Saka 4 Folad

Misiˈayaway kiso to taˈangayay a sapalifet nohatini han? Itini kasakopang iraay ko midokaˈay tisowanan a tamdaw alatek. (Yakop 3:2) Pakayni i pihakelongan o cafay iso matayal, cafay micudad milikafay tisowanan alatek. (1 Pitiro 4:​3, 4) Paro no lomaˈ micongeday tisowanan mirienang to saˈopo ato mitosil alatek. (Matay 10:35, 36) Oniya sapalifet pasemsemay tisowanan, anca sapisawadaw sanay kiso to pihakelongan. Kawra ngaˈay tanektek ko pakasoˈlin iso, ano o mananto ko misiˈayawan iso a sapalifet, papafelien ni Yihofa kiso to taneng misiˈayaw, papafeliho tisowanan to ˈicel a mihadidi. O Fangcalay Cudad misongilaˈay mitadtad to samanay misiˈayaw ko cowa ka lefot a tamdaw to pakidemay a sapalifet. Hano tiliden ni Yihofa koniya nalifetan hani? Samanen mitokelay Cingra kitanan pasayra cangranan minanam. Mikayatan ni Yihofa ko tarokos ci Pawlo pasowal toniya demak. Miˈosi toniya nalifetan ngaˈay pafeli kitanan to sahinom ato hatokel, kawra cowa ko piˈosi aca, papikayaten ita ko Fangcalay Cudad to harateng ita, mitemer to falocoˈ ita. w21.03 14 fiedac 1-2 fatac

O pinengneng iso to mitosilan a tamdaw malecaday o ngaˈayayto a panayen a panay han? Ano mahaenay i, wa taˈangay ko sadama to mitosilay a tayal. Saka 1, ano citolasay ko toki a mipanay, wa metmeten iso ko toki a mitosil. Saka 2, ano micada ko tamdaw to ngaˈayay lihaf wa lipahak kiso, samanen sowal no Fangcalay Cudad, itini pipanayan lipahakay a maacang ko tamdaw. (Isaya 9:3) Saka 3, miharateng kiso o mamalo Krisciyang ko kahacecay a tamdaw alatek, mansa misalof to sowal mitosil, milengo to kaciharatengan nangra a demak. Cato pakasoˈlin ko Samariya tamdaw ci Yisan sanay ko harateng no nisawawaan alatek, kawra cowa pihaen ko harateng ni Yis. Mihaenay, palecaden ita ci Yisan, o mamalo Krisciyang ko kahacecay tamdaw han ko harateng. Itini toniya pakayraan, ngaˈayay ko demak no tarokos ci Pawlo. Mafanaˈ to o maanan ko pakasoˈlinan no tao, kilimen ko kaciharatengan no tao a demak, pakasoˈlin to mamalo Krisciyang cangra alatek. w20.04 8-9 fiedac 3-4 fatac

Todongen ita ci Yihofa, hamaan pakayni waywayan no tao ira ko tatiihay pinengneng cangranan, mamisaˈicel a cipinang to nafalocoˈan nangra. Edengan ci Yihofa ko masongilaˈay ko kacipinang to cecay tamdaw. Mihaenay o cacangacangen ita ci Yihofa padama kitaanan mihapinang to soˈlinay a waywayan no tao, hanaca paihkal to siniˈadaay falocoˈ cangraanan. Cowa kangaˈay kita o papina aca a salikaka ko paihkalen to siniˈadaay falocoˈ. O polong a salikaka tahalifaay to pasangaray, malecad ci Yonaan, Iliya, Hakar aci Lotoan ko malifaay. Latekay o pasangaray no roma tamdaw oniyah ko mifekaday alatek. Kawra, o kahacecay tamdaw na pairaay to pasangaray no niyah, mansa misaali ci Yihofa kitaanan ‘palecad to falocoˈ no tao.’ (1 Pitiro 3:8) Mikiriwiˈay ko paro no lomaˈ ni Yihofa, o masakenakenaay a tamdaw ko misakapotay. Ano midofdof kita ci Yihofaan, wa ngaˈay micowat to kakelec noniya paro no lomaˈ. Mihaenay, misongilaˈ kita mitengil, misarocod a cipinang, paihkal to siniˈadaay a falocoˈ. w20.04 18-​19 fiedac 15-​17 fatac

Itini pidofdof ci Yihofaan, malefotay ko patirengan ni Yis a taˈarawan. Mihaenay, sapidofdofaw kita ci Yihofaan, mamisarocod a minanam ci Yisan. (Yohani 8:​29) Sapidoedoaw to soˈlinay kimad a dademak, o tatanektek ko pakasoˈlin ita to ngaˈayay tadiˈecen ci Yihofa, o sowal Ningra i Fangcalay Cudad sahtoay o soˈlinay kimad. Roma i, papakasoˈlin kita to ci Misiya ci Yis. Anini ˈalomanay tamdaw cowa pakasoˈlin to o hongti no Hongti Kitakit no Kawas ci Yis. Mirikecay ci Yohani, wa ‘adihay ko misamangahay’ miolat to tamdaw. Ano caka tatodong ko kafanaˈ ci Yihofaan aci Yisan, caka tanektek ko pakasoˈlln, wa madolo a malipalaw. (2 Yohani 7-​11) Sanay ci Yohani? “Cima ko misamangahay hani? Cokoya minaˈayay to ci Kristo ci Yis han?” (1 Yohani 2:​22) Ano sakaecaaw ka malipalaw kita, misongilaˈ a micekiw to Fangcalay Cudad, mihaen ngaˈ soˈliˈlin a mafanaˈ ci Yihofaan aci Yisan, ngaˈay pakahapinang to iraay ko soˈlinay kimad no mita.​—Yohani 17:3. w20.07 21 fiedac 4-5 fatac

Makahi kita a micaˈi, cowa ko papacieci to tao micada to harateng no niyah, ho eca ka malo ‘sakasetol a fakeloh.’ (Loma 14:​19-​21; 1 Korinto 8:​9, 13) Toniya demak, cowa kalecad kita cangranan, o niyah aca ko miharatengan, mansa samacay saan i kaˈayaw no tao a comikay. Kawra, cowa ko malalifetay kita. (Kalatiya 5:​26; 6:⁠4) O patosokan ita mamisarocod a padama to tamdaw tahira patosokan a comikay, milifok to tahadaˈocay a ˈorip, mihaenay wa misaˈicel kita mitoor to sowal no Fangcalay Cudad a midemak, cowa ko niyah aca ko haratengen, wa miharatengho to roma tamdaw. (Filipi 2:4) Ano malaheci ita ko cacikayen no Krisciyang, wa pafelien ni Yihofa kita to midaˈocay a ˈorip i kakarayan anca fafekang no sera. w20.04 28 fiedac 10 fatac; 29 fiedac 12 fatac

Wa ira ko taˈangayay ˈopo a tamdaw maˈorip a micomod i faelohay hekal. O mamaˈaraw nangra ko ˈalomanay mapatayay tamdaw patikol maˈorip, pakaˈaraw to piliyaw pakalowid to patay. Haratengen hena, oniya pakalowid wa taˈangay ko kalipahak no tamdaw! (Dmak 24:15) Saikor, oya parocokan ni Atam i tamdaw a patay wa masongilaˈ a malowid, o polong tahatolasay ko madimadi ci Yihofaan a tamdaw wa tahadaˈoc a maˈorip. Itini saka 1 Korinto pakayniay patikol maˈorip a sinael taˈangayay ko sahinom to tamdaw, aniniay a Krisciyang o mamiakoˈid to Kawas. Iraay ko adihayay a lalangian ita midoedo to limoˈot ni Pawlo, misarocod ‘matayal to tayal no tatapangan.’ (1 Korinto 15:58) Ano tahatolas ko madimadi ita, tawlik a matayal saki Yihofaan, wa irato ko toki soˈliˈlin a lipahak ko kaˈorip noikor. O mamalifok ita a sapalemed noikor, mataˈlifay ko maharatengay ita. Malaod ko toki wa mahapinang ita, o nano roray ita i tatapangan cowa ko malaholacay. w20.12 13 fiedac 16-​17 fatac

O mitadtadan no Icikil 38:10-​23; Taniil 2:​43-​45; 11:⁠44-​12:1; Paˈarawan 16:13-​16, 21 itiniay i malecaday tatokian mifekad a demak, ano mahaenay, o kalingad no demak wa mahaen o milengoan i laeno alatek. Ikor no mifekad ko taˈangayay padiing i cecay tatokian, ‘polong no hekal a hongti’ wa makakadep. (Paˈarawan 16:13, 14) O makakadepay a kalo kitakit o misowalan no Fangcalay Cudad a ‘Makok a kok.’ (Icikil 38:2) Oha mamiˈodis cangra to finawlan no Kawas. Itini mapolosi maˈaraway ni Yohani ko sano ˈikayay a soeda materakay nai kakarayan, patefoay i tireng no ˈada no Kawas. Oniya sano soedaay a pades mitaypiyaway to mihadakan no finawlan no Kawas sapisawkit a lihaf. Pakayniay toniya lihaf alatek, sapiˈodisaw to finawlan no Kawas, ciharateng to sapalahdawaw cangraanan. w20.05 15 fiedac 13-​14 fatac

O fangcalay saocor o kalimlaan a sapatelong. Ano maharateng ita ko milaˈosian no fangcalay saocor a demak, wa matongal ko pisalimla toniya kalimlaan a sapatelong. ˈAyaw no patikol ci Yis tayra i kakarayan somowalay to nisawawaan: ‘Ano matefadto i tamowanan ko fangcalay saocor i, o caciˈicel kamo . . . tangasa i tolas no hekal, malo misawacayay takowanan a tamdaw.’ (Dmak 1:8) Anini malaˈosiayto ko sowal ningra, mataˈlifay ko 850 ˈofad icowacowaay pala a tamdaw madimadiay midoko ci Yihofaan. Roma i, padamaayho ko Kawas kitaanan palahad to ‘minaroˈan no fangcalay saocor,’ mahawpay ko olah, lipahak, rihaday, mihadidi, siniˈada, ngaˈayay, pakasoˈlinay falocoˈ, damsayay, pakaˈmetay to tireng, mansa ngaˈayto kita malacecay to salikaka. (Kalatiya 5:​22, 23) Soˈlinayto taˈangayay ko sapadama no fangcalay saocor kitaanan! w20.05 28 fiedac 10 fatac; 29 fiedac 13 fatac

Iraay ko lalangian ita a pakasoˈlin, ano militemoh kita to patikolay maˈorip a salawina i, wa pakahapinang cangranan. Tinakoen, pakayni maˈoningay i Fangcalay Cudad pakayniay patikolay maˈorip, patikolen ni Yihofa paˈorip ko cecay tamdaw, wa miliyaw a misangaˈ cingranan, o papisingan, sasowalen, harateng malecaday to ˈayaw no mapatay. Haratengen, patinakoan ni Yis ko mapatayay to mafotiˈay, patikolay maˈorip patinakoan to mipalalay to maeholay a tamdaw. (Matay 9:​18, 24; Yohani 11:11-​13) Ano mapalal ko maeholay a tamdaw i, o pising ato ngihaˈ ningra malecaday to ˈayaw no mafotiˈ, o maharatengay cowa ka falic. Haratengen ita ko tinakoan ni Lacarus, patikolen ni Yis cingra paˈorip i, sepatayto romiˈad mapatay cingra, misatapangayto maponiˈ ko tireng. Patikol cingra maˈorip i, oya tatosaay fafahiyan salikaka ningra tangsolay mahapinang cingra, ano cingrato mafanaˈay cangranan.​—Yohani 11:38-​44; 12:​1, 2. w20.08 14 fiedac 3 fatac; 16 fiedac 8 fatac

Pakaynien i Kawas, o manilnilay no fangcalay saocor a Krisciyang ato roma lopayˈay siri malecaday masakalimlaan, malecaday sano odoˈay. Hatiraay to, o mihadakan no Kawas a sapilidong toni tosa ˈopo tamdaw a sapiˈaca o malecaday, o ˈorip no kanonoˈan a wawa Ningra. O sasiroma no tosa ˈopo a tamdaw coka hecad ko hatokel, misaaliay cangraanan madimadi to Kawas aci Kristoan. (ˈOlic 31:23) Haratengen, o pidemak no fangcalay saocor no Kawas i tireng no polong a tamdaw malecaday, sakoniya sowal, ano manan toko hatokel ita, pafeliay ci Yihofa kitaanan to misaalian ita a fangcalay saocor. O kahacecay midokoay ci Yihofaan a tamdaw iraay ko sapafeli Ningra a makapahay hatokel. (Yirimiya 29:11) Pakayniay ci Yihofaan aci Yisan, hato ngaˈayay kita milifok to midaˈocay a ˈorip. O piharatengan ci Yisan a saˈopo pairaay to toki no polong a Krisciyang pakahemek Cangranan, miakoˈid to nano demak Nangra kitaanan. Pakaynien i polong a Krisciyang, oniya piharatengan saˈopo o kalimlaan a saˈopo i lalomaˈ no cecay miheca. w21.01 18 fiedac 16 fatac; 19 fiedac 19 fatac

O tokel no ˈalomanay mirienangay to piharatengan saˈopo a tamdaw itiniay fafekang no sera a Lakoing. Ano hatiraay i, hano mirienang cangra to Lafi no Tapang hani? O lalangian i malecaday to pirienang to pakaetimay no widang. Mirienang kita to pakaetimay, samanen sapaihkalaw to olah ato pidama toya faelohay mararamoday. Malecaday, mirienang to Piharatengan a Saˈopo ko roma lopayˈay siri, pakayniay sapaihkalaw cangra to olah ato pidama ci Kristoan ato salikaka ni Kristo. Roma i, mirienang toniya saˈopo ko roma lopayˈay siri, paihkalay to piakoˈid to kinafalah ni Yis. Pakayniay kinafalah ni Yis, mansa ira ko toki nangra tahadaˈoc a maˈorip. O roma kalimlaan a lalangian i midofdofay cangra to limoˈot ni Yis. Itini saka cecay pisikay to Lafi no Tapang, pasowalan ni Yis ko madimadiay tarokos saan: ‘Ka padadotoc kamo mihaen to demak a miharateng takowanan.’ (1 Korinto 11:23-​26) Mihaenay, ano iraho maˈorip ko salikaka ni Kristo toniya hekal, o roma lopayˈay siri padadotoc mirienang to Lafi no Tatapangan. Cowa konini aca, wa mitahidangho cangra to roma tamdaw malacafay a mirienang. w21.01 17-​18 fiedac 13-​14 fatac

Miharateng kita ano maolah to tao, pasowal to padihkoay to falocoˈ a sowal cangranan, paihkal to nafalocoˈan ita. Kawra, o soˈlinay olah pairaen ko waywayan ngaˈ ngaˈay. (Nengnengen ko Yakop 2:​17, 26) Tinakoen, maolahay ci Yihofa kitaanan. (1 Yohani 4:​19) Itini Fangcalay Cudad, misakadademakay Cingra to adihayay makapahay a sowal paihkal to olah Ningra. (ˈOlic 25:10; Loma 8:​38, 39) Kawra pakasoˈlin kita to maolahay ko Kawas kitaanan, cowa ko pakayniay aca i sasowalen Ningra, pakayniayho i nano demak Ningra kitaanan. Hai sanay ci Yihofa papisemsem to kaolahan ningra a wawa pakayni kitaanan a kinafalah to ˈorip. (Yohani 3:​16) Makahi ci Yihofa mihaen to demak, wa cisasaho kita to olah Ningra han? Maolah kita ci Yihofaan aci Yisan, wa midofdof to limoˈot Nangra. (Yohani 14:15; 1 Yohani 5:3) Ihkalay ko limoˈot ni Yis kitaanan masasiolaolah. (Yohani 13:34, 35) Ano maolah kita to salikaka, cowa ko tano ngoyos aca a somowal, tatano waywayen misawacay tonini.​— 1 Yohani 3:​18. w21.01 9 fiedac 6 fatac; 10 fiedac 8 fatac

O manilnilay no fangcalay saocor a tamdaw iraay ko tokel malacafay ci Yisan mala hongti i Hongti Kitakit no Kawas, hanaca tahadaˈoc a malacafay cingraanan. Wa soˈlin cangra i tihi ni Yis, pakaˈaraw cingraanan, masasowal cingraanan. (Yohani 14:​2, 3) Itiniay fafekang no sera ko tokel tahadaˈoc maˈorip a tamdaw wa milifok to olah ato sadipot ni Yis. Soˈlin cowa pakaˈaraw cangra ci Yisan, kawra wa ngaˈay milifok to sapalemed ni Yihofa aci Yis lipahak ko kaˈorip, mihaenay o kalawidang nangra aci Yis mamatongal ko tangongol. (Isaya 9:​6, 7) Malawidang kita aci Yis wa milifok to adihayay a sapalemed. Tinakoen, aniniho ngaˈayto malifok ita ko kaciharateng ato sadipot ningra, noikor wa tahadaˈoc a maˈorip. Sakakaay i, malawidang ci Yisan papaira to kalimlaan a hafay i hakelong no kaˈorip ita, ngaˈay patireng to ngaˈayay kalalaˈed to Wama ningra ci Yihofaan. Ngaˈay kita malo widang ni Yis, tada kalipahakanto! w20.04 25 fiedac 15-​16 fatac

O sapatikami ni Pawlo to Korintoay a Krisciyang, manilnilay no fangcalay saocor cangra, iraay ko hatokel patikol maˈorip tayra i kakarayan, mihaenay o patikolay maˈorip a ‘polong tamdaw’ mahawpay cangra. Sowal ni Pawlo cangra ‘o mapalacecay aci Kristo, malo fangcalayto, micadaay to satahidang a malo fangcalay finacadan.’ Roma i, o mitoroˈan ni Pawlo ‘pakayni ci Kristoan a mapatayay a tamdamdaw,’ mitoroˈan i o manilnilay no fangcalay saocor a Krisciyang. (1 Korinto 1:2; 15:18; 2 Korinto 5:​17) Itini roma tikami i, sanay ko sowal ni Pawlo, ‘mapalacecayay aci Kristo a mapatay’ a tamdaw ‘wa milecad ci Kristoan a patikol maˈorip malacecay cingranan.’ (Loma 6:​3-5) Ci Yis patikol maˈorip malo ˈadingo ko tireng ikor tayra i kakarayan, o malacecayay ci Kristoan a tamdaw, o manilnilay no fangcalay saocor a Krisciyang, wa patikol maˈorip tayra i kakarayan. Sowal ni Pawlo patikolayto maˈorip ci Kristo, o ‘saˈayaway a mipanayan i lalomaˈ no mafotiˈayto a tamdaw.’ (1 Korinto 15:20) Haratengen, soˈlin itini ˈayaw ni Yis iraay ko patikolay maˈorip a tamdaw, tinakoen ci Lacarus, kawra edengan ci Yis ko saˈayaway patikol maˈorip malo ˈadingo hanaca tahadaˈoc ko ˈorip. w20.12 5-6 fiedac 15-​16 fatac

Anini, ano mapatay ko manilnilay no fangcalay saocor a Krisciyang, wa tangsol patikol maˈorip tayra i kakarayan. Mikitini 1 Korinto 15:51, 52 mahapinang konini, sanay ci Pawlo: ‘Cowa ko hahalafin mafotiˈ kita o kahacecay tamdaw, kawra o mamafalic ko kahacecay tamdaw. O pifekad noniya demak cecayay a melet, itiya i salikoray a soni no laepa.’ Matatodongay koniya sinael no hatini! Tahalifaay to mahaenay patikol maˈorip a Krisciyang taˈangayay ko lipahak! Oniya “Cecay melet” patikol maˈorip tayra i kakarayan a Krisciyang wa ira ko maanan a ˈinorong hani? Pasowalan ni Yis cangra: ‘O pakalowiday a tamdaw, oya midoedoay to limoˈot ako tangasa i paherekan i, wa pafelien ako cingra to fadangalan mikowan to kalo kitakit, malecad takowanan mikitini Wama milifok to fadangalan. O pakalowiday a tamdaw wa tano malad a cokol ko sapikowan to kalo kitakit, mipelpel to kalo kitakit, malecad o pipelpel to kapowa.’ (Paˈarawan 2:​26, 27) Mihaenay, wa itini cangra pikerid ni Yis tano malad a cokol mikowan to kalo kitakit.​—Paˈarawan 19:​11-15. w20.12 12 fiedac 14-​15 fatac

Nolitengan, o saˈayaway mipanayan patafangan no Israil tamdaw i Kawas. Sapatinakoan no tarokos ci Pawlo konini, panganganan ci Yisan o ‘saˈayaway mipanayan,’ mifanaˈay wa iraho noikor ko patikolay maˈorip malo ˈadingo ko tireng tayra i kakarayan. (1 Korinto 15:18) Malaod ko misaˈosian a toki, o tarokos ato malacecayay ci Kristoan a tamdaw wa tahalifa to mahaenay a pipatikol maˈorip. Patikami ci Pawlo to Korintoay a tamdaw i, oya “malacecayay ci Kristoan” a tamdaw cowaho patikol maˈorip tayra i kakarayan. Masowal ko patikol maˈorip no ikor, sanay ci Pawlo: ‘O mamitoor ko kahacecay tamdaw to matatodongay kadadoedo a patikol maˈorip. Ci Kristo o saˈayaway a panayen, dotoc ano patikol ci Kristo a tayni kitaanan a tatokian, oyato malacecayay cingranan a tamdaw.’ (1 Korinto 15:23; 1 Tisalonika 4:​15, 16) Nohatini ‘o patikolanto ni Kristo a tayni kitaanan a tatokian.’ Toniya lintad, o mapatayay a tarokos ato roma manilnilay a Krisciyang wa milifok to kakarayan sapalifon, ‘malecad ci Kristoan a patikol maˈorip malacecay cingranan.’​—Loma 6:5. w20.12 5 fiedac 12 fatac; 6 fiedac 16-​17 fatac

Itini sinel, o misowalan ni Pawlo cowa ko itiniay fafekang no sera patikol maˈorip a tamdaw, tinakoen oya patikolan paˈorip ni Iliya, Ilisa aci Yis a tamdaw. O misowalan ningra oya patikol maˈorip tayra i kakarayan a tamdaw, wa ira ko “noˈadingoan a tireng” nangra. (1 Korinto 15:43, 44) Itiniho i fafekang no sera ci Yis o ciˈirangay ciheciay ko tireng, kawra patikol cingra maˈorip malo ‘pafeliay to ˈorip ˈadingo a tireng,’ tayra i kakarayan. Malecaday, o manilnilay no fangcalay saocor a Krisciyang patikol maˈorip wa malo ˈadingo a tireng. Sanay ci Pawlo: ‘O tatirengan ita no hatini malecaday toya tano seraan misangaˈ a tamdaw, noikor o tatirengan ita wa malecad toya i kakarayanay.’ (1 Korinto 15:45-​49) Haratengen, patikol ci Yis maˈorip cowato ko ciˈirangay ciheciay a tireng, kalimlaan konini. Pakayni patikol maˈorip, dotoc mitadtaday ci Pawlo to cecay kalimlaan, sanay cingra: ‘Cowa ko mamicada to Hongti Kitakit ko ciˈirangay ciheciay a tireng.’ (1 Korinto 15:50) Mihenay, o tarokos ato roma manilnilay no fangcalay saocor a Krisciyang patikol maˈorip tayra i kakarayan i, o tatirengan nangra cowa ko mamaponiˈ a ciˈirangay ciheciay a tireng. w20.12 10-​11 fiedac 10-​12 fatac

Itini saka 1 hahekalan, mikayatan no Kawas ko nisawawaan ni Yis mitilid to milingatay to i kakarayan patikol maˈorip a demak. Sowal no tarokos ci Yohani: ‘O wawato no Kawas kita nohatini. Cowa ka hapinang ko noikor a pakayraan. Kawra soˈlinay mafanaˈ kita, ano patalahekal to Cingra i, wa malecad kita Cingranan, samanen wa maˈaraw ita o masamanay Cingra.’ (1 Yohani 3:2) Mihaenay, o manilnilay no fangcalay saocor a Krisciyang cowa ka fanaˈ to pakayraan patikol maˈorip malo ˈadingo. Kawra ngaˈay pakasoˈlin, itiya wa maˈaraw nangra ci Yihofa. O Fangcalay Cudad cowa ka ihkal pasowal to milingatay i kakarayan patikol maˈorip a demak, kawra tarokos ci Pawlo pasowalay kitaanan, ci Kristo wa ‘papalahdaw to polong no mikowanay halo cifadangalay ato ciˈicelay a maemin’ ato palahdaw to ‘saikoray a ˈada o patay,’ itiya manilnilay no fangcalay saocor a Krisciyang wa padadotoc kalacafay ci Kristoan. Ikor, ci Yis ato kalacafayay cingranan mikowan a tamdaw wa papidodof to kihcod ci Yihofaan, ano cangrato wa midodof ci Yihofaan. (1 Korinto 15:​24-​28) Tada o kalipahakan a tatokian konini! w20.12 8 fiedac 2 fatac

O roma madimadiay a Krisciyang cowa ko tatayra i kakarayan kalacafay ci Yisan mikowan, iraay ko maanan hatokel nangra hani? Iraay ko hatokel nangra patikol maˈorip. Sowal no Fangcalay Cudad, ci Pawlo ato roma tatayra i kakarayan a Krisciyang wa ‘milifok to saˈayaway a patikol maˈorip.’ (Filipi 3:​11) Sowal no sinael ikor wa iraho ko roma papatikol maˈorip, malecaday to sowal ni Yupo konini. (Yupo 14:15) Ikor papalahdawen ni Yis ko polong no mikowanay, cifadangalay ato ciˈicelay a maemin, itiya o ‘malacecayay cingranan’ a tamdaw wa kalacafay cingranan tayra i kakarayan. Ikor, o ‘saikoray a ˈada o patay mamalahdaw.’ Oniya patikolay maˈorip i kakarayan a tamdaw cowato ko mamapatay tahadaˈoc. (1 Korinto 15:​23-​26) Iraay ko tokel i fafekang no sera maˈorip a tamdaw ngaˈayay mikitini sinael anini milifok to hatokel. Mahapinangay, ‘cowa ka moecel a tamdaw’ cowa ko ngangaˈay tayra i kakarayan, mihaenay o mitoroˈan no sinael o itiniay fafekang no sera a patikol maˈorip. w20.12 6-7 fiedac 18-​19 fatac

Wa miharateng kita alatek: “Hano pakasoˈlin kako to cowa pisawad ci Yihofa takowanan hani?” Ano mihaen ko harateng iso, paihkalay to mamalifok iso ko sasodod ni Yihofa. Sowal no Mikecolay: “O roma tatihay nanaman ita cilamitay to alatek, mansa saliyaliyaw saan kita midemak to malecaday a raraw . . . Aka a matoled, miharateng to cowa ko mamisodod ci Yihofa tisowanan. Nanay mahaen ko harateng iso sanay ci Satan. Pakayni i raraw no niyah a makesem kiso, paihkalay konini to ngaˈayayho a malidong. Misapoener ko falocoˈ a mitolon to Kawas, micangacang to sasodod Ningra, padama tisowanan ira ko makoracay a falocoˈ, ecato piliyaw midemak to malecaday a raraw. Tarokos ci Pawlo iˈayaw malo Krisciyang cingra adihay ko pakidemay a raraw. Maharatengay ni Pawlo ko iˈayaway a raraw. (1 Timoti 1:​12-​15) Kawra minengneng cingra to sapatefoc o sapafeli ni Yihofa cingranan a sapatelong. Mihaenay, cowa ka pakidem a makesem ko falocoˈ ni Pawlo, ao misarocoday ko falocoˈ ato harateng matayal saki Yihofaan. w20.11 27 fiedac 14 fatac; 29 fiedac 17 fatac

Misaka dademakay ci Satan to adihayay pakayraan a mikayhid kitaanan. Wa sasamaan ko harateng ita hani? Wa mikilim kita to saˈading to niyah a sowal alatek, saan miharateng: “Midemak tonini cowa ko mamafalah, awaay ko maanan nonini.” O hatiniay harateng o masaka talawan. Ano tahalifa to sakayhid i mamiharateng kita: “Ciharatengay ci Satan misaka dademak tonini ho ecato pisacecay kako to falocoˈ a mikangodo to Kawas hokira? Ano pakihater han ako ko niyah, o papakangodo to fangcalay ngangan no Kawas han? Oniya dademaken ako a demak o papangata anca paraay takowanan ci Yihofaan han?” Sasongilaˈen a miharateng koniya salicay, micangacang ci Yihofaan pafeli kitanan to taneng, hoeca ka malipalaw ko niyah. Mihaen to demak i, o mamidipot kitaanan, wa ngaˈayho padama kitaanan tanektek a miconged to sakayhid, malecad ci Yisan a pasowal: ‘Satan, ka piliyas!’ (Matay 4:​10) Haratengen, misacecay to falocoˈ a mikangodo to Kawas tada kalimlaan. w20.06 12-​13 fiedac 16-​17 fatac

Wa mihai kita, mafanaˈay ci Yihofa o maanan ko sangaˈayay kitaanan, mihaenay o mamakahi misapoener ko falocoˈ a midoedo to palinian Ningra a maˈorip. (Ifiso 4:​22-​24) Misapoener kita, o harateng ni Yihofa mikikakaay ko kalimlaan to harateng no niyah, mikikakaay ko kangaˈay no tao to niyah saan ko piharateng. Ano mihaen i, o mamalo widang ni Yihofa kita, wa ngaˈay mararihaday to salikaka. (Filipi 2:3) Kawra, ano ecaka pisinanot kita i, o mamafiyor no hekal tamdaw, malo misatakaraway misateked. Itini saka 1 hahekalan roma Krisciyang micadaay to mahaenay pifiyor, samanen masowalay no tarokos ci Pawlo i Loma: ‘Pasowalen ako kamo, aka patakarawen minengneng ko niyah, patatodongen ko harateng. Soˈlin mihaiay ci Pawlo itini matatodongay a demak mamisaareteng kita to niyah, kawra o misapoeneray a tamdaw cowa ko papatakaraw a minengneng to niyah. w20.07 2 fiedac 1-2 fatac

Itini pikowan ni Asa a tatokian, cowa ka padotoc ko rihadayay a tatokian. O Iciyopiya tamdaw ci Cira mikeriday to 100 efan a sofitay milood to Yutaya kitakit, wa madolo a pakalowid sanay miharateng. Kawra o mitadiˈecan ni Asa cowa ko ˈicel no sofitay, oya saˈakawangay a Kawas ci Yihofa. Sanay mitolon cingra: ‘Yihofaaw Kawas niyam, nanay padamaen kami, samanen mitadiˈecay kami Tisowanan, pakayni i ngangan Iso a micoˈay toniya taˈangayay sofitay.’ (2 Rayray 14:11) O ˈaloman no sofitay no Iciyopiya tosaay tingloh no Yutaya kitakit, kawra pakasoˈlinay ci Asa to iraay ko ˈicel ni Yihofa a milidong to finawlan Ningra. Cowa patoleden ni Yihofa cingra. Salikor, mapadikay ko Iciyopiya tamdaw, mahadefekay maemin. (2 Rayray 14:​8-​13) Soˈlin cowa ka fanaˈ kita to sasamaan ko malifaay no kahacecay tamdaw, kawra ngaˈayay saˈosien i, o rihaday no finawlan no Kawas cowa ko papadotoc. Haratengen, na paˈayaway ci Yis itini salikoray romiˈad, o nisawawaan ningra ‘kakaˈintehen no polong a kitakit.’​—Matay 24:9. w20.09 17-​18 fiedac 14-​16 fatac

Ano pakangodo ko tao kitaanan, caay ka rihaday ko harateng ita, kawra ano paifalocoˈ han ita ko sowal no tao, o mamatoled ko falocoˈ. (Taneng 24:10) O sasamaan kita misiˈayaw to pipakangodo hani? Malecad ci Pawloan, wa ngaˈay minanam kita ‘makahi mihadidi to sapakangodo.’ Misamanay hani? Samanen malikaf anca misafelit ko tao kitaanan, misawacayay to o soˈlinay a Krisciyang kita. (1 Pitiro 4:​14) Sowal ni Yis o nisawawaan ningra o tatahacada to sapalak. (Yohani 15:18-​20) Mahaenay ko saka 1 hahekalan a Krisciyang. Itiya, mafiyoray no serangawan no Kirisiya a tamdaw o mafolaay malonayay ko Krisciyang sanay, harateng no Yutaya tamdaw i, o Krisciyang malecaday to tarokos ci Pitiroan aci Yohanian, o ‘cowa picudad a kalo tamdaw’ sanay. (Dmak 4:​13) Roma i, harateng no ˈalomanay o malonayay awaay ko inaneng no Krisciyang, samanen o kapiliˈan no ˈalomanay, manaˈayayho mirienang to mikowanay, cowa pakafiyor to mikowanay, hanaca manaˈayayho malasofitay, awaay ko ˈicel a midipot to niyah. Masakahmaw no tamdaw ko salakatay Krisciyang, hawad sanayto mikotod ci Yisan hokira? Cowa. w20.07 14-​15 fiedac 3-4 fatac

O mihadakan ni Yohani i tikami a sapakalalok pahapinangay kitaanan, tada maolahay cingra to salikaka, makalimay ira ko tanektekay a pakasoˈlin nangra. O manilnilay malacafay ci Yisan tayra kakarayan mikowan a Krisciyang malecaday ci Yohanian, naifalocoˈ a ciharateng kitaanan. Mafanaˈ tonini, tada mitemeray to falocoˈ ita! (1 Yohani 2:​27)Nanay paifalocoˈen ita a minaˈeng ko masowalay toniya lalakaw a sapakalalok, misetek to falocoˈ midoedo to soˈlinay kimad a dademak, itini polong no kaˈorip midofdof ci Yihofaan. Misongilaˈ a micekiw to Fangcalay Cudad, pakasoˈlin to o soˈlinay kimad ko sowal ni Yihofa, paˈicelen ko pakasoˈlin ci Yis Kristoan. Aka mafiyor no harateng no hekal ato sasowalen no misafelitay to kimad a tamdaw. O pidoko ci Yihofaan aka o potal aca ko sangaˈayen, coˈayen ko sakayhid, aka a mararaw. Tooren ko palinian ni Yihofa a maˈorip. Padamaenho ko salikaka mitafo to tanektekay, itini pisaalian nangra mihadak to sapadama, makahiho a misodod to pakararaway kitaanan a tamdaw. Ano mihaen ko demak ita, ano o mananto ko masiˈayaway sapalifet, wa ngaˈay padadotoc a midoedo to soˈlinay kimad a dademak. w20.07 24-​25 fiedac 15-​17 fatac

Kahacecay madimadiay midoko ci Yihofaan a tamdaw pairaan Ningra ko saaroˈan i kasakopang. Soˈlin cowa ka lecad ko mihadakan no kahacecay tamdaw a ˈicel, kawra kalimlaan a maemin, cowa ka ngaˈay malawa. Milengoay ci Pawlo cowa ka ngaˈay kita misakahmaw to roma salikaka, malecad o pasowalay cangranan: “Malomaan ako kiso.” (1 Korinto 12:21) Makalimay kita sakarihadayaw no kasakopang, oha masasingodo, madadama. (Ifiso 4:​16) Mihaen, o mamatinako no kahacecay tamdaw ko olah, o mamacowat ko kasakopang. O malohemay malitengay i kasakopang sahtoay o tano fangcalay saocor ni Yihofa a nilnilen, kawra cowa ka lecalecad ko inaneng ato ˈicel nangra. (1 Korinto 12:​17) O roma malohemay malitengay cowaho ka halafin manilnil, mimingayho ko milifetan. O roma malohemay malitengay pakayni katoˈas ato tatiih no tireng, citolasay ko midemakan. Kawra, o cecacecay a malohemay malitengay cowa ko ngangaˈay misakahmaw to roma malohemay malitengay, malecad o pasowalay: “Malomaan ako kiso.” Kahacecay a malohemay malitengay mamitoor to limoˈot ni Pawlo i Loma 12:10. w20.08 26 fiedac 1-2 fatac; 27 fiedac 4 fatac

Itini saka tahadaˈoc no ˈorip a lalan, misaka dademakan ni Yihofa ko fafekangay no sera a likakawa Ningra a mikayat kitaanan. Ano ira ko faelohay pitadtad no likakawa no Kawas to sinael, anca mihadak to sakayat padama kitanan mitoor to palinian no Kawas, madeng o mamakahi kita a micada. Kawra, o pisalof no likakawa ano mamifiyor to kaˈorip ita i, samaan ko harateng ita hani? Sapadotocaw a lipahak, haharatengen ita, o kihcod a demak ita pakayniay ci Yihofaan, hanaca mikayatan Ningra ko likakawa Ningra, mihaen o papadotoc a lipahak. (Kolosay 3:​23, 24) Patirengay ci Tafiti to ngaˈayay taˈarawan. Tiya pakayni fangcalay sefi a pakiyaho cingra i, sanay: “Awaay ko maan aca a sapacakat ako ato finawlan ako i Tisowanan. Nawhani o nano Miso a nipafelian ko polong no maamaan niyam a maemin. O pipatikol aca niyam i Tisowanan to nano Miso a maamaan.” (1 Rayray 29:14) Ano pakiyaho kita i, o patikolay ci Yihofaan to sapafeli Ningra kitanan a dafong. Kawra pakayni kita ci Yihofaan a matayal mihadak to toki, ˈicel ato dafong, o papakahemek Cingranan!​—2 Korinto 9:7. w20.11 22-​23 fiedac 14-​16 fatac

Malo Misawacayay Tamdaw ni Yihofa, o kalaˈosi ita cowa ko hakowaay ko mapadamaay a tamdaw micada to paputisem ko piˈarawan. (Luka 8:​11-​15) Ano padadotoc kita a midofdof ci Yihofaan ato wawa Ningra, padotoc a mitosil pasifanaˈ to tamdaw, itini pinengneng ni Yihofa o malaˈosiayto kita. (Marko 13:10; Dmak 5:​28, 29) Mamahererekto koniya lekakawa, cowato ka hakowa ko maˈosaway a toki, oha mametmeten ita ko toki a mitosil, milidong to ˈorip no tao. Aka minayar eca ka pidemak, tahinito ka sinowayan no kaˈorip ngaˈ itiya a misatapang mitosil. Nohatiniho palahad to kaolah a mitosil, tongalen ko kacipinang to Fangcalay Cudad, palahad to timolo, palahad to miˈimeray to niyah. Kalacafayen ko 800 efan ‘milifokay to tamdaw a mifotingay’ matayal, mihaen kiso wa ngaˈay milifok to sapafeli ni Yihofa a lipahak. (Nihimiya 8:​10; Luka 5:​10) Seteken ko falocoˈ misarocod mirienang to mitosilay a tayal, hanaca padadotoc fanekfek tahatolas. w20.09 7 fiedac 18-​20 fatac

Aka pakayni picangacang to hafay a makalisanga ko falocoˈ ita. O hafay iraay ko “milipalaway to tamdaw a ˈicel,” oha mamifasaw to olah ita ci Yihofaan, ecato pisaareteng to kimad no Kawas, eca ka ciharateng milengo to Fangcalay Cudad i tamdaw. (Matay 13:22) Ano sapisimawaw kita to sapatorod ni Yihofa kitaanan, ano tahalifa to katalawan i, kaliki a misaysay. Wa isalakat kita a miharateng, ano misangwang anca minengneng to ika, kamok no tilifi fahalsa masadak ko kaacekan anca mariˈangay a sasing, anca milingatay to lalakaw no mitowakangay to kimad a tamdaw, sasamaan ko hademak ita. Ano salakatay a mihalaka kita, wa kaliki a misaysay, midipot to kalalaˈed ita ci Yihofaan, wa ngaˈay ira ko makoracay a falocoˈ i ˈaˈayaw ni Yihofa. (ˈOlic 101:3; 1 Timoti 4:​12) Patorodan ni Yihofa kita to adihayay kalimlaan a dafong, mahawpay ko soˈlinay kimad no Fangcalay Cudad, ato pasifanaˈ to tao a ˈinolong, wa songilaˈen ita misimaw. Mihaen, irato ko tingalaway falocoˈ no mita, soˈliˈlin ciepoc ko nokaˈorip, ngaˈayho pakayni pipadama to tao mafanaˈ ci Yihofaan a marenec ko falocoˈ. w20.09 30 fiedac 16-​19 fatac

Maharekayto kiso micada to paputisem han? Ano hatiraay i, pakapapotalay kiso paihkal to pakasoˈlin ci Yihofaan, makahi mikapot to likakawa Ningra. O pakayraan ni Yihofa mikayat to likakawa Ningra paihkalay to capeling ningra, araaw ato palinian. Samanay ko likakawa no Kawas paihkal to tolo a mikiriwiˈay capeling. Saka 1, ‘cowa pisakakinih ko Kawas.’ (Dmak 10:34) Tangongolay ko olah Ningra to tamdaw, miocor to wawa Ningra ‘milidong to polong a tamdaw.’ (1 Timoti 2:6; Yohani 3:​16) Miocorayho ci Yihofa to finawlan Ningra pasayra i polong a tamdaw milasil to ngaˈayay lihaf, mihaen o makahiyay mitengil a tamdaw iraay ko toki pakayni sapatefoc a malidong. Saka 2, masieroday ko demak ni Yihofa, micowatay to rihaday. (1 Korinto 14:33, 40) Mihaenay, malikakawaay ko midokoay Cingranan a tamdaw, rihaday a malacecay. Saka 3, o ‘kasapaan a singsi’ ci Yihofa. (Isaya 30:21) Mihaenay, o likakawa Ningra pakayniay saˈopo ato mitosilay a demak pasifanaˈ to tamdaw to Fangcalay Cudad. w20.10 20 fiedac 1-3 fatac