Saka 7 Folad

O mamalawidang kita ci Yisan ngaˈ, pacaˈofen ni Yihofa ko satolon no mita. Dengan ˈayaw no mahererek ko satolon somowal to ‘pakayni ngangan ni Yis’ cangoˈotayho. O mamihapinang kita to samanan ni Yihofa a misaka dademak ci Yis a pacaˈof to satolon no mita. Sowal ni Yis to tarokos: ‘Pakayni kamo i ngangan ako, ano o mananto ko micangacangan, o lalahecien ako maemin.’ (Yohani 14:13) Soˈlin ci Yihofa ko mitengilay ato pacaˈofay to satolon ita, kawra wa ocoren Ningra ci Yis a midemak to saˈosi Ningra. (Matay 28:18) Mihaenay, ˈayaw no pacaˈof ko Kawas to satolon ita i, wa minengneng to midofdofay kita to limoˈot ni Yis hokira. Sowal ni Yis: ‘Ano misodod kamo to raraw no tao, o Wama namo i kakarayan wa misodod tamowanan; ano eca pisodod kamo to raraw no tao i, cowa ko mamisodod ko Wama namo to raraw namo.’ (Matay 6:​14, 15) Palecaden ita ko picada ni Yihofa aci Yis kitaanan, sidaˈit a micada to tao, mihaen ngaˈ pacaˈofen ni Yihofa ko satolon ita ato misodod kitaanan. w20.04 22 fiedac 6 fatac

Mahapinang ni Pawlo ko kaciharatengan no tao a demak i, misalofay to hasowal ningra. Tinakoen, awaay ko kafanaˈan no Losete a tamdaw to Fangcalay Cudad, hato oyaan kafanaˈan nangra a demak ko misowalan ni Pawlo, tinakoen o pipanayan ato kalipahakan a demak i nokaˈorip. O sowal ato tinakoan ni Pawlo sahtoay o kafanaˈan no tao. O mamihapinang kita, o maanan ko kaciharatengan no cilomaˈay, dotoc salofen ko sakayat a sowal mitosil. Ano tayni kiso i fawahan no cilomaˈay anca maˈaraw ko cecay tamdaw i, samaan mafanaˈ to o maanan ko kaciharatengan ningra hani? Songilaˈen a mihapinang. Mitistisay cingra to pinaloma, miasipay to cudad, misiwliay to paliding, anca o roma a demak. Itiya wa ngaˈay lengoen kora midemakan ningra. (Yohani 4:7) Latekay, o caˈedong wa padama kitaanan cipinang cingraanan, tinakoen o kitakit, o tayal, anca kaolahan ningra a mimaliay. w20.04 11 fiedac 11-​12 fatac

O roma salikaka macariraway, tada calemcemay malacafay to tao. Cowa ka olah to ˈalomanay ko tamdaw a kitiraan alatek, kawra padadotocay mirienang to saˈopo ato taykay. Masasowal to kafahalan tamdaw pasangaray alatek, kawra padadotocayho a mitosil. Ano o pakayraan no miso konini, sayaren ko falocoˈ, o hatiniay pakayraan marariday a mifekad. Sarocoden ko falocoˈ ato ˈicel matayal saki Yihofaan, mamahemek Cingra. Caka pisawad kiso, misawacayay to palemedan ni Yihofa kiso, pafeli to ˈicel tisowanan. (Filipi 4:​6, 7) Ngaˈay pakasoˈlin kiso, soˈlin ira ko adada no tireng ato nafalocoˈan a pasangaray, ano padadotoc kiso midoko ci Yihofaan, wa lipahak Cingra. Mihaenay soˈlin caka tanoktok ko tireng ita, wa ngaˈay tahatolas a mihadidi, pakalowid to pisiay. (2 Korinto 4:​16) Ira ko sapadama ni Yihofa, wa ngaˈay kita maemin milaheci to cacikayen. w20.04 31 fiedac 20-​21 fatac

Patadoan ni Yihofa kita a misangaˈ to kitiraan a cikiw. Kasapaan ko pisafaco to cikiw, paihkalay to taneng Ningra. (Hipray 3:4) Adihayay ko mitaliyokay to cidal lomakat a foˈis, kawra edengan ko cikiw ngaˈayay kitiraan no tamdaw. Ngaˈayay patinakoen ita to maˈedefay a lomaˈ ko cikiw, matomesay ko tamdaw i lalomaˈ. Haratengen, i lalomaˈay tamdaw oniyah ko misangaˈ to nanom, kakaenen ato saka saselaˈ a fali, hanaca cowa ka ngaˈay mifalah to hadec i papotal, wa hakowa ko halafin no ˈorip nangra hani? Kawra ngaˈayay paˈorip ko cikiw to masawalwalay a tamdaw, cowa ka emin ko nanom, kakaenen ato saka saselaˈ a fali. Soˈlin cowa ka falahen ko hadec i papotal, kamayan a makorac makapah ko cikiw, ngaˈayay a kitiraan. Misamanay hani? Misafacoan ni Yihofa ko sapisafaeloh a ˈicel no cikiw. w20.05 20 fiedac 3-4 fatac

Mihaen ko sowal ni Satan, o mirikecay to misamangahay ci Yihofa. Mihaenay, malo ‘Akoma’ to ci Satan, o ‘mitonganganay.’ Pakasoˈlinay ci Ifa to sowal ni Satan, masongilaˈay a malipalaw. (1 Timoti 2:​14) Ci Satan ko pakasoˈlinan ningra cowa ko ci Yihofa, telocto mararaway ko misaˈosian ningra. Mitowakangay cingra to Kawas, komaen to losay noya kilang, ikor pafelian ningra ko faˈinay a komaen. (Satapangan 3:6) Haratengen, na ngangaˈay ci Ifa a pacaˈof ci Satanan. Ngaˈay mihaen ko sowal ningra: “Cowa ka fanaˈ kako tisowanan, kawra mafanaˈay kako to Wama ci Yihofaan, tada maolahay kako Cingranan, pakasoˈlinay Cingranan. O kihcod ako aci Atam sahtoay o sapafeli Ningra. Hano timolo kiso paoraf Cingranan? Ka piliyas!” Ano madimadi ci Ifa ci Yihofaan, mihaen ko sowal, hahakowa ko kahemek ni Yihofa hani! (Taneng 27:11) Kawra awaay ko madimadiay a olah ni Ifa aci Atam ci Yihofaan, mansa eca ka paˈading cangra to ngangan no Kawas. w20.06 4 fiedac 10-​11 fatac

Adihayay ko nano tayal no fafahiyan salikaka saki Yihofaan, tada papakahemeken ita cangra. O tayal nangra mahawpay ko patirengay ato mitomadaway to kasaˈopoan, midama to roma sowal a mitosilay, itini Pitil matayal, mirienangayho cangra to padamaay to tahapadesay a tayal, mihongyak to masakenaay mitepangan, ato misakafah ato malo mikiriwiˈay nilnilen a mitosilay. Roma i, midamaay to faˈinay ko fafahi, hato ngaˈayay cangra itini kasakopang ato likakawa no Kawas mitamorong to kalimlaan ˈinorong. Oniya salikaka o sapafeli no Kawas a ‘malo sapatelong’ a tamdaw, adihayay ko mihadakan nangra a ˈicel pakayni kitaanan. Ano caay pidama ko fafahi cangranan, cowa ko aadihay ko tayal nangra. (Ifiso 4:8) Cipinangay ko malohemay malitengay, o patenakay to ngaˈayay lihaf a fafahiyan salikaka o “masaferenganay,” cowa ko makahi aca mitosil cangra, o sangaˈayay a mitosilay. Roma i, mafanaˈay ko malohemay mlitengay, o matenesay fafahiyan salikaka tada mafanaˈay padama to kaemangay fafahiyan salikaka miremo to sapalifet. (Titus 2:​3-5) Tada kalimlaan ko fafahiyan salikaka, soˈlinay o kasemeran ita cangra! w20.09 23-​24 fiedac 13-​14 fatac

Cowa ko mamapawan ci Yihofa to mihawaday mitosil a tamdaw, cowa ko mamapawan to nano demak nangra i Cingranan i salakat. (Hipray 6:​10) Misaka dademakan ni Isaya ko mitemeray to falocoˈ a sapatinako mitadtad to maolahay ci Yihofa to finawlan Ningra, sanay cingra: “O mamatiya o pidipot no pakaenay to masafelaway a siri ko nipidipot no Kawas to finawlan Ningra. O sasaˈopoen Ningra ko tofor a siri a miˈafofo.” (Isaya 40:11) O kasapaan a pakaenay ci Yihofa, ano miliyas ko cecay siri Ningra to masafelaway siri, wa samaan ko harateng Ningra hani? Pasowalan ni Yis ko nisawawaan to nafalocoˈan ni Yihofa, sanay cingra: ‘Samaan ko harateng namo? Ano ira ko cisiriay to semoˈot a siri i, ano moraraw ko cecay nonini, caay ka siday han Ningra itira i lotok koya 99 a siri, ta tayra a mikilim toya cecay a moraraway a siri? Sowalen Ako kamo, ano makilim ningra konini a siri i, ikaka ko lipahak ningra toya 99 a caay ka moraraw a siri.’​—Matay 18:12, 13. w20.06 19-​20 fiedac 8-9 fatac

Matayal kita saki Yihofaan, ano o maananto a demak kalikoan a haratengen. (ˈOlic 27:4; 84:10) Cecay salikaka makahiay mihadak to ˈicel, mitongal to demak saki likakawa no Kawas, tada o papakahemeken. Kawra, ano malifok ningra ko cecay ˈinorong i, caay kangaˈay patakaraw minengneng to niyah. (Luka 17:​7-​10) O patosokan ningra o mamisapoener ko falocoˈ a matayal saki tao. (2 Korinto 12:15)Itini i Fangcalay Cudad iraay ko tatiihay tinakoan, pahapinang kitaanan patakaraway minengneng to niyah a tamdaw o masamaanay. Ci Titefis itini kasakopang ‘maolahay to ˈakawangay saaroˈan,’ cowa ka pisapoener ko falocoˈ. (3 Yohani 9) Misatakaraway ci Osiya, sapidemakaw to cowa papidemaken ni Yihofa cingraanan a demak. (2 Rayray 26:​16-​21) Ci Apsalom sapilifokaw to saaroˈan no hongti misamangahay sao maolahay to tamdaw, sapilifokaw to sadama no finawlan. (2 Samuil 15:​2-6) Oniya tinakoan pahapinangay kitaanan, mapiliˈay ci Yihofa to micangacangay to sapaˈdil to niyah a tamdaw. (Taneng 25:27) Misatakaraway, maˈanofay a tamdaw ka adayayan ko teloc.​—Taneng 16:18. w20.07 4 fiedac 7-8 fatac

O roma salikaka pakayni pilaliw to pades ato mikilim to katayalan, miˈorongay to paro no lomaˈ mafolaw tayra roma kitakit. Mahaen ko pakayraan, o wawa nangra itini picudadan mafanaˈay tono itiraay a sowal. O wama wina pakayni tayal wa minanam to itiraay a sowal. Itira ano iraay ko somowalay to kananaman nangra a sowal a kasakopang anca kasakapot, o icowaay a kasakopang ko rarienangen nangra hani? Ono kafanaˈan a sowal a kasakopang, anca ono itiraay ko sowal a kasakopang hokira? O tawki no lomaˈ wa mitamorong to ˈinorong, misimsim to o maanan ko sakangaˈay no paro no lomaˈ, itiya a misaˈosi to masamanay ko sowal a kasakopang ko rienangen. O nangra a saˈosi konini, o kakangodoen ita. Ano icowaayto a kasakopang ko mirienangan nangra, o mamahemek kita a militemoh cangranan, paihkal to olah cangranan.​—Loma 15:7. w20.08 30 fiedac 17-​18 fatac

Ano sapilifokaw kita to sapafeli ni Yihofa a ˈicel, aka tano picudadan, tanoktok no tireng, hafay anca saaroˈan toniya hekal ko sapilalat to epoc no niyah. Cowa ko kalimlaan sanay ko pinengneng ni Yihofa toniya dafong. Soˈlinay i, lalomaˈ no finawlan no Kawas, cowa ka ˈaloman ko citanengay, cowa ka ˈaloman ko cifadangalay, ‘cowa ka ˈaloman ko tadamaanay a tamdaw.’ (1 Korinto 1:​26) Mihaenay, hamaan papicaraen ko dangoc no niyah to pidoko iso ci Yihofaan, tawliken ko pinengneng to pakayraan no niyah. O mamaˈaraw iso ko pipafeli ni Yihofa kisowanan to kasapaan a ˈicel. Tinakoen, ano cisasa ko tamdaw tisowanan a matalaw ko harateng, ngaˈayay cangacangen ci Yihofa pafeli tisowanan to timolo a miˈading to pihakelongan. (Ifiso 6:​19, 20) Ano pakayniay i adada a maroray kiso, ngaˈayay cangacangen ci Yihofa pafeli to ˈicel tisowanan, ho ngaˈay kiso misarocod a matayal saki Cingraanan. Maˈaraw iso ko pisaliyaliyaw ni Yihofa padama tisowanan, mamatongal ko pakasoˈlin iso, matongal ko tanektek. w20.07 16 fiedac 9 fatac

Ano aisalakat kita micangacang to Hongti Kitakit no Kawas, o mamitodong kita ci Aprahaman makahi pakayni ci Yihofaan a kinafalah. (Marko 10:28-​30; Hipray 11:​8-​10) Hamaan halamham to rarihaday ko kaˈorip. O madimadiay midoko to Kawas a tamdaw o tatahalifa to roray. (Yakop 1:2; 1 Pitiro 5:9) Anini, ikakaay ko adihay no lalangian ita mitokel to hanoikor, samanen mahapinangay ko pakayraan no hekal, itiniay kita i salikoray no lekakawa maˈorip. Itiya wa pakayni kita i pikowan no Hongti Kitakit a milifok to adihayay a sapalemed, o cecay i, maˈaraw ko mapatayay salawina patikol a maˈorip. Pakayni pakasoˈlin ato pihadidi ni Apraham o papalifonen ni Yihofa cingra, miliyaw paˈorip cingranan ato paro no lomaˈ ningra. Wa itini kiso i Lakoing a militemoh cangranan han? Ano malecad kiso ci Aprahaman, makahi a pakayni Hongti Kitakit no Kawas a kinafalah, itini pasangaray a pakayraan kamayan madimadi to Kawas, hanaca mihadidi a mitala to pipalaˈosi ni Yihofa to sakiˈok Ningra, mihaen wa ira ko hatiniay a toki iso.​—Mika 7:7. w20.08 5-6 fiedac 13-​14 fatac; 7 fiedac 17 fatac

Mafanaˈay kita, soˈlin patayen no ˈada kita, o papatikolen ni Yihofa paˈorip kita. Pakasoˈlinay kita, ano samaanto ko demak no ˈada, cowa ko papakaconged to Kawas maolah kitaanan. (Loma 8:​35-​39) Pafeli ci Yihofa kitanan to patikol maˈorip a hatokel, tada citanengay koniya demak! Pasokiyaway koniya lalosidan ni Satan, pairaay to timolo ita, malecad o micaˈedongay to tanektekay sapilood a rikoˈ!Ano patalaw ko ˈada mamipatay tisowanan, wa pakasoˈlin kiso to papatikolen ni Yihofa kiso a paˈorip han? Samaan a mafanaˈ kita toya tatokian o mamitadiˈec ko niyah ci Yihofaan hani? Cecay pakayraan i licayen ko niyah: “O misaˈosian ako to romiˈamiˈad paihkalay to mitadiˈecay kako ci Yihofaan han?” (Luka 16:10) Ngaˈayho licayen ko niyah: “O pakayraan ako a maˈorip, paihkalay to paisalakatay kako micangacang to Hongti Kitakit, pakasoˈlinay to mamidimokos ko Kawas to sakaˈorip ako a dafong han?” (Matay 6:​31-​33) Ano masaˈosiay ko caˈof, mitadtaday to maharekayto kiso a misaday misiˈayaw to masakenaay a sapalifet.​—Taneng 3:​5, 6. w20.08 17-​18 fiedac 15-​16 fatac

Oha mamananam kita misaka dademak to Kimad no Kawas. Mirienang kita to saˈopo wa mananam ko pakayraan misaka dademak to Fangcalay Cudad, kawra ano sapadamaaw kita to tao pakasoˈlin to kimad no Fangcalay Cudad, o mamicerid tono tekedan a picekiw. Tano sowal no Kawas a paˈicel to pakasoˈlin no niyah, aka o piasip aca to Fangcalay Cudad. Oha mamidotimho to maˈosiay a lalakaw, kilimen ko lalakaw no mitepangan, mihaen wa matatodong ko kacipinang ato misaka dademak to sinael. (1 Timoti 4:​13-​15) Ikor ngaˈayto tano Fangcalay Cudad a pasifanaˈ to tao. Kawra cowa ko papiasip aca ita to tao to sinael, papadamaen cingra cipinang to tatodong no sinael, mafanaˈ to sasamaan misaka dademak i kaˈorip no niyah. Micerid kita tono tekedan picekiw, wa malo ngaˈayay a singsi pasifanaˈ to Fangcalay Cudad.​—2 Timoti 3:​16, 17. w20.09 28 fiedac 12 fatac

Songilaˈen miharateng hakowaay ko pidama ni Yihofa kitaanan, wa ngaˈay padama kitaanan misarocod a midemak to mitosilay. Tinakoen, misadayan ni Yihofa ko masakenaay sapahaled to pakasoˈlin no falocoˈ a ‘kakaenen,’ mahawpay ko cudad, no tingnaw a mitepangan, ika, milokoingan ato tilifi a kamok. Haratengen hena, itini wangcan ita mataˈlifay ko 1,000 sasowalen a lalakaw! (Matay 24:45-​47) Minanam to taˈarawan ni Yis wa ngaˈay padama kitaanan misarocod to mitosilay. Itiniho i hekal ci Yis padotocay misawacay to soˈlinay kimad, caay ka makalisanga ko falocoˈ. (Yohani 18:37) Ci Satan tano ‘polong no kitakit ato hafay no hekal’ a mikayhid ci Yisan, tangsolay cingra minaˈay. Sapidopoaw ko ˈalomanay pala hongti ci Yisan, caay kakahi cingra micada. (Matay 4:​8, 9; Yohani 6:​15) Cowa picangacang cingra to pakadafongay a hafay, misiˈayaw to pisafelit cowa ka talalikor. (Luka 9:​58; Yohani 8:​59) Ano mapalifet ko pakasoˈlin ita i, haratengen ko limoˈot no aniniay sinael wa ngaˈay padama kitaanan padadotoc misamacay mitosil. w20.09 9-​10 fiedac 6-7 fatac

Itini kasakopang ˈalomanay ko malalokay a fafahiyan salikaka, tada mahemekay kita! Tawlikay cangra mirienang to saˈopo, fanekfekay a mitosil. O roma fafahiyan salikaka mirienangay to pitomadaw to kasaˈopoan, o roma fafahiyan salikaka tada ciharatengay to roma salikaka. Kawra, misiˈayaway cangra to pasangaray. O roma midimokosay to matoˈasayto a wama wina, o roma micadaay to pisafelit no paro no lomaˈ, o roma awaay ko faˈinay a wina, marorayay paliliˈ to wawa. Hano mamidama kita to fafahiyan salikaka i kasakopang hani? Samanen o hekal a tamdaw cowa pikangodo to fafahiyan. Roma i, pakalalokay ko Fangcalay Cudad kitaanan midama to fafahiyan salikaka. Tinakoen, papicadaan ni Pawlo ko Lomaay kasakopang ci Fipian, pafeli cingranan to “sapadama.” (Loma 16:​1, 2) Ci Pawlo nao Falisay a tamdaw, itihiay ningra a tamdaw misakahmaway to fafahiyan. Kawra ikor no malo Krisciyang ci Pawlo misatapangay mitodong ci Yisan, paihkal to pikangodo ato patado miharateng to fafahiyan. w20.09 20 fiedac 1-2 fatac

Sapadamaaw to pacekiwan palahad to kalim a mitosil, ngaˈayay licayen ita ko pacekiwan: “Mafanaˈ to ngaˈayay lihaf no Hongti Kitakit, samanay mifalic to kaˈorip iso? Harateng iso misaaliay ko tao sapitengilaw toniya lihaf han? Wa ngaˈay kiso midemak to maanan hani?” (Taneng 3:​27; Matay 9:​37, 38) Sowal ni Yis “kihcod a limoˈot” ningra, pasifanaˈen ita ko tao midofdof. O limoˈot ni Yis maedeng mahawpay ko tosa sataˈangayay a rikec, maolah to Kawas ato maolah to tamdaw malecad o niyah, oniya tosa rikec milingatay to padama to tamdaw malo Krisciyang a tayal, samanen o olah to Kawas ato tao o sakakaay a ˈicel ita mitosil to tamdaw. (Matay 22:​37-​39) Manaokaniw, o roma pacekiwan maharateng ko mitosilay matalaway, ngaˈayay fanaˈen ita ko pacekiwan, mitadiˈec to sadama ni Yihofa, wa palidlid saan maremo nangra ko matalaway to tamdaw a falocoˈ.​—ˈOlic 18:​1-3; Taneng 29:25. w20.11 3 fiedac 6-8 fatac

Ano misaday kita to lalakaw i, ka pakayni pacekiwan ato saali ningra mitolon ci Yihofaan, micangacang to sadama ni Yihofa tano Fangcalay Cudad a patemer to falocoˈ no pacekiwan. Haratengen, o patosokan ita i, papadama cingranan micada to paputisem. O mamasasowal ko pacekiwan ci Yihofaan, sakoniya sowal o mamasasowal ci Yihofaan ato mitengil to sowal Ningra. Miasip to Fangcalay Cudad to romiˈamiˈad, o mitengilay to sowal ni Yihofa. (Yosuwa 1:8; ˈOlic 1:​1-3) Roma i, o pacekiwan wa mitolon to romiˈamiˈad, masasowal ci Yihofaan. Mihaenay, o singsi misatapang ato mahererek ko pinanam mikifalocoˈ a mitolon to Kawas, itini satolon sowalen ko demak no pacekiwan. Matengil no pacekiwan ko mahaenay satolon ita, wa mafanaˈto mikitini falocoˈ a mitolon, mafanaˈho to papakaynien i ngangan ni Yis a mitolon ci Yihofaan. (Matay 6:9; Yohani 15:16) To romiˈamiˈad miasip ko pacekiwan to Fangcalay Cudad (mitengil to sowal ni Yihofa) ato mitolon (masasowal ci Yihofaan), wa matongal ko piingid ci Yihofaan!​—Yakop 4:8. w20.10 8 fiedac 8 fatac; 9 fiedac 10-​11 fatac

Anini, masieroday ko limasmas no likakawa no Kawas, misarocod palecad to finawlan no Kawas to saka 1 hahekalan a Krisciyang mitafo to makelecay a rihaday. (Dmak 16:​4, 5) Tinakoen, ano tayra kiso i roma kasakopang, anca tayra i roma kitakit mirienag to picekiw to Mikecolay, cowa ko mamafahal kiso, wa ira ko rihadayay, samanen ihkalay ko kafanaˈ iso to pakayraan no saˈopo, mafanaˈay to o manan a lalakaw ko cacekiwen. Edengan ko fangcalay saocor no Kawas ko palaˈosiay to mahaenay a demak. (Cifaniya 3:9) Sasamaan ko demak iso? Haratengen ko laenoay salicay: ‘Itini kasakopang micowatay kako to makelecay, mararihaday to tao han? Makahiyay kako midofdof to mikeriday a tamdaw han? Miharateng ko salikaka o ngaˈayay pakasoˈlinen a tamdaw kako han? Ano ira ko ˈinorong ako, madimadiay kako a midemak han? Mitooray kako to toki, makahi a padama to tamdaw hokira?’ (Yakop 3:​17) Ano mahapinang iso iraay ko sasalofen no niyah, cangacangen ko Kawas pafeli to fangcalay saocor. Midofdof kiso to fangcalay saocor misalof to capeling no niyah, wa matongal ko olah ato pikangodo no salikaka tisowanan. w20.10 23 fiedac 12-​13 fatac

O Kimad no Kawas malecaday o dadingoan. (Yakop 1:​23-​25) Mahadak to papacem midingoayho ko tamdaw, mihaen ˈayaw no maˈaraw no tao kita i, wa mahapinang ita icowaay ko sasalofen no niyah. Malecaday, ano miasip kita to Fangcalay Cudad to romiˈamiˈad i, wa ngaˈay mahapinang to misaaliyay to sasalofen ko harateng ato waywayan hokira. ˈAlomanay tamdaw ˈayaw no masadak to papacem miasipay to pakaromiˈaday a sinael, midotim to maasipay a sinael, hanaca misaˈicel misaka dademak to limoˈot no Kimad no Kawas. Roma i, to romiˈamiˈad wa miasip ato midotim kita to Kimad no Kawas, tengilen konini hato madoloay alatek, kawra tada kalimlaan, samanen o papadama konini kitaanan materek i sakaˈorip a kincoay a lalan. O Kimad no Kawas malecaday to X kowang, ngaˈayay padama kitaanan mihapinang to masamanay tamdaw ko niyah. Kawra, misaaliay kita to misapoeneray, ngaˈ makahi micada to pakayniyan no Kawas i Fangcalay Cudad anca minilnilan Ningra a tamdaw mihadak to limoˈot, hanaca milifok to haepoc. w20.11 18 fiedac 3 fatac; 20 fiedac 8 fatac

O saka 1 hahekalan a Krisciyang soˈlin marariday micada to sapalak, kawra iraay ko rihadayay a tatokian nangra to latekay. Itiya, mimetmetan nangra ko toki padotoc a mitosil. Sanay ko sowal no Dmak, ‘o waywayan nangra paihkalay to mangodoay ci Yihofaan a falocoˈ.’ Itini karihadayan a tatokian misaˈicelay cangra a milasil to ngaˈayay lihaf, telocto ‘matongalay ko tamdaw.’ Mahapinangay, o pisaˈicel nangra milifokay to sapalemed ni Yihofa. (Dmak 9:​26-​31) O saka 1 hahekalan a Krisciyang mimetmetay to toki milasil to ngaˈayay lihaf. Tinakoen, itini Ifiso mahapinangay no tarokos ci Pawlo, iraay ko ‘taˈangayay fawahan’ pasayraay cingranan mafohat, padotocayto cingra materek itira a mitosil, padama to tamdaw malo Krisciyang. (1 Korinto 16:​8, 9) Misaˈicelay ko ˈalomanay ‘milasil to ngaˈayay lihaf no sowal ni Yihofa.’ (Dmak 15:30-​35) Samanay ko minaroˈan hani? O caˈof itiniay i sinael anini. w20.09 16 fiedac 6-8 fatac

Ikor no mararaw ci Atam pairaay to patay no niyah ato polong tamdaw, no hatini pakayniyay pitowakang ningra a maroray kita. Kawra sanay ko dotoc a sowal ni Pawlo: ‘Patikol maˈorip ko mapatayay . . . pakayniay i cecay tamdaw ko sakaira.’ Oniya ‘cecay tamdaw’ ci Yis. Samanen patikolan no Kawas paˈorip ci Yis, hato iraay ko ˈodingaray tokel no tamdaw. Mansa mihaen ko sowal ni Pawlo: ‘Pakayni ci Ataman, mapatayay ko polong a tamdaw, pakayni ci Kristoan, mamaˈorip ko polong a tamdaw noikor.’ (1 Korinto 15:22) Sowal ni Pawlo: ‘Pakayni ci Ataman, mapatayay ko polong tamdaw no hatini.’ Tatodong ni Pawlo i, o teloteloc ni Atam mirocokay to raraw, cowa ka lefot ko tireng ato falocoˈ, saikor o mamapatay maemin. (Loma 5:​12) Soˈlin o “papatikol maˈorip” ko mapatayay noikor, kawra cowa ka haop ci Atam. Misamanay? Ci Atam nao malefotay tamdaw, padeteng sanay mitowakang to Kawas, mansa caka ngaˈay mikitini sapatefoc milifok to haepoc. Noikor sasawkiten ni Yis ko roma tamdaw malo ‘lotok a siri,’ malecaday ci Atam cangranan, o ‘tatahadaˈoc a malaˈafo.’​—Matay 25:31-​33, 46; Hipray 5:9. w20.12 5 fiedac 13-​14 fatac

Ano caka lifok ita ko cecay katayalan, haratengen ko ngaˈayay taˈarawan no madimadiay a coyoh. Kinacecayay, sapilipalawaw ci Yihofa toya tatiihay hongti ci Ahapan, papihadakan ko coyoh to sapaini, ˈalomanay coyoh mihadakay to harateng no niyah. Ikor, misaka dademakan ni Yihofa ko sapaini no cecay coyoh, somowal to mamalaˈosi cingra. (1 Hongti 22:19-​22) O romaroma coyoh matoleday, miharateng ‘na ecato ka somowal kako’ saan hokira? Cowa. Tada misapoeneray cangra, mitokel to papaˈdil ci Yihofaan. (Kakitaan 13:16-​18; Paˈarawan 19:10) Haratengen, ngaˈay malo laenoay no ngangan no Kawas a tamdaw, hanaca ngaˈay milasil to Hongti Kitakit Ningra o kalikoan a demak. Cowa ko saaroˈan ita ko piˈarawan no Kawas a minengneng to epoc ita. Ano misapoeneray kita, pakayni ci Yihofaan ato salikaka, o masakalimlaan kita. Mihaenay, cangacangen ci Yihofa padama kitaanan padotoc a misapoener ko falocoˈ, micerid miharateng to ngaˈayay taˈarawan no misapoeneray i Fangcalay Cudad. Roma i, mameten ita ko toki, makahi matayal saki salikaka.​—1 Pitiro 5:5. w20.12 26 fiedac 16-​17 fatac

O sakalidong a kafong mitaypiyaway to sapafeli ni Yihofa kitaanan a hatokel, oniya hatokel o sapalifon Ningra to midofdofay Cingranan a tamdaw. Soˈlin mapatay, papatikolen Ningra a paˈorip kita. (1 Tisalonika 5:8; 1 Timoti 4:​10; Titus 1:​1, 2) O sakalidong a kafong wa midipot to sapiharateng a ˈicel ita, padama kitanan miharateng to sakiˈok no Kawas, cowa ko papakidem ko pinengneng to malifaay a pasangaray. Mihaenay, samaan ko demak o misakafongay to sakalidong a kafong hani? Pairaen ita ko malecaday no Kawas a harateng. Tinakoen, cowa ko papatoroden ita ko tokel i hafay, ao Kawas ko patoroden. Mihaen, o misakafongay to sakalidong a kafong. (ˈOlic 26:2; 104:34; 1 Timoti 6:​17) Fonos no fangcalay saocor o Kimad no Kawas Fangcalay Cudad. Taˈangayay ko ˈicel noniya fonos, ngaˈayay mitihedak to masakenaay a mangah, padama to tamdaw mifalah to tatiihay nanaman, ecato ka apoh no mararaway sasowalen, milifok to soˈlinay a pasalat. (2 Korinto 10:​4, 5; 2 Timoti 3:​16, 17; Hipray 4:​12) Misongilaˈ kita micekiw, micada to sapahatatanam no likakawa, wa mafanaˈ misaka dademak toniya fonos.​—2 Timoti 2:​15. w21.03 27 fiedac 4 fatac; 29 fiedac 10-​11 fatac

Pakayni i noka pilasil ci Yisan a mapalit ci Yohani i, kamayan ciharateng to salikaka. Tinakoen itini potipot i Patmos i, mitilidan ningra ko sapatemer no Kawas cingraanan, ikor parakatan ningra ko cudad tayni kasakopang, araaw i, ho mafanaˈ cangra ‘caka halafin o mamifekad a demak.’ (Paˈarawan 1:1) Ci Yohani ikor no matedal caka halafin mitiliday to Yohani a Ratoh, maˈoningay ko hakelong no kaˈorip ni Yis ato mitosilay a tayal. Roma i, mitilidayho cingra to tolo a tikami pakalalok to salikaka, paˈicel to pakasoˈlin nangra. Wa ngaˈay kiso mitodong ci Yohanian, paihkal to kinafalahay harateng. Mipiliˈan iso samaan misakadademak to nokaˈorip, wa ngaˈay misawacay to maolahay kiso to tao hokira. Tokel ni Satan nanay palaken iso ko polong no toki ato ˈicel i tireng no niyah, o sakacihafay aca ato sakacingangan ko haratengen sanay. Kawra itini cowacowa pala, o salikaka paihkalay to kinafalahay a harateng, adihayay ko mapalakay a toki nangra milasil to ngaˈayay lihaf, padama to tao patireng to kalawidang ci Yihofaan. w21.01 10 fiedac 9-​10 fatac

Ano maˈinap ci Yonatan ci Tafitian matatodongay haratengen. O wawa no hongti ci Sawlo cingra, na ngangaˈay misaˈosi to citatodongay ko niyah midotoc a mala hongti. (1 Samuil 20:31) Kawra misapoeneray ci Yonatan, madimadiayho ci Yihofaan, mansa misarocod cingra midama to misaˈosian ni Yihofa, midopo ci Tafitian mala midotocay a hongti. Madimadiay ci Yonatan ci Tafitian, soˈlin mangolaw ko wama, cowa pifalah to widang no niyah. (1 Samuil 20:32-​34) Matomesay ko damsayay ni Yonatan ci Tafitian, mansa cowa ka sakalalifet saan ko pinengneng ci Tafitian. O idahiyay a mipanaˈ ci Yonatan, o timoloay a sofitay. Pakahemekay ko tamdaw cingraanan ato wama ci Sawloan, saan: ‘Mikikakaay to lidep ko kaliki, mikikakaay ko timolo to layong.’ (2 Samuil 1:​22, 23) Mihaenay na mamaliko ci Yonatan to katimolo no niyah. Kawra cowa pisatakaraw cingra, cowa ka maˈinap to malaˈosiay ni Tafiti a demak. Masafelitay, tada masemeray ci Yonatan to timolo ato pakasoˈlin ni Tafiti ci Yihofaan. Soˈlinay i, itiniay ikor no patayen ni Tafiti ci Koliyat, itiyaay tangongol ko kaolah ni Yonatan ci Tafitian. w21.01 21 fiedac 6 fatac; 22 fiedac 8-9 fatac

O polong a Krisciyang o mamidofdof to pikerid no malefotay a Yis Kristoan. Kawra fafahiyan a Krisciyang ikor no ciraramod, o mamidofdof to cowa kalefot a faˈinayan, cowato ko madoloay. Mihaenay, o cowaho ka ciraramod a fafahiyan salikaka ano misimsimay mararamod to cecay faˈinayan salikaka, o mamisongilaˈ a miharateng: ‘Samaan mahapinang ako koniya faˈinayan salikaka o mamalo ngaˈayay a tawki no lomaˈ noikor? Misaaretengay cingra to midokoay to Kawas a demak han? Ano cowa i, ikor no mararamod hano mamisongilaˈ cingra mikerid to paro no lomaˈ a midoko to Kawas saan kako a miharateng hani?’ Manaokaniw, o lalicayen no fafahiyan salikaka koniyah: ‘Iraay ko maanan ngaˈayay capeling ako, ngaˈay micowat to rihadayay a raramod hani? Iraay ko mihadidiay a falocoˈ, hinapaladaˈay to tao han? Tangongolay ko kalawidang ako ci Yihofaan han?’ (Patnakay 4:​9, 12) Haratengen, hakowa ko kalipahak no raramod, milingatay to pisaˈosi no cecay tamdaw i ˈayaw no mararamod. Anini, ˈalomanay ciraramoday a fafahiyan salikaka midofdofay to faˈinay no niyah, patirengay to ngaˈayay taˈarawan, o papakahemeken cangra. w21.02 8 fiedac 1-2 fatac

Toniya pina miheca, ˈalomanay salikaka sapitongalaw to mitosilay a tayal, misatapangay minanam to faelohay a sowal, itini misaaliay to mitosilay a kilac matayal. Mihaen ko saˈosi nangra, pakayniay sapitongalaw to tayal saki Yihofaan. Soˈlin pina miheca ngaˈ malaymay to faelohay a sowal, kawra wa ngaˈay adihay ko sadama nangra to kasakopang. O makapahay a capeling ato nalifetan nangra wa ngaˈay pakalalok to salikaka, wa patanektek to kasakopang. Oniya cowa pisateked a kinafalah, tada masemeray kita cangranan. O kasacefang no malohemay malitengay cowa ko papakayni ka eca malaymay no salikaka to sowal, hawad han a minilnil malo dama sikawdan ato malohemay malitengay. Ano miharateng ko malohemay malitengay minilnil to salikaka i, o palinian no Fangcalay Cudad ko haharatengen, cowa ko inaneng noniya salikaka a somowal ko piˈarawan.​—1 Timoti 3:​1-​10, 12, 13; Titus 1:​5-9. w20.08 30 fiedac 15-​16 fatac

Harateng no ˈalomanay tamdaw, ira ko tanoktokay tireng, hafay ato rihadayay a paro no lomaˈ ngaˈ, iraay ko lipahak sanay. Kawra o milengoan ni Yakop a lipahak o minaroˈan no fangcalay saocor, cowa ko pakayraan no tamdaw a maˈorip ko piˈarawan. (Kalatiya 5:​22) Raheker a lipahak ko Krisciyang, o pakayniay noka pikotod to taˈarawan ni Yis, iraay ko pihayda ni Yihofa. (Luka 6:​22, 23; Kolosay 1:​10, 11) Itiniay i falocoˈ ko lipahak no Krisciyang, malecad mitahepoan a tinghoy, cowa ko mamafiyor no potalay a fali ato ˈorad. Mihaenay, soˈlin awa ko payci anca adada, o lipahak ita cowa ko mamalahdaw. Soˈlin safeliten ato likafen no paro no lomaˈ ato widang, o lipahak ita cowa ko mamalowan. Ano sapiˈafasaw ko tao to lipahak ita, o lipahak no falocoˈ ita matongalay cowa ka lowan. Pakayni kita i pihakelongan tahalifa to sapalifet, misawacayay to o soˈlinay Krisciyang kita. (Matay 10:22; 24:9; Yohani 15:20) Mankora, mitilidan ni Yakop ko aniniay a sinael palimoˈot kitaanan. w21.02 28 fiedac 6 fatac

Itini Fangcalay Cudad adihayay a sinael ngaˈay mitadtad, ano caka rawraw kita, mitadiˈec ci Yihofaan, wa milifok to ˈicel. Ngaˈayay naˈengen i ponoˈ, o cecay ngaˈayay pakayraan i hadaken ko ngiha miasip to sinael, anca tiliden ikorto i ceriden a milomal. Palimoˈotan no Kawas ci Yosuwa padadotoc midotim to rikec ni Mosi, ano mihaen cingra wa inaneng ko demak. Roma i, itini i rikec maˈosiay ningra a sowal papadama cingraanan miremo to makokiˈay, ira ko timolo a milahci to ˈinorong. (Yosuwa 1:​8, 9) Anini, adihayay ko pakayraan pairaay to cariraw ato kokiˈ no mita. Itini Fangcalay Cudad adihayay ko sinael papadama kitaanan aka marawraw, ira ko rihaday no falocoˈ. (ˈOlic 27:​1-3; Taneng 3:​25, 26) Mirienang to saˈopo i, micadaay kita to sapasifanaˈ, matengilay a sapacaˈof, kalacafay to salikaka a macacawmaˈ, wa ngaˈay pakalalok kitaanan, adihayay ko haepoc. (Hipray 10:24, 25) Wa ngaˈay kita itini kasakopang mahela ko ngaˈayay widang, mifowah to nafalocoˈan cangraanan. w21.01 6 fiedac 15-​16 fatac

Patafang kiso to tireng micada to paputisem i paihkalay to pakasoˈlinay ko niyah ci Yihofaan, mitadiˈec Cingranan. Mansa mahemek ci Yihofa, pacomod tisowanan i paro no lomaˈ Ningra. O hademak iso nohatini, padadotoc a mitadiˈec Cingranan. Ano misaˈosi kita to kalimlaan a demak i, mitadiˈecay kita ci Yihofaan. Kawra itini kalowa toki i? Soˈlinay, ano o mananto ko misaˈosian iso, mipiliˈ to lawla anca tayal, ato patosokan no kaˈorip, o mamitadiˈec ci Yihofaan, aka mitiˈer to inaneng no niyah, kalimlaan mihaen to demak. Kilimen ko milingatay a safalod no Fangcalay Cudad, tooren koniya sakayat a midemak. (Taneng 3:​5, 6) Mihaen, o papakahemek kiso ci Yihofaan, wa milifokho to pikangodo no salikaka. Manaokaniw, cowa ko malefotay ko kahacecay tamdaw, mararaway no latekay, kawra ano ngaˈay kiso matayal saki Yihofaan, mamisarocod kiso a midemak. w21.03 6 fiedac 14-​15 fatac

Mihadidiay kiso nohatini to pisafelit no paro no lomaˈ han? Itini kitiraan iso, pakidemay ko saconged anca masongilaˈay makeceng ko midokoay ci Yihofaan a demak han? Ano hatiraay i, ˈosien ko saka 2 Timoti 1:​12-​16; 4:​6-​11, 17-​22, wa milifok kiso to taˈangay a sapakalalok. Oniya sowal sahtoay itiniay mapalit ci Pawlo a tiliden. ˈAyaw no misatapang kiso miˈosi toniya sinael, pasowalen ci Yihofa tahalifaay kiso to manan pasangaray, samanay ko nafalocoˈan. Ihkalen ko sowal, cangacangenho ci Yihofa padama tisowanan mikitini nalifetan ni Pawlo mahapinang ko matatodongay a safalod, mafanaˈ to sasamaan miremo to pasangaray. Na pasowalan ni Yihofa ci Pawlo, wa pakayni cingra pihakelongan a micada to sapalak. (Dmak 21:11-​13) Samanan ni Yihofa padama ci Pawlo mihadidi to sapalak hani? Pacaˈofan ni Yihofa ko satolon ningra, pafeliho to ˈicel cingranan. Mikiˈokay ci Yihofa, o mamalifok ni Pawlo ko micangacangan ningra a sapalifon. Pakaynianho ni Yihofa i madimadiay a widang ni Pawlo, pafeli cingranan to adihayay ciepocay a sapadama. w21.03 17-​18 fiedac 14-​15, 19 fatac