Daniel

10 Petu tañi cudulen cahuitu mu peuman, fei pefiñ quiñe rume fütra alüpürachi anümca rangi Mapu meu mülelu. 11 Ti anümca tremi ca rume nehuen-ngerpui, fei ñi huechuñ puhui huenu meu. Com Mapu püle pengeafui tati anümca. 12 Tañi tapül elalcalefui, fentrenque fün niefui, com che iquefui tañi hulqueel ti anümca. Tati pu culliñ llaufeñtuquefuingün fei mu, pu üñüm mülequefui tañi rou mu. Com müleyelu iquefui fei mu. 13 Petu peumalu iñche tranalelu tañi cahuitu mu, pen quiñe llihuatulelu, quiñe lifngelu, nagpalu huenu meu. 14 Fei huirari: “¡Catrüafimün tati anümca, catrüñmayafimün tañi rou, entuñmayafimün tañi tapül, fill püle huidpücünulleafimün ñi fün! Com tripape tati pu culliñ fei mu, ca pu üñüm tripape ñi rou mu. 15 Huelu elcünufimün tañi mutrung ñi folil engu mapu mu rangiñ cachu meu, fei traricünufimün quiñe pañillhue trarihue meu ca quiñe cobre trarihue meu. Narfüpe tati ilhuen nagpalu callfü huenu meu ca mülepe tati pu culliñ lelfün meu mülequelu. 16 Entuñmangepe tañi piuque, fei tuculelngepe culliñ tañi piuque, che ñi piuque no. Fei rupape regle tripantu fei mu. 17 Tüfa ñi feipiel pu llihuatulelu, ca ti pu lifngelu ñi llellipuel, fei tati pu che ñi quimürpual engün ti Doi Alüpüralelu, Lonco Ülmencülei pu che ñi ngünenien mu, ca quisu elufi pu che tañi dulliel, ca lonco ülmencünufi tati doi ñom piuquengelu pu che meu”. 20 Feichi anümca tami pefiel, tati fütra tremlu ca fütra nehuen-ngerpulu, tañi huechun puhui ta huenu meu, fei pengen-ngefui com mapu meu. 21 Feichi anümca tañi tapül müna adelcalefui ca femngechi niefui fentren fün ñi iyafiel com pu che ca com pu culliñ, quisu tañi miñche meu tati pu culliñ mülequefuingün ca tañi rou meu mongelequefuingün tati pu üñüm. 22 Ca femngechi eimi, ahuem lonco ülmen, falin huentrungeimi ca fütra nehuen-ngerpuimi, tami fütra nehuen-ngen puhui reque ta huenu meu ca tami ngünenien puhui com huall mapu püle, feimu feichi anümca eimi adentucünungeimi. 23 Fei ti lonco ülmen pei quiñe huerquen nagpalu huenu meu, feipimequelu: “Catrütufimün tati anümca ca apümcafimün. Huelu elcünufimün tañi mutrung ñi folil engu mapu mu rangiñ cachu meu, fei traricünufimün quiñe pañillhue trarihue meu ca quiñe cobre trarihue meu. Narfüpe tati ilhuen nagpalu callfü huenu meu ca mülepe tati pu culliñ lelfün meu mülequelu, rupale hula regle tripantu”. 24 Ahuem lonco ülmen, feula feipiayu chem adentulei tami peuma ca chem feipicünui tati Alüpüralelu tami rupayal eimi lonco ülmencülelu. 25 Huemünentungeaimi cheu ñi mülen tati pu che, fei mongelerpuaimi tati pu culliñ engün lelfün meu ca cachutuaimi tati pu toro reque. Tati ilhuen nagpalu callfü huenu meu cültrafaimu ca rupayaingün regle tripantu tami feleal, quimtuculmi hula tati Alüpüralelu ngüneniei itrocom pu che meu ca quisu eluafui tati autoridad inei rume tañi ayünieel tañi ngünenierpual. 26 Huelu chumngechi ñi feipingeel, tati mutrung ñi folil engu elcünungeai, feimu quimtuculmi hula Ngünechen ta ngüneniei huenu meu, eimi elungetuaimi tami lonco ülmen-ngeal. 27 Ahuem lonco ülmen, allcütuñmayafen tañi ngülam. Elcünutunge tami culpan ca femnge cüme dungu. Fentecünunge tami femquen huesaque dungu ca cutranpiuqueyefinge pu pofre. Femülmi, doi alüñmayafui chi tami cümelcalen’”. 29 Mari epu cüyen rupalu, ti lonco ülmen trecatrecatumequefui huente Babilonia ñi ülmen ruca meu. 30 Fei ti lonco ülmen feipimequefui: “¿Tüfa no am tati Fütra Babilonia iñche tañi deumael tañi fütra nehuen meu, femngechi ñi püramyengeal tañi lonco ülmen-ngen?”. 31 Tati lonco ülmen petu feipimequelu tüfachi dungu, quiñe dungun allcüngei huenu meu feipilu: “Ahuem lonco ülmen Nabucodonosor, eimi feipingeimi tüfachi dungu: ‘Tami ngünenien müntuñmangeimi 32 ca huemünentungeimi cheu ñi mülen tati pu che. Fei mongelerpuaimi tati pu culliñ engün lelfün meu ca cachu iyaimi tati pu toro reque. Rupayaingün regle tripantu tami feleal, quimtuculmi hula, tati Alüpüralelu ngüneniei itrocom pu che meu ca quisu eluafui tati autoridad inei rume tañi ayünieel tañi ngünenierpual’”. 33 Feichi meu müten, tüfachi dungu huechurpui Nabucodonosor meu. Fei huemünentungei cheu ñi mülen tati pu che ca eluhui ñi iyal cachu pu toro reque. Tañi cuerpo narfüquefui tati ilhuen nagpalu callfü huenu meu, tañi cal lonco rume tremi, pichuñ ñamcu reque felefui, ca tañi huili fente tremlu huili üñüm reque felefui. 34 “Rupalu feichi medin antü, iñche, Nabucodonosor, lelipüran huenu meu, fei checontun. Ca püramyefiñ tati Alüpüralelu. Poyeniefiñ ca püramyefiñ tati rumel mongelequelu, turpu aflayai tañi ngen-ngen itrocom dungu meu ca tañi ngünenien müleai rumel meu. 35 Tati pu che trürümfalngelai ta Quisu meu, ca quisu femmequei tañi ayüniel tati pu hueichafe mülelu huenu meu ca tati pu che mülelu nag Mapu meu. Inei no rume catrütulayafeyu ñi femal tañi ayünieel, ca inei no rume feipilayaeyeu: ‘¿Chumngelu am femimi tüfa?’. 36 Feichi meu müten checontun, fei huiñoleltungen tañi ngünenien, tañi fütra nehuen-ngen ca tañi püramyen. Tañi pu yamfal cüdaufe ca tañi pu falin huentru pepaeneu engün. Ca huiño ngünenierpun ca doi yamfal huentrungerpun.