Proverbios
3 Iñche ñi fotüm ngüyunentulayaimi tañi quimeltun, feyentunge piuque mu tañi huercün dungu, 3 Tami nor piuqueyen ca tami manelfalngen famtripaquilpe eimi mu. Pültrücünufinge reque tami pel mu, huirintucucünuafimi reque tami piuque mu. 4 Femngechi tuteafimi ta Chau Dios ca tati pu huentru, cafei quimniengeaimi tami quim ngüneduamchefengen. 5 Maneluunge Jehová meu com tami piuque mu, ca eimi tami raquiduam mu recüluuquinolnge. 6 Com tami rüpü meu raquiduamanieafimi, ca quisu norümaimu cheu tami miyahual. 7 Quisu tami raquiduam mu quimcauquinolnge, doi mai rume yamniefinge ta Jehová ca püntütripange ti huesaque dungu mu. 8 Tüfa ta cümelcañmayaimu tami mongen ca nieai nehuen tami foro. 9 Püramyeafimi ta Jehová tami falinque chemcün meu ca tami hunen huefpachi fün quetran meu. 10 Feimeu tami elquetranhue apolerpuai, ca tami cütrühue meu hutrutripayai ti hue pulcu. 11 Iñche ñi fotüm, famentuquefilnge tami norümaeteu Jehová, ca üdequefilnge quisu tami ngüfetueteu, 12 Jehová ngüfetuquefilu am tañi pu piuqueyequefiel, quiñe chau reque ngüfetuquefilu tañi saquin fotüm. 13 Ayühun-ngei tati che quimchengerpulu, ca tati che quim ngüneduamürpulu, 14 tüfa am doi cümelcaqueyeu ti plata meu ca doi falin-ngechi dungu hulqueyeu ta milla meu. 15 Doi fali tati coral mu. Chem rume taiñ ayüqueel trürümngelayafui ti quimün meu. 16 Tañi man cuhu mu mülei rumel mongen, tañi huele cuhu mu mülei falinque fillem ca püramyen. 17 Fei ñi rüpü ayühun-ngei, ca com tañi rüpü mu mülei tüngün. 18 Inei rume recüluuquelu feitachi quimün mu quiñe anümca hulquelu mongen reque feleai quisu meu, ca pu recüluuquelu fei mu ayüucüleai. 21 Iñche ñi fotüm, loncontucuniefinge com tüfachi dungu. Eluucülenge tami quimchengerpual ca tami cüme raquiduamal; 23 Femngechi cuñihun-ngenon mu miyahuaimi tami rüpü meu, turpu mutrurlayaimi rume. 25 Llicalayaimi chem huesa dungu rume tami conturumeafeteu [...]. 27 Pepi quellulmi, catrütuuquilnge tami femal cümeque dungu feichi pu felelu ñi llohual. 28 Pepi quellufilmi tami carucatu, feipiquefilnge: “Amutunge. ¡Müchai huiñonge! Hule quelluayu”. 32 Jehová üdeniefilu am tati ngünencaquelu, huelu cüme hueniyeniefi tati pu nor chengelu