Noviembre

Huenche ngüneduamliyiñ ñi chumün ta Jonás, feipiafuiñ ñi huesa chengen. Jehová huercüfi ta Jonás ñi feipimeafiel pu niniveche tañi apümngeal, huelu Jonás femlai tañi feipieteu ta Jehová. Pürai quiñe farcu cañpüle amualu, femngechi tañi lefmahual ta Jehová meu (Jon. 1:1-3). ¿Eimi cai? ¿Ca huiño maneluhuafuimi Jonás mu? Fempeafuimi chi. Jonás huelulcaufui rume, Jehová maneluucülefui quisu mu (Jon. 3:1, 2). Chumngechi ñi ngillatun ta Jonás, pengeli chem tañi nieel tañi piuque mu. Mülelu ponhuitu ti fütra challhua meu, feipifi ta Jehová: ‘Hueñancülelu nga iñche ngillatun eimi meu, Jehová, eimi allcüñmaen. Fütra ponhuitu tüfachi lafquen meu ngillatun eimi meu, fei eimi allcüñmaen. Huelu iñche mañumtun meu huiraran, chalintuculelayu tami eluafielchi dungu, felepuai tami feipin, tami pifiel ta eimi. ¡Eimi müten tati montulchefe!’ (Jon. 2:1, 2, 9). Feichi ngillatun pengeli Jonás ñi ñom piuquengen, ñi mañumquefiel ta Jehová ca ñi cüpa feyentuquefiel. Feimu Jehová re ngüneduamüñmalafi müten tañi huelulcan, doi mai allcütuñmafi tañi llellipun ca elufi tañi huerquencüleal. Rume falin-ngei pu loncolelu ñi cüme quimal com ti dungu petu tañi ngülamtunon. w20.04 pag. 15 parr. 4-6

Tati pu hunenque cristiano feyenturpuingün ñi quimeltuel ta Jesús, fei eluhuingün ñi quelluaeteu Chau Dios tañi nehuen ñi cüme adümal feitachi cüme dungu. Feitachi pu cristiano ngüneduamquefuingün Ngünechen tañi Huirin Dungu, femngechi tañi quimal ñi rüfngen ñi quimeltuel ta Pablo (Hech. 17:11, 12; Heb. 5:14). Feitachi pu che ayüquefuingün Pablo ñi quimeltuel ca ayüquefuingün ñi trahuluhual tati pu cristiano engün. Huelu feitachi dungu meu müten poyequelafuingün ta Jehová, doi mai tañi cüme quimfiel mu ta Jehová (Col. 1:9, 10). Ñi quimeltuqueel ta Biblia felequei müten (Sal. 119:160). Quiñeque mu huesa duamelafeiñmu quiñe peñi cam quiñe lamngen, ca fütra culpayafui quiñe cristiano, ca conturumeafeiñmu huesaque dungu. Huelu chem rume rupafule, Biblia ñi quimeltuqueel felequei müten. Feimu cüme quimafiyiñ Biblia ñi quimeltuqueel ca maneluhuaiñ ñi rüfngen com tañi feipiel. Feimu rüf feyentuliyiñ Biblia ñi quimeltuqueel mu, rüf maneluucüleaiñ Jehová mu chem dungu rume rupafuliyiñ. w20.07 pag. 9 parr. 6, 7

Tati pu dullingelu, Jesús tañi peñi reque felei. Feimu quelluntucufiliyiñ engün, quisu ta quellungelu troquiuquei Jesús (Mat. 25:34-40). ¿Chumngechi quelluntucuafuiñ pu dullin cristiano? Com taiñ nehuen mu quimeltucheaiñ chumngechi taiñ huercüeteu ta Jesús (Mat. 28:19, 20). Pu dullin cristiano duamnieingün ñi quelluaeteu pu caquelu ufisa, femngechi müten huechurpuafuingün tañi falin cüdau (Juan 10:16). Feimu coneltuleliyiñ pu caquelu ufisa mu, eluucüleaiñ taiñ amuldungucheal. Femngechi pengelafuiñ taiñ piuqueyeniefiel pu dullin cristiano, huelu doyelchi mai taiñ piuqueyeniefiel ta Jesús. Quelluntuculiyiñ plata mu ñi femquen Jehová tañi troquiñche, ca femngechi hueniyerpuafuiñ ta Jehová ca Jesús (Luc. 16:9). Tüfachi plata taiñ hulqueel quelluntucuafui pu huesa rupamequelu. Ca quelluntucuafuiñ plata mu ñi cullingeal fillque duam taiñ trahunche mu. Ca ngüneduamliyiñ ñi huesa rupamequen quiñeque taiñ pu peñi ca pu lamngen, ca quelluafiyiñ engün (Prov. 19:17). w20.04 pag. 24 parr. 12, 13

Tati rey del norte, ¿chumngechi ‘yamlafi tañi pu chau ñi Ngünechen’? Tati Unión Soviética ayüfui ñi apümcayafiel tati religion, femngechi ñi ngünehuenoafiel tati pu che. Feimu 1918 tripantu, tati Unión Soviética feipi ñi quimeltungenoal Chau Dios mu quiñe escuela mu no rume. Daniel ca feipi tüfachi lonco ülmen “püramyeafi feichi dios poyengequelu cheu ñi cuñiutucuhuam pu che”. ¿Chumngechi huechurpui tüfa? Tati Unión Soviética eluhui ñi nieal fentren hueichafe ca ñi nieal fütraque arma, femngechi tañi doi nehuen-ngeal. Femngechi rupachi antü mu, tati rey del norte ca tati rey del sur nierpui fentren arma, fei ñi langümafiel rume fentren che. Tati rey del norte ca tati rey del sur quiñentrür deumafingün tati Organización de las Naciones Unidas, fei tüfa tati “ünufalchi huesalcaquelu” ñi feipiel ti lifru Daniel (Dan. 11:31). w20.05 pag. 6, 7 parr. 16, 17

¿Inei mülei ñi quintuafiel pu quiñe püle tripalu ti trahunche mu? Tañi pu familia, pu loncolelu, pu hunelequelu amuldungun mu ca com iñchiñ. Quiñeque taiñ pu che ca quiñeque taiñ pu hueni quiñe püle tripalei chi Jehová mu. Cafei amuldungun mu, peafuiñ quiñe peñi cam lamngen quiñe püle tripalu Jehová mu. Feipiafuiñ tati che: “Ayülmi tami pemeaeteu pu loncolelu, iñche huirintucuñmayafeyu tami numero telefono ca cheu tami mülen, femngechi ñi eluafiel engün”. Quiñe loncolelu, Tomás pingelu, feipi: “Ramtuquefiñ pu peñi, pu lamngen: ‘Fau püle, ¿mülepei mai quiñe peñi cam lamngen quiñe püle tripalu ti trahunche mu?’. Femngechi quimürpuquen cheu ñi mülen quiñeque peñi, quiñeque lamngen quiñe püle tripalu ti trahunche mu. Fei pemefilu engün, ramtuquefiñ ñi chumlen tañi pu che. Quiñeque tañi pu familia trahuquefuingün ca amuldunguquefuingün, huelu ca quiñe püle tripaingün Jehová mu. Quisu engün ca quellungeafui ñi huiñotual Jehová mu”. w20.06 pag. 24 parr. 1; pag. 25 parr. 6, 7

Tati pu che müten loncontucunieafui chem ñi rupan cuifi, fei ñi entual falinque quimeltun. Femngechi norümtuafuiñ taiñ raquiduam ca taiñ femquen, fei doi cüme chengerpuafuiñ (1 Cor. 6:9-11; Col. 3:9, 10). Iñchiñ pepicayafuiñ taiñ raquiduam, femngechi doi cüme quimafuiñ chem ñi cümen ca chem tañi cümenon (Heb. 5:14). Quimürpuafuiñ taiñ piuqueyecheal ca cutranpiuqueyecheal. Ca inayentuafuiñ ta Jehová, fei taiñ nor chengeal. Jehová elueiñmu taiñ loncontucunieal fillque dungu. ¿Chumngechi mañumtuafuiñ? Loncontucunieaiñ chumngechi taiñ quelluqueteu ca yafültucuqueteu Jehová, femngechi doi maneluucüleaiñ taiñ rumel quelluaeteu Jehová (Sal. 77:12; 78:4, 7). Ca femngechi loncontucunieafiyiñ chumngechi quelluqueiñmu caquelu che, fei mañumtuafiyiñ engün. Pu cientifico feipiquei pu che mañumtuquelu, doi ayüucülequei. w20.05 pag. 23 parr. 12, 13

Fütra cuifi mu, Moisés pei ñi huilüfcülen quiñe fütra pelon Jehová meu cüpalu, müna afmatulehuepelai Moisés. Fei quiñe cüme püllü feipieyu: “Jehová, Jehová, quiñe Ngünechen cutranduamyechequelu, cutranpiuqueyechequelu, ca lladcüfemquenolu, rume piuqueyechequelu ca rüfngelu, nor piuqueyequefilu ta huarancaquechi pu che, huiñoduamtuquefilu huelulcan, huesa femün ca ti culpan” (Éx. 33:17-23; 34:5-7). Moisés üitufiel mu ta Jehová, acordafemquepelai feichi afmatun dungu ñi peel. Üitufiel mu ta Jehová, ca raquiduamaiñ ñi chumngen. Mülefui taiñ raquiduamal Jehová tañi nehuen mu, tañi quimün mu, tañi norngen mu ca tañi piuqueyechen mu. Femngechi femliyiñ, doi respetayafiyiñ ta Jehová (Sal. 77:11-15). w20.06 pag. 8, 9 parr. 3, 4

Jesús feipi ñi quimfaluhual pu rüf cristiano tañi piuqueyehun mu (Juan 13:34, 35). Huelu taiñ rüf feyentual Jehová mu, fillque dungu mülei taiñ femal. Iñchiñ piuqueyefiyiñ taiñ pu peñi ca pu lamngen, huelu feichi dungu meu müten serfiquelafiyiñ ta Jehová. ¿Chumngelu am? Com iñchiñ ta culpafe chengeiñ, feimu inei rume trahunche mu huelulcarumeafui. Raquiduamnge tüfachi dungu: quiñe loncolelu, quiñe hunelequelu amuldungun mu cam inei rume huesa duamelafeiñmu, fütra culpayafui cam apostatangerpuafui. Femngechi dungu rupale, fei cüme hueniyenofiliyiñ ta Jehová, iñchiñ famtripayafuiñ quisu mu. Feimu taiñ rüf feyentual Jehová mu, rume falin-ngei taiñ cüme hueniyeafiel. Falin-ngei taiñ piuqueyeafiel ta Jehová ca taiñ pu peñi ca pu lamngen, huelu ca femngechi rume falin-ngei taiñ cüme ngüneduamafiel tati Biblia, femngechi rüf maneluhuafuiñ ñi rüfngen taiñ quimürpun (Rom. 12:2). w20.07 pag. 8 parr. 2, 3

Tati pu cümeque püllü quelluqueiñmu taiñ peafiel pu cüpa huiñotulu Jehová mu, fentren rupan dungu pengelqueiñmu tüfa (Apoc. 14:6). Quiñe peñi Silvio pingelu, quiñe püle tripalefui ti trahunche mu. “Quelluen” pifi ta Jehová ñi huiñotual ti trahunche mu. Petu llellipulu, epu loncolelu puhui tañi ruca mu. Feichi mu müten eluhuingün ñi quelluafiel ta Silvio. Ayühun-ngei taiñ quelluafiel pu peñi ca pu lamngen ñi huiñotual Jehová mu. Quiñe peñi Salvador pingelu, quelluquefi pu quiñe püle tripalu ti trahunche mu. Quisu feipi: “Jehová tañi quellun mu, quelluquefiñ quiñeque peñi ca lamngen ñi huiñotual Jehová mu. Raquiduamün mu tüfa, llancünagquei tañi cülleñu fente tañi ayühun”. Eimi quiñe püle tripalelmi ti trahunche mu, rüf maneluucüleafuimi tami piuqueyenieteu Jehová. Jehová esperanieimu. Huiñotulmi quisu mu, ayühunquechi llohuaimu. w20.06 pag. 29 parr. 16-18

Jehová am taiñ enseñalqueteu iñchiñ, elcünui Biblia mu ñi femün fentren che, femngechi taiñ quimeltuaeteu (Is. 30: 21). Feimu cüme raquiduamaiñ ñi chumün tüfachi pu che quimnielu ñi chumafel ca tañi chumnoafel. Ca raquiduamaiñ ñi chumlerpun tati pu femnolu (Sal. 37:37; 1 Cor. 10:11). Peafiyiñ ñi rupan ta Saúl. Huechengelu, Saúl quimniefui ñi chumafel ca tañi chumnoafel ca llicalefui ñi doi elungeal cüdau (1 Sam. 9:21; 10:20-22). Huelu pichi rupalu ñi reycünungen, Saúl ñom piuquengehuelai ca femi quiñe cüdau tañi femnoafel. Quiñe antü, Saúl cansafui ñi esperaniefiel ta Samuel. Chalintuculelfi quiñe culliñ ta Jehová, huelu quisu ngelafui ñi femal. Femlu ta Saúl, Jehová famentueyu ca elulaeyu ñi reycüleal (1 Sam. 13:8-14). Inchiñ inayentulayafiyiñ ta Saúl. Turpu femlayaiñ taiñ femnoafel. w20.08 pag. 10 parr. 10, 11

Jesús tañi duam mu, Jehová huercüfi quiñeque “huentru ñi cümelcayafiel ti trahunche” (Efes. 4:8, TNM). Mülei Cuerpo Gobernante ca tañi pu quelluqueteu, pu adniequelu ta Betel, pu huitran-ngepaquechi loncolelu. Mülei pu quimeltuquelu fillque escuela mu ñi nieel Jehová tañi troquiñche, pu loncolelu ca pu siervo ministerial. Com feitachi pu peñi Jehová tañi nehuen mu elcünungeingün, fei cuidaquefingün ca yafültucuquefingün pu peñi ca pu lamngen (1 Ped. 5:2, 3). Taiñ namun ca taiñ cuhu trür cüdauquei ñi cümelcayafiel com taiñ cuerpo. Ca femngechi pu peñi nielu caquerume cüdau, trür cüdauquei ñi cümelcayafiel com ti trahunche. Quintuyahulquelai tañi fampüramngeal engün, doi mai yafültucuquefi pu peñi ca pu lamngen (1 Tes. 2:6-8). Feitachi pu cümeque peñi doyümquefingün ñi cümelcaleal ti trahunche, feimu rume mañumtuquefiyiñ ta Jehová. w20.08 pag. 21 parr. 5, 6

Famülque mu fentren che huesa ruparupangei ca nielaingün inei tañi quelluaeteu, feimu duamnieingün ñi quimal Chau Dios tañi cümeque dungu. Pefiel mu tüfa, eluuqueiñ taiñ amuldungucheal (Mat. 9:36). Jehová ayüniei “com che tañi montual ca tañi quimürpuafiel engün tati rüfngechi dungu” (1 Tim. 2:4). Raquiduamaiñ tati pu che ñi montuluhuafel allcütule taiñ amuldungun, femngechi doi eluucüleaiñ taiñ amuldungucheal. Iñchiñ mülei taiñ nieal cümeque herramienta taiñ amuldungucheal, ca mülei taiñ cüme adümnieafiel. Jesús cüme feipifi tañi pu inanieteu chumngechi ñi amuldungucheal. Feipifi chem tañi yeal engün, cheu tañi amuldungucheal engün ca chem tañi feipipual engün (Mat. 10:5-7; Luc. 10:1-11). Famülque mu Jehová tañi troquiñche eluqueiñmu cümeque herramienta, fillque quellu taiñ quimeltucheal pingei. Ca quimeltungequeiñ chumngechi ñi doi adümnierpuafiel tüfachi quellu. Feimu doi tüngcülequeiñ amuldungun mu ca doi cüme quimeltuchequeiñ (2 Tim. 2:15). w20.09 pag. 4 parr. 6, 7, 10

Fentren che ñi enseñalfiel ti apostol Juan amulerpuingün ti rüf dungu mu, feimu müna ayüumapelafui ti apostol Juan. Juan fotüm ca ñahue reque troquiquefi feitachi pu cristiano. Feimu rupalu engün huesaque dungu mu, quellufi tañi nehuencüleal engün. Ca femngechi famülque mu, taiñ pu fotüm, ñahue ca feichi pu che taiñ enseñalfiel ta Biblia serfiniefile ta Jehová, iñchiñ rume ayüucüleaiñ (3 Juan 3). Jehová adcünufi ta Juan ñi huirintucual cüla carta. Feitachi carta quellufi pu cristiano ñi doi cüme maneluhual Jesús mu ca ñi amuleal ti rüf dungu mu. Quiñeque coilaque cristiano conpui ti trahunche mu. Quisu engün feipiquefuingün ñi quimfiel ta Chau Dios, huelu femquelafuingün tañi feipieteu. Feimu Juan müna raquiduamcülefui tañi pu peñi ca tañi pu lamngen mu ñi huelulcanoaeteu feitachi pu coilaque cristiano (1 Juan 2:18, 19, 26). w20.07 pag. 20 parr. 1-3

Iñchiñ feyentuleiñ ñi rüfngen taiñ huercün dungu, feimu ayünieiñ taiñ amuldungulelafiel fentren che. Maneluuqueiñ com taiñ feipicünueteu Chau Dios Biblia mu (Sal. 119:42; Is. 40:8). Cüme ngüneduamnieiñ ñi femtripamequen famülque mu quiñeque profecia, ca ngüneduamqueiñ ñi doi cüme mongen ñi nierpuquen pu inaquefilu Biblia ñi ngülam. Femngechi llemai quimtucuqueiñ che ñi duamnieel ñi allcütuñmual feitachi cümeque dungu. Ca femngechi feyentuqueiñ Jehová mu, fei am taiñ elueteu tüfachi huercün dungu taiñ amuldunguqueel. Ca feyentuqueiñ Jesús mu, ti Rey ñi elcünuel Jehová tañi Gobierno mu (Juan 14:1). Chem dungu rume rupafuliyiñ, Jehová afquentu quellunieaiñmu ca nehuentucunieaiñmu (Sal. 46:1-3). Cafei maneluucüleiñ Jesús ñi adniequefiel ti amuldungun cüdau. Jehová elueyu nehuen ca autoridad taiñ adnieaeteu (Mat. 28:18-20). Feyentuliyiñ Jehová mu, maneluucüleaiñ taiñ cümelcayaeteu taiñ amuldungun mu. w20.09 pag. 12 parr. 15-17

Quiñeque mu taiñ pu lamngen duamnieafui ñi dunguñpengeal ca ñi quellungeal (Is. 1:17). Taiñ pu lamngen lantulu ca taiñ pu lamngen fütangehuenolu duamnieafui chi ñi quellungeal quiñeque dungu mu ñi femquefel tañi füta. Quiñe cuse lamngen duamnieafui chi ñi quelluntucungeal ñi amual doctor mu. Ca quiñe lamngen hunelequelu amuldungun mu ca cüdau niele Jehová ñi troquiñche mu, huesa dunguyengeafui tañi müte tripaquenon amuldungun mu, fei duamnieafui tañi dunguñpengeal. Jesús dunguñpequefi pu domo huesa pimequengelu. Fei dunguñpefi ta María ñi feipintucueteu ta Marta (Luc. 10:38-42). Ca antü María huesalcalu troquingei, feimu Jesús ca huiño dunguñpefi (Mar. 14:3-9). Jesús cüme quimniefui chemu ñi hutrunagümeleteu perfume ta María, feimu dunguñpefi ca saquifi. Fei Jesús feipicünui cheu rume puule ti amuldungun cüdau, acordangeai María tañi femün. w20.09 pag. 24 parr. 15, 16

Quiñe cüme cuidaufisafe quimniefui ñi ñamrumeafel quiñe ufisa. Ñamün mu ti ufisa, tati cuidaufisafe lladcütuquelafi ca hulelcaquelafi. Ca femngechi quiñe püle tripale quiñe tañi pu che, Jehová lladcütuquelafi, doi mai quelluquefi. Ngüneduamnge Jonás ñi rupan. Jehová “amuaimi Nínive mu” pieyu, huelu quisu cañpüle amui. Femfulu rume, Jehová famentulaeyu. Quiñe cuidaufisaquelu reque, Jehová montulfi ta Jonás ca quellufi ñi cüme femal tañi cüdau (Jon. 2:7; 3:1, 2). Cafei Jehová tremümelfi quiñe pichi anümca, ca antü ancümfi, femngechi pengelelfi ta Jonás fente ñi falin-ngen pu che tañi mongen (Jon. 4:10, 11). Pu loncolelu, ¿chumngechi inayentuafui ta Jehová? Quiñe püle tripale quiñe peñi ca quiñe lamngen ti trahunche mu, pu loncolelu “huiñopetuafui trahun mu” piquelai. Doi mai, ngüneduamqueingün chemu tañi püntühun engün ti trahunche mu. Huiñotun mu feitachi pu ufisa ti trahunche mu, pu loncolelu quisucünuquelaeyu, piuqueyenquechi quelluqueyu. w20.06 pag. 20, 21 parr. 10-12

Tati Unión Soviética ñamtulu 1991 tripantu mu, taiñ pu peñi ca pu lamngen mülelu feichi mapu mu elungei ñi poyeafiel ta Chau Ngünechen, chumngechi ñi feipicünuel Daniel. Feimu lifrelen mu amuldunguingün. Femngechi feichi mapu cheu ñi mülequefel tati Unión Soviética rume fentren che poyerpufi ta Jehová. Huelu rupachi antü mu, Rusia ca tañi pu quelluqueteu, tati rey del norte ngerpui. Quiñe troquiñche rey del norte ca rey del sur pingeafui femle cüla dungu: 1) Tüfachi pu gobierno cutrancaquefi Ngünechen tañi pu che. 2) Tañi huesa femün mu pengelquei ñi caiñetuquefiel Jehová ca tañi pu che. 3) Tüfachi pu gobierno huelucontu notucauqueingün ñi hunencüleal. Famülque mu, ¿chumngelu rey del norte piafuiñ ta Rusia ca tañi pu quelluqueteu? 1) Quisu engün caiñetuquefi taiñ pu peñi ca pu lamngen, ca eluquelafi ñi amuldungual engün. 2) Tañi huesa femfiel mu, pengelqueingün ñi üdequefiel Jehová ca tañi pu che. 3) Rusia ca tañi pu quelluqueteu hueluquentu notucauquei tati rey del sur engu ñi huneleal, fei ta Gran Bretaña ca Estados Unidos. w20.05 pag. 12, 13 parr. 3, 4

Mülei taiñ rume cüme quimeltucheal, fei ñi discipulongerpual engün. Huall Mapu püle enseñalquefiyiñ Biblia ta fentren che. Falintuquefiyiñ ca ayüuqueiñ taiñ quimelelafiel Biblia ta che, feimu quiñeque mu rume nütramcayafuiñ chi, huelu mülei taiñ ngünehual. Feichi peñi adniequelu Ti Huerquen ca ti Chillcatun Biblia Trahunche mu ca pu quimeltuchequelu mülei tañi rume nütramcanoal engün, feimu mülei taiñ ngünehual tunte taiñ dungual. Feipiquelayaiñ com taiñ quimürpun, femngechi iñchiñ meu müten tripalayai ti quimeltun dungu, doi mai Biblia meu (Juan 16:12). Fautizaulu iñchiñ, pichin müten quimpelafuiñ Biblia, huelu feula fentren dungu quimürpupelaiñ (Heb. 6:1). Fentren tripantu rupai taiñ cüme quimürpuafiel ta Biblia, feimu com quimeltulayafiyiñ tati estudiamequelu. w20.10 pag. 14, 15 parr. 2-4

Chau Jehová rume cüme dulli inei ñi tremümafiel ta Jesús (Mat. 1:18-23; Luc. 1:26-38). María ñi feipin tripalu Biblia mu pengelqueiñmu fente ñi piuqueyefiel ta Jehová ca ñi falintufiel tañi dungu (Luc. 1:46-55). José femi tañi feipieteu ta Jehová, femngechi pengeli ñi piuqueyefiel ca ñi cüpa ayühulfiel (Mat. 1:24). Jehová dullilai ülmen che ñi tremümafiel ta Jesús. Ñi chalintucuel José ca María deu ñi choyüngen ta Jesús, pengeli ñi pofrengen engu (Luc. 2:24). José María engu nierpui regle pichiqueche cam doi chi, feimu sofra niequelafui plata tañi mongeluhuam (Mat. 13:55, 56). Jehová cuñiutucufi ta Jesús quiñeque dungu mu, huelu catrütulafi ñi rupayal chem cüdaungechi dungu mu no rume (Mat. 2:13-15). Ellaca mu, quiñeque tañi pu che ta Jesús feyentulafuingün tañi Mesías ngen (Mar. 3:21; Juan 7:5). Cafei petu huechengelu ta Jesús, lapelai ta José, feimu rume hueñancüquepelafui. w20.10 pag. 26, 27 parr. 4-6

Quiñeque mu rupalmi huesaque dungu mu, ¿quisulelu troquiuquepeimi mai? “Nielan inei rume tañi quelluaeteu”, ¿piqueimi chi? Femngechi dungu raquiduamcülelmi, eimi müten no. Fentren che poyequefilu ta Jehová ca femngechi raquiduamürpuingün quiñeque mu (1 Rey. 19:14). Rupan mu huesa dungu, loncontucuaiñ taiñ feipicünueteu Jehová: “Chumcaunorume quisucünulayayu ca elcünulayayu rume”. Feimu maneluhun mu, feipiafuiñ: “Ngünechen quelluqueneu ta iñche, feimeu llicalayan” (Heb. 13:5, 6). Pablo huirintuculelfi tüfachi dungu tati pu cristiano mülelu Judea 61 tripantu mu. Ñi feipiel ta Pablo trüri tañi feipiel quiñe salmista cuifi (Sal. 118:5-7). Ti salmista reque, Pablo pei fentren rupa ñi quellueteu Jehová, feimu rüf maneluucülefui tañi ca quellungeal. Petu ñi huirintucunofiel ti carta tati pu hebreo, Pablo cuñihun dungu mu rupai. Amui camapu farcu mu, fei fütra cürüftucu mahun mülerquei lafquen mu (Hech. 27:4, 15, 20). Feichi mu ca fentren rupa Jehová quellufi ta Pablo fillque dungu mu. w20.11 pag. 12 parr. 1, 2

¿Chumngelu ngelai taiñ raquiduamcüleal ñi doi cümequefel taiñ mongen cuifi? Femfuliyiñ, acordayafuiñ re cümeque dungu müten taiñ rupan. Femngechi dungu mu rupai pu cuifique israelita. Tripalu Egipto mu, ngoimafemtuingün ñi chumngefel ñi mongen üyeu. Doi mai raquiduamyeniefingün ti iyael ñi elcünuel Egipto mu. Pu israelita feipingün: “¡Müna duamtuniefuiñ taiñ iquefel Egipto mu! Ti challhua, aju, cefolla, santilla, puerro ca pepino”. Pu israelita “refalta iquefuiñ ti iyael” pingün (Núm. 11:5). Huelu, ¿refalta iquefuingün? ¡Femlafui llemai! Doi mai cutrancangequefuingün ñi cüdahual, feimu cutrancahun iquefuingün (Éx. 1:13, 14; 3:6-9). Huelu ngoimanentufingün ñi huesa rupafel, feimu ayüfui ñi huiñotual engün. Ngoimaingün chumngechi ñi rupan Egipto mu, huelu duamlafingün feula Jehová ñi cümelcamequeteu engün. Jehová ayülai ñi huesa femün engün (Núm. 11:10). w20.11 pag. 25 parr. 5, 6

Quimnieiñ ñi pichiñmaquen taiñ mongen, ca fentren huesaque dungu contupaqueiñmu, feimu quiñeque mu huesa duamcülequeiñ (Job 14:1). Ca femngechi quiñeque che poyequefilu ta Jehová cuifi mu huesa duamquefui quiñeque mu. Quiñeque engün ayüfui ñi layal cütu (1 Rey. 19:2-4; Job 3:1-3, 11; 7:15, 16). Huelu Jehová yafültucuqueyu ca nehuentucuqueyu engün. Tañi rupan feitachi pu che huirintucungei Biblia mu taiñ yafültucuaeteu ca taiñ quimeltuaeteu (Rom. 15:4). Raquiduamnge chem ñi rupan ta José. Fütra calerumetui ñi mongen ta José. Quiñe antü mülefui tañi chau tañi ruca mu, müna piuqueyequefeyu. Ca antü esclavongerpui, mülefui ñi cüdahuelafiel ta Potifar, poyequelafui rume ta Jehová (Gén. 37:3, 4, 21-28; 39:1). Potifar ñi domo re coila dungu mu dalluntucufi ta José, “ayüfui tañi nüntucayaeteu” pi. Potifar ngüneduamlai rume ñi rüfngepen mai ñi feipin tañi domo, carceltucufi müten ta José, traricünungei cadena mu (Gén. 39:14-20; Sal. 105:17, 18). ¡Fei llemai! Müna hueñancün-ngei com ñi rupan ta José. w20.12 pag. 16, 17 parr. 1-4

Jesús quimeltueiñmu llellipun mu iñchiñ mülei taiñ ngillatuafiel ta Jehová ñi yamniengetual tañi üi. ¿Chem pin tüfa? Mülei taiñ liftuafiel reque Jehová tañi üi. Huelu Jehová tañi üi deu lifngei, “¿chumngechi fel liftungeafui?” piafuiñ. Taiñ huiñoldungual, ngüneduamaiñ chem coneltulei pu che tañi üi mu. Biblia mu, ¿chem coneltulei pu che tañi üi mu? Biblia feipi: “Doi falin-ngei cüme üitunchengeal ta ricu chengeal. Doi cümei yamniengeal ta nieal plata ca oro” (Prov. 22:1; Ecl. 7:1). Feimu falifui rume chem üi ñi nieel quiñe che, doi falin-ngei tañi cüme üitunchengeal ca ñi cüme acordangeal tañi üi. Tati pu che huesa dunguyequefi ta Jehová, femngechi tañi huesa acordangeal. Femün mu tüfa, illamquefingün reque Jehová tañi üi. w20.06 pag. 3 parr. 5-7

Fente taiñ raquiduamcülen huesaque dungu mu ñi rupan, pepi raquiduamlayafuiñ caquelu dungu mu. Rume raquiduamcüleafuiñ taiñ fente nienoal plata taiñ ngillayal duamnieelchi chemcün. Ca raquiduamcüleafuiñ taiñ cutranal, taiñ pepi cüdaunoal ca taiñ niehuetunoal ta cüdau. Cafei raquiduamcüleafuiñ ngüchaltucungeliyiñ taiñ huesa femal. Ca raquiduamcüleafuiñ taiñ chumafel puule chi antü taiñ huesalcayaeteu Huecüfü ñi pu inanieteu. Feimu ramtuhuafuiñ chi: “¿Huesalcaquepen mai ñi fente raquiduamcüleal feitachi dungu mu?”. Jesús feipifi tañi pu inanieteu: “Fill raquiduamcülequilmün” (Mat. 6:25). ¿Feipipei mai Jesús taiñ fill raquiduamelnoaeteu chem dungu no rume? ¡Femlai tati! Cuifi mu quiñeque poyequefilu ta Jehová ca rume raquiduamcülefuingün quiñeque mu, huelu Jehová hueni troquinieyu engün (1 Rey. 19:4). Feimu Jesús feipilu “fill raquiduamcülequilmün”, ayüfui taiñ yafültucuaeteu. Jesús ayüfui taiñ doyümafiel Chau Ngünechen ñi dungu. Feimu ngülamtueiñmu taiñ fill raquiduamcülenoal chem taiñ iyal, chem taiñ pütocoal ca chem taiñ tucutuhual. w21.01 pag. 3 parr. 4, 5

Pu füta nieingün ta responsabilidad Chau Jehová ca Jesús ñi adquiñ mu (1 Ped. 3:7, TNM). Chau Jehová loncolei com pu mülelu huenu mu ca nag Mapu mu, feimu eluquefi huercün dungu ca adniefi ñi inayafiel engün (Is. 33:22). Jesús ca femngechi loncolei pu trahunche mu, feimu eluqueiñmu huercün dungu ca adnieiñmu taiñ inayafiel (Gál. 6:2; Col. 1:18-20). Jehová Jesús reque, ca femngechi pu ngen familia loncolei tañi pu che mu, feimu dulliafui ñi chem chumal engün (Rom. 7:2; Efes. 6:4). Huelu pu ngen familia doi üye püle amulayafuingün. Ti ngen familia Biblia mu mülei ñi entual chem tañi huercüafiel tañi pu che (Prov. 3:5, 6). Huelu mülei ñi loncontucual tañi familia mu müten loncolei, feipilayafui caquelu che chem chumal (Rom. 14:4). Ca femngechi deu tremle tañi fotüm, tañi ñahue, fei mülehuenole tañi ruca mu, loncolehuelayai fei engün mu tañi feipiafiel chem tañi chumal engün. Huelu tañi fotüm, ñahue ngepe rume, amulei ñi yamnieaeteu (Mat. 19:5). w21.02 pag. 2 parr. 3; pag. 3 parr. 5

Ti ngen familia mülei ñi eluafiel tañi pu che com tañi duamnieel, femngechi pengelelquefi tañi piuqueyefiel. Huelu mülei tañi quimnieal doi falin-ngei quelluafiel tañi pu che ñi poyeafiel ta Jehová (Mat. 5:3). Jesús epe lalelu ti orcon mamüll mu, preocupaucülefui tañi ñuque mu. Jesús lalefui rume, feipifi ta Juan ñi cuidalelaeteu tañi ñuque (Juan 19:26, 27). Pu ngen familia fentren duam niei. Mülei ñi cüme cüdaufengeal, femngechi peeteu mu ta che ñi püramyeafiel ta Jehová (Efes. 6:5, 6; Tito 2:9, 10). Quiñeque ngen familia loncolei trahunche mu cam siervo ministerialngeingün, feimu mülei ñi yafültucuafiel pu peñi ca pu lamngen ca coneltual amuldungun mu. Huelu ca femngechi mülei ñi quiñentrür estudiayal ta Biblia tañi pu che engün. Tati ngen familia chumquei rume ñi tremoleal tañi pu che, ñi ayüucüleal engün ca ñi fülcüleal ta Jehová mu. Femle ti ngen familia, pengelelafi tañi pu che fente tañi piuqueyeniefiel, fei tüfa engün müna mañumcüleai (Efes. 5:28, 29; 6:4). w21.01 pag. 12 parr. 15, 17

Biblia pengeli ñi chumquen ti quim domo (Prov. 31:15, 16, 18). Ti domo pengequelai quiñe esclava reque, “ñücüfcülenge müten” pingequelai. Doi mai tañi füta eluucülei ñi allcütuaeteu fente tañi maneluucülen tañi domo mu (Prov. 31:11, 26). Femngechi ti huentru yamniefile tañi domo, quisu ayühunquechi eluucüleai ñi adnieaeteu. Jesús fentren dungu femfui rume, huelu illamcan dungu troquilafi ñi adnieteu mu Jehová (Juan 6:38; 1 Cor. 15:28). Ca femngechi pu quim domo mülei ñi inayentuafiel ta Jesús, fei illamcan dungu troquilayafi ñi adnieteu mu tañi füta. Ti domo quelluntucuafi tañi füta tañi piuqueyefiel mu, huelu doyelchi mai ñi piuqueyefiel ca yamniefiel mu ta Jehová. Ti huentru feipifile ñi domo ñi femal chem rume ñi ayüquenoel ta Jehová, ngelafui ñi femal. w21.02 pag. 11 parr. 14, 15; pag. 12 parr. 19

Jehová tañi pu che rumel nehuencülei, inacangelu rume. ¿Chumngelu? Fente tañi piuqueyefiel mu ta Jehová. Hunen siglo meu, ti tribunal supremo feipifi pu apostol ñi amuldunguchehuenoal. Fei, ¿chumingün pu apostol? Fente tañi piuqueyefiel mu ta Jehová feipingün: ‘Iñchiñ felei taiñ doi allcütuafiel ta Ngünechen ta che meu’ (Hech. 5:29; 1 Juan 5:3). Ca femngechi famülque mu, fentren taiñ pu peñi, pu lamngen caiñetueyu ca inacaeyu pu gobierno. Huelu fei engün nehuencüleingün fente tañi piuqueyefiel mu ta Chau Jehová. Fei llemai, üdengen mu iñchiñ huesa duamcülelaiñ, doi mai ayüucüleiñ (Hech. 5:41; Rom. 5:4, 5). Quisu taiñ pu familia caiñetueliyiñmu, rume cüdautuafuiñ taiñ nehuencüleal. Hue eluulu taiñ quimafiel ta Jehová, taiñ pu che feipiafeiñmu taiñ ngünencamequengen ca “locoleimi” piafeiñmu (ca ngüneduamafuimi Marcos 3:21). Quiñeque engün lucatuafeiñmu ca hulelcayafeiñmu cütu. Huelu com tüfachi dungu afmatulquelaeiñmu. ¿Chumngelu? Jesús feipicünui taiñ caiñetuaeteu taiñ pu che (Mat. 10:36). w21.03 pag. 21 parr. 6, 7

Compañfilmi quiñe peñi cam lamngen ñi enseñachemeal, cüme allcütunge ñi chem pimequen tati quimeltuchefe ca tati estudiaquelu. Femngechi femülmi, pepicaucüleaimi tami quelluntucual. Mülei tami raquiduamal petu tami dungunon. Catrüconlayaimi petu ñi dungumequen ti quimeltuchefe ca nütramcalayaimi quiñe dungu nüucülenolu ti quimeltun mu. Feimu, ¿chumafuimi tami quelluntucual? Pichin dungufuimi rume, feipiafuimi falinque dungu. Ca entuafuimi cümeque pengelün dungu ca cümeque ramtun, femngechi ñi cüme adümal ti che ti quimeltun. Quiñeque mu raquiduamafuimi tami müte quelluntucuquenon. Huelu saquifilmi ti estudiante ca duamtufilmi, quelluafuimi llemai ñi fautizahurpual. Cafei, feipiafuimi tati estudiaquelu chumngechi quimürpufimi ta Jehová, chem huesaque dungu chaftuquefimi ca chumngechi tami quellueteu Jehová tami mongen meu (Sal. 78:4, 7). Rume quelluafeyu tati estudiante quimal chem tami rupan. Yafültucuafui tañi maneluhual Jehová mu, femngechi ñi fautizahurpual. w21.03 pag. 10 parr. 9, 10

Cüme tripale taiñ amuldungun, ¿inei mülei tañi püramyengeal? Jehová müten. Feimu Pablo feipi: “Iñche ta quiñe nganlu reque, fei Apolos ta hutrucolu reque, huelu Ngünechen mai ta eluquefi ñi tremal reque ti nganqueelchi fün quetran. Fei ta femngechi tati nganlu rume ca ti hutrucolu rume chem falilai, huelu Ngünechen itrocom meu ngen-ngei, fei quisu lle tati eluquefilu ñi tremal ti nganqueelchi fün” (1 Cor. 3:6, 7). Feimu llemai cüme tripale taiñ amuldungun, “Jehová ñi duam mu müten” piaiñ Pablo reque. Rume mañumcüleiñ taiñ trür cüdauquen Chau Jehová, Jesús ca pu cümeque püllü iñchiñ. ¿Chumngechi pengelafuiñ? (2 Cor. 6:1). Eluucüleaiñ taiñ nütramcayafiel com pu che Jehová tañi cümeque dungu. Iñchiñ nganqueiñ reque Jehová tañi cümeque dungu pu che tañi piuque mu. Huelu ca femngechi mülei taiñ hutrucoafiel reque. Femngechi cüme cüdahuaiñ Jehová iñchiñ. Quiñe che ayüle taiñ nütramcafiel, huiño pemetuafiyiñ femngechi taiñ quimeltulelafiel Biblia. Jehová tañi quellun mu, pu papeltuquelu Biblia cüme elcünutuquei tañi mongen. Taiñ pefiel tüfa, rume ayühulqueiñmu. w20.05 pag. 30 parr. 14, 16-18