Enero

Timoteo maneluuquefui Chau Dios tañi cüme dungu mu, feimu eluhui tañi hueniyeafiel. Ca femngechi iñchiñ mülei taiñ ngüneduamafiel ta Biblia ca cüme raquiduamal chem quimeltuquei Jehová mu. Quisuque iñchiñ mülei taiñ rüf feyentual cüla falin dungu meu: Quiñe, Jehová ñi deumafiel com tati mülelu (Éx. 3:14, 15; Heb. 3:4; Apoc. 4:11). Epu, Biblia feipilei chem ayüniei Jehová taiñ quimal (2 Tim. 3:16, 17). Cüla, Jehová niei quiñe troquiñche tañi poyequeteu, tati pu Dunguquelu Ineingen Jehová, Cristo adniequeyu engün (Is. 43:10-12; Juan 14:6; Hech. 15:14). Duamfalngelai taiñ quimafiel com tati Biblia. Doi mai cüme raquiduamaiñ chem taiñ feyentuqueel, femngechi maneluhuaiñ ñi rüfngen (Rom. 12:1). w20.07 pag. 10 parr. 8, 9

Ti lifru Apocalipsis nütramcai quiñeque chori “lonco meu niei engün allhue oro corona femngerumelu, fei tañi ange che femngerumei” (Apoc. 9:7). Feichi pu chori quechu cüyen cutrancarqueafulu pu huesaque che “nienolu Ngünechen tañi marca ñi tol meu” (Apoc. 9:4). Feichi dungu adentulei ñi femquen pu dullin cristiano. Quisu engün nehuen piuque mu huldunguqueingün ñi afal com ñi ngünenieel tati Huecüfü, femngechi cutrancaquefingün reque Huecüfü ñi pu inanieteu. Tati chori ñi feipiel Joel adentulei quiñe dungu, huelu tati chori ñi feipiel Apocalipsis ca dungu adentulei. Biblia meu, quiñeque pengelün dungu trüri ta cangelu pengelün dungu ñi feipiel, huelu quiñeque mu adentulei epurume dungu. Feula ngüneduamaiñ quiñe tüfachi pengelün dungu. Ti lifru Apocalipsis feipi Jesús “fei tati trapial reque felelu, tati mülelu Judá” (Apoc. 5:5). Huelu tati lifru Hunen Pedro feipi tati Huecüfü fei ta “ñahuauquiyauchi trapial reque femyaulu” (1 Ped. 5:8). w20.04 pag. 4 parr. 8; pag. 5, parr. 10

Agar cüdahuelquefi ta Sara, huelu huesa femi. Fütayefilu ta Abrahán, niepüñeñi ca illamtufi ta Sara tañi niepüñeñquenon mu. Fente tañi huesa yehun engu, Agar lefmahui (Gén. 16:4-6). Huenche ngüneduamliyiñ müten ñi rupan ta Agar, raquiduamafuiñ ñi huesañmangen, feimu “cümefui tañi femngechi rupayal” piafuiñ. Huelu femngechi raquiduamlai Jehová. Doi mai, Jehová huercüfi quiñe cüme püllü tañi yafültucuafiel. Tüfachi cüme püllü quellufi ta Agar ñi norümtual tañi raquiduam ca cümelcafi. Agar inaduami ñi ngüneduamnieteu Jehová ca ñi quimüñmaeteu com tañi rupamequen. Feimu rüf piuque mu, Agar feipi: “Ngünechen ta peeneu” (Gén. 16:7-13). Jehová quimniefui Agar tañi tuhun ca com ñi rupan cuifi mu. Jehová ayüquelafui Agar ñi illamcayafiel ta Sara, huelu Jehová quimniefui Agar tañi rupan ca ñi chum duamcülen, feimu cutranpiuqueyefi. w20.04 pag. 16 parr. 8, 9

Tati apostol Pablo feipi com iñchiñ taiñ cristianongen amuleiñ quiñe cuden meu reque taiñ poyeafiel ta Jehová (Heb. 12:1, TNM). Feimu com iñchiñ huechengeliyiñ cam füchaleliyiñ rume, mülei taiñ huechutripayal tüfachi cuden meu reque, femngechi taiñ llohual chem taiñ feipicünueteu Jehová (Mat. 24:13). Pablo cüme huechutripai tati cuden meu reque, feimu rüf piuque mu ngülamtueiñmu taiñ ca femngechi femal iñchiñ (2 Tim. 4:7, 8). Huelu, ¿chem cuden am chi mülei taiñ huechutripayal? Cuifi mu, Grecia mapu mu femngequefui fillque aucantun ca cuden, feimu Pablo nütramcai feichi dungu mu (1 Cor. 9:25-27; 2 Tim. 2:5). Fentren rupa Pablo feipi tati pu cristiano amulei reque quiñe cuden meu ñi poyeafiel ta Ngünechen (1 Cor. 9:24; 2 Tim. 4:7). Fautizahun mu pu che, conquei reque tüfachi cuden mu (1 Ped. 3:21, TNM). Ca quimün mu ta che Ngünechen ñi rüf eluaeteu tañi feipicünuel, huechutripaquei reque tüfachi cuden meu (Mat. 25:31-34, 46; 2 Tim. 4:8). w20.04 pag. 26 parr. 1-3

“Ñidol manelfali itrocom ñi dungu meu, feimeu quisu ta quelluaimünmeu tamün nehuentuleal, ca montulnieaimünmeu ti Huecüfü ñi huesaque dungu meu” (2 Tes. 3:3). Chau Jehová elueiñmu com ti hueichahue femngechi taiñ cuñiutucuhual Huecüfü mu (Efes. 6:13; 6:14-17, TNM). Mülei taiñ yenieal com feitachi hueichahue, femngechi müten cüme cuñiutucuhuaiñ. ¿Chem adentulei tati trarihue? Adentulei tati rüf dungu Biblia meu mülelu. Tüfa quelluaiñmu taiñ ngünencanoaeteu tati Huecüfü (Juan 8:44). Fütra cuifi mu eluhui ñi ngünencacheal ca fantepu meu ngünencaquefi “com mapu meu mülechi pu che” (Apoc. 12:9). ¿Chumngechi yenieafuiñ tüfachi trarihue? Quimafiyiñ ti rüf dungu Chau Jehová mu, eluhuaiñ taiñ adnieaeteu Jehová tañi nehuen taiñ cüme serfiafiel ca nor chengeaiñ com dungu meu (Juan 4:24, TNM; Efes. 4:25; Heb. 13:18). w21.03 pag. 26, 27 parr. 3-5

Feichi mapu mu poyengequefui ta Jehová, feimu femngechi üitungequefui. Huelu puulu ti Pentecostés 33 tripantu mu, huall Mapu püle poyengerpui ta Jehová. Feimu feichi adelcalechi mapu ñi feipiel Daniel adentulerpui com ñi chumquen pu rüfngechi cristiano ñi poyeafiel ta Jehová. Tati rey del norte mollquechi malocontuquefi tati “Adelcalechi Mapu”. Segunda Guerra Mundial mu, Alemania tati rey del norte ngefui. Fei caiñetufi ca langümcafi fentren poyequefilu ta Jehová. Femngechi malocontufingün reque tati “Adelcalechi Mapu”. Rupalu feichi fütra hueichan, ti Unión Soviética tati rey del norte ngerpui. Quisu engün caiñetufi Ngünechen tañi pu che ca huemünentufi ca mapu, femngechi malocontufingün reque tati “Adelcalechi Mapu”. w20.05 pag. 13 parr. 7, 8

Inaduamnge ñi rupan quiñeque che hueniyequefilu ta Jehová petu ñi cüpanon Jesús Mapu mu. Abrahán müna feyentuquefui Chau Dios mu. Quiñe huaranca tripantu rupalu rume tañi lan, Jehová “iñche tañi hueni” pieyu (Is. 41:8). Lafule rume tati pu che, Jehová hueni troquinieyu. Abrahán mongelei reque Jehová tañi raquiduam mu (Luc. 20:37, 38). Ca raquiduamnge Job mu. Quiñe antü trahuluucülelu pu cümeque püllü, Jehová feipi fente ñi maneluhun Job mu. Feimu feipi Job feita “quiñe huentru nor piuquengelu püntütripaquenolu, ca yamquefilu ta Chau Ngünechen ca famtripalelu huesaque dungu mu” (Job 1:6-8). Feula raquiduamnge Daniel mu. Quisu 80 tripantu alü camapulefui tañi pu che mu, huelu poyequefi ta Chau Jehová. Füchalelu Daniel, “rume falichi huentru” pieyu quiñeque cümeque püllü. Femngechi pengelingün fente ñi falintunieteu Jehová (Dan. 9:23; 10:11, 19). Jehová rüf ayüniei llemai ñi huiñomongeltuafiel com tañi pu hueni deu lalu (Job 14:15). w20.05 pag. 26, 27 parr. 3, 4

Pu che quimfile Jehová tañi ley dungu müten, rüf piuqueyelayafui ta Jehová, fei inalayafui com tañi ngülam. Raquiduamnge ñi rupan Adán Eva engu. Quisu engu quimniefui Jehová tañi huercün dungu, huelu rüf piuqueyelafi ta Jehová, feimu inalafi tañi feipin (Gén. 3:1-6). Jehová tañi huercün dungu rumel cümelcayafeiñmu (Sal. 119:97, 111, 112). Ñi quimal tüfa, pu che mülei ñi ngüneduamal Jehová hulquei tüfachi ley fente taiñ piuqueyenieteu. Petu enseñalfiliyiñ ta che papeltulu ta Biblia, ramtuafuiñ: “¿Chemu anta Jehová ta feipiqueiñmu taiñ femal ca taiñ femnoal? ¿Chem enseñalqueiñmu Jehová tüfa mu?”. Quellufiliyiñ ta che ñi raquiduamal Jehová tañi fütra üi mu, doi puhuaiñ tañi piuque mu. Femngechi pu che piuqueyeafi ta Jehová ca tañi ley dungu, doi maneluhuai Jehová mu, femngechi doi chaftuafi huesaque dungu rupale engün (1 Cor. 3:12-15). w20.06 pag. 10 parr. 10, 11

Tati pu quiñe püle tripalu Jehová mu alüñmayafui ñi huiñotual engün, feimu duamfali taiñ ñom piuquengeal. Fentren peñi ca lamngen quiñe püle tripalefulu Jehová mu, pemengeingün fentren rupa, feichi mu hula huiñotuingün Jehová mu. Quiñe lamngen Nancy pingei, feipi: “Quiñe lamngen tañi trahunche mu rume quelluqueneu. Quisu tañi hunen lamngen troquiqueneu. Quisu acordaleneu fente tayu cüme rupan cuifi mu. Iñche feipiquefiñ chem ñi mülen tañi piuque meu. Quisu allcütuqueneu ca ngülamtuqueneu. Quisu rüf cüme hueniyeneu ca quelluqueneu chem dungu rume duamniefuli”. Allfülechi che duamniei lahuen tañi cüme duamtual. Ca femngechi hueñancülechi che duamniei tañi cutranpiuqueyengeal, fei tañi doi cüme duamtual. ¿Chumngelu am? Quiñeque peñi ca lamngen huesa duamelngeingün trahunche mu, feimu quiñe püle tripaleingün ca ayülaingün ñi huiñotual Jehová mu. Quiñeque engün huesalcangelu troquiuqueingün, feimu illculeingün. Tüfachi pu peñi ca pu lamngen duamnieingün ñi allcütungeal tañi chum duamcülen. w20.06 pag. 26 parr. 10, 11

Doi famentufilmi huesaque dungu, doi cüdautulayaimi tami femal Jehová tañi ayüqueel. Fillque podngechi raquiduam ñi inaqueel pu che famülque mu, Huecüfü mu cüpai. Feimu famentufilmi feitachi huesaque raquiduam, huehuafimi tati Huecüfü. Jehová müten felei tañi feipial chem ñi femnoafel ta che. Feimu famentuquefiyiñ Jehová tañi üdequeel. Ca culpan mu iñchiñ, ngillatuquefiyiñ ta Jehová, “perdonaen” piquefiyiñ (1 Juan 1:9). Fütra culpaliyiñ, feipiafiyiñ pu loncolelu taiñ quelluaeteu (Sant. 5:14-16). Deu perdonaeliyiñmu Jehová, quisutu culpaulayaiñ taiñ cuifique culpan mu. ¿Chumngelu am? Taiñ Fütra Chau Jehová huli tañi saquin Fotüm taiñ perdonayaeteu. Rüf piuque mu cüme raquiduamtuliyiñ taiñ culpan mu, Jehová rüf perdonayaiñmu llemai. Femngechi quisutu culpaulayaiñ, doi mai ayühunquechi serfiafiyiñ ta Jehová (1 Juan 2:1, 2, 12; 3:19, 20). w20.07 pag. 22, 23 parr. 9, 10 

Fütra cuifi mu, Jehová quisulefui, huelu hueñancüquelafui. Duamnielafui chem no rume ca inei no rume tañi ayüucüleal. Femfule rume, ayüniefui caquelu ñi mongeleal ca ñi ayüucüleal. Feimu fente tañi piuqueyechen mu, eluhui ñi deumayal com tati mülelu (1 Juan 4:19). Hunelu mu, Jehová deumafi tañi Fotüm, Jesús pingelu. Fei “Ngünechen deumai itrocom tati mülelu”, quenü tati pu cümeque püllü (Juan 1:3). Jesús müna ayühulfeyu cüdahual tañi Chau engu (Prov. 8:30). Pu cümeque püllü pefilu com ñi deumael Jehová Jesús engu, tati Mapu ca tati huenu, rume ayüucülefuingün. Biblia feipi pu cümeque püllü ñi püramyefiel ta Chau Jehová deumafilu ti Mapu. Ca femngechi fempelaingün deumafilu itrocom tati mülelu, doyelchi mai deumangelu tati pu che (Job 38:7; Prov. 8:31). Com tañi deumael ta Jehová pengelquei tañi piuqueyechequen ca tañi rume quimün-ngen (Sal. 104:24; Rom. 1:20). w20.08 pag. 14 parr. 1, 2

Chau Jehová deumaeiñmu taiñ piuqueyecheal ca taiñ piuqueyengeal iñchiñ. Feimu üdengeliyiñ, huesa duamcüleafuiñ ca llicayafuiñ chi. Quiñe peñi feipi: “Tañi testigongen mu, pu soltau hulelcaeneu, lucatueneu ca aneltueneu. Feimu llicalefun ca yehuelcangefun” pi taiñ peñi. Huesa duamqueiñ taiñ üdengen mu, huelu afmatulquelaeiñmu. ¿Chumngelu? Jesús feipicünui taiñ üdengeal. Jesús reque, iñchiñ coneltuquelaiñ tüfachi Mapu tuhun pu che meu, feimu üdengequeiñ (Juan 15:17-19). Yamniefiyiñ rume pu gobierno, huelu coneltuquelaiñ politico dungu mu, poyelafiyiñ ti bandera ca ülcantuquelaiñ tati himno nacional. Iñchiñ serfiniefiyiñ Chau Jehová müten. Quimnieiñ Jehová müten ngünenieafilu ta com pu che feimu quelluntucuqueiñ, huelu Huecüfü ca tañi pu inaniequeteu ayüqueingün ñi catrütuafiel ta Chau Jehová (Gén. 3:1-5, 15). Enseñachequeiñ Jehová ñi Gobierno müten cüme elcünutuafi ti Mapu ca apümcayafi tañi pu caiñetuqueteu (Dan. 2:44; Apoc. 19:19-21). Tüfa ta cümeque noticia tati ñom chengelu, huelu huesaque noticia tati norngenolu. w21.03 pag. 20 parr. 1, 2  

Jehová falintuquefi pu lamngen, feimu eluquefi falinque cüdau ti trahunche mu. Fentren tüfachi pu domo quimchengei, maneluuquei Chau Dios mu, cüdaufengei, fütra piuquengei, fürenechequei ca cümelcachequei (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). Ca femngechi rume falintuquefiyiñ pu füchaqueche mülelu taiñ trahunche mu. Fentren tüfachi pu peñi ca pu lamngen cutrancüleingün tañi füchan mu. Femfule rume, chumqueingün rume tañi amuldungucheal ca eluuqueingün ñi yafültucuafiel ca pepicayafiel pu peñi ca pu lamngen. Fentren quimeltun entuafuiñ feitachi füchalechi peñi ca pu lamngen mu. Jehová rume falintuqueyu engün, iñchiñ ca falintuquefiyiñ (Prov. 16:31). ¿Pu huechequeche cai? Feitachi Mapu ngünenieteu am tati Huecüfü, pu huechequeche fill püle famtuculelngei huesaque dungu, feimu cüdautuqueingün ñi femnoal Jehová tañi üdequeel. Cüdaungefule rume, tüfachi pu huechequeche eluuqueingün tañi amuldungual, coneltual trahun mu ca incañpequefi tañi feyentun. Taiñ pefiel tüfa, rume yafültucuqueiñmu. Eimün pu hueche, rume falin-ngeimün Jehová tañi troquiñche mu (Sal. 8:2). w20.08 pag. 21, 22 parr. 9-11

Eluulu iñchiñ taiñ amuldungual Jehová tañi cümeque dungu, taiñ pu che caiñetuafeiñmu, ayentuafeiñmu, ca quiñeque che piquelai taiñ allcütuaeteu. ¿Chumngechi doi nehuen piuquengeafuiñ? Rüf maneluucüleaiñ Jesús ñi adniequen taiñ amuldungun cüdau (Juan 16:33; Apoc. 14:14-16). Doi maneluucüleaiñ Jehová taiñ cuidanieaeteu (Mat. 6:32-34). Doi maneluuliyiñ Jehová mu, doi nehuen piuquengeaiñ. Eimi feipifilu tami pu che tami chillcatuquen Biblia ca tami amuquen trahun mu, pengelimi tami fente maneluhun Chau Dios mu. Cafei cüme adcünutuimi tami mongen, fei tami inayal Jehová tañi ngülam. Femlu eimi, pengelimi tami nehuen piuquengen ca tami maneluhun Jehová mu. Doi nehuen piuquengelmi, doi maneluucüleaimi tami afcadinieaeteu Jehová “cheu rume tami amuquen” (Jos. 1:7-9). w20.09 pag. 5 parr. 11, 12

Asá com piuque mu maneluhui Jehová mu, feimu inayentufali. Poyefi ta Jehová cüme rupalen mu cam huesa rupalen mu. “Asá com ñi mongen meu poyefi ta Jehová com tañi piuque mu” (1 Rey. 15:14). Feimu apümcafi tati coilaque religion müleyelu Judá mapu mu. Feimu Biblia feipi Asá apümcafi ti mülehue cheu ñi poyengequeel pu coilaque dios, huatrocafi tati pu poyequeelchi orcon, ca catrüfi pu poyengequeelchi mamüll (2 Crón. 14:3, 5). Ca famentufi ñi cucu ñi ülmen domongenoal. ¿Chemu am? Feitachi domo feipiquefi ti pu che ñi poyeafiel engün quiñe coila dios (1 Rey. 15:11-13). Felei llemai, Asá apümcafi tati coilaque religion, huelu ca femngechi quellufi tati pu israelche ñi huiño poyetuafiel ta Jehová. Feimu Jehová cümelcafi ta Asá ca tati pu israelche. Elufi ñi hueichangenoal engün. Petu ngünenielu Asá, mari tripantu hueichangelaingün (2 Crón. 14:1, 4, 6). w20.09 pag. 14 parr. 2, 3

Quiñeque mu elfalcünuqueiñ taiñ niequeel taiñ cuidalelngeal. Tripan mu iñchiñ, quiñeque mu feipiquefiyiñ quiñe hueni cam quiñe pariente taiñ cuidalelaeteu taiñ ruca. Femlu iñchiñ, maneluucüleiñ taiñ cüme cuidalelngeal, “chem no rume hueñeñmangelayaiñ” piqueiñ. Pablo feipifi ta Timoteo ñi elungen falinque dungu, ñi quimafiel chem ñi ayüqueel ta Chau Ngünechen ca ñi quimeltucheal feitachi cümeque dungu (2 Tim. 4:2, 5). Cafei Pablo feipifi ta Timoteo ñi falintuafiel tañi elfalcünungeel. Timoteo reque, iñchiñ ca femngechi elfalcünungeiñ falinque dungu. Chau Jehová piuqueyenquechi elueiñmu taiñ cüme quimafiel chem pin ta Biblia. Com ñi quimeltuqueel ta Biblia rume falin-ngei. ¿Chemu am? Biblia quimeltuqueiñmu chumngechi taiñ hueniyeafiel ta Jehová ca chumngechi taiñ rüf ayüucüleal. Inafiel mu Biblia ñi feipin, ngünencangequelaiñ coilaque quimeltun mu ca lif mongen yeniequeiñ (1 Cor. 6:9-11). w20.09 pag. 26 parr. 1-3

Pengelelafiyiñ tati estudiaquelu iñchiñ taiñ falintuquefiel ca rüf feyentuquefiel Biblia ñi quimeltun, femngechi ti estudiaquelu doi falintuafi tañi quimürpuel Biblia mu. Ca feipiafuiñ chumngechi taiñ quelluqueteu Biblia tañi ngülam, femngechi “iñche ca quelluafeneu Biblia” piafui tati estudiaquelu. Nütramelqueafiyiñ pu estudiaquelu Biblia ñi chem chumün quiñeque peñi ca lamngen rupalu ca femngechi dungu meu. Trahunche mu fentren peñi ca lamngen rume cüme quelluafui tati estudiaquelu Biblia, feimu feipiafiyiñ taiñ compañaeteu. Quelluafiyiñ ti estudiante ñi quimürpual fente ñi cümen ñi inangeal Biblia tañi ngülam. Curengele cam fütangele tati estudiamequelu, ca cümeafui tañi ca estudiayal tañi afcadi. Feimu mangelafuiñ tañi conpayal petu taiñ estudiamequen. Ca feipiafuiñ tati estudiaquelu ñi nütramelafiel tañi pu che ca tañi pu hueni chem tañi quimürpuel (Juan 1:40-45). w20.10 pag. 16 parr. 7-9

José María engu cüme tremümfingu ta Jesús, quellufingu tañi cüme hueniyeafiel ta Jehová. ¿Chem quellueyeu? Quisu engu femi chem ayüquei Jehová ñi femal com pu chau ca pu ñuque (Deut. 6:6, 7). José María engu rume piuqueyequefui ta Jehová, feimu eluhuingu ñi quelluafiel tañi pu pichiqueche ñi ca femngechi femal. José María engu, eluhuingu ñi poyenieafiel ta Jehová com tañi pu che engün. Fill semana amuquefuingün trahun Nazaret huaria mu. Ca fill tripantu quiñe rupa amuquefuingün Jerusalén huaria mu ñi fiestañmayal ti Pascua (Luc. 2:41; 4:16). Petu amulelu engün Jerusalén huaria mu, José María engu enseñapelafi com tañi pu pichiqueche ñi rupan Jehová tañi pu che. Cafei quimürpupelafingün quiñeque mapu nütramcangelu ta Biblia mu. José María engu doi nierpuingu ta familia, feimu doi cüdautupelaingün ñi doyümafiel Jehová tañi dungu. Huelu femürpuingün llemai, feimu hueniyeniefingün ta Jehová. w20.10 pag. 28 parr. 8, 9

Mangelngelmi tami enseñachemeal, cümeafui tami ngüneduamal ti troquiñ tamün estudiayal. Quiñe peñi, Darío pingelu, feipi: “Rume mañumniefiñ ñi pepicahun tañi compañ, femngechi doi cüme entuquei tañi feipin” pi taiñ peñi. Cafei tati quimeltuchefe ca tati compañ cüme pepicaucülele, tati estudiaquelu inayentuafeyu. Cüme pepicaunofulmi rume, ngüneduamafuimi tati doi falinque dungu mülelu ti troquiñ mu. Estudiayam rume falin-ngei hune ngillatual. Feimu feipingelmi tañi ngillatucünual, cüme raquiduamaimi tami chem pial tami ngillatun meu. Femngechi tami ngillatun meu, doi cüme quelluafimi ti estudiaquelu (Sal. 141:2). Quiñe domo, Hanae pingelu, piuquentucuniefi ñi llellipuel quiñe lamngen compañfilu tañi enseñaleteu. Fei feipi: “Quimfali ti lamngen ñi cüme hueniyefiel Jehová, fei iñche ca ayüfun ñi inayentuafiel. Üituquefeneu tañi ngillatun meu, fei quimün tañi piuqueyenieteu” pi tati domo. w21.03 pag. 10 parr. 7, 8

Jesús feipifi ta Pablo ñi puhual ta Roma. Huelu quiñeque judio Jerusalén mülelu ayüfui ñi langümafiel ta Pablo. Ti comandante Claudio Lisias pingelu allcüi chem ñi pepicanieel tati pu judio, feimu eluhui ñi quelluafiel ta Pablo. Feimu huercüfi quiñeque hueichafe ñi cuidayafiel ta Pablo, femngechi Pablo yengei ta Cesarea mu. Cesarea huaria mu, ti gobernador Félix pingelu huercüi ñi incañpengeal ta Pablo “Herodes tañi ülmen ruca meu”. Feimu pu judio huesalcalayafuingün ta Pablo feichi mu (Hech. 23:12-35). Fei Félix elcünutui ñi gobernadorcüleal, fei gobernadorngetui Festo. Festo ayüi “ñi cümelcaucüleal ti pu judio engün”. Feimu ramtufi ta Pablo: “¿Cüpa amuimi am ta Jerusalén, üyeu tañi inaramtumeal iñche eimi tami dungu?”. Pablo quimniefui tañi langümngeafel ta Jerusalén mu. Feimu Pablo feipifi ta Festo: “Iñche duamtun tati emperador tañi inaramtulaeteu ñi femelchi dungu”. Feimeu Festo ta feipieyu: “Eimi am deu feipilu tati emperador tami inaramtuaeteu, tati emperador meu ta amuaimi”. Ñi dulliel ta Festo, montulfi ta Pablo tañi pu caiñe mu (Hech. 25:6-12). w20.11 pag. 13 parr. 4; pag. 14 parr. 8-10

Quiñeque peñi, lamngen huesa duamelqueyu ñi huesa femün petu ñi quimnofiel ti rüf dungu. Caquelu cai, huesa duamelqueyu ñi femün deu fautizaucülelu (Rom. 3:23). Ayünieiñ taiñ femal Jehová tañi ayüqueel, huelu ‘com iñchiñ ta rume culpaqueiñ’ (Sant. 3:2; Rom. 7:21-23). Cüme duamelquelaeiñmu taiñ culpatuhual. Huelu quelluafeiñmu taiñ cümecünutual taiñ mongen, fei eluhuaiñ taiñ huesa femhuenoal (Heb. 12:12, 13). Quiñeque mu arrepentiutuliyiñ rume, perdonaeliyiñmu rume ta Jehová, amuleafui taiñ culpatuhun. Huesalcayafeiñmu feichi culpatuhun (Sal. 31:10; 38:3, 4). Huelu ngelai taiñ fente huesa duamcüleal taiñ femün mu. ¿Chumngelu? Amulele taiñ huesa duamcülen, fentecünuafuiñ taiñ serfiafiel ta Jehová, fei Huecüfü rume ayühuafui (ca ngüneduamafuimi 2 Corintios 2:5-7, 11). w20.11 pag. 27 parr. 12, 13

Ti huirintuculu ti Salmo 73 levita tuhun-ngefui. Fei ütrirpufi tati pu huesaque che ca ti pu mallmangelu, feimu huesa duamcülefui. Ütrirquelafi ñi huesaque femquen engün, doi mai ütrirquefi tañi cüme felen mu engün (Sal. 73:2-9, 11-14). Feitachi huesaque che riculequefui. Tüfachi levita mülefui ñi inayal Jehová tañi raquiduam, femngechi tañi huesa duamcülenoal ca ñi ütrirnoafiel pu huesaque che. Femlu tüfa, tüngduamtui ca ayüucületui. Feimu ti levita feipifi hula ta Jehová: “Tayu hueniyehun mu, ca chem no rume duamnielan Mapu mu”. Iñchiñ ngelai taiñ ütrirafiel cüme felen yenielu reque pu huesaque che. Afai tañi ayühun engün (Ecl. 8:12, 13). Ütrirfiliyiñ, huesa duamafuiñ ca hueniyehuelayafuiñ ta Jehová. Feimu ütrirpufiliyiñ pu huesaque che, inayentuafiyiñ ñi femün ti levita. Allcütuñmayafiyiñ ñi ngülam ta Jehová ca quiñentrür müleaiñ taiñ pu peñi ca pu lamngen iñchiñ. Feichi piuqueyefiliyiñ ta Jehová com taiñ piuque mu, feita rüf ayühun nieaiñ ca amuleaiñ tati rüpü mu taiñ yeaeteu “tati rüfngechi mongen” meu (1 Tim. 6:19). w20.12 pag. 19, 20 parr. 14-16

Llellipun mu feipifiliyiñ ta Jehová taiñ fill raquiduamcülen, ca cümeafui taiñ mañumtuafiel. Rupaliyiñ rume huesaque dungu, cümei taiñ loncontucual com tati cümeque dungu taiñ nieel. Quiñeque mu quimlayafuiñ chumngechi feipiafiel ta Jehová chem taiñ raquiduamcülen. Huelu loncontucuaiñ, “quelluen” pifiliyiñ rume, Jehová allcütuaiñmu (2 Crón. 18:31). Maneluulayaiñ quisu taiñ quimün mu, doi mai Jehová mu. Isaías ñi antü mu pu judio llicalefui ñi lefcontuaeteu pu asirio. Pu judio pilafui ñi malocontuaeteu pu asirio, feimu feipimefingün pu egipcio ñi quelluaeteu (Is. 30:1, 2). Chau Jehová feipifi pu judio ñi huesa tripayal engün maneluufule pu egipcio mu (Is. 30:7, 12, 13). Jehová adniefi ta Isaías ñi feipiafiel pu judio chumngechi ñi nehuentual. Chau Jehová feipi: “Tüngcülelmün ca maneluucülelmün ta iñche meu nehuentuleaimün” (Is. 30:15b). w21.01 pag. 3, 4 parr. 8, 9

Quiñeucülen Jesús engün, pu dullin cristiano rey ca sacerdotengerpuaingün (Apoc. 20:6). Jehová, Jesús ca pu cümeque püllü rume ayühuaingün ñi quiñeucüleal com pu dullin cristiano huenu mu. Feula Juan pei cangelu fütra troquiñche mongetripalu Armagedón mu. Doi alün-ngeingün ti pu 144.000 mu, pepi raquifal-lai (Apoc. 7:9, 10). Tüfachi fütra troquiñche “tucutuucülei engün fülang tacuhun”. Mapu mu coneltulaingün huesaque femün mu, femngechi liftuucüleingün. Nor piuque mu serfiquefingün ta Jehová ca Jesús (Sant. 1:27). Ayühun mu huiraringün ñi montuleteu Jehová ca Jesús. Nünieingün tapül palmera, femngechi pengelqueingün ñi eluucülen ñi ngünenieaeteu Jesús, Jehová ñi dullielchi Rey (ca ngüneduamafuimi Juan 12:12, 13). w21.01 pag. 15, 16 parr. 6, 7

Pu huentru mülei ñi inayentuafiel ta Jehová ca Jesús, fei ñi cüme loncoleal tañi familia mu. Por ejemplo, mülei ñi ñom piuquengeal. Jehová com quimün niei, huelu ñom piuquengei, feimu allcütuquei chem pin tañi pu poyequeteu (Gén. 18:23, 24, 32). Raquiduamnge tüfa: Jehová loncolei pu cümeque püllü mu, huelu fente ñi ñom piuquengen ramtuquefi ñi feipiaeteu chumngechi doi cümeafui ñi femal quiñe dungu (1 Rey. 22:19-22). Jehová huelulcauquelai, huelu esperaquelai taiñ turpu huelulcaunoal. Doi mai quelluqueiñmu ñi cüme tripayal taiñ mongen (Sal. 113:6, 7). Feimu ti rey David feipifi ta Jehová: “Eimi ta iñche ñi quelluqueteu” (Sal. 27:9; Heb. 13:6). David quimniefui Jehová tañi ñom piuquengen mu quelluqueyu ñi femal com tañi cüdau. Jesús loncolefui ca ñidolcülefui tañi pu discipulo mu, huelu ñom piuquengefui. Feimu cüchañmafi tañi namun engün. Jesús feipi: “Iñche ta eluhuiyiñ quiñe cüme inayentufalchi dungu, fei eimün tamün ca femngechi piuqueyehual chumngechi femün ta iñche” (Juan 13:12-17). Fente autoridad niefulu rume ta Jesús, feipiyahulquelafui ñi poyengeal, doi mai rüf poyechequefui (Mat. 20:28). w21.02 pag. 3, 4 parr. 8-10

Eimün pu hueche peñi rume quelluafuimün trahunche mu. Fentren eimün nehuen nieimün ca yafüluucüleimün. Feimu eimi hueche, ayüafuimi chi tami siervo ministerialngerpual, huelu raquiduamafuimi chi: “Caquelu peñi ca lamngen trahunche mu raquiduamquei rume huechengen iñche ca ñi pepicaucülenon tañi elfalngeal falinque cüdau”. Huechengefulmi rume, fillque dungu femafuimi tami manelfalchengeal ca yamfalchengeal tami trahunche mu. Eimün cai pu hueche, ¿chem dungu meu adümuucüleimün? ¿Chumngechi quelluafuimün tati pu peñi ca pu lamngen trahunche mu? Raquiduamnge tüfa: tati pu peñi ca pu lamngen doi putremcülelu trahunche mu doi cüdautuafuingün ñi cüme adümafiel tati electronico chemcün. Huelu eimi cüme adümfimi, feimu quellufilmi, ayühulafimi engün. Elfalcünungelmi chem cüdau rume, com tami mongen mu ayühulafimi tami Chau Jehová. w21.03 pag. 2 parr. 1, 3; pag. 7 parr. 18

Ti domo niele doi educacion rume tañi füta mu, ti füta mülei ñi adnieafiel ñi familia ñi poyeafiel ta Jehová (Efes. 6:4). Ti domo eluucülei ñi adnieaeteu ñi füta, huelu mülei ñi quisu eluhual ñi doi hueniyeafiel ta Jehová. Mülei ñi elantücünual ñi papeltual Biblia ca ñi raquiduamal. Femle tati domo, yamnieafi ca piuqueyenieafi ta Jehová, fei ayühunquechi eluucüleai ñi adnieaeteu ñi füta. Pu lamngen ñi piuqueyefiel mu ta Jehová eluule ñi adnieaeteu tañi füta, doi ayüucüleaingün. Huelu pu domo femnole, ayüucülelayafui. Taiñ pu lamngen eluule ñi adnieaeteu ñi füta, inayentuafeyu pu huecheque huentru ca pu üllchaque domo. Cafei quelluconcüleingün ñi tüngcüleal tañi familia ca tañi trahunche mu (Tito 2:3-5). Famülque mu doi alün-ngei pu domo Jehová tañi troquiñche mu (Sal. 68:11). w21.02 pag. 13 parr. 21-23

Ti apostol Pablo nehuencülefui rupan mu huesaque dungu, feimu inayentufali. Quiñeque mu Pablo yafüngehuelafui, huelu maneluuquefui Jehová ñi eluaeteu nehuen, feimu cüme chaftuquefi com tañi huesa rupan (2 Cor. 12:8-10, TNM; Filip. 4:13, TNM). Ca femngechi iñchiñ ñom piuque mu maneluhuaiñ Jehová taiñ quelluaeteu, femngechi nehuencüleaiñ (Sant. 4:10). Rupan mu huesaque dungu, turpu raquiduamlayaiñ Jehová taiñ castigamequeteu. Santiago feipi: “Rupan mu huesaque dungu, inei no rume ngelai ñi feipial: ‘Chau Ngünechen elueneu huesaque dungu tañi ngüneduamaeteu’. Chau Ngünechen ngüneduamngequenolu am huesaque dungu mu, ca quisu ta inei no rume eluquelafi huesaque dungu tañi ngüneduamafiel” (Sant. 1:13, TNM). Rüf maneluuliyiñ Jehová taiñ castiganoeteu, doi cüme hueniyeafuiñ (Sant. 4:8). Chau Jehová “ta rumel felequei müten, quisu meu ngelai ñi hueluletual chem dungu no rume” (Sant. 1:17). Jehová quelluquefi tati pu hunenque cristiano, fei ca femngechi quelluaiñmu ta iñchiñ famülque mu. Com piuque mu llellipuafiyiñ ta Jehová: “Eluen ta quimün, quelluen ñi doi maneluhual eimi mu ca nehuen piuquengeal” piafiyiñ. Jehová allcütuaiñmu llemai. w21.02 pag. 31 parr. 19-21

Tami estudiaquelu Biblia fentecünunole tañi trahuluhual, duamnieafimi (Filip. 2:4). Eluhuafuimi tami doi cüme quimafiel. Saquiafuimi ñi cüme inaniefiel mu Biblia ñi ngülam. Ramtuafuimi: “¿Chum amulei tami estudio? ¿Chumlei tami pu che? ¿Chum amulei tami cüdau?”. Huelu cuñiutuunge tami yehuelnoafiel tami feipin mu. Femngechi nütramcahun mu doi cüme hueniyehuaiñ. Fei tüfa rume quelluafui tati estudiaquelu ñi fautizahurpual. Ti estudiaquelu doi cüme yeniele tañi mongen, quelluafimi ñi ayüucüleal tañi coneltulen trahunche mu. Tami femal tüfa, mangelafuimi tati estudiaquelu tamu cüme rupaleal ca trür amuldungual (Heb. 13:2). Inaduamnge ñi feipin taiñ peñi Diego, feipi: “Fentren pu peñi mangeleneu trür amuldungual. Femngechi doi cüme quimürpufiñ engün. Ca quimeleneu fentren dungu, fei tüfa quellueneu ñi doi cüme hueniyeafiel Jehová ca Jesús” pi taiñ peñi. w21.03 pag. 12 parr. 15, 16

Jesús feipieiñmu taiñ piuqueyeafiel taiñ pu caiñe (Mat. 5:44, 45). Quisu taiñ nehuen mu, rume cüdaungeafui. Huelu Jehová tañi nehuen mu femafuiñ tüfa. Llouliyiñ Jehová tañi nehuen, piuqueyechefengeaiñ, nieaiñ ta paciencia, fürenecheaiñ, ñom duamngeaiñ ca quim ngüneniehuaiñ (Gál. 5:22, 23, TNM). Femngechi chengeliyiñ, nehuencüleaiñ üdengen mu rume. Fentren pu che ngüneduamingün ñi cüme chengen tañi afcadi, tañi pu yall, tañi püñeñ ca tañi carucatu che, feimu fentecünuingün taiñ caiñetueteu. Fentren fei engün feula taiñ peñi ca lamngen-ngetuingün. Feimu cüdautuliyiñ taiñ piuqueyeafiel taiñ pu caiñe, llellipuafiyiñ Jehová taiñ eluaeteu ñi nehuen (Luc. 11:13). Loncontucuaiñ: siempre doi cümei inayal Chau Jehová tañi ngülam (Prov. 3:5-7). Piuqueyehun doi nehuen-ngei ta üdehun mu. Piuqueyefiliyiñ taiñ pu caiñe, caiñetuhuelayafeiñmu chi. Cafei ayühulafiyiñ ta Jehová. Huelu amulele taiñ üdeeteu taiñ pu caiñe, iñchiñ ayüucüleaiñ. w21.03 pag. 23 parr. 13; pag. 24 parr. 15, 17

Ti profeta Joel pengeli tati chori adentulei ñi femürqueafel quiñe troquiñ hueichafe (Joel; 2:1, 8, 11). Jehová feipi ñi adnieafiel quiñe “troquiñ hueichafe”, fei ñi castigayafiel pu israelche tañi feyentunoeteu. Feichi troquiñ hueichafe Babilonia tuhun-ngei (Joel 2:25). Quisu engün conpuingün ta Israel picun mapu püle, feimu ti lifru Joel feipi tati pu chori ñi cüparqueafel picun püle (Joel 2:20). Feichi troquiñ hueichafe trürümngeafui ta quiñe fütra llamllam chori cüme adümuucülelu. Feimu Joel feipi caque quiñeque hueichafe “inaqueingün quisuque ñi rüpü”. ‘Hunhunconqueingün huaria meu. Püraqueingün ñi conpual tati ruca meu, fei conpuqueingün tati fentana mu chumngechi ñi conpuquen pu hueñefe’ (Joel 2:8, 9). Tüfa raquiduameleiñmu ñi femün pu babiloniache. Fill püle mülerquefui ta hueichafe, ca cheu rume mülehuelafui tañi ellcahuam pu israelche, inei no rume montulai tati pu hueichafe meu. Babilonia ñi pu hueichafe, caldeo ca feipingequei. Tüfa engün chori reque, conpuingün Jerusalén huaria meu 607 tripantu meu petu ñi mülepanon Jesús. Biblia feipi: ‘Ngünechen huercüfi pu caldeo ñi lonco, femngechi ñi apümcayafiel feichi pu israelche. Pichi no rume ngünayelafi tati pu hueche ca tati pu üllchaque domo ca pu putremche ca pu cutrancülelu no rume’ (2 Crón. 36:17). w20.04 pag. 5 parr. 11, 12