Enero

Jesús ñi antü mu pu loncolechi religioso cüme ngülamtuquelafui pu che ñi femal Jehová ñi ayüqueel. Feimu Jesús feipifi engün ñi huesa femmequen. Pu fariseo doi falintuquefui ñi cüchayal tañi cuhu engün, huelu duamtuquelafui tati pu fütaque che (Mat. 15:1-11). Pu fariseo lladcütufulu rume ta Jesús, huelu Jesús feipieyu müten ñi huesa femmequen engün. Jesús quimfalcünui quiñeque che ñi quimeltuquen coilaque dungu. Jesús feipi ta Jehová llouquelafi itrofill religion. Doi mai Jesús feipi fentren che ñi conpual ti alürupachi rüpü yequefilu ta che ñi apümcangeal. Huelu pichin che müten conpuai feiti pichi rupachi rüpü yequefilu ta che ñi rumel mongeleal (Mat. 7:13, 14). Fentren che “iñche dios poyequefiñ” pingün, huelu rüf femquelaingün. Feimu Jesús feipi taiñ cuñiutucuucüleal feichi pu che ñom ufisa reque femfaluuquelu, huelu auca trehua reque feleingün. Tañi femün meu engün iñchiñ quimafuiñ inei ngen engün (Mat. 7:15-20). w21.05 pag. 9 parr. 7, 8

Ana fütayequefi quiñe levita Elcaná pingelu. Huelu Elcaná ca domo niequefui, Peniná pingequefui. Elcaná doi piuqueyequefui ta Ana Peniná mu. Peniná nieyequefui pichiqueche, huelu Ana pepi niepüñeñquelafui. Feimu Peniná ayentuquefi ta Ana tañi huesa duamelafiel. Fei ¿chum duamfui ta Ana? “Ngümaquefui ca iquelafui rume”. Hueñancülefulu rume ta Ana, huelu Biblia feipilai tañi caiñetuniefiel ta Peniná. ¿Chumi ta Ana? Nütramcafi ta Jehová tañi ruparupangen, fei maneluhui Jehová mu tañi quelluaeteu (1 Sam. 1:2, 6, 7, 10). ¿Chem enseñalqueiñmu ñi femün ta Ana? Quiñe che doi falilu iñchiñ mu troquiule, iñchiñ ngünehuafuiñ llemai. Duamnielaiñ taiñ pengelelafiel iñchiñ taiñ doi falin-ngen. Eluulayaiñ taiñ caiñetunieafiel, doi mai taiñ cümelcaucüleal (Rom. 12:17-21). Feiti che elcünunole rume tañi huesa raquiduam, iñchiñ ayüucüleaiñ ca cüme duamcüleaiñ. w21.07 pag. 17 parr. 13, 14

Inaduamaiñ Judas Iscariote ñi rupan. Ellaca mu cüme piuque niefui, huelu diñmatufengerpui (Luc. 6:13, 16). Jesús maneluuquefui Judas mu, feimu elfalcünufi ñi adcünual chi caja cheu guardangequen ti plata ñi femngeal ti amuldungun. Jesús mollquechi feipiquefi tañi pu discipulo ñi cuñiutucuhual fei ñi diñmatufengenoal engün. Rupachi antü mu Judas hueñei, fei traicionafi ta Jesús (Mar. 7:22, 23; Luc. 11:39). Epe puulu ñi layal Jesús, Judas pengelcünui ñi diñmatufengen. ¿Chumi? Quiñe antü Simón, tati leproso pingequefulu, mangelfi ta Jesús ca tañi pu inanieteu tañi ruca mu. Ca mangelfi ta María engu Marta. Petu imequelu engün, María huitrapürarumei ca fülcontufi ta Jesús, fei hutrunacümelfi ñi lonco meu quiñe cüme nümün-ngechi aceite rume falilu. Fei Judas ca pu caquelu discipulo rume illcuingün. Pu discipulo raquiduamquefuingün ti domo ñi ngünamcamequen feiti aceite. Feipingün “pütrün plata meu fendengeafui, fei elungeafui pu pofre” pingün. Judas ca illcufui. Ayüniefui ñi fendengeal ti aceite fei ñi tucungeal ti plata caja meu, femngechi tañi hueñeafiel (Juan 12:2-6; Mat. 26:6-16; Luc. 22:3-6). w21.06 pag. 18 parr. 12, 13

¿Raquiduamqueimi tami fentren nien cüdau, fei “fentepuan” piqueimi chi? Apostol Pablo ca femngechi raquiduami. Quisu ca feipi: “Fill antü meu rume raquiduamelqueneu com ti troquiñ feyentulechi pu che” (2 Cor. 11:23-28). ¿Nieimi quiñe cutran tami hueñancülqueteu? Pablo cutrancülequefui chi, feimu hueñancülequefui ñi piuque. Quisu ayüniefui ñi nienoal femngechi cutran, huelu pepi femlai (2 Cor. 12:7-10). ¿Ca femngechi huesa duamcülequeimi tami culpanchengen? Pablo cüdautuquefui ñi femal norngechi dungu cüpalu Jehová mu, feimu feipi: “¡Ahungen mai ta iñche!” (Rom. 7:21-24). Fillque huesaque dungu mu rume rupai Pablo, huelu poyeniefi müten ta Chau Jehová. ¿Chem am quellueyeu? Pablo quimtucuniefui tañi culpanchengen, huelu feyentulequei Jesús tañi lan mu. Tüfa quellueyeu llemai. w21.04 pag. 22 parr. 7, 8

Culpalu Adán, quisu ca tañi pu familia ñi nierpuafel, afnoachi mongen niehuelaingün. Adán quisu tañi duam mu culpai, feimu mülefui ñi layal. Huelu, ¿tañi pu yall cai? Fei engün chumconpalafui ñi femfel ta Adán (Rom. 5:12, 14). ¿Chumfui chi cai Jehová ñi elutuafiel rumel mongen? Pichi rupalu ñi culpan ta Adán, Jehová eluhui ñi pengelafiel tati pu che chumngechi ñi montulafiel ti culpan ca lan dungu meu (Gén. 3:15). Jesús ñi lan mu, com dungu norcületuai. Cüme hueniyetuafuiñ ta Jehová ca norümngetuai Huecüfü ñi huesaque femün (1 Juan 3:8). Cüme elcünungetuai ti Mapu, chumngechi ñi ayüqueel ta Jehová. w21.04 pag. 14 parr. 1; pag. 19 parr. 17

Quiñe antü pütrünque che caquerume tuhun ca quehun nielu, amuingün ta Jerusalén huaria. Feichi antü mu rupai quiñe afmatufalchi dungu, ¿chem dungu chi? Quiñeque judio dungurumeingün feitachi pu che ñi quehun dungu mu. Tati pu che allcülu, lelilehueingün. Huelu feitachi pu judio ca ti apostol Pedro, quiñe rume falin dungu feipieyu engün. ¿Chem pingei feitachi pu che? Mülefui ñi feyentual Jesús mu, fei tañi montuluhual. Allcülu tüfa, puhui tañi piuque mu engün. Fei tati pu che ramtui: “¿Chem chumaiñ anta iñchiñ?”. Fei Pedro feipieyu engün: ‘Fautizahuaimün’ (Hech. 2:37, 38). ¿Ca chem rupai ca antü mu? 3.000 che peno fautizangefui, fei Jesús ñi discipulongerpui engün. Feichi antü mu, coni ñi femngeal quiñe rume falin cüdau. ¿Chem cüdau? Ñi quelluafiel tati pu che ñi discipulongerpual. Famülque ca femngechi femmequeiñ feitachi falin cüdau. w21.06 pag. 2 parr. 1, 2

Taiñ lof mu rume cüdaungepelai taiñ peafiel che ayülu ñi estudiayal Biblia. Quiñeque che pilai taiñ allcütuaeteu cam caiñetuafeiñmu chi. Fei, ¿chem quelluafeiñmu taiñ fentecünunoal taiñ amuldungun cüdau? Loncontucuaiñ: pu che tañi mongen calerumetuafui. Feiti allcütuquenofulu, feula quimtucuafuingün ñi duamnieel Chau Dios ñi dungu (Mat. 5:3). Quiñeque che cuifi llouquelafuingün taiñ publicacion, huelu feula eluucüleingün tañi estudiayal Biblia. Cafei quimnieiñ Jehová ta ngen-ngei tati cosecha mu (Mat. 9:38). Fei ayüquei taiñ nganal ca taiñ hutrucoal, huelu Jehová müten eluquefi ñi tremal tati fün. Cafei Jehová ngüneduamquelai tunten publicacion taiñ hulqueel ca tunten che taiñ enseñalquefiel. Huelu mai doi falintuquefi taiñ quelluchequen com taiñ nehuen mu. Quimfiel tüfa rume yafültucuqueiñmu. w21.07 pag. 6 parr. 14

Jehová elufi tati pu che ñi nieal ta pichiqueche ca elufi ñi enseñayafiel ñi poyerpuafiel ta Jehová. Jehová elufi tati pu cümeque püllü ñi femal fillque dungu, huelu elulafi ñi nieal ta yall. Pu chau mai elufi ñi nieal ta pichiqueche. Cafei pu chau elfalcünungei ñi cüme tremümafiel tañi pu pichiqueche chumngechi ñi ayünieel ta Jehová (Efes. 6:4; Deut. 6:5-7). Ñi quellungeal tati pu chau, Jehová tañi troquiñche entuquei fillque papel, video, ülcantun ca quiñeque troquiñ mülelu taiñ pagina internet mu. Com tüfa tuhui Biblia mu. Quimfali llemai Jehová ca Jesús piuqueyequefi tati pu pichiqueche (Luc. 18:15-17). Pu chau maneluule Jehová tañi ngülam mu, fei cüme tremümfile tañi pu pichiqueche, Jehová rume ayühuai. Femngechi femle pu chau, quelluafingün tañi pu pichiqueche ñi rumel coneltuleal Jehová tañi fütra familia mu. w21.08 pag. 5 parr. 9

Quiñeque che feipiquei pu feyentuquelu Chau Dios mu feyentuqueingün tañi feipingeel meu müten. “Müte quimlaingün” piqueingün. Huelu femngechi femquelai pu rüf feyentuquelu Ngünechen mu. Biblia feipi pu feyentuquelu Chau Dios mu fente cüme quimnieingün ñi mülen ta Jehová, Jesús ca Chau Dios tañi Gobierno, pengequenolu rume (Heb. 11:3). Quiñe cientifico testigongerpulu, feipi: “Iñchiñ pu poyequefilu ta Jehová, feyentuquelaiñ Jehová mu taiñ feipingeel mu müten ca ngüneduamqueiñ ñi feipin tati ciencia”. Fillque dungu ñi mülen cüme quimfalcünui Jehová ñi deumafiel com mülelu. Felefulu rume, ¿chumngelu fentren che feyentuquelai Chau Dios mu? Quisu engün am cüme ngüneduamnofilu Jehová tañi deumael ca Biblia ñi feipin no rume. Inaduamaiñ ñi feipin taiñ peñi Roberto. Fei feipi: “Colegio mu turpu enseñalngequelafuiñ Chau Dios ñi deumafiel com tati mülelu, feimu iñche feyentuquelafun. 20 tripantu nielu hula iñche, quimürpun Biblia ñi feipiel Jehová ñi deumafiel com tati mülelu”. w21.08 pag. 15 parr. 4, 5

Papeltufiliyiñ ta Biblia, quimürpuaiñ ñi cüme piuquengen ta Chau Dios. Ca femngechi allcüqueiñ ñi cümelcafiel taiñ pu peñi ca taiñ pu lamngen ta Chau Dios. Fei, ¿fentepuhuai taiñ quimafiel Chau Dios tañi cüme piuquengen? Femlai. Rüf quimafuiñ ta Jehová tañi cüme piuquengen eluuliyiñ taiñ cümelcayaeteu. Raquiduamaiñ tüfa: raquiduamcüleliyiñ taiñ huneleal ta amuldungun mu, huelu mülei taiñ cümelcacünual taiñ mongen. Quimnieiñ hunentucufiliyiñ taiñ cüdahuelafiel ta Jehová, eluaiñmu chem taiñ duamnieel. Huelu turpu pequelafiyiñ tañi femün ta Jehová iñchiñ mu, re allcüquefiyiñ müten (Mat. 6:33). Tunte felefule rume, iñchiñ quimnieiñ Jehová taiñ eluaeteu taiñ duamnieel. Femngechi eluhuiyiñ taiñ doi pichi cüdahual ca doi pichin plata taiñ huehual, femngechi taiñ hunentucuafiel taiñ cüdahuelafiel ta Jehová. Femngechi femliyiñ, rüf quimafiyiñ chumngechi taiñ duamtunieteu ta Jehová. w21.08 pag. 26 parr. 2

¿Ca femngechi dungu rupaquei fachantü? Femllei mai. Pu loncolechi religioso doi cüme troquiquefi tati pu ülmenque che. Cafei cüme llouquefi engün tañi iglesia mu femfule rume Chau Dios ñi üdequeel. Ca feitachi loncolechi religioso illamcaqueiñmu iñchiñ pu testigo ngen. Iñchiñ com nehuen mu sefiquefiyiñ ta Jehová ca cüme yeniequeiñ taiñ mongen. Tunte felefule rume, pu che illamcaqueiñmu. Feimu Pablo feipi ta Chau Dios dullifi tati pu illamcangequelu (1 Cor. 1:26-29). Huelu Jehová mu, com tañi pu che falin-ngefui. ¿Chem quelluaimu tami hueluraquiduamelnoateu pu che ñi raquiduam? (Mat. 11:25, 26). Loncontucunge: Chau Dios dulliquefi pu ñom piuquengelu müten ñi femal Chau Dios ñi ayüqueel (Sal. 138:6). Tati pu che “nielai educacion” pieliyiñmu rume, huelu Jehová adniequeiñmu taiñ femal falinque dungu. Feimu llemai, com famentuafimi ñi huesa feipingequeel pu testigo. w21.05 pag. 8 parr. 1; pag. 9 parr. 5, 6

Ti apostol Pablo mañumcülequefui tañi quellungen mu. Ñom piuquengefui ca eluhui tañi quellungeal (Filip. 2:19-22). Eimi füchalmi, pengelafuimi tami mañumcülen pu doi huechengelu mu. ¿Chumngechi am? Ayüle engün tami compañaeteu ngillacameal, amual feria mu, amual doctor mu cam quelluelmu quiñeque dungu tami duamnieel, eluhuaimi tami quelluaeteu. Acordanienge tüfa: Jehová adniequefi pu hueche tami quelluaeteu, femngechi quisu pengelquei tami piuqueyenieteu. Ca femngechi cüme hueniyerpuafuimi tüfei engün tami quellueteu. Quellunieafimi engün ñi doi maneluhual ta Jehová mu. Feipiafimi tami ayüucülen quisu engün ñi quelluntuculen ti trahunche mu. Elcünuaimi quiñeque antü tami trahuluhual fei engün mu ca nütramcayafimi falinque dungu tami quimürpuel tami mongen mu. Femlimi tüfachi dungu, pengelaimi ta Jehová tami mañumcülen ñi femqueel mu pu huechequeche (Juan 6:44; Col. 3:15; 1 Tes. 5:18). w21.09 pag. 12 parr. 12, 13

Jehová piuqueyeniefi taiñ pu peñi ca taiñ pu lamngen. Huelu iñchiñ quiñeque mu, cüdautuafuiñ taiñ piuqueyeafiel engün. ¿Chumngelu? Trürlai taiñ tremümngemum ca caquerumei taiñ tuhun. Taiñ culpafe chengen mu quiñeque mu huesa duamelquefiyiñ taiñ pu peñi ca taiñ pu lamngen. Huelu femngechi nentuafuiñ nehuen taiñ doi piuqueyehual taiñ pu peñi ca taiñ pu lamngen. ¿Chumngechi femafuiñ? Inayentuafiyiñ ta Jehová fei pengelelafiyiñ piuqueyen taiñ pu peñi ca taiñ pu lamngen (Efes. 5:1, 2; 1 Juan 4:19). Quiñe che cuñillchequelu pepicauquei chumngechi ñi quelluafiel ti che cutrancaucülelu. Mülepalu Mapu mu, Jesús inayentufi ta Jehová chumngechi ñi cuñillchequen (Juan 5:19). Biblia feipi: ‘Jesús pefilu tati pu che, cutranpiuqueyefi quisulelu engün am quiñe quechan ufisa reque nienolu quiñe camañ reque’ (Mat. 9:36). Jesús re cutranpiuqueyequelafui müten ta pu che, doi mai quelluquefui. Jesús tremoltufi tati cutrancülelu ca elufi nehuen tati cansalelu ca fanetulelu tañi cüdau mu (Mat. 11:28-30; 14:14). w21.09 pag. 22 parr. 10, 11

Jehová piuqueyequefi pu che, feimu cutranpiuqueyequefi. Tati apostol Pablo huirintucui Chau Ngünechen rume fütra cutranpiuqueyechequei. ¿Chumngelu Pablo feipi tüfa? Chau Jehová fente ñi piuqueyefiel mu tati pu dullielchi cristiano, elufi ñi müleal ta huenu mu (Efes. 2:4-7). Huelu Jehová cutranpiuqueyequelafi müten tati pu amualu huenu mu. David feipi: “Jehová cüme piuquengei itrocom che mu, ca tañi cutranpiuqueyechen quimfali com tañi femün meu” (Sal. 145:9). Jehová fente piuqueyefilu am tañi pu che peñmaquefi cümeque dungu ñi piuque mu, feimu eluucülei ñi cutranpiuqueyeafiel. Jesús cüme quimniefui tañi chau ñi cutranpiuqueyechequen. Jehová engu Jesús fentren tripantu mu mülequefui huenu mu engu (Prov. 8:30, 31). Feimu Jesús pefi Jehová fente ñi cutrantupiuqueyechequen (Sal. 78:37-42). Feimu Jesús mülepalu Mapu mu, enseñafi tati pu che Jehová ñi cutrantupiuqueyechequen. w21.10 pag. 8, 9 parr. 4, 5

Jehová feipifi ta Jesús: ‘Iñche eluafiñ tati pu che tañi püramyeaeteu tañi üi’. Jesús amuldunguyaulu Mapu mu, rumel yamquefi Chau Jehová tañi üi (Juan 17:26). Feimu pu rüfngechi cristiano rume falintuquefingün ñi püramyengeal Chau Jehová ñi üi ca tañi quimelelafiel ta com che. Fütra cuifi mu hue elcünungelu ti cristiano trahunche, Biblia feipi ta Jehová eluhui ñi dulliafiel quiñe troquiñche ñi yenieal tañi üi (Hech. 15:14). Feitachi pu cristiano ayühunquechi püramyefingün Chau Dios tañi üi ca quimelelfingün ta caquelu pu che. Cafei quiñeque engün huirintucuingün quiñeque troquiñ Biblia, fei ca huirintucuquefuingün Chau Jehová ñi üi fei mu. Femngechi femün mu engün, quimfalcünuingün fei engün müten enseñachequefui Chau Jehová tañi üi (Hech. 2:14, 21). Famülque mu, iñchiñ müten pu testigo ca enseñachequeiñ Chau Jehová tañi üi. w21.10 pag. 20, 21 parr. 8-10

Turpu aflayai taiñ rüf piuqueyeaeteu Jehová. Com tati Salmo 136 mu huiriconcülei tüfa. Versiculo 1 feipi: “Jehová cüme piuquengei, feimu mañumafimün; aflayai taiñ nor piuqueyeaeteu” (Sal. 136:1). Cafei versiculo 2 puulu 26, caque quiñeque ti versiculo mu cüme pengeli Chau Jehová tañi rüf piuqueyen turpu afquelai. Papeltufiel mu feitachi versiculo, quimiyiñ Jehová chumngechi pengelelquefi tañi pu che ñi rüf piuqueyeniefiel. ¿Chem quimeltueiñmu tüfachi salmo? Chem huesaque dungu mu rume rupafuliyiñ, Jehová turpu elcünulayaiñmu. Feimu serfifiel mu ta Jehová iñchiñ, quisu famentuuquelai iñchiñ mu. ¿Chumngechi quelluqueiñmu Jehová taiñ rumel piuqueyenieteu? Femngechi müten ayüucüleaiñ ca nehuencüleaiñ, fei cüme chaftuafiyiñ chem huesaque dungu mu rume rupaliyiñ ca rumel serfinieafuiñ ta Jehová (Sal. 31:7). w21.11 pag. 4 parr. 9, 10

Pichiñma mu apümcangeai tati coilaque religion, Gog tuulu Magog caiñetuafi Jehová tañi pu che ca pichiñma mu acuai ti Armagedón hueichan. Llicaquepelaimi ñi rupayal com tüfa. Feimu eimi ramtuhuafuimi chi: “Rupale com tüfa, ¿petu fülconcülepean mai Jehová mu?”. Femngechi raquiduamülmi, yafültucupelayafeimu Jesús ñi feipin tripalu fachantü. Quisu feipi: ‘Ca raquiduamcülequilmün. Felei tamün maneluhual ta Ngünechen meu’. Rüf maneluucüleliyiñ Jehová mu, aguantayaiñ chem huesa dungu rume rupafuliyiñ. Cüme chaftufiliyiñ ti huesaque dungu ñi ruparupangen famülque mu, doi maneluhuaiñ Jehová mu, fei nehuencüleaiñ rupafuliyiñ huesaque dungu mu cüpalechi antü meu. w21.11 pag. 20 parr. 1, 2

Ti apostol Pablo yafültucufi ta Timoteo ñi cüme yenieal tañi amuldungun cüdau (2 Tim. 4:5). Huelu quiñeque mu cüdaungeafui chi. Quiñeque pais mu taiñ pu peñi, pu lamngen müte elungequelai ñi amuldungual ca caquelu pais mu catrütungequei ñi amuldungual. Jehová tañi pu che huesaque dungu mu rupaquei, feita huesa duamelafeyu. Quiñeque taiñ pu peñi, pu lamngen com antü cüdauqueingün tañi ngillalelafiel tañi pu che tañi duamtunieel müten. Fei engün doi ayüafuingün chi ñi doi cüdahuelafiel ta Jehová, huelu fente tañi cansalen engün pepi femlaingün. Caquelu pu peñi ca lamngen müte amuldunguquelaingün tañi cutrancülen mu, tañi füchan mu, quiñeque pepi tripaquelaingün rume tañi ruca mu. Ca quiñeque falintunoeteu Jehová troquiuqueingün. Chem huesa dungu mu rume rupaliyiñ, Chau Jehová eluafeiñmu ñi nehuen femngechi taiñ serfinieafiel. w21.05 pag. 20 parr. 1-3

Quiñeque mu, pu che poyequenofilu Jehová dicümtucuafeiñmu taiñ femal Jehová tañi üdequeelchi dungu. Rupale tüfa, ¿chem quelluaiñmu taiñ cüme dullial taiñ femal? Peaiñ chem pilen Levítico 19:19. Quiñe troquiñ tüfachi versiculo feipilei: “Tuculayafimün chi tacun deumangelu epurume füu mu”. Femngechi femün mu pu israelita, pengelquefuingün tañi trürnon caquelu troquiñche mu poyequenofilu Jehová. Famülque mu, inaquelafiyiñ Moisés tañi Ley. Feimu caquerumeafui taiñ tacun. Huelu ca mülei taiñ pengelcünual taiñ trürnon pu poyequenofilu Jehová. Feimu inaquelafiyiñ ñi raquiduam ca ñi femqueel engün. Feingei, iñchiñ piuqueyefiyiñ taiñ pu che ca caquelu pu che. Huelu taiñ cüme dulliel quimfalcünuqueiñ taiñ trürnon caquelu pu che mu. Loncontucunielu am iñchiñ taiñ lifngeal, feimu huichulequeiñ reque feitichi pu che poyequenofilu Jehová (2 Cor. 6:14-16; 1 Ped. 4:3, 4). w21.12 pag. 5 parr. 14; pag. 6 parr. 16

Pu che peafui tüfachi cüme rüpü yequefilu ñi rumel mongeleal. Feimu Jesús feipi: ‘Inaniefilmün iñche ñi dungu, rüf dungu meu eimün iñche ñi pu discipulongeimün. Quimafimün tati rüf dungu, fei ti rüfngechi dungu lifrecünutuaimünmeu’ (Juan 8:31, 32). Huelu eimi yafüluhuimi tami quintual ti rüf dungu. ¿Chumimi? Eluhuimi tami papeltual Biblia, fei tami quimal Jehová tañi huercün dungu ca Jesús tañi quimeltun. Quimürpuimi Jehová feipieimu tami famentuafiel ñi quimeltuqueel tati coilaque religion ca tami connoal chem fiesta rume nüucülelu coilaque religion mu. Ca quimürpuimi, quiñeque mu, cüdautuafuimi tami inayal Jehová tañi feipin. Ca cüdautuafuimi tami elcünual huesaque huimtun ñi ayüquenoel Jehová (Mat. 10:34-36). Huelu fente tami piuqueyefiel ta Jehová, cüme elcünutuimi tami mongen. ¡Müna cümei tami femün! ¿Ayüucülenoafulu ta Jehová eimi mu? (Prov. 27:11). w21.12 pag. 22 parr. 3; pag. 23 parr. 5

Quiñe rupa Moisés rume illcui, fei püramyelafi ta Jehová. Ñi femün mu Moisés, conpulai ti mapu mu Jehová tañi eluafeteu (Núm. 20:1-13). Fei Moisés feipifi ta Jehová ñi eluñmayaeteu ñi conpual feiti cüme mapu mu, huelu Jehová feipieyu: “¡Fentecünuunge! Doi feipimequelayan” (Deut. 3:23-27). Fei Moisés allcülu feichi dungu, illculai, cüme lloufi Jehová tañi feipieteu. Fei Moisés amulei ñi loncoleal pu israelche mu (Deut. 4:1). ¿Chem quimürpuiñ ñi femün Moisés? Moisés cüme lloufi Jehová ñi ngülamtueteu. Amulei ñi püramyeafiel ta Jehová fei ñi conpunoal rume feiti cüme mapu mu. Iñchiñ cümeafui taiñ inayentuafiel ta Moisés. Cüme llohuafiyiñ tati ngülam taiñ elungeel. Moisés reque cüme lloufiliyiñ ti ngülam, müna cümelcayaiñmu (Prov. 4:10-13). Fentrenque peñi ca pu lamngen allcütufingün ti ngülam ñi elungeel. w22.02 pag. 11 parr. 9, 10

Feichi 32 tripantu mu Lázaro cutrani, ca lai. Tüfa Jesús tañi cüme hueni yem (Juan 11:3, 14). Lázaro niefui epu lamngen, María ca Marta pingefui. Jesús rume piuqueyequefui tüfachi familia. Marta quimlu müten ñi amulen ta Jesús, trafmefi. Marta fente ñi hueñancülen mu feipifi ta Jesús: ‘Ñidol, eimi mülefulmi tüfa meu, iñche ñi lamngen lalayafui’ (Juan 11:21, 32, 33). Hueñancülpelaeyu ta Jesús ñi pefiel Marta ca María ñi cutrancaucülen Lázaro tañi lan mu. ¿Eimi cai? Lan mu quiñe tami cüme hueni cam quiñe tami familia, Jehová com quimniei tami chum duamcülen. Biblia pengeli Jesús tañi chumngechi chengen Chau Ngünechen mu trüri (Heb. 1:3). Feimu Jesús ñi ngüman mu, ¿chem pengeli? Jehová ca femngechi hueñancüquei ñi lan mu quiñe che (Juan 14:9). Eimi layeluhulmi quiñe tami familia cam hueni, chumngechi tami hueñancülen com quimniei Jehová. Huelu fei ca müten no, Jehová ca hueñancüquei. Jehová ayüquei tami tremolmayaeteu tami piuque (Sal. 34:18; 147:3). w22.01 pag. 15, 16 parr. 5-7

Nütramcafiliyiñ Jehová, allcütufiliyiñ ñi feipin ca raquiduamliyiñ quisu meu, müna quelluaiñmu. ¿Chumngechi? Hune, cüme dulliaiñ taiñ chumal. Biblia feipi tati che “quimche engu miyauquelu ca quimchengeai” (Prov. 13:20). Epu, doi cüme quimeltucheafuiñ. Quimeltufiel mu ta che, quelluquefiyiñ ñi doi fülconal Jehová mu. ¿Chumngechi femafuiñ tüfa? Doi llellipufiliyiñ Jehová ca doi quimürpufiliyiñ, doi piuqueyeafiyiñ. Fei doi cüme quelluafuiñ pu che ñi piuqueyerpuafiel engün ta Jehová. Femngechi femi Jesús. Quimeltulu Chau Dios ñi dungu, femngechi pengelquefui fente tañi piuqueyefiel ta Jehová. Pu che ngüneduamlu Jesús fente tañi piuqueyefiel ta Jehová, quisu engün ca femngechi femi (Juan 17:25, 26). Cüla, doi feyentuaiñ Jehová mu. Iñchiñ llellipufiliyiñ Jehová ca ngüneduamliyiñ taiñ allcütuñmaqueteu ca quelluqueteu, doi maneluuqueiñ quisu meu (1 Juan 5:15). w22.01 pag. 30 parr. 15-17

Pu che famentuquenofilu huesaque raquiduam quisutu huesalcauquei ca huesalcaquefi caquelu. Jehová quimniei tüfa. Quisu ayüquelai taiñ cutrancahual, rume piuqueyeiñmu. Ayüquei taiñ cümelcaleal, feimu feipiqueiñmu taiñ famentuafiel huesaque raquiduam ca huesaque huimtun (Is. 48:17, 18). Eluucüleliyiñ taiñ famentuafiel taiñ cuifi huesa mongen, taiñ familia ca hueni poyequenofilu Jehová ayentuafeiñmu chi (1 Ped. 4:3, 4). Ca feipiafeiñmu: “Inei no rume feipiqueelmu tami chumal. Chem dungu rume ayülmi tami femal, femaimi müten”. Pu famentuquefilu Jehová ñi ngülam quisutu ngünenieulu troquihuafuingün. Huelu femlai, Satanás ngünenieyu engün (Rom. 12:1, 2). Com iñchiñ mülei taiñ raquiduamal chem taiñ chumal. ¿Eluupeaiñ mai taiñ ngünenieaeteu Huecüfü cam eluupeaiñ mai Jehová taiñ adnieaeteu, femngechi taiñ cacünutual taiñ mongen? (Is. 64:8). w22.03 pag. 3 parr. 6, 7

Raquiduamfiel mu iñchiñ taiñ papeltufiel Biblia mu, quelluaiñmu taiñ cüme raquiduam nieal. Femngechi cüme chaftuafiyiñ chem huesa dungu rume rupafuliyiñ. Peaiñ chumngechi tati Biblia quellufi quiñe lantu lamngen. Quiñe loncolelu ngülamtueyu ñi papeltuafiel Job tañi rupan, fei entuafui cümeque ngülam. Femlu feiti lamngen, juzgafemfi ta Job. “Huesa raquiduamcüleimi Job. Fente cutrancauquilnge” pifi reque. Fei hula inaduamürpui ñi huesa raquiduamcülen Job reque. Raquiduamlu hula, quellueyu ñi cüme raquiduamtual, femngechi ñi cüme chaftuafiel huesaque dungu tañi rupan. Chau Jehová adniequefi taiñ pu peñi, taiñ pu lamngen taiñ yafültucuaeteu. Pablo epechi amulefui ñi pemeafiel tañi pu peñi, pu lamngen femngechi ñi hueluconque yafültucuhual (Rom. 1:11, 12). w21.05 pag. 22 parr. 10, 11; pag. 24 parr. 12

Cuifi mu, Jehová feipifi tati pu israelche: “Cüla rupa tripantu mu, com pu huentru mülei ñi puhual cheu ñi feipicünuel tami Ngünechen, Jehová tañi adquiñ meu” (Deut. 16:16). Pu israelche quisucünuquefuingün tañi ruca ca tañi mapu engün ñi amual ta trahun mu. Huelu Jehová feipicünueyu engün: “Püralmi tami poyeafiel Jehová, inei no rume cüpa müntuñmalayaimu tami mapu” (Éx. 34:24). Pu israelche tañi amual feitachi trahun mu, mülefui ñi maneluhual Jehová mu müten. Amulu engün feitachi trahun mu, doi cüme adümquefingün Jehová tañi ley, raquiduamqueingün ñi cüme piuquengen ta Jehová ca ayüuqueingün tañi cüme rupaleal tañi caquelu pu peñi ca pu lamngen. Ca femngechi iñchiñ eluucüleliyiñ taiñ amual ta trahun mu, rume cümelcayaiñmu. Cafei cüme pepicauliyiñ taiñ huiñoldungual trahun mu, ca müte alüñmanoliyiñ taiñ huiñoldungual, Jehová müna ayühuai. w22.03 pag. 21 parr. 9

Jehová catrütulafi ñi cutrancahual ta Jesús, femngechi adümelfi ñi Hunen Lonco Sacerdotengerpual. ¿Chumngechi am? Cutrancaulu Jesús, quimürpui fente cüdaungen inangeal Jehová ñi feipin rupan mu huesaque dungu mu. Fente ñi cutrancahun ta Jesús nehuentu llellipufi ta Ngünechen ca ngümai cütu. Cutrancaulu am Jesús, quimtucuniei taiñ cutrancaucülen ca rüf quelluafeiñmu rupaliyiñ huesaque dungu mu. Jehová cüme adümelfi ta Jesús ñi Hunen Lonco Sacerdotengeal, feimu rume mañumcüleiñ iñchiñ (Heb. 2:17; 4:14-16; 5:7-10). ¿Ca chem dungu mu fente cutrancahui ta Jesús? Jehová ayüfui pengelcünual Huecüfü ñi coilatufengen. Ti Huecüfü feipi huesaque dungu mu rupaliyiñ, famtripayaiñ Jehová mu. Ca feipi iñchiñ serfiniequefiyiñ Jehová re taiñ füreneaeteu müten ca iñchiñ rüf piuqueyequelafiyiñ ta Jehová (Job 1:9-11; 2:4, 5). Feimu ñi femün mu ta Jesús, cüme quimfalcünungei Huecüfü ñi coilatufengen. w21.04 pag. 16, 17 parr. 7, 8

Quiñe che papeltuquelu Biblia ayüfule ñi fautizahual, ¿chumafui? Mülefui ñi cüme inayafiel chem pin tati Biblia. Quiñe rupa Jesús nütramcai quiñe “quim huentru” mu deumafilu ñi ruca huente cura mu. Fei ti estudiante inafile ñi quimürpuel, feiti quim huentru reque feleai (Mat. 7:24, 25; Luc. 6:47, 48). Quelluafiyiñ tati estudiaquelu ñi cüme elcünutual tañi mongen (Mar. 10:17-22). Jesús quimniefui feitachi huentru ñi cüdautuafiel ñi elal com tañi falinque chemcün (Mar. 10:23). Femfulu rume, Jesús feipifi ta tüfachi ricu huentru ñi femal. ¿Chemu feipifi? Tañi piuqueyefiel mu ta tüfachi huentru. Quiñeque mu feipiquelafiyiñ taiñ estudiaquelu ñi cüme elcünutual ñi mongen, ¿chemu? Inaduamquefilu am iñchiñ ñi pepicaucülenon (Col. 3:9, 10). Huelu alün tiempo rupaquilpe taiñ feipiafiel taiñ estudiante ñi elcünual huesaque huimtun. Pürüm feipifemliyiñ chem tañi femafel, doi matu femafui. Femliyiñ com tüfa, pengelelafiyiñ pu estudiaquelu taiñ duamtuniefiel Jesús reque (Sal. 141:5; Prov. 27:17). w21.06 pag. 2 parr. 3; pag. 3 parr. 5

¿Chumngelu inayentufali ta Jesús? Jesús rupai ta fentren cutrancahun mu, huelu aguantai, femngechi huirintucui ti apostol Pedro. Huelu Jesús ca femi fentren dungu ñi inayentungeal (1 Ped. 2:18-25). Com tañi nütramcan ca tañi femün ta Jesús, com cümei ñi inayentungeal. Iñchiñ culpafe chengeiñ. Fei, ¿rüf cüme inayentupeafuiñ mai ta Jesús? Femafuiñ llemai. Huelulcahuafuiñ rume, huelu eluucüleafuiñ taiñ cüme inayentuafiel. Femngechi femliyiñ, nieaiñ lif mongen Jesús reque. Tüfa ñi ngülamtuel ti apostol Juan (1 Juan 2:6). Inayentufiliyiñ Jesús tañi femün doi cüme hueniyeafiyiñ ta Jehová. ¿Chumngelu feipiafuiñ tüfa? Jesús miyaupalu Mapu mu, com ñi mongen mu ayühulfi ta Jehová (Juan 8:29). Feimu inayentufiliyiñ ñi femün ta Jesús, ayühulafiyiñ ta Jehová. Ayühulfiliyiñ taiñ Huenu Chau, fülcontunieaiñmu llemai (Sant. 4:8). w21.04 pag. 3 parr. 4-6

Chau Jehová ngüneduamqueiñmu taiñ cüme femquen, chem taiñ femürpuafel ca quelluqueiñmu taiñ hueniyeafiel. Femliyiñ Chau Dios tañi ayüqueel, chumcaunorume quisucünulayaiñmu (Juan 6:44). Rüf maneluuliyiñ taiñ rüf piuqueyenieteu Jehová, serfiafiyiñ com taiñ nehuen mu chem rume rupafuliyiñ. Huelu Chau Dios piuqueyenoeteu troquiuliyiñ, yafüngehuelayaiñ (Prov. 24:10). Feita cuñihun-ngeafui, ti Huecüfü püntünentuafeiñmu Chau Jehová mu (Efes. 6:16). Quiñeque peñi, lamngen raquiduamürpui ñi piuqueyenoeteu Jehová. Feimu fente maneluuhuequelai Jehová mu. Feimu nieliyiñ femngechi raquiduam, ¿chem mülefui taiñ femal? Pürüm famentuafiyiñ llemai. “Eluen tami tüngün” piafiyiñ ta Chau Jehová, femngechi taiñ entual femngechi huesa raquiduam taiñ piuque mu ca taiñ lonco mu (Sal. 139:23; Filip. 4:6, 7). Loncontucuaimi: quisulelaimi tati. w21.04 pag. 20 parr. 1; pag. 21 parr. 4-6

¿Chumngechi am quimürpuimi ti rüf dungu fei testigongerpuimi? Tami chau cam tami ñuque nütramcapelaeimu Chau Jehová mu. Cüdau cam colegio mu tami pu compañ ca nütramcapelaeimu. Cam tami ruca mu amuldungulelngeimi chi (Mar. 13:10). Amuldungulelngelu eimi doi ayüimi tami quimal, fei quiñe che eluhui tami enseñalelaeteu Biblia. Femngechi quimürpuimi Chau Jehová tami piuqueyenieteu, fei eimi ca piuqueyerpufimi. Feimu Jehová cüpaleimu quisu mu, fei maneluucüleimi tami rumel mongeleal (Juan 6:44). Fei llemai, Jehová adniefi quiñe che tami quimeltuaeteu Biblia, fei llohueimu quisu tañi troquiñche mu. Mañumcülepelafuimi. Deu quimfilu iñchiñ ti rüf dungu, quelluafuiñ ta caquelu che taiñ quiñentrür poyeafiel Jehová. Rume falin-ngei tüfa. Iñchiñ cüdautulayafuiñ chi taiñ amuldungulelafiel pu che, huelu cüdautuafuiñ chi taiñ feipiafiel pu che taiñ enseñalelafiel Biblia cam quimlayafuiñ chi chumngechi taiñ enseñalelafiel engün. w21.07 pag. 2 parr. 1, 2