Saka 8 Folad

O mamalawidang kita ci Yisan ngaˈ, ngaˈay mikitini sapatefoc milifok to epoc. Samanen sowal ni Yis, ‘pakayniay i widang kinafalah to ˈorip’ cingra. (Yohani 15:13) ˈAyaw no tayni i hekal ci Yis a midokoay to Kawas a tamdaw, misaaliayto sakafanaˈaw ato maolah ci Yisan. Papatikolen maˈorip cangra no ikor, itiya o mamalawidang cangra ci Yisan ngaˈ, ngaˈay midaˈoc a maˈorip. (Yohani 17:3; Dmak 24:15; Hipray 11:​8-​12, 24-​26, 31) Mahemekay kita ngaˈay mikitini sadama ni Yis, mitenak to ngaˈayay lihaf no Hongti Kitakit no Kawas, pasifanaˈ to tamdaw to soˈlinay kimad. Itiniho i hekal ci Yis misarocoday a pasifanaˈ to tamdaw, ikor no patikol i kakarayan, malo ˈaˈideman no kasakopang, padadotocay mikayat toniya kalimlaan a demak. Misarocod kiso pasifanaˈ to tamdaw mafanaˈ cingraanan aci Yihofaan, maedeng misalimla cingra to mihadakan iso a ˈicel, kawra oniya demak dengan mitadiˈec to sapadama ni Yihofa aci Yis ngaˈ ngaˈay malaˈosi.​—Yohani 15:​4. w20.04 22 fiedac 7-8 fatac

‘Kaˈamisay hongti’ ato ‘katimolay hongti’ salakat itiniay i kaˈamis ato katimol no Israil a mikowanay. (Taniil 10:14) Kawra ikor no saka 33 miheca a Kocinsic, o finacadan no Israil cowato ko finawlan no Kawas. Mikitini Kocinsic misatapang, pahapinangan ni Yihofa ko ˈalomanay, edengan oya madimadiay mihakelong ci Yisan a tamdaw ko finawlan Ningra. Mihaenay, o adihayay lalakaw no Taniil saka 11 fedengan cowa pilingat to finacadan no Israil, milingatay to nisawawaan ni Yis. (Dmak 2:​1-4; Loma 9:​6-8; Kalatiya 6:​15, 16) Pakayni kalingad no toki, mafalicay ko saaroˈan no kaˈamisay hongti ato katimolay hongti, kawra iraay ko cecay tahapinangan cowa ka falic. Saka 1, o pifiyor nangra to finawlan no Kawas, sakoniya sowal, itini pala nangra adihayay ko finawlan no Kawas, anca o pipalak nangra to finawlan no Kawas. Saka 2, o pakayraan no katimolay ato kaˈamisay hongti micada to finawlan no Kawas, paihkalay to ˈintehay cangra ci Yihofaan. Saka 3, malalifetay ko katimolay ato kaˈamisay a hongti. w20.05 3 fiedac 3-4 fatac

Pakayni sapalaˈosiaw to araaw no Niyah, o kihcod a demak wa malaˈosi ni Yihofa a maemin. Roma i, soˈlin cowa ko malefotay ko sikawdan no Kawas, wa ngaˈayho padama ci Yihofa cangranan malo ngaˈayay matayal saki Cingranan ato palaˈosiay to araaw Ningra a tamdaw. (Isaya 64:8) Pakayniay ko Kawas toniya tosa pakayraan i fafekang palaˈosi to araaw no Niyah, o kihcod a demak cowa ko papakaconged ci Yihofaan. (Isaya 46:10, 11) Midotim kita to midemakan ni Yihofa a kihcod, ato pakayni pipaˈicel Ningra kitaanan hato madangaray ita a demak, matongalay ko pikangodo Cingraanan. Tinakoen, midotim to kasapaan a misangaˈan ni Yihofa a maamaan, miocoray kitaanan masemer to nano demak Ningra. (ˈOlic 8:​3, 4) Midotim to samanay ci Yihofa padama kitaanan milaheci to patorodan Ningra a demak kitaanan, mamitongal to mikangodoay a falocoˈ ita Cingraanan. O “Yihofa” sanay a ngangan soˈlinayto o kakangodoen! Samanen oniya ngangan mitaypiyaway to kihcod a capeling ni Yihofa, ato malaˈosiay a demak Ningra, ato papalaˈosien noikor a demak.​—ˈOlic 89:​7, 8. w20.06 9-​10 fiedac 6-7 fatac

O tamdaw ato ˈaˈadopen sahtoay misaaliay to saka saselaˈ a fali. Mihecahecaan, adihayay ko mapalakay no tamdaw ato ˈaˈadopen a sakasaselaˈ a fali, hanaca mihadakay to adihayay Eyang-howatan (no Kowaping a sowal). Kawra, kamayan maedeng ko saka saselaˈ a fali, cowa ka pakidem adihay ko Eyang-howatan. Misamanay hani? Samanen misangaˈay ci Yihofa to masakenakenaay a pinaloma. Miselipan no pinaloma ko Eyang-howatan, misangaˈ to saka saselaˈ a fali. Misawacayay konini to aniniay a sinael. Sasamaan kita ngaˈ matongal ko pisalimla to sano odoˈay a cikiw ato masakenaay a dafong no cikiw hani? (ˈOlic 115:16) O cecay pakayraan i, micerid miharateng to kalimlaan ko sapatelong ni Yihofa kitaanan. Ano misalimla kita toniya sapatelong, o mamiakoˈid to Kawas to romiˈamiˈad, wa misaˈicel mitafo to makoracay. w20.05 22 fiedac 5, 7 fatac

Sapisaysayaw toniya demak, paihkalay ci Yihofa to kasapaan a taneng, mihadidiay ato masadafdafay, pakaynian Ningra i adihayay pakayraan paihkal to taˈangayay ˈicel Ningra. Sakakaay i, kihecod a demak Ningra paihkalay to olah Ningra. (1 Yohani 4:8) Soˈlinayto padadotocay ci Yihofa patalahkal to fangcalay ngangan Ningra. Anini, padadotocay ci Satan pakadit no fangcalay ngangan ni Yihofa, papiharateng to tamdaw to awaay ko ˈicel ato cowa ka sadafdaf ci Yihofa, halo awaay ko taneng ato awaay ko olah sanay. Tinakoen, papipasoˈlinen ningra ko tamdaw, cowa ko ci Yihofa ko misangaˈay to kihcod. Ano pakasoˈlinay ko tamdaw to iraay ko Kawas i, paorafay cingra to o cowa ka sadafdaf a Kawas Cingra, pakidemay ko saali to tamdaw. Sanayho cingra milasil, awaay ko olah ni Yihofa, pasemsemay to tamdaw i marengrengay ko namal a cikok. Ano pakasoˈlin ko tamdaw toniya mangah, pasangarayto micada to sakowan no Kawas. Salikor papalaˈafoen ni Yihofa ci Satan, kawra ˈayaw nonini, wa padadotocho ci Satan mikayhid tisowanan miliyas to Kawas. Wa samaan ko hademak iso hani? w20.06 5 fiedac 13-​15 fatac

Itini adihayay kasakopang iraay ko salikaka minanamay to faelohay a sowal. Pakayni cangranan, sapaihkalaw to harateng no niyah ato nafalocoˈan pasangaray alatek. Kawra, ano eca pisamacay kita to ngaˈayay anca tatiihay ko sowal nangra, mamahapinang to maolahay cangra ci Yihofaan, makalimay sapidokoaw Cingraanan. Ano maˈaraw ita ko makapahay a capeling nangra, wa matongal ko kasemer cangraanan, mikangodo cangraanan. Mihaen, cowato ko papakayni ka eca ka malaymay ko sowal nangra a misakahmaw cangranan, malecad o pasowalay cangranan: “Malomaan ako kiso.” (1 Korinto 12:21) Pairaan ni Yihofa ko saaroˈan no kahacecay tamdaw i kasakopang, tada aakoˈiden ita Cingra. Ano faˈinayan anca fafahiyan salikaka kita, o awaay ko ramod anca ciraramoday, o kaemangay anca matoˈasay, inanengay anca mafokilay caciyaw, pakaynien ci Yihofaan ato salikaka, sahtoay o kalimlaan. (Loma 12:​4, 5; Kolosay 3:​10) Nanay mameten ita ko toki padama to kasakopang, wa matongal ko pikangodo to salikaka i kasakopang. w20.08 31 fiedac 20-​22 fatac

Soˈlin mitaˈongay to samiay ko Atin a tamdaw, masemeray to taneng no tamdaw, malafoayho ko kaˈorip, malikafay ci Pawloan, kawra kamayan tosilen ni Pawlo cangra. Ci Pawlo na ‘pakaditay to Kawas, mipalakay, misamsamay to tamdaw’ ko niyah. (1 Timoti 1:​13) Kawra, awaayto ko kapo cowa kahaen ko pinengneng ni Yis cingraanan, mansa pakasoˈlin ci Pawlo o mamafalic ko roma a Atin tamdaw. Ikorto soˈlinay malo Krisciyang ko roma Atin tamdaw. (Dmak 9:​13-​15) Itini saka 1 hahekalan, masakenaay tamdaw malo Krisciyangay. Patikami ci Pawlo to Korintoay a Krisciyang i, somowalay to na midemakay cangra to mararaway a demak, malafoay ko kaˈorip, kawra ‘maharekayto a mikorac’ cangra. (1 Korinto 6:​9-​11) Ano itiraay kiso toya lintad a maˈorip, wa pakasoˈlin kiso to ngangaˈay mafalic koya tamdaw han? w20.04 12 fiedac 15-​16 fatac

Ano cisasa ko salikaka to haepoc midoko to Kawas, aka tangsol ko malohemay malitengay a mikapoˈi cangranan, ao mamisarocod a cipinang to hano mahaen ko harateng nangra. Edengan mihaen ko demak, ngaˈ makilim no malohemay malitegay ko matatodongay a sinael pakalalok cangranan, Matalaway ci Iliya patayen ni Yicipil, hato milaliway cingra. (1 Hongti 19:​1-3) Harateng ningra edenganto cingra cecay ko pairasolay ni Yihofa, awaay ko epoc no tayal no niyah sanay cingra miharateng. sakapatayaw sanay. (1 Hongti 19:10) Cowa ka kapoˈiyen ni Yihofa ci Iliya, ao mikiˈokay cingraanan, cowa ko cecayay aca cingra, o taˈangayay ˈicel no Kawas, o papadama cingraanan, hanaca adihayayho ko tayal mitalaay cingraanan. Mihadidiay ci Yihofa mitengil to nafalocoˈan ningra, pafeli cingranan to faelohay ˈinorong. (1 Hongti 19:11-​16, 18) Mananamay ita ko maanan? Kita maemin, mikiriwiˈay ko malohemay malitengay, o caciharateng to sikawdan ni Yihofa. Ano caka rihaday ko cecay tamdaw, anca awaay ko tatodong no niyah micada to sasodod no Kawas saan miharateng, o mamihadidi ko malohemay malitengay a mitengil to nafalocoˈan ningra, ikorto misarocod a padama cingranan mihapinang, misaaretengay ci Yihofa minengneng cingraanan. w20.06 22 fiedac 13-​14 fatac

Mitokelay ci Yihofa lipahak ko kalacafay ita to salawina ato widang. (ˈOlic 133:1) ˈAlomanay ko widang ni Yis. (Yohani 15:15) Sowal no Fangcalay Cudad ira ko ngaˈayay widang adihayay ko epoc, somowalayho aka misiwatid to niyah. (Taneng 18:1, 24) ˈAlomanay tamdaw anini ngaˈayay pakayni sapicawmaˈ malawidang a wangcan mafanaˈ to adihayay widang, ngaˈay palahdaw to matoˈoray harateng sanay. Kawra, o maminaˈon kita misaka dademak to sapicawmaˈ malawidang a wangcan. Paihkalay ko mikingkiwan, adihayay ko toki minengneng to lihaf ato sasing i wangcan a tamdaw, ikor matoˈoray a matoled. Misamanay hani? Cecay lalangian i, o mihadakan no tamdaw i wangcan o sangaˈayay i nokaˈorip a tatokian, o sapaˈaraw i o sangaˈayay a sasing nangra ato widang, o ngaˈayay pisalamaan a kitiraan. Telocto, o harateng no minengnengay to sasing a tamdaw, palini sato kaˈorip no niyah cowa ka samaan, awaay ko hemek saan a miharateng. w20.07 5-6 fiedac 12-​13 fatac

Mikecolay 1988 miheca Saka10 Folad 1 romiˈad, no Padaka lalakaw sanay ko sowal: “Kafanaˈ ko malohemay malitengay, ano o mananto ko sasaysayen a demak, misaˈosi to maanan kalimlaan a demak, wa ngaˈay pakaynien ni Yis Kristo i fangcalay saocor padama to kahacecay a malohemay malitengay mihadak to matatodongay a safalod no Fangcalay Cudad. (Dmak 15:​7-​15) O polong a malohemay malitengay no kasakopang wa milifok to sadama no fangcalay saocor, cowa ko cecayay aca.” O cecay malohemay malitengay mikangodo to roma malohemay malitengay, ano malalengo i cowa ko mamiˈafas a somowal anca awa ko tolas no sowal, cowa ko mamiharateng to matatodongay ko niyah a harateng. Wa misapoener cingra a mihadak to harateng no niyah, wa misongilaˈ mitengil to sowal no tao. Sakakaay i, mamisarocod cingra mihadak to safalod no Fangcalay Cudad, ato midofdof to sakayat no ‘madimadiay citanengay a koli.’ (Matay 24:45-​47) Ano malalengo to pasangaray demak masasingodo ko malohemay malitengay, paihkal to olah, o papadamaen no fangcalay saocor cangra, mikayat cangranan matatodong ko misaˈosian.​—Yakop 3:​17, 18. w20.08 27 fiedac 5-6 fatac

O ˈada ni Pawlo mikikakaay ko ˈicel cingranan. ˈAlomanay ko cifadangalay a tamdaw tada ˈintehay cingranan, mansa kinapinaay a mapekpek, mapalit cingra. O roma tamdaw nao hawidang ni Pawlo, kawra tada tatiihay cingraanan, ano i kopangay to a tamdaw misafelitay cingranan. (2 Korinto 12:11; Filipi 3:​18) Kawra, malowiday ni Pawlo ko polong misafelitay cingranan a tamdaw. Misiˈayaw to sapalak, padotocay cingra tanektek a mitosil. Soˈlin pakatoled ko salikaka cingranan, kamayanho a madimadi cingra cangraanan. Sakakaay i, padotocay cingra a madimadi ci Yihofaan. (2 Timoti 4:8) Ngaˈay cingra miremo to masakenaay a pasangaray, cowa ko niyah a ˈicel ko mitiˈeran, ao mitiˈeray to ˈicel ni Yihofa. Malikafay anca mipalakan no tao kiso han? Tahalifa to pisafelit i, tano sowal no Kawas a mipatemer to falocoˈ nangra. Saka laˈosiaw noniya patosokan, tatano Fangcalay Cudad ko sapacaˈof to salicay nangra, padotoc a mikangodo cangranan, mitafo to damsayay, midemak to ngaˈayay i polong a tamdaw, mahawpay ko ˈada iso.​—Matay 5:​44; 1 Pitiro 3:​15-​17. w20.07 17-​18 fiedac 14-​15 fatac

O masamaanay a Kawas ci Yihofa hani? Pasowalay ci Tafiti i aniniay a sinael. (ˈOlic 18:35) Maharatengay ni Tafiti i, na tayraay ci Samuil i lomaˈ no wama minilnil to mamidotoc a faelohay a hongti no Isral, soˈlin o sasafaay no fafaloay a wawa cingra, kawra mipiliˈan ni Yihofa cingra mikotay to Hongti ci Sawloan. (1 Samuil 16:​1, 10-​13) Maedeng malecaday ko harateng ni Tafiti to roma mitiliday to ˈOlic a tamdaw, sanay koniya mitiliday: ‘Roho sa ko Kawas minengneng to kakarayan ato sera, palowad nai alafoh ko tadancaay a tamdaw, palowaden nai alafoh ko manikaway a tamdaw, papikapot cingranan to kangodoan a tamdaw a maroˈ.’ (ˈOlic 113:​6-8) Mikitini pakayraan ni Yihofa micada to finawlan Ningra, ngaˈayay mahapinang ita to tada misapoeneray Cingra. Soˈlin cowa ko malefotay kita, kawra ngaˈayay kita midoko Cingraanan, misawidangayho kitaanan. (ˈOlic 25:14) Pakayni saka ngaˈay ita malo widang Ningra, talaˈayaway ci Yihofa a kinafalah to foseniˈan a Wawa no Niyah, mihepol to raraw ita. Tada iraay ko siniˈadaay a falocoˈ ni Yihofa. w20.08 8 fiedac 1-3 fatac

Maharekayto ci Yihofa misaˈosi to hacowa tatokian a palaˈafo toniya ciraraway a hekal, itini ˈayaw noya romiˈad, cowa ko mamacaloh Cingra a midemak. (Matay 24:36) Soˈlin makalimay ci Yihofa patikol paˈorip to mapatayay tamdaw, kawra kamayan a mihadidi Cingra. (Yopu 14:14, 15) Wa mitala Cingra to matatodongay a tatokian patikol paˈorip cangranan. (Yohani 5:​28) Hatiniay ko pihadidi ni Yihofa, tada miakoˈiday kita Cingranan! Haratengen, ano cowa pihadidi ci Yihofa, wa awato ko toki ita ato ˈalomanay tamdaw pasasiyor. Tokel ni Yihofa nanay ˈaloman ko tamdaw milifok to tahadaˈocay ˈorip. Sasamaan ko demak ita a miakoˈid ci Yihofaan hani? Fanekfek kita mitosil, misaˈicel mikilim to ‘matatodongay ko waywayan ngaˈayay milifok to tahadaˈocay ˈorip a tamdaw,’ padama cangranan maolah ato midoko ci Yihofaan. (Dmak 13:48) Mihaen o mamalecadto cangra kitaanan, pakayni pihadidi ni Yihofa a malidong. w20.08 18 fiedac 17 fatac

Makalimay kita padama to pacekiwan mafanaˈ ci Yihofaan, kawra kalimlaan ko patemer to falocoˈ no pacekiwan, mihaen wa makalim cingra misaka dademak to mananamay. Mahaenay ko sapasifanaˈ ni Yis, cowa ko katatodong aca no sowal ningra, tangongolay ko pitemer to falocoˈ no tamdaw, mansa makahi ko tamdaw mihakelong ci Yisan. (Luka 24:15, 27, 32) Padamaen ita ko pacekiwan mihapinang, soˈlinay materek ci Yihofa, ngaˈayay ingiden ita Cingra, hanaca ngaˈayay malo Wama ita Cingra, malo Widang no Kawas. (ˈOlic 25:​5) Ano misikay to pacekiw i, padamaen ko pacekiwan mihapinang to makapahay capeling ni Yihofa. (Kasadakan 34:​5, 6; 1 Pitiro 5:​6, 7) Ano o mananto a lalakaw ko milengoan, paihkalen to masamanay a Kawas ci Yihofa. Papitinakoen ko pacekiwan to olah ni Yihofa, sidaˈitay ato siniˈadaay falocoˈ. Sanay ci Yis, ‘sataˈangayay, kalimlaan a sarikec’ i ‘maolah ci Yihofaan Kawas iso,’ mihaenay mamisarocod kita padama to pacekiwan maolah ci Yihofaan.​—Matay 22:37, 38. w20.10 10 fiedac 12 fatac

Mikangodoay ci Yis to fafahiyan. (Yohani 4:​27) Mikangodoay cingra to polong midofdofay to araaw no kakarayan Wama midemak a fafahiyan, malecaday o paro no lomaˈ a tamdaw ko pinengneng cangranan, pangangan to “fafahiyan salikaka.” (Matay 12:50) Mala soˈlinay windang nangra. Tinakoen, windang ni Marta aci Mariya ci Yis, cowa ka ciramod koniya tatosa fafahiyan. (Luka 10:38-​42) O sowal ato midemakan ni Yis parihadayay cangranan. Kinacecayay, itiniay i kaˈayaw ni Yis maroˈ ci Mariya mitengil to sowal ningra, cowa ka marawraw. Itiya caka hemek ci Marta samanen cowa padama ci Mariya a dademak, mihadakay to nafalocoˈan a harateng. Toya tatokian, padamaan ni Yis cangra minanam to kalimlaan a kimad. Roma i, marariday ci Yis micawmaˈ ci Martaan, Mariyaan ato salikaka nangra ci Lacarusan, paihkal to kaciharateng cangranan. (Yohani 12:​1-3) Mansa tiya pakidem ko adada ni Lacarus i, cowa ka cisasa ci Marta aci Mariya misaali to sadama ni Yis.​—Yohani 11:​3. w20.09 20 fiedac 3 fatac; 21 fiedac 6 fatac

Saka 1 hahekalan a nisawawaan mihamhamay ‘tangsol’ a masadak ko Hongti Kitakit no Kawas, ho ecato ka roero no Loma tamdaw cangra. Kita anini mitokelay kahenay palaˈafoen no Hongti Kitakit no Kawas ko tatiihay tamdaw ato tatiihay a demak, patireng to moecelay faelohay a hekal. (2 Pitiro 3:​13) Kawra iraayho ko mihadidiay ita, mitala to kaira no misaˈosian ni Yihofa a toki. Pafelian ni Yihofa ci Nowa to maedengay a toki misangaˈ to tamina halo ‘milasil to moecelay.’ (2 Pitiro 2:5; 1 Pitiro 3:​20) Misaˈosi ci Yihofa palaˈafo to Sotom ato Komora a tamdaw i, mihadakay ci Apraham to adihayay salicay, padotocay ci Yihofa mihadidi mitengil. (Satapangan 18:​20-​33) Adihayay mihecaan, cowa ka madimadi ko Israil tamdaw ci Yihofaan, padotocay a misodod ci Yihofa cangranan, tada mihadidiay cangranan. (Nihimiya 9:​30, 31) Anini, kamayan mihadidi ci Yihofa to tamdaw, misolot to tamdaw miingid Cingranan, hanaca paira to toki nangra ‘pasasiyor a maemin.’ (2 Pitiro 3:9; Yohani 6:​44; 1 Timoti 2:​3, 4) O taˈarawan ni Yihofa pakalalokay kitaanan itini pipasifanaˈ to tamdaw i, padotoc a paihkal to mihadidiay. w20.09 10 fiedac 8-9 fatac

Ano patikolen ni Yihofa paˈorip ko cecay tamdaw i, wa palecaden ko maharatengay ato pinangan ningra to saˈayaway. Tatodong nonini tada maolahay ci Yihofa tisowanan, o maharatengay ato matinakoay iso, o misowalan ato midemakan iso, o hahacecayen Ningra a mitilid. Ano papatikolen Ningra paˈorip kiso, o papahecaden to salakatay kiso, pakaynien Cingranan ko sowal o madoloay a demak. Mafanaˈay ci Tafiti, ihkalay ko kafanaˈ ni Yihofa to kahacecay tamdaw. (ˈOlic 139:​1-4) Mafanaˈ tonini, pakayni kitaanan wa ira ko maanan sapadama hani? Maharateng to cipinangay ci Yihofa kitaanan, wa mahapinang ita tada ciharatengay Cingra kitaanan, itini pinengneng Ningra, o cecacecay tamdaw sahtoay o mikiriwiˈay, o kalimlaan. Adihayay malifaay i nokaˈorip mifiyoray kitaanan, mihacecayan Ningra a mitilid. Tada parihadayay koni kitaanan! Cowa ko matoˈolay kita, miceriday ci Yihofa i tatihi ita, mikilim to toki a padama kitaanan.​—2 Rayray 16:9. w20.08 17 fiedac 13-​14 fatac

Maolahay ci Yihofa pasifanaˈ to finawlan Ningra. Mitokelay Cingra mafanaˈ cangra Cingranan, maolah Cingranan, hanaca malo wawa Ningra, ngaˈay tahadaˈoc a maˈorip. Oniya kihcod wa pakayni sapasifanaˈ ni Yihofa a malaˈosi. (Yohani 17:3) Itini saka 1 hahekalan, pakayniyan ni Yihofa i kasakopang no Krisciyang pasifanaˈ to finawlan Ningra. (Kolosay 1:​9, 10) O fangcalay saocor, oya mikiˈokan ni Yis sapafeli a ‘padamaay,’ taˈangayay ko sapadama. (Yohani 14:16) Padamaan no fangcalay saocor ko nisawawaan cipinang to Fangcalay Cudad, padamaho cangranan miharateng to nanosowal ato demak ni Yis. O sasowalen ato nano demak ni Yis matiliday i ratoh a cudad. Oniya sifanaˈ paˈicelay to pakasoˈlin no saka 1 hahekalan a Krisciyang, mitongalay to olah nangra to Kawas, ci Yisan ato salikaka. Paˈayaway ci Yihofa ‘itini salikoray lintad,’ kasafinacadan no kalowa kitakit wa tayra i lotok Ningra, mikapot to matatodongay a pihakelongan, micada to sapasifanaˈ Ningra. (Isaya 2:​2, 3) Anini, malaˈosiyay to koniya sapairasol. w20.10 24 fiedac 14-​15 fatac

O roma tamdaw cowa ka kahi micada to mikitiniay i olah no widang mihadakan a limoˈot. Misamanay? Samanen misatakaraway. O misatakaraway a tamdaw maolahay ‘mitengil to ngaˈayay a sowal,’ ‘cowa ka pitengil to soˈlinay kimad.’ (2 Timoti 4:​3, 4) Pakidemay ko pinengneng to harateng no niyah, anca mikikakaay ko niyah to tao saan miharateng. Kawra, sowal no tarokos ci Pawlo: “Ano caay ko tadamaanay a tamdaw, o tadamaanay kako ano saan ko cima i, o misafanaˈay cingra to tireng.” (Kalatiya 6:3) Sowal ni Solomon tada matatodongay, sowal ningra: ‘O manikaway citanengay a kapah, ikakaay to matoˈasto caay pilayap to pisalof no tao maapaay a hongti.’ (Patnakay 4:​13) Haratengen, tiya salofen ni Pawlo ci Pitiro i kaˈayaw no ˈalomanay tamdaw i, patirengay to maanan ngaˈayay taˈarawan ita. (Kalatiya 2:​11-​14) Ci Pitiro cowa ka pakayni pakayraan ni Pawlo ato kitiraan mihadak to limoˈot a maketer ci Pawloan, tada citanengay cingra, micadaay to limoˈot, cowa kaˈinteh ko falocoˈ ci Pawloan, ikor panganganan ningra ci Pawlo to ‘kaolahan a salikaka.’​—2 Pitiro 3:​15. w20.11 21 fiedac 9, 11-​12 fatac

Samaan ko demak no pacekiwan, ngaˈ ngaˈay ko kacakat hani? Mirienang to saˈopo no Krisciyang. Samanen o lalakaw no saˈopo wa ngaˈay padama cangranan matongal ko sifanaˈ, matongal ko pakasoˈlin, wa ngaˈayho padama cangranan matongal ko olah to Kawas. (Dmak 15:​30-​32) Pasowalay ko salikaka to pacekiwan, samanen maolah maolahay cingra ci Yihofaan, makalimay sapidofdofaw to sarikec ni Yihofa. (2 Korinto 7:1; Filipi 4:​13) Ano mafanaˈ ko pacekiwan to salikaka i, wa ngaˈay pasayra i ngaˈayay taˈarawan nangra a minanam, mafanaˈ to sasamaan midofdof to limoˈot ni Kristo, maolah to Kawas ato maolah to tao. (Yohani 13:​35; 1 Timoti 4:​12) Mamahapinang no pacekiwan, o salikaka i kasakopang tahalifaay to malecaday to no niyah a pasangaray, mananamayho o ngangaˈay ko niyah a mifalic, saikor ngaˈay malo Krisciyang. (Limoˈot 30:11) O kahacecay tamdaw no kasakopang wa ngaˈay mihadak to ˈicel, tano masasiromaay pakayraan a padama to pacekiwan macakat.​—Matay 5:​16. w20.11 5 fiedac 10-​12 fatac

Tatodong ni Pawlo i, soˈlinay cingra itini i karaˈodotan no Ifiso malaˈodot to ˈaˈadopen. (2 Korinto 1:8; 4:​10; 11:23) Roma i, pakidemay ko macadaay ningra a sapalak no Yutaya tamdaw ato roma finacadan, oniya tamdaw malecaday o ˈaˈadopen a mariˈang. (Dmak 19:26-​34; 1 Korinto 16:9) Ano samaanto ko pakayraan, katalawan ko pakayraan ni Pawlo, kawra tawlikay ko pinengneng ningra to hanoikor. (1 Korinto 15:30, 31; 2 Korinto 4:​16-​18) Itiniay kita i katalawan a lintad maˈorip. O roma salikaka madokaˈay no mariˈangay a waywayan, o roma itiniay malalooday a pala, maroeroay ko ˈorip, o roma itiniay makecengay ko mitosilay tayal a kilac, misiˈayaway to sakalahdawaw no ˈorip ato pasalat a midoko ci Yihofaan. Kawra, oniya salikaka padadotocay madimadi ci Yihofaan, patirengay to nagˈayay taˈarawan ita. Cowa ka talaw cangra, mafanaˈay cangra soˈlin malahdaw ko ˈorip no hatini ngaˈayto, maharekayto ci Yihofa misaday to makapahay hanoikor nangra. w20.12 9 fiedac 3-4 fatac

Itini pitosilan iso a kilac ano awaay ko minaroˈan, anca awaay i lomaˈ ko ˈalomanay tamdaw, wa matoled kiso, maˈisang ko harateng han? Mahaen ko pakayraan, sasamaan kita padotoc a lipahak mitosil hani? Papairaen ita ko matatodongay pinengneng to mitosilay a tayal. O maanan ko matatodongay a pinegneng hani? Haratengen, sakakaay a araaw ita mitosil i, o mamilasil to fangcalay ngangan no Kawas ato Hongti Kitakit Ningra. Ihkalay ko sowal ni Yis, cowa ka ˈaloman ko pakahelaay a tamdaw to saka tayra i ˈorip a lalan. (Matay 7:​13, 14) Ano mitosil kita i, o malacafay ci Yihofaan, ci Yisan ato coyoh a matayal, tada kalikoan konini. (Matay 28:19, 20; Paˈarawan 14:​6, 7) Ci Yihofa misolotay toya makalimay midoko Cingranan a tamdaw. (Yohani 6:​44) Haratengen, ano caka olah mitengil ko tao anini to milasilan ita a lihaf, ano miliyaw i, o mamitengil alatek. Cecay ci Tepora a fafahiyan salikaka sanay: “O ciˈicelay a lalosidan ni satan ko matoleday falocoˈ, taˈangayay ko pidokaˈ.” Kawra palinien to ˈicel ni Yihofa, cowa ka samaan ko lalosidan ni Satan. w20.12 26 fiedac 18-​19 fatac; 27 fiedac 21 fatac

Pakayni sapaririˈaw to niyah ato paro no lomaˈ, ˈalomanay madimadiay salikaka mieminay to toki a mawmah. Soˈlin hatira, misarocoday cangra midama to likakawa no Kawas. Tinakoen, o roma tamadw mirienangay to padamaay to tahapadesay, o roma tamdaw mirienangay to patirengay a tayal. Roma i, kita kahacecay a tamdaw wa ngaˈay pakiyaho midama to mitosilay a tayal. To lipalipay, mirienangay kita to saˈopo tawlikay mirienang to kamok, misawacayay koni to maolahay kita to salikaka. Soˈlin malotayay kita alatek, kamayanho mirienang to saˈopo. Soˈlin marawraway ko harateng ita, kamayan misaˈicel pakamay a pacaˈof. Soˈlin adihayay ko pasangaray ita, kamayanho misarocod itini ˈayaw no saˈopo ato ikor pakalalok to tao. (Hipray 10:24, 25) Maˈaraw ko pisaˈicel no salikaka, tada mitemeray to falocoˈ! w21.01 10 fiedac 11 fatac

Misatakaraway a tamdaw pasangaray pakahemek to tao, mangalayay cangra pakahemek ko tao to niyah. Madoloay masasiay to tao ko mahaenay a tamdaw, sapilowidaw to tao ko maharatengay. Cowa ka makahi a pahatatanam to tao, paladaˈ to fadangalan i tao. Maolahay cangra mitoor to pakayraan no niyah a midemak, o harateng nangra: “Ano sakangaˈayaw no demak, oniyah ko midemak.” O misatakaraway a tamdaw madoloay ira ko maˈanofay harateng, maˈinapay to tao. Ano mahapinang ita ko niyah madoloay misatakaraw, cangacangen ko Kawas padama kitaanan ‘misafaeloh to harateng,’ aka palamiten ko mahaenay a dangoc. (Loma 12:2) Tada miakoˈiday kita ci Yihofaan patirengay to hatiniay a ngaˈayay a taˈarawan. (ˈOlic 18:35) Ci Yihofa misapoeneray micada to midokoay Cingranan a tamdaw, maolahay kita mitodong Cingranan. Roma i, masowalay no Fangcalay Cudad ˈalomanay tamdaw misamiming ko harateng a kalacafay to Kawas, makalimay kita minanam cangranan. Wa panokayen ita ko ˈdil ato pakahemek ci Yihofaan.​—Paˈarawan 4:​11. w20.08 13 fiedac 19-​20 fatac

O raramod o malefotay a sapatelong no Kawas i tamdaw, kawra cowa ko malefotay ko tamdaw. (1 Yohani 1:8) Mansa mihaen ko sowal no Fangcalay Cudad, o ‘mamaroray’ ko mararamoday, wa tahalifa to pasangaray. Mitokelay ci Yihofa to Krisciyang a faˈinay midimokos to saali no paro no lomaˈ i noˈadingoan, nofalocoˈan, ato nodafongan. (1 Timoti 5:8) Kawra ano samaanto ko ˈifowa no ciramoday a fafahiyan salikaka, o mamihadak to toki micekiw ato midotim to kimad no Kawas, hanaca mitolon to Kawas. Mihaen to demak cowa ko madoloay alatek, tada ˈifowaay ko fafahi, awaay ko toki ato ˈicel midemak tonini saan miharateng, kawra mihaen to demak o kalimlaan. Misamanay hani? Samanen mitokelay ci Yihofa to kahacecay tamdaw palahad ato padadotoc mitongal to kalawidang Cingraanan. (Dmak 17:27) Ngaˈayay haratengen, wa adihay ko mihadakan no fafahi a ˈicel alatek, ngaˈ ngaˈay midofdof to cowa kalefot a faˈinay. Kawra, mitadtaday ko Fangcalay Cudad to lalangian mihaen to demak, ano cipinang ato micada cangra, o mamadoloto midofdof to faˈinay, misongilaˈ midemak to sapafeli ni Yihofa cangranan a ˈinorong. w21.02 9 fiedac 3, 6-7 fatac

O sapalifet, mahecaday misangaˈay to fonos. Pafaedeten pakietecen ko fonos, malo tanektekayto. Malecaday, ano padadotoc kita mihadidi i sapalifet, wa matongal ko tanektek no pakasoˈlinay falocoˈ. Mansa mihaen ko sowal ni Yakop: ‘Tahiraen i tolas ko pihadidi, ho malaˈosi ko demak namo, awa ko laliyaliyawen, awa ko kacangoˈotan.’ (Yakop 1:4) Maˈaraw ko pakasoˈlinay falocoˈ no niyah pakayni i sapalifet a malo tanektekay, ano misiˈayaw to sapalifet i, wa madolo to padadotoc lipahak.Masowalay ni Yakop i tikami ningra, o pina pasangaray wa palahdaw to lipahak no tamdaw alatek. Cecay pasangaray: Caka fanaˈ to sasamaan ko demak. Tahalifa to sapalifet i, makalimay kita inaneng ko misaˈosian, pakahemek to Kawas, paira to haepoc no salikaka, ngaˈayho padama to niyah padadotoc a madimadi. (Yirimiya 10:23) Misaaliay kita to taneng ngaˈ mafanaˈ misaˈosi, ato sasamaan pacaˈof to misafelitay kitaanan a tamdaw, ano caka fanaˈ sasamaan ko demak, wa matoled ko falocoˈ, telocto, wa kahenay malahdaw ko lipahak. w21.02 28 fiedac 7-9 fatac

Patirengay ci Yihofa to sangaˈayay taˈarawan ita. Tada fanekfekay ko olah kitaanan, mihaenay ano madimadi kita Cingraanan, awaay ko manan mamiconged to olah Ningra kitaanan. (Loma 8:​38, 39) Mihongyakan itini a “fanekfek” a Hipray sowal, o “macowat tahatolas” sanay ko tatodong. Latekay, misaaliay kita mihadak to taˈangayay ˈicel ngaˈ, paihkal to damsayay i salikaka. O sasowalen ato midemakan no tao, cowa pakahemek kitaanan, wa ‘tano olah a masasisodod, pakayni rihadayay a kakelec, misarocod a mitadiˈec i fangcalay saocor a malacecay.’ (Ifiso 4:​1-3) Cowato ko mamisamacay to dangoc no salikaka. Wa misaˈicel kita tano pinengneng ni Yihofa a minengneng to salikaka. (1 Samuil 16:7; ˈOlic 130:3) Latekay, paihkal to damsayay i salikaka cowa ko madoloay, mangalef ano mafanaˈay kita to dangoc nangra i, tada pasangaray. Itini sakacecay hahekalan a Krisciyang iraay ko mahaenay pasangaray. Tinakoen ci Iuotia aci Sintiki. Palimoˈotan no tarokos ci Pawlo cangra ‘ka malacecay ko harateng a matayal saki tapang.’​—Filipi 4:​2, 3. w21.01 22-​23 fiedac 10-​11 fatac

Kapah a tamdaw, masemeray ko matoˈasay tamowanan, mahemekay kalacafay tamowanan a midoko ci Yihofaan. (Cifaniya 3:9) Matomesay to ˈicel kamo, fanekfekay ko olah, misarocoday a midemak to patorodan tamowanan a demak, maolahay cangra tamowanan. Tada idahiyayto kamo! Kapah a salikaka, aka mapawan, tada maolahay ci Yihofa tamowanan, pakasoˈlinay tamowanan. Paˈayaway ci Yihofa, itini salikoray romiˈad, wa ˈaloman ko kapah tamdaw misalof to falocoˈ patafang to niyah a matayal saki Cingranan, malecad o ˈalomanay a sofitay. (ˈOlic 110:​1-3) Mafanaˈay ci Yihofa maolahay kiso Cingranan, makalimay patafang to sangaˈayay no niyah Cingranan. Mihaenay, ka pihadidi to niyah, ka pihadidiho to tao. Ano mararaw kiso, misapoener a micada to sarikec ato sapalimoˈot, o mikitiniay ci Yihofaan konini han ko pinengneng. (Hipray 12:6) Ano patorod ko cima tisowanan i, sarocoden a midemak. Sakakaay i, ano o mananto ko demak iso, pakahemeken ko kakarayan a Wama, ho pakayni tisowanan a maliko Cingra.​—Taneng 27:11. w21.03 7 fiedac 17-​18 fatac

O patoleday to falocoˈ ita a lalangian adihayay, iraay ko kemoday, ato potalay. Matoled ko falocoˈ ita, pakayniay raraw no niyah, dangoc anca tatiih ko tireng, alatek awaay ko kaolahan noniyah a saaroˈan i likakawa ni Yihofa, anca itiniay i awaay ko maolahay to kimad a kilac mitosil. Pakayni i dangoc ato raraw no niyah, madoloay kita ira ko cowa ka tatodong a harateng. Telocto, miharateng kita samanen cowa ka ngaˈay ko demak ita, cowa ko mamakahi ci Yihofa pacomod kitanan i faelohay hekal. O mahaenay a harateng tada katalawanto! Haratengen ita, sowal no Fangcalay Cudad edengan ci Yis Kristo, ‘ciraraway ko polong no tamdaw.’ (Loma 3:​23) Kawra o kasadakan no Fangcalay Cudad ci Yihofa cowa ka mikilim to raraw ita, cowa pisaali Cingra kitaanan malo malefotay. O sidaˈitay a Wama Cingra, makalimay padama kitanan, mihadidiayho kitaanan. Mafanaˈay Cingra pakayni ˈalomanay, sapiremoaw to dangoc no niyah, ira ko matatodongay a harateng to niyah, cowa ka madoloay, mansa miceriday Cingra misaday padama kitaanan.​—Loma 7:​18, 19. w20.12 22 fiedac 1-3 fatac

Kahacecay tamdaw romakatay kita i cecay lalan, o kahiceraan i o mikowanan no Kawas a faelohay hekal. To romiˈamiˈad romakatay kita to sakaˈorip a lalan, malecad o sowal ni Yis, kincoay koniya lalan, pasangaray rakaten no no latekay. (Matay 7:​13, 14) Samanen cowa kalefot, madoloay kita miliyas toniya lalan. (Kalatiya 6:1) Ano sapadotocaw kita romakat i sakaˈorip a kincoay lalan, o mamakahi kita a misalof to harateng, waywayan ato demak noniyah. Pakalalokay ko tarokos ci Pawro kitaanan ‘micada to sasalof.’ Saka cipinangaw kita to harateng ato nafalocoˈan no niyah cowa ko madoloay, samanen misafakofakoay ko falocoˈ ita, pasangaray mihapinang to o maanan ko misaalian no niyah, madoloay ‘miharateng to mararaway a milipalaw to niyah.’ (Yakop 1:​22; Yirimiya 17:9) Mihaenay, palalinien ita to Fangcalay Cudad a cipinang to niyah, mihapinang to ‘harateng no falocoˈ ato mihalakaan.’​—Hipray 4:​12, 13. w20.11 18 fiedac 1-3 fatac

Misapoener ato misamiming ko waywayan ita, wa matongal ko lipahak. Misamanay hani? Samanen mafanaˈay kita to citolasay ko ˈicel no niyah, ano micada to sapadama wa lipahak ko falocoˈ, wa miakoˈid to tao. Kinacecayay, miadahan ni Yis ko mamoetepay ci adadaay tono fanges a tamdaw, kawra cecayay aca ko patikolay a miakoˈid cingranan. Mafanaˈay koniya misamimingay tamdaw, ano eca ka padamaen ni Yis, cowa ko mamaadah cingra, mansa miakoˈid to piadah ni Yis cingraanan, hanaca taˈangay ko ngiha a pakahemek to Kawas. (Luka 17:11-​19) O misapoeneray ato misamimingay tamdaw madoloay malacafay to tao, madoloay ira ko ngaˈayay a widang, samanen makahiay cangra mihai to kangaˈayan no tao, makahiyayho a pakasoˈlin to tao. Pakayni ngaˈayay minaroˈan no tayal no tao patadoay cangra mahemek, mikifalocoˈay a mikangodo to tao, talaˈayaway a pakahemek cangranan. w20.08 12 fiedac 17-​18 fatac