በአገልግሎት ረገድ ክህሎታችንን ማዳበር—ከሰዎች ጋር ውይይት በመጀመር መደበኛ ባልሆነ መንገድ መመሥከር

አስፈላጊ የሆነው ለምንድን ነው? ከቤት ወደ ቤት ስናገለግል አብዛኛውን ጊዜ ሰዎችን ቤታቸው አናገኛቸውም። ይሁን እንጂ እነዚህን ሰዎች የሕዝብ መጓጓዣ ስንጠቀም፣ የሐኪም ቤት ወረፋ ስንጠብቅ፣ በትምህርት ቤት ወይም በሥራ ቦታ የዕረፍት ሰዓት ላይ በምንሆንበት ጊዜና በሌሎች አጋጣሚዎች ልናገኛቸው እንችላለን። ይሖዋ፣ ሁሉም ሰው የመንግሥቱን መልእክት እንዲሰማ ይፈልጋል። (1 ጢሞ. 2:3, 4) ይሁንና በእነዚህ ወቅቶች ምሥክርነት ለመስጠት ከፈለግን እኛ ቅድሚያውን በመውሰድ ውይይት መጀመር ይኖርብናል።

ይህን ማድረግ የሚቻለው እንዴት ነው?

መራጮች ሁኑ። ግለሰቡ ተግባቢ ይመስላል? ጨዋታ ለመጀመር ፈቃደኛ ይሆናል? ሁኔታዎቹ ዘና ብሎ ለመጨዋወት ያመቻሉ? አንዳንድ አስፋፊዎች አንድን ሰው ከማናገራቸው በፊት ከግለሰቡ ጋር ዓይን ለዓይን በመተያየት ፈገግ ይላሉ። ግለሰቡም መልሶ ፈገግ ካለ ውይይት ለመጀመር ይሞክራሉ።
ውይይት መጀመር ካስፈራችሁ ይሖዋ ድፍረት እንዲሰጣችሁ በልባችሁ አጭር ጸሎት አቅርቡ።—ነህ. 2:4፤ ሥራ 4:29
አጭር ሐሳብ በመናገር ምናልባትም ሰላምታ በመስጠት መጀመር ትችላላችሁ። ኢየሱስ ከሳምራዊቷ ሴት ጋር በተነጋገረበት ወቅት ውይይቱን የጀመረው ስለ መንግሥቱ በመናገር አልነበረም። (ዮሐ. 4:7) አንዳንድ ጊዜ ለግለሰቡ አድናቆታችሁን በመግለጽ ውይይት መጀመር ይቻላል፤ ለምሳሌ፣ “ልጆችሽ በጣም ጨዋ ናቸው!” ማለት ይቻላል። ጥያቄ መጠየቅም ቢሆን ውይይት ለመጀመር ያስችላል፤ ለምሳሌ፣ “ትናንት ዜና ላይ ስለዚህ ጉዳይ የቀረበውን ዘገባ ሰምተሃል?” ማለት ትችላላችሁ።
ጨዋታ ከጀመራችሁ በኋላ ምሥራቹን ለመንገር የሚያስችላችሁን አጋጣሚ ፈልጉ፤ ሆኖም ይህን ለማድረግ አትጣደፉ። ምሥራቹን መቼ መንገር እንዳለባችሁ ለመወሰን ጭውውቱ በራሱ እንዲመራችሁ አድርጉ። ምናልባት በጭውውቱ መሃል ግለሰቡ የማወቅ ፍላጎቱ እንዲቀሰቀስና በራሱ ጥያቄ እንዲያቀርብላችሁ የሚያደርግ ትኩረት የሚስብ ሐሳብ መናገር ትችሉ ይሆናል። ለምሳሌ ያህል ስለ ቤተሰብ ጉዳይ እያወራችሁ ከነበረ “ይገርምሃል፣ ልጆችን ጥሩ አድርጎ ለማሳደግ የሚረዳ አስተማማኝ ምክር አግኝቻለሁ” ማለት ትችላላችሁ። ወይም ደግሞ ዜና ላይ ስለሰማችሁት ነገር እየተጨዋወታችሁ ከሆነ “የሚገርመው፣ በቅርቡ አንድ ጥሩ ዜና አንብቤ ነበር” ማለት ይቻላል። ምሥክርነት ከመስጠታችሁ በፊት ውይይቱ ቢቋረጥ ተስፋ መቁረጥ አይኖርባችሁም።
ፍላጎት ላሳየ ሰው ልትሰጡት የምትችሉትን ትራክቶች ወይም ሌሎች ጽሑፎች ያዙ።

በዚህ ወር እንዲህ ለማድረግ ሞክሩ፦

መደበኛ ባልሆነ መንገድ ምሥክርነት የመስጠት ግብ በመያዝ በየሳምንቱ ቢያንስ ከአንድ ሰው ጋር ውይይት ለመጀመር ጥረት አድርጉ።