Diciembre

Quiñeque mu cüdautuafuiñ taiñ cüme adümafiel Biblia ñi feipin. Cafei raquiduamafuiñ “Jehová huiñoldunguquelaeiñmu chem taiñ llellipufiel” piafuiñ chi. Femngechi rupaliyiñ, epurume raquiduam nieafuiñ. Femnoliyiñ chem no rume taiñ epurume raquiduam nienoal, maneluucülelayaiñ Jehová mu ca cüme hueniyehuelayafuiñ (Sant. 1:7, 8). Fei niehuelayafuiñ chem cüme maneluhun no rume cüpalechi antü mu. Ti apostol Pablo feipi taiñ maneluhun Jehová mu feita quiñe “fane fütra fierro reque queltahuengelu ti farcu tañi amucon-noal” (Heb. 6:19). Tati fane fütra fierro mülei ñi cüme traringeal quiñe cadena meu. Feichi cadena trafolele, ti farcu amuconafui lafquen mu. Huesañmaule ti pañillhue cadena trafoafui. Ca femngechi iñchiñ epurume raquiduam nieliyiñ, taiñ maneluhun feleafui feichi pañillhue cadena huesañmaucülelu. Fei rupaliyiñ huesaque dungu, maneluulayafuiñ ñi femtriparpual Jehová tañi feipicünuel. Femngechi raquiduamle quiñe che, turpu ayüucülelayafui. w21.02 pag. 30 parr. 14, 15

Abrahán doi 70 tripantu niepelafui tripalu ta Ur huaria mu (Gén. 11:31–12:4). Pataca tripantu peno, Abrahán umañquefui tolto ruca mu ca fill mapu mu miyauquefui. Nielu 175 tripantu, lai ta Abrahán (Gén. 25:7). Huelu Abrahán pelafui rume chumngechi ñi femtriparpun Jehová ñi feipicünuel tañi pu cüpanche mu. Ca femngechi petu mongelelu ta Abrahán, ngünenierpulai Chau Dios tañi Gobierno. Rume huesaque dungu rupafui ta Abrahán, huelu ayühunquechi maneluucülefui Jehová mu müten. ¿Chemu am femi? Tunte puulu tañi mongen, Jehová cuidaeyu ca hueniyeyu (Gén. 15:1; Is. 41:8; Sant. 2:22). Abrahán reque, iñchiñ ca femngechi maneluucüleiñ ti “doi cüme deumaelchi huaria meu”, Chau Dios tañi Gobierno (Heb. 11:10). Feichi 1914 tripantu mu, Chau Dios tañi Gobierno ngünenierpui huenu (Apoc. 12:7-10). Huelu iñchiñ esperaniefiyiñ ñi ngünenietual com ti Mapu. w20.08 pag. 4 parr. 11, 12

Taiñ quim allcütuafiel taiñ pu peñi ca pu lamngen, mülei taiñ ñom piuquengeal ca ñochi duampiuquengeal. ¿Chumngelu fente falin-ngei taiñ femal? Femngechi huesa raquiduamalayafiyiñ tati pu che. Ca cüme quimüñmayafuiñ ñi chumngen engün ca cutranpiuqueyeafuiñ. Ca femngechi quelluafuiñ tati che ñi quisutu quimuhual. ¿Chumngelu feipiafuiñ tüfa? Quiñeque mu quisutu quimuuquelai ta che, huelu nütramcale tañi chem rupamequen, doi cüme quimuhuafui tañi chumlen. Quiñeque taiñ pu peñi ca pu lamngen cüdautuqueingün ñi nütramcayal chem tañi rupamequen. Alüñmayafui chi ñi entual chem tañi nieel ta piuque mu, huelu mülefui taiñ ñom piuquengeal Jehová reque, femngechi müten quimüñmayafuiñ chem tañi rupamequen. Fei eluule engün taiñ nütramcayaeteu, cüme allcütuafiyiñ. w20.04 pag. 15, 16 parr. 6, 7

Tati challhua miyauquei tañi doi ayüqueelchi co mu ca cheu ñi pequen fentren iyael. Ca femngechi ti pu challhuafe mülei ñi cüme dullial chem hora mu ñi quintuchallhuayal. Raquiduamnge ñi rupan quiñe misionero. Quiñe peñi adümuulu ti challhuan mu mangeleyu ñi challhuameal. “Felei, pulihuentu las nueve mu, pehuayu” pifi. Fei tati misionero feipingei: “Quimfali tami quim challhuaquenon. Quintuchallhuaquelaiñ iñchiñ taiñ ayüelchi hora mu, doi mai challhuaqueiñ tunten mu ñi miyauquen tati challhua”. Femngechi ti misionero adümürpui chem hora mu ñi challhuayal. Ca femngechi tati pu hunenque cristiano amuldunguquefuingün cheu ca chem hora ñi miyauquen tati pu che. Pu inaquefilu ta Jesús amuldunguchequefui ngillatuhue ruca mu, sinagoga mu, fill ruca püle ca mercado mu (Hech. 5:42; 17:17; 18:4). Ca femngechi iñchiñ mülei taiñ quimal cheu ca chem hora doi cümeafui taiñ amuldungucheal. Fei eluucüleaiñ iñchiñ taiñ tuteunoal, femngechi taiñ amuldunguafiel doi fentren che (1 Cor. 9:19-23). w20.09 pag. 4 parr. 8, 9

Inayaiñ com taiñ feipiqueteu Jehová tañi troquiñche, femngechi taiñ hueniyeafiel ta Jesús. Jesús loncolei Jehová tañi troquiñche mu, feimu mülei taiñ yamnieafiel pu huentru quisu ñi loncocünuel, femngechi doi hueniyeafiyiñ ta Jesús (Efes. 4:16). Raquiduamnge tüfachi dungu: fentren trahunche trapümngei ca doi cüme adcünungei cheu ñi amuldungual engün, femngechi ñi apoleal tati Trahunhue Ruca, fei ñi ngünamcangenoal tati plata. Quiñeque peñi ca lamngen pütrüqueñma mülequefui quiñeque trahunche mu, feimu huimtulequefuingün fei mu. Huelu feipingeingün ñi amual caque trahunche mu, huelu ayühunquechi femürpuingün. Rume ayühulpelafingün ta Jesús tañi femün mu. w20.04 pag. 24 parr. 14

Tati rey del norte ca tati rey del sur quehuaconcülei engu ñi ngünenieafiel com ti Mapu, ¿chemu feipiqueiñ tüfa? Rupalu ti Segunda Guerra Mundial, tati Unión Soviética ngünenierpui epe com Europa mapu. Feimu tati rey del sur quiñehuingu caquelu gobierno mu femngechi ñi hueichayafiel tati rey del norte. Femngechi deumarpuingün quiñe troquiñche, OTAN pingelu. Tati rey del norte ca tati rey del sur pütrüquen plata gastaqueingün ñi nieal fentren hueichafe. Mülen mu hueichan África, Asia ca América Latina mapu mu, tati rey del norte quelluquefi tati rey del sur ñi pu caiñe. Rupachi tripantu mu, Rusia ca tañi pu quelluqueteu ngünenierpui fentren troquiñ mapu mu. Cafei tati rey del norte ca tati rey del sur quehuaqueingu internet mu, femngechi ñi cüme amulenoal tañi gobierno. Cafei tati rey del norte amulei ñi caiñetuniefiel Ngünechen tañi pu che, femngechi femtripai Daniel tañi feipicünuel (Dan. 11:41). w20.05 pag. 13 parr. 5, 6

Fütra cuifi mu, Chau Dios feipifi tati pu israelche: “¿Ngoimacünupeafui mai quiñe domo tañi moyol püñeñ, ca cutranpiuqueyelayafui tañi püñeñ quisu ñi choyüel? Tüfachi pu domo ngoimafule rume, iñche turpu ngoimanentulayayu” (Is. 49:15). Pu ñuque rume piuqueyeniefi tañi pu püñeñ. Feimu feitachi versiculo mu, Jehová trürümuhui quiñe ñuque mu, femngechi taiñ quimal fente taiñ piuqueyenieteu. Quiñe lamngen Jasmín pingelu, feipi: “Pu domo moyolfiel mu tañi pu püñeñ, doi quiñeuquei. Fentren tripantu rupale rume, piuquentucunieafi” pi. Fentren ñuque ca femngechi raquiduamquei. Jehová rume falintuquefi com ñi femquen tañi pu poyequeteu, huelu fill tripantu fentren peñi ca lamngen amuldunguhuequelai ca trahuhuequelai engün. Fentren taiñ pu peñi ca pu lamngen amuldunguhuequenolu, huiñotuqueingün Jehová mu, iñchiñ ayühunquechi llouquefiyiñ. Jehová rume ayüniei tüfachi pu peñi ca pu lamngen ñi huiñotual quisu mu. Iñchiñ ca femngechi ayünieiñ (1 Ped. 2:25). w20.06 pag. 18 parr. 1-3

Doi falin-ngechi dungu pequelafiyiñ, ¿chumngelu feipiafuiñ? Jesús feipi taiñ ngülümcayafiel reque falinque tesoro huenu mu, tüfa am doi falilu chem plata mu rume. Jesús ca quimeltueiñmu tati pu che femürpuquei chem tañi doi falintunieel tañi piuque mu (Mat. 6:19-21). Feimu, ¿chumngechi ngülümcayafuiñ reque falinque tesoro huenu mu? Doyümaiñ taiñ ayühulafiel ta Jehová. Femngechi femliyiñ, inei no rume hueñeñmalayaiñmu feichi falinque tesoro. Pablo ngülamtueiñmu taiñ raquiduamyeafiel huenu cüpachi cüme dungu (2 Cor. 4:17, 18). ¿Chem am feichi huenu cüpachi cüme dungu? Feita com taiñ eluaeteu Chau Dios cüpalechi antü mu. ¿Pengelquepeiñ mai ta Jehová taiñ mañumtuniefiel? w20.05 pag. 26 parr. 1, 2

Moisés tañi enseñafiel tati pu israelche quellueyu ñi doi maneluhual Jehová meu. Inchiñ cai enseñacheliyiñ, ¿chumngechi quelluafuiñ engün? Amuldungun mu iñchiñ, pengelelafuiñ tati pu che Jehová tañi üi Biblia mu. Cafei pengelelafuiñ tati pu che cümeque revista, lifru, video ca fillque dungu tripalu jw.org mu, femngechi quelluafiyiñ engün ñi yamnieafiel ta Jehová. Cüdau mu, colegio mu ca cheu rume miyauliyiñ, nütramcayafuiñ tati pu che ñi chumngen ta Jehová. Feipiafuiñ com ñi chumal Jehová taiñ cüme feleal ca com cümeque dungu ñi mületual Mapu mu, femngechi tati pu che quimürpuafui fente ñi piuqueyenieteu Jehová. Enseñalfiliyiñ tati pu che ñi rüf chumngen ta Jehová, quelluntucuafuiñ ñi yamniengeal tañi fütra üi. Enseñafiel mu ta che, quimürpuqueingün ñi coilatulngen engün Jehová mu. Taiñ enseñalfiel ta che, füshcüconquei reque tañi piuque mu (Is. 65:13, 14). w20.06 pag. 10 parr. 8, 9

¿Chem chengeaiñ taiñ quelluafiel pu quiñe püle tripalu Jehová mu? Taiñ huiñoldungual, ngüneduamaiñ quiñe nütram ñi entuel Jesús (Luc. 15:17-24). Jesús nütramcai quiñe hueche huentru huedhuedcaulu, fei tripatui tañi chau ñi ruca mu. Rupachi antü mu, checontui, fei huiñotui tañi chau ñi ruca mu. Tañi chau pefilu ñi huiñotun, lefcülen lloumefi ca piuqueyenquechi pancofi. Fente tañi huesa duamcülen ti hueche huentru, “yehuen-ngei iñche ñi fotüm tami piafiel ta iñche” pifi tañi chau. Fei tañi chau cutranpiuqueyeyu. Fei tañi chau adcünui quiñe fiesta ca feipi ñi doi cümeque ropa ñi elungeal tañi fotüm. Femngechi pengeli ñi nietufiel fotüm reque. Jehová trürümngeafui feichi chau ñi nütramcael Jesús. Chau Jehová rume piuqueyeniefi pu quiñe püle tripalu quisu mu ca ayüniei ñi huiñotual quisu mu. Jehová reque, ñom piuquengeaiñ, cutranpiuqueyecheaiñ ca piuqueyecheaiñ, femngechi quelluafuiñ pu peñi ca pu lamngen ñi huiñotual Jehová mu. w20.06 pag. 25, 26 parr. 8, 9

Jesús feipi quiñeque che ayühunquechi llouquefi tati rüf dungu, huelu contupaelieyeu huesaque dungu famtripaqueingün Jehová mu (Mat. 13:3-6, 20, 21). Quiñeque che feipiquei cüdaungelai ñi serfiafiel ta Jehová. Ca quiñeque che raquiduamquei re cümeque dungu rupaquei pu serfiquefilu ta Jehová (Mar. 8:34). Huelu cristianongefuliyiñ rume, com rupaqueiñ huesaque dungu mu. Femngechi rupaliyiñ, ayüucülehuetulayafuiñ (Sal. 6:6; Ecl. 9:11). Epe com iñchiñ pengelqueiñ taiñ rüf feyentulen Jehová mu. ¿Chumngelu feipiafuiñ? Huesaque dungu femfule rume taiñ pu peñi ca pu lamngen, fentecünuquelaiñ taiñ poyeafiel ta Jehová (Sal. 119:165). Huesaque dungu mu rupafuliyiñ rume, doi nehuentuleaiñ taiñ feyentulen ta Jehová mu (Sant. 1:2-4). w20.07 pag. 8 parr. 1; pag. 9 parr. 4, 5

Petu taiñ papeltunon ti Biblia, llellipuafiyiñ Jehová taiñ quelluaeteu peal falinque ngülam. Raquiduamnge, chaftufilmi quiñe huesa dungu tami mongen mu, llellipuafuimi Jehová tami quelluaeteu peal cümeque ngülam, femngechi tami quimal chem chumal (Filip. 4:6, 7). Jehová elueiñmu taiñ lonco, feimu imaginayafuiñ fillque dungu. Papeltulmi quiñe che ñi rupan Biblia meu mülelu, raquiduamnge ñi chum duamcülen feichi che, chem ñi pen ca chem ñi rupamequen. Femngechi penieafimi reque chem ñi rupan. Femülmi tüfa, doi cümelcayaimu ñi feipin Biblia. ¿Ca chem femafuiñ? Cüme raquiduamaiñ taiñ papeltuel mu. ¿Chumngechi femafuiñ tüfa? Raquiduamaiñ chem enseñalqueiñmu taiñ papeltupeel ca chumngechi nüucülei caquelu dungu mu taiñ deu quimürpuel. Femngechi doi cüme adümafiyiñ ñi chem pin ti Biblia. Raquiduamnge tüfa: tami deumayal cofque, re elcünulayafimi mesa meu com tami duamnieel. Doi mai trapümafimi com tati ingrediente. Ca femngechi, re papeltulaiñ tati Biblia, doi mai raquiduamqueiñ taiñ papeltuel mu, femngechi trapümquefiyiñ reque taiñ quimürpuel taiñ lonco meu. w21.03 pag. 15 parr. 3-5

Ca chengefule ta Pablo, raquiduamafui cuifi mu ñi doi cüme felequefel ca “fente amuldungunofuli, lifreleafun” piafui. Cafei illcutuafui tañi pu compañ ñi quisucünueteu mu, fei maneluulayafui caquelu che mu. Huelu Pablo femlai quiñeque tüfachi dungu no rume. Quimniefui rume ñi langümngeal, huelu loncontucuniei ñi doi falin-ngen poyeafiel ta Jehová. Pablo raquiduamniefui chumngechi ñi yafültucuafiel ta caquelu che. Siempre llellipuquefui ta Jehová ñi quelluaeteu. Raquiduamyenielai tañi quisucünungen. Doi mai, mañumcülefui tañi quelluqueteu mu tañi pu hueni. Cafei amulei ñi ngüneduamfiel Chau Dios ñi Dungu (2 Tim. 3:16, 17; 4:13). Doyelchi mai, quimniefui Jehová ca Jesús tañi piuqueyenieteu. w21.03 pag. 18 parr. 17, 18

Deu rupalu 100 tripantu taiñ mülen antü mu, mülerpui fentren coilaque cristiano ti trahunche mu, tüfa engün quimeltuqueingün coilaque dungu. Pütrün-ngerpulu am tati coilaque cristiano, feimu cüdaungefui tañi quimngeal engün tati rüfngechi cristiano (Mat. 13:36-43). Deu rupalu 100 tripantu, fei ñi puhun 1870 tripantu, Jehová niequelafui quiñe troquiñche tüfachi Mapu meu. Feimu com feichi tripantu mu, ngequelafui tati rey del norte ca tati rey del sur. Huelu pichi rupalu 1870 tripantu, huiño mületuingün tati rey del norte ca tati rey del sur. w20.05 pag. 3 parr. 5

Joel feipicünui fentren chori ñi huesalcayafiel ta Israel femngechi ñi apümcayafiel com tati cachu mülelu Israel meu (Joel 1:4). Tati chori turpu afeluuquelai, ca femngechi iñchiñ turpu afeluuquelaiñ taiñ amuldungual, feimu raquiduamquefuiñ ñi feipin Joel adentulei taiñ amuldungun cüdau. Cafei raquiduamquefuiñ feichi mapu huesalcangelu adentulei feichi pu che inaquefilu coilaque religion. Huelu feula ngüneduamiyiñ com ñi feipicünuel feichi profecia, feimu quimürpuiñ ñi adentulen ca dungu, fei huelulcalefui chumngechi taiñ adümquefel ñi feipin Joel. Ngüneduamnge, Jehová feipicünui: “Iñche alü camapucünutuafiñ” tati pu chori (Joel 2:20). Tati chori adentulefule tati pu amuldunguquelu, feitachi versiculo feipiafui Jehová ñi alü camapucünutuafiel tañi pu poyequeteu. Huelu Jehová turpu femngechi femlayafui tañi pu che (Ezeq. 33:7-9; Mat. 28:19, 20). Doi mai, Jehová quiñepülecünuquefi feichi pu che huesalcafilu tañi troquiñche. w20.04 pag. 2, 3 parr. 3-5

Quiñeque mu raquiduamafuiñ Jehová taiñ allcüfemnoeteu taiñ llellipun. Fei, ¿chumafuiñ? Fentecünulayaiñ taiñ llellipuafiel ta Chau Jehová. Fentren rupa ngillatufiliyiñ rume ta Jehová, turpu lladcütulayaiñmu. Doi mai taiñ Huenu Chau ayühunquechi eluaiñmu ti quimün taiñ duamnieel. Jehová huesa duamquei pefiel mu taiñ cutrancaucülen, feimu eluuquei taiñ quelluaeteu. Tüfa rume ayühulqueiñmu (Sal. 25:12, 13). Huelu Jehová, ¿chumngechi eluqueiñmu ta quimün? Jehová eluqueiñmu ta quimün Biblia meu (Prov. 2:6). Feimu mülei taiñ estudiayal ta Biblia ca taiñ fillque publicacion, fei taiñ nieal ta quimün. Huelu ngelai taiñ re estudiayal müten, doi mai mülei taiñ inayafiel chem taiñ feipieteu Jehová. Feimu Santiago huirintucui: “Ngelai tañi re allcütungeal müten tati hue quimelün dungu” (Sant. 1:22). Inaniefiel mu iñchiñ Jehová tañi ngülam doi tüngcülequeiñ, doi cutranpiuqueyechequeiñ ca doi eluucüleiñ taiñ ñom chengeal (Sant. 3:17). Femngechi chengeliyiñ, ayüucüleaiñ rupaliyiñ rume huesaque dungu. w21.02 pag. 29 parr. 10, 11

Com ti trahunche mülei ñi quelluafiel pu estudiaquelu Biblia, femngechi doi eluucüleaingün ñi cüme elcünutual tañi mongen ca fautizahual. Com quelluntucuafuiñ ñi coneltual trahunche mu pu estudiaquelu Biblia (Efes. 4:16). Quiñe lamngen hunelequelu amuldungun mu feipi: “Quelluhun mu tripaquei dungu, feimu com ti trahunche mülei ñi quelluafiel pu estudiaquelu Biblia ñi fautizahurpual” pi taiñ lamngen. Quiñe pichiche duamniei ñi yafültucuaeteu ca enseñayaeteu tañi chau, ñuque ca tañi pu profesor, femngechi ñi cüme amuleal ñi mongen. Ca femngechi pu estudiaquelu Biblia duamniei ñi yafültucuaeteu ca ngülamtuaeteu pu peñi ca pu lamngen trahunche mu, femngechi ñi cüme amuleal ti rüf dungu mu ca fautizahual (Prov. 15:22). Enseñalfilmi Biblia quiñe che ca quelluntucule tami pu peñi ca pu lamngen, ayüucüleaimi. ¿Chumngelu? Femngechi quellungele ti estudiante, doi cüme hueniyerpuafi Jehová. w21.03 pag. 8 parr. 1-3

Com iñchiñ taiñ cristianongen, tunten tripantu nieliyiñ rume, cuñiutucuhuaiñ taiñ nienoal epu rume mongen. Ti apostol Juan feipi inei no rume poyequefilu ta Jehová yenielayafui podngechi mongen (1 Juan 1:6). Cüpa ayühulfiliyiñ ta Jehová, loncontucunieaiñ quisu quimniei com taiñ femqueel iñchiñ. Caquelu che penoeliyiñmu rume, huelu Jehová mai pequeiñmu taiñ femquen (Heb. 4:13). Juan ñi antü mu, pu coilaque cristiano feipiquefui: “Huesa femle rume ti che, hueniyenierpuafui ta Jehová”. Famülque mu, fentren che ca femngechi raquiduamquei. Huelu iñchiñ inayentuñmalayafiyiñ ñi raquiduamquen pu che ti culpan dungu mu. Fentren che “feyentuquen Chau Dios mu” piqueingün, huelu cümelu troquiquefingün Chau Dios tañi üdequeel. Fentren che duamcülelai rume ñi yenieal lif mongen chumngechi ñi ayüqueel ta Jehová. Fentren che femquei Jehová tañi üdequeel, huelu feipiqueingün: “Iñche tañi mongen tati, feimu chumafun rume. Huesalcamequelan” piqueingün. w20.07 pag. 22 parr. 7, 8

Duamfalngele, ¿dunguñpeafiyiñ mai taiñ pu lamngen? Raquiduamnge rupafule tüfachi dungu. Quiñe lamngen tañi füta poyequelafi ta Jehová, ti lamngen quisu amuquei trahun mu. Huelu tarde acuquei, ca fentepun mu ti trahun amufemquetui. Ca quiñeque mu müten yequei tañi pu püñeñ trahun mu. Peeteu quiñeque peñi ca lamngen, huesa dunguyengeafui. “¿Chumngelu chi feipiquelafi tañi füta ñi cüpalafiel tañi pu pichiqueche?” piafuingün. Huelu feitachi lamngen cümelcamequei. Ayülefui ñi doi temprano acual trahun mu ca ñi pürüm amufemtunoal. Ca ayülefui chi tañi cüpalal tañi pu püñen. Huelu pepi femquelai, mülei ñi yamafiel tañi füta. Saquifiliyiñ taiñ lamngen ca feipifiliyiñ ñi cüme femmequen ta caquelu peñi ca lamngen, femngechi quelluntucuafuiñ ñi huesa dunguyengenoal. Pu loncolelu cüme quimnieingün Jehová ñi ayüquen ñi cümelcangeal taiñ pu lamngen (Sant. 1:27). Pu loncolelu inayentuquefingün ta Jesús. Quiñeque mu pu lamngen femürpulayafui quiñeque dungu chumngechi ñi adcünungeel, huelu pu loncolelu lladcütuquelaeyu engün, doi mai cutranpiuqueyequeyu (Mat. 15:22-28). Feimu pu loncolelu quellufile pu lamngen, tüfa engün quimtucuaingün ñi piuqueyenieteu Jehová ca tañi troquiñche. w20.09 pag. 24, 25 parr. 17-19

Com tañi mongen mu, Daniel ñom piuquengequefui ca eluhui ñi adnieaeteu Jehová. Daniel feipifilu ta Nabucodonosor ñi chem pin tañi peuma, quisutu püramyeulai, doi mai feipi Jehová tañi quellueteu (Dan. 2:26-28). ¿Chem quimeltuqueiñmu tüfa? Saquingeliyiñ hulün mu quiñe hueupin ca cüme tripale taiñ amuldungun, quisutu fampüramuulayaiñ, fampüramyeafiyiñ llemai ta Jehová (2 Cor. 4:7). Femliyiñ, inayentuafiyiñ Jesús tañi cüme femün. Jesús maneluuquefui tañi Chau mu (Juan 5:19, 30). Jesús turpu hunencaulai tañi Chau mu, feimu Biblia feipi Jesús “Dios quechilefui, huelu pilai tañi Chau Ngünechen cünuhual” (Filip. 2:6, TNM). Jesús quimniefui tañi chumafel ca tañi chumnoafel, ca eluucülefui tañi ngünenieaeteu tañi Chau. w20.08 pag. 11 parr. 12, 13

Quiñeque peñi ca lamngen huesa dungu mu rupaqueingün. Huesa rupamequelmi, “cutranpiuqueyelaeneu pu peñi ca pu lamngen” piafuimi. Femngechi raquiduamülmi, inayentuafuimi Mefibóset ñi femün (2 Sam. 4:4). Mefibóset huesa cutran namun niefui, pepi trecalai. Cafei quiñe antü David huesa raquiduamfi ta Mefibóset fei ñi chumnon rume, ca huesalcafi. Mefibóset eluulai tañi huesa raquiduamal. Doi mai falintuquefui chem cümeque dungu ñi nieel tañi mongen mu. Ca raquiduamtucuquefui fente ñi cutranpiuqueyeteu David cuifi mu (2 Sam. 9:6-10). Mefibóset huesalcangelu rume, raquiduamlai tañi huesa rupamequen müten ca culpantuculafi ta Jehová tañi huesa rupan mu. Mefibóset quimniefui Jehová ñi lonco ülmencünufiel ta David, feimu raquiduamquefui chumngechi tañi quelluafiel (2 Sam. 16:1-4; 19:24-30). Jehová huirintucucünui Mefibóset tañi rupan iñchiñ taiñ quimeltuaeteu (Rom. 15:4). w20.04 pag. 26 parr. 3; pag. 30 parr. 18, 19

Fentren trahunche mu mülei hunelequelu amuldungun mu: regulares, especiales ca misioneros. Fei engün eluuquei ñi amuldungucheal ca quimeltucheal fill antü. Epe com feitachi pu peñi ca pu lamngen ricungelafui, huelu Jehová müna cümelcaqueyu (Mar. 10:29, 30). Müna piuqueyefiyiñ feitachi pu peñi, pu lamngen, ca ayüucüleiñ ñi mülen taiñ trahunche mu. Pu peñi nielu falinque cüdau, pu hunelequelu amuldungun mu ca pu misionero, ¿fei engün müten pemai falin-ngei trahunche mu? ¡Femlai llemai! Com pu amuldunguquelu falintuqueyu Jehová ca falintuqueyu tati pu trahunche (Rom. 10:15; 1 Cor. 3:6-8). ¿Chemu am? Tati trahunche elcünungei ñi quelluafiel ta che ñi discipulongerpual (Mat. 28:19, 20; 1 Tim. 2:4). Com pu amuldunguquelu, fautizaucülefule rume, femnofule rume, doyümniequeingün tañi amuldungucheal, feimu müna falin-ngeingün (Mat. 24:14). w20.08 pag. 21 parr. 7, 8

Chumngechi pengeli taiñ peelchi texto fachantü, huesaque dungu chaftufiliyiñ, Jesús quelluaiñmu. Ñi feipiel ta Jesús yafültucuqueiñmu famülque mu. ¿Chemu am? Famülque mu iñchiñ rupaqueiñ fentren huesaque dungu mu. Layeluuliyiñ, fentren tripantu hueñancülerpuafuiñ. Quiñeque peñi ca lamngen cutrancauqueingün tañi füchalen mu. Ca quiñeque peñi ca lamngen contueyu depresion pingechi cutran, feimu rume sufriqueingün. Huelu chem dungu mu rume rupaliyiñ, quimnieiñ Jesús ñi rumel mülen iñchiñ mu, feimu yafüluucüleiñ (Mat. 11:28-30). Biblia feipilei Jehová ta quelluqueiñmu tañi pu cümeque püllü mu (Heb. 1:14). Pu cümeque püllü quelluqueiñmu taiñ amuldunguafiel Chau Dios tañi cümeque dungu “itrocom troquiñque mapu, ca tripanche, dungun ca troquiñche” (Mat. 24:13, 14; Apoc. 14:6). w20.11 pag. 14 parr. 6, 7

Pu estudiamequelu mülei ñi quimürpual Biblia meu tripai taiñ enseñamequefiel (1 Tes. 2:13). ¿Chumngechi femürpuafuiñ? Feipiafuiñ tati estudiamequelu taiñ nütramcayaeteu chem tañi adümel. Iñchiñ quelluquefiyiñ tati estudiaquelu ñi adümal chem pin ta Biblia, huelu quiñeque mu ramtulelafuiñ: “¿Chem pimi? ¿Chumngechi adümfimi tüfachi versiculo?”. Quelluafiyiñ tati estudiaquelu ñi ngüneduamal chumngechi inayafui Biblia ñi ngülam tañi mongen mu (Luc. 10:25-28). Deu ñi papeltungeel quiñeque texto, ramtulelafuiñ tati estudiamequelu: “Tami peel tüfachi texto mu, ¿chem quimeltueimu Jehová mu? ¿Chumngechi cümelcayafeimu feitachi quimeltun? Quimürpufilu eimi feitachi dungu, ¿chum duami tami piuque?”. Femngechi ramtun entuliyiñ, quimafuiñ chem ñi raquiduamqueel ti estudiamequelu. Falin-ngefui ñi nieal quimün ti estudiamequelu, huelu doi falin-ngei ñi falintuafiel ca inayafiel chem tañi quimürpuel. Biblia mu tripape taiñ quimeltun. Ñom piuque mu eluhuaiñ taiñ ngülamtungeal, femngechi müten doi cüme quimeltucheafuiñ. w20.10 pag. 15 parr. 5, 6

Jehová deu elcünui quiñe antü ñi tuntepuhual ti amuldungun cüdau, feimu alüñmalayai. Jehová rume cüme dulliquei chumül ñi femal tañi ayünieelchi dungu. Raquiduamaiñ ñi rupan Noé tañi antü. Jehová dulli chem antü ñi acual ti fütra mangin co 120 tripantu petu ñi acunon. Rupachi tripantu mu, Jehová elfalcünufi Noé ñi deumayal ti fütra huampo ruca. 40 tripantu cam 50 tripantu chi, Noé rume cüdahui ñi deumayafiel. Ca femngechi tunte allcütungelafui rume, com che feipifi ñi acual ti fütra mangin co. Fei acui antü Jehová ñi feipieteu Noé ñi conal ti fütra huampo ruca mu, fei Jehová cerrantucufi ti puerta ñi dullicünuelchi antü mu (Gén. 6:3; 7:1, 2, 16). Pichin mu “fentepuupe ti amuldungun” piai ta Jehová, fei afai com ñi ngünenieel tati Huecüfü, re cümeque che mületuai. Huelu petu ñi acunon feichi antü, inayentuafiyiñ Noé ca caquelu che, fei amuleai taiñ amuldungumequen. Doyümnieafiyiñ ti amuldungun cüdau, nieaiñ ta paciencia ca feyentuleaiñ Jehová mu ca tañi feipicünuel. w20.09 pag. 13 parr. 18, 19

Femngechi adnienofule tañi familia, com huesalcaleafui, fei ayüucülelayafuiñ. Inei no rume loncolenofule, quimngelayafui inei mülei ñi dullial chem chumal ca quimngelayafui chumngechi ñi femngeal. Rume cümei pu huentru ñi loncoleal tañi familia mu. Huelu fentren domo huesalcaeyu ñi füta, ¿chumngelu femngechi rupaqueingün? Fentren huentru inaquelafingün chem ñi huercüfiel Jehová tati pu ngen familia, doi mai inaquefingün fillque huimtun ñi yenieel pu che. Quiñeque engün quisutu duamuuqueingün, feimu huesalcaquefingün tañi domo. Quiñeque huentru ayüfui tañi falintungeal ca ñi rüf huentru pingeal, feimu ngünecaniefi ñi domo. Raquiduamqueingün ñi pepi obliganoafiel tañi domo tañi piuqueyeaeteu, huelu mai llicalcafingün tañi yamnieaeteu. Huelu cümelai feichi raquiduam, rume huelulcaleingün. Jehová ayüniei pu domo ñi yamniengeal (Efes. 5:25, 28). w21.02 pag. 3 parr. 6, 7

Rume raquiduamcüleliyiñ taiñ rupan mu quiñe huesa dungu, ngillatuafuiñ ta Jehová taiñ quelluaeteu. Fei Chau Jehová eluaiñmu “tañi cüme tüngün, fei tüfachi fütra cüme tüngün ta doi cümei che ta pepil-layafui ñi nieal ta cüme tüngün” (Filip. 4:6, 7). Jehová tañi nehuen quelluaiñmu taiñ tüngcületual (Gál. 5:22, TNM). Llellipufiliyiñ ta Jehová, feipiafiyiñ com ñi mülen taiñ piuque mu. Feipiafiyiñ chem dungu rume raquiduamelqueiñmu, fei feipiafiyiñ taiñ chum duamcülen. Llellipuafiyiñ ta Jehová taiñ eluaeteu quimün ca nehuen taiñ cüme elcünutuafiel ti huesa dungu taiñ contueteu. Huelu pepi chumnoliyiñ rume taiñ cüme elcünutuafiel, “quelluen tañi fente raquiduamnoal tüfachi huesa dungu mu” piafuiñ ta Jehová. Cüme feipifiliyiñ ta Jehová chem dungu taiñ rupan ca chem taiñ raquiduamcülen, doi cüme ngüneduamafiyiñ chumngechi taiñ huiñoldunguaeteu. Pürüm huiñoldungunoeliyiñmu Jehová, mülei taiñ amuleal taiñ llellipun mu. Jehová ayüniei taiñ llellipuafiel com taiñ piuque mu. Huelu ca ayüniei taiñ rumel llellipuafiel (Luc. 11:8-10). w21.01 pag. 3 parr. 6, 7

Taiñ trahunche mu mülei ta curehuen ca mülei ta familia. Huelu ca femngechi mülei ta curengenochi peñi ca fütangenochi lamngen. ¿Chem piafuiñ tüfa engün? Inayentuafiyiñ Jesús tañi raquiduamqueel. Mülepalu Jesús Mapu mu curengelai. Raquiduamcülefui ñi quimeltucheal müten. Turpu feipilafi pu cristiano ñi nieal cam ñi nienoal afcadi. Huelu feipi quiñeque cristiano dulliquei ñi curengenoal ca fütangenoal (Mat. 19:11, 12). Jesús yamniequefui ca rume falintuquefui feitichi fütangenolu ca curengenolu, ca ahungechi che troquiquelafi engün. Jesús reque, ca femngechi Pablo curengelafui. Pablo feipilai ñi cümenon curengeal cam fütangeal. Quimniefui quisuque pu cristiano mülei tañi dullial tüfachi dungu mu. w20.08 pag. 28 parr. 7, 8

Tati apostol Juan fentren tripantu mongelefui. Fillque cümeque dungu mu rupai, huelu ca femngechi rupai huesaque dungu mu. Femfulu rume, eluhui ñi inayal com tañi huercüel ta Jesús, feimu piuqueyefi tañi pu peñi, tañi pu lamngen. Juan rume quimniefui Jehová ca Jesús ñi piuqueyenieteu ca quimniefui ñi quellungeal chem dungu rume rupafule (Juan 14:15-17; 15:10). Juan piuqueyefi tañi pu peñi, tañi pu lamngen. Pengelelfi com tañi femün mu. Huecüfü ca tañi pu inanieteu no rume catrütulaeyu tañi femal tüfa. Juan ñi antü mu reque, tüfachi Mapu ngünenieyu tati Huecüfü (1 Juan 3:1, 10). Feita piuqueyen-ngelai, feimu ayülai taiñ piuqueyeafiel taiñ pu peñi, taiñ pu lamngen. Huelu eluulayaiñ taiñ catrütuaeteu ti Huecüfü. Doi mai eluucüleaiñ taiñ piuqueyeafiel taiñ pu peñi ca taiñ pu lamngen. Pengelelafiyiñ taiñ feipin mu ca taiñ femün mu. Femliyiñ, coneltuaiñ Jehová ñi fütra familia mu ca rume ayüucüleaiñ (1 Juan 4:7). w21.01 pag. 13 parr. 18, 19

Huecüfü ñi ngünenien mu tüfachi Mapu cüdaungeafui taiñ mongen (2 Tim. 3:1). Quiñeque mu, quimlayafuiñ chem taiñ chumal. Femfule rume, fill raquiduamlayaiñ ca llicalayaiñ. Jehová quimniei chem dungu meu taiñ rupamequen. Duamnien mu iñchiñ ta quellu, Chau Jehová eluucülei taiñ quelluaeteu (Is. 41:10, 13). Rüf maneluucüleiñ Jehová taiñ quelluaeteu taiñ chaftuafiel chem huesa dungu rume. Ca femngechi ngüneduamliyiñ Biblia, nehuencüleaiñ. Mülei fentren publicacion taiñ quimeleteu chem ñi rupan pu che Biblia mu tripalu, tüfa rume nehuentucuafeiñmu. Mülei fillque video, Biblia ñi afmatufalchi papeltun ca mülei ti troquiñ “Inayentuafiyiñ pu feyentulu Jehová mu”. Petu taiñ penofiel com feitachi dungu, llellipuafuiñ ta Jehová taiñ quelluaeteu peal cümeque ngülam taiñ inayafiel. Petu taiñ ngüneduamfiel ñi rupan quiñeque tüfachi pu che, inaduamaiñ ñi femün ca chumngechi quellueyu Jehová. Feimeu eluhuaiñ taiñ inayentuafiel. Cafei mañumtuafiyiñ ta Jehová taiñ quellueteu mu. ¿Chumngechi? Eluhuaiñ taiñ yafültucuafiel ca quelluafiel caquelu che. w21.03 pag. 19 parr. 22, 23

Pu curehuen ayünielu ñi nieal ta pichiqueche mülei ñi ramtuhual: “José ca María reque, ¿ñom piuquengepeyu mai? ¿Piuqueyepefiyu mai ta Jehová ca tañi dungu? ¿Dullipeafeiñmu mai Jehová taiñ tremümafiel quiñe pichiche?” (Sal. 127:4). Ca femngechi tati pu chau mülei tañi ramtuhual: “¿Quimeltupequefiñ mai tañi pu pichiqueche ñi falin-ngen rume cüdahual?” (Ecl. 3:12, 13). “¿Chumquen rume ñi quelluntucuafiel tañi pu pichiqueche ñi lif mongen yenieal ca ñi huesalcangenoal?” (Prov. 22:3). Eimi catrütulayafuimi chem huesa dungu rume ñi rupanoal tami pu yall, tami pu püñeñ. Huelu piuqueyenquechi quelluafuimi engün ñi maneluhual Biblia mu, femngechi pepicaucüleaingün chem dungu rupafule (Prov. 2:1, 2, 5). Quiñe pariente elcünutufile ta Jehová, enseñayafimi tami pu yall, tami pu püñeñ fente ñi falin-ngen turpu püntütripanoal Jehová mu (Sal. 31:23). Ca lale quiñe piuqueyen che, Biblia mu yafültucuafimi tami pu yall, tami pu püñeñ, fei ñi tüngcüleal (2 Cor. 1:3, 4; 2 Tim. 3:16). w20.10 pag. 27 parr. 7