Saka 6 Folad

Mikifalocoˈ a ciharateng ko singsi to pacekiwan, o salikaka noikor hanko pinengneng cangranan. Sapidokoaw ko pacekiwan ci Yihofaan, wa misawad micawmaˈ to cowa ka olah ci Yihofaan a tamdaw, adihayho ko fafalicen i nokaˈorip, cowa ko madoloay konini. Mihaenay, o ngaˈayay singsi no Fangcalay Cudad wa misiwkay to pacekiwan mafanaˈ to salikaka i kasakopang, ira ko toki no pacekiwan micawmaˈ to salikaka. Wa ngaˈay padama ko salikaka to pacekiwan matongal ko piingid ci Yihofaan, ano tahalifa ko pacekiwan to pasangaray i mihinom cingranan. Tokel ita nanay o masalalomaˈay no kasakopang saan ko harateng no pacekiwan, malecad o masalalomaˈay no paro no lomaˈ no Krisciyang ko niyah. Ano matinako no pacekiwan ko olah no salikaka ita, o makelecay ko kalalaˈed to kasakopang, wa madoloto misawad micawmaˈ to cowa ka olah ci Yihofaan a tamdaw. (Taneng 13:20) Mafanaˈ ko pacekiwan to ngangaˈay mahela ko soˈlinay widang i likakawa ni Yihofa, cowato ko mamatalaw misawad to salakatay a widang.​—Marko 10:29, 30; 1 Pitiro 4:4. w20.10 17 fiedac 10-​11 fatac

O mamalawidang kita ci Yisan ngaˈ, ngaˈay a miingid ci Yihofaan. Misamanay? Salakat, pasowalan ni Yis ko nisawawaan: ‘Tangongolay ko olah no Wama tamowanan, samanen padotocay kamo tangongol ko olah takowanan.’ (Yohani 16:27) Sanayho ko sowal ningra: ‘Ano caay pakayni takowanan, awaay ko tatahira i Wamaan.’ (Yohani 14:6) Mihaenay, sapalahadaw to kalawidang ci Yihofaan, salakatho malo widang ni Yis, malecad sapicomodaw i cecay lomaˈ salakatho mikilim to fawahan. Na somowalay ci Yis, o ‘picomodan no lopayˈay siri a fawahan’ ko niyah. (Yohani 10:​7) Dotoc, malefotay ci Yis paihkal to makapahay capeling no kakarayan Wama. Sanay ko sowal ningra to nisawawaan: ‘Pakaˈaraw takowanan, o pakaˈaraway to Wamaan.’ (Yohani 14:9) Mihaenay, cipinang kita to nalifetan ni Yis, wa mafanaˈto ci Yihofaan. Ano matongal ko kacipinang ci Yisan, matongal ko tangongol no kalawidang cingraanan, matongal ko kaolah ci Yihofaan. w20.04 21-​22 fiedac 5-6 fatac

Adadaay kiso i takar anca maroˈ to cikalilengay a kamaroˈan han? Cowa ka ngaˈay ko rakat anca tatiihay ko mata han? Ano mahaenay i, wa ngaˈay kiso kalacafay to kaemangay comikay to saka tahadaˈoc no ˈorip a cacikayen han? Hano caka ngaˈay! ˈAlomanay matoˈasay malonayay ko tireng a tamdaw comikayay to saka tahadaˈoc no ˈorip a cacikayen, cowa ko niyah a ˈicel ko mitiˈeran nangra, pakayniay i tingwa anca wangcan mitengil to kamok no saˈopo. Roma i, misawacayay cangra to salawina anca kankoho ato ising. Tatiihay ko tireng iso alatek, cowato pakademak to adihayay a demak, kawra hamaan miharateng to awaay ko pakayraan no niyah padadotoc comikay to saka tahadaˈoc no ˈorip a cacikayen. Padadotocay kiso mitadiˈec ci Yihofaan, mitafo to mihadidiay, mansa maolah Cingra tisowanan. Nohatini mikikakaay ko pisaali iso ci Yihofaan, mihaenay cowa ko mamifalah Cingra tisowanan, wa matongal ko piingid tisowanan.​—ˈOlic 9:​10. w20.04 29 fiedac 6-​17 fatac

O maanan ko hasowal iso to iraay ko pihakelongan a tamdaw hani? Kilimen ko kalecadan a demak. Tinakoen, pakasoˈlinay cingra to iraay ko cecay soˈlinay Kawas, anca pakasoˈlin to mamilidong ci Yis to tamdamdaw. Alatek pakasoˈlinay cingra, ano adihayay ko tatiihay tamdaw ato demak nohatini, mangataayto ko salikoray romiˈad. Mihaen, ngaˈayay tooren iso ko kalecadan a demak, tano kaolahan no tao a pakayraan malalengo cingraanan. Haratengen, o roma tamdaw cowa pakasoˈlin to kimad no pihakelongan no niyah alatek. Mihaenay, soˈlin pasowal ko tamdaw to iraay ko pihakelongan, misongilaˈ a cipinang to o maanan ko pakasoˈlinan ningra. Cecay misakafahay sanay, pakasoˈlinay ko roma tamdaw to toloay cecayay ko tireng, kawra cowa pakasoˈlin cangra to malecaday a Kawas ko Wama, wawa, ato fangcalay saocor. Sanay cingra: “Mafanaˈ tonini, madoloayto makilim ko kalecadan a demak to cilomaˈay.” Mihaenay, cipinang to o maanan ko pakasoˈlinan no tao, o mamalecad ci Pawloan, ano masamaanay tamdaw i malo o masamaanay a tamdaw.​—1 Korinto 9:​19-​22. w20.04 10 fiedac 9-​10 fatac

Ano samaanto ko mifekaday a demak noikor, cowa ko mamatalaw kita, samanen pakasoˈlinay kita to sowal no Taniil ato Paˈarawan, ci Yihofa aci Yis itini taˈangayay padiing wa milidong to madimadiay Cangraanan a tamdaw. Sowal ni Taniil oya malidongay a tamdaw sahtoay ‘matiliday ko ngangan i piharatengan cudad.’ Samaan ngaˈ ‘matilid ko ngangan i piharatengan cudad’ hani? Oha mamisawacay kita mihakelongay ko niyah to tofor a siri no Kawas, patafang to tireng to Kawas micada to paputisem. (Yohani 1:​29; 1 Pitiro 3:​21) Oha mamisarocodho kita padama to tao mafanaˈ ci Yihofaan, paihkal to midopoay ko niyah to Hongti Kitakit no Kawas. Aniniho paˈicel to pakasoˈlinay falocoˈ ci Yihofaan ato likakawa Ningra! Aniniho midopo to Hongti Kitakit no Kawas! Mihaenay, ano mapalaˈafo no Hongti Kitakit no Kawas ko kaˈamisay hongti ato katimolay hongti i, oha mamalidong kita. w20.05 16 fiedac 8-​19 fatac

Ci Atam aci Ifa mafanaˈay to ci Yihofa ko ngangan no Kawas, mafanaˈayho to adihayay pakayniay ci Yihofaan a demak. Mafanaˈay cangra, o misangaˈay a tatapangan ci Yihofa, pafeliay to ˈorip cangranan, makapahay kitiraan ato malefotay a raramod. (Satapangan 1:​26-​28; 2:​18) Kawra misaka dademakan nangra ko malefotay a ponoˈ midotim to nano demak ni Yihofa cangraanan, padadotocay a mitongal to olah ato piakoˈid ci Yihofaan hokira? Nengnengen ita tiya micada cangra to sakayhid i samanay ko harateng. Pakaynian ni Satan i cecay ˈoner a pasowal ci Ifa: ‘Soˈlinay pasowal ko Kawas, cowa ka ngaˈay kamo komaen to losay no masakenaay a kilang han?’ (Satapangan 2:​16, 17; 3:1) Oniya salicay mahimeday ko pakaditay to Kawas a mangah, hato iraayto ko tatiihay harateng ni Ifa to Kawas. Soˈlinay i, sowal no Kawas, edengan o heci no cecay kilang cowa ka ngaˈay kaenen, o romaroma ngaˈayay kaenen. (Satapangan 2:9) Kawra o salicay ni Satan hato maˈidiay ci Yihofa, misatapangay a miharateng ci Ifa alatek: ‘Soˈlinay miterekan no Kawas ko maanan ngaˈayay a dafong cakakahi pafeli takowanan hokira?’ w20.06 3-4 fiedac 8-9 fatac

O roma salikaka pakayniay kararaw no tao a madokaˈ. Sowal no tarokos ci Pawlo latekay ‘iraay ko katatiihan to tao.’ Roma i, cowa ka sadafdaf ko macadaay ita alatek. Ano caka pinaˈon kita, wa kaketer saan, telocto miliyas to finawlan no Kawas. Nengnengen ko tinakoan no itiniay Katimol Amilika ci Papolo. Na mapakokotay cingra, orato malahdaway ko toki matayal i kasakopang. Samanay ko harateng ningra hani? Sanay: “Tada maketeray kako, ikorto palidlid sanay a miliyas to kasakopang.” Cecay tamdaw wa pakayni pakidemay raraw i salakat padadotoc a matoled ko falocoˈ, awaay ko tatodong no niyah malo finawlan no Kawas saan miharateng. Cecay faˈinayan salikaka ci Fransiske mahaenay ko harateng, ikor sawad sanayto micawmaˈ to kasakopang. w20.06 19 fiedac 6-7 fatac

O papakahapinang kita to o maanan ko papaira to katalawan, kaliki a miliyas. (Hipray 5:​14) Tinakoen, mamisinanot a mipiliˈ to lawla. Adihayay a kamok no tilifi ato ika adihayay ko malafoay a lalakaw, o mahaenay a waywayan o kaˈintehan no Kawas, midemakay to mahaenay demak a tamdaw mipalakay to niyah ato tao. O hatiniay a lawla wa palidlid saan mifasaw to olah ita to Kawas, mihaenay oha laliyasen ita. (Ifiso 5:​5, 6) O mamihapinang kita to o maanan a sasowalen o mikitiniay mitowakangay to kimad a tamdaw. O mitowakangay to kimad a tamdaw miowingay kitanan cisasa to salikaka ato likakawa no Kawas. (1 Timoti 4:​1, 7; 2 Timoti 2:​16) O hatiniay a lihaf o mamifasaw to pakasoˈlin ita, oha laliyasen no mita. Misamanay hani? Samanen o mitowakangay to kimad a tamdaw o ‘maminahol to harateng, ecato ka ira ko soˈlinay kimad,’ o araaw nangra ho mifekad ko lacongis sanay. (1 Timoti 6:​4, 5) Sapilipalawaw cangra kitaanan, ho ecato pakasoˈlin kita to salikaka. w20.09 29 fiedac 3, 15 fatac

O faˈinay ato fafahi oha masasingodo ato masasiolah. (Ifiso 5:​33) Pasifanaˈay ko Fangcalay Cudad kitaanan, adihayen ko misadakan i tao, eca ka piharateng mikitini i tao milifok to maanan. (Dmak 20:35) O maanan a capeling ko ngangaˈay padama to mararamoday masasiolah ato masasingodo hani? O misapoeneray. Paihkal to misapoeneray ko ciraramoday a Krisciyang, wa lipahak ko kaˈorip ato ramod. O cecay ciramodayto a salikaka ci Stifen, sanay: “O mararamoday malecaday o cecay kapot, o mamadadama, ano misiˈayaw to pasangaray i malacafay a misaˈicel. Cowa ko mamiharateng kita ‘o maanan ko sangaˈayay takowanan,’ o mamiharateng, ‘o maanan ko sangaˈayay tamiyanan.’” Malecaday ko harateng no fafahi ningra ci Stifeni, sanay: “Awaay ko maolahay kalacafay to ˈada. Ano ira ko pasangaray i, wa misaˈicel kita mikilim to lalangian, misarocod mitolon, mikilim to lalakaw, malacafay malalengo. O cacoˈayen niyam a ˈada oya pasangaray, cowa ko ramod.” O faˈinay ato fafahi eca pisakareteng minengneng to niyah, eca piharateng to mikikakaay koniyah to ramod a kalimlaan, mihaen o lalipahakto a tatosa. w20.07 3-4 fiedac 5-6 fatac

Aka miˈtier to inaneng no niyah midoko ci Yihofaan. ˈAkawangay ko picudadan ni Pawlo, o singsi ningra o ˈakawangay ko saaroˈan i Yutayakiyo ci Kamalil. (Dmak 5:​34; 22:3) Salakat, itini lalomaˈ no Yutaya tamdaw ngaˈayay ko ngangan ni Pawlo. (Dmak 26:4) Kawra, cowa ka piˈtier ci Pawlo to niyah. Salo sanay ci Pawlo misawad to misalimlaan no hekal tamdaw a dafong. (Filipi 3:8) Ikor no malo Krisciyang, tahalifaay ci Pawlo to adihayay a roray. Mikaˈintehan no Yutaya tamdaw cingra. (Dmak 23:12-​14) Soˈlin o Loma ko kika ningra, kawra mipekpekan ato mipalitan no Loma tamdaw cingra. (Dmak 16:19-​24, 37) Roma i, pakayni dangoc no niyah tada makesemay ci Pawlo. (Loma 7:​21-​25) Kawra ‘mihadidiay to kalonay’ ci Pawlo, cowa ka pakayni pisafelit no tao ato dangoc no niyah ecato ka malo Krisciyang. Misamanay hani? Samanen itini kalonayan ningra i, pafelian no Kawas cingra to kasapaan a ˈicel.​—2 Korinto 4:7; 12:10. w20.07 16 fiedac 7-8 fatac

Anini, mangalefay ko pisaali ita misamacay to falocoꞌ a mitosil. Na pairasolay ci Yis, ikor no mapatay cingra o papadotoc a mitosil ko nisawawaan ningra, hanaca wa mikikaka ko taˈangay no mitosilay a demak. Ikor no patikol ci Yis maˈorip, midemakay ci Yis to kafahkaan a demak, padama to nisawawaan mirepel to adihayay a foting. Toya tatokian, paihkalay ci Yis, o mitosilay a demak ikakaay ko kalimlaan to romaroma a demak. (Yohani 21:15-​17) ˈAyaw no patikol tayra i kakarayan ci Yis pasowalay to nisawawaan, mitosilay a tayal wa mikitini Israil a macowat i polong no cikiw. (Dmak 1:​6-8) Ikor no pina miheca, paˈarawan ni Yis ko tarokos ci Yohani i mapolosi to “romiˈad no Tapang” wa iraay ko maanan mifekaday a demak. Maˈaraway ni Yohani ko cecay a coyoh pasayra i ‘kasakitakit kasafinacadan kasasiroma no sowal ato kasangasaw a tamdaw milasil to midaˈocay a ngaˈayay lihaf.’ (Paˈarawan 1:​10; 14:6) Mihaenay, mitokelay ci Yihofa kitaanan misarocod mirienang to mitosilay i polong no hekal, tahira pipasowal Ningra to malaˈosiayto ko tolas. w20.09 9 fiedac 5 fatac

O kaˈorip no paro no lomaˈ ni Apraham cowa ka sahto saan o rihadayay. Soˈlin maolahay cingra to fafahi ci Saraan, kawra cowa ka ciwawa ci Sara, adihayay a mihecaan, cariraway cangra toniya demak. Ikor pafelian ni Sara ci Apraham ci Hakaran malo fafahi, mitokel ira ko wawa ningra. Kawra, mapoyapoy ci Hakar ci Ismailan i, misakahmaway ci Saraan, marawraway ko kalalaˈed no paro no lomaˈ nangra, mansa laplapen ni Sara ci Hakar. (Satapangan 16:​1-6) Saikor mapoyapoyayto ci Sara, mahofoc ci Isakan. Ci Ismail aci Isak o kaolahan ni Apraham a wawa. Kawra ikor misamsaman ni Ismail ci Isak, hato misaalian ni Apraham ci Hakar aci Ismail a miliyas. (Satapangan 21:​9-​14) Ikor no pina miheca, palimoˈotan ni Yihofa ci Apraham mipatoˈaya ci Isakan. (Satapangan 22:​1, 2; Hipray 11:​17-​19) Toniya tosa a demak, masongilaˈay ko pitadiˈec ni Apraham ci Yihofaan, pakasoˈlin to papalaˈosien Ningra ko pakayniay toniya tosa wawa a sakiˈok. w20.08 4 fiedac 9-​10 fatac

Haratengen, mahepolayto no patikolay maˈorip a tamdaw ko matelangay capeling, misaˈicel a mitoor to moecelay palinian no Kawas, wa hakowa ko kalipahak nangra! Mihaen ko kafalic nangra, wa ngaˈayto tahadaˈoc maˈorip i Lakoing. Kawra ano cakakahi a mafalic ko patikolay maˈorip a tamdaw, cowato ko mamihai ci Yihofa padadotoc a maˈorip cangra, mipalak to rihaday no Lakoing. (Isaya 65:20; Yohani 5:​28, 29) Itini pikowan no Hongti Kitakit no Kawas, o tatahatanam ko finawlan no Kawas to sowal i Taneng 10:22: ‘O sapafeli no Kawas a lemed pahafayay to tamdaw, cowa paira to roray.’ Itini sapadama no fangcalay saocor, wa palidlid saan kita a malefot, malecad ci Kristoan. (Yohani 13:15-​17; Ifiso 4:​23) To romiˈamiˈad matongal ko tanektek no tireng, mamalefot ko capeling. Itiya maedeng o tataˈangay ko kalipahak ita!​—Yopu 33:25. w20.08 17 fiedac 11-​12 fatac

Haratengen ita o roma tamdaw oniyah ko misaˈosiay to caka ciraramod, roma tamdaw saka ciramodaw, kawra awaayho ko matatodongay a haramod, roma tamdaw mapatayay ko ramod. Ano samaanto ko pakayraan, ano milicay ko tamdaw i kasakopang to hano caka ciraramod cangra, anca misiwkay to haramod nangra, matatodongay koniya demak han? Ano cowa pisaali cangra to papadamaen, talaˈayaw saan ko tao mihaen to demak, sasamaan ko harateng nangra hani? (1 Timoti 5:​13) Ano masemer kita to ngaˈayay capeling no awaay ko ramod a salikaka, wa lipahak cangra. Hamaan pakayni ka eca ciraramod cangra a siniˈada cangranan, ka pakayni ka madimadi nangra a midoko to Kawas a misalimla cangranan. Mihaen, ecato piharateng cangra to papasowal kita cangranan: ‘Malomaan ako kiso.’ (1 Korinto 12:21) Wa matinako nangra ko pikangodo ita cangranan, misalimlaayho to nano demak nangra i kasakopang. w20.08 29 fiedac 10, 14 fatac

Ikor, paˈarawan ni Yis ko tarokos ci Pawlo. (1 Korinto 15:8) Ci Pawlo itini fatad no sakatayra i Tamaskus, matengilay ko sowal no patikolay maˈorip a Yisan, maˈarawayho ko ˈdil ato ˈodingar ni Yis i kakarayan. (Dmak 9:​3-5) O nalifetan ni Pawlo misawacayay, o pipatikol ni Yis maˈorip cowa ko tawcikel. (Dmak 26:12-​15) O sasinanoten ko wacay ni Pawlo, samanen na mipalakay cingra to Krisciyang i salakat. Pakasoˈlin ci Pawlo to patikolayto maˈorip ci Yis i, misaˈicelay pasowal to tamdaw toniya kimad. Sapihaenaw to demak, kinapinaay masetiˈ cingra, mipalitan, tahalifaayho to pades i tamina. (1 Korinto 15:​9-​11; 2 Korinto 11:23-​27) Samanen pakasoˈlinay ci Pawlo to patikolayto maˈorip ci Yis, mansa makahi kinafalah to ˈorip paˈading toniya kimad. Itini saka 1 hahekalan ˈalomanay ko misawacayay tamdaw, coko padamaay kisowanan pakasoˈlin to patikolayto maˈorip ci Yis, pakasoˈlinho to mamalaˈosi ko hatokel patikol maˈorip noikor hokira? w20.12 3 fiedac 8-​10 fatac

Ngaˈayay licayen ita ko niyah: ‘Miceriday kako mirienang to saˈopo hokira?’ Mirienang to saˈopo papadama kitaanan milifok to ˈicel padotoc a midoko ci Yihofaan, ngaˈayho milifok to sapakalalok no salikaka. (Matay 11:28) Ngaˈayho licayen ko niyah: ‘Miceriday kako micekiw to Fangcalay Cudad han?’ Ano malacafayay kiso to paro no lomaˈ, to lipalipay iraay ko masaˈosiay a toki namo to pakalomaˈay a pidoko? Ano cecayay kiso, iraay ko masaˈosiay a toki micekiw hokira? Roma i, misarocoday kiso a mitosil, padama to tamdaw malo Krisciyang hokira? Hano licayen ita ko niyah toniya salicay hani? Samanen sowal no Fangcalay Cudad ci Yihofa mihapinangay to falocoˈ no mita, mansa songilaˈen ita mihapinang to nafalocoˈan a harateng no niyah. (1 Rayray 28:9) Ano mahapinang ita misaaliay ko niyah misalof to patosokan, waywayan ato harateng, wa ngaˈay micangacang ci Yihofaan padama kitaanan. Nohatiniho misadayto, misiˈayaw to kaˈayaway a sapalifet. w20.09 19 fiedac 19-​20 fatac

Patinakoay ci Yis mitadtad sasamaan ko demak no cecay tamdaw ngaˈ malo nisawawaan ningra. Sanay ci Yis, cecay tamdaw sapatirengaw to lomaˈ, ‘wa salakatho misaˈosi to mamapalak a payci,’ mihaen ngaˈ malaˈosi ko pipatireng. Sanayho ci Yis, cecay hongti sapiloodaw to ˈada, ‘maroˈho a malalengo,’ mihapinang iraay ko ˈicel a miocor to sofitay hokira. (Luka 14:27-​32) Tatodong ni Yis i, ciharateng ko tamdaw malo nisawawaan ningra, wa ihkal a cipinang o maanan ko tatodong malo Krisciyang. Mihaenay, pakalaloken ita ko pacekiwan masaˈosi ko toki to lipalipay a malacafay kitanan minanam to Fangcalay Cudad. Malo singsiyay, wa misongilaˈ kita misaday to cacekiwen a lalakaw. Dotoc haratengen ko pakayraan no pacekiwan, miharateng tano kantangay a pakayraan mitadtad to lalakaw, ho madolo ko pacekiwan cipinang ato misaka dademak.​—Nihimiya 8:8; Taneng 15:28a. w20.10 7 fiedac 5 fatac; 8 fiedac 7 fatac

Ihkalay ko sowal ni Yis, wa pasifanaˈ kita to tao mafanaˈ to limoˈot ningra. Kawra, cowa ka ngaˈay malawa ita ko cecay kalimlaan a demak. Cowa ka somowal cingra ‘o kihcod a limoˈot ako tamowanan, pasifanaˈen cangra,’ ao ‘o kihcod a limoˈot ako tamowanan, pasifanaˈen cangra midofdof.’ Sapitooraw to limoˈot ni Yis a midemak, cowa ko pasifanaˈ aca to pacekiwan, midemak to maanan, pasifanaˈenho ko pacekiwan, mafanaˈ to sasamaan midemak. (Dmak 8:​31) Ano pasifanaˈ kita to pacekiwan i, cowa ko pasowal aca cangranan to saali no Kawas, wa pasifanaˈenho cangra midemak to mananamay. (Yohani 14:15; 1 Yohani 2:3) Ngaˈay kita saka dademaken ko demak no niyah a tinakoan, pasifanaˈ to pacekiwan cipinag itini picudadan, katayalan ato lawla i, samaan misaka dademak to safalod no Fangcalay Cudad. Kalacafay to pacekiwan mitolon, micangacang ci Yihofaan tano fangcalay saocor mikayat to pacekiwan.​—Yohani 16:13. w20.11 2-3 fiedac 3-5 fatac

Misiˈayawayho ko nisawawaan ni Yis to roma sapalifet, tinakoen, cowa ka ˈaloman ko mitatiliday to Fangcalay Cudad itiya, cowa ka lecad anini adihayay ko sapitadtad to Fangcalay Cudad a mitepangan. Roma i, pasayraay i cowa kalecad ko sowal a tamdaw mitosil. Soˈlin mahaen, oniya fanekfekay a mitosilay madangaray nangra ko pasangaray a demak. Itini pina poloˈ miheca, o ngaˈayay lihaf ‘mapatenakto i polong no tamdamdaw.’ (Kolosay 1:​6, 23) Anini lintad. Padotocay ci Yihofa mikayat to finawlan Ningra, pafeli to ˈicel cangranan midemak to tayal Ningra. Anini, sakakaay sakayat no Kawas mikitiniay Fangcalay Cudad. O Fangcalay Cudad pakaynian no Kawas i fangcalay saocor mikayat ko tamdaw a mitilid, itini Fangcalay Cudad maasipay ita ko mitosilay a tayal ni Yis ato limoˈot ningra to nisawawaan. Palimoˈotan ni Yis ko nisawawaan padotoc a mitosil. (Matay 28:19, 20) Cowa pisakakinih ci Yihofa, paˈayaway Cingra papatenaken ko ngaˈayay lihaf i ‘kasakitakit, ngasaw, sowal ato finacadan a tamdaw.’ (Paˈarawan 14:​6, 7) Tokel Ningra ngaˈay matengil no polong a tamdaw ko lihaf no Hongti Kitakit. w20.10 21 fiedac 6-8 fatac

Hongti ci Tafiti ‘maolahay to sarikec ni Yihofa.’ (ˈOlic 1:​1-3) Mafanaˈay ci Tafiti milidongay ci Yihofa to misapoeneray a tamdaw, misaˈadaay to misatakaraway tamdaw. Mihaenay, makahiyay ci Tafiti mitoor to sarikec no Kawas a misalof to harateng noniyah, sanay cingra: ‘Pakahemeken ako ci Yihofa, samanen palimoˈotay Cingra takowanan. To lafii, misalofay ko falocoˈ ako takowanan.’ (ˈOlic 16:7) Ano misapoeneray kita, ˈayaw no mararaw ko demak wa mitoor to Kimad no Kawas a misalof to harateng no niyah. Ano pasiwili pasiwanan a miliyas kita, mihadakay to sarikec ko kimad no Kawas: ‘O moecelay a lalan konini, romakat kamo toniya lalan o matatodongay.’ (Isaya 30:21) Midofdof kita ci Yihofaan, wa adihay ko haepoc. (Isaya 48:17) Tinakoen, ano micada kita to pisalof no tao cowato ko mamakesem ko falocoˈ. Wa pakayni tahatinako to sano Wamaay a kaolah ni Yihofa kitaanan a matongal ko piingid Cingranan.​—Hipray 12:7. w20.11 20 fiedac 6-7 fatac

O mahaenay harateng mifiyoray to roma Krisciyang i Korinto. (1 Korinto 15:12) Rom i, harateng no roma Krisciyang, o patikol maˈorip o sapatinako aca sanay, sakoniya sowal, o cecay ciraraway a tamdaw mahecaday o “mapatayay,” kawra malo Krisciyang cingra i, masodod ko raraw ikor, patikolay maˈorip. Ano samaanto, o Krisciyang ano eca pakasoˈlin to patikol maˈorip, o pihakelong ningra awaay ko epoc. Ano cowa ka patikolen ni Yihofa paˈorip ci Yis, wa awa ko sapatefoc ni Yis, o raraw ita cowa ko mamilifok to sasodod. Mihaenay, o cowa pakasoˈlin to patikol maˈorip a tamdaw awaay ko soˈlinay a hatokol. (1 Korinto 15:13-​19; Hipray 9:​12, 14) Mikitini nalifetan no niyah mafanaˈay ci Pawlo, ‘patikolayto maˈorip ci Kristo nai patay.’ O pipatikol ni Yis maˈorip ikakaay to salakatay a patikolay maˈorip, samanen o salakatay patikol maˈorip a tamdaw ikor miliyaway mapatay. Sowal ni Pawlo, ci Yis ‘itini mapatayay tamdaw o salakatay a lidongen,’ tatodong ningra: Ci Yis o saka cecay patikol maˈorip malo ˈadingo ko tireng a tamdaw, o saka cecay macokacokay tayra i kakarayan a tamdaw.​—1 Korinto 15:20; Dmak 26:23; 1 Pitiro 3:​18, 22. w20.12 5 fiedac 11-​12 fatac

Saka 1 hahekalan, malohemay malitengay i Yirusalim malacafayay a matayal, padama to finawlan no Kawas makelec a rihaday. (Dmak 2:​42) Tinakoen, madeng itini 49 miheca, o roma Krisciyang macacoliay to mikeritay a demak. Ano eca ka saysayen koniya demak, o mamaliwasak ko kasakopang, o mamacara ko mitosilay a demak. Orato, itini sakayat no fangcalay saocor malalengoay ko malohemay malitengay toniya demak. O malohemay malitengay i Yirusalim soˈlin o Yutaya tamdaw maemin, kawra cowa ka fiyor no pinangan no Yutaya anca miowingay to mamikerit a tamdaw, ao pasayraay i Sowal no Kawas ato fangcalay saocor micangacang to sakayat. (Dmak 15:​1, 2, 5-​20, 28) Telocto, o misaˈosian nangra milifokay to sapalemed ni Yihofa, padotocay makelec a rihaday ko kasakopang, ngaˈayho padotoc fanekfek a mitosil. (Dmak 15:30, 31;16:​5) Anini, o likakawa no Kawas adihayay ko limasmas, padama to finawlan no Kawas rihaday a malacecay. w20.10 22-​23 fiedac 11-​12 fatac

Pakayni mihecaan, tatiih no tireng ato roma lalangian, awaay ko pakayraan ita matayal i likakawa no Kawas. Ano mahaenay, ngaˈayay minanam kita to hongti ci Tafitian. Makalimay ci Tafiti patado ci Yihofaan patireng to fangcalay sefi, kawra cowa ka piliˈen ni Yihofa cingra midemak tonini. Soˈlin mahaen, kamayan misarocod cingra midama to mipiliˈan no Kawas a tamdaw, pakiyahoayho to adihayay a dafong. O taˈarawan ni Tafiti ngaˈayay a nanamen ita! (2 Samuil 7:​12, 13; 1 Rayray 29:​3-5) Itini Frans cecay faˈinayan salikaka ci Ike, tatiihay ko tireng ningra cowato kangaˈay padotoc malo malohemay malitengay, ano kantangay a demak i lomaˈ caayto kangaˈay midemak. Sanay cingra: “Salakat awaayto ko kapo no niyah sanay miharateng, tada matoleday ko falocoˈ. Kawra, micadaan ako koniya pakayraan, mihai to cowa ko mamadangar ko roma a demak, kawra ngaˈayay misarocod kako to mamadangar a demak, lipahak a matayal saki Yihofaan. Malecad ci Kitiyonan a toya 300 timoloay a sofitay, soˈlin maroray, tahatolasay a milood!”​—Kakitaan 8:4. w20.12 25 fiedac 14-​15 fatac

Mitilid ci Yohani to Fangcalay Cudad i, misaliyaliyaway cingra misaˈicel papaihkal to olah ko Krisciyang. Soˈlinay i, itini mitilidan ningra hakelong no kaˈorip ni Yis kinapinaay milengo to olah, ikakaay ko kaadihay to tolo a Ratoh a cudad. Oniya maloloday cudad pasifanaˈay kitaanan, ano mananto ko hademak no Krisciyang kitinien ciolahay a falocoˈ a midemak. (1 Yohani 4:​10, 11) Soˈlinay i, adihayay ko mapalakay ni Yohani a toki ngaˈ, mananamay konini a kimad. Kaemangho ci Yohani, kina pinapinaay caka paihkal to olah. Kina cecayay, mikeridan ni Yis ko nisawawaan tayra Yirusalim, itini i fatad mitaˈlifay to niyaroˈ no Samariya, coka kahi micada cangranan. Samaanay ko harateng ni Yohani hani? Milicayan ningra ci Yis, ngaˈay tefaden ko namal i kakarayan, palaˈafoen ko polong a tamdaw noniya niyaroˈ sanay. (Luka 9:​52-​56) Kinacecayayho, ci Yohani ato salikaka ningra ci Yakop misaaliay to wina tayra ci Yisan a micangacang, pafeli cangraanan to kalimlaan a saˈaroan itini i Hongti Kitakit. Mafanaˈ ko roma tarokos i, tada maketeray. (Matay 20:20, 21, 24) Soˈlin mahaenay ko raraw ni Yohani, kamayan maolah ci Yis cingraanan.​—Yohani 21:7. w21.01 8-9 fiedac 3-4 fatac

Ano o mananto ko misaˈosian ni Yihofa, sahtoay o sakaciepoc no tao. Tinakoen misangaˈ Cingra to ˈorip i, kita ko maharatengay cowa ko Niyah, ho lipahak ko kaˈorip ita sanay. Misaˈosi ci Yihofa kinafalah to wawa no Niyah mihepol to raraw ita, o kalim no falocoˈ, cowa ko mapacieciay. Malecaday, ano misaˈosi ci Yis i, o tao ko maharatengay. Kinacecayay, sapasifanaˈaw cingra to taˈangayay ˈopo a tamdaw i, hawad han ko pahanhanan no niyah a toki sanay a misaˈosi. (Marko 6:​31-​34) O ngaˈayay a tawki no lomaˈ mafanaˈay, patado to paro no lomaˈ inaneng ko saˈosi cowa ko madoloay, mihaenay misongilaˈay cingra minengneng toniya ˈinorong. Cowa ko saoniyahan saan cingra a misaˈosi, cowa ko nafalocoˈan itiya ko piˈarawan. Wa micada cingra to sakayat ato sapahatatanam ni Yihofa. (Taneng 2:​6, 7) Mihaen, wa patado cingra to paro no lomaˈ a miharateng, cowa ko niyah aca ko maharatengay. (Filipi 2:4) Ano misaˈicel ko faˈinay minanam ci Yihofaan aci Yisan, o mamalo ngaˈayay a tawki no lomaˈ. w21.02 7 fiedac 19-​21 fatac

Kaemangho ko Hongti ci Asa misapoeneray timoloay. Tinakoen midotoc cingra to wama ci Apiyaan a mala hongti i, palahdaway to samiyay i kitakit no Yutaya, ‘palimoˈotayho to Yutaya tamdaw midoko ci Yihofaan, midofdof to Rikec ato limoˈot Ningra.’ (2 Rayray 14:​1-7) Tiya mikerid to 100 efan a sofitay ko Iciyopiya tamdaw ci Cira milood to Yutaya i, citanengay ci Asa, micangacang to sadama ni Yihofa, sanay: ‘Yihofaaw, ano hakowato ko ˈaloman no tamdaw, anca cangoˈot ko ˈicel, wa ngaˈay Kiso a milidong. Yihofaaw Kawas niyam, nanay padamaen kami, samanen mitiˈeray kami Tisowanan.’ Oniya sowal paihkalay, pakasoˈlinay ci Asa iraay ko ˈicel ni Yihofa a milidong cingranan ato finawlan ningra. Mitadiˈecay ci Asa to kakarayan Wama, mansa patadoan ni Yihofa cingra a milowid to Iciyopiya tamdaw. (2 Rayray 14:​8-​12) Misiˈayaw to 100 efan a sofitay, katalawanto. Kawra mitadiˈecay ci Asa ci Yihofaan, salikor mapadikay ko ˈada. w21.03 5 fiedac 12-​13 fatac

Mikitini i Fangcalay Cudad, wa ngaˈay mahapinang cowa ka lefot a tamdaw wa ngaˈay paihkal to damsayay. Ci Yonatan aci Tafiti o ngaˈayay a tinakoan. Sowal no Fangcalay Cudad: “Ci Yonatan aci Tafiti malo ngaˈayay a widang, maolahay ci Yonatan ci Tafitian malecaday ko kaolah to niyah.” (1 Samuil 18:1) Manilnilay no Kawas ci Tafiti mala midotocay a hogti. Ikor, tada ˈintehay ci Sawlo ci Tafitian, mihalakaay sapipatayaw cingraanan. Kawra wawa ni Sawlo ci Yonatan cowa pikapot to wamaan. Makaketonay ci Yonatan aci Tafiti madadama, caay pihai to manan a demakan mipalak to kalawidang nangra. (1 Samuil 20:42) Haratengen ita iraay ko manan a lalangian to mamicara toniya kalawidang, mamatongal mahapinag tano damsayay macacada ci Yonatan aci Tafiti tada kalimlaanto. Cecay lalangian i, ikakaay ko mihecaan ni Yonatan ci Tafitian to 30 miheca. Ano o tao i, mahaen ko harateng nangra alatek: Oniya pakalongay kaemangayho, awaay ko nalifetan, wa samaan kako malawidang cingraanan hani? Cowa pihaen ci Yonatan miharateng, misakahmaw ci Tafitian. w21.01 21-​22 fiedac 6-7 fatac

Mikiˈokay ci Yis to nisawawaan, wa mahela nangra ko soˈlinay a lipahak. Roma i, patalipaˈelalay cingra to maolahay cingraanan a tamdaw, wa tahalifa to sapalifet. (Matay 10:22, 23; Luka 6:​20-​23 ato roma pihongyak.) Ngaˈay kita malo nisawawaan ni Kristo, tada o kahemekanto. Kawra, maharateng misafelit ko paro no lomaˈ, sapalak no mikowanay, anca miroero ko cafay matayal cafay micudad papidemak to mararaway a demak, wa samaan ko harateng ita hani? Ano macariraw kita, o matatodongay koni. Miharateng ko kalo a tamdaw, tahacada to sapalak cowa ko kalipahakan a demak, kawra sowal no Fangcalay Cudad, pairaen ita ko mahaenay a harateng. Tinakoen, sowal no nisawawaan ci Yakop, tahalifa to sapalifet i hamaan matoled ko falocoˈ, o kalipahakan a demak konini han ko pinengneng. (Yakop 1:​2, 12 ato roma pihongyak.) Mihaenay ko sowal ni Yis, soˈlin tahacada kita to sapalak, iraay ko sapalemed, o kalipahakan konini. (Matay 5:​11) Itini sakayat ni Yihofa, patikamian ni Yakop ko Krisciyang, pafeli cangranan to ciepocay sapaini, padama to salikaka soˈlin misiˈayaw to sapalifet kamayanho mitafo to lipahakay. w21.02 26 fiedac 1-2 fatac; 27 fiedac 5 fatac

O roma kalecadan ni Timoti lintad a tamdaw cowa pisalimla to kalacafayan to Kawas matayal a toki. Tinakoen ci Timas, ci Fikilus ci Hermokinis, ci Himinayus, ci Aliksantor aci Filitus. (1 Timoti 1:​19, 20; 2 Timoti 1:​15; 2:​16-​18; 4:​10) Oniya tamdaw na maolahay ci Yihofaan, ikor cowato pisalimla to sapatorod ni Yihofa cangraanan. Tano maanan a pakayraan ci Satan papisawad kitaanan to kalimlaan a sapatorod ni Yihofa kitaanan hani? I laenoay o misaka dademakan ni Satan a pakayraan. Misaka dademakan ningra ko tilifi ato lawla miowing to mararaway harateng ato waywayan, hato palidlid sato kita a miliyas ci Yihofaan, ecato pidofdof Cingraanan. Misaka demakanho ningra ko saroero no widang ato sapalak patalaw kitaanan, cato ka timolo mitosil. Mikayhidayho cingra kitaanan mitengil to sasowalen no mitowakangay to kimad a tamdaw, tano ‘misamangahay a sifanaˈ’ a sasowalen papisawad kitanan to soˈlinay kimad. Ano eca pinaˈon kita, wa palidlid saan miliyas to soˈlinay kimad.​—1 Timoti 6:​21. w20.09 27 fiedac 6-8 fatac

Na misafelitan no pakasoˈlinan a paro no lomaˈ anca widang kiso han? Ano iraay i, miasip to nalifetan ni Tafiti wa padama tisowanan. O wawa ni Tafiti ci Apsalom misafelitay cingranan, sapiˈafasaw to saaroˈan no hongti. (2 Samuil 15:​5-​14, 31; 18:​6-14) Itini ˈayaw no misongilaˈ miˈosi toniya maˈoningay i Fangcalay Cudad i, pasowalen ci Yihofa, masafelitay no tao kiso tada marorayay. (ˈOlic 6:​6-9) Dotoc, haratengen tahalifa ci Tafiti toni kihcod hakowaay ko karoray. Maolahay cingra ci Apsaloman, tada pakasoˈlinay ci Ahitofilan, kawra oniya miingiday cingranan a tamdaw malacafayay a misafelit cingranan. Cowa ko pidokaˈ aca to falocoˈ ningra, sapipatayawho cingranan. Cowato ko papakasoˈlin to roma widang ci Tafiti alatek, cisasaay cangranan sahtoay mirienangay to kapot ni Apsalom. Oniyahto ko midimokosan, sacecay saan milaliw, tada matoled ko falocoˈ alatek. Pasayraay ci Yihofaan micangacang cingra, talaˈayaw cingra a misaali to sadama no widang. Maharek misaˈosi ci Tafiti, tangsolay midemak. Kamayan cingra padadotoc mitiˈer ci Yihofaan, pakaˈsolinayho to widang ningra. w21.03 15 fiedac 7-8 fatac; 17 fiedac 10-​11 fatac