ ሲያዩ በአምላክ ባሕርይ ላይ ጥያቄ ያነሳሉ፤ አልፎ ተርፎም እሱ መኖሩን ይጠራጠራሉ። በእነዚህ ሰዎች አመለካከት መሠረት መከራ የሚደርስብን (1) አምላክ መከራን ለማስቆም ኃይል ስለሌለው፣ (2) አምላክ መከራን ማስቆም ስለማይፈልግ ወይም (3) አምላክ ስለሌለ ነው።

ሆኖም ያሉት አማራጮች እነዚህ ብቻ ናቸው?

መጽሐፍ ቅዱስ ምን ይላል?

አምላክ የፈጠረን በመከራ የተሞላ ሕይወት እንድንኖር አይደለም።

አምላክ ደስተኛ ሆነን እንድንኖር ይፈልጋል።

“ለሰው በሕይወት ዘመኑ ከመደሰትና መልካም ከማድረግ የተሻለ ነገር የለም . . . ደግሞም ለሰው ከመብላትና ከመጠጣት እንዲሁም ተግቶ በሚሠራው ሥራ ሁሉ ደስታ ከማግኘት የተሻለ ነገር የለም። ይህ የአምላክ ስጦታ ነው።”—መክብብ 3:12, 13

አምላክ አዳምንና ሔዋንን የፈጠራቸው ደስተኛ ሆነው እንዲኖሩ ነበር።

የአምላክ ዓላማ እነሱም ሆኑ ዘሮቻቸው መከራ እንዲደርስባቸው አልነበረም።

“አምላክ ባረካቸው፤ እንዲህም አላቸው፦ ‘ብዙ ተባዙ፤ ምድርንም ሙሏት፤ ግዟትም።’”—ዘፍጥረት 1:28

አዳምና ሔዋን አምላክን ላለመታዘዝ መረጡ።

በመሆኑም በራሳቸውም ሆነ በዘሮቻቸው ላይ ብዙ መከራ አመጡ።

“በአንድ ሰው አማካኝነት ኃጢአት ወደ ዓለም ገባ፤ በኃጢአትም ምክንያት ሞት መጣ፤ ሁሉም ኃጢአት ስለሠሩም ሞት ለሰው ሁሉ ተዳረሰ።”—ሮም 5:12a

አምላክ ለሰው ልጆች ከእሱ አገዛዝ ውጭ ሆነው ራሳቸውን የመምራት ችሎታ አልሰጣቸውም።

ውኃ ውስጥ መኖር እንድንችል ተደርገን እንዳልተፈጠርን ሁሉ ራሳችንን መምራት እንድንችል ተደርገንም አልተፈጠርንም።

“[ሰው] አካሄዱን እንኳ በራሱ አቃንቶ መምራት አይችልም።”—ኤርምያስ 10:23

አምላክ መከራ እንዲደርስብን አይፈልግም።

አምላክ መከራ ከሚያስከትሉብን ነገሮች በተቻለ መጠን እንድንርቅ ይፈልጋል።

“ትእዛዛቴን ብትሰማ ምንኛ መልካም ነው! እንዲህ ብታደርግ ሰላምህ እንደ ወንዝ . . . ይሆናል።”—ኢሳይያስ 48:18