ሰው ሲሞት ምን ይሆናል?

ሞት የሕይወት ተቃራኒ ነው። ሞት ከከባድ እንቅልፍ ጋር ይመሳሰላል። (ዮሐንስ 11:11-14) ሙታን መስማት፣ ማየት፣ መናገር ወይም ምንም ነገር ማሰብ አይችሉም። (መክብብ 9:5, 10) የሐሰት ሃይማኖት ሙታን ከቀድሞ አባቶቻቸው ጋር ለመኖር ወደ መንፈሳዊ ዓለም ይሄዳሉ በማለት ያስተምራል። መጽሐፍ ቅዱስ ግን እንዲህ ብሎ አያስተምርም።

የሞቱ ሰዎች ሊረዱንም ሆነ ሊጎዱን አይችሉም። አንዳንዶች የሞቱ ሰዎችን ያስደስታቸዋል ብለው በማሰብ አምልኮታዊ ድርጊቶችንና መሥዋዕቶችን ያቀርባሉ። ይህ ድርጊት ሰይጣን ከተናገራቸው ውሸቶች መካከል በአንዱ ላይ የተመሠረተ በመሆኑ አምላክን አያስደስትም። ሙታን በድን በመሆናቸው የሞቱትንም አያስደስትም። ሙታንን መፍራትም ሆነ ማምለክ አይኖርብንም። ማምለክ ያለብን አምላክን ብቻ ነው።—ማቴዎስ 4:10

ሙታን ዳግመኛ በሕይወት ይኖራሉ። ይሖዋ በገነቲቱ ምድር ውስጥ በሕይወት እንዲኖር ሙታንን ያስነሳቸዋል። ይህ የሚሆነው ወደፊት ነው። (ዮሐንስ 5:28, 29፤ ሥራ 24:15) አንድን የተኛ ሰው ከእንቅልፉ ቀስቅሰህ ማስነሳት እንደምትችል ሁሉ አምላክም የሞቱ ሰዎችን ሊያስነሳ ይችላል።—ማርቆስ 5:22, 23, 41, 42

አንሞትም የሚለው ሐሳብ ሰይጣን ዲያብሎስ የሚያስፋፋው ውሸት ነው። ሰይጣንና አጋንንቱ የሙታን መናፍስት ሕያው ሆነው ይቀጥላሉ፤ ህመምንና ሌሎች ችግሮችንም ያስከትላሉ ብለው ሰዎች እንዲያስቡ ያደርጋሉ። ሰይጣን አልፎ አልፎ በሕልምና በራእይ ሰዎችን ያታልላል። ይሖዋ ከሙታን ጋር ለመነጋገር የሚሞክሩ ሰዎችን ያወግዛል።—ዘዳግም 18:10-12