Saka 3 Folad

Caka olah kita kaˈintelen ato micada to sapalak. Nikawrira, kaˈintelen no tamdaw kita, hano kamayanho a lipahak hani? Toloay ko lalangian. Saka cecay, padotoc a mihadidi kita ngaˈay milifok to pihayda ni Yihofa. (1 Pitiro 4:​13, 14) Saka tosa, ano mapalifet ko pakasoˈlinay falocoˈ ita mamatongal ko tanoktok. (1 Pitiro 1:7) Saka tolo, wa milifok kita to kalimlaan a sapalifon, o midaocay a ˈorip. (Loma 2:​6, 7) Patikol maˈorip ci Yis caka halafin, matinakoayto no tarokos ko hatiniay misowalan ni Yis a lipahak. Roma tamdaw misetiˈ cangranan, miconged cangranan mitosil, kawra tada lipahakay cangra. Misamanay? ‘Matatodongay a mapakangodo tona mitoor ci Yisan a lipahak ko falocoˈ’ nangra. (Dmak 5:​40-​42) O olah nangra ci Yisan mataˈlifay ko kaciˈangi to ˈada, soˈlin kaˈintelen no tamdaw, kamayan padadotoc milasil to ngaˈayay lihaf. Anini, ˈalomanay salikaka padotocay madimdi midoko ci Yihofaan i pasangaray a pakayraan. Mafanaˈay cangra, cowa ko mamapawan ci Yihofa to midemakan nangra, ato pakayniay i ngangan Ningra paihkalan a olah nangra. w21.03 25 fiedac 18-​19 fatac

O manilnilay no fangcalay saocor a Krisciyang coka hofochan makalimay to tayra i kakarayan maˈorip. Oniya tokel o sapafeli no Kawas cangraanan. Wa micerid cangra miharateng to tokel noniyah, pakayni toniya tokel a mitolon, makalim milifok to sapalifon i kakarayan. Kawra wa samaan ko tireng nangra noikor, awaay ko pakayraan nangra miharateng. (Filipi 3:​20, 21; 1 Yohani 3:2) Soˈlin mahaen, mihamhamayho to saaroˈan no niyah a matayal itini kakarayan no Hongti Kitakit. Misalimlaay ko roma lopayˈay siri to tokel no niyah tahadaˈoc maˈorip i fafekang no sera, hakelong no ˈorip no tamdaw iraayto ko hatiniay a kalim. Mihamhamay cangra pala lakoing to polong no cikiw, mihamhamayho patireng to lomaˈ, mawmah to omah, palahad to wawa, tanektek ko tireng lipahak a lomahad ko wawa. (Isaya 65:21-​23) Mihamhamay cangra sapihapinangaw toni serayan, minengnengto ˈakawangay a lotok, malohlohay a colin ato kakahaday a riyar, micekiw to misangaˈan ni Yihofa a maamaan. Sakakaay i, makalimay cangra sapitongalaw to kafanaˈ ci Yihofaan, matongal ko piingid Cingraanan. w21.01 18-​19 fiedac 17-​18 fatac

Maharek ko sofitay no Papilon palaˈafo to kihcod i, sanay ko sowal no pakaˈaraway tamdaw: ‘O awaay ko tamdaw a kohkoh konini, hanaca pafelianto i kamay no Papilon a tamdaw.’ (Yirimiya 32:43) Ikor no mitilid ci Yoil to sapairasol ikor no 200 miheca, pakaynian ni Yihofa ci Yirimiyaan paˈayaw to roma milingatay a demak. Sowal ni Yihofa wa misongilaˈ ko sofitay no Papilon a mikilim to tatiihay ko demak a Israil tamdaw, miemin a mirepet cangraanan. Sanay ko sinael: “Milasilay ci Yihofa: ‘Wa tahidangen Ako ko mifotingay, malecad cangra o misalilay to foting, misalil to Israil tamdaw. Wa mitahidangho Kako to miˈadopay, malecad cangra o miˈadopay, mikitini lotolotokan ato kasadihidihif no ˈongcoy a miˈadop to Israil tamdaw. Tatooren Ako ko raraw nangra, mitefoc cangraanan.’” (Yirimiya 16:16, 18) Sakoniya sowal, cowa kakahi psasiyor a Israil tamdaw ano itinito i kemod no lotok anca i riyar, caay ko papakalaliw to pilepet no sofitay no Papilon! w20.04 5 fiedac 12-​13 fatac

Itini kalimlaan a tatokian, cowa ka tangsol ci Loto mitengil to sakayat. Miharateng kita cowa ka i falocoˈen ni Loto ko limoˈot ni Yihofa, anca cowa pidofdof cingra to Kawas saan. Kawra cowa ka sawaden ni Yihofa ci Loto, sanay ko Fangcalay Cudad ‘siniˈadaay ci Yihofa cingraanan.’ Orato, tengteng hananay no coyoh ci Loto ato paro no lomaˈ ningra, mikayat cangranan masadak i Sotom. (Satapangan 19:15, 16) Hano siniˈada ci Yihofa ci Lotoan hani? Mafanaˈay Cingra minayar ci Loto caka romakat, matalaway to potalay no niyaroˈ a tamdaw alatek. Roma i, o fideloan adihayay ko hefong, na matengilay ni Loto malefongay ko tatosa hongti toniya hefong. (Satapangan 14:​8-​12) Iraay ko fafahi ato wawa ningra, madeng calemcemay to rihaday no paro no lomaˈ. Hanaca, cihafayay ci Loto, makapahay ko lomaˈ ningra i Sotom. (Satapangan 13:​5, 6) Manaokaniw, cowa ko lalangian a eca pidofdof konini, kawra o pinengneng ni Yihofa ci Lotoan kamayan o ‘moecelay a tamdaw,’ cowa ko raraw aca ningra ko minengnengan.​—2 Pitiro 2:​7, 8. w20.04 18 fiedac 13-​14 fatac

Kapah a salikaka, oya minengnengay to kalomahad iso a tamadaw misaaliay to toki, ngaˈ mahapinang to soˈlinay lomahadayto kiso, cowato ko wawa. Kawra wa rihaday ko falocoˈ iso, cowa ko papotal ko minengnengan ni Yihofa, mafanaˈay to masamanay a tamdaw kiso, mafanaˈayho to inaneng iso. (1 Samuil 16:7) Padotocen mitongal ko kalawidang iso ato Kawas. Samanay ko demak ni Tafiti hani? Mahapinangay ningra ko misangaˈan ni Yihofa a maamaan, hanaca misongilaˈ midotim, mansa mahapinang ko makapahay capeling no misangaˈay a Tatapangan. (ˈOlic 8:​3, 4; 139:14; Loma 1:​20) Iraayho ko dademaken iso, cangacangen ci Yihofa pafeli to ˈicel. Tinakoen, malikafay ko cafay iso micudad to Misawacayay Tamdaw ni Yihofa kiso han? Ano mahaenay i, tolonen ci Yihofa, milongoc to sapadama Ningra misiˈayaw toniya demak, saka dademakenho ko sapaini no Fangcalay Cudad, mitepangan cudad ato ika. Ano maˈaraw iso ko pipadama ni Yihofa tisowanan miremo to pasangaray, wa matongal ko pakasoˈlin iso Cingranan. Maˈaraw no tao ko pitadiˈec iso ci Yihofaan wa matongal ko pakasoˈlin tisowanan. w21.03 4 fiedac 7 fatac

Kalalaˈed no ngaˈayay widang mikifalocoˈay a masasowal, malecaday ko kalalaˈed ita ci Yihofaan. Pakaynian ni Yihofa i Fangcalay Cudad pasifanaˈ kitaanan to harateng ato nafalocoˈan Ningra, wa ngaˈay kita pakayni satolon mifanaˈ Cingranan to soˈlinay nafalocoˈan ato harateng no niyah. Cowa ko pitengil aca Ningra, pacaˈofayho to satolon ita, samanen tada maolahay Cingra kitaanan. Latekay kalikiay pacaˈof Cingra, latekay o papadadotoc kita a mitolon. Ano samaanto, wa ngaˈay pakasoˈlin kita, wa itini ci Yihofa i matatodongay a toki, tano sangaˈayay a pakayraan pacaˈof kitaanan. Manaokaniw, o pakayraan no Kawas a pacaˈof cowa ko mamalecad o milongocan ita alatek. Tinakoen, cowa ko tatangsol Cingra misaysay to pasangaray ita, kawra o papafeli to taneng ato ˈicel kitaanan, ho ‘ngaˈay pakahadidi’ kita. (1 Korinto 10:13) Sasamaan kita misalimla to mitolonay a sapatelong hani? Cecay pakayraan i, tooren ko limoˈot no Kawas ‘padadotoc mitolon.’​—1 Tisalonika 5:​17. w20.05 27-​28 fiedac 7-8 fatac

O malasongay a tamdaw wa misinanot to kaˈayaway lalan, hoeca ka mapolin. Ano mapolin cangra i, wa kaliki a lomowad, padadotoc a comikay. Misarocodan nangra i, cowa ko maanan ko pakapolinay cangranan, ao tatahira i patosokan a comikay, pakalowid to misiayay.Itini cacikayen to saka tahadaˈoc no ˈorip, kinapinaay kita a mapolin alatek. Latekay mararaway ko sowal, mararaway ko demak, latekay madokaˈay no salikaka alatek. O mamifekad ko hatiniay a pakayraan, samanen cowa ko malefotay ko tamdaw, hanaca itiniay kita i mimingay lalan no saka tahadaˈoc no ˈorip a comikay, masasongtolay nolatekay. Somowalay ci Pawlo, latekay ‘iraay ko katatiihan’ ita to tao. (Kolosay 3:​13) Kawra, hamaan pakinali ko harateng ita to o maanan ko pakapolinay kitaanan, ao mamisamacay to halifon no ikor. Ano cakafasaw ko keter ita, caka kahi a lomowad, wa awa ko pakayraan tahira patosokan a comikay, milifok to sapalifon, wa micara to roma a misiayay alatek. w20.04 26 fiedac 1 fatac; 28 fiedac 8-9 fatac

Milengoay ci Taniil to cecay taˈangayay samiyay, o kahacecay no samiyay o cowa kalecad a fodawan ko sapisangaˈ, mitaypiyaway to cowa kalecad lintad mifiyoray to finawlan no Kawas a mikowanay. O waˈay no taˈangayay samiyay o marad ato ditaˈ ko sapisangaˈ, mitaypiyaway to salikoray ciˈicelay mikowanay, o Ikok ato Padaka Ciˈicelay Mikowanay to Hekal. Mitadtaday koniya sapairasol, ano palaˈafo ko Hongti Kitakit no Kawas to polong a mikowanay i, oniya Ciˈicelay Mikowanay to Hekal iraayho a materek. Masowalay no tarokos ci Yohani ko pina mifiyoray to finawlan no Kawas a ciˈicelay mikowanay. Itini mapolosi maˈaraway ningra ko pitoay ko fongoh a ˈaˈadopen, oniya pito fongoh mitaypiyaway toniya ciˈicelay mikowanay. O saka pito a fongoh o Ikok ato Padaka Ciˈicelay Mikowanay to Hekal. Kalimlaan konini, samanen oniya ˈaˈadopen cowato ka lomahad ko roma fongoh, sakoniya sowal, tiya mikerid ci Kristo to kakarayan a sofitay palaˈafo to ˈaˈadopen i, kamayan a mikowan ko Ikok ato Padaka.​—Paˈarawan 13:​1, 2; 17:​13, 14. w20.05 14 fiedac 11-​12 fatac

Kantangay koniya sowal, kawra mihadakay to cecay kalimlaan kimad. Cowa ko pipowalan aca no ˈorip ko Kawas, o pipowalan no olah. Tada maolahay ci Yihofa kitaanan, o olah Ningra parihadayay kitaanan, lipahakay marenecay ko falocoˈ. Pakaynien i Krisciyang, paihkal to olah o limoˈot no Kawas kitaanan, ano maolah demaken, o tatooren a midemak. (Matay 22:37-​40) Ikor no mafanaˈ kita ci Yihofaan, sapidofdofaw to saka cecay a limoˈot madoloay alatek, samanen malefotay ci Yihofa, hanaca patadoay kitanan a miharateng, damsayay. Kawra sapidofdofaw to saka tosa limoˈot cowa ko madoloay, misamaanay hani? Samanen ora kaolahan ita a tamdaw, mahawpay ko salikaka, sahtoay cowa ko malefotay. Latekay o sasowalen ato midemakan no salikaka pakasomoday kitaanan. Mafanaˈay ci Yihofa to masiˈayaway ita ko mahaenay a sapalifet, mansa sakadademaken Ningra ko tamaw mitilid ko ihkalay a limoˈot itini Fangcalay Cudad, pasowal kitaanan hano masasiolah ato sasamaan ko hademak ita. Mahawpay ci Yohani.​—1 Yohani 3:​11,12. w21.01 8 fiedac 1-2 fatac

Ano satapang sanayho kita midoko ci Yihofaan, anca halafinayto micada to paputisem, o mamiharateng: “Misacecayay ko falocoˈ ako mikangodo ci Yihofaan, tanektek a miconged to sakayhid ni Satan hokira?” Haratengen hena, ano maˈaraw iso ko mikidatay to mararaway a coos a sasing i tilifi anca i wangcan alatek, wa samaan ko demak iso hani? Wa mikilim kiso to saˈading to niyah a sowal alatek, cowa ko kaacekan a lalakaw konini. Kawra coko o pakayraan ni Satan a mikayhid konini ho ecato pisacecay kita to falocoˈ a mikangodo ci Yihofaan hokira? Oniya sasing malecaday tano cihinangay a marad mipelaˈ to kilang, satapang aca mimingay ko ngalaˈ, kawra ano padotocen a misetiˈ, o mamapelaˈ ko kilang. Malecaday koya mikidatay to saka rarawaw a sasing, satapang aca cowa ka samaan, kawra ano micerid a minengneng, saikor o sakararaw ita, pakararaw ci Yihofaan. Mihaenay, aka a papicomoden i falocoˈ ita ko kihcod tatiihay a demak, oha mamisacecay kita to falocoˈ a mikangodo to fangcalay ngangan no Kawas! w20.06 11-​12 fiedac 14-​15 fatac

O mihawaday mitosil a salikaka misaaliay to pipadadotoc ita a padama cangranan. Malecad o malafelay wawa a sapatinako ni Yis, maedeng tada misemsemay cangra alatek. (Luka 15:17-​24) Itini hekal ni Satan padadotocay a misafirofiro cangra, miraayayto ko kalalaˈed nangra ci Yihofaan alatek. O papadamaen ita cangra miliyaw palahad to pakasoˈlinay falocoˈ ci Yihofaan. Itini moraraway a lopayˈay siri a sapatinako, somowalay ci Yis o pakaenay to siri panokay i masafelaway siri. Soˈlin adihayayto ko mipalakan a toki ato ˈicel no pakaenay a mikilim to siri, kawra mafanaˈay cingra o ˈaˈafalangen ko siri panokay i masafelaway siri, samanen awaayto ko ˈicel no siri a minokay. (Luka 15:​4, 5) Pakayni sapadamaaw to mihawaday mitosil a tamdaw miremo to dangoc nangra, wa adihay ko mihadakan ita a toki ato ˈicel alatek. Kawra pakayni pitiˈer to fangcalay saocor, Fangcalay Cudad ato mitepangan no likakawa no Kawas a cudad, wa ngaˈay mapadama ita cangra miliyaw mala widang no Kawas. Ano mitahidang ko malohemay malitengay tisowanan malacafay to mihawaday mitosil a tamdaw malalengo to Fangcalay Cudad, wa makahi kiso mihaen to demak han? w20.06 28 fiedac 14-​15 fatac

O papaihkal kita maemin to olah, misawacay to o soˈlinay a Krisciyang ko niyah. Kawra kalimlaan ita ko ‘matatodongay a sifanaˈ, masongilaˈ ko kacipinang to demak.’ (Filipi 1:9) Ano eca i, ‘mamadolo a masaˈfit no tamdaw, mafiyor no tatiihay ato misawiay a sasowalen’ kita, tinakoen pakasoˈlin to sowal no misafelitay to kimad a tamdaw. (Ifiso 4:​14) Itini saka 1 hahekalan, ˈalomanay nisawawaan cowato pikotod ci Yisan, kawra cowa ka mafiyor ko tarokos ci Pitiro, pakasoˈlinay cingra ‘iraay ko saka tahadaˈoc no ˈorip a kimad’ ni Yis. (Yohani 6:​67, 68) Soˈlin cowa ka marocek ko kacipinang ni Pitiro to kihcod a sowal ni Yis, kamayanho a madimadi mikotod ci Yisan, samanen pakasoˈlinay cingra to ci Kristo ci Yis. Wa ngaˈay kiso patanektek to pakasoˈlin, malecad ci Pitiroan pakasoˈlin sahtoay o soˈlinay kimad ko Fangcalay Cudad. Mihaen, ano tahalifa to sapalifet ko pakasoˈlinay falocoˈ iso cowa ko mamangiyangi, wa ngaˈay kiso padama to tao palahad to tanektekay a pakasoˈlin.​—2 Yohani 1, 2. w20.07 8 fiedac 2 fatac; 13 fiedac 18 fatac

Pakayni sapadamaaw to tao midoedo to soˈlinay kimad a dademak, o papaihkal kita to siniˈadaay a falocoˈ cangranan. (1 Yohani 3:​10, 11, 16,17) Itini kangaˈayan no pakayraan masasiolah kita, itini pasangaray pakayraan padiheko to falocoˈ nangra. Tinakoen, malahdaway ko salawina no roma salikaka, wa ngaˈay kiso pafeli cingranan to sahinom ato ciepocay a sadama han? O roma salikaka tahapadesay, adihayay ko malahdaway dafong, wa ngaˈay kiso padama cangranan miliyaw patireng to lomaˈ anca kasaˈopoan han? Cowa ko tano sowal aca kita to maolahay to salikaka, wa tano waywayan a paihkal to siniˈadaay a falocoˈ. Ano todongen ita ko sidaˈitay Wama i kakarayan ci Yihofa, wa masasiolahto. (1 Yohani 4:⁠7, 8) O cecay pakayraan ita paihkal to olah i, misodod to tao. Tinakoen, ano midokaˈ ko salikaka kitaanan, ikor miliˈayay, oha sasododen ita cingra, ecato pinaˈeng i falocoˈ toniya demak.​—Kolosay 3:​13. w20.07 24 fiedac 14-​15 fatac

Itiya o kahacecay nangra wa ira ko cecay a padama cangranan, malecad o pipacekiw ita anini to Fangcalay Cudad han? O sasilsilen cangra tayra i kasakopang, hanaca micada to sapahatatanam a pasifanaˈ to midotocay cangranan patikol maˈorip a tamdaw han? Itiyato ngaˈ mafanaˈ kita to caˈof. Kawra ngaˈayay pakasoˈlinen ita i, mahererek ko Pikowan to Comaˈol Miheca, ‘pakayniay ci Yihofaan a sifanaˈ o mamiedef toniya cikiw,’ i lalomaˈ no comaˈol miheca o ˈaˈifowa kita, wa taˈangay ko lipahak! (Isaya 11:9) Itini Pikowan ni Kristo to Comaˈol Miheca, o papadotoc a mifalic ko finawlan ni Yihofa ngaˈ ngaˈay pakahemek ci Yihofaan, mihaenay o ‘papalecaden nangra ko falocoˈ,’ padama to patikolay maˈorip a tamdaw miremo to sakararawaw a harateng, mitoor to saali ni Yihofa a midemak. (1 Pitiro 3:8) Maˈaraw no patikolay maˈorip a tamdaw ko finawlan ni Yihofa ‘padotocay a misaˈicel, ho malidong ko niyah,’ maedeng o mamakalim a kalacafay to misapoeneray ko falocoˈ a tamdaw midoko to Kawas.​—Filipi 2:​12. w20.08 16 fiedac 6-7 fatac

Ano tooren ita ko sapaini ni Pawlo misongilaˈ a miharateng to nano demak no niyah, wa mahapinang to iraay ko inaneng no niyah. Tinakoen, o roma malohemay malitengay soˈlin cowa ka tada mafanaˈ a mikimad, kawra mafanaˈay a mitosil ato pasifanaˈ to tao minanam to Fangcalay Cudad. O roma malohemay malitengay soˈlin cowa ka lecad to roma malohemay malitengay mafanaˈ a milikakawa, kawra tada ciolahay ko falocoˈ, tahalifa ko salikaka to pasangaray maolahay pasowal cingraanan, ngaˈayay cangra mikitini Fangcalay Cudad mihadak to ngaˈayay a sapaini. O roma malohemay malitengay hinalafangay, marariday pakaen to salikaka. (Hipray 13:​2, 16) Ano mahapinang ita iraay ko kangaˈayan ato inaneng no niyah, wa pakayni pipadama to kasakopang a lipahak, cowato ko mamaˈinap to inaneng no tao. Ano o mananto ko sadama ita to kasakopang, oha papadadotoc kita maemin a misaˈicel misalof to inaneng mitosil ato pasifanaˈ, pacakat to inaneng no niyah. w20.08 24 fiedac 16-​18 fatac

Itini 1935 miheca, mikimaday ko salikaka ci Rosofo i pitaykayan, lalangian i “taˈangayay ˈopo tamdaw.” Itini i kimad, mitadtaday ko salikaka ci Rosofo to masowalay i Paˈarawan 7:9 a “taˈangayay ˈopo tamdaw” cima ko mitoroˈan. ˈAyaw nonini, harateng no finawlan no Kawas wa tayra i kakarayan ko taˈangayay ˈopo tamdaw, o midotocay ko saaroˈan, samanen cowa ka tada madimadi cangra sanay. Misaka dademakan no salikaka ci Rosofo ko Sinael mitadtad, cowa ka piliˈen no Kawas ko taˈangayay ˈopo tamdaw tayra i kakarayan. O ‘roma lopayˈay siri’ ni Kristo cangra. Wa milakowit cangra to “taˈangayay padiing,” tahadaˈoc maˈorip i fafekang no sera. (Paˈarawan 7:​14) Sowal ni Yis: ‘Ira ko roma lopayˈay siri ako, caay ko nonini a pasirian a siri. Wa keriden ako cangra. O mamitengil cangra to ngiha ako. Ta malacecay ko kasafelaw no siri, cecayto ko pakaenay.’ (Yohani 10:16) Oniya lopayˈay siri o madimadiay ci Yihofaan, misawacayay Cingranan a tamdaw, iraay ko tokel nangra tahadaˈoc maˈorip i fafekang no sera a Lakoing.​—Matay 25:31-​33, 46. w21.01 14 fiedac 1-2 fatac

Kalimlaan ko piˈimer to niyah, mihaen ngaˈ tahatolas a mihadidi, milahci to mitosilay a tayal. (Matay 28:19, 20) Cowa ka hofochan mafanaˈayto kita a miˈimer to niyah, maolahay to sinowayay a tayal. Mihaenay, misaaliay kita to sapadama ni Yihofa. Pafeliay Cingra kitanan to fangcalay saocor, padama kitaanan tanektek midemak to pasangaray a demak. (Kalatiya 5:​22, 23) O tarokos ci Pawlo o miˈimeray to niyah a tamdaw, kawra mihayiay cingra, latekay o “mamisetiˈ to tireng no niyah” ho ngaˈ midemak to matatodongay a demak. (1 Korinto 9:​25-​27) Pakalalokay cingra to tao palahad to miˈimeray to niyah, “kao masinanotay ko demak namo a maemin.” (1 Korinto 14:40) Papalahad kita to miˈimeray to niyah, ngaˈ padadotoc a mirienang to midokoay ci Yihofaan a demak, mahawpay ko picerid mitosil ato pasifanaˈ to tamdaw mafanaˈ to soˈlinay kimad no Fangcalay Cudad.​—Dmak 2:​46. w20.09 6-7 fiedac 15-​17 fatac

Anini, i cowacowa pala, pasalatay kita a mitosil. Mahaenay ko kitiraan iso a pala han? Ano mahaenay, ngaˈayay miharateng kiso: “Sasamaan kako misaka dademak toniya pasalat hani?” Itini toniya pacekiday to falocoˈ a lintad, o likakawa ni Yihofa i cowacowa pala micowatay to sataˈangayay mitosilay a tayal. Toniya demak, adihayayho ko dademaken ita. Sasamaan kiso misaka dademak to rihadayay a tatokian hani? (2 Timoti 4:2) Wa ngaˈay kiso miharateng alatek, o niyah ato paro no lomaˈ wa ngaˈay mitongal to mitosilay a tayal, anca misatapang a misakafah. Cowa ko sakacihafayaw a tatokian no hatini, samanen cowa ko mamaˈorong ita ko hafay milakowit to taˈangayay padiing. (Taneng 11:4; Matay 6:​31-​33; 1 Yohani 2:​15-​17) Pakayni sapadamaaw to ˈalomanay tamdaw mafanaˈ ci Yihofaan, ˈalomanay mitosilay misatapangay minanam to faelohay a sowal, o likakawa no Kawas misangaˈay to adihayay sasowalen a mitepangan, tahanini, mataˈlifayto ko 1,000 a sasowalen! w20.09 16 fiedac 9-​11 fatac

O sangaˈayay a sofitay kalimlaan ko madimadiay. Wa pakayni cingra sapidipotaw to kaolahan no niyah ato misalimlaan no niyah a dafong a milood. Pakalalokan ni Pawlo ci Timoti palahad to soˈliˈlinay falocoˈ, madimadi a maolah to Kawas. (1 Timoti 4:⁠7) Ano tangongol ko olah ita to Kawas, oha mamisongilaˈ a misimaw to sapatorod Ningra kitaanan. (1 Timoti 4:​8-​10; 6:⁠6) O mamiˈimer to niyah ko sofitay ngaˈ maharek misaday milood. Ngaˈay ci Timoti maharek a misaday micoˈay to saˈodis ni Satan, samanen mitengilan ningra ko limoˈot ni Pawlo miliyas to mararaway a harateng, palahad to kaolahan no Kawas a capeling, micerid micawmaˈ to salikaka. (2 Timoti 2:​22) Sapiremoaw tonini misaaliay to piˈimer to niyah. Malecaday, oha mamiˈimer kita to niyah ngaˈ pakalowid to mararaway harateng. (Loma 7:​21-​25) Roma i, sapadotocaw mifalah to matelangay capeling, hanaca micaˈedong to faelohay capeling, misaaliay kita miˈimer to niyah. (Ifiso 4:​22, 24) Ano ˈifowa kita to cecay romiˈad, malotayen ko tireng, o mamisaˈicel kita mikowad to harateng mirienang to saˈopo.​—Hipray 10:24, 25. w20.09 28 fiedac 9-​11 fatac

Sapadamaaw to pacekiwan patafang to tireng ato micada to paputisem, misaaliay kita to mihadidiay falocoˈ, kawra mamihapinang kita, soˈlinay makalim ko pacekiwan midoko ci Yihofaan hokira. Misaˈicelay ko pacekiwan midofdof to limoˈot ni Yis han? Anca o sapinanamaw aca to sifanaˈ no Fangcalay Cudad han? Ngaˈayay haratengen no singsi ko laenoay salicay, micerid a milomal to kacakat no pacekiwan. Paihkalay ko pacekiwan to olah ci Yihofaan han? Pasayraay cingra ci Yihofaan a mitolon han? (ˈOlic 116:​1, 2) Maolahay cingra miasip to Fangcalay Cudad han? (ˈOlic 119:97) Miceriday cingra mirienang to saˈopo han? (ˈOlic 22:22) Mitooran ningra ko mananamay sifanaˈ no Fangcalay Cudad a mifalic to kaˈorip han? Paladaˈan ningra i widang ko mananamay no niyah a soˈlinay kimad han? (ˈOlic 9:1) Sakakaay i, makalimay cingra malo Misawacayay Tamdaw ni Yihofa han? (ˈOlic 40:8) Itini toniya pina pakayraan ano cowa kacakat ko pacekiwan, kilimen no singsi ko lalangian, ikor damsay mikifalocoˈ a masasowal cingranan. w20.10 18 fiedac 14-​15 fatac

O kakarayan a Wama ato fafekangay no sera a wama wina ni Yis inanengay ko mipiliˈan, kawra lomahadto ci Yis wa oniyah ko mamipiliˈ. (Kalatiya 6:⁠5) Malecaday ci Yis to tao, iraay ko pasalatay harateng, wa ngaˈay cingra mipiliˈ eca pidofdof to araaw no kakarayan Wama a maˈorip. Mafanaˈto ci Yis to saaroˈan no niyah i araaw no Kawas i, mipiliˈay micada to sapafeli no Kawas a ˈinorong. (Yohani 6:38) Mafanaˈay cingra ˈalomanay ko ˈintehay cingranan, maharateng koniya demak madeng karetengay ko saroero ningra, kawra kamayan mipiliˈ cingra midofdof ci Yihofaan. Itini ikor no micada cingra to paputisem i kongyin 29 miheca, midemak to araaw ni Yihofa malo sakakaay i nokaˈorip ningra. (Hipray 10:5-7) Ikor, soˈlin misemsem cingra i pisemseman a hecek, cowa ka ngiyangi ci Yis. —Yohani 19:30. w20.10 29 fiedac 12 fatac; 30 fiedac 15 fatac

Itini kasakopang ita, iraay ko salikaka pakayniay adada, malahdaw ko salawina ato misiˈayaway to pasangaray a matoled ko falocoˈ han? Ano mahapinang ita misaaliay to papakalaloken a tamdaw, ngaˈayay cangacangen ita ci Yihofa padama kitaanan somowal to mihinomay a sowal, anca patado cangranan a dademak. O sowal ita, midemakan a demak, o misaalian no salikaka a sapakalalok alatek. (1 Pitiro 4:​10) Wa ngaˈay timolo kita, samanen mafanaˈay kita to kalacafayay ci Yihofa kitaanan. Pakayniyan Ningra ci Yisan ato coyoh padama kitaanan. Pakayni sapalaˈosiyaw to araaw Ningra, ngaˈayay pakaynien ni Yihofa i cifadangalay tamdaw a padama kitaanan. Roma i, pakayniyan ni Yihofa i fangcalay saocor pakalalok to salikaka a padama kitaanan, adihayay ko mahaenay a nalifetan. Mihaenay, malecad ci Pawloan, ngaˈayay matomes ko pakasoˈlin ita a pasowal: ‘Iraay ci Yihofa padama takowanan, cowa ko mamatalaw kako. Ngaˈay ko tamdaw misamaan takowanan saw?’​—Hipray 13:6. w20.11 17 fiedac 19-​20 fatac

Pakasoˈlinay ko tarokos kalacafayay ci Yihofa cangraanan, samaanen pafeliay ci Yihofa cangranan to ˈicel midemak to kasapaan. (Dmak 5:​12-​16; 6:8) Manaokaniw, coka hecad ko pakayraan ita anini. Kawra pakaynian ni Yihofa i Fangcalay Cudad damsayay a mikiˈok kitaanan, ano pakayni kita i moecelay a demak micada to roray, wa milifok to pihayda Ningra, ato sapafeli Ningra a fangcalay saocor. (1 Pitiro 3:​14; 4:​14) Mihaenay, cowa ko cacalemcem kita ano tahacada to sapalak wa ngaˈay misaysay ko niyah hokira, o haharatengen ita o manan ko hademak nohatini, mitongal to pakasoˈlin no niyah, o papafelien ni Yihofa to ˈicel kita, milidong kitaanan. Mahecad itini saka 1 hahekalan a Krisciyang, pakasoˈlinay to sakiˈok ni Yis, sanay cingra: ‘Pafelien ako kamo to hasowal ato taneng, ano samaanto ko pisafelit no tamdaw i, cowa ko papakalowid tamowanan.’ Mikiˈokayho ci Yis: ‘Ano miemem kamo, wa madipot ko ˈorip.’ (Luka 21:12-​19) Aka mapawan, midokoay ci Yihofaan a tamdaw, ano pakayni noka madimadi Cingraanan malahdaw ko ˈorip, o mamaharateng ni Yihofa ko kihcod nangra, patikol paˈorip cangraanan. w21.01 4 fiedac 12 fatac

Cowa ko saka cecay ci Pawlo milengoay to patikol maˈorip, na mihadakay ci Yopu toniya hatokel, pakasoˈlin to mamaharateng no Kawas cingra, hanaca patikol a paˈorip cingraanan. (Yopu 14:​7-​10, 12-​15) ‘Patikol maˈorip ko mapatayay tamdaw’ o ‘salakatay a sifanaˈ’ no pakasoˈlinan no Kristokiyo, o kalimlaan a ‘taˈeneran.’ (Hipray 6:​1, 2) Milengo ci Pawlo i saka 1 Korinto 15 fedengan to patikol maˈorip a kimad, pakalalokay to saka 1 hahekalan a Krisciyang. Ano hakowato ko halafin ita a pakasoˈlin toniya kimad, o saka 15 fedengan no saka 1 Korinto o papakalalok kitaanan, padama kitaanan pakasoˈlin to mamalaˈosi ko hatokel patiokol maˈorip.O pipatikol ni Yis Kristo a maˈorip o patenakan ni Pawlo i Korinto a ‘ngaˈayay lihaf.’ (1 Korinto 15:​1, 2) Oniya ngaˈayay lihaf pakasoˈlinay kita, soˈlin mapatay ko salawina ita, iraay ko hatokel patikol maˈorip. Sowal ni Pawlo ano caka pakasoˈlin ko Krisciyang to patikolayto ci Yis maˈorip, awaayto ko kapo no pihakelong ningra.​—1 Korinto 15:17. w20.12 2 fiedac 2-4 fatac

Hano ngaˈay cingra miliyaw a talifak hani? Cecay lalangian i, na patadoan ni Yis ci Pitiro a mitolon, micangacang ci Yihofaan padama cingranan eca ka malahdaw ko pakasoˈlin. Pacaˈofan ni Yihofa ko satolon ni Yis. Roma i, paˈarawan ni Yis ci Pitiro, maedeng o papakalalok cingranan. (Luka 22:32; 24:33, 34; 1 Korinto 15:5) Ikor, cecay dadaya mifotingay ko tarokos, awaay ko malepelay a foting. Itiya paˈarawan ni Yis cangra, paira to hatoki ni Pitiro paihkal to olah ci Yisan. Misododan ni Yis ci Pitiro, patorodayho to adihayay a tayal toniya ngaˈayay widang. (Yohani 21:15-​17) Mikitini picada ni Yis ci Pitiroan mahapinangay ita, sidaˈitay ci Yis micada to tamdaw, malefotay ko paihkal to makapahay capeling no Wama. Mihaenay, ikor no mararaw kita, aka miharateng to cowa ko sasododen no Kawas ko niyah. Haharatengen, oni Akoma Satan ko mahaenay harateng. O mamisongilaˈ kita miharateng tada maolahay ci Yihofa kitaanan, mafanaˈay Cingra citolasay ko ˈicel ita, hanaca makahiyay misodod kitaanan. O mamisarocod kita tano harateng ni Yihofa a minengneng to niyah, ato pakararaway kitaanan a tamdaw.​—ˈOlic 103:13, 14. w20.12 20-​21 fiedac 17-​19 fatac

O roma tamdaw marawraway, cowa pitadiˈec ci Yihofaan. Mikitini i tireng nangra wa mananam ita ko manan a sapasifanaˈ. Songilaˈen miharateng ko nalifetan nangra, papadama kitanan miliyas to malecaday a raraw. tahalifa ci Asa to pasangaray i, micangacangay to sadama ni Yihofa, kawra ikor to o niyah sanay a pakayraan ko sapisaysay to pasangaray. (2 Rayray 16:​1-3, 12) Cangacangay cingra to sadama no Siriya tamdaw, micoˈay to hongti no Israil. Ano nengnengen i, hato matatodongay koni a demak, pairaay to miming a sakangaˈay. Nikawrira, ora dipayar no Yutaya cowa ka halafin. Pakaynian ni Yihofa i cecay a pairasolay pasowal ci Asa: ‘Samanen tadiˈecay kiso to hongti no Siriya, cowa pitadiˈec to Kawas iso ci Yihofaan, mamalahdaw ko sofitay no Siriya i kamay iso.’ (2 Rayray 16:7) Oha maminaˈon kita, hamaan a mitiˈer to niyah a misaysay to pasangaray, telocto cowato pisongilaˈ micekiw to Fangcalay Cudad, micangacang to sakayat ni Yihofa. Soˈlin tahalifa to kacalohan a pakayraan, aka a marawraw, tadiˈecen ci Yihofa, papadamaen Ningra kita inaneng ko misaˈosian. w21.01 6 fiedac 13-​15 fatac

Anini, pakayni lalood, pasangar ko nokaˈorip ato sasifod no lekakawa, macahiway ko roma finawlan no Kawas, o roma tamdaw pakayni pihakelongan mapalitay. Kawra mafanaˈay ko taˈangayay ˈopo a tamdaw, ikor no malaˈafo ko ciraraway a hekal, o kakaenen ato sapirenec to nofalocoˈan a kakaenen wa kadofah. Ano palaˈafoen no Kawas koniya mikowanan ni Satan a hekal i, cowa ko mamisemsem ko taˈangayay ˈopo a tamdaw to “sano namalay” a keter no Kawas. Maherek ko taˈangayay padiing, wa keriden ni Yis cangra “patayni pipowalan no sakaˈorip a nanom.” (Paˈarawan 7:​17) Hatiraayto, tada mikiriwiay ko tokel no taˈangayay ˈopo a tamdaw: Itini lalomaˈ no maˈoripay fafekang no sera masacaˈolay soˈot efan a tamdaw, edengan cangra ko iraay ko tokel cowa ko tatahalifa to patay ngaˈayto tahadaˈoc a maˈorip! (Yohani 11:26) O roma lopayˈay siri o mamiakoˈid to Kawas aci Kristoan paira to kasapaan a tokel no niyah. w21.01 16-​17 fiedac 11-​12 fatac

Itini ˈayaw no kinafalah ci Yis a dadaya, padotocay miharateng to mamasiˈayaw no nisawawaan a pasangaray noikor. Tada maolahay cingra toniya widang, mansa micangacang to kakarayan Wama ‘midipot cangranan, hoeca ka malaˈosi ci Satan.’ (Yohani 17:14, 15) Mafanaˈay ci Yis ikor no patikor cingra i kakarayan, wa padotoc ci Akoma Satan miˈodis to midokoay ci Yihofaan a tamdaw. Tada misaaliay ko finawlan ni Yihofa to sadipot. Mikikakaay to salakatay ko pisaali ita to sadipot ni Yihofa. Malaplapayto ci Satan nai kakarayan, ‘tada mangolaway.’ (Paˈarawan 12:12) Miolatan ningra ko tamdaw, mipalak cingra kitaanan o ‘midokoay to Kawas’ Sanay. (Yohani 16:2) Roma i, mipalak ko cowa pidoko to Kawas a tamdaw kitaanan, samanen cowa kalecad kita cangranan. Ano o mananto a pakayraan, cowa ko mamatalaw kita, Misamanay hani? O sinael anini papacaˈof toniya salicay. w21.03 26 fiedac 1, 3 fatac

Ano mananto ko demak ni Yihofa, mikitiniay i olah. Samanen maolahay Cingra kitaanan, mansa mirenecay to kihcod a saali ita. Milimasmas ci Yihofa to sapatefoc, pakayniay kaolah kitaanan. Malecaday, maolahay ci Yis kitaanan, hai sanay pakayni kitaanan kinafalah to ˈorip. (Yohani 3:​16; 15:13) Tada maolahay ci Yihofa aci Yis to madimadiay Cangranan a tamdaw, o mahaenay a olah awaay ko papakaconged. (Yohani 13:1; Loma 8:​35) Malecaday, ano o mananto ko demak no tawki no lomaˈ kitinien i ciolahay falocoˈ ko pidemak. Hano kalimlaan konini hani? Sowal no tarokos ci Yohani: ‘O cima ano caka olah to maˈaraway a salikaka (anca paro no lomaˈ), cowa ko mamaolah to cowa kaˈaraw a Kawas.’ (1 Yohani 4:​11, 20) Ano maolah ko tawki no lomaˈ to paro no lomaˈ, sapinanamaw to taˈarawan ni Yihofa aci Yis, wa misongilaˈ mirenec to saali no paro no lomaˈ i noˈadingoan, nofalocoˈan ato nodafongan. (1 Timoti 5:8) Wa pahatatanamen ato rikecen ningra ko wawa. Roma i, saka inanengaw ko misaˈosian, paˈdil ci Yihofaan ato sakaciepoc no lomaˈ, wa padotoc cingra misaˈicel a macakat. w21.02 5 fiedac 12-​13 fatac

Mafanaˈay ko sidaˈitay a kakarayan Wama to pisakahmaw nangra toniyah a nalifetan, cipinangayho to kemoday falocoˈ nangra, pakaˈaraway to cowa ka hapinang noniyah a kangaˈayan. (1 Yohani 3:​19, 20) O cecay tamdaw misaˈicelay misawad to tatiihay nanaman, mataˈlif ko cecay liyad pasokiyaway, tada matoleday to niyah alatek. Manaokaniw, ikor no mararaw makesem ko falocoˈ o matatodongay. (2 Korinto 7:​10) Kawra, cowa ka ngaˈay pakidem ko pirikec to niyah, miharateng: “Awaay to ko kapo ako, sasamaan ci Yihofa misodod takowanan hani?” O mahaenay harateng cowa ka tatodong, o mamiocor kitaanan misawad midoko ci Yihofaan alatek. Mihaenay, papasayra kita ci Yihofaan a mitolon. Micangacang to sasodod Ningra. Malecad o sowal i Isaya, malacafay Cingranan ‘misaysay to pasangaray i kalalaˈed.’ (Isaya 1:​18) Maˈaraw no Kawas mikifalocoˈ a pasasiyor kita, o mamisodod kitaanan. Roma i, ngaˈayay misaali kita to sadama no malohemay malitengay, wa mihadidi cangra a padama kitaanan misalof to kalalaˈed ita aci Yihofaan.​—Yakop 5:​14,15. w20.12 23 fiedac 5-6 fatac

Mikangodoay ci Yis to fafahiyan. Misakahmaway to fafahiyan ko Farisay tamdaw, cowa ka masasowal i kaˈalomanan a kitiraan to fafahiyan, mangalef eca ka malalengo cangranan to Fangcalay Cudad. Kawra cowa ka lecad ko pinengneng ni Yis ato Farisay tamdaw. Ano faˈinayanto fafahiyanto, milengoan ni Yis cangra to kalimlaan a kimad no Fangcalay Cudad. (Luka 10:38, 39, 42) Kalacafayanho ningra ko roma fafahiyana mitosil. (Luka 8:​1-3) Roma i, miocoran ni Yis ko pina fafahiyan pasowal to tarokos patikolayto cingra a maˈorip. Pakayni toniya fafahiyan, o taˈangayay sakaliko konini! (Yohani 20:16-​18) Mikangodoay to fafahiyan ko tarokos ci Pawlo. Mikiriwiˈan ningra patalipaˈelal ci Timoti mikangodo to fafahiyan. Sanay ci Pawlo, salakatay padamaay ci Timotian minanam to Fangcalay Cudad i, o wina ato fofo ningra. (2 Timoti 1:5; 3:​14, 15) Itini Loma cudad panganganan ni Pawlo ko pina fafahiyan salikaka mihamham. Masinanotay ningra adihayay ko midemakan no fafahiyan salikaka, pakapotalay a pakahemak cangranan.​—Loma 16:​1-4, 6, 12; Filipi 4:3. w21.02 15 fiedac 5-6 fatac