Proverbios
6 Mülelu tañi ruca mu, adquintunacümfiñ ventana mu, lelirpumefiñ reja mu. 7 Ca pefilu iñche pu quimchengenolu, tati pu huechequeche meu ngüneduamfiñ quiñe hueche huentru quim raquiduamnolu. 8 Miyahurquefui feichi rüpü meu inafülcülelu tüfachi domo meu, amulefui quisu tañi ruca püle, 9 epe punlu ti antü ca epe dumiñlu ti pun. 10 Fei pefiñ quiñe domo üncü amulen quisu meu, tucutuucülefui quiñe prostituta reque ca adcan dungu yeniefui tañi piuque meu. 11 Quisu pofolcangechi domongei ca ngünefalngelai. Mülequelai tañi ruca meu. 12 Feula rüpü püle miyahui, fei hula plaza meu mületuai, caque esquina meu üngümcülei. 13 Nüfi ca truyufi, fei yehuenon meu feipifi: 14 “Chalintucupen ñi pengelal tañi cüme hueniyehun Ngünechen engu. Fachantü femün tañi feipicünuel. 15 Feimu tripan tami trafiepayafiel, fei ¡peeyu! 16 Pepicacünun tañi cahuitu, ayüfalngechi ngütantu meu, tucufiñ lino cüpalu Egipto meu ayüfalchi color nielu. 17 Mirra, aloe ca canela meu cüme nümücünufiñ tañi cahuitu. 18 Pulihuen meu fentecünuayu tayu tuduamcülen cudumuhun meu, cüme rupayayu cudumuhun meu. 19 Tañi huentru mülelai ruca mu, fütra camapu amui. 20 Fentren plata yei, huiñotualu apon cüyen meu”. 21 Ti domo adcan dungu mu femi ñi fülmayaeteu. Cochi dungun mu rulpafi. 22 Quiñe langümngeachi toro reque yengei, ti huentru amurumei cheu ñi mülen ti domo, quiñe hueluduam reque traringealu cadena meu ñi castigangeal. 23 Fei quiñe flecha chüngarmaeyeu tañi ponon. Quiñe üñüm lefconlu ti huachi meu reque, ti huentru ngüneduamlai rume ñi femün yeaeyu ñi layal. 24 Feula allcütuen fotüm, cüme ngüneduamnge tañi feipin. 25 Inaquilpe tami piuque feichi domo ñi rüpü. Ñihuiyauquilnge quisu ñi rüpü mu. 26 Feichi domo am rume fentren che ngünencafi, rume fentren che langümfi. 27 Quisu tañi ruca yequefi tati pu che Eltun meu, nagqueingün cheu ñi mülen pu la.