Febrero

Jehová ayüniei com tañi pu poyequeteu ñi ayüucüleal. Jehová fülmaniefi tañi pu che. Feimu quiñeque mu hueñancüleliyiñ, Jehová quimniei (Sal. 145:19). Ngüneduamaiñ ñi rupan Elías. Huesa duamcülelu tüfachi huentru, Jehová preocupahui ca quellufi. Elías ñi antü mu, quiñeque che poyequenofilu Jehová inantucufingün tati pu che Jehová poyequefilu. Huelu doi ayülefuingün langümafiel ta Elías (1 Rey. 19:1, 2). Cafei Elías raquiduamcülefui ñi quisulehuen poyeniefiel ta Jehová, feimu peno huesa duamcülefui (1 Rey. 19:10). Fei, ¿chumi Jehová? Quellufemfi ta Elías. Jehová huercüfemi quiñe cüme püllü, fei feipifi ta Elías ñi quisulenon. Ca feipifi petu mülequefui fentren israelita poyeniefilu ta Jehová (1 Rey. 19:5, 18). Jesús feipifi tañi pu inanieteu ñi llohual quiñe falin-ngechi familia trahunche mu (Mar. 10:29, 30). Cafei Jehová feipi ñi quelluafiel com tañi pu serfiqueteu (Sal. 9:10). w21.06 pag. 8, 9 parr. 3, 4

Tati pu che famentuqueiñmu. ¿Chumngelu? Iñchiñ, Biblia mu, quimfalcünuqueiñ coilaque quimeltun. Tati pu loncolechi religioso quimeltuquefi tañi inanieteu ñi mülequen quiñe infierno, “üye mu Chau Dios castigaquefi pu huesaque che” piqueingün. ¿Chumngelu femngechi quimeltuqueingün? Ñi llicalcapenoafiel pu che, fei ñi inanieaeteu engün. Huelu iñchiñ pu testigongen quelluquefiyiñ ta che ñi quimal engün ñi coilangen feitachi quimeltun. Pu loncolechi religioso ca quimeltuquei ñi laquenon tati alma. Huelu laquenole tati alma, duamlayafuiñ ñi huiñomongetual ta che. Fei iñchiñ quimeltuchequeiñ feitachi quimeltun mülelai Biblia mu. Cafei fentren religion quimeltuquei Chau Dios deu feipicünueiñmu chem taiñ chumal. Huelu iñchiñ quimeltuchequeiñ ñi rüfngenon tüfa. Caque quiñeque iñchiñ Chau Dios elueiñmu taiñ dullial chem chumal, cafei taiñ serfiafiel cam taiñ serfinoafiel. Fei, ¿chumqueingün pu religioso? Allcün mu tüfa, illcuqueingün. Rüf falintufilmi ti rüf dungu, inayaimi chem tami feipieteu Jehová (Juan 8:45, 46). Huecüfü famentufi ti rüf dungu, huelu iñchiñ turpu famentuulayaiñ ti rüf dungu mu (Juan 8:44). Chau Jehová feipieiñmu taiñ üdeafiel ti huesaque dungu ca inayaiñ ti cümeque dungu chumngechi ñi femün Jesús (Rom. 12:9; Heb. 1:9). w21.05 pag. 10, 11 parr. 10, 11

Mallmangerpuliyin cam diñmatufengerpuliyin, ¿chumafuiñ? Pablo feipi iñchiñ ngünencaeliyiñmu Huecüfü femngechi dungu mu, montuafuiñ (2 Tim. 2:26). Loncontucuaiñ: Jehová doi nehuen-ngei Huecüfü mu. Feimu eluuliyiñ taiñ quelluaeteu, Huecüfü ngünencalayaiñmu. Eluulayaiñ taiñ mallmangenoal ca diñmatufengenoal. ¿Chem quelluafeiñmu? Jehová llemai. Müna cümei taiñ ngüneduamuhual chem ñi mülen taiñ piuque mu. Taiñ femngechi femal fill antü llellipuafiyiñ ta Jehová taiñ quelluaeteu (Sal. 139:23, 24). Alün tripantu mu ti Huecüfü mequei ñi ngünencacheal. Huelu pichiñma mu, traringeai ca apümcangeai (Apoc. 20:1-3, 10). Rume ayünieiñ ñi ngehuenoal ti Huecüfü. Huelu petu ñi apümcangenon, trepeluucüleaiñ taiñ ngünencanoaeteu, fei eluhuaiñ taiñ mallmachengenoal ca diñmatufengenoal. Inayafiyiñ tüfachi ngülam: ‘Nehuentuumün tamün ngünencanoaeteu ta Huecüfü, fei tüfa lefmautuai ta eimün meu’. w21.06 pag. 19 parr. 15-17

Quiñe che inafile tañi quimürpuel fei enseñalchele, Jehová rume ayühuai (Prov. 23:15, 16). Famülque mu, Jehová adquintuquei taiñ femmequen fei rume ayüuquei. Por ejemplo, septiembre 2019 tripantu mu puulu agosto 2020 tripantu mu 7.705.765 che estudialngei Biblia, fei engün mu 241.994 che fautizahuingün. Feitachi pu che fautizaulu ca quelluafingün caquelu pu che ñi discipulongerpual (Luc. 6:40). Com tüfachi cümeque dungu rupai mülelu rume quiñe pandemia. Feimu llemai, quellufiliyiñ tati pu che ñi discipulongerpual, ayühulafiyiñ Chau Jehová ñi piuque. Taiñ quelluafiel quiñe che ñi discipulongerpual mülei taiñ rume cüdahual, huelu Jehová quelluaiñmu taiñ femal. ¿Eluupeafuimi mai tami estudialelafiel Biblia quiñe che rehuall? Com tati pu che taiñ nütramcaquefiel ofrecelelafuiñ estudio. Afmatuafuiñ chem tañi feipial engün. w21.07 pag. 6, 7 parr. 14-16

Ti rey David quelluntucui alün plata mu, huelu ca huli tañi falinque chemcün ñi deumangeal ti ngillatuhue ruca (1 Crón. 22:11-16). Iñchiñ taiñ füchan mu, quelluhuelayafuiñ ñi deumangeal ta Trahunhue Ruca. Huelu ca quelluntucuafuiñ plata mu, nieliyiñ. Ca femngechi pu fütaqueche com tañi quimürpuel quelluafui tati pu huechequeche. Peaiñ ñi chumün ta Pablo. Pablo compañtufi ta Timoteo ñi amual tañi fillque viaje mu. Cafei Pablo ayühunquechi pengelelfi ta Timoteo chumngechi ñi amuldunguchequen ca quimeltuchequen (Hech. 16:1-3). Felei, Pablo pepicafi ta Timoteo ñi doi cüme amuldungucheal (1 Cor. 4:17). Fei ca femngechi Timoteo pepicafi ta caquelu che. w21.09 pag. 12 parr. 14, 15

¿Chem quimürpuafuiñ Apolos ca tati apostol Pablo mu? Fei engu rüf cüme quimniequefuingu Jehová tañi huirintucuel. Mür quimniengequefuingu tañi cüme enseñachequen engu. Mür engu quelluquefingu fentrenque che ñi discipulongerpual. Femfulu rume, ütriruuquelafuingu (Hech. 18:24). Apolos amutulu Corintio huaria mu, Pablo feipieyu ñi huiñotual (1 Cor. 16:12). Apolos tañi adümuhun mu eluhui tañi amuldungual ca ñi yafültucuafiel tañi pu peñi, pu lamngen. Cafei Apolos ñom piuquengequefui. Quiñe rupa, Áquila Priscila engu quellufingu ta Apolos ñi doi cüme adümafiel Jehová tañi huirintucuel. Biblia feipilai Apolos ñi illcun, feimu feipiafuiñ Apolos ñi ñom piuquengen (Hech. 18:24-28). Ti apostol Pablo cüme quimniefui ñi fente cüme cüdauquefel ta Apolos. Huelu Pablo huesa duamlai, ñom piuquengefui. ¿Chumngechi quimiyiñ tüfa? Inaduamliyiñ Pablo ñi huirintuculelfiel pu corintoche, quimafuiñ ñi ñom piuquengen ta Pablo (1 Cor. 3:4-6). w21.07 pag. 18 parr. 15-17

Adán engu Eva quisu tañi duam mu famentuhuingu Jehová mu, feimu mülefui ñi quechanentungeal Jehová ñi familia mu. Huelu ¿iñchiñ cai? Jehová fente taiñ piuqueyeteu mu, huli tañi saquin Fotüm ñi layal iñchiñ mu. Femngechi com pu feyentuquefilu ta Jehová, coneltuafui Jehová ñi fütra familia mu (Juan 3:16). Jesús tañi duam mu, Jehová fotüm ca ñahue reque llohuafui ta 144.000 che (Rom. 8:15-17; Apoc. 14:1). Cafei famülque mu, fentrenque che poyeniequefi ta Jehová. Fei engün maneluucüleingün ñi yallyeaeteu Jehová afle ti huaranca tripantu ñi ngünenieel Jesús (Sal. 25:14; Rom. 8:20, 21). Fachantü “Chau” piquefingün ta Jehová (Mat. 6:9). Cafei tati pu huiñomongetulu ca quimürpuafuingün ta Jehová. Fei cüme lloufile Jehová tañi dungu, ca coneltuleafuingün Jehová tañi familia mu. w21.08 pag. 5 parr. 10, 11

Ti apostol Pablo elfalcünungei ñi amuldungual, fei pengeli ñi rume falintuquefiel ti amuldungun cüdau. Pablo cheu rume miyahui che, amuldungulelquefi ca fill ruca püle (Hech. 20:20). Pablo fill semana ca chem hora rume amuldunguchequefui. Por ejemplo, Pablo petu üngümniefilu ta Silas ca Timoteo, amuldungulelfi quiñeque quim che, fei quiñeque engün feyentuingün (Hech. 17:16, 17, 34). Cafei, presulelu rume tañi ruca mu, Pablo amuldungufi tati pu soltau ca tañi pu pemequeteu (Hech. 28:16-24; Filip. 1:13, 14). Pablo rume huimtulequei tañi compañaeteu amuldungual caquelu pu che. Por ejemplo, quiñe rupa Pablo feipifi ta Juan Marcos ñi compañaeteu amuldungual. Ca rupa, feipifi ta Timoteo ñi compañaeteu (Hech. 12:25; 16:1-4). Fei Pablo pepicafi engu tañi cüme adcünuafiel ti trahunche, ñi cüme cuidayafiel ti trahunche ca ñi cüme quimeltuchefengeal (1 Cor. 4:17). w22.03 pag. 27 parr. 5, 6

Quiñeque che feipiquei: “Iñche feyentuquen tañi pequeel meu müten, feimu feyentuquelan Chau Dios mu”. Felefulu rume, quiñeque mu feyentuqueingün tañi pequenoel engün. Por ejemplo, feyentuqueingün tati cürüf meu. Pengequelafui rume, huelu quimfali ñi mülen. Fei ca femngechi pu feyentuquelu Ngünechen mu maneluuquei ñi mülen ta Dios. ¿Chumngelu? Pengenolu rume ta Chau Dios, quimfali tañi mülen (Heb. 11:1). Duamnieiñ tiempo taiñ quisutu ngüneduamal ñi rüf mülepen mai ta Chau Dios. Huelu pütrüquen che cüdautuquei ñi femal tüfa. Quiñe che ngüneduamnole ñi rüf mülepen mai ta Chau Dios, turpu feyentulayai. Quiñeque cientifico ngüneduamingün Chau Dios ñi deumael ca Biblia ñi feipin, fei feyenturpuingün. Quiñeque cientifico universidad mu enseñangequelafuingün Chau Dios ñi deumafiel com ti mülelu, feimu feyentuquelafuingün. Femfulu rume, fentren cientifico quimürpufingün ca piuqueyerpufingün ta Jehová. Chumten educacion niefuliyiñ rume, iñchiñ ca duamnieiñ taiñ doi nehuentuleal taiñ feyentulen ta Jehová mu. w21.08 pag. 14 parr. 1; pag. 16 parr. 6, 7

Jesús feipi quiñe pengelün dungu tañi quimeltual Jehová ñi cutranpiuqueyechefengen. Tüfa nütramcai quiñe hueche mu. Feitachi hueche tripai tañi ruca mu, cañpüle amui, fei coni huesaque dungu mu (Luc. 15:13). Rupayechi antü mu, feitachi hueche huiñoduamtui fei huiñotui tañi ruca mu. ¿Chumi tañi chau? Pefilu ñi püllelepan tañi fotüm, rume cutranpiuqueyefi. Fei lefi ñi trafmeafiel, pancofi ca piuqueyenquechi trepetucafi. Ti chau yehuelcalafi tañi fotüm, doi mai cutranpiuqueyefi ca perdonafi. Ti hueche rume huesaque dungu mu confui, huelu rüf huiñoduamtulu am, tañi chau perdonaeyu. Jesús tañi nütram mu, ¿inei mu am adentulei ti chau? Jehová mu llemai. ¿Chem cüpa quimeltui Jesús? Chau Jehová eluucülei ñi perdonayafiel pu rüf repentiuquelu (Luc. 15:17-24). w21.10 pag. 8 parr. 4; pag. 9 parr. 6

Pu Dunguquelu Ineingen Jehová, ¿fei engün müten quimelchequeingün Chau Jehová tañi üi? Raquiduamnge tüfa. Fentren loncolechi religioso ellcalingün Chau Jehová tañi üi. Biblia meu entuquefingün Chau Dios ñi üi ca catrütuquefingün tati pu che ñi üitunoafiel ta Chau Dios. ¿Iñchiñ cai pu testigo? Fentren che rume entucünulu Chau Dios ñi üi Biblia meu, huelu iñchiñ huirintucuquefiyiñ Chau Dios ñi üi taiñ Biblia meu, Traducción del Nuevo Mundo pingelu. Cafei doi mil quehun mu entuqueiñ fillque publicacion tuulu Biblia meu. Tüfa meu ca huiriconcülei Chau Dios tañi üi. ¡Quimfali llemai! Iñchiñ müten pu Dunguquelu Ineingen Jehová, yamquefiyiñ Chau Jehová tañi üi. Iñchiñ doi quimelelquefiyiñ tati pu che Chau Jehová tañi üi. Trürümngelayafuiñ caquelu religion mu. Felei llemai, ¡com taiñ nehuen mu dunguqueiñ ineingen Jehová! (Is. 43:10-12). w21.10 pag. 20, 21 parr. 9, 10

Quelluntucufiel mu pu peñi ca pu lamngen duamnielu quellu, poyequefiyiñ ta Jehová. Jehová feipifi tati pu israelche quellufile engün tati pu pofre, fei Jehová cümelcayaeyu (Deut. 15:10). Quellufilu iñchiñ taiñ pu peñi ca pu lamngen, quiñe mañumtun reque eluquefiyiñ ta Jehová (Prov. 19:17). Por ejemplo, presuntucungelu ta Pablo, pu cristiano mülelu Filipos huaria mu, huercülelfingün regalo ta Pablo. Pablo feipi feichi regalo quiñe chalintucun reque felei Jehová tañi ayünieel (Filip. 4:18). ¿Iñchiñ cai? ¿Chumafuiñ? Ramtuhuafuiñ: “¿Quelluafun quiñe peñi cam quiñe lamngen trahunche mu?”. Iñchiñ hulün mu tiempo, nehuen, adümuhun ca taiñ plata taiñ quellucheal, Jehová ta ayüuduamquei. Ca feipiquei: “Tüfa iñche ta poyequeneu” (Sant. 1:27). Taiñ poyeafiel Jehová chumngechi ñi ayüqueel, duamnieiñ tiempo. Ca mülei taiñ femal fillque dungu. Huelu ayühunquechi femquefiyiñ (1 Juan 5:3). ¿Chumngelu? Fente taiñ piuqueyefiel mu ta Jehová ca taiñ pu peñi ca pu lamngen. w22.03 pag. 24 parr. 14, 15

Raquiduamliyiñ chumngechi ñi rupaquen taiñ pu peñi ca pu lamngen, femngechi doi eluucüleaiñ taiñ quelluafiel taiñ pu peñi ca lamngen. Quiñe ejemplo: quiñe lamngen rume cutrancülele, huelu feipiquelai ñi cutrancülen. Huelu doi ayüupelayafui quellufiliyiñ. Cam rume cüdautuquei chi ñi eluafiel iyael tañi familia. Cümeafui taiñ deumalelafiel iyael ca liftulelafiel ñi ruca. Cangelu ejemplo: quiñe peñi niehuelai chi cüdau. Cümeafui taiñ quelluafiel pichin plata mu, pele cüdau hula. Cümeafui chi ñi quimnoal inei ñi quellueteu. Jehová eluñmaquefi ñi tripayal ta antü, taiñ pedinofiel mu rume. Ti eñum antü puuquei ti mañumquelu mu ca mañumquenolu mu rume. Eluqueiñmu taiñ duamnieel, Jehová femngechi pengelquei taiñ piuqueyenieteu. Rume piuqueyefiyiñ ta Jehová tañi piuqueyechequen mu ca tañi quelluchequen mu. Jehová reque ca femngechi iñchiñ eluucüleaiñ taiñ quelluafiel taiñ pu peñi ca lamngen, “quelluen” pinole rume. w21.09 pag. 23 parr. 12, 13

Fente taiñ rüf piuqueyenieteu mu Jehová, perdonaqueiñmu. Quiñe che huesa culpan mu huelu rüf repentiulu, Jehová perdonaqueyu. Ti salmista David feipi Jehová huiñoleltuquelaeiñmu taiñ huesa femün mu (Sal. 103:8-11). Culpalu ta David, quisu cutrantupiuquelequefui feimu quisu culpahui ca müna hueñancülequefui. Huelu David quimürpui Jehová eluucülei tañi perdonayaeteu. ¿Chemu perdonachequei ta Jehová? Tañi rüf piuqueyechen mu. Quisu “perdonaen” pingen mu, eluucülequei ñi perdonacheal. Culpan mu iñchiñ, cümei taiñ huesa duamal. ¿Chumngelu? Femngechi müten eluucüleafuiñ taiñ pedial ta perdon ca norümtuafuiñ taiñ huesa femün. w21.11 pag. 5 parr. 11, 12

Jehová rume falintuquei tañi üi, fei ayüquei ñi yamniengeal (Isa. 42:8). Huelu fentren tripantu mu yamngequelai (Sal. 74:10, 18, 23). Huecüfü coila mu dalluntucufi ta Chau Dios. Fei feipi Jehová pilai ñi nieal ta ayühun Adán engu Eva (Gén. 3:1-5). Fantepu mu ca femngechi dalluntucungequei ta Chau Dios. “Ngünechen pilai ñi ayüucüleal ta che” pingequei. Jesús rume preocupaucülefui ñi huesa dunguyengequen Chau Dios tañi üi. Jehová müten felei ñi ngünenieal com mülelu huenu mu ca Mapu mu. Inei no rume doi cüme ngünenielayafui (Apoc. 4:11). Huelu ti Huecüfü raquiduamelfi pu cümeque püllü ca tati pu che Chau Dios felelai ñi ngünenieal com dungu. Pichiñma mu, com tati pu che quimai Jehová müten ti doi cüme gobernantengei ca ngünenietule, rüf cüme feleaingün tati pu che. w21.07 pag. 9 parr. 5, 6

Tati pu ngen familia ayüquei ñi cüdahual ñi eluafiel com tañi duamnieel tañi pu che. Eimi müte nielaimi chi plata, feimu müte nielaimi chi tami duamnieel. Müna huesa dungu tati. Femülmi rume, eluunge tami doi maneluhual Jehová mu. ¿Chumngechi femafuimi? Llellipuafimi Jehová ca papeltuafimi ca raquiduamaimi ñi feipin Mateo 6:25-34. Ca raquiduamafuimi ñi rupan quiñeque peñi ca quiñeque lamngen. Fei engün huesaque dungu rume rupafulu, fentecünulaingün tañi poyeafiel Jehová. Fei Jehová quellueyu engün (1 Cor. 15:58). Femülmi, doi maneluhuaimi tami quisucünunoaeteu Jehová. Quisu fente cüme quimniei chem tami duamnieel, chumngechi rume eluafeimu. Pefilmi chumngechi tami cümelcaqueteu Jehová, doi maneluhuaimi quisu meu. Ca nehuencüleaimi tami chaftuafiel doi huesaque dungu rupafulmi cüpalechi antü meu. w21.11 pag. 20 parr. 3; pag. 21 parr. 6

Fentren peñi, lamngen, pu füchalelu cütu rupaqueingün huesaque dungu mu, huelu nehuencüleingün ca fentecünulaingün ñi amuldungual. ¿Chumngelu? Rume maneluucüleingün Jesús ñi lan mu. Peaiñ ñi rupan ti apostol Juan. Fei doi 60 tripantu amuldungufui peno Jesús ñi lan mu. Epe nielu 100 tripantu ti apostol Juan petu amuldungumequefui, fei pu romano “rume cuñihun-ngei ñi femmequen tüfachi huentru” pingün. Feimu presuntucueyeu ca yeeyeu Patmo pingechi huapi mu (Apoc. 1:9). Rume inayentufali ñi femün ti apostol Juan. Ti apostol Juan huirintucui fente ñi mañumün Jesús ñi hulün ñi mongen mu. Ca huirintucui chumngechi cümelcaqueiñmu tüfa. Doi 100 rupa nütramcai tüfa mu (1 Juan 2:2). Quimfalcülei ta Juan fente ñi mañumün Jesús ñi hulün ñi mongen. Iñchiñ ca femngechi pengelafuiñ taiñ mañumcülen. w21.04 pag. 17 parr. 9, 10

Cuifi mu, Jehová ayüquefui tañi pu che ñi cutranpiuqueyeafiel tati pu encañngechi che. Por ejemplo, Jehová huercüfi tati pu israelita ñi huesa pinoafiel pu pilungechi che. Femfule tüfa engün, müna huesa dungungeafui. Pilungelu cai ti che, pepi incaulayafui. Ca Jehová feipifi pu israelita ñi tucunoal chem no rume tañi tranaconnoal quiñe traumalechi che. Quiñe lifru feipi pu encañngechi che mu: “Cuifi mu, Israel mapu meu, rume huesalcangequefui pu encañngechi che” pi. Quiñeque pu che tucuquefui chi cura cam mamüll ñi tranaconal feiti traumalechi che, femngechi tañi ayentucuafiel ca huesalcayafiel. Tüfa rume huesa dungungefui. Feimu Jehová tañi Ley quimeltuquefi tati pu israelita ñi cutranpiuqueyeafiel pu encañngechi che. w21.12 pag. 8, 9 parr. 3, 4

Jacob llicalefui Esaú mu. Ramtuuquefui chi: “¿Petu üdeniecapelaeneu tañi peñi?”. Feimu llellipufi Jehová. Fei hula, huercülelfi quiñe falin regalo (Gén. 32:9-15). Cafei chaf trahuluulu engu, Jacob regle rupa lucutunagi Esaú mu. Femngechi pengelelfi tañi yamniefiel. Femngechi mu, Jacob ñom piuque mu cümelcautui tañi peñi engu (Gén. 33:3, 4). ¿Chem quimeltun entuafuiñ Jacob tañi femün mu? Hunelu mu, feipifi Jehová ñom piuque mu tañi quelluaeteu. Epu, deu llellipufilu Jehová, Jacob femi tañi feipifiel, femngechi ñi cümelcautual tañi peñi engu. Ca cüla, Jacob feipilafi tañi peñi “eimi ta huelulcahuimi”. Doi mai, cüme nütramcafi ñi cümelcautual engu. ¿Inahuentuafuimi mai ta Jacob? (Mat. 5:23, 24). w21.12 pag. 25 parr. 11, 12

Quimnieiñ Jesús ñi lapan com iñchiñ mu. Huelu quiñeque mu taiñ piuque ngünencayafeiñmu. Feimu “falinolu troquiuquen, inei no rume piuqueyelayafeneu” piafuiñ chi (1 Juan 3:19). Feimu huesa duamcüleafuiñ. “Iñche tañi culpan perdonangequelai” piafuiñ. Femngechi raquiduamcüleliyiñ, loncontucunieaiñ Chau Jehová ‘doi fentrei iñchiñ taiñ piuque meu’. Quiñeque mu raquiduamafuiñ “Jehová piuqueyelaeneu, perdonaquelaeneu rume”. Huelu, ¡feingelai tati! Taiñ Chau Jehová piuqueyeiñmu ca perdonaqueiñmu llemai. Cüdautufuliyiñ rume, piuquentucunieafiyiñ tüfachi quimeltun. ¿Chumngechi femürpuafuiñ? Mülei taiñ papeltunieafiel Biblia, llellipunieafiel ta Jehová ca hueniyeafiel taiñ pu peñi, pu lamngen. ¿Chemu fente falin-ngei taiñ femal? Femliyiñ, doi cüme quimürpuaiñ fente ñi cüme piuquengen ta Chau Jehová ca fente taiñ piuqueyenieteu. Fill antü raquiduamliyiñ ñi chem pilen ta Biblia, doi cüme raquiduam nieaiñ taiñ piuque mu ca taiñ lonco mu (2 Tim. 3:16). w21.04 pag. 24 parr. 12, 13

Taiñ doi maneluhual Jehová mu, ngelai taiñ re papeltuafiel Biblia taiñ nieal quimün müten. Mülei taiñ raquiduamal taiñ petu quimelchi dungu meu. Peaiñ chem ñi rupan ti huentru huirintuculu ti Salmo 77. Fei huesa duamcülequefui. ¿Chumngelu? Raquiduamquefui Jehová ñi quelluhuenofiel pu israelita. Pun cüme umautuquelafui rume (Sal. 77:2-8). Fei ramtuuquefui: “¿Ngoimaquepeiñmu mai ta Chau Dios taiñ füreneaeteu? ¿Cam fente tañi lladcülen mu cutrantupiuqueyehuequelaeiñmu?” (Sal. 77:9). Fei, ¿chumi? Feipifi ta Jehová: “Raquiduamtucuniean com tami femqueel, ca cüme ngüneduamnieafiñ chumngechi tami yeuquen caquelu engün” (Sal. 77:12). Tüfachi salmista quimniefui Jehová ñi chumngechi quelluquefiel ca cutranpiuqueyequefiel tañi pu che cuifi (Sal. 77:11). Raquiduamlu tüfa mu, doi maneluhui Jehová ñi turpu quisucünunoafiel tañi pu che (Sal. 77:15). w22.01 pag. 30 parr. 17, 18

Jehová rume ayüniei tañi huiñopetuafiel com tañi pu hueni lalu (Job 14:15). Rume echamenoquepelafi tañi hueni Abrahán (Sant. 2:23). ¿Tañi cüme hueni Moisés cai? Ca ayüniepelafui tañi huiñonütramcatuafiel (Éx. 33:11). Ca ayüniepelafui tañi huiñoülcantulelaeteu ta David cam caquelu salmista (Sal. 104:33). Com lafuingün rume Jehová tañi pu hueni cuifi mu, quisu ngoimaquelafi (Is. 49:15). Jehová acordaquefi caque quiñeque ñi chumngequefel engün. Cüpalechi antü mu, Jehová huiñomongeltuafi tañi pu hueni. Fei ca huiñoallcütuafi tañi llellipueteu engün ca rume ayühuai ñi huiñopüramyetuaeteu engün. Fei eimi layeluulimi, müna yafültucupelayafeimu tüfa. Culpalu ta Adán engu Eva, Jehová quimniefui tañi doi huesalcalerpual ti dungu. Famülque mu tati pu che quehuatufengei ca huesalcachequei. Jehová ayüquelai ta tüfa. w21.07 pag. 12 parr. 11, 12

Piuqueyeafiyiñ com taiñ pu peñi ca pu lamngen. Femngechi pengelaiñ taiñ mañumün Jesús ñi hulün tañi mongen. ¿Chumngelu? Jesús fente ñi piuqueyefiel tati pu che huli ñi mongen itrocom che mu (1 Juan 3:16-18). ¿Iñchiñ cai? Duamtufiliyiñ taiñ pu peñi ca pu lamngen, pengelafiyiñ taiñ piuqueyeniefiel (Efes. 4:29, 31–5:1, 2). ¿Chumafuiñ fei engün mu? Quiñe tüfa cutrancülele ca rupale quiñe huesa dungu mu, quelluafuiñ. Huelu huesa pieliyiñmu quiñe peñi cam quiñe lamngen, com taiñ mongen illcutunieafuiñ chi. Fei ¿chumafuiñ? (Lev. 19:18). Inayaiñ chem pin Biblia: “Huesa femngelmün illcutunieulayaimün, hueluquentu perdonahuaimün com piuque mu, huesalcangelmün rume. Chau Jehová com piuque mu rulpacünui com tamün huelulcan, feimu ca femngechi femqueaimün” (Col. 3:13). Perdonaliyiñ taiñ pu peñi, pu lamngen, pengelquefiyiñ ta Jehová taiñ mañumcülen Jesús ñi hulün ñi mongen. w21.04 pag. 17, 18 parr. 12, 13

Iñchiñ müna cüdauquefuiñ chi Jehová mu, yequefiyiñ pütrünque che ñi fautizahual. Huelu com taiñ cüdau taiñ femqueel, quisu taiñ duam mu femquelaiñ, Jehová mai quelluqueiñmu. ¿Ca chem quimeltueiñmu Apolos ca ti Apostol Pablo ñi femün? Doi falinque cüdau niefuliyiñ trahunche mu, doi eluucüleaiñ taiñ quelluafiel ti trahunche ñi quiñeucüleal. Ti pu loncolelu ca tati pu siervo ministerial ngülamtueteu Biblia mu, quelluqueiñmu taiñ quiñeucüleal ca taiñ cüme feleal, feimu müna mañumtuquefiyiñ. Cafei doi falilu troquiuquelaingün, doi mai quelluntucuquefi tati trahunche ñi allcütuafiel ta Jesús ca ñi inayentuafiel (1 Cor. 4:6, 7). Caque quiñeque iñchiñ Jehová elueiñmu adümuhun. Huelu “nehue falilai tañi femquen” piliyiñ, ¿chem quelluafeiñmu? Raquiduamaiñ tüfa: deumangele quiñe ruca, pichiquen trafla tucuniengerpule, nehuentulerpuafui. Fei ca femngechi iñchiñ pichiquen dungu rume femfuliyiñ trahunche mu, quelluntucuafuiñ ñi nehuentulerpual ca quiñeucülerpual. Eluulayaiñ taiñ doi cümelu troquiaeteu caquelu pu che. Doi mai eluucüleaiñ taiñ quelluntucuafiel ti trahunche fei ñi quiñeucüleal ca ñi cüme feleal (Efes. 4:3). w21.07 pag. 19 parr. 18, 19

Eimi ca maneluucüleafuimi tami petuafiel tami poyenque pu che lalu cuifi. Feimu lalu tañi pu hueni, Jesús yafültucufi tati pu ngen familia, ca inaye ngümai fente ñi hueñancülen. ¿Chem pengeleiñmu tüfa? Jesús rume ayüniei ñi huiñomongeltuafiel pu la (Juan 11:35). Eimi quelluafuimi tati familia layeluulu. Jesús re ngümalai müten Marta ca María engu, doi mai cüme allcütufi ca yafültucufi (Juan 11:25-27). Iñchiñ ca femngechi femafuiñ. Quiñe loncolelu Australia mapu mu tuulu, Dan pingelu feipi: “Lalu tañi domo duamniefun ñi yafültucungeal. Alünque curehuen eluucülefui tañi allcütuaeteu. Allcütueneu engün tañi chem duamcülen ca peeneu tañi ngümamequen. Ca eluucülei tañi quelluaeteu engün tañi cüchalelaeteu tañi auto. Cafei ngillacalmeneu supermercado mu, ca deumaleleneu iyael. Ca quiñeque mu, ngillatuquefuingün iñche mu. Fei engün rüf pengeli tañi hueniyeteu huesalcalen mu iñche” (Prov. 17:17). w22.01 pag. 16 parr. 8, 9

Jehová ayüniei iñchiñ taiñ cümelcaleal (Prov. 4:20-22). Jehová ngülamtueliyiñmu Biblia mu, taiñ publicacion mu ca quiñe peñi cam lamngen ñi feipin mu, femngechi pengelquei taiñ rume piuqueyenieteu (Heb. 12:9, 10). Raquiduamlayaiñ chumngechi taiñ feipingeel ti ngülam, doi mai chumngechi taiñ quelluaeteu. Quiñeque mu raquiduamafuiñ taiñ elueteu ti ngülam müte cüme dungulai. Tati ngülamtuchequelu mülei ñi ñochi dungual ca cüme entual ñi cüpa feipin, femngechi ñi cüme lloungeal ti ngülam (Gál. 6:1). Huelu iñchiñ ngülamtungeliyiñ, mülei taiñ raquiduamal chumngechi taiñ quelluafeteu ti ngülam, raquiduamliyiñ rume taiñ huesa feipingeel ti ngülam. Ramtuhuafuiñ: “Ayünofuli rume chumngechi tañi feipingeel ti ngülam, ¿chumngechi quelluafeneu? ¿Rulpacünupeafun mai ñi culpafechengen tañi ngülamtueteu? Ca, ¿raquiduamafun ti ngülam mu müten?”. Chem ngülam rume elungeliyiñ, mülei taiñ quintual chumngechi taiñ cümelcayafeteu müten. Femngechi femliyiñ, pengelaiñ taiñ quim chengen. w22.02 pag. 12 parr. 13, 14

Jehová quimniei iñchiñ cüdautuafuiñ ca alüñmayafuiñ taiñ famentuafiel huesaque raquiduam ca huesaque huimtun (Sal. 103:13, 14). Huelu Jehová quelluqueiñmu ca eluqueiñmu quimün taiñ cacünutual taiñ mongen. ¿Chumngechi quelluqueiñmu? Biblia mu, tañi nehuen mu ca tañi troquiñche mu. Papeltuafimi Biblia tami cüme ngüneduamuhual. Biblia quiñe espejo reque felei. Quelluafeimu tami cüme ngüneduamuhual tami raquiduam, chumngechi tami dunguquen ca chem tami femquen (Sant. 1:22-25). Jehová rumel mülequei tami quelluaeteu. Inei rume quellulayafeimu Jehová reque, quisu am quimniefilu tami piuque (Prov. 14:10; 15:11). Fill antü llellipuafimi Jehová ca papeltuafimi Biblia, rumel femqueaimi tüfa. Raquiduamtucuaimi Chau Jehová ñi huercün dungu doi cümei. Chem dungu rume feipielmu Jehová tami femal, cümelcayaimu. Pu inaquefilu Chau Jehová ñi huercün dungu ayüucülequei ñi piuque (Sal. 19:7-11). w22.03 pag. 4 parr. 8-10

Deumafiel mu Trahunhue Ruca ca cüme adcünufiliyiñ, poyequefiyiñ ta Jehová. Biblia feipi pu huentru ñi deumafiel mu ti tolto ruca ca ti fillque chemcün ñi nieel, püramyefingün Jehová (Éx. 36:1, 4). Famülque mu, iñchiñ deumafiel mu Trahunhue Ruca ca caquelu ruca poyengeam ta Jehová, pengelelquefiyiñ ta Jehová taiñ poyequefiel. Quiñeque peñi ca quiñeque lamngen rume quelluntucuqueingün tüfachi cüdau mu. ¡Rume falintuquefiyiñ tañi cüdau engün! Huelu feichi cüdau müten femquelaingün, ca amuldunguqueingün. Quiñeque engün ca ayüafuingün tañi huneleal amuldungun mu. Fei engün pepi precursorngefule, tati pu loncolelu catrütulayaeyu tañi precursorngeal. Ñi femngechi femün mu pu loncolelu, quelluntucuqueingün ti cüdau ñi deumangeal Trahunhue Ruca. Adümuunoliyiñ rume taiñ deumarucayal, com iñchiñ quelluntucuafuiñ ñi lifcüleal ca ñi cüme adcüleal taiñ Trahunhue Ruca. w22.03 pag. 22 parr. 11, 12