Saka 5 Folad

Kaemangho ci Yis mipiliˈay a midofdof to wama wina. Mitengilay to sowal no wama wina cingra, cowa ka ikakaay ko adihay no kafanaˈ no niyah cangranan saan miharateng. Sowal no Fangcalay Cudad ‘ci Yis padotocay midofdof to wama wina. Ihkalay, ci Yis misongilaˈay minengneng to ˈinorong no fisac. Minanamay cingra to inaneng no wama misasayho alatek, mihaen wa ngaˈay misarocod a midipot to paro no lomaˈ. O wama wina ni Yis pasowalay cingranan alatek, o kafahkaan konika hofoc ningra. Pasowalho cingranan, na iraay ko coyoh no Kawas milasilay to pakayraay cingranan a sapairasol. (Luka 2:​8-​19, 25-​38) Kawra, cowa ko wama ato wina aca ko mihaenay pasowal ci Yisan, misongilaˈay cingra micekiw to Fangcalay Cudad. Hano mafanaˈ kita hani? Madeng 12 ko mihecaan ni Yis i, o singsi itini fangcalay sefi no Yirusalim ‘fahkaay to kafanaˈan ningra.’ (Luka 2:​46, 47) Roma i, pakasoˈlinayto ci Yis itiya, o Wama ningra ci Yihofa.​—Luka 2:​42, 43, 49. w20.10 29-​30 fiedac 13-​14 fatac

Pakasoˈlin ko Krisciyang to patikolayto ci Yis maˈorip tada kalimlaan, mihaen ngaˈ ira ko hatokel. Milengo ci Pawlo to patikol maˈorip a demak i, satapang mihadakay to tolo a demak: (1) “Pakayniyay i raraw ita mapatay” ci Kristo. (2) “Mitademanto” cingra. (3) “Malecad o sowal no Fangcalay Cudad, saka tolo romiˈad patikolay maˈorip” cingra. (1 Korinto 15:​3, 4) O kapatay ni Yis, pitadem ato patikol maˈorip pakayni kitaanan iraay ko maanan a tatodong hani? Pairasolay ci Isaya, ci Misiya wa ‘itini kaˈoripan no tamdaw a pala patayen,’ hanaca ‘malacafay to tatiihay tamdaw a tademen.’ Roma i, somowalayho ci Isaya wa ‘mitamorong to raraw no ˈalomanay’ ci Misiya, tiya patafang ci Yis to ˈorip malo sapatefoc i, matatodongayto koniya sapairasol. Kawra sapatafangaw ci Yis to sapatefoc i Kawas i, wa salakatho a patikol maˈorip tayra i kakarayan. (Isaya 53:​8, 9, 12; Matay 20:28; Loma 5:8; Hipray 9:24) Mihaenay, o kapatay ni Yis, pitadem ato patikol maˈorip padamaay kitanan pakasoˈlin to iraay ko tokel noniyah miliyas to patay, hanaca ngaˈay malalitemoh to mapatayayto a salawina. w20.12 2-3 fiedac 4-6 fatac; 5 fiedac 11 fatac

Marariday ci Pawlo itini sefi no Yutaya a mitosil. Tinakoen, itini cingra i Tisalonika i, padadotocay i tolo Paselaˈan Romiˈad itini sefi, tano Fangcalay Cudad a padama to Yutaya tamdaw. (Dmak 17:​1, 2) O Yutaya tamdaw ci Pawlo, cipinangay to harateng no Yutaya tamdaw, mananamayho to sefi. (Dmak 26:​4, 5) Mansa mitosil cingra to Yutaya tamdaw iraay ko pakasoˈlinay falocoˈ. (Filipi 3:5) Samanen tahacadaay to sapalak, mikitini i Tisalonika milaliway ci Pawlo tayra i Piriya, ikor tayraay i Atin. Itini i Atin i, ‘itiniay cingra i sefi malacafay to Yutaya tamdaw ato roma midokoay to Kawas a tamdaw malalengo.’ (Dmak 17:17) Kawra itini cingra i kaˈalomanan a mitosil i, cowato kalecad ko mitengilay a tamdaw, ˈalomanay ko ˈalafang a tamdaw, o citanengay tamdaw. O ‘faelohay a kimad’ sanay ko piharateng nangra to misowalan ni Pawlo, sanayho ko sowal: ‘O misowalan iso, o kafahkaan a demak.’​—Dmak 17:18-​20. w20.04 9 fiedac 5-6 fatac

Mihaenay, ano pasangaran kiso miremo to cecay dangoc, awaayto ko kapo no niyah aka mahaen ko harateng. Haratengen, ngaˈay kita malo moecelay tamdaw i pinengneng no Kawas, o pakayniay sapatefoc, pakayniay mikiriwiˈay a sidaˈit ni Yihofa, cowa ko no niyah a ˈicel ko mitiˈeran. (Ifiso 1:7; 1 Yohani 4:​10) Wa ngaˈay rihaday kita a misaali to sapadama no salikaka, samanen sahtoay o paro no lomaˈ kita. Makahiyay cangra mitengil to sowal ita, somowalho to padihkoay to falocoˈ a sowal, palipahak kitaanan. (Taneng 12:25; 1 Tisalonika 5:​14) Itini Naiciliya fafahiyan salikaka ci Ciyawi marariday a matoled ko falocoˈ, sanay: “Ano awaay ko salikaka, cowato ko mamafanaˈ kako to sasamaan. O sapadama no salikaka mahapinangay ako, soˈlinay pacaˈof ci Yihofa to satolon ako. Mikitini cangranan mananamay ako sasamaan pakalalok to matoleday ko falocoˈ a tamdaw.” Kawra o haharatengen ita, awaay ko pinang no salikaka hahacowa misaali kita to sapakalalok. Ano misaali kita to sapadama i, talaˈayaw kita mikilim to matenesay a salikaka, mihadak to nafalocoˈan cangranan. w20.12 23-​24 fiedac 7-8 fatac

Tocerid, sakalawidangaw kiso to cecay tamdaw, isalakat mamipalak to toki malacafay cingranan. Masasowal tatosa, makamihadak to maharatengay ato nafalocoˈan no niyah, wa ngaˈayto malawidang kamo. Kawra sakalawidangaw ci Yisan cowa ko madoloay, cowa pakaˈaraw kita ci Yisan. Hatiraayto, itini saka 1 hahekalan iraay ko malecaday pasangaray no ˈalomanay Krisciyang, kawra sanay ko sowal no tarokos ci Pitiro: ‘Cowaho pakaˈaraw kamo cingraanan, kawra maolahay cingraanan, cowa pakaˈaraw nohatini, kawra mihakelongay cingraanan.’ (1 Pitiro 1:8) Mihaenay, soˈlin cowa pakaˈaraw ko tamdaw ci Yisan, ngaˈayayho a malo ngaˈayay widang ningra. Awaay ko pakayraan ita a masasowal ci Yisan. Ano mitolon kita i, mifanaˈay to harateng no niyah ci Yihofaan. Manaokaniw, pakayniay kita i ngangan ni Yis a mitolon, kawra cowa ko pasayraay cingraanan a mitolon. Soˈlinay i, cowa pitokel ci Yis kitaanan pasayra cingraanan a mitolon. Samanen o mitolonay o midokoay a demak, dengan ci Yihofa ko dadokoen ita. (Matay 4:​10) Soˈlin mahaen, wa ngaˈayho kita paihkal to olah ci Yisan. w20.04 20 fiedac 1-3 fatac

Itini kasasiay nolitengan a Krisiya, marorayay ko misiayay tamdaw, adadaay, kawra o mahatatanamay to cerid ato ˈicel no niyah ko sapiremo nangra to pasangaray. Malecaday kita cangraanan micadaay to sapahatatanam, kawra cowa ko niyah ko mitiˈeran ita, ao taˈangayay ko ˈicel a Yihofa. Cowa ko pahatatanam aca Ningra kitaanan, padamaayho kitaanan tanektek a ciˈicel! Adihayay ko malifaay ni Pawlo a pasangaray, cowa ko matongangan, maroero aca, sowal ningra ‘mapacekay no ceka ko tireng’ sanay, latekay miharateng cingra malonayay ko niyah. (2 Korinto 12:7) Kawra, cowa pisawad ci Pawlo, tahalifa to hatiniay demak o ngaˈayay toki a mitadiˈec ci Yihofaan sanay minengneng. (2 Korinto 12:​9, 10) Iraay ko mahaenay harateng ningra, mansa padamaen ni Yihofa cingra milakowit to polong a pasangaray. w20.04 29 fiedac 13-​14 fatac

Ngaˈay ‘malacafay matayal’ to Kawas, ci Yisan ato coyoh tada o kalikoanto a toki. (2 Korinto 6:1) Ano malingad kita mitosil i, iraay ko toki mihaen to demak. Sowal ni Pawlo o niyah ato roma mitosilay sahtoay o ‘kalacafayay to Kawas a matayal.’ (1 Korinto 3:9) Palimoˈotay ci Yis to mikotoday cingraanan a tamdaw, malingad a padama to polong kasafinawlan malo nisawawaan ningra, dotoc mikiˈokay to kakalacafay cangraanan, mihaenay o malacafayay kita ci Yisan a matayal. (Matay 28:19, 20) Sasamaan ko coyoh a midama kitaanan hani? Ano ‘milasil to ngaˈayay lihaf i . . . polong a tamdaw’ kita i, wa mikayat ko coyoh kitaanan. (Paˈarawan 14:6) O mikitiniay i kakarayan a sapadama, wa malaˈosi ita ko maanan demak hani? Ano mitosil kita i, o roma tamdaw wa micada to soˈlinay kimad hanaca mamafalic ko waywayan. (Matay 13:18, 23) Cima ko palahaday to sapaloma no soˈlinay kimad ato ciheci to ngaˈayay minaroˈan hani? Pacaˈofay ci Yis i sinael anini. w20.05 30 fiedac 14-​15 fatac

Anini, adihayay paro no lomaˈ pakayniay kalasawad no ramod a maliwasak. Adihayay paro no lomaˈ hato ngaˈayay nengnengen, kawra malaliyasay ko kalalaˈed no paro no lomaˈ. O cecay talicayan no paro no lomaˈ sanay: “O wama, wina ato wawa cowa ka masasowal, o sangaˈayay a widang nangra o tingnaw, pipan, soci anca tasalamaan.” Soˈlin malacafayay ko kitiraan, kawra hato kafahalanto a tamdaw sanay. Cowa ka ciharateng kita o mamadenga noniya awaay ko olah a hekal. Mihaenay o mamaolah kita to paro no lomaˈ, maolah to salikaka, paihkal to damsayay cangraanan. (Loma 12:10) O manan ko damsayay? Oniya sowal, mikiriwiˈay sakadademaken i kalalaˈed no lomaˈ a dihkoay a olah. O salikaka o paro no lomaˈ ita, mihaenay pairaen ita ko mahaenay tangongolay a olah cangraanan. Paihkal kita to damsayay, wa ngaˈayto makedec a malacecay midoko ci Yihofaan.​—Mika 2:​12. w21.01 20 fiedac 1-2 fatac

O kapot no mimaliay rihaday a malacecay ngaˈ pakalowid misiay, mahecaday, wa misacecay ko falocoˈ ita, ngaˈ ngaˈay ko pidoko to Kawas. Haratengen, ci Satan makalimay sapakaˈarawaw kitanan mafanaˈay to palinian ni Yihofa, kawra mitooray tono niyah a coos midemak. Mihaenay, padadotoc kita misaˈicel misarocod midoko ci Yihofaan, aka papilowiden ci Satan! (Matay 22:36-​38) Ngaˈay kita malecad ci Tafitian mitolon ci Yihofaan sanay ko sowal, ‘Nanay sacecayen iso ko falocoˈ ako mangodo to fangcalay ngangan Iso,’ dotoc misaˈicel a palecad to sowal ato waywayan, mihadak to ˈicel. Ano o mananto ko misaˈosian to romiˈamiˈad i, paihkal kita to tangongolay ko pikangodo to ngangan no Kawas, misawacay to o soˈlinay Misawacayay Tamdaw ni Yihofa ko niyah. (Taneng 27:11) Mihaen, wa ngaˈay kita malecad ko harateng to pairasolay ci Mikaan: ‘Kita i, o tatahadaˈoc pakayni i ngangan ni Yihofa a dademak!’​—Mika 4:5. w20.06 13 fiedac 17-​18 fatac

O kaˈamisay hongti ato kapot ningra ano malacafay a miˈodis to finawlan no Kawas i, wa mangolaw ko Kawas, hato mifekad ko Armakiton a lalood. (Paˈarawan 16:14, 16) Itiya, wa malaˈafo ko kaˈamisay hongti, ‘awaay ko papaˈorip cingraanan.’ (Taniil 11:45) Palaˈosiay to ‘kok’ a romaroma kitakit wa malecad ko hateloc. Dotoc, wa mitadtad ko Taniil to sasamaan a malaˈafo ko kaˈamisay hongti ato kapot ningra, ato samaan kita a malidong. (Taniil 12:1) O maanan ko tatodong noniya sinael hani? Ci ‘Mikail’ o roma a ngangan no hongti ita ci Yis Kristo. Mikitini 1914 miheca tomireng ko Hongti Kitakit no Kawas i kakarayan misatapang, ‘padotocay tomireng a miˈading’ cingra to finawlan no Kawas. Cato ka halafin, wa itini Armakiton a lalood a ‘tomireng’ cingra, tatodong i papalaˈafo to ˈada no Kawas. Itiya, o ‘pasangaray a tatokian’ wa mahererekto.​—Paˈarawan 6:2; 7:​14. w20.05 15-​16 fiedac 15-​17 fatac

Malo koli ci Yosif ato itini kapalitan i, awaay ko pakayraan a mifalic to kitiraan no niyah. Hano ngaˈay cingra padotoc a tawlik hani? Misarocoday cingra midemak to sapatolod no tao a demak, cowa ka haharateng saan to cowa ko mamadangar a demak. Sakakaay i, o kaolahan ni Yihofa a demak ko midemakan ni Yosif. Mansa palemeden ni Yihofa cingra, palaˈosi to midemakan ningra. (Satapangan 39:21-​23) O nalifetan ni Yosif mahapinangay ita, itini toniya awaay ko olah a hekal, tahacadaay kita to cowa ka sadafdaf a picada, latekay o salikaka ko midokaˈay kitaanan. Kawra ano palo ˈongcoyen ita minengneng ci Yihofa ato pikiˈadingan, cowa to ko papakidem ko katoled ita, anca sapisawadaw midoko ci Yihofaan. (ˈOlic 62:​6, 7; 1 Pitiro 5:​10) Roma i, haratengen ita, papitiihen ni Yihofa ci Yosif to tosa paˈayaway to hanoikor a mitiihan, 17 ko mihecaan ni Yosif. Mahapinangay, soˈlin kaemangho ko midokoay ci Yihofaan a tamdaw, pakasoˈlinay ci Yihofa cangranan. Anini, ˈalomanay kapah malecaday ci Yosifan, pakasoˈlinay ci Yihofaan. O roma tamdaw soˈlin mapalit, misetekay to falocoˈ padotoc a madimadi ci Yihofaan.​—ˈOlic 110:3. w20.12 16 fiedac 3 fatac; 17 fiedac 5, 7 fatac

O tarokos ci Pitiro aci Yohani, harateng nangra, pakayni pihakelong ci Yisan ato padama to tao mafanaˈ ci Yisan tahacada to sapalak, o kalikoan a demak sanay. (Dmak 4:​18-​21; 5:​27-​29, 41, 42) Cowa ko kangodoan sanay ko piharateng noya Krisciyang. O sapadama nangra to tao, ikakaay ko adihay to misafelitay cangranan a tamdaw. Tinakoen, o roma Krisciyang micadaay to sakayat no Kawas, mitiliday to Fangcalay Cudad, oniya matiliday a cudad pairaay to sapadama ato hatokel no masacaˈolay masaemangay a tamdaw. Oya milasilan nangra a Hongti Kitakit, tomirengayto i kakarayan, hanaca caka halafin wa mikowan to polong a tamdaw. (Matay 24:14) Kawra oya na mikariˈangay to Krisciyang a mikowanay, malahdawayto. Oya madimadiay a Krisciyang itiniayto i kakarayan mikowan, oya misafelitay cangranan a tamdaw mapatayayto. Soˈlin papatikol cangra maˈorip no ikor, wa itini pikowan noya na mikaˈintehan nangra a Krisciyang.​—Paˈarawan 5:​10. w20.07 15 fiedac 4 fatac

Tanektekay ko pakasoˈlin ni Apraham to sakiˈok no Kawas, malecaday o pakaˈarawayto ci Misiyaan, oya mamala hongti no Hongti Kitakit no Kawas no ikor. Mansa mihaen ko sowal ni Yis to Yutaya tamdaw: ‘O lalitengan namo ci Apraham lipahakay a mitokel a pakaˈaraw to romiˈad ako, lipahakay cingra a pakaˈaraw.’ (Yohani 8:​56) Mafanaˈay ci Apraham to roma teloc ningra o mamikapot malo Hongti Kitakit, oniya Hongti Kitakit ci Yihofa ko patirengay, mansa makahiyay cingra mihadidi mitala to kalaˈosi no sakiˈok ni Yihofa. Hano mafanaˈ kita to mitalaay ci Apraham to Hongti Kitakit no Kawas hani? Saka 1, cowa ka malo finawlan no cecay kitakit cingra, salinalinah sanay ko kaˈorip ningra, cowa ka saˈosi ko kitiraan, cowa ka pidama to cecay hongti. Saka 2, cowa ka patireng ci Apraham to niyah a kitakit, padotocay cingra midofdof ci Yihofaan, mihadidi mitala to palaˈosi no Kawas to sakiˈok Ningra. O pakasoˈlin ni Apraham ci Yihofaan tada kasemeranto! w20.08 3 fiedac 4-5 fatac

Mahererek ko Pikowan to Comaˈol Miheca i, patikolen ni Yis ko Hongti Kitakit i kakarayan Wama, itiyato malaˈosi no Hongti Kitakit ko araaw no Kawas, mahawpay papatikol a malefot ko tamdaw. (1 Korinto 15:24-​28; Paˈarawan 20:​1-3) Mihaenay, itini Pikowan to Comaˈol Miheca, palidlid saan ko tamdaw malefot. Mikiˈokay ci Yihofa, itini Lakoing cowato ko papasowal ko tamdaw ‘adadaay kako,’ mihaenay o patikolay maˈorip a tamdaw o tatanektek ko tireng, kawra cowa ka tangsol a malefot koniya tamdaw, mihaenay oha papakahapinang ko salawina nangra cangranan. (Isaya 33:24) Haratengen hena ano militemoh kita to patikolay maˈorip a salawina. Itiya wa maacang a mahemek kiso anca tahatangic a mahemek hokira? Cowa ko papakaˈmet kiso a sakaromadiwaw a pakahemek ci Yihofaan han? Wa ngaˈay a pakasoˈlinen, o kalimlaan a sapatelong no sidaˈitay Wama ato Wawa Ningra ko patikolay maˈorip, o mamikifalocoˈ a miakoˈid kita Cangraanan, tangongol ko kaolah Cangraanan. w20.08 16-​17 fiedac 9-​10 fatac

Pakalalokay ci Pawlo to Krisciyang padotoc a caka ciramod, mihaen o mamisamacay matayal saki Yihofaan. (1 Korinto 7:​8-9) Cowa ko papakatoor ko awaay ko ramod a Krisciyang to ciramoday a Krisciyang cowa ka haen ko harateng ni Pawlo, soˈlinay i, na paikenan ningra ko kalimlaan a tayal i kapah caay ka ciramod a Timotian. (Filipi 2:​19-​22) Mihaenay, caay kangaˈay o ciramoday anca cowa ciramod ko sapisaˈosi ita to mamadangar ningra ko tayal hokira. (1 Korinto 7:​32-​35, 38) Ci Yis aci Pawlo cowa pasowal to caciramod anca aka ciramod ko Krisciyang. Mihaenay, sasamaan ko pinengneng ita to raramod ato caka ciramod hani? Mikecolay 2012 miheca Saka 10 Folad 1 romiˈad, sanay: ‘Sowal no Fangcalay Cudad, ciraramoday ato awaay ko ramod sahtoay o sidaˈit anca sapatelong no Kawas. . . . Awaay ko ramod a tamdaw, miharateng ci Yihofa cowa ko sakangodo ato kasomadan ko hatiniay pakayraan.’ Mankora, o awaay ko ramod a salikaka iraay ko saaroˈan i kasakopang, o kakangodoen ita cangra. w20.08 28 fiedac 8-9 fatac

Itini i roma kilac, mitosil kita i, makalimay ko tamdaw saka cipinangaw to ngaˈayay lihaf. I roma kilac, cowa ka olah ko tamdaw to Kawas ato Fangcalay Cudad. O kitiraan iso a pala, samanay ko harateng no tamdaw hani? Ano samaanto, misaaliay ci Yihofa kitaanan padadotoc a mitosil, tahira pipasowal ni Yihofa to malaˈosiayto koniya tayal. Tahira misaˈosian ni Yihofa a toki, mahererekto ko mitosilay a tayal, ‘maraod ko toki irato ko salikoray romiˈad.’ (Matay 24:14) Pairasolay ci Yis itini saikoray romiˈad wa ira ko masamanay pinangan no hekal, ato mamifekad ko maanan a demak. Mafanaˈay cingra to oniya demak wa mifiyor to nisawawaan eca to pisarocod a mitosil, mansa pasowalen ningra ko nisawawaan: ‘Ka padotoc a mikecol.’ (Matay 24:42) Itini lintad ni Nowa, adihayay ko mikalisangaay to tamdaw a demak, mansa cowa pisinanot ko ˈalomanay tamdaw to sarikec ni Nowa. Anini adihayay ko mikalisangaay to tamdaw a demak, mansa wa padadotoc a misarocod kita, ngaˈ masongilaˈ midemak ko patorodan ni Yihofa kitaanan a tayal.​—Matay 24:37-​39; 2 Pitiro 2:5. w20.09 8 fiedac 1-2, 4 fatac

Ci Satan ‘tada mangolaway,’ o papakaliyas kako to ngolaw ningra ano saan kita miharateng, misakaniway toniyah. (Paˈarawan 12:12)Cato ka halafin no ikor, o paksoˈlin ita o kahacecay tamdaw wa micada to sapalifet. Mangataayto, wa mifekadto ko taˈangayay padiing, ‘o mahaenay a padiing, mikitini satapangan no hekal cowaho ka pifekad.’ (Matay 24:21) Itiya, wa miˈodis ko paro no lomaˈ kitanan alatek, wa makeceng ko mitosilay a tayal ita alatek. (Matay 10:35, 36) Wa malecad kiso ci Asaan, pakasoˈlin to papadamaen ato dipoten ni Yihofa kiso hokira? (2 Rayray 14:11) Padotocay ci Yihofa padama kitaanan misaday, irako tanektekay a pakasoˈlin misiˈayaw to sapalifet. Mikayatan Ningra ko “madimadiay citanengay a koli” itini matatodongay a tatokian mihadak to sapahaled to pakasoˈlinay a “kakaenen,” ho ngaˈay kita padadotoc a midoko Cingranan. (Matay 24:45) Kawra o mamisaˈicel kita a midemak, mihaen ngaˈ ira ko tanektekay a pakasoˈlin ci Yihofaan.​—Hipray 10:38, 39. w20.09 18 fiedac 16-​18 fatac

Sapalaˈosiyaw to araaw no niyah, misaka dademakan ni Yihofa ko fangcalay saocor miocor to cifadangalay tamdaw mitoor to harateng Ningra a midemak. O tamdaw ngaˈayay mikorkor to kali, mitoor to mihalakaan nangra mifalic to kaˈalol no nanom, malecaday, ngaˈayay saka dademaken ni Yihofa ko fangcalay saocor mifalic to harateng no cifadangalay tamdaw, mihaen o mamitoor cangra to harateng ni Yihofa a midemak, mihadak to ciepocay a saˈosi i finawlan no Kawas. (Nengnengen ko Icra 7:21, 25, 26) Wa ngaˈay kita midemak to maanan? Wa ngaˈay kita patado to ‘hongti ato cifadangalay tamdaw’ mitolon, samanen o misaˈosiyan nangra wa mifiyor to kaˈorip ato midokoay a tayal ita. (1 Timoti 2:​1, 2 ato roma pihongyak; Nihimiya 1:​11) Mamalecad kita to saka 1 hahekalan a Krisciyang, patado to mapalitay a salikaka, micangacang to Kawas a mitolon.​—Dmak 12:5; Hipray 13:3. w20.11 15 fiedac 13-​14 fatac

Ano micada to paputisem ko pacekiwan iso, maedeng o mamatongal ko lipahak! (1 Tisalonika 2:​19, 20) O micadaay to paputisem a tamdaw cowa ko sapaˈayaw aca a tikami no pacekiway, o “sapaˈayaw a tikami” no polong a kasakopang. (2 Korinto 3:​1-3) Itini mataˈlifay 4 miheca, itini cowacowa pala a mitosilay hikingen to folafoladan 1,000 efan ko pacekiwan to Fangcalay Cudad, hikingen cecay miheca 28 efan ko micadaay to paputisem malo Misawacayay Tamdaw ni Yihofa. Ano adihayay ko minanamay a tamdaw to Fangcalay Cudad, sasamaan kita padama to ˈalomanay tamdaw micada to paputisem hani? Anini, kamayanho paihkal ci Yihofa to mihadidiay i tamdaw, ira ko toki no tamdaw malo Krisciyang. Makalimay kita padama cangranan macakat, kaliki micada to paputisem, samanen cowato ka hakowa ko toki.​—1 Korinto 7:​29a; 1 Pitiro 4:7. w20.10 6 fiedac 1-2 fatac

Hongti ci Sawlo Cowa pidofdof ci Yihofaan. Tiya toroˈen ni Samuil ko raraw ningra i, cowa pihai cingra, mikilimayho to saˈading to niyah a sowal, cowa ka samaan ko demak sanay miharateng, milolohayho to tao. (1 Samuil 15:13-​24) ˈAyaw nonini iraayto ko mahaenay a waywayan ni Sawlo. (1 Samuil 13:10-​14) Misatakaraway ko falocoˈ ningra, cowa kakahi misalof to harateng no niyah, telocto mirikecan ni Yihofa cingra, cowato pihayda cingranan. Mikitini ci Sawloan minanam, ngaˈayay kita miharateng: “Ano maˈosi ako ko limoˈot no Fangcalay Cudad i, wa mikilim to saˈading to niyah han? Miharateng kako ano caka pidofdof to limoˈot no Fangcalay Cudad cowa ka samaan han? Wa miloloh kako to tao han? Toniya pakayraan ano iraay ko pasangaray ita, wa misalof to harateng ato waywayan no niyah, ano eca i, wa misatakaraw kita malo ecato ko widang ni Yihofa kita alatek.” w20.11 20 fiedac 4-5 fatac

Kapah tamdaw, mipiliˈ midoko ci Yihofaan. Wa cipinang kiso o cima ci Yihofa, iraay ko manan a araaw Ningra, ato o araaw Ningra iraay ko maanan kalaliting tisowanan. (Loma 12:⁠2) Mihaen, wa ngaˈay midemak to kalimlaan a saˈosi i nokaˈorip iso, mipiliˈ midoko ci Yihofaan. (Yosuwa 24:15) Ano micerid kiso minengneng to Fangcalay Cudad, tangongol ko picekiw, wa matongal matongal ko kaolah iso ci Yihofaan, wa matongal ko pakaˈsolinay falocoˈ Cingranan. Mipiliˈ paisalakat to araaw ni Yihofa i nokaˈorip. Pasowalay to tamdaw ko hekal ni Satan, saka dademak to inaneng micangacang tono tekedan a patosokan ngaˈ ira ko lipahak sanay, kawra mafanaˈay kita, makalimay saka cihafayaw a tamdaw salikor ‘oniyah ko mamidokaˈ to tireng no niyah.’ (1 Timoti 6:​9,10) Ano tengilen iso ko sowal ni Yihofa, paisalakat to araaw Ningra i nokaˈorip, oha ‘inaneng ko demak, malaˈosi ko kaˈorip.’​—Yosuwa 1:8. w20.10 30-​31 fiedac 17-​18 fatac

O patenakan ni Yis a lihaf i saka 1 hahekalan pairaay to hatokel no polong a tamdaw. Palimoˈotan ningra ko nisawawaan padotoc a mitosil, ‘tahira i samaraayay a pala.’ (Dmak 1:8) Cowa ko mamitiˈer ko nisawawaan to ˈicel no niyah a milahci toniya ˈinorong. Misaaliay cangra to fangcalay saocor, oya misowalan ni Yis a “padamaay,” ngaˈ malahci ko mitosilay a tayal. (Yohani 14:26; Cikariya 4:6) Itini 33 miheca kocinsic, milifokay ko nisawawaan to fangcalay saocor, tangsolay misatapang mitosil, kalikiyay ira ko pinacaˈol a tamdaw micadaay to ngaˈayay lihaf. (Dmak 2:​41; 4:4) Ikor, micadaay to sapalak ko nisawawaan ni Yis, kawra cowa ka pakayni katalaw a sawad sato mitosil. Mingitangitay to sadama no Kawas, sanay mitolon: ‘Nanay, pafelien ko koli to timolo, ho ngaˈay kami padotoc a milasil to sowal Iso.’ Ikor, matomesay to fangcalay saocor cangra, padotocay ‘timolo milasil to sowal no Kawas.’​—Dmak 4:​18-​20, 29, 31. w20.10 21 fiedac 4-5 fatac

Hano ngaˈay pakasoˈlin kita, maharekayto ci Yihofa patikol paˈorip ci Yisan hani? ˈAlomanay ko pakaˈaraway a tamdaw to patikolayto maˈorip ci Yis. (1 Korinto 15:​5-7) O saka cecay masowalay ni Pawlo mamisawacay a tamdaw ci Pitiro. Cecay ˈopo a nisawawaan mahaenay ko sowal, soˈlinay paˈarawen ni Yis ci Pitiro. (Luka 24:33, 34) Roma i, ‘12 tarokos’ pakaˈaraway to patikolay maˈorip a Yisan. Ikor kinacecayay, ci Yis ‘paˈaraway to 500 a salikaka,’ mapakalalokay ko ˈalomanay, o masowalay no Matay 28:16-​20 a saˈopo i Kalili konini. Ci Yis ‘paˈaraway ci Yakopan,’ Oniya Yakop o safa ni Yis alatek. Salakat cowa pakasoˈlin cingra to ci Misiya ci Yis, kawra maˈaraw ningra ko patikolay maˈorip a Yis, pakasoˈlinayto. (Yohani 7:5) Sasinanoten i, itiniay ci Pawlo i Kongyin 55 miheca mitilid toniya tikami, itiya maˈoripayho ko pakaˈaraway to patikolayto maˈorip a Yisan. Mihaenay, ano cisasa ko tamdaw, ngaˈayay milicay toniya pakaˈaraway a tamdaw. w20.12 3 fiedac 5, 7-8 fatac

Ano caka ngaˈay ko tireng ita, anca halafinto adada, wa pasangar a tawlik ko harateng. Soˈlin cowa ko mamidemak ci Yihofa to kafahkaan miadah kitaanan, kawra o mamihinom Cingra kitaanan, pafeli to ˈicel kitaanan, ho ngaˈay padotoc a mihadidi kita. (ˈOlic 94:19) Wa ocoren Ningra ko salikaka alatek, tayni i lomaˈ ita mipadang a dademak, anca malacafay kitaanan a mitolon. Papiharatengen Ningra kita to mihinomay a sinael alatek, tinakoen o roma sinael milengoay to faelohay hekal noikor, o lalipahakto ko kaˈorip no kahacecay tamdaw, cowato ko mamisemsem to adada. (Loma 15:4) O adadaay anca malonayay ko tireng a matoˈasay salikaka ecato ka adihay ko mitosilay a tayal matoleday ko falocoˈ alatek. Kawra mahelaayho no ˈalomanay salikaka ko pakayraan a misawacay to tamdaw. cecay fafahiyan salikaka ci Lawlie. 37 miheca a tatokian, matiˈnangay i cecay kikay, tiˈer sanay toniya kikay a saselaˈ. O ekang ko adada ningra, kinapinaay a tokaden, ciadadaayho tono fanges. Soˈlin pasangar ko kaˈorip, cowa paselaˈ a mitosil. Misawacayan ningra ko miadahay cingranan a ising, telocto 17 ko mapadamaay ningra a tamdaw mafanaˈ ci Yihofaan. w20.12 24 fiedac 9 fatac; 25 fiedac 12 fatac

Madeng i kongyin 56 miheca, milepelay ko mariˈangay tamdaw ci Pawloan, mikidkid cingranan pasadak i fangcalay sefi, sapipatayaw cingranan. Saka 2 romiˈad, maˈorongay ci Pawlo tayra i pisawkitan, mangata cinasen no ˈada. (Dmak 21:​30-​32; 22:30; 23:​6-​10) Itiya, miharateng ci Pawlo: ‘Wa ngaˈayho kako padotoc mihadidi han?’ Soˈlinay misaaliay ci Pawlo to sapadama. Milifokay ci Pawlo to maanan a sapadama? Toya dadaya, tomirengay ci Yis i tatihi ni Pawlo, sanay: ‘Ka timolo kiso! Itini Yirusalim misongilaˈ misawacay takowanan, itiniho i Loma misawacay takowanan.’ (Dmak 23:11) Matengil ni Pawlo koniya sowal, madeng mapakalalokay! Pakahemekan ni Yis cingra ngaˈayay ko pisawacay i Yirusalim, ikor mikiˈok to rarihaday cingra tahira i Loma, padotoc itira misawacay. Matengil ni Pawlo ko sowal ni Yis, rihadayay ko falocoˈ, malecad o wawa micingray i falohang no wama, iraay ko rihaday. w20.11 12 fiedac 1, 3 fatac; 13 fiedac 4 fatac

Hatokel no Hongti Kitakit “mahecaday o sakaˈorip a ˈenor,” misiˈayaw kita to pasangaray ato kacarirawan i, papadama kitaanan a tanektek caka ngiyangi. Mikiˈokay ci Yihofa, itini i faelohay a hekal awato ko cariraw a maˈorip. (Isaya 65:17) O mamicerid kita a midotim toniya tokel. Miharateng to itiniay kita i faelohay hekal rihaday ko kaˈorip, cowa ko mamacekid matalaw. (Mika 4:4) Misaˈicel kiso pasowal to tao toniya makapahay a hatokel no ikor, papadama to niyah tanektek ko pakasoˈlin toniya tokel, mihaenay ka pisarocod mirienang to mitosilay a tayal. Mihaen ko demak ita, ‘pakayni hatokel no niyah wa tanektek ko pakasoˈlin tahira i tolas.’ (Hipray 6:​11) Mangata mangataayto ko saikoray a romiˈad, wa adihay ko malifaay ita pacariraway kitaanan a pasangaray. Wa ngaˈay kita miremo toniya sapalifet, eca ka marawraw. Ngaˈay kita mihaen to demak, cowa ko ˈicel no niyah ko mitadiˈecan, o mitadiˈecay kita ci Yihofaan. Nanay tano waywayan kita a misawacay pakasoˈlinay ko niyah to sakiˈok ni Yihofa: ‘Aka marawraw, sarocoden mitadiˈec Kako, o caciˈicel kamo.’​—Isaya 30:15. w21.01 7 fiedac 17-​18 fatac

Sinanoten ko Yakop 5:​11 sinael palalitingan ko damsayay ni Yihofa to roma kasemeran a capeling, o siniˈadaay a falocoˈ. (Kasadakan 34:6) O cecay pakayraan ni Yihofa siniˈada kitaanan i, misododay to raraw ita. (ˈOlic 51:1) Itini Fangcalay Cudad, o siniˈadaay cowa ko pisodod aca, mahawpay ano maˈaraw ita misemsem ko tao, mifekaday i falocoˈ ko ciˈicelay a olah, makalimay sapadamaaw to tao. Sowal ni Yihofa, o olah Ningra kitaanan mikikakaay to olah no wina to wawa. (Isaya 49:15) Siniˈadaay ci Yihofa kitaanan, mansa ano misemsem kita i, makalimay sapadamaaw kitaanan. (ˈOlic 37:39; 1 Korinto 10:13) Malecaday, ira ko siniˈadaay falocoˈ ita to salikaka, wa makahi a misodod cangraanan, ano pakararaw cangra kitaanan i, cowa ko a ˈinteh ko falocoˈ ita. (Ifiso 4:​32) Roma i, paihkal to siniˈada kalimlaan a pakayraan i, padama to salikaka miremo to pasangaray. Mihaen ko demak ita, o mitodongay to saˈakawangay a taˈarawan no damsayay ci Yihofaan.​—Ifiso 5:1. w21.01 21 fiedac 5 fatac

Kawra o mamisadafdaf cingra, cowa ka ngaˈay pakinali ko ˈifowa mietan to payci a misakahmaw to saali no paro no lomaˈ i noˈadingoan ato nofalocoˈan. Ano pahatatanam ato mirikec ci Yihofa kitaanan i, mitokelay to saka ciepocaw no mita. (Hipray 12:​7-9) Ci Yis malecaday to kakarayan Wama, pakayniay i olah ko pipahatatanam to nisawawaan. (Yohani 15:14, 15) Tanektekay ci Yis, kawra iraay ko sidaˈit. (Matay 20:24-​28) Cipinangay cingra cowa ko malefotay kita, madoloay a mararaw. (Matay 26:41) O tawki no lomaˈ mitodong ci Yihofaan aci Yisan, o mamisodod to dangoc no fafahi ato wawa, cowa ko ‘mamangolaw’ cangranan. (Kolosay 3:​19) Maharatengay ningra cowa ko malefotay ko niyah, wa misaka dademak to safalod no Kalatiya 6:1, ‘tano damsayay a waywayan’ misalof to paro no lomaˈ. Malecad ci Yisan, cipinangay cingra o sangaˈayay pakayraan a pasifanaˈ, o ngaˈayay taˈarawan no niyah. w21.02 6-7 fiedac 16-​18 fatac

Pakayni sapatefoc, milidongan ni Yihofa ko kahacecay tamdaw no kasakopang. (Marko 10:45; Dmak 20:28; 1 Korinto 15:21, 22) Kinafalahay ci Yis to ˈorip malo sapatefoc, nilnilen no Kawas cingra malo fongoh no kasakopang tada matatodongay. Malo fongoh no mita, iraay ko fadangalan ni Yis patireng to palinian no waywayan, dadofdofen no kahacecay tamdaw, kahacecay paro no lomaˈ ato kahacecay kasakopang. (Kalatiya 6:2) Kawra, cowa ko pisaˈosi aca ni Yis to safalod, midimokosayho ato maolahay kitanan o kahacecay tamdaw. (Ifiso 5:​29) Midofdof ko fafahiyan salikaka to sakayat no mikeriday a salikaka, o mikangodoay ci Kristoan, samanen minilnilan ni Kristo cangra midimokos to fafahiyan salikaka. Mikangodo ato masemer ko faˈinayan salikaka to fafahiyan salikaka, paihkalay konini to cipinangay cangra to limasmas no kakeridan. Itini kasakopang o kahacecay tamdaw ano cipinang ato mikangodo to limasmas no kakeridan, polong a kasakopang wa makedec a rihaday. O kalimlaan i, wa patongal kita to ˈdil no ciolahay a Wama ci Yihofaan. w21.02 18-​19 fiedac 14-​17 fatac

Itini pilaliwan ni Tafiti ato sikawdan a tatokian, kinacecayay, miliyasay cangra to paro no lomaˈ a dademak. Itini kaawaan nangra i, iraay ko ˈada a milood, miˈafasay to dafong, milepelayho to paro no lomaˈ nangra. Na ngangaˈay ci Tafiti mitiˈer to nalifetan no niyah a milood, oniyah saan a pakayraan milidong to paro no lomaˈ. Kawra cowa pihaen ko demak ningra, micangacangay to sakayat ni Yihofa. Mingitangit milicay ci Tafiti ci Yihofaan: “O mamilepel kako toya kokong han?” Pasowalan ni Yihofa ci Tafiti, mamilepel cingra to ˈada, hanaca mikiˈok to mamalidong ningra ko paro no lomaˈ. (1 Samuil 30:​7-​10) Mikitini toniya demak mananam iso ko maanan hani? ˈAyaw no misaˈosi i, licayen ko tao. Ngaˈayay masasowal to wama wina iso, ngaˈayho mitengil to sapaini no malohemay malitengay. Pakasoˈlinay ci Yihofa to minilnilan Ningra a salikaka, wa ngaˈay pakasoˈlin kiso cangranan. ‘Malo sapatelong’ ni Yihofa i kasakopang cangra. (Ifiso 4:8) Todongen iso ko pasoˈlinay falocoˈ nangra, micada to sapalimoˈot nangra, wa ngaˈay ko minaroˈan. w21.03 4-5 fiedac 10-​11 fatac

Sowal ni Yis, ano eca ka sakadademaken ita ko minanaman, malecaday patirengay i tafok to lomaˈ, kawra awaay ko kapo. Misamanay hani? Samanen ano tahalifa to taˈangay a fali anca taˈangay ko cedas, mapelal ko lomaˈ. (Matay 7:​24-​27) Malecaday, kawra ano caka sakadademaken ko mananamay i, malahoracay ko nano demak ita. Ano tahalifa to pasangaray anca sapalak, o pakasoˈlinay falocoˈ ita cowa ko papakaremo to sapalifet. Kawra ano sakadademaken ita ko minanaman, wa citaneng ko misaˈosian, rihaday ko falocoˈ, wa tanoktok ko pakasoˈlinay falocoˈ. (Isaya 48:17, 18) Sapitafoaw to madimadiay, o mamicerid kita mitolon, mitadiˈec ci Yihofaan, wa padotocho to ngaˈayay nanaman micekiw to Fangcalay Cudad. Haratengenho ita, sakakaay kalimlaan i misarocod paˈdil ci Yihofaan. Wa ngaˈay pakasoˈlin kita, cowa ko mamifalah ci Yihofa kitaanan, ano cima to tamdaw anca maanan a demak cowa ko papaliyas to olah Ningra kitanan.​—Hipray 13:​5, 6. w21.03 15 fiedac 6 fatac; 18 fiedac 20 fatac