Matoˈasayto a Salikaka—O Odoˈ no Kasakopang Kamo

Alatek o kaˈorip iso nohatini malecaday ci Dongian, halafinayto kiso madimadi midoko ci Yihofaan, nikawrira cowato ka hecad to isaˈayaway, adihay ko midemakan saki ci Yihofaan, mansa matoledan nanay kiso. Ano mahaenay i, samaan ko pidemak iso ngaˈ padadotoc a lipahak hani?

Makalimay ci Yihofa Samaan ko Pidemak Iso Hani?

Wa ngaˈay salalicayen iso ko niyah: “Makalimay ci Yihofa samaan ko pidemak ako hani?” Ora caˈof itiniay i 2 Korinto 8:12. Mamihinom tisowanan koniya sinael, saan ko sinael: ‘Salakat ira ko makahiay a falocoˈ no tamdaw, o sapatafang ningra wa mikiriwiˈ a palipahak to Kawas, hanaca o sapatafang ningra o iraay ningra, cowa kono awaay ningra.’

Sanay ko sinael, makalimay ci Yihofa tisowanan mitoor to aniniay nokaˈorip a midemak. Miharateng toninian i, cowato ko papalalini kiso to tao, cowato ko tatano nidemakan isaˈayaw palalini to mamadangar a demak anini.

Haratengen hena, kaemangho kiso i, misaˈicelay kiso mitoor to itiyaay a kaˈorip matayal saki ci Yihofaan. Nohatinito i, mitooray kiso to aniniay a kaˈorip misaˈicel matayal saki ci Yihofaan. Mihaenay i, o patafangen iso ci Yihofaan nohatini i, mahecaday to isaˈayaway. Mihaenay isaˈayaw patafangen iso ko sangaˈayay ci Yihofaan, nohatini i, mahecaday tano sangaˈayay iso patafang ci Yihofaan.

Wa Ngaˈay Kiso Pakaciepoc to Tamdaw

Tanamen hena falicen ko harateng iso: Soˈlin matoˈasayto citolasay ko midemakan, kawra wa ngaˈay ciepoc to tamdaw. Malo matoˈasayto a Krisciyang, o hadademaken iso nohatini kaemangho kiso i, cowa pakademak. O manan a demakan hani?

Tinakoen wa ngaˈay kiso paladaˈen to nalifetan iso to tao. Nengnengen itini lalomaˈ no Fangcalay Cudad to sowal no tatosaay a tamdaw:

Hongti ci Tafiti sanay: ‘Isaˈayaw kaemangho kako, matoˈasayto nohatini, cowaho pakaˈaraw kako to mafalah ko moecelay a tamdaw, cowaho pakaˈaraw to misaali to kakaenen ko teloteloc ningra.’—ˈOlic 37:25.

Ci Yosuwa sanay: ‘Wa mapatayto kako. Mafanaˈay ko falocoˈ namo, mafanaˈay maemin kamo, o Kawas namo ci Yihofa mikiˈokay to sakaraheker tamowanan, awaay ko malaholacay ko cecacecay a sowal Ningra, malaˈosiay maemin saki tamowanan.’—Yosuwa 23:14.

Halafinay ci Tafiti aci Yosuwa madimadi midoko ci Yihofaan, cinalifetan ko kaˈorip nangra. Mihaenay i, tada ciˈicelay ko sowal nangra. Na mahecaday kiso cangranan matoˈasayto nohatini, kawra adihayayto ko nalifetan no kaˈorip iso nohatini, mansa papaˈicel ko sasowalen iso to tamdaw.

Tinakoen, ngangaˈay paladaˈen iso itini pidokoan ci Yihofa o manan ko macadaay a sakaraheker. Sowalen hena ko nalifetan no niyah. Na maˈosiay iso ko mahaenay a lalakaw alatek, maˈaraw no tamdaw ko nalifetan no tao milifokay to taˈangayay a sapakalalok. Mansa hamaan a mangodo, paladaˈen iso ko salikaka to nalifetan iso pakayniay to nika dademak saki ci Yihofaan, o mahaenay a makapahay nalifetan wa ngaˈay pakalalok cangranan, padama cangranan tanoktok ko pakasoˈlinay falocoˈ.—Loma 1:11, 12.

O roma pakalalok to tao a pakayraan i, saˈicelen tayra i Kasaˈopoan a misaˈopo, mihaen to demak i, mamacada ko sapakalalok. Ya masowalay isawni a salikaka ci Dongi mahaenay ko demak, sanay cingra: “Tayra kako i Kasaˈopoan a misaˈopo, mapakalalokay kako ira ko tawlikay a harateng. Samanen i Kasaˈopoan ˈalomanay ko maolahay takowanan a salikaka, mihaen i, cato ka malonay ko falocoˈ ako! Patelongayho kako to dafong i salikaka, paihkal to miakoˈiday a falocoˈ ako. Mihaenay i, misetekay kako to falocoˈ a micerid malacafay to salikaka mirienang to midokoay a demak.”

O Nika Madimadi Iso a Dademak, Misalimlaay ci Yihofa Tisowanan

Ilalomaˈ no Fangcalay Cudad ˈalomanay ko madimadiay a sikawdan no Kawas, soˈlin o nademakan nangra cowa ka adihay to isaˈayaway, kamayan misalimla ci Yihofa cangranan. Tinakoen nengnengen hena ko nalifetan no Israil tamdaw ci Simiyon. Kinasofocen ci Yis i, malitengayto ci Simiyon. Ano tayra ci Simiyon i fangcalay sefi i, maˈaraw ningra ˈalomanay kapah a faˈinayan midemak to kalimlaan a tayal, alatek samaanay ko harateng ningra hani? Malitengayto, awaayto ko kapo, awaayto ko ˈicel midemak to tayal ni Yihofa, sanay ko harateng ningra alatek. Kawra o pinengneng ni Yihofa ci Simiyon cowa ko mahaen. I pinengneng ni Yihofa, o ‘moecelay madimadiay’ ci Simiyon. Kalikoan ni Simiyon paˈarawan ni Yihofa cingra to ˈengaengaho a Yisan, pakayniho ci Simiyonan somowal to milingatay ci Misiyaan a sapairasol. (Luka 2:25-35) Mahapinangto no mita, cowa pisamacay ci Yihofa to liteng ni Simiyon, ao misamacayay to tanoktokay a falocoˈ ningra, hanaca ‘iraay ko fangcalay saocor itini i tireng ningra.’

Mihaenay i, aka calemcem kiso, ano madimadi kiso midoko ci Yihofaan, soˈlin cowa ka adihay ko midemakan, sasalimlaen ni Yihofa. O cecay tamdaw ‘o sapatafang ningra o iraay ningra, cowa kono awaay ningra’ i, mamahemek ci Yihofa to pipatafangan ningra.—2 Korinto 8:12.

Soˈlin mahaen i, oha ngangaˈay madangar iso a demak i, saˈicelen a midemak. Tinakoen tanamen iso mirienang to masasiromaay noka pitosil, soˈlin ˈapotoay ko toki o ngaˈayay koni. O roma i, patingwaen iso, mitilid to kato to salikaka, soˈlin kantangay koniya demak, kawra padihkoay to salikaka koniya pakayraan, mangalefay ko halafinay noka madimadi iso midoko ci Yihofaan. Mihaenay, o sowal iso, midemakan iso, oha papakalalok to tao koni.

O roma matoˈasayto a salikaka cowato ka ngaˈay ko rakat, nikawrira ngaˈayayho pakaciepoc to tamdaw. Nengnengen ko sapatongal lalakaw naitiniay i Kakawalian a Afrika a nalifetan. O lalangian i, “Mapaˈoripay Ningra Kako.”

Matoˈasay a salikaka maemin, paihkalay kamo to mihadidiay, patirengay to makapahay a taˈarawan. Halafinayto kamo midoko ci Yihofaan, nohatini kamayan tanoktokay ko pakasoˈlinay falocoˈ padadotoc matayal saki ci Yihofaan, o ngaˈayay taˈarawan namo papakalalok to tao. Ngaˈay pakasoˈlinen namo, ‘cowa ko eca ka moecel ko Kawas, cowa ko mamapawan to nano demak namo ato paihkalan namo a olah pakayni i ngangan Ningra, oya isaˈayaway matayal namo saki fangcalay finawlan, nohatiniho padadotoc matayal saki cangranan.’—Hipray 6:10.

Ano Ngaˈayay i, Saˈicelen Padama ko Tao

Paihkalay ko cecay mikakingkiway, ˈalomanay matoˈasay maceriday padama to tao, telocto i, tanoktokay ko tireng no niyah, tawlikayho ko ponoˈ, halafinayho ko ˈorip.

Ano padama kita to tao i, wa ngaˈayto tanoktok ko tireng padadotoc a maˈorip, cowa ka saan. Edengan o Kitakit no Kawas ko hamamipalahdaw to raraw no mita, cowato ko mamafiyor no liteng ato patay.—Loma 5:12.

Matoˈasay salikaka maemin, tanektek ko pakasoˈlin namo padadotoc matayal ci Yihofaan, misaˈicel padama to tao mafanaˈ Cingranan, o hanoikor namo a hatokel mamatongal ko tanektek, ano tirengto tatanoktok alatek. Mihaenay o matoˈasay salikaka maemin, aka mapawan misalimlaay ci Yihofa to nano demak namo Cingranan, i kasakopangay salikaka minengneng tamowanan i, mahecaday o odoˈ.