Saka 10 Folad

Mafanaˈ kita ci Yisan, wa minanam to pakayraan ni Yis a misimsim ato dademak. Micalep ko kacipinang ita ato mitodong ci Yisan, mamatongal ko tanektek no kalawidang cingraanan. Haratengen ko pakayraan ni Yis micada to tamdaw. O miharatengan ningra sahtoay o sasamaan padama to tao, cowa ko niyah aca ko miharatengan. (Matay 20:28; Loma 15:​1-3) Mihaenay, makahiay cingra mihadak to niyah, hanaca mikifalocoˈ a misodod to tao. Soˈlin caka ngodo ko tao pasowal cingraanan, cowa ka ranikay a maketer. (Yohani 1:​46, 47) Cowa ko pakayni i raraw no tamdaw i salakat a misakakinih to tamdaw. (1 Timoti 1:​12-​14) Palecaden ita ci Yis a micada to tamdaw, kalimlaan mihaen, samanen sanay cingra: ‘Ano masasiolah kamo, mamafanaˈ ko polong a tamdaw to nisawawaan ako kamo.’ (Yohani 13:35) Ngaˈayay licayen ko niyah: “Mitodongay kako ci Yisan, misarocod a mararihaday to salikaka han?” w20.04 24 fiedac 11 fatac

Soˈlin ˈalomanay tamdaw no hekal pakaditay to fangcalay ngangan no Kawas, kawra o ngangaˈay kiso talaˈayaw, mihadak to soˈlinay kimad: O makoracay ci Yihofa, o moecelay, o ngaˈayay, matomesay to olah a Kawas. Wa ngaˈay midofdof kiso to sakowan Ningra, halo padama to tao mihapinang, edengan o sakowan ni Yihofa malefotay a moecel, edengan o sakowan ni Yihofa ko papaira to soˈlinay rihaday ato lipahak (ˈOlic 37:​9, 37; 146:​5, 6, 10) Ano pasifanaˈ kita to pacekiwan i, marariday misaˈicel to iraay ko saˈakawangay sapikowan a fadangalan ni Yihofa, pasowal to pacekiwan iraay ko fadangalan ni Yihofa mikowan to coyoh ato tamdaw. Matatodongay koniya sowal. Pasifanaˈ to pacekiwan midofdof to sarikec ni Yihofa o kalimlaan, kawra sakakaay patosokan ita papadama to pacekiwan maolah ato madimadi ci Yihofaan. Mihaenay, saadihayen ita milengo ko mitemeray to falocoˈ a makapahay capeling ni Yihofa, pahapinang to pacekiwan tada sidaˈitay ko Kawas ci Yihofa. (Isaya 63:7) Mihaen, wa maolahto ko pacekiwan ci Yihofaan, samanen makalimay saka madimadiaw a midofdof to sakowan Ningra. w20.06 6 fiedac 16 fatac; 7 fiedac 19 fatac

O kafahkaˈanto ko pisafaco to ponoˈ no tamdaw! Ya itiniho kita i tiyad no wina i, misatapangayto tano paˈayawan misafaco a pakayraan lomahad ko ponoˈ, cecay ehon pinaay ˈofad ko lomahaday a ˈalamat no ponoˈ! Lalomaˈ no ponoˈ no tamdaw iraay ko tatemer. Paihkalay ko mikingkiway, itini ponoˈ no matoˈasay tamdaw 1,000 walwal ko tatemer. O kareteng no ponoˈ mangata 2 kongcin. Iraay ko kafahkaan a inaneng no ponoˈ, nengnengen ita ko pina a tinakoan. Ano mihadak kita to cecay sowal, miontingan no ponoˈ ko sema, takolaw, filfil, ngaroy ato 100 a fatil no falohang, mitooray to masaˈosiay a kadadoedo no tatemik no fatil, ngaˈ ihkal a mahadak ko sowal. O mihadakan a mikingkiwan i 2019 miheca paihkalay, o mihofocan a wawa ngaˈayay mihapinang to cowa kalecad a sowal. Misawacayay konini to harateng no citanengay tamdaw​—hofoc han ko tamdaw iraay to ko inaneng mihapinang ato minanam to sowal. Awaay ko hasasa, o sakacaciyaw a inaneng o mikitiniay ci Yihofaan a sapatelong.​—w20.05 22-​23 fiedac 8-9 fatac

Salo sanay ci Apraham a misawad to sinowayay a kaˈorip, miliyas to Ur a niyaroˈ. Misamanay hani? Samanen ‘mitalaay to soˈlinay ira ko taˈeneran a niyaroˈ cingra.’ (Hipray 11:​8-​10, 16) O mitalaan ni Apraham a niyaroˈ o Hongti Kitakit no Kawas, oniya Hongti Kitakit ci Yis Kristo ato 144,000 tatayra kakarayan a Krisciyang ko mikapotay, panganganan ni Pawlo ko Hongti Kitakit no Kawas to ‘niyaroˈ no soˈlinay Kawas, kakarayan a Yirusalim.’ (Hipray 12:22; Paˈarawan 5:​8-​10; 14:1) Pasifanaˈan ni Yis ko nisawawaan itini satolon a micangacang to kaira noniya Hongti Kitakit, ano mihaen wa malaˈosi ko araaw no Kawas itini fafekang no sera, malecad i kakarayan. (Matay 6:​10) Samanay ko pikapot to Hongti Kitakit no Kawas, mafanaˈay ci Apraham to polong a demak han? Cowa. Samanen itini halafinay tatokian, oniya demak o ‘fangcalay pakakemoday a demak.’ (Ifiso 1:​8-​10; Kolosay 1:​26, 27) Kawra mafanaˈay ci Apraham, o papina a teloc ningra o mamalo hongti, samanen na ihkalay ko pikiˈokan ni Yihofa cingranan toniya demak.​—Satapangan 17:​1, 2, 6. w20.08 2-3 fiedac 2-4 fatac

Aka pakasoˈlin to sasowalen no misafelitay to kimad a tamdaw. Mikitini katomireng no kasakopang no Krisciyang, padotocay ci Satan mihalaka sapipalakaw to pakasoˈlin no Krisciyang. Mihaenay, hahapinangen ita ko soˈlinay ato misamangahay. O miˈodisay to pihakelongan ita a tamdaw misakadademakay to sapicawmaˈ to widang a wangcan mipatenak to mangah, mifasaw to pakasoˈlin ita ci Yihofaan ato olah to salikaka. Haratengen, oniya mangah sahtoaay o mikitiniay ci Satanan, aka a malipalaw kita. (1 Yohani 4:1, 6; Paˈarawan 12:9) Pakayni sapicoˈayaw to saˈodis ni Satan, wa tongalen ita ko pitadiˈec ci Yisan, pakasoˈlin to kalimlaan ko demak ningra i araaw no Kawas. Tatadiˈecenho ita ko madimadiay citanengay a koli, pakasoˈlin to edengan cangra ko minilnilan ni Yihofa mikayat to likakawa Ningra. (Matay 24:45-​47) Wa micerid kita minanam to Fangcalay Cudad patanektek to pakasoˈlin no niyah. Mihaen, o pakasoˈlin ita mamalecad o tangongolay ko lamit a kilang, matongal ko tanektek. Malecaday ko sowal ni Pawlo to aniniay a sinael. w20.07 23-​24 fiedac 11-​12 fatac

Cowa ko malefotay kita, madoloay mitoor to papotal a misawkit to tao. (Yohani 7:​24) Kawra o maˈaraway no mata, o mimingay aca nora tamdaw. Tinakoen, o cecay ising o pinengneng aca ko mitiˈeran, ano samaanto a inaneng, adihay ko nalifetan, citolasay ko kacipinang to adadaay tamdaw. Saka tatodongaw ko piadah, wa misongilaˈ a mitengil to sowal no adadaay, cipinang to pifekad no adada, nafalocoˈan ato roma demak, latekay misaaliay to X-kowang ko adadaay, hoeca ka raraw ko piadah. Malecaday, ano papotal aca no salikaka ko nengnengen ita, cacitolas ko kacipinang cangraanan. O mamisaˈicel kita a cipinang to kemoday falocoˈ no salikaka. Manaokaniw, cowa ko mamasongilaˈ ko kafanaˈ ita to miharatengan no falocoˈ no tao, kawra wa ngaˈayho minanam ci Yihofaan. Mitengilay ci Yihofa to nafalocoˈan no finawlan Ningra, cipinangay to nalifetan ato pakayraan nangra, tada siniˈadaay cangranan. w20.04 14-​15 fiedac 1-3 fatac

Palahad to misapoeneray tada kalimlaan, samanen o misatakaraway a tamdaw awaay ko matatodongay a harateng. Misatakaraway a tamdaw palitaˈangay to niyah, maolahay malacongis to tao. O harateng nangra ato waywayan marariday midokaˈ to niyah ato tao. Ano eca pifalic to pakayraan a miharateng, o mamaapoh ato manahol ni Satan. (2 Korinto 4:4; 11:3) Roma i, misapoeneray a tamdaw matatodongay ko harateng. Iraay ko masadafdafay matatodongay a pinengneng to niyah, mihai to ikakaay ko kangaˈay no tao to niyah i adihayay pakayraan. (Filipi 2:3) Mafanaˈay ko misapoeneray a tamdaw, ‘misaˈadaan no Kawas ko misatakaraway a tamdaw, palemeday to misapoeneray ko falocoˈ a tamdaw.’ (1 Pitiro 5:5) O matatodongay ko harateng a tamdaw cowa ka ciharateng malo ˈada ni Yihofa. Sapitafoaw to misapoeneray, oha mamitoor kita to sowal no Fangcalay Cudad, ‘hepolen ko matelangay capeling ato matelangay a waywayan,’ hanaca ‘caˈedongen ko faelohay capeling.’ Oha mamicalep a tangongol ko kafanaˈ ita ci Yisan, misarocod a mitodong to taˈarawan ningra.​— Kolosay 3:​9, 10; 1 Pitiro 2:21. w20.07 7 fiedac 16-​17 fatac

Masalalomaˈ no kasakopang ni Yihofa tada kalikoanto! Malecaday o itiniay kita i Lakoing, ˈalomanay ko lipahakay a salikaka i tatihi, rihadayay a malacafay. Mihaenay, wa ngaˈay kiso mihadak to maanan sadama to kasakopang hani? Tarokos ci Pawlo patinakoan ningra ko kasakopang to tireng, patinako to tamdaw i kasakopang to caˈang no tireng. (Loma 12:​4-​8; 1 Korinto 12:12-​27; Ifiso 4:​16) Mikitini sapatinako ni Pawlo mamananam ita saka 1 a kalimlaan i: Itini kasakopang ni Yihofa, kalimlaan ko kahacecay tamdaw. Itini satapangan no sapatinako ni Pawlo sanay: ‘Adihay ko caˈang no tireng, caay ka lecad ko tayal noya caˈang a maemin. Soˈlin ˈalomanay kita, nikawrira, kamayan o cecayay ko tireng, pakayni i nika lacecay ci Kristoan, malalitingayto ko tatirengan ita.’ (Loma 12:​4, 5) O maanan ko tatodong ni Pawlo hani? Soˈlin o demak no kahacecay tamdaw i kasakopang cowa kalecad, kawra sahtoay o iraay ko epoc no kahacecay tamdaw. w20.08 20 fiedac 1-2 fatac; 21 fiedac 4 fatac

Malo wama winaay, wa samaan kamo mitodong to pisapoener ni Yihofaan hani? Latekay, pakayni sasamaan a midemak, ngaˈayay tengilen ko harateng no wawa, ano ngangaˈay i, saka dademaken kora sapaini nangra. Roma i, tada mihadidiay ci Yihofa, soˈlin cisasaay ko sikawdan Ningra to misaˈosian Ningra, cowa ka maˈisang Cingra. Tinakoen, tiya misaˈosi ci Yihofa palaˈafo to Sotom ato Komora i, cariraway ci Apraham. Itiya, mihadidiay ci Yihofa a mitengil to nafalocoˈan ningra. (Satapangan 18:22-​33) Wa ngaˈay nengnengen ita samanay ci Yihofa micada ci Saraan. Matoˈasto ci Sara i, mikiˈokay ko Kawas to mamahofoc cingra. Itiya, matawaay ci Sara, kawra cowa ka maketer ko Kawas, misikolay to saka seneng ningra. (Satapangan 18:10-​14) Ano o wama wina anca o malohemay malitengay kiso, mikitini taˈarawan ni Yihofa mananamay ko maanan hani? O wawa anca i kasakopangay a tamdaw cisasa to saˈosi iso, wa samaan ko harateng iso hani? Wa tangsol kiso a mirikec cangranan han? Anca misaˈicel a cipinang to harateng nangra? Ano misaˈicel kiso a minanam ci Yihofaan, o lalipahak ko paro no lomaˈ iso, o rarihaday ko kasakopang. w20.08 10 fiedac 7-9 fatac

Satapang aca micawmaˈ kita to finawlan no Kawas i, mitokelay padama ko tao kitanan alatek, samanen cowaho katenes ko niyah, adihayayho ko hananamen a demak. (1 Korinto 3:​1, 2) Kawra nohatini i? Ano halafinayto kita a midoko ci Yihofaan, hanaca adihayay ko milifetan, cowato ka makahi micada to sapadama alatek. O sapadamaaw kitaanan a tamdaw cowaho ka halafin a midoko to Kawas, wa mangalef ko kaeca picada ita to sapadama alatek. Kawra marariday ci Yihofa misaka dademak to salikaka a padama kitaanan. (Loma 1:​11, 12) Ano sapilifokaw kita to sapafeli ni Yihofa a ˈicel, oha mamicada to sapadama no tao. O lalangian a malaˈosi cowa ko picudadan, tanektek no tireng, hafay ato saaroˈan, ao mitafoay to misapoeneray, hanaca mitadiˈecay ci Yihofaan. Nanay padadotoc kita a misaˈicel, (1) mitiˈer ci Yihofaan, (2) mikitini ngaˈayay taˈarawan i Fangcalay Cudad a minanam, (3) micada to sapadama no salikaka. Mihaen, ano samaanto ko kalonay no niyah, o papatomesen ni Yihofa kita to ˈicel! w20.07 14 fiedac 2 fatac; 19 fiedac 18-​19 fatac

Ano misawacay kita to cowa pihakelong a paro no lomaˈ i, paihkal to mihadidiay cowa ka dolo alatek. Ano hatiraay i, papadama ko Patnakay 3:7 kitaanan, sanay ko sinael: ‘Ira ko katomerepan, ira ko kacaciyawan a tatokian.’ Latekay caka caciyaw kita ngaˈayay tano makapahay waywayan a misawacay to paro no lomaˈ, latekay mameten ita ko toki pasowal to soˈlinay kimad i paro no lomaˈ. (1 Pitiro 3:​1, 2) O fafanekfek kita a mitosil pasifanaˈ to tamdaw, kawra papaihkal to mihadidiay i polong a tamdaw, mahawpay ko paro no lomaˈ. Ngaˈay kita minanam to pihadidi nolitengan ato aniniay madimadiay a sikawdan. Tinakoen, cowato sapinengnengaw ci Hapakuk to tatiihay demak a mifekad, kawra kamayan a mihadidi, sanay: ‘Padadotoc kako tomireng i pikacawan.’ (Hapakuk 2:1) Soˈlin sakahenayaw ci Pawlo milahci to ˈinorong, milifok to kakarayan a sapalifon, kawra kamayan a paihkal to mihadidiay, padotoc ‘misongilaˈ misawacay to ngaˈayay lihaf.’​—Dmak 20:24. w20.09 11-​12 fiedac 12-​14 fatac

Soˈlin o padoedoay ci Yihofaan ko saaroˈan ni Yis, kawra cowa patakaraw cingra minengneng to niyah. O matayalay saki Yihofaan a tamdaw paihkalay to misapoeneray, matomesay ko olah i likakawa no Kawas, o olah o tahapinangan no soˈlinay a Krisciyang. (Luka 9:​48; Yohani 13:35) Ano mifekad ko pasangaray i kasakopang, oniya demak cowa ka tatodong ko pisaysay ano saan kiso miharateng, samaanto hani? Aka ngaliwngiw, paihkalen ko misapoeneray, misaˈicel a midama to mikeriday a salikaka. (Hipray 13:17) Haratengen ko laenoay salicay waira ko sadama: “Soˈlinay pakidem koniya demak, o sasaysayen han? O sangaˈayay a tatokian nohatini misaysay toniya demak han? Iraay ko fadangalan ako misaysay toniya demak han? Soˈlinen ko sowal, mihaen ko demak ako pakayniay sapicowataw to rihaday, anca sapaihkalaw to kalimlaan ko niyah han?” O misaaretengan ni Yihofa o misapoeneray cowa ko inaneng, o kakelec cowa ko kaliki no demak. Mihaenay, misaˈicel kita misapoener a matayal saki Yihofaan, wa ngaˈay micowat to kakelec ato rihaday no kasakopang.​—Ifiso 4:​2, 3. w20.07 4-5 fiedac 9-​11 fatac

O roma fafahiyan ‘mihadakay to dafong no niyah’ midama ci Yisan, tada miakoˈiday ci Yis cangranan. (Luka 8:​1-3) Pasowalayho to kalimlaan a soˈlinay kimad cangranan. Tinakoen, pasowalan ningra cangra, wa patayen cingra, ikor patikol a maˈorip. (Luka 24:​5-8) Padama cingra to fafahiyan salikaka misaday to mamasiˈayaw a sapalifet, malecaday o pipadama to tarokos. (Marko 9:​30-​32; 10:32-​34) Tiya marepel ci Yis i, milaliway ko tarokos maemin, tiya paceken ci Yis i pisemseman a hecek i, o roma fafahiyan padotocay a madimadi midama cingranan. (Matay 26:56; Marko 15:40, 41) Tinakoen, papinaay fafahiyan salakatay pakaˈaraw to patikol ni Yis a maˈorip, ikor miocoran ni Yis cangra mifanaˈ to tarokos, patikolayto maˈorip cingra. (Matay 28:​5, 9, 10) Ikor, itini saka 33 miheca Kocinsic, tiya matefad ko fangcalay saocor i, iraay ko fafahiyan itiya. O polong a tamdaw itiya milifokay to kafahkaan a ˈicel, ngaˈayay tano roma kitakit a sowal pasayra i tamdaw ‘milasil to kasapaan a demak no Kawas.’​—Dmak 1:​14; 2:​2-4, 11. w20.09 23 fiedac 11-​12 fatac

Padama to tamdaw malo Krisciyang wa ngaˈay milidong to ˈorip no tamdaw. Hano mafanaˈ kita hani? Itini Matay 28:19, 20 sanay palimoˈot ci Yis: “Kalingad kamo palo nisawawaan ako ko polong a finawlan . . . paputisemen cangra.” Padama to tamdaw micada to paputisem o masakalimlaan, samanen micada ko tamdaw to paputisem ngaˈ ngaˈay malidong. Makalimay micada to paputisem a tamdaw wa pakasoˈlin, ira ko toki ningra malidong pakayniay kinafalah ni Yis to ˈorip hanaca patikol maˈorip. Mihaenay sanay ko tarokos ci Pitiro a somowal: “O paputisem . . . pakayniay patikol ni Yis Kristoan a maˈorip milidong tamowanan.” (1 Pitiro 3:​21) Tiya micada ko tamdaw to paputisem malo nisawawaan ni Yis i, wa irato ko toki ningra milifok to tahadaˈocay a ˈorip. Pakayni sapadamaaw to tamdaw malo Krisciyang, misaaliay kita palahad to ‘inaneng a pasifanaˈ.’ (2 Timoti 4:​1, 2) Misamaanay hani? Sanay ci Yis: ‘Kalingad kamo, palo nisawawaan ako ko polong finawlan . . . pasifanaˈen cangra.’ Mihaenay ko sowal no tarokos ci Pawlo, ka ‘padotoc aka pisawad’ midemak toniya demak, ‘mihaen to demak wa ngaˈay milidong to niyah, ngaˈayho milidong to mitengilay tisowanan a tamdaw.’ w20.10 14 fiedac 1-2 fatac

Tarokos ci Pitiro malo ‘milifokay to tamdaw a mifotingay,’ maolahay to mitosilay a tayal. Itini pipadama ni Yihofa, malaˈosiay ko mitosilay a tayal ni Pitiro. (Dmak 2:​14, 41) Mitosil kita pakayniay kaolah ci Yihofaan, o sakakaay a ˈicel ita a mitosil konini. Ano maolah kita ci Yihofaan, soˈlin cowa ka ngaˈay ko niyah saan kita miharateng, cowa ko mamisawad toniya tayal. Mitahidang ci Yis ci Pitiroan pasowalay cingranan: “Aka matalaw.”(Luka 5:​8-​11) Cowa ka talaw ci Pitiro malo nisawawaan ni Kristo tahalifa to tatiihay a demak, ao maˈaraw ningra ko pidemak ni Yis to kafahkaan padama cingranan adihay ko malepelay a foting, fahkaan nanay, awaay ko tatodong no niyah malacafay ci Yisan matayal saan miharateng. Malecaday kiso ci Pitiroan a matalaw alatek, calemcem to caka pakafilo to ˈinorong no Krisciyang. Ano mahaenay, tongalen ko kaolah ci Yihofaan, ci Yisan ato tao, mihaen wa irato ko ˈicel iso, makahi micada to satahidang ni Yis, malo ‘milifokay to tamdaw a mifotingay.’​—Matay 22:37, 39; Yohani 14:15. w20.09 3 fiedac 4-5 fatac

Makahi kita mihadak to toki, ˈicel ato payci, mikilim to ‘matatodongay ko waywayan ngaˈayay milifok to tahadaˈocay ˈorip a tamdaw.’ (Dmak 13:48) Mihaen ko demak ita, o mitodongay to taˈarawan ni Yis, sanay cingra: ‘O kakaenen ako o pidemak to araaw noya miocoray takowanan, milaheci to tayal Ningra.’ (Yohani 4:​34; 17:4) Malecaday ko harateng ita, makalim sapilaheciyaw to patorodan Ningra kitaanan a ˈinorong. (Yohani 20:21) Mitokelay kita to roma tamdaw, mahawpay ko misawaday mitosil a salikaka, malacafay kitaanan tahatolas ko pihadidi, milaheci toniya tayal. (Matay 24:13) Manaokaniw, sapilaheciaw kita toniya sapatorod ni Yis a ˈinorong cowa ko madoloay. Kawra, cowa ko kita ace ko matayalay, mikiˈokay ci Yis wa malacafay cingra kitaanan, hanaca ‘o kapot no Kawas kita a matayal,’ wa ‘tiˈeren ci Kristo milasil to lihaf.’ (1 Korinto 3:9; 2 Korinto 2:​17) Mihaenay, wa ngaˈay malaheci ita koniya ˈinorong. Malikoay kita mirienang toniya tayal, halo padama to tao mihaen ko demak, tada kahemekanto!​—Filipi 4:​13. w20.11 7 fiedac 19-​20 fatac

O mipiliˈan no wama wina taˈangayay ko pifiyor to wawa. Ano caka inaneng ko saˈosi no wama wina, wa paira to pasangaray no wawa. Safeliten ko sowal, ano inaneng ko saˈosi nangra, wa padama to wawa lipahak ko kaˈorip. Kawra, a inaneng ko saˈosi no wawa ngaˈ ngaˈay. Pakaynien i kahacecay tamdaw, sangaˈayay a saˈosi i, midoko to sidaˈitay a Wama i kakarayan ci Yihofaan. (ˈOlic 73:28) O wama wina ni Yis mitokelay padama to wawa malo midokoay ci Yihofaan a tamdaw. Ora saˈosi nangra paihkalay, o sakakaay kalimlaan ko pidoko ci Yihofaan i kaˈorip nangra. (Luka 2:​40, 41, 52) Ano ci Yisto inanengay ko misaˈosiyan, mansa ngaˈay mitoor to araaw ni Yihofa a maˈorip. (Matay 4:​1-​10) Lomahadto ci Yis malo sidaˈitay, madimadiay ato timoloay a tamdaw. O maolahay ci Yihofaan a wama wina maˈaraw ko wawa malecad ci Yisan, o mamaliko a lipahak. w20.10 26 fiedac 1-2 fatac

Haratengen ko laenoay tolo tinakoan. Cecay matoˈasay fafahiyan salikaka marariday miharateng to mataˈlifayto a lipahakay tatokiyan. Soˈlin pasangaray ko kaˈorip nohatini, kawra padotocay cingra misarocod matayal saki Yihofaan. (1 Korinto 15:58) To romiˈamiˈad, miharatengay cingra kalacafayay to salawina i lakoing a maˈorip ko niyah. Cecay salikaka maharatengay ko pidokaˈ no cecay salikaka cingranan, kawra makahiyay cingra a misodod. (Kolosay 3:​13) Cecay faˈinayan salikaka maharatengayho ko nano raraw i saˈayaw, kawra padotocay cingra a madimadi, misamacay matayal saki Yihofaan. (ˈOlic 51:10) Oniya tatoloay Krisciyang iraay ko maanan kalecadan hani? Maharatengay nangra ko mifekaday i saˈayaw a demak, kawra cowa ka tangoˈol to mataˈlifayto a demak. ‘Pasiˈayaw ko pinengneng,’ misaˈimer to hanoikor. Pasiˈayaw ko pinengneng ita, misaˈimer to hanoikor, hano kalimlaan hani? Ano pasilikor saan ko tamdaw a minengneng, cato kangaˈay talaˈayaw a romakat. Malecaday, ano misamacay kita to mataˈlifayto a demak, wa cato kangaˈay misamacay matayal saki Yihofaan.​—Luka 9:​62. w20.11 24 fiedac 1-3 fatac

Tanektekay ko tireng a Koliyat misakahmaway ko pinengneng ci Tafitian kantangay tapiˈen sanay. Tanektekay a ˈakawang ko tireng ni Koliyat, marocekay ko sapilood a lalosidan, adihayay ko milifetan a milood, ci Tafiti saan kaemangayho, cowaho ka pilood, kantangay ko sapilood a lalosidan. Kawra, pakasoˈlinay ci Tafiti ci Yihofaan, hanaca mitiˈer to ˈicel no Kawas milowid toniya katalawan a ˈada. (1 Samuil 17:41-​45, 50) Ikor to, wa misiˈayawho ci Tafiti to pakatoleday cingranan a sapalifet alatek. O minilnilan no Kawas ci Sawlo a hongti, na madimadiay ci Tafiti matayal saki cingraanan, misalimlaanho ni Sawlo. Ikorto i, pakayni pisatakaraw ningra misatapangay a maˈinap ci Tafitian. Mipalakay ci Sawlo ci Tafitian, sapipatayaw cingranan. (1 Samuil 18:​6-9, 29; 19:​9-​11) Soˈlin micada to sapalak ni Sawlo, kamayanho mikangodo ci Tafiti ci Sawloan, samanen o minilnilan ni Yihofa a hongti ci Sawlo. (1 Samuil 24:6) Mitadiˈecay ci Tafiti to sapafeli ni Yihofa a ˈicel, malaˈosi ko pilakowit toniya sapalifet.​—ˈOlic 18:1 ato lalangian. w20.07 17 fiedac 11-​13 fatac

Pakayani ‘kaˈamisay hongti’ ato ‘katimolay hongti’ a sapairasol, O adihayay lalakaw malaˈosiayto, iraay ko lalangian ita pakasoˈlin o maˈosaway a sapairasol o mamalaˈosi maemin. Saka cipinangaw to sapairasol no Taniil saka 11 fedengan, haratengen, o misowalan noniya sapairasol oyaan mifiyoray to finawlan no Kawas a mikowanay ko mitoroˈan. O finawlan no Kawas toniya hekal o mimingay, hano ˈodisen noniya mikowanay hani? Samanen o patosokan ni Satan ato miontingan ningra a hekal miˈodis i, oya midokoay ci Yihofaan ato mihakelongay ci Yisan a tamdaw. (Satapangan 3:​15; Paˈarawan 11:7; 12:17) Roma i, saka tatodongaw no kacipinang ita to sapairasol no Taniil, oha patatiriˈen to roma sowal no Fangcalay Cudad, samanen o sapairasol no Taniil malacecayay to roma sapairasol no Fangcalay Cudad. w20.05 2 fiedac 1-2 fatac

ˈAlomanay tamdaw anini pakayni pakayraan no mapatayay iraay koniyah a pinengneng. Mihaenay, samanay ko sowal no Fangcalay Cudad hani? Mapatay ko tamdaw, manaholayto ko tireng. Ano ngaˈayay ci Yihofa mikitini i awaay a misangaˈ to maamaan, oha ngangaˈay patikol paˈorip to mapatayay tamdaw, pafeli cingranan to matatodongay a tireng. (Satapangan 1:1; 2:7) Tano tinakoan ci Pawlo a mitadtad, patikolen no Kawas paˈorip ko tamdaw i, cowa koya telang a tireng ko sapafeli cingranan. O cecay sapaloma kosamen i sera cicengoˈay, malo faelohay a pinaloma, o potal noniya pinaloma cowa kalecad to potal noya sapaloma. Tanonini a sapatinako ci Pawlo a mitadtad, ano patikolen no Kawas paˈorip ko tamdaw i, ngaˈayay ‘oniyah saan a harateng’ pafeli to tamdaw to faelohay tatirengan. Sanayho ci Pawlo: “Iraay ko kakarayan a tatirengan, iraay kono sera a tatirengan.” O maanan ko tatodong no sowal ningra hani? O tamdaw ‘ono sera a tatirenagn,’ o ciˈirangay ciheciay a tireng, o coyoh iraay ko “no kakarayan a tatirengan,” ono ˈadingoan a tireng.​—1 Korinto 15:36-​41. w20.12 9-​10 fiedac 7-9 fatac

Makalimay kita rihaday ko kaˈorip, awaay ko maolahay cariraw to romiˈamiˈad. Kawra awaawa sai malitemohay ita ko kacalemceman a tatokian. Mahecad ci Tafitian, o mamilicay kita ci Yihofaan to masowalay no aniniay sinael a salicay. Adihayay kacarirawan a lalangian o cowa ko mamaˈimer ita. Tinakoen, pasangar pasangaray ko sakaˈorip, awaay ko pakayraan ita miˈimer tonini. Cowa ka fanaˈ kita, hahacowa mikayhid ko cafay matayal cafay micudad a midemak to makaniway malafoay a demak. Roma i, awaay pakayraan ita miconged to mararaway a demak. Anini, misiˈayaw kita to hatiniay a pasangaray, samanen cowa pitoor to safalod no Fangcalay Cudad a maˈorip ko ˈalomanay a tamdaw. Mafanaˈay ko kawas no hekal ci Satan, o roma tamdaw pakayni “cariraw no lekakawa,” awaay ko harateng sapidokoaw ci Yihofaan. (Matay 13:22; 1 Yohani 5:​19) Maˈorip kita toniya hekal i, tada karetengay ko saroero! w21.01 2 fiedac 1, 3 fatac

Roma i, patalipaˈelalay ci Yohani kitaanan, aka ˈinteh to salikaka, ano caka tengilen ita koniya limoˈot, pafeliay to toki ci Satanan mionting kitaanan. (1 Yohani 2:​11) Salikoray no saka 1 hahekalan, iraay ko mahaenay a tamdaw. Mihalakaay ci Satan mikosam to ˈintehay itini finawlan no Kawas, paira to maliwasakay. Mitilid ci Yohani to tolo a tikami pafeli to kasakopang i, iraay ko mitakaway micomod i kasakopang no Krisciyang, paihkalay cangra to harateng ni Satan. Tinakoen, ci Tiyotrifis (Titefi) mikidatay cingra to pakidemay kalacongis i kasakopang. Cowa ka ngodo cingra to miocoran no malohemay malitengay i congpo. Ano iraay ko tamdaw sapicadaaw to kapiliˈan ningra a tamdaw, milaplapan nignra cangra itini kasakopang. Tada pakidemay kora waywayan. (3 Yohani 9, 10) Anini, kamayanho ci Satan mihalaka paliwasak to finawlan no Kawas, sapitapiˈaw kitaanan. Mihaenay aka ka ˈinteh to salikaka, mipalak to kakelec a malacecay. w21.01 11 fiedac 14 fatac

Itini Saka Cecay Lalood no Hekal, o mikowanay no Towic ato Ikok mipalakay to manaˈayay mirienang milood a Krisciyang. O mikowanay no Padaka mipalitay to kakeridan no mitosilay a salikaka, oniya demak matatodongay to sapairasol no Paˈarawan 11:​7-​10. Ikor no 1933 miheca, mangalef itini Saka Tosa Lalood no Hekal, haratengay sanay ko kaˈamisay hongti a miˈodis to finawlan no Kawas. Ci Sitele ato sikawdan ningra maedeng 1500 ko mipatayan a salikaka, mipalitanho ko pina patek a salikaka i pitepengan kapalitan. Cowa ko ‘pipakadit aca to sano pololay a fangcalay sefi no Kawas, palahdawayho to patoˈayaay a limasmas,’ mikeceng to mitosilay a tayal ita. (Taniil 11:30b, 11:31a) Somowalayho ci Sitele papalaˈafo to polong a Misawacayay Tamdaw ni Yihofa i Towic. w20.05 6 fiedac 12-​13 fatac

Tano damsayay kita macacada, cowa ko mamikidat to malalifetay a harateng itini kasakopang. Masowalay i fafekang, minengneng ci Yonatan ci Tafitian cowa ko sakalalifet a tamdaw, cowa ka laˈafas to saaroˈan no hongti. (1 Samuil 20:42) Oha maminanam kita to ngaˈayay taˈarawan ni Yonatan. Soˈlin ira ko inaneng no malacafayay kitanan matayal a salikaka, o pinengneng ita cangraanan aka o sakalalifet han ko pinengneng. ‘Pairaen ita ko misapoeneray, minengneng to tao ikakaay to niyah han ko harateng.’ (Filipi 2:3) Haratengen, o kahacecay a tamdaw iraay ko sapadama i kasakopang. Misapoener ko falocoˈ ita, aka misatakaraw miharateng, wa maˈaraw ko kangaˈayan no salikaka, wa ngaˈay minanam to madimadiay taˈarawan nangra. (1 Korinto 12:21-​25) Tano damsayay kita macacada, wa ngaˈay kita micowat to kakelec no kasakopang. Wa ngaˈayho kita misawacay to nisawawaan ni Yis ko niyah, misolot to maolahay to kimad a tamdaw midoko ci Yihofaan. Sakakaay i, wa ngaˈay paˈdil kita ci Yihofaan, o “siniˈadaay to tamdaw a Wama Cingra, o pafeliay to kihecod sahinom a Kawas.”​—2 Korinto 1:3. w21.01 24 fiedac 14 fatac; 25 fiedac 16 fatac

Anini, finawlan ni Yihofa misakahmawan no tao alatek, o roma tamdaw sanay ko sowal o mafolaay malonayay kita sanay. Misamaanay hani? Samanen o waywayan ita cowa ka lecad tono hekal a tamdaw, misaˈicelay kita malo misapoeneray damsayay a tamdaw, kawra masemeray ko hekal tamdaw to misatakaraway a tamdaw. Roma i, manaˈayayho kita malasofitay anca mirienang to mikowanay. Cowa picapid kita tono hekal a waywayan, mansa masakahmaw no hekal tamdaw. (Loma 12:2) Soˈlin masakahmaw no hekal tamdaw kita, kawra misakadademakan ni Yihofa kita palaˈosi to kasapaan a demak. Anini, o mitosilay a demak taˈangayay ko kacowat. O finawlan no Kawas saadihayay ko sasowalen a mitepangan ato saadihayay ko palilaman a casi, misakadademakayho to Fangcalay Cudad padama to pinaay soˈot emang a tamdaw malipahak ko kaˈorip. Oniya kihcod sahtoay o nanoˈicel ni Yihofa. w20.07 15 fiedac 5-6 fatac

Midofdof ci Yis ci Yihofaan, cowa ko awaay ko taneng ato ˈicel ningra. O sapasifanaˈ ni Yis kantangay ihkalay, dengan o citanengay tamdaw ko papakadangar tonini. (Yohani 7:​45, 46) Madeng masemeray ci Yihofa to inaneng ni Yis, mansa tiya misangaˈ to dohaw i malacafayay ci Yis Cingranan a matayal. (Taneng 8:​30; Hipray 1:​2-4) Roma i, ikor no patikol ci Yis maˈorip, pafelian ni Yihofa cingra to ‘fadangalan no kakarayan ato sera.’ (Matay 28:18) Soˈlin iraay ko taneng ni Yis, kamayan cingra pasayra ci Yihofaan micangacang to sakayat. Misamanay? Samanen tangongolay ko olah ningra to kakarayan Wama. O mamisinanot ko faˈinay tonini. Misaali ci Yihofa to fafahi midofdof to faˈinay, cowa ko pakayniay caka pakadangar ko fafahiyan to faˈinayan. Hano mafanaˈ kita hani? Samanen, cowa ko faˈinayan aca ko mipiliˈan ni Yihofa, mipiliˈay to fafahiyan malacafay ci Yisan malo hongti. (Kalatiya 3:​26-​29) Pakasoˈlinay ci Yihofa ci Yisan, mansa makahi patorod to fadangalan cingranan. Malecaday, ira ko taneng no faˈinay, wa patorod to fadangalan i fafahi. w21.02 11 fiedac 13-​14 fatac

Mahecaday o dadingoan ko kimad no Kawas, ngaˈayay padama kitaanan mihapinang, o manan ko pasangaray no niyah, ato sasamaan a misalof. (Yakop 1:​23-​25) Tinakoen, ikor no micekiw to Fangcalay Cudad, wa mahapinang ita wa miˈimer to keter no niyah. Itini sapadama ni Yihofa wa mananam ita, tano damsayay waywayan misiˈayaw to paketeray kitaanan a tamdaw ato demak. Ano mihaen i, wa madolo to kita miremo to saroero, ihkalto ko piharateng, ngaˈayto inaneng ko misaˈosian. (Yakop 3:​13) Mankora, micalep a cipinang to Fangcalay Cudad tada kalimlaanto! Latekay, ikor no mararaw kita ngaˈ mafanaˈay to cowa ka ngaˈay mihaen ko demak. O ngaˈayay a pakayraan i, mikitini nalifetan no tao minanam to sapasifanaˈ. Mihaenay i, pakalalokay ci Yakop kitaanan misongilaˈ a miharateng to tinakoan no Fangcalay Cudad, malecad ci Apraham, ci Rahap, Yupo aci Iliya. (Yakop 2:​21-​26; 5:​10, 11, 17, 18) Oniya madimadiay a sikawdan ni Yihofa, soˈlin misiˈayaw to sapalifet, cowa ka lahdaw ko lipahak. O tinakoan nangra mitadtaday, ira ko sapadama ni Yihofa, o mamalaˈosi ko demak ita. w21.02 29-​30 fiedac 12-​13 fatac

Itini pipacekiw to Fangcalay Cudad, pasifanaˈ to pacekiwan o ˈinorong no pacekiway a singsi. Ano mitahidang cingra tisowanan mirienang, o cafayto ningra kiso, o mamisongilaˈ a madadama. (Patnakay 4:​9, 10) Ihkalen ko sowal, sasamaan ko demak no ngaˈayay a cafay hani? Songilaˈen misaday ko cacekiwen lalakaw. Salakat, ngaˈay kiso milicay to singsi to pakayraan no pacekiwan. “Samanay ko lalengawan noniya pacekiwan hani? Minanamay kamo to manan lalakaw hani? Harateng iso itini manan pakayraan pakalalok cingranan hani? Iraay ko manan cowa ka ngaˈay sowalen anca demaken han? Ngaˈay kako samaan pakalalok to pacekiwan macakat hani?” Manaokaniw, cowa ko papasowal ko pacekiway singsi to mahimeday no pacekiwan, kawra ngaˈay siwkayen ningra ko pakayraan no pacekiwan, wa ira ko sadama. O cecay mikiriwiˈay nilnilen a mitosilay ci Ciyawi sanay cingra: “Mihaenay, wa makalimto ko cafay ako sapipadamaaw toniya pacekiwan, wa mafanaˈho sasamaan pakalalok cingranan.” w21.03 9 fiedac 5-6 fatac

O roma lalangian kaˈintelen no tamdaw kita i, mitooray kita to palinian ni Yihofa a maˈorip. O ˈakawangay a palinian ni Yihofa taˈangayay ko kasasiroma to palinian no hekal. Tinakoen, o Sotom ato Komora a finawlan maenepay to malafoay madadiˈiyay a waywayan, telocto palaˈafoan ni Yihofa, nohatini pakapapotal sanay ko ˈalomanay tamdaw midama to mahaenay waywayan. (Yuta 7) Samanen midopoay kita to ˈakawangay a palinian ni Yihofa, malikafay ko tamdaw kitaanan, malaliway ko harateng ita sanay. (1 Pitiro 4:​3, 4) Ano ˈintel ko tao kitaanan, pakangodo kitanan i, o manan ko papadama kitanan padotoc mihadidi hani? Misaaliay kita to tanektekay a pakasoˈlinay falocoˈ, wa padamaen ni Yihofa kita. O pakasoˈlinay falocoˈ malecaday o taˈangayay sapatada, “sapipadeng to nipaeferan no palafoay a cinamalay a panaˈ a maemin.”(Ifiso 6:​16) Kawra cowa ko pakasoˈlinay aca falocoˈ, pairaenho ko olah, misamaanay? Samanen o olah “caay ka ranikay maketer.” Ano ira ko olah ita i, ano samaanto ko dokaˈ, wa ngaˈay padadotoc a masasodod ato miemem. (1 Korinto 13:​4-7, 13) Maolah ci Yihofaan, maolah to salikaka, maolahho to ˈada, ngaˈay padama kitaanan milowid to ˈintelay. w21.03 20-​21 fiedac 3-4 fatac

Latekay, caka pidemak kita to cecay demak o maolahay to salikaka konini. Tinakoen, aka ranikay kita pakayni sowal no salikaka a maketer. Haratengen ˈayaw no mapatay ci Yis mifekaday a demak. Pasowalan ningra ko nisawawaan, cima ko sapilifokaw to tahadaˈoc a ˈorip, kakomaen to heci ningra, minanom to ˈirang ningra. (Yohani 6:​53-​57) Matengil no ˈalomanay nisawawaan ko sowal ni Yis, macekiday, miliyasay cingraanan. Kawranan ci Yohani ato romaroma soˈlinay widang ni Yis padotocay mikotod cingraanan. Soˈlinay i, cowa ka cipinang cangra to sowal ni Yis, macekiday alatek, kawra cowa pisaˈosi cangra to mararaway ci Yis, cowa ka mapiliˈ ko harateng. Pakasoˈlinay cangra ci Yisan, mafanaˈay sahtoay o soˈlinay kimad ko sowal ningra. (Yohani 6:​60, 66-​69) Mananamay ita, aka ranikay kita pakayni i sowal no widang a maketer, kalimlaan konini. Pairaen ita ko toki no tao a mitadtad, ho malahdaw ko mararaway harateng.​—Taneng 18:13. w21.01 11 fiedac 13 fatac