Febrero

Inayentuafiyiñ ta Jehová, eluhuaiñ taiñ doi cüme quimafiel taiñ pu peñi ca pu lamngen. ¿Chumngechi femafuiñ? Petu ñi con-non ti trahun, nütramcayafiyiñ engün. Ca femngechi femaiñ fentepun mu ti trahun. Ca trür amuldunguaiñ. Ca mangelafuiñ tañi imeal taiñ ruca mu. Femliyiñ, doi cüme quimürpuafuiñ taiñ pu peñi ca pu lamngen. Quiñe lamngen hueniyefalnolu quechileafui, huelu quimürpuafuiñ ñi yehuenchengen müten. Quiñeque peñi pütrün plata niefui chi, huelu cüme quimürpufiliyiñ, quisu müna quelluchequei. Quiñe lamngen rumel tarde acuquei trahun mu, huelu cüme quimürpufiliyiñ, inaduamafuiñ ñi huesa rupalen tañi ruca mu (Job 6:29). Cümei taiñ quimal chem rupamequen pu peñi, pu lamngen. Huelu cuñiutucuhuaiñ taiñ rume con-noal quisu engün ñi dungu mu (1 Tim. 5:13). Quiñeque mu nüngaituafuiñ ñi femün quiñeque peñi ca quiñeque lamngen. Huelu cümeafui taiñ quimüñmayafiel chem ñi rupan tañi mongen mu, femngechi doi cutranpiuqueyeafuiñ. Feimu yafüluhuaiñ taiñ cüme quimafiel ca piuqueyeafiel com taiñ pu peñi ca pu lamngen, femngechi inayentuafiyiñ ta Jehová, quisu am piuqueyeniefilu ta “com che” (1 Tim. 2:3, 4; 2 Cor. 6:11-13, TNM). w20.04 pag. 16, 17 parr. 10-12

Feichi pun, petu ñi langümngenon ta Jesús, feipifi tañi pu inanieteu ñi hueluconque piuqueyehual engün. Jesús quimniefui femngechi piuqueyeule engün, quiñeucüleafuingün ca nehuencüleafuingün üdengen mu rume. Raquiduamaiñ ñi femün pu cristiano Tesalónica meu mülelu. Hue eluulu ñi trahuluhual engün, inacangeingün. Huelu pu peñi ca pu lamngen rume piuqueyehuingün ca yafüluhuingün (1 Tes. 1:3, 6, 7). Pablo ca ngülamtueyu ñi doi piuqueyehual (1 Tes. 4:9, 10). Hueluconque piuqueyeule engün, eluhuaingün ñi yafültucuafiel pu hueñancülelu ca quelluafiel pu duamnielu ta quellu (1 Tes. 5:14). Pu cristiano mülelu Tesalónica meu, inafingün Pablo ñi ngülam. Feimu rupalu quiñe tripantu peno, Pablo ca huirintucueyu ca saquieyu fente tañi piuqueyehun engün (2 Tes. 1:3-5). Tañi piuqueyehun engün quellueyu ñi cüme chaftuafiel tañi huesa rupan ca tañi inacangen engün. w21.03 pag. 22 parr. 11

Taiñ elungeal ta rumel mongen, mülei taiñ inayal Jehová tañi cüme rüpü (Hech. 20:24; 1 Ped. 2:21). Huelu tati Huecüfü ca tañi pu inanieteu, ayüniei taiñ inayal quisu engün “ñi huesaque huimtun” (1 Ped. 4:4). Quisu engün pefiel mu chumngechi taiñ yeniequeel taiñ mongen, ayentuqueiñmu. Ca feipiqueingün: “Iñchiñ rüf lifreleiñ, feimu doi ayüucüleiñ”. Huelu, ¡re coila tati! (2 Ped. 2:19). Tati Biblia feipi mülei quiñe cüme rüpü ca quiñe huesa rüpü. Tati cüme rüpü pichi rupai, yequefi tati pu che tati rumel mongen. Tati huesa rüpü alü rupai, yequefi tati pu che ñi apümcangeal engün. Rume fentren che amulei feichi huesa rüpü mu (Mat. 7:13, 14). Tati Huecüfü ayüfui taiñ püntünentuaeteu tati cüme rüpü mu, fei taiñ inayal tati huesa rüpü. Feimu taiñ amuleal tati cüme rüpü mu, maneluhuaiñ Jehová mu ca allcütuafiyiñ. w20.04 pag. 26 parr. 1; pag. 27 parr. 5, 7

Famülque mu, Rusia ca tañi pu quelluqueteu malocontufingün reque tati “Adelcalechi Mapu”, ¿chumngechi am? (Dan. 11:41). 2017 tripantu mu, Rusia catrütufi taiñ pu peñi ca pu lamngen ñi amuldunguhuenoal engün ca carceltucufi quiñeque engün. Ca eluhuelafi ñi nieal engün taiñ revista, lifru ca tati Traducción del Nuevo Mundo no rume. Müntufingün ta Betel ca fillque trahunhue ruca. Feimu llemai, 2018 tripantu mu tati Cuerpo Gobernante feipi Rusia ca tañi pu quelluqueteu tati rey del norte ngerpuingün. Huelu iñchiñ poyequefiyiñ ta Jehová, feimu chaftuquelafiyiñ pu gobierno chumllefeliyiñmu rume. Doi mai, ngillatuquefiyiñ ta Jehová tati pu autoridad taiñ catrütunoaeteu taiñ poyeafiel. w20.05 pag. 14 parr. 9

Eimün pu chau, pu ñuque, ayüniepelaimün tamün pu yall ñi serfinieafiel ta Jehová. Tañi femal engün, mülei tañi cüme hueniyeafiel ta Jehová ca maneluhual ñi rüf feipiquen tati Biblia. Pu chau, pu ñuque mülei ñi cüme ngüneduamafiel tati Biblia, femngechi tamün pu yall, tamün pu püñeñ tamün inayentuaeteu, fei cüme quimürpuafuingün ta Jehová. Elantücünuaimün tamün raquiduamal chem tamün chillcatuqueel, femngechi quimeltulelafimün tamün pu yall ñi ca femngechi femal. Quimeltulelafimün tamün pu yall, tamün pu püñeñ ñi adümafiel ti pagina INTERNET MÜLEYECHI LIFRU Watchtower^™, JW Library ca fillque lifru ca video ñi quelluaeteu tañi doi cüme quimafiel ta Biblia. Femngechi tamün pu yall, tamün pu püñeñ piuqueyerpuafuingün ta Jehová ca maneluhuafuingün Jehová ñi adniequefiel ti “quim manelfal cona”, esclavo fiel y prudente pingei huinca dungun mu. Femngechi Jehová quimeltuqueiñmu com taiñ duamnieel (Mat. 24:45-47, TNM). Quimeltuafimün tamün pu yall, tamün pu püñeñ ti doi duamfalngechi quimeltun Biblia mu mülelu. Huelu fei ca müten no, ca femngechi quelluafimün ñi ngüneduamal caquelu fütraque quimeltun mülelu Biblia mu. Tami femngechi femal, loncontucunieaimi tunten tripantu ñi nieel tami pu yall ca tunte ñi adümuhun-ngen (1 Cor. 2:10). w20.07 pag. 10 parr. 10; pag. 11 parr. 12, 13

Famülque mu, fentren pu che cüme hueniyefi ta Jehová. ¿Chumngechi hueniyerpuafuiñ ta Jehová? Jesús huli tañi mongen, fei taiñ perdonangeal taiñ culpan. Feimu mülei taiñ feyentual Jesús tañi lan mu. Ca mülei taiñ hultucual taiñ mongen Jehová mu ca fautizahual. Femngechi müten hueniyerpuafuiñ ta Jehová. ¿Chumngechi falintuafuiñ taiñ hueniyefiel ta Jehová? Mülei taiñ inayentuafiel ta Abrahán ca Job, quisu engu doi pataca tripantu nor piuque mu serfiquefi ta Jehová. Tunten tripantu yenieliyiñ rume taiñ serfiquefiel ta Jehová, iñchiñ ca femngechi femafuiñ. Ca inayentuafuiñ ta Daniel. Turpu fentecünulayaiñ taiñ poyequefiel ta Jehová, latripafuliyiñ rume (Dan. 6:7, 10, 16, 22). Jehová tañi quellun mu, chaftuafuiñ chem huesa dungu rume rupaliyiñ. Femngechi turpu aflayai taiñ hueniyefiel ta Jehová (Filip. 4:13, TNM). w20.05 pag. 27 parr. 5, 6

Quiñe rupa, David pefi quiñe domo fütangelu müñetumequelu. David quimniefui ñi ayütunoafiel ca huentru tañi domo, huelu famentulai tañi quintun feitachi domo mu (Éx. 20:17). Feichi mu, David ¿quiñe rume piuque mai niequepefui? Femlai. Quisu ayüniefui ñi ayühulafiel ta Jehová, huelu ca femngechi famentulai ñi huesa raquiduam feitachi domo mu. David piuqueyefilu rume ta Jehová, yamniefilu rume, quisu fente huesa culpai. David tañi femün mu huesa dunguyengei ta Jehová. David ca huesalcafi caquelu pu che ca tañi familia llemai (2 Sam. 11:1-5, 14-17; 12:7-12). Jehová cüme norümtufi ta David, fei cüme hueniyeutuingu (2 Sam. 12:13; Sal. 51:2-4, 17). David quimtucui fente ñi huesa tripan epu rume piuquengerpual. David ñi huirintucuel Salmo 86:11 mu, ca rulpadungungeafui “quelluen ñi epu rume piuquengenoal”. Jehová, ¿quelluquepefui mai ta David ñi quiñe rume piuquengeal? ¡Femi llemai! Feimu Biblia feipi David cüdahuelfi ta Jehová com tañi piuque mu (1 Rey. 11:4; 15:3). w20.06 pag. 11 parr. 12, 13

Cuifi mu, Jehová feipi ñi piuqueyenquechi cüpalafiel pu israelche quiñe püle tripalu quisu mu. Ca femngechi famülque mu, Jehová piuqueyenquechi cüpalqueiñmu quisu mu. ¿Chumngechi am? Raquiduamnge tüfachi dungu mu: quiñe antü ütrüfconpuimi quiñe alü conchi lolo mu. Quisu tripapalayafuimi, duamnieimi tami ütrüftuculelngeal quiñe llasu, fei tami entungeal. Ca femngechi famülque mu, quiñeque taiñ pu peñi ca lamngen ütrüfconcüleingün quiñe lolo meu reque. Fill huesaque dungu nieingün, fei quiñe püle tripaleingün Jehová mu. Huelu Chau Jehová piuqueyenieyu engün, fei ayüniei ñi entuafiel feichi lolo meu reque ca ñi cüpaltuafiel quisu mu. Quiñeque mu, Jehová adniequeiñmeu iñchiñ taiñ piuqueyenquechi quelluafiel engün. Feipiafiyiñ pu quiñe püle tripalu ti trahunche mu ñi piuqueyeteu Jehová. Ca femngechi pengelelafiyiñ iñchiñ taiñ piuqueyeniefiel. w20.06 pag. 27 parr. 12, 13

Langümngelu Esteban, fentren cristiano lefmahuingün, fei “püdyei engün Judea ñi troquiñ mapu püle ca Samaria püle”. Rupalechi antü puhuingün Chipre ca Antioquía püle (Hech. 7:58–8:1; 11:19). Pu discipulo rupaingün fentren huesaque dungu mu. Fente huesa rupafulu rume engün, eluhuingün ñi amuldungucheal, femngechi quellufingün ta fentren che ñi cristianongerpual. Ca fentren trahunche tripai caquerume lof meu (1 Ped. 1:1). Deu rupalu chi dungu, ca nierpuingün doi huesaque dungu. Feichi 50 tripantu püle, ti Emperador Claudio huercüi com pu judio ñi tripatual Roma huaria meu. Fei pu judio cristianongerpulu elcünuingün ñi ruca ca amuingün cañpüle (Hech. 18:1-3). Fülcülepachi 61 tripantu, ti apostol Pablo huirintucui quiñeque cristiano lucatungeingün, presuntucungeingün ca hueñecangeingün (Heb. 10:32-34). Caquelu cristiano pofrengefuingün ca cutrancülefuingün (Rom. 15:25, 26; Filip. 2:25-27). w21.02 pag. 26, 27 parr. 2-4

Cüme maneluucüleliyiñ Jehová mu, chumle rume tati Huecüfü ca tañi pu inanieteu, püntünentulayaiñmu ti rüf dungu mu (2 Juan 8, 9). Iñchiñ taiñ pu cristianongen, quimnieiñ taiñ üdengeal (1 Juan 3:13). Juan feipi ‘com tüfachi Mapu ñi ngünenieteu tati Huecüfü’ (1 Juan 5:19). Doi pichilehuei tañi apümcangeal tati Huecüfü, feimu rume illculei. Quiñeque mu, Huecüfü cüdauquei taiñ ñochiquechi püntünentuaeteu ti rüf dungu mu, feimu famtuculelqueiñmu podngechi raquiduam ca ñi quimeltuqueel pu apostata. Huelu cafei Huecüfü huesa caiñetuqueiñmu. Huecüfü quimniei ñi pichilehuen ñi antü, feimu chumquei rume ñi catrütuafiel taiñ amuldungun cüdau ca taiñ elcünual ti rüf dungu. Feimu quiñeque pais mu taiñ pu peñi ca pu lamngen catrütungequei ñi poyefiel ta Jehová. Caquelu pais mu, müte elungequelaingün tañi femal. Femfulu rume, taiñ pu peñi ca pu lamngen amuleingün ñi serfiniefiel ta Jehová. Feimu feipiafuiñ chumle rume tati Huecüfü, amuleafuiñ ti rüf dungu mu. w20.07 pag. 24 parr. 12, 13

Jehová ayüniefui com pu che ñi müleal quiñe adcülechi mapu tañi deumael. Huelu Adán Eva engu culpalu, famentuhuingu Jehová mu. Feimu rumel mongelehuelafuingu ca femngechi tañi pu cüpanche (Rom. 5:12). ¿Chumi ta Jehová? Pürüm feipi ñi chumafel tañi montulafiel tati pu che (Gén. 3:15). Feimu eluhui ñi hulal tañi Fotüm ñi montulafiel tati pu che ti culpan ca lan dungu mu. Femngechi caque quiñeque che dulliafui ñi serfiafiel ta Jehová, fei ñi rumel mongeleal (Juan 3:16; 1 Cor. 15:21, 22). Jehová elfalcünufi ta Jesús ñi huiñomongeltuafiel pütrünque che, huelu com mongeltufemlayafi engün. ¿Chemu feipiafuiñ tüfa? Com che mongeltufemngele, re desorden mülepelayafui. Huelu Jehová ayüquelai feichi dungu. Jehová quimniei ñi duamfalngen cüme adnieafiel itrocom dungu, fei ñi tüngcüleal ta che (1 Cor. 14:33). w20.08 pag. 14 parr. 3; pag. 15 parr. 5

Taiñ estudiante mülei ñi quimtucual: enseñalmequefiyiñ Biblia ñi  coneltual Jehová tañi troquiñche mu. Pu estudiamequelu cüpa fautizaulu fillque dungu femürpuquei. Quimürpuquefi ta Jehová, piuqueyerpuquefi ca maneluuquei ñi Huenu Chau mu (Juan 3:16; 17:3). Hueniyerpuquefi ta Jehová ca pu peñi ca pu lamngen ti trahunche mu (Heb. 10:24, 25; Sant. 4:8). Tati estudiaquelu arrepentiuquei ca femhuetuquelai huesaque dungu (Hech. 3:19). Cafei nütramelquefi ta caquelu che chem tañi feyentunien (2 Cor. 4:13). Fei hultucuquei ñi mongen Jehová mu ca fautizauquei (1 Ped. 3:21; 4:2). Rume ayühun-ngei feichi antü ñi fautizahun pu estudiaquelu. Rume falin-ngei pu estudiaquelu ñi femal com tüfachi dungu tañi fautizahual. Femle, saquiafiyiñ ca yafültucuafiyiñ ñi amulnieal tañi cüme femmequen. w20.10 pag. 17 parr. 12, 13

Trürümuuliyiñ taiñ pu peñi, pu lamngen mu, falintuulayafuiñ. Quiñeque peñi cüme quimeltuchequei, yafültucuchequei ca cüme adcünuquefi fillque cüdau ti trahunche mu. Trürümuuliyiñ quisu engün mu, “femngechi femlayafun tañi peñi reque” piafuiñ. Feitachi raquiduam nieliyiñ, pengelafuiñ taiñ ñom chengen (Filip. 2:3). Huelu cuñiutucuhuaiñ. Trürümuumequeliyiñ pu peñi ca lamngen mu doi adümuulu, huesa duamnagafuiñ, fei falintuulayafuiñ trahunche mu. Cuifi mu Jehová elufi ñi nehuen quiñeque cristiano, femngechi quisuque caque nieingün ñi pepiluhun (1 Cor. 12:4-11). Com falin-ngeingün. Ca femngechi fachantü nieiñ caquerumechi pepiluhun, huelu com iñchiñ falin-ngeiñ. w20.08 pag. 23 parr. 13-15

Ngillatuafiyiñ ta Jehová taiñ nehuen piuquecünuaeteu. Femliyiñ, Chau Jehová nehuen piuquecünuaiñmu ca chumcaunorume quisucünulayaiñmu (Hech. 4:29, 31). Chau Jehová eluucülei taiñ quelluaeteu. Cafei cümeafui taiñ raquiduamal chumngechi Jehová montuli tañi pu poyequeteu cuifi. Raquiduamaiñ chumngechi taiñ quelluqueteu quisuque iñchiñ ca chumngechi nehuentucuqueiñmu taiñ cüme elcünutual taiñ mongen. ¡Fei llemai! Cuifi Chau Dios montulentui tañi pu che ti Quelü Lafquen mu, ¿ca quellupelayaimeu am eimi tami amuldungucheal? (Éx. 14:13). Maneluhun mu feipiafuimi: “Ngünechen quelluqueneu ta iñche, feimeu llicalayan. ¿Chem chumaeneu anta che?” (Heb. 13:6). Ca femngechi Jehová nehuen piuquecünuquefi feitichi petu hue eluulu ñi amuldungucheal. Quiñe lamngen hue tripalu tañi amuldungucheal, puhui quiñe ruca mu, fei ti ngen ruca huirareyu: “Iñche turpu duamquelafiñ ti pu testigo”. Fei nehuentu racümtucui ti puerta. Amutulu tañi compañ engu, taiñ lamngen ayühunquechi feipifi tañi compañ: “¿Ngüneduamimi am? Chem pilan rume, huelu quimüñmangen tañi poyequefiel ta Jehová. Rume ayüucülen tati”. Feula taiñ lamngen hunelequei amuldungun mu. w20.09 pag. 6 parr. 13, 14

Asá feipifi tati pu che Jehová ñi elueteu engün tañi “tüngcüleal fill püle” (2 Crón. 14:6, 7). Asá raquiduamlai “feula ürcütuan, cüme rupalean müten” pilai. Doi mai deumai quiñeque huaria, fütraque cura malal, fütraque torre ca puerta. Asá feipifi pu israelche: “Petu ta ngen-ngeiñ tüfachi mapu mu”. ¿Chem pin am tüfa? Quisu engün lifrelen mu miyauquefuingün feichi mapu mu ñi elueteu Chau Dios, ca eluhuingün ñi deumayal fillque dungu petu tañi hueichangenon mu engün. Feimu Asá feipifi engün ñi cümeque dungu femal petu tañi tüngcülen mu. Petu ñi hueichangenon mu, Asá pepicai tañi troquiñche acurumefule ta hueichan (2 Crón. 14:8). ¿Feipipeafuiñ mai Asá ñi maneluucülenon Jehová mu? Femlai llemai. Asá quimniefui tañi reyngen mu mülefui ñi pepicayafiel ta che huesaque dungu acurumefule. Asá cüme quimniefui ñi fenteñma tañi tüngcülenoal ta dungu. w20.09 pag. 15, 16 parr. 4, 5

Quiñeque loncolelu ngen familia troquihuafui ti trahunche mu, femngechi “doi cüme cuidayafiñ engün” piafui. Raquiduamafui chi: “Feipiafun pu peñi ca pu lamngen chem tañi chumal engün” piafui. Huelu, ¿chem dungu mu trürlai ñi autoridadcülen pu ngen familia ca pu loncolelu? Chau Jehová elufi pu loncolelu müten ñi juzgayafiel pu culpalu ti trahunche mu. Feichi repentiutunole, huemünentungeafui ti trahunche mu (1 Cor. 5:11-13). Quiñeque dungu pu ngen familia müten elungei ñi femal, huelu pu loncolelu ngelai ñi femal. Por ejemplo, pu ngen familia müten feipiafui tañi pu che chem tañi chumal engün. Pu ngen familia müten feipiafui tañi pu fotüm ca ñahue chem hora mülei tañi acual ruca mu. Fei inangenole tañi feipin, pu ngen familia norümafui tañi fotüm ca ñahue (Efes. 6:1). Huelu pu cümeque ngen familia quimniei tañi domo engu quiñe chengetuingu. Feimu petu ñi feipinoafiel tañi pu che chem tañi chumal engün, ramtuafi tañi domo chem tañi raquiduamquen (Mat. 19:6). w21.02 pag. 16-18 parr. 10-13

¿Chemu fente falin-ngei Biblia ñi feipin? Jehová quimeltuquefi feitachi rüf dungu tati pu ñom che müten (Hech. 13:48, TNM). Feitachi pu ñom che eluuquei ñi quimeltuaeteu ti “quim manelfal cona”, esclavo fiel y prudente pingelu (Mat. 11:25; 24:45, TNM). Quisu ngünehun mu cüme quimürpulayafuiñ ta Biblia. Rume falin-ngei taiñ quimafiel. Chem no rume trürümlayafeyu (Prov. 3:13). Chau Jehová ca femngechi elueiñmu taiñ quimeltucheal quisu tañi ineingen ca chem tañi ayüqueel (Mat. 24:14). Tüfachi huercün dungu taiñ quimeltuchequeel quelluquefi pu che ñi conal Jehová tañi pu che mu, fei ñi rumel mongeleal, feimu rume falin-ngei feitachi huercün dungu (1 Tim. 4:16). Fentren amuldunguliyiñ rume cam pichin femliyiñ rume, com iñchiñ quelluntucuqueiñ feitachi fütra amuldungun cüdau mu (1 Tim. 2:3, 4). Rume ayühulqueiñmu taiñ chaf cüdaucülen Chau Ngünechen iñchiñ (1 Cor. 3:9, TNM). w20.09 pag. 27 parr. 4, 5

Apostol Pablo amulu ta Roma, fentren peñi ca lamngen quellueyu Jehová tañi adcünuel mu. Por ejemplo, Aristarco ca Lucas, Pablo ñi hueningefui, eluhuingu ñi compañafiel Roma mu. Jesús feipicünufi ta Pablo müten ñi cüme puhual ta Roma. Aristarco ca Lucas feipingelaingu chi, huelu amuingu müten ñi compañafiel ta Pablo cuñihun-ngefulu rume. Rüpütulelu hula Pablo engün, Aristarco ca Lucas feipingei ñi cüme puhual ta Roma (Hech. 27:1, 2). Rumerpulu engün ta Sidón huaria meu, Pablo elungei “ñi huitran-ngemeal ñi pu hueni meu ca ñi poyengeal”. Ca rumerpulu engün Puteoli huaria mu, quiñeque cristiano mangeleyu ñi ‘mülenagal quisu engün meu quiñe semana’. Feichi mu, Pablo ca tañi pu compañ poyetueyu pu cristiano, fei Pablo nütramcalelfi cümeque dungu tañi yafültucuafiel engün (ca ngüneduamafuimi Hechos 15:2, 3). w20.11 pag. 16 parr. 15-17

Chau, ñuque tami feipin ca tami femün mu pengelnge fente tami piuqueyefiel ta Jehová. Quelluafiel tami pu yall, tami pu püñeñ ñi piuqueyeafiel ta Jehová, fei tati doi cüme regalo tami eluafiel engün. Enseñayafimi tami pu pichiqueche ñi ngillatual, ñi papeltuafiel Biblia, ñi amual trahun mu ca ñi amuldungual. Tüfa tati doi falinque dungu tañi quimürpuafel (1 Tim. 6:6). Huelu ca femngechi mülei tami eluafiel tami pu pichiqueche com tañi duamnieel engün (1 Tim. 5:8). Huelu nieal com tañi duamnieel quellulayafi tami pu yall, tami pu püñeñ ñi montual. Doi mai mülei tañi cüme hueniyeafiel ta Jehová. Femngechi müten llohuafuingün com tañi feipicünuel (Ezeq. 7:19; 1 Tim. 4:8). Famülque mu, fentren chau ca ñuque cümelcamequeingün ñi quelluafiel tañi pu pichiqueche ñi hueniyeafiel ta Jehová. Epe com pu pichiqueche femngechi tremümngelu, amulequeingün ñi cüme femün, ca rumel mañumtuquefingün tañi pu chau, tañi pu ñuque (Prov. 10:22). w20.10 pag. 28, 29 parr. 10, 11

Quiñeque mu, ti apostol Pedro femquefui quiñeque dungu ñi raquiduamnon rume, fei huesa duamquetufui. Quiñe rupa, Jesús feipifi tañi pu inanieteu ñi rupayal cutrancahun dungu mu ca tañi layal. Huelu Pedro feipieyu: “¡Fei tüfachi dungu meu ta rupalayaimi!”. Fei Jesús norümtufi ta Pedro (Mat. 16:21-23). Ca antü, cüpai quiñe quechan che ñi presupayafiel ta Jesús. Pedro cai entui ñi fütra cuchillo, fei ñi raquiduamnon mu rume catrünentuñmafi ñi pilun ta quiñe huentru. Ca norümeyu Jesús (Juan 18:10, 11). Cafei Pedro feipifi ta Jesús: “Tunte com elcünutuaingün rume tañi maneluhun eimi meu, huelu iñche femlayan” (Mat. 26:33). Huelu feichi pun müten fütra llicai, fei cüla rupa “quimlafiñ ta Jesús” pi. Fente tañi cutrantupiuquen mu, “Pedro tripapatui ta tiye meu, fei rume fütra ngümacahui” (Mat. 26:69-75). Ramtuupelafui Pedro Jesús ñi perdonayafeteu chi. Pedro huesa duamcülefui rume, fentecünulai ñi serfiafiel ta Jehová. Huelulcaulu rume, amulerpui ñi serfiniefiel ta Jehová pu caquelu apostol engün. (Juan 21:1-3; Hech. 1:15, 16). w20.12 pag. 20, 21 parr. 17, 18

Pu ngen familia fentren dungu femafui ñi pengelal tañi ñom piuquengen. Por ejemplo, ñom piuquengele, esperalayai ñi huelulcaunoal tañi domo ca tañi fotüm ca ñahue. Ca femngechi trürcülenole quiñe raquiduam meu tañi pu che engün, allcütuquefi ca ngüneduamquefi ñi chem pin caque quiñeque engün. Fentren che raquiduamquei pu domo müten mülei ñi femal quiñeque cüdau ruca mu. Huelu ñom piuquengele ti huentru, eluucüleai ñi femal müten femngechi cüdau. Tüfa rume cüdaungeafui. ¿Chumngelu? Quiñe lamngen Raquel pingei, feipi: “Iñche tañi tuhun mapu mu pu che raquiduamquei ñi rüf huentru ngenon feiti pu huentru quelluquefilu tañi domo ñi cücharalial ca liftuafiel ti ruca. Femfule ti huentru, ‘ngünequelai ñi domo’ pingeafui” pi. Femngechi raquiduamle pu che tami lof mu, loncontucuaimi tüfa: Jesús ñi antü meu pu che raquiduamquefui pu esclavo müten mülefui ñi cüchanamunafiel caquelu che. Huelu Jesús eluhui müten ñi femal feichi yamfalngenochi cüdau. Pu cümeque huentru duamtuquelafi ñi chem raquiduamquen caquelu che, doi mai duamtuquefi ñi chum duamcülen tañi domo ca tañi fotüm ca ñahue, fei ayüniei ñi ayüucüleal engün. w21.02 pag. 2 parr. 3; pag. 4 parr. 11

Jehová elueiñmu taiñ acordanieal fillque dungu taiñ rupan. Huelu chumlefule rume taiñ mongen cuifi, doi cüme mongen nietuaiñ cüpalechi antü mu. Caquelu che huesa duamelafeiñmu, huelu perdonayafiyiñ taiñ ayühunquechi cüdahuelafiel ta Jehová. Rume culpatuuliyiñ taiñ huelulcan mu, ayühunquechi serfilayafuiñ ta Jehová. Feimu ti apostol Pablo reque, mülei taiñ rüf maneluhual taiñ perdonaqueteu Jehová (1 Tim. 1:12-15). Maneluucüleiñ ñi afnoal taiñ mongen. Müleliyiñ ti hue Mapu mu, ngehuelayai hueñancün. Biblia feipi: “Tati cuifique rupan dungu ngoimacünungeai” (Is. 65:17). Quiñeque iñchiñ com taiñ mongen mu cüdahuelfiyiñ ta Jehová, feimu deu füchalerpuiñ chi. Huelu cüpalechi antü mu com huechengetuaiñ (Job 33:25). Feimu llemai raquiduamyenieafiyiñ cüpalechi antü ca com taiñ chumal famülque mu, fei taiñ mülepual ti hue Mapu mu. w20.11 pag. 24 parr. 4; pag. 29 parr. 18, 19

Cüpalechi antü mu conai ti fütra cutrancahun, fei afmatuaiñ chumngechi taiñ montulaeteu Jehová. Hunelu mu, Jehová adnieafi pu gobierno ñi apümcayafiel com coilaque religion, huelu montulafi tañi troquiñche (Apoc. 17:16-18; 18:2, 4). Fei hula Armagedón mu, Jehová apümcayafi com ñi ngünenieel Huecüfü, fei montulafi tañi troquiñche (Apoc. 16:14, 16). Fülconcüleliyiñ Jehová mu, ti Huecüfü turpu catrütulayafeiñmu taiñ llohual afnoachi mongen. Huecüfü mai apümcangeai (Rom. 16:20). Feimu yenieaiñ com ti hueichahue taiñ elueteu Chau Jehová ca famentulayafiyiñ quiñe no rume. Iñchiñ quisu hueichalayafiyiñ Huecüfü ca tañi ngünenieeteuchi pu che, doi mai quelluafiyiñ taiñ pu peñi, pu lamngen. Ca inayaiñ Jehová tañi ngülam. Femngechi femliyiñ, quimtucunieaiñ taiñ cüme Chau Jehová yafültucuaiñmu ca cuñiutucuaiñmu (Is. 41:10). w21.03 pag. 30 parr. 16, 17

¿Chem dungu mu maneluhuafuiñ ta Jehová mu? Biblia mu mülei fentren rupan dungu, pengelquei fente ñi falin-ngen tüngcüleal ca maneluucüleal Jehová mu. Ngüneduamliyiñ feitachi rupan dungu, raquiduamaiñ chem quellueyu Jehová tañi pu che ñi tüngcüleal caiñetungelu engün rume. Quiñe cuifi rupan dungu, pu loncolechi judio feipifingün pu apostol tañi amuldunguhuenoal engün, huelu fei engün llicalaingün. Doi mai nehuen piuque mu feipingün: ‘Iñchiñ felei taiñ doi allcütuafiel ta Ngünechen ta che meu’ (Hech. 5:29). Hulelcangefui rume, pu apostol llicalaingün. ¿Chumngelu llicalaingün? Pu apostol quimniefui Jehová tañi quellumequeteu. Ñi femün mu ayühulfingün ta Jehová, feimu amulei ñi amuldungufiel ti cüme dungu (Hech. 5:40-42). Ca femngechi Esteban epe puulu tañi langümngeal, rume tüngcülefui. Feimu tañi ange quiñe cüme püllü ñi ange reque felefui (Hech. 6:12-15). ¿Chumngelu am? Esteban rüf maneluucülefui ñi ayühulfiel ta Jehová. w21.01 pag. 4 parr. 10, 11

Tüfa pengeli ti fütra troquiñche lif raquiduam nieingün ca norngeingün Dios tañi adquiñ mu (Is. 1:18). Tüfachi pu cristiano fautizaleingün, feyentuleingün Jesús ñi lan mu ca cüme hueniyequefingün Jehová (Juan 3:36; 1 Ped. 3:21). Ayühulquefingün ta Jehová tañi femün mu, feimu “antü ca pun poyequefi engün” Mapu mu (Apoc. 7:15). Tüfachi fütra troquiñche doyümniei Chau Dios ñi dungu tañi mongen mu, feimu rume amuldunguqueingün (Mat. 6:33; 24:14; 28:19, 20). Pu mongetripayalu ti fütra cutrancahun mu cüme quimnieingün Chau Dios tañi cuidanieaeteu engün. ¿Chumngelu quimnieingün tüfa? Biblia feipi “tati anülelu ti lonco ülmen huancu meu incanieaeyu engün”. Feichi antü mu “ancümüñmangetuai engün tañi cülleñu” (Apoc. 21:3, 4). “¡Ahuem! Femtriparpui tañi maneluucülemum fentren tripantu” piaingün. w21.01 pag. 16 parr. 9, 10

Com iñchiñ rume ayüucüleiñ Jehová tañi troquiñche mu. Jehová elufi ta quiñeque che ñi loncoleal tañi troquiñche mu ca com iñchiñ eluucüleiñ taiñ yamnieafiel engün. Tati Biblia pengeli Jehová ñi trür falintuniefiel pu huentru ca pu domo. Pu hunenque cristiano ñi antü mu, Jehová trür eluquefi ñi nehuen pu peñi ca pu lamngen, femngechi femürpuingün afmatun dungu ca dunguingün caquerume dungun mu (Hech. 2:1-4, 15-18). Cafei Jehová dullifi quiñeque peñi, quiñeque lamngen ñi amual huenu mu fei ñi ngünenieal Jesús engu (Gál. 3:26-29). Ca femngechi pu huentru ca pu domo elungeingün ñi rumel mongeleal Mapu mu (Apoc. 7:9, 10, 13-15). Cafei Jesús huercüfi pu huentru ca pu domo ñi quimeltucheal ti cümeque dungu (Mat. 28:19, 20). Inaduamnge Priscila tañi rupan. Feiti lamngen tañi füta engu, Áquila pingelu, quellufingu ta Apolos ñi doi cüme adümafiel ti rüf dungu (Hech. 18:24-26). w21.02 pag. 14 parr. 1; pag. 15 parr. 4

Eimün pu loncolelu mülei tamün quelluafiel pu peñi ca pu lamngen ñi doi cüme quimeltucheal. Yehuele ti peñi cam ti lamngen ñi enseñacheal eimi tami adquiñ mu, feipiafuimi: “Ayülmi, iñche adnieafun ti estudio”. Pu loncolelu rume quelluafui pu peñi ca pu lamngen ñi amuleal tañi quimeltuchequen (1 Tes. 5:11). Penoliyiñ rume quiñe estudio, quelluafuiñ quiñeque che ñi fautizahurpual. Mangelngeliyiñ ñi enseñachemeal, rume dungulayaiñ. Huelu mai cüme dulliaiñ chem taiñ pial, femngechi müna quelluafiyiñ tati quimeltuchefe. Pu estudiaquelu amule taiñ trahun mu, cüme hueniyeafiyiñ. Cafei inayentufalngeaiñ. Pu loncolelu elcünuafui tiempo ñi quelluafiel pu estudiaquelu ca pu peñi, pu lamngen ñi doi cüme quimeltucheal, femngechi müna cümelcayafingün. Pichin quelluntucufiliyiñ rume quiñe che ñi poyeafiel ta Jehová, rume ayüucüleaiñ. w21.03 pag. 13 parr. 18, 19

David cüme pengeli tañi manelfalngen. Petu pichi huentrungelu, rume cüdahui ñi cuidalelafiel tañi pu ufisa tañi chau. Tachi cüdau ca cuñihun-ngefui, feimu David nütramelfi ta Saúl: “Iñche camañquefiñ tañi chau ñi quechan ufisa. Fei quiñe antü, cüpai quiñe trapial ca quiñe oso, fei caque quisuque yepaingu quiñe ufisa ti quechan mu. Fei iñche inantucufiñ ca langümfiñ engu ca montulfiñ ti ufisa” (1 Sam. 17:34, 35). David quimniefui ñi cuidaufisayal. Ca femngechi eimün pu hueche peñi inayentuafuimün ta David, feimu cüme femaimün chem cüdau rume elungelmün. Huechengelu ta David cüme hueniyequefi ta Jehová. David nehuen piuquengefui ca cüme dungulquefui ti arpa, huelu doi falintuquefui tañi hueniyehun Jehová engu. David poyequefi ta Jehová, huelu doyelchi mai cüme hueniyefi. Eimün pu hueche ca femngechi cüme hueniyeafimün ta Jehová, fei tüfa tati doi falin dungu tamün femafel. w21.03 pag. 3 parr. 4, 5