Daniel
7 Com tati pu cüdahulquefilu ti lonco ülmen, pu prefecto, pu satrapa, pu falin-ngechi cüdaupelu ti ngünenien mu ca pu ngüneniequelu, quiñehuingün ñi elcünual quiñe huercün dungu cüpalu ti lonco ülmen mu ca tañi feyentungeal quiñe catrütuelchi dungu, fei tüfa: 30 antü mu quiñe che ngillatufile ta chem dios cam huentru rume, ca ngillatunofile ta eimi müten, ahuem lonco ülmen, ütrüftucungepe ti rüngan nielu trapial. 8 Feula, ahuem lonco ülmen, anümcünuafimi ti huercün dungu ca huirintuculelfinge tami üi, fei tañi cacünungetunoal, chumngechi ñi femngen pu medo ca persa ñi ley, catrütungequenolu ñi femngeal”. 9 Fei tati lonco ülmen Darío huirintuculelfi ñi üi ti huercün dungu ca tati catrütuelchi dungu. 10 Fei quimlu müten Daniel ñi elcünungeel ti huercün dungu, amutui ñi ruca mu, tüfa niefui quiñe pieza huenu ruca meu ca ti ventana ad nülalefui Jerusalén püle. Ca cülachi rupa lucutulen ngillatuquefui ca püramyequefui ta Chau Dios, chumngechi ñi femquefel petu ñi rupanon tüfa. 11 Feichi antü meu, tüfeichi pu huentru lef conpurumeingün, fei pefingün ta Daniel petu ngillatumequefilu ta Ngünechen tañi füreneaeteu. 12 Feimu amuingün ñi dunguafiel ti lonco ülmen ca acordalelfingün ñi catrütuqueelchi dungu, feipifingün: “¿Huirintucucünulaimi ama 30 antü mu inei rume ngillatufile caque dios cam huentru eimingenole, ütrüftucungeai rüngan meu cheu ñi mülen pu trapial?”. Fei ti lonco ülmen feipieyeu: “Femngechi felei, chumngechi feipi pu medo ca pu persa ñi ley, ngelai ñi cacünungetual”. 13 Fei engün huiñoldungufemingün tati lonco ülmen: “Daniel tati cüpalngelu Judá mapu meu allcütulaeimu lonco ülmen ca inalafi tami huercüelchi dungu, amülei ñi ngillatun cüla rupa antü meu”. 15 Feimu tüfachi pu huentru quechan conpuingün cheu ñi mülen tati lonco ülmen ca feipifingün: “Acordange ñidol, pu medo ca pu persa ñi ley feipi ngelai ñi cacünungeal ñi feipicünuel ti lonco ülmen”. 17 Fei cüpalngei quiñe cura ca tacungei ti rüngan. Fei ti lonco ülmen marcacünufi tañi anillo mu ca tati anillo ñi nieel pu falinque huentru, femngechi ñi femngeal ta Daniel chumngechi ñi feipicünuel ti lonco ülmen. 21 Pürümquechi Daniel huiñoldungufi tati lonco ülmen: “¡Rumel mongelenge ñidol! 22 Iñche tañi Ngünechen huercüi tañi cüme püllü, ca racümtucuñmafi ñi hun ti pu trapial, fei huesalcalaeneu, nienolu culpan am iñche quisu ñi adquiñ meu, ahuem lonco ülmen, femquelaeyu chem huesa dungu no rume”. 26 Huercün com tañi ngünenieelchi pu che ñi yamnieafiel Daniel tañi Ngünechen. Fei mai ti rumel mongelequeelchi Ngünechen. Ñi ngünenieel chumcaunorume teifücangelayai, rumel ngünenierpuai.