LALENGOEN LALAKAW 51
RADIW 132 Malacecayayto Kami
Samaan ko Pilimasmas to Pakaetimay Ngaˈayto Paˈdil ci Yihofaan
Kao masinanotay ko demak namo maemin, matatodong ko pilimasmas.—1 KORINTO 14:40.
KALIMLAAN NO LALAKAW
Caciraramod a Krisciyang samaan ko pidemak, ngaˈayto pipakaetiman a romiˈad paˈdil ci Yihofaan.
1-2. Makalimay ci Yihofa to Krisciyang ira ko masamaanay a pipakaetim?
PAKOTIYAAYTO kiso han? Ano hatiraay i, kahemekanto kiso! Maedeng ˈifowaay kamo milimasmas to pakaetimay nohatini.a Ciharatengay ci Yihofa tamowanan, makalimay lipahak kamo toya pakaetiman a romiˈad, ikor i, ira ko rahekeray a nokaˈorip no raramod.—Taneng 5:18; Radiw ni Solomon 3:11.
2 Na miharatengay kiso han? O pipakaetim namo papaˈdilen ci Yihofa. Hano mihaen ko sowal hani? Samaan ngaˈ paˈdil Cingranan hani? Oniya lalakaw papadama to pilimasmasay to pakaetimay a tamdaw cipinang to caˈof noniya tosa a salicay. Mamirienang kita to pipakaetim no tao anca mipaini to pakaetimay a tamdaw, o safalod noniya lalakaw papadama kitanan ho ngaˈay paˈdil ci Yihofaan.
Hano Papaˈdilen ci Yihofa?
3. Milimasmasay to pakaetimay a Krisciyang saka cecay sasimsimen i, o manan? Misamaanay?
3 O pipakaetim no Krisciyang hano paˈdilen ci Yihofa hani? Ci Yihofa ko patirengay to raramod, milimasmasay Cingra to saka cecay a pakaetimay, pararamod ci Atam aci Ifaan. (Satapangan 1:28; 2:24) Mihaenay, milimasmasay to pakaetimay a Krisciyang saka cecay sasimsimen i, o pinengneng ni Yihofa, doedoen ko safalod no Fangcalay Cudad a misaˈosi.
4. I pipakaetiman no Krisciyang mipaˈdil ci Yihofaan, iraayho ko manan a lalangian han?
4 Roma i, iraayho ko cecay masakalimlaan a lalangian. O kakarayan Wama iso ci Yihofa, hanaca o sangaˈayay a widang iso. (Hipray 12:9) Maedeng sapidipotaw kiso to kalalaˈed no niyah Cingranan, ano hacowato a tatokian, caay ka ciharateng pakasomad Cingranan, mahawpay ko pipakaetiman a romiˈad. (ˈOlic 25:14) Maharateng ko nano demak ni Yihofa tisowanan, ato mikiˈokan Ningra a demak noikor, coko miakoˈiday kiso Cingranan, makalim i pipakaetiman no niyah paˈdil Cingranan hokira?—ˈOlic 116:12.
Sasamaan Paˈdil ci Yihofaan?
5. O Fangcalay Cudad sasamaan a padama to Krisciyang milimasmas to pipakaetim?
5 Pakayni sasamaan a misikay ko Krisciyang to pakaetimay, cowa ka adihay ko saˈosi no Fangcalay Cudad. Mansa, o kahacecay Krisciyang mamitoor to sarikec ato pinangan no kitiraan no niyah, ato pakayraan, kaolahan no niyah a milimasmas to pipakaetim. Soˈlin mahaen, kamayan mihadak ko Fangcalay Cudad to adihayay milingatay a safalod. Tooren namo kora safalod a midemak, itini pipakaetiman a romiˈad papaˈdil ci Yihofaan, palipahak Cingranan. Iraay ko maanan a safalodan hani?
6. Midofdof to milingatay to raramod a sarikec, hano masakalimlaan hani?
6 Midofdof to milingatay a sarikec. (Matay 22:21; Loma 13:1, 2) Adihayay kitakit a sifo iraay ko milingatay to mararamod a sarikec, caciraramod a Krisciyang o cacipinang to o manan ko milingatay a sarikec i kitiraan no niyah. Ano iraay ko salicay, ngaˈayay licayen ko malohemay malitengay micangacang to sapadama nangra.b
7. Sasamaan ko pisikay to pakaetimay hani?
7 Ira ko matatodongay palipahakay to tamdaw a waywayan. (1 Korinto 10:31, 32) O pipakaetim namo pairaen ko makapahay capeling no fangcalay saocor, eca kono hekal a harateng. (Kalatiya 5:19-26) Samanen pafelian no Fangcalay Cudad ko faˈinay to fadangalan no mikeriday, mihaenay o caciraramod a faˈinayan iraay ko ˈinorong paira to lipahakay, ira ko masinanotay a pidemak to pipakaetim. O manan a demakan ko papadama to caciraramod a tamdaw pakadangar toniya demak hani? O misalalangiay to Fangcalay Cudad, padihkoay to falocoˈ no tamdaw a kimad no pakaetimay. O mahaenay a kimad papadama to mirienangay a tamdaw matongal ko pikangodo toni pipakaetim, matongalho ko kacipinang o raramod hananay i, mikitiniay ci Yihofaan a kalimlaan a sapatelong. Masimsim koniya lalangian, ˈalomanay caciraramod a tamdaw mipiliˈay itini Kasaˈopoan a misikay to pakaetim. Ano mahaenay ko harateng namo, kalikien pasowal to malohemay malitengay a misingsi.
8. Sasamaan ko demak wa matatodongto ko pipatahka to pakaetimay? (Loma 13:13)
8 ˈOsien ko Loma 13:13. Ano sapatahkaaw kamo to pakaetimay, sasamaan ko demak ho eca ka paihkal tono hekal a harateng hani? Masowalay no sinael, o Krisciyang cowa ka ngaˈay ‘pakidem a maacang.’ O ‘pakidem a maacang’ sanay no Krisiya a sowal tatodong i, o pakidemay maacang a misalisin, mirienang to patahkaay no pakaetimay a tamdaw taˈowak sanay to epah, pasadak to radiw i, taˈangayay ko ngihaˈ, tahira i lafii. O pakaetimay a tahka no Krisciyang cowa ka ngaˈay mahaen. Ano mamihadak kamo to epah i tahka no pakaetimay i, salakatenho miharateng mamifekad ko manan a demak, ano mihaen i, cato ka adihay ko miˈowakan no tamdaw.c Ano papasadak kamo to radiw, aka taˈangayay ko ngihaˈ, ho ngaˈay masasowal ko mirienangay a tamdaw, sinanotenho mipiliˈ to masamaanay a radiw, hamaan patatiihen ko makapahay falocoˈ no mirienangay a tamdaw.
9. Pakayni i hasasomowal i tahka no pakaetimay ato romaroma a kamok, o caciraramod a tamdaw mamisinanot to manan hani?
9 Ciharatengay kamo mitahidang to salawina anca widang somowal itini i tahka no pakaetimay han? Milimasmasho to lipahakay a kamok, anca paˈaraw to ˈalomanay to sasing ato ika han? Kawra haratengen, onini lipahakay a kamok no tahka no pakaetimay, sahtoay o ngaˈayay, o papakalalok to tamdaw wangaˈ. (Filipi 4:8) Haratengen: “Onini a kamok wa ira ko tatiihay noka pifiyor han?” Haratengenho: “Onini a kamok paihkalay to mikangodoay to raramod han? Masakalimlaan i, mapaˈdil ci Yihofaan han?” Soˈliˈlin o mamenacay ngaˈayay pakahemek to tamdaw, kawra aka somowal to kaacekan a sowal pakatawa to tamdaw. (Ifiso 5:3) Roma i, pasowalen koya sasomowal i tahka no pakaetimay a tamdaw to harateng namo, ho cipinang cangra, hanaca mikangodo tamowanan.
10. Milimasmas to pakaetimay i, o Krisciyang hano papadadotoc misamiming ko falocoˈ, aka a pasengi? (1 Yohani 2:15-17)
10 Padadotoc misamiming ko falocoˈ, aka a pasengi. (ˈOsien ko 1 Yohani 2:15-17.) O Krisciyang ano misarocod paˈdil ci Yihofaan eca ko niyah, o mamahemek ci Yihofa. Mihaenay, sapadadotocaw misamiming ko falocoˈ no Krisciyang, cowa ko mamisaloyaˈ, ‘pasengi to hafay.’ Soˈlinay haw i, o kantangay a pipakaetim adihayay ko kangaˈayan. Itiniay i Norwi faˈinayan salikaka ci Mayke sanay: “Cowa ka adihay ko mapalakay niyam a payci misikay to pakaetim, mansa cowa ka citadah, ngaˈayho padadotoc misakafah. Soˈlin kantangay ko pipakaetim niyam, kawra dihkoay ko falocoˈ, o maharatengay sahtoay o ngaˈayay.” Itiniay i Intiya fafahiyan salikaka ci Tapisa sanay: “Samanen kantangay ko pipakaetim, mansa cowa ka adihay ko cariraw, cowa ka adihay ko saroero, cowa ka adihay ko cowa ka lecad a harateng.”
Ano icowaayto a kitiraan, o Krisciyang ngangaˈay misikay to kantangay, dihkoay lipahakay a pipakaetim (Nengnengen ko saka 10-11 fatac)
11. Itini pilafa to caˈedong, caciraramod a tamdaw mamisinanot to maanan hani? (Nengnengen ko coka.)
11 Maherekayto kamo miharateng itini pipakaetiman o manan ko cacaˈedongen han? Makalimay kamo makapah ko pilafa to niyah. Soˈlinay i, i lintad no Fangcalay Cudad, caciraramod a tamdaw mamisakapahay a milafa to niyah. (Isaya 61:10) O caˈedong namo i pipakaetiman a romiˈad cowa ka hecad tono kalo a romiˈad, kawra papadadotoc a paira to sanengsengay. (1 Timoti 2:9) I pipakaetiman a romiˈad, aka papisamacayen ko tao minengneng to caˈedong namo anca sakaˈeres a dafong.—1 Pitiro 3:3, 4.
12. Hano naˈayen ko cowa ka tatodong to safalod no Fangcalay Cudad a pinangan no pakaetimay?
12 Minaˈay to cowa ka tatodong to safalod no Fangcalay Cudad a pinangan. (Paˈarawan 18:4) I hekal ni Satan, adihayay pinangan no pakaetimay iraay ko mapaysinay, anca milingatay to mararaway pihakelongan ato misakawasay. Mirikecay ci Yihofa kitanan, aka picada to cowa ka korac a demak. (2 Korinto 6:14-17) Ano misimsimay kamo misakadademak to cecay pinangan i pipakaetiman, kawra cowa ka fanaˈ tonini a pinangan to ngaˈayay hokira, sasongilaˈen a cipinang tonini a pinangan ato milingatay to safalod no Fangcalay Cudad, ikor ngaˈ misaˈosi to demak.
13. Pakayni picada to sapatelong, o caciraramod a tamdaw, sasamaan ko pinengneng?
13 Itini kitiraan iso a pala, mirienangay to pakaetimay a tamdaw wa patelong to caciraramod a tamdaw han? O kaˈorip no kahacecay a tamdaw cowa ka hecad, o sapatelong cowa ka hecad. Pakalalokay ko Fangcalay Cudad to Krisciyang hinapaladaˈ, makahiay ko salikaka mihaen to demak. (Taneng 11:25; Dmak 20:35) Kawra sapatelongaw ko mirienangay a tamdaw, aka pairaen ita ko harateng nangra to mamihaen ko demak ngaˈ, anca patelong to madoloay a dafong kapiliˈen cingra. Mamisaˈicel kita palahad to pinengneng ni Yihofa, o mirienangay a tamdaw mitooray to harateng ato payci no niyah to o manan ko sapatelong, o aakoˈiden ita cangra.—2 Korinto 9:7.
Miremo to Pasangaray
14. O roma a salikaka tahalifaay to manan a pasangar hani?
14 Makalimay kamo paˈdil ci Yihofaan ko pipakaetim no niyah, kawra milimasmas to pakaetimay i, iraay ko malifaay a pasangar. Harateng no roma salikaka, sapikantangaw to pipakaetim cowa ko madoloay. Itini potipot no Solomon a faˈinayan salikaka sanay: “Cima ko tahidangen mirienang to tahka no pakaetimay, tada pasangaray. ˈAlomanay ko widang niyam, itini serangawan niyam, o mafanaˈay tamiyanan a tamdaw sapirienangaw to tahka no pakaetimay.” Masowalay isawni a fatac sanay ci Tapisa: “I niyaroˈ niyam, ˈalomanay ko mirienangay to tahka no pakaetimay, kawra 100 aca a tamdaw ko tatahidangen niyam, adihayay ko mapalakay niyam a toki malalengo to wama wina, ngaˈ micadaay cangra to saˈosi niyam.” Itiniay Intiya fafahiyan salikaka ci Sara sanay: “O kafanaˈan ako a roma tamdaw misakaretengay to saaroˈan no niyah, maolahay pasengi to hafay. O kakakaka ako mipalakayho to adihayay a payci misikay to pakaetim, mansa pakidemay ko saroero ako mamisikay to pasangaray ikakaay ko kangaˈay a pakaetim.” O manan ko papadama tamowanan miremo to hatiniay a pasangar hani?
15. Milimasmas to pakaetimay i, hano masakalimlaan ko mitolonay hani?
15 Pakaynien i pakaetimay a demak padadotoc a mitolon. Milimasmas to pakaetimay i, ano malifa namo ko masamaanay a pasangar, iraay ko manan a harateng, ngaˈayay tolonen ci Yihofa pasowal Cingranan. (Filipi 4:6, 7) Ngaˈayay cangacangen ci Yihofa padama tamowanan citaneng ko pisaˈosi, ira ko rihaday no falocoˈ, ato timolo a misiˈayaw to saroero no tao. (1 Pitiro 5:7) Mafanaˈto pacaˈofan ni Yihofa ko satolon namo, wa matongalto ko pakasoˈlin a mitiˈer Cingranan. Fafahiyan salikaka ci Tapisa sanay: “Itiya calemcemay to kalalaˈed niyam caka hecad ko harateng, calemcemayho ira ko lacongis ato paroˈ no lomaˈ. Mansa ˈayaw no malalengo to pakaetimay a demak i, mitolonay kami. Soˈlinayto padadotocay ci Yihofa padama tamiyanan, mansa ngaˈayay ko kalalengo niyam!”
16-17. Milimasmas to pakaetimay i, o ngaˈayay a kalalengo hano o masakalimlaan hani?
16 Ihkalen sidaˈiten ko kalalengo. (Taneng 15:22) Milimasmas to pakaetimay i, adihayay ko sasaˈosien namo. Tinakoen pakaetim a romiˈad, hakowa ko mamapalak a payci, cima ko tatahidangen a mirienang. ˈAyaw no mamisaˈosi i, malacafayay kamo misaharaterateng to cowa ka hecad noka pipiliˈ, simsimen ko o mananho ko milingatay a safalod no Fangcalay Cudad. Ngaˈayay malalengo kamo to matenesay cinalifetan a sapaini no salikaka. Ano pasowal to harateng no niyah i, cisidaˈit, makahi a pacaˈi. Ano wama wina anca paro no lomaˈ pasowal to matatodongay a saali i, mamisaˈicel mikangodo to harateng nangra. Samanen o pakaetim namo pakayni cangranan o masakalimlaan. Ano cowa ka mamadangar namo mitoor ko sapaini nangra, ka mihadidi a mitadtad pasowal cangranan. (Kolosay 4:6) Pasifanaˈen ko paro no lomaˈ to patosokan namo, wa misikay namo to pakahemekay to ˈalomanay ngaˈayho paˈdil ci Yihofaan a pakaetimay.
17 Tadtaden ko cowa pidoko ci Yihofaan a wama wina to saˈosi namo alatek cowa ko madoloay, kawra wa ngaˈayto a malaˈosi kamo. Itini Intiya faˈinayan salikaka ci Santosi iraay ko mahaenay a milifetan, sanay cingra: “Makalimay ko paro no lomaˈ tamiyanan tano Intiya a pakayraan i pakaetiman. Adihayay ko mapalakay niyam a toki malalengo cangranan, ngaˈ micadaay cangra to saˈosi niyam. Kawra, o saali nangra ano cowa ka misafelit to palinian ni Yihofa, wa makahi kita a misalof. Tinakoen, tooren niyam ko kaolahan nangra a misaˈosi to kakaenen i tahka no pipakaetiman, roma i, caayho ka romadiw makero, samanen o roma paro no lomaˈ cowa ka olah.”
18. Sakalaˈosiaw no pipakaetim, sasamaan ko pidemak namo? (1 Korinto 14:40) (Nengnengen ko coka.)
18 Songilaˈen a mihalaka. Ano talaˈayaw kamo a milimasmas, pipakaetiman a romiˈad cato ka taˈangayay ko saroero. (ˈOsien ko 1 Korinto 14:40.) Itiniay i Taiwan a faˈinayan salikaka ci Tomon sanay: “Sakalaˈosiaw no pipakaetim, ˈayaw no pina romiˈad malacafayay kami to papadama a salikaka malalengo to hademak i pipakaetiman a romiˈad, talaˈayawayho mihatatanam to pina a kamok.” Iraayho ko hasasinanoten, o kahacecay a limasmas to pipakaetim mamisaˈicel a mitoor to toki a midemak, mihaen i, o paihkalayto mikangodoay kamo to lafang.
Talaˈayaw songilaˈen a mihalaka, wa malaˈosito ko pipakaetim (Nengnengen ko saka 18 fatac)
19. Sakalaˈosiaw no tahka no pakaetimay, sasamaan ko pidemak namo?
19 Ano talaˈayaw kamo a miharateng mamifekad ko manan a pasangaray alatek, mihaen awato ko kaafadan a demak. (Taneng 22:3) Tinakoen, itini kitiraan iso a pala, marariday ira ko cowa ka tahidangen a tamdaw mirienang to tahka no pakaetimay han? Ano hatiraay i, salakatenho a miharateng ko hapakayraan a misaysay, edengan o matahidangay a lafang ko ngangaˈay mirienang to tahka no pakaetimay. Ano mitahidang kamo to cowa ko misawacayay a salawina, salakaten a pasowal cangra samaanay ko pinengneng namo to pinangan, ato o pakaetim ato tahka no pakaetimay sasamaan ko pidemak namo, alatek ngaˈayay paˈarawen cangra to jw.org wangcan “O Pipakaetim no Misawacayay Tamdaw ni Yihofa i, Samaanay?” onini a lalakaw. Roma i, ngaˈayay kamo mitahidang to matenesay a faˈinayan salikaka malo “mikowanay to tahka a tamdaw,” mihaen ano mifekad ko manan a demakan i, o papadama cingra a misaysay. (Yohani 2:8) Ano talaˈayaw kamo pasowal cingranan to limasmas no pipakaetim i, wa ngaˈayto cingra padama tamowanan, mitoor to halaka ko pipakaetim masierod ko noka pidemak.
20. Pakayni pakaetimay, o caciraramod a Krisciyang haharatengen ko manan?
20 Milimasmas to pipakaetim, adihayay ko sasimsimen a demak, taˈangayay ko saroero namo alatek. Kawra aka mapawan, cecayay aca a romiˈad ko pipakaetim, mansa kantangen ko pidemak. Haratengenho, tonini a romiˈad wa misatapangto kamo malacafay a matayal saki ci Yihofaan, mansa o pipakaetim namo saˈicelen a paˈdil ci Yihofa. Tadiˈecen ci Yihofa, tiˈeren ko sapadama Ningra, mamalaˈosi kamo. Ikor, maharateng namo ko pipakaetim no niyah i, sahtoay o ngaˈayay ko maharatengay.—ˈOlic 37:3, 4.
RADIW 107 Taˈarawan a Olah no Kawas
a SAPITADTAD A SOWAL: Itini adihayay a pala, o pakaetimay hananay i, itini kaˈayaw no Kawas mihadakay to miketonay a sowal ko caciraramod a tamdaw. Ikor mamisikay to tahka no pakaetimay alatek. Kawra itini roma pala, o pakaetimay awaay ko mikimaday anca cowa ka somowal to miketonay a sowal, anca awaay ko tahka no pakaetimay. Itiniay toniya pala a Krisciyang o mamisimsim to safalod no Fangcalay Cudad.
b Sapitongalaw to kacipinang sasamaan ko Krisciyang minengneng to milingatay to raramod a sarikec, nengnengen ko Mikecolay 2006 miheca 10 folad 15 romiˈad, “Itini Pinengneng no Kawas ato Pinengneng no Tamdaw o Citatodongayto Kakangodoen a Pipakaetim.”
c Nengnengen ko jw.org wangcan “Mamisadak Kako to Epah Han?” onini a ika.