Saka 9 Folad

Itini sakayat no Kawas, misaka dademak ci Pitiro to sapairasol no Yoil i mifalicay to sowal. (Dmak 2:​16, 17) Cowa ka somowal ci Pitiro to ‘ikor noniya demak,’ sowal sa ‘itini salikoray romiˈad,’ wa itiya ko Kawas miterak to fangcalay saocor i ‘tireng no masakenaay tamdaw.’ O misowalan ningra a ‘salikoray romiˈad’ itiniay saka 70 miheca ˈayaw no malaˈafo ko Yirusalim a tatokian, mihaenay o sapairasol ni Yoil halafinto a matilid ngaˈ malaˈosiay. Ikor no materak ko fangcalay saocor i saka 1 hahekalan, padadotocay macowat ko mitosilay a demak. Maedeng saka 61 miheca, patikamian ni Pawlo ko Kolosay kasakopang, sanay ‘mapatenakayto ko ngaˈayay lihaf i paro no kakarayan, mafanaˈayto ko masangaˈay a pinaˈorip.’ (Kolosay 1:​23) Tatodong ni Pawlo i, mapatenakayto ko ngaˈayay lihaf i ngaˈayay kahiceraan no tamdaw a pala. Anini, itini sapadama no fangcalay saocor, tahiraayto i ‘lihoc no pala’ a mapatenak ko ngaˈayay lihaf!​—Dmak 13:47. w20.04 6-7 fiedac 15-​16 fatac

Tangongolay ko olah ni Yihofa kitaanan o kahacecay tamdaw, mahawpay ko miliyasay to cecay liyad to kasakopang a salikaka. (Matay 18:12-​14) Mikiˈokay ko Kawas to Cingra ko mamikilim to moraraway a lopayˈay siri, padama cangraanan miliyaw a malawidang Cingraanan. Ihkalay ko pitadtad Ningra to sasamaan Cingra malecad o pakaenay a mikilim to lopayˈay siri, milidong to finawlan Ningra. (Icikil 34:12-​16) Salakat, ano hakowato ko mapalakay a toki ato ˈicel, talacowacowaay ko pakaenay a mikilim to moraraway a lopayˈay siri. Dotoc, mahela no pakaenay ko lopayˈay siri i, panokayan i masafelaway a siri. Ano madokaˈay ko lopayˈay siri anca macahiway, wa damsay ko pakaenay a midimokos ciraan, padama a mitafo to dokaˈ, miˈafofo i falohang, pacoma ciranan to kakaenen. O malohemay malitengay o midimokosay to siri no Kawas a pakaenay, o tatano malecaday a waywayan ko pipadama nangra toya miliyasay to cecay liyad to kasakopang a salikaka. (1 Pitiro 5:​2, 3) O kakilimen no malohemay malitengay cangra, mikayat cangranan minokay i kasakopang, halo padama cangranan miliyaw a malawidang ni Yihofa, ho matinako nangra ko kaciharateng ato olah. w20.06 20 fiedac 10 fatac

Sowal ni Yis ngaˈayayto panayen ko omah, o mamihakelong ko ˈalomanay tamdaw cingraanan sanay han? Cowa. Pairasolay ko Fangcalay Cudad cowa ka ˈaloman ko mihakelongay ci Yisan sanay. (Yohani 12:37, 38) Hanaca pafeselay ko pinengneng ni Yis to falocoˈ no tamdaw, mafanaˈay cingra cowa kakahi ko ˈalomanay micada to sowal ningra. (Matay 9:4) Soˈlin mahaen, fanekfekayho cinga mitosil to tamdaw, padotocayho ciharateng to pakasoˈlinay tamdaw. Ano cowa pafesel ko pinengneng ita to falocoˈ no tamdaw, cowa ko ngangaˈay misaˈosi to mamanaˈay ko tao to soˈlinay kimad, oha papakasoˈlin kita o kahacecay tamdaw o mamalo Krisciyang alatek. Haratengen ko sowal ni Yis, maecakayto ko omah, ngaˈayayto panayen sanay. Pinengneng ni Yihofa mamalo Krisciyang ko kahacecay tamdaw, malo ‘odoˈ’ i pinengneng Ningra. (Hakay 2:7) Ano malecad kita ci Yihofaan aci Yisan a minengneng to tao, mamisongilaˈ a cipinang to lalengawan ato kaciharatengan nangra a demak, o mamalo salikaka noikor han ko pinengneng cangraanan. w20.04 13 fiedac 18-​19 fatac

Ano somowalay ko Fangcalay Cudad, sapakahemekaw ci Yihofaan, papalahaden ita ato padadotoc a malawidang ci Yisan, mihaenay o mamafanaˈ kita ci Yisan. Miasip ato midotim kita to maˈoningay no Sepat Ratoh a cudad, mafanaˈ to sidaˈitay ko pakayraan ni Yis micada to tamdaw, wa masemer, maolah cingraanan. Tinakoen, soˈlin o tapang no nisawawaan ci Yis, kawra cowa palakoli cangranan a minengneng, pasowalan cangra to harateng ato nafalocoˈan no niyah. Malacafayay ci Yis cangranan a mararom, malacafay a tomangic. (Yohani 11:32-​36) Ano misafelitay ci Yisan a tamdaw pakahapinangay, kalawidang hananay ni Yis ko polong mihakelongay cingraanan a tamdaw. (Matay 11:19) Minanam kita to pakayraan ni Yis a micada to tamdaw, wa matongal ko kangaˈay no kalalaˈed to tao, wa matongal ko lipahak no niyah. Mihaen, wa matongal ko kaolah ci Yisan. w20.04 22 fiedac 9-​10 fatac

1870 miheca, o sakakahaday ko pala no Ikok, iraay ko ciˈicelay a sofitay. O Ikok oya pairasolan no Taniil a ‘mimingay waˈa,’ o milowidan nira a toloay waˈa o Frans, Sipanya ato Helan. (Taniil 7:​7, 8) Tahira i Saka Cecay Lalood no Hekal, o ‘katimolay hongti’ ko Ikok. Toniya tatokian, malo sacihafayay a kitakit ko Padaka, misatapangay makakadep to Ikok. Itini Saka Cecay Lalood no Hekal, malacafayay ko Ikok ato Padaka milood. Mikitiya misatapang, o Ikok ato Padaka malo ciˈicelay mikowan toniya hekal. Malecad o paˈayawan no Taniil, iraay ko ‘ciˈicelay a sofitay’ nangra. Itini pahererekan a tatokian, o Ikok ato Padaka o ‘katimolay hongti.’ w20.05 4 fiedac 7-8 fatac

O nanom tano malosoˈay a pakayraan materek i cikiw, samanen matatodongay ko laˈed no cikiw ato cidal. Ano mangata to miming, o mamalo lahod ko polong a nanom, o fafaedet a maˈicang ko cikiw, awato ko maˈoripay. Ano maraay to miming, o mamalo soeda ko polong a nanom, malo soeda koniya cikiw. Patatodongan ni Yihofa ko kitiraan no cikiw, hato ngaˈayay ko pikoliyol no nanom i cikiw, midama to sakaˈorip. O cidal palahoday to nanom no riyar ato fafekangay no sera a nanom, tayra kakarayan malo ˈoˈol. To mihecahecaan tada adihayay ko malo lahoday a nanom. O lahod no nanom maedeng 10 romiˈad materek i kakarayan, ikor malo ˈorad ato soeda matefad, salikor patikolay i ˈalo, fanaw ato riyar. Oniya pikoliyol padamaay to cikiw ira ko maedengay a nanom, misawacayay to citanengay, taˈangayay ko ˈicel ni Yihofa.​—Yopu 36:27, 28. w20.05 22 fiedac 6 fatac

O roma sasalimlaen ita a odoˈ i, o fangcalay saocor. Pakalalokay ci Yis kitaanan padadotoc mitolon, micangacang to Kawas pafeli toniya sapatelong kitaanan. (Luka 11:​9, 13) Wa pacaˈof ko Kawas to satolon ita, malifok ita ko ‘tadamaanay a ˈicel.’ (2 Korinto 4:7) Ira ko sadama no fangcalay saocor, wa ngaˈayto kita mihadidi to masakenaay a sapalifet. O fangcalay saocor ngaˈayay pacakat to ˈicel ita, ngaˈay misongilaˈ midemak to sapatorod no Kawas kitaanan a demak. Mafanaˈay kita, ano awaay ko fangcalay saocor, o tayal ita to Kawas wa awa ko ngaˈayay a minaroˈan. Sasamaan ko hademak ita o misalimlaay to fangcalay saocor hani? Ngaˈayay cangacangen ita ci Yihofa pakayni i fangcalay saocor padama kitaanan a mihapinang, itini kemoday falocoˈ iraay ko mararaway a harateng ato coos hokira. (ˈOlic 139:23, 24) Ano mahapinang ita ko pasangaray, cangacangen ko Kawas pafeli kitaanan to fangcalay saocor, padama kitaanan miconged to mararaway harateng ato coos. Misarocod kita mihaen ko demak, o paihkalay to cowa ka ciharateng kita malahdaw ko fangcalay saocor ni Yihofa.​—Ifiso 4:​30. w20.05 28-​29 fiedac 10-​12 fatac

Miˈading kita to ngangan ni Yihofa, o minanamay ci Yis Kristoan. Ci Yis cowa ko piowaw aca ci Yihofaan, padamaayho to tamdaw cipinang to samanay a Kawas ci Yihofa. Tinakoen, harateng no Farisay tamdaw, pakidemay ko saali ni Yihofa, pasangaray a ingiden, awaay ko siniˈadaay falocoˈ sanay. Kawra pasowalan ni Yis ko tamdaw, makahiyay micaˈi to demak ko kakarayan a Wama, iraay ko mihadidiay, matomesay ko olah to tamdaw, makahiyayho misodod to tamdaw. Roma i, itini kalo kaˈorip ni Yis malefotay a paihkal to makapahay capeling no Kawas, pahapinang to tamdaw to masamaanay a Kawas ci Yihofa. (Yohani 14:9) Wa ngaˈay kita malecad ci Yisan pasifanaˈ to tamdaw mafanaˈ ci Yihofaan, padama cangranan mihapinang to sidaˈitay a Kawas ci Yihofa. Mihaen ko demak ita, wa ngaˈay mitihdak to mangah, patalahkal to fangcalay ngangan no Kawas, pahapinang to tamdaw to makoracay koniya ngangan. Tano sasowalen ato waywayan kita padama to tamdaw mihapinang to masamaanay a Kawas ci Yihofa. Mararaway ko pinengneng no ˈalomanay tamdaw ci Yihofaan, kawra wa ngaˈay kita mikorac to mapakaditay a fangcalay ngangan no Kawas. w20.06 6 fiedac 17-​18 fatac

Manaokaniw, o sapicawmaˈ malawidang a wangcan o ciepocay a lalosidan, tinakoen ngaˈayay mararinnak to salawina ato ngaˈayay widang. Kawra, mahapinangay iso, miterek ko roma tamdaw to sowal, sasing, pakayniay sapisolotaw to harateng no tao to niyah, mipahiyo to tao han? O roma tamdaw mihadakay to kaacekan a sowal milengo to sasing. Pakalalokay ko Fangcalay Cudad to Krisciyang paihkal to misapoeneray, misikol to nafalocoˈan no tao, madeng cowa ko mamihaen a misaka dademak kita to mahaenay sapicawmaˈ malawidang a wangcan. (1 Pitiro 3:8) Ano misaka dademakay kiso to sapicawmaˈ malawidang a wangcan, licayen ko niyah: “O pasadakan ako a sowal, sasing, o pahiyoay kako sanay ko piharateng no tao han? Wa mikidat to sakaˈinap no tao han?” O Krisciyang cowa ka ngaˈay ciharateng to sapatakalawaw to niyah, o mamidoedo kita to limoˈot no sinael anini. Ano misapoeneray ko waywayan ita, cowa ko mamalecad to malitaˈangay a tamdaw no hekal, patakaraw a minengneng to niyah.​—1 Yohani 2:​16. w20.07 6 fiedac 14-​15 fatac

ˈAyaw no malo Krisciyang ko tarokos ci Pawlo i, na mariˈangay a mipalak to nisawawaan ni Yis. (Dmak 7:​58) Ikor, ci Yis ko micongeday ci Pawloan padotoc a midokaˈ to Krisciyang. Mikitiniay i kakarayan ci Yis pasowal cingraanan, hanaca mipohaw cingranan to cecay liyad, telocto pasayraay ci Pawlo i mipalakan ningra a tamdaw misaali to sapadama. Misapoeneray cingra micada to sapadama ni Ananiya, ikor miliyaway a pakaˈaraw. (Dmak 9:​3-9, 17, 18) Ikorto itini kasakopang mikangodoan no ˈalomanay tamdaw ci Pawlo, kawra cowa ka pawan cingra to mananamay no niyah a demak i fatad no sakatayra i Tamaseke. Padotocay ci Pawlo a misapoener to falocoˈ, makahi a micada to sapadama no salikaka, sowal ningra o salikaka ko ‘patanektekay cingranan.’​—Kolosay 4:​10,11 ato roma pihongyak. w20.07 18-​19 fiedac 16-​17 fatac

Soˈlin malefotay ko ˈicel ni Yihofa, kawra makahiyay Cingra paladaˈ to fadangalan. Tinakoen, minilnilan Ningra ci Yis malo Hongti no Hongti Kitakit, mihaiho to 144,000 a Krisciyang malacafay ci Yisan a mikowan i kakarayan. Manaokaniw, pahatatanaman ni Yihofa ci Yis, ho ngaˈay ko demak mala Hongti ato Taˈangayay Saysi. (Hipray 5:​8, 9) Oya hacafay ni Yis mikowan a tamdaw milifokay to sapahatatanam. Kawra, patoroden ni Yihofa ko tayal cangranan ikor i, cowato pihacecay a micapid. Pakasoˈlinay Cingra cangranan to mamidoedo to harateng Ningra a dademak. (Paˈarawan 5:​10) Cowa pisaali to papadamaen ko kakarayan Wama, kawra makahiyay paladaˈ to fadangalan, patorod to tayal i roma tamdaw, wa mikikaka ko pihaen ita to demak! Ano o tawki no paro no lomaˈ kiso anca o malohemay malitengay, o maminanam ci Yihofaan. Ikor no patorod to tao to tayal, akato cacapid saan to demak. Ano mitodong kiso ci Yihofaan, cowa ko pilaheci aca to demak, wa ngaˈayho pahatatanam to tao, mitongal to pakasoˈlin nangra to Kawas.​—Isaya 41:10. w20.08 9 fiedac 5-6 fatac

Tokel ni Yihofa kitaanan samaan ko pinengneng to moraraway a lopayˈay siri Ningra hani? Patirengay ci Yis to taˈarawan ita, mafanaˈay cingra to misalimlaan ni Yihofa ko kahacecay no siri, mansa misarocod ci Yis a padama to ‘moraraway a lopayˈay siri no finacadan no Israil’ minokay i tatihi ni Yihofa. (Matay 15:24) O ngaˈayay a pakaenay ci Yis, misarocoday cingra hoeca ka malahdaw ko cecacecay a siri ni Yihofa. (Yohani 6:​39) Palimoˈotan no tarokos ci Pawlo ko Ifisoay a malohemay malitengay mitodong ci Yisan. Sanay ci Pawlo: “Papadamaen ko malonayay a tamdaw, haratengen ko sowal ni Yis, sanay: ‘O paladaˈay ikakaay ko hemek to milayapay.’” (Dmak 20:17, 35) Mitadtaday koniya sinael, iraay ko ˈinorong no malohemay malitengay midimokos to finawlan no Kawas. Cecay itiniay Sipanya malohemay malitengay ci Saewato, sanay: “Maharateng ako tada ciharatengay ci Yihofa to moraraway a lopayˈay siri Ningra, makalimay sapadamaaw cangraanan. Mafanaˈay kako mitokelay ci Yihofa takowanan misongilaˈ a midimokos cangraanan.” w20.06 23 fiedac 15-​16 fatac

Padotocay ci Yihofa mihadidi kitaanan, makahi a misodod to raraw ita, samanen mafanaˈay Cingra tahirato i kahererekan no Pikowan ni Kristo to Comaˈol Miheca ngaˈ malefot kita. Mihaenay, tatodongen ita ci Yihofa, o ngaˈayay no tao ko nengnengen, mihadidi cangranan. Misangaˈ ko Kawas to cikiw i, tada mahemekay ci Yis ato coyoh! Haratengen hena, noikor matomes ko malefotay tamdaw i fafekang no sera, midoko ato maolah ci Yihofaan, wa hakowa ko kalipahak nangra hani! (Paˈarawan 4:​4, 9-​11; 5:​9, 10) Oya malacafayay ci Yisan mikowan i kakarayan a tamdaw, maˈaraw ko kalipahak no mikowanan nangra a tamdaw i fafekang no sera i, wa hakowa ko karenec nangra hani! Ano kotayen no lipahakay a losaˈ ko marorayay a losaˈ, ano awato materek ko adada, somad ato patay, wa hakowa ko kaacang ita hani! ˈAyaw no malaˈosi koniya demak i, seteken ko falocoˈ mitodong to sidaˈitay, iraay ko taneng, mihadidiay a kakarayan Wama. Mihaenay, ano o mananto ko malifaay ita a sapalifet, wa ngaˈay padadotoc a lipahak. (Yakop 1:​2-4) Mikiˈokay ko Kawas, ‘moecelay tamdaw ato cowa ka moecel a tamdaw wa patikol a maˈorip,’ tada aakoˈiden ita Cingra!​—Dmak 24:15. w20.08 19 fiedac 18-​19 fatac

O Fangcalay Cudad o sapatelong no Kawas. Maolahay ko kakarayan Wama ita to fafekangay no sera a wawa, mansa mikayat to tamdaw mitilid to Fangcalay Cudad. Pakayni toniya cudad, pacaˈofay to adihayay kalimlaan a salicay ci Yihofa, tinakoen, mikicowaay kita a ira? O maanan ko araaw no tamdaw a maˈorip? Sasamaan no ikor? Tokel ni Yihofa nanay mafanaˈ ko polong a tamdaw to caˈof noniya salicay, mansa papihongyaken ko tamdaw to adihayay kasasiroma no sowal no Fangcalay Cudad. Anini, o Fangcalay Cudad mataˈlifayto ko 3000 a sasowalen! Ano misalimlaay kita toniya sapatelong, miasip to romiˈamiˈad, misongilaˈ midotim, ato sakadademaken. Roma i, misarocod kita, milasil to lihaf no Fangcalay Cudad i ˈalomanay tamdaw.​—ˈOlic 1:​1-3; Matay 28:19, 20. w20.05 24-​25 fiedac 15-​16 fatac

Itini katayalan no pairasolay a Yirimiyaan a kilac, tatiihay ko waywayan no tamdaw. Na matoleday cingra, sapisawadan nanay, kawra cowa pihaen ko demak ningra. Misamaanay hani? Samanen ‘o sowal ni Yihofa’ malecaday o namal marengreng i falocoˈ ningra, caay ka ngaˈay eca ka sowalen ningra! (Yirimiya 20:9) Ano malecad kita ci Yirimiyaan, mitomes i falocoˈ ita to sowal no Kawas, wa malecad ko nafalocoˈan cingranan. Onini ko lalangian ita misongilaˈ a micekiw ato midotim to romiˈamiˈad. Mihaen ko demak ita, wa matongal ko lipahak, wa ciepoc ko mitosilay a tayal. (Yirimiya 15:16) Mihaenay, ano matoled kita i, cangacangen ko sadama ni Yihofa. Wa padama Cingra kitaanan matatodong ko pinengneng to raraw ato dangoc no niyah. Pakayni saaroˈan no niyah i likakawa no Kawas, papadama Cingra kitaanan matatodong ko pinengneng. Padamaho Cingra kitaanan tawlik a mirienang to mitosilay a tayal. Ano samaanto ko cariraw iso, ngaˈayay rihaday a mifowah to nafalocoˈan Cingranan. Ira ko sadama Ningra, wa pakalowid kiso to matoleday falocoˈ! w20.12 27 fiedac 20-21 fatac

O roma fafahiyan salikaka itini aca i kasaˈopoan ngaˈ iraay ko toki masasoˈaraw to salikaka, mansa mameten ita ko toki a mihamham cangranan, masasowal cangranan, mifanaˈ cangranan tada ciharatengay kita cangranan. Wa ngaˈay kita malecad ci Yisan, mipalak to toki kalacafay to fafahiyan salikaka. (Luka 10:38-​42) Ngaˈayay tahidangen cangra malacafay komaen, anca malacafay milawla. Kawra, ano malacafay kita cangranan i, oya ngaˈayay pakalalok cangranan ko hasowal. (Loma 1:​11, 12) Mangalef ko malohemay malitengay maminanam to harateng ato waywayan ni Yis. Mafanaˈay ci Yis pakayni roma tamdaw, padotoc eca ka ciramod cowa ko madoloay, kawra ihkalay ko sowal ningra, ciraramod ato ciwawa awaay ko pinang to tatahadaˈoc a lipahak. (Luka 11:27, 28) Paisalakaten ita ko pidoko to Kawas i kaˈorip, mihaen ngaˈ tahadaˈoc a lipahak. (Matay 19:12) Mangalef ko malohemay malitengay minengneng to fafahiyan Krisciyang o salikaka o wina hanko pinengneng. Wa mihadak cangra to toki itini ˈayaw anca ikor no saˈopo masasowal cangranan. w20.09 21-​22 fiedac 7-9 fatac

Itini Israil, o mawmahay itini ‘kafarawfawan’ a mikosam to sapaloma, itini ‘kacanglahan’ a mipanay. (Marko 4:​28) Malecad kita o mawmahay mihadidi a mitala, o citanengay a tamdaw, kawra mihaen to demak cowa ko madoloay. Tocerid tangsol maˈaraw ko minaroˈan no niyah sanay ko cowa kalefot a tamdaw, kawra ano mitokelay kita ngaˈay ko milidongan a pinaloma, mamihadak to toki ato ˈicel mifelih to sera, mikosam to sapaloma, mikolas to semot, micefos to nanom. Malecaday, sapadamaaw to tamdaw malo nisawawaan ni Kristo, oha papadotoc kita a misaˈicel. Tinakoen, padama to pacekiwan mifalah to misakakinihay ato mafanaˈ ciharateng to tao, misaaliay to toki. Ano manaˈay ko tao mitengil to ngaˈayay lihaf i, ano ira ko mihadidiay ita, cowa ko lalanikay a matoled. Soˈlin makahi ko tao minanam to Fangcalay Cudad, papaihkal kita to mihadidiay, samanen cowa ka ngaˈay kita pacieci to pacekiwan a pakasoˈlin to soˈlinay kimad. Mahaenay, o nisawawaan ni Yis cowa ka tangsol cipinang to pasifanaˈan ni Yis a kimad. (Yohani 14:9) Haratengen, o pikosam aca ato picefos aca ita, edengan ko Kawas ko ngangaˈay palomahad.​—1 Korinto 3:6. w20.09 11 fiedac 10-​11 fatac

Tokel ita nanay micada to paputisem malo Krisciyang ko pacekiwan, mihaenay pakalaloken ita cangra mirienang to saˈopo no kasakopang. Ano ranikay ko pacekiwan mirienang to saˈopo, wa kaliki a macakat. O roma singsi pasowalay to pacekiwan, wa ngaˈay cangra itini kasaˈopoan minanam to adihayay lalakaw cowa ko mamananam i picekiwan. Ka malacafay to pacekiwan miasip to Hipray 10:24, 25, pasowalen cingra mirienang to saˈopo wa milifok to maanan a epoc. Ngaˈayay lipahak kiso a paladaˈ cingranan to mananamay iso i kasaˈopoan. Maˈaraw ningra ko kaolah iso masaˈopo, wa makalim a mirienang alatek. O matinakoay no pacekiwan sakinacecay mirienang to saˈopo, maedeng ikakaay ko kangaˈay to pirienang to roma pihakelongan. (1 Korinto 14:24, 25) Itini kasaˈopoan wa adihay ko maˈaraway ningra ngaˈayay a taˈarawan, malacafay to mahaenay a widang micawmaˈ o papadama cingranan misetek to falocoˈ micada to paputisem. w20.10 10-​11 fiedac 14-​15 fatac

Wa padama ko fangcalay saocor no Kawas tisowanan misaka dademak to mananamay a sifanaˈ. Malecad to mitiliday to ˈOlic a mitolon: ‘Yihofaaw, nanay pasifanaˈen Iso kako to lalan Iso, wa doedoen ako ko soˈlinay kimad Iso a midemak. Nanay padamaen Iso kako misarocod mikangodo to fangcalay ngangan Iso.’ (ˈOlic 86:11) Wa misaˈicel kiso micada to pakayniyan ni Yihofa i sowal Ningra ato mihadakan no likakawa sapahaled to pakasoˈlin no falocoˈ a ‘kakaenen.’ Kawra, o patosokan iso cowa ko pilifok aca to sifanaˈ, pakasoˈlinen ko mananamay iso a kimad, saka dademaken i nokaˈorip. O fangcalay saocor ni Yihofa wa padama kisowanan miremo toniya demak. Roma i, pakalaloken ko salikaka, samanen o paro no lomaˈ iso cangra. (Hipray 10:24, 25) Ngaˈayay cangacangen ko Kawas pafeli to fangcalay saocor, padama tisowanan itini saˈopo mihadak to mikifalocoˈay a sapacaˈof. Ano ciˈinorongay kiso to kimad i saˈopo, ngaˈayay cangacangen ko Kawas padama tisowanan misarocod a midemak. Mihaen ko demak iso paihkalay to tangongolay ko olah to salikaka, o kalimlaan a ‘lopayˈay siri’ ni Yihofa aci Yis cangra. (Yohani 21:15-​17) Cato ka halafin, dengan o mikayatan no fangcalay saocor no Kawas a likakawa ko mamaterek. w20.10 24-​25 fiedac 15-​17 fatac

Malonayay to cecay riyad ko nisawawaan, samanay ko picada ni Yis cangranan hani? Ikor no patikol maˈorip ci Yis i, pasowalay to nisawawaan: ‘Aka matalaw. Olili. Pasowalen ko salikaka ako.’ (Matay 28:10a) Soˈlin na milaliway ko tarokos ci Yisan, kawra cowa pisawad ci Yis cangranan, kamayan malo “salikaka ako” saan ko pinengneng cangranan. Ci Yis malecaday ci Yihofaan, matomesay ko siniˈadaay, makahiay misodod to tamdaw. (2 Hongti 13:23) Mahecaday, tada ciharatengay kita to misawaday mitosil a tamdaw. O salikak ita cangranan, tada maolahay kita cangranan! Kamayan maharateng ita ko paihkalan nangra a olah ci Yihofaan, o roma tamdaw pinaay poloˈ miheca malalokay matayal saki Yihofaan. (Hipray 6:​10) Soˈlinayto tada ciharatengay kita cangranan! (Luka 15:​4-7) Mihaenay tatahidangen ita ko misawaday mitosil a salikaka mirienang to saˈopo. Ano tayni Hongti Kitakit kasaˈopoan ko misawaday mitosil a tamdaw i, sasamaan ko demak ita hani? Talaˈayaw kita militemoh cangranan. w20.11 6 fiedac 14-​17 fatac

Kinacecayay, o wina no tarokos ci Yohani aci Yakop miˈaraway ci Yisan, micangacangay ci Yisan midemak to awaay ko fadangalan ningra a demak. Samanay ko harateng ni Yis hani? Tangsolay pasowal ci Yis, edengan ko kakarayan Wama ko cifadangalay misaˈosi, itini Hongti Kitakit cima ko mamaroˈ i kawanan ato kawili ningra. (Matay 20:20-​23) Cipinangay ci Yis citolasay ko fadangalan no niyah. Tada misamimingay cingra, caay pidemak to cowa palimoˈotan ni Yihofa cingranan a demak. (Yohani 12:49) Wa ngaˈay kita samaan a mitodong to taˈarawan ni Yis hani?Ano minanam kita to taˈarawan ni Yis a misamiming, wa mitoor to sinael anini a midemak. Mihaenay ano misaali ko tao kitaanan paini cangranan i, aka pacieci to tao micada to harateng ita, aka haratengay saan a somowal. Padamaen ita ko tao misinanot to samanay ko sowal no Fangcalay Cudad ato mitepangan a cudad. Mihaen ko demak ita, paihkalay to mihaiyay to citolasay ko ˈicel no niyah, mihai to ‘moecelay ko sarikec’ no Kawas, o pinengneng no Kawas mikikakaay kitaanan.​—Paˈarawan 15:​3, 4. w20.08 11-​12 fiedac 14-​15 fatac

Miharateng kiso misaaliay to mamihadak to limoˈot i widang i, haharatengen ko maanan hani? ˈAyaw no mamihadak to limoˈot i, haratengen: ‘“Pakinaliay ko saali” ako hokira?’ (Patnakay 7:​16) Pakinaliay ko saali a tamdaw tano niyah a palinian ko sapisawkit to tao, cowa ka tano palinian ni Yihofa, hanaca cowa ka sidaˈit ko waywayan ningra alatek. Maharek misinanot i, ano kamayan ira ko harateng iso sapihadakaw to limoˈot, ihkalen a mitoroˈ ko pasangaray no widang, dotoc saka dademaken ko salicay mikayat cingranan, padama cingranan mihapinang icowaay ko raraw no niyah. Ora sowal iso salalangien ko Fangcalay Cudad, miharatengho awaay ko fadangalan iso misawkit to widang. Kawra ngaˈayay padamaen iso cingra mihapinang, samanay ko harateng ni Yihofa to nano demak ningra. (Loma 14:10) Ano mihadak to limoˈot i sakadademaken ko Kimad no Kawas, todongen ci Yis paihkal to siniˈadaay. (Taneng 3:5; Matay 12:20) Misamaanay hani? Samanen ano samanay kita micada to tao, wa mihaen ko picada ni Yihofa kitaanan.​—Yakop 2:​13. w20.11 21 fiedac 13 fatac

Maolahay kiso mitoor to fanges, pising ato tatirengan iso a misawkit ko tao kisowanan han? Ecato ka olah. Kao ngaˈayay cowa ko papotal ko minengnengan ni Yihofa, parihadayay kitaanan. Kinacecayay, palimoˈotan ni Yihofa ci Samuil minilnil to cecay wawa ni Yisi malo hongti no Israil, kawra cowa pasowal to o cima. Maˈaraw ni Samuil ko taˈangayay wawa ni Yisi ci Iliyap i, o pising ko minengnengan ningra, sanay: ‘Oniya i kaˈayaway ni Yihofa a tamdaw, madeng o nanilnilen ningra a mala hongti.’ Soˈlinay makapahay ko tatirengan ni Iliyap, kawra pasowalan ni Yihofa ci Samuil: ‘Hamaan o papotal ato ka ˈakawang no tireng ko nengnengen, cowa ko papiliˈen Ako cingra.’ Misamaanay hani? Sanay ci Yihofa: ‘O potal ko minengnengan no tamdaw, o kemoday falocoˈ ko minengnengan ni Yihofa.’ (1 Samuil 16:​1, 6, 7) Palecaden ita ci Yihofa mihaen ko pinengneng to salikaka. w20.04 14 fiedac 1 fatac; 15 fiedac 3 fatac

Mitaˈlif ci Yis to kakahaday a omah i, malohlohay ko panay i omah. (Yohani 4:​3-6) Maedeng sepatho a folad ngaˈ ngaˈay panayen, kawra sanay ci Yis: ‘Caˈengawen minengneng ko omah, maecakayto, ngaˈayayto a panayen.’ (Yohani 4:​35, 36) Fahkaan ko nisawawaan. O maanan ko tatodong no sowal ni Yis hani? O mitoroˈan ni Yis cowa ko panay ao tamdaw. Haratengen ˈayaw no somowal ci Yis toniya sowal mifekaday ko maanan a demak. Itiya cowa ka picawmaˈ ko Yutaya tamdaw to Samariya a tamdaw, kawra mitosilan ni Yis ko cecay Samariya a fafahiyan, micadaay cingra. Mihaenay, tiya pasowal ci Yis to ngaˈayayto panayen ko omah i, ˈalomanay a Samariya tamdaw mamiˈaraw ci Yisan. Samanen tahatengil cangra to sowal noya fafahiyan, sapitengilaw ko niyah to sapasifanaˈ ni Yis. (Yohani 4:​9, 39-​42) Pakayni toniya maˈoningay, sowal no mikakingkiway to Fangcalay Cudad: “Makalimay cangra mitengil to sowal ni Yis . . . malecaday o ngaˈayayto a panayen cangra.” w20.04 8 fiedac 1-2 fatac

Pacakatay ko saˈopo to ‘sapilood a ˈicel’ no mita, ho ngaˈay kita padotoc a midemak to mitosilay, tinakoen pasifanaˈ kitanan misaka dademak to sapasifanaˈ a lalosidan. Mihaenay, ˈayaw no saˈopo songilaˈen misaday, ano masaˈopo misamacay a mitengil, ikor no saˈopo saka dademaken ko minanaman, mihaen o mamalo ‘sofitay ni Kristo’ kiso. (2 Timoti 2:3) Roma i, iraay ko masawalwalay ciˈicelay a coyoh midamaay kitaanan. Haratengen hena, cecay ko coyoh hakowaay ko malowiday a ˈada, haratengenho cecay ˈopo a coyoh hakowaay ko taˈangay no ˈicel! (Isaya 37:36) Awaay ko tatiihay coyoh papakalowid to kakarayan sofitay ni Yihofa. O malefotay ko ˈicel ni Yihofa, ano kalacafay Cingra kitaanan, ano hakowato ko ˈaloman no misafelitay, cowa ko papakafilo kitaanan! (Kakitaan 6:​16) O sowal ato demak no cafay matayal, cafay micudad anca cowa pihakelong a salawina, ano patalaway kitaanan, o haharatengen konini. Aka mapawan, cowa ko cecayay kita a milood! Midofdof kita to limoˈot ni Yihofa, o papadama Cingra kitaanan. w21.03 29 fiedac 13-​14 fatac

Misaka dademakan ni Pawlo ko sowal i Isaya 22:13 alatek, o milengoan no sinael o waywayan no Israil tamdaw itiya. Haratengay sanay cangra maacang, cowa pisikol to kalalaˈed no niyah aci Yihofaan. O waywayan nangra i: ‘Awaay ko pinang to kaˈorip no tamdaw, ka ranikay a maacang.’ ˈAlomanay tamdaw anini mahaenay ko harateng. Pakasoˈlin kita to papatikol maˈorip, o mamisongilaˈ mipiliˈ to hawidang. O Korintoay a Krisciyang o mamisawad micawmaˈ to cowa pakasoˈlin to papatikol maˈorip a tamdaw, malecaday kita anini. Mararid malacafay to maolahay maacang a tamdaw, o mamifiyor to pinengneng ita, mipalak to ngaˈayay nanaman, mangalef o mamidemak to kaˈintehan no Kawas a demak. Mihaenay, misaaretengay a palimoˈot ci Pawlo: ‘Ka talipaˈelal kamo, midemak to moecelay, aka mararaw.’​—1 Korinto 15:33, 34. w20.12 9 fiedac 3, 5-6 fatac

Mitadtaday koniya sinael, samanan ni Yihofa a milikakawa ko kakarayan ato iseraay paro no lomaˈ. Mikitini mahapinangay ita o fadangalan no kakeridan mahawpay ko tosa kalimlaan lalangian, o fadangalan ato ˈinorong. Itini taˈangayay paro no lomaˈ i dohaw, o “fongoh” ci Yihofa, o tawki no lomaˈ, iraay ko saˈakawangay a fadangalan. Polong a wawa Ningra, o coyoh anca o tamdaw, wa misiˈayaw Cingranan. (Loma 14:10; Ifiso 3:​14, 15) Pafelian ni Yihofa ci Yis to fadangalan mikerid to kasakopang, kawra samaan ko picada ni Yis to kasakopang o mamisiˈayaw ci Yihofaan. (1 Korinto 15:27) Malecaday, pafelian ni Yihofa ko faˈinay to fadangalan mikerid to fafahi ato wawa. O faˈinayan sasamaan minanam malo ngaˈayay a tawki no lomaˈ hani? Salakatho cingra cipinang to o maanan ko saali ni Yihofa cingranan. Roma i, o mamafanaˈ cingra hano patireng ci Yihofa to fadangalan no mikeriday, ato sasamaan mitodong to taˈarawan ni Yihofa aci Yis. Mafanaˈ tonini hano kalimlaan hani? Samanen pafelian ni Yihofa ko tawki no lomaˈ to fadangalan, mitokelay cangranan misongilaˈ a misaka dademak.​—Luka 12:48b. w21.02 2 fiedac 1-3 fatac

Wa minanam kita ci Yihofaan, mipawan to kalo demak. Malefotay ko sapiharateng a inaneng ni Yihofa, kawra ano makahi kita pasasiyor, wa sododen Ningra kita mipawan to nano raraw ita. (ˈOlic 25:7; 130:​3, 4) Mihaenay, ano midokaˈ ko tao kitaanan a miliˈay i, pahecaden ita ci Yihofa misodod cangranan, hanaca misaˈicel mipawan to mifekaday a demak. (Matay 6:​14; Luka 17:​3, 4) Pafeliay ko Kawas kitaanan to masakafahkaan a ponoˈ, miakoˈiday kita Cingraanan, wa saka dademaken koniya sapatelong midoko Cingranan. O roma tamdaw sapisaloaw to coos, o niyah sanay misaˈosi to ngaˈayay ato tatiihay a palinian. Kawra, o misangaˈay kitaanan ci Yihofa, o palinian Ningra ikakaay ko kangaˈay to palinian ita. (Loma 12:​1, 2) Mitoor to palinian Ningra maˈorip, wa rihaday ko falocoˈ, wa paˈdil to kakarayan Wama, ngaˈay pakahemek to falocoˈ Ningra, mahaen ko kaˈorip ngaˈ o soˈlinay ciepocay.​—Taneng 27:11; Isaya 48:18. w20.05 23-​24 fiedac 13-​14 fatac

Anini, sasamaan palahad to damsayay i salikaka hani? Matongal to kafanaˈan ita to salikaka, wa madoloto a cipinang cangraanan, wa madoloto palahad to tangongolay olah cangraanan. Soˈlin caka hecad ko mihecaan ato lalengawan, wa ngaˈay mala ngaˈayay widang. Haratengen, o mihecaan ni Yonatan ikakaay ci Tafitian to 30 miheca, kawra patirengay cangra to ngaˈayay kalawidang. Wa ngaˈay kiso talaˈayaw ciharateng to coka hecad ko mihecaan a tamdaw itini kasakopang han? Mihaen ko demak iso, paihkalay kiso to soˈlinay ‘maolah to polong no kasacefang a salikaka.’ (1 Pitiro 2:​17) Tano damsayay ko picada ita to salikaka, tatodong noniya sowal mahecaday ko kaolah ita to kahacecay a tamdaw han? Cowa ka hatira, mikiriwiˈay kita miingid toya mahecaday ko nanaman a salikaka coko mararaway koni. Sowal ni Yis sahtoay o “widang” ningra ko tarokos, kawra mikiriwiˈay ko olah ningra ci Yohanian. (Yohani 13:23; 15:15; 20:2) Soˈlin mahaen, cowa ka pisakakinih ko falocoˈ ni Yis, cowa ka pikiriwiˈ a maolah ci Yohanian.​—Marko 10:35-​40. w21.01 23 fiedac 12-​13 fatac

Ano mitosil ci Pawlo to ˈalafang a tamdaw i, cowa kalecad to pitosil to Yutaya tamdaw. Misimsimay cingra to kaˈorip ato nanaman no itiraay tamdaw, mikilim to kalecadan no pihakelongan nangra ato Fangcalay Cudad. (Dmak 17:23) Makahiay ci Pawlo misalof to pakayraan a mitosil. Pasowalan ningra ko Atin a tamdaw, o milasilan ningra a lihaf mikitiraay toya ‘cowa ko kafanaˈan a midokoan nangra a Kawas.’ Soˈlin cowa ka nanam ko ˈalafang tamdaw to Fangcalay Cudad, cowa pisaˈosi ci Pawlo to cowa ko mamalo Krisciyang cangra, ao ngaˈayay panayen cangra sanay ko pinengneg, mitoor to saali nangra a misalof. Palecaden ita ci Pawloan misongilaˈ a mihapinang to o maanan ko pihakelongan no cilomaˈay. Tinakoen ngaˈayay haratengen ita: Oniya lomaˈ ato paliding iraay ko mikiriwiˈay a dafong han? O ngangan, caˈedong, o sowal no tao paihkalay to o maanan ko pihakelongan ningra han? w20.04 9-​10 fiedac 7-8 fatac