Diciembre

Tati pu ufisa quimüñmafingün tañi pastor ñi dungun, feimu inaquefingün. Feimu Jesús trürümfi tañi pu discipulo ufisa meu. Jesús taiñ pastor reque felei, feimu iñchiñ inaquefiyiñ (Juan 10:14). Peaiñ ñi rupan quiñe huentru. Fei feipi: “Quiñe rupa ayüfun ñi entufotoafiel pu ufisa. Ayüfun tañi quisutu fülconpayal iñche meu, huelu femlaingün, quimüñmanoeteu am iñche tañi dungun. Fei acurumei quiñe pichi pastor, fei dungueyu fei inafemfingün”. Ñi rupan feitachi huentru, acordalqueiñmu Jesús tañi feipin. Jesús feipi tañi pu discipulo, ufisa reque felelu, ñi allcütuñmayaeteu tañi dungun. Huelu Jesús mülei huenu mu, ¿chumngechi allcütuñmayafuiñ tañi dungun? Inaniefiel mu iñchiñ taiñ quimeltueteu ta Jesús, allcütuñmaquefiyiñ reque tañi dungun (Mat. 7:24, 25). w21.12 pag. 16 parr. 1, 2

Tati apostol Pablo inantucuquefui pu cristiano. Huelu rupalu ta antü, Pablo quimtucui ñi huesa femün, fei eluhui ñi cüme elcünutual ñi chumngechi chengen ca tañi raquiduam (1 Tim. 1:12-16). Jehová ñi quellun mu, Pablo loncolerpui trahunche mu, rume piuqueyechequefui ca ñom piuquengequefui. Pablo maneluhui Jehová ñi perdonayafeteu (Rom. 7:21-25). Cafei rume cüdahui ñi doi cüme cristianongeal ca maneluhui Jehová mu ñi quelluaeteu huechunentual ñi cüdau (1 Cor. 9:27; Filip. 4:13). Com pu loncolelu huelulcahuafui. Jehová ayülei pu loncolelu ñi quimtucual tañi huelulcauquen ca ayülei tañi doi cüme cristianongeal engün (Efes. 4:23, 24). Pu loncolelu chillcatulu Biblia engün mülefui ñi quisutu ngüneduamuhual, femngechi ñi quimal chumngechi doi cüme cristianongeafuingün. Femngechi femle engün, Jehová quelluaeyu tañi doi cüme loncoleal trahunche mu, fei ñi ayüucüleal (Sant. 1:25). w22.03 pag. 29, 30 parr. 13-15

¿Chumafuiñ ngüneduamliyiñ taiñ juzgamequefiel quiñeque peñi ca lamngen? Ngoimanentulayaiñ taiñ piuqueyeafiel taiñ pu peñi ca pu lamngen (Sant. 2:8). ¿Ca chumafuiñ? Llellipuafiyiñ Jehová taiñ quelluaeteu, femngechi taiñ juzgahuenoafiel taiñ pu peñi ca pu lamngen. Ca eluhuaiñ taiñ fülcontuafiel ca nütramcayafiel engün. Cafei compañtuafuiñ taiñ amuldungual, ca mangelafuiñ tañi imeal taiñ ruca mu. Doi quimnierpufiliyiñ taiñ pu peñi ca pu lamngen, inaduamüñmayafiyiñ tañi cüme chengen engün ca tañi cüme serfiquefiel ta Jehová. Femngechi inayentuafiyiñ Jehová ca Jesús tañi femün. Cafei inayafiyiñ taiñ feipieteu Jesús taiñ juzgachenoal. Chumngechi pu ufisa allcüñmafingün tañi pastor ñi dungun, iñchiñ ca femngechi allcüñmaquefiyiñ Jesús tañi dungun. Coneltuliyiñ ti “pichi quechan ufisa” mu cam coneltuliyiñ ti pu “caquelu ufisa” mu, com iñchiñ allcütuñmayafiyiñ ca inayafiyiñ Jesús tañi dungun (Luc. 12:32; Juan 10:11, 14, 16). w21.12 pag. 19 parr. 11; pag. 21 parr. 17, 18

Rehoboam reyngelu Israel mapu mu, pu israelita feipieyu ñi elunoafiel fentren cüdau. Fei Rehoboam amui ñi ramtumeafiel pu loncolelu Israel mu ñi chem piaeteu. Cüme femi Rehoboam. Fei engün ngülamtueyu tañi femal chem ñi pedimequeteu ti Israel troquiñche, femngechi femle cüdahuelnieaeyu engün (1 Rey. 12:3-7). Huelu Rehoboam ayülafi chi ti ngülam, fei amui ñi ramtumeafiel ti pu huentru fei engün ñi quiñentrür tremün. Fei engün elueyu huesa ngülam, “doi cüdau eluafimi pu israelche” pieyu engün (1 Rey. 12:9-11). Rehoboam mülefui ñi ngillatuafiel ta Jehová ñi quimal chem ngülam tañi allcütuafiel. Huelu femlai. Eluhui tañi allcütuafiel ti ngülam ñi elueteu ti pu doi huecheque huentru. Ñi femün mu Rehoboam, rume huesalcaeyu ca huesalcafi tati pu israelita. ¿Chem quimeltueiñmu tüfa? Quiñeque mu taiñ llohun ngülam, com taiñ ayüquenofiel. Huelu Biblia mu tripalu, mülei taiñ allcütuafiel. w22.02 pag. 9 parr. 6

Ñom piuquengechi che raquiduamquelai pu huechequeche ñi cüme femnoafel ti cüdau, huelu mai tañi cüme femafel. Cafei caiñetuquelayafi tati pu doi huechengelu, huelu mai ñi compañ ñi troquiafiel. Tati pu fütaqueche regalo troquiquefi tati pu doi huechelelu, feimu müna mañumtuñmaquefi tañi femqueel mu engün. Pu fütaqueche doi füchalerpulu, fente nehuen-ngehuelai engün, feimu pepi femhuelai quiñeque cüdau trahunche mu. Feimu müna mañumcüleingün pu doi huechengelu mu. Fei engün eluucülequei ñi cüme enturpual tañi cüdau engün ca ñi doi quelluntucual ti trahunche mu. Biblia meu mülei quiñe cüme ejemplo, Noemí ñi rupan. Quisu eluhui ñi quelluaeteu quiñe üllcha domo. ¿Chem rupai? Lalu tañi püñeñ, feipifi tañi nanüng Rut ñi huiñotual tañi pu che mu. Huelu Rut ayüquelafui ñi quisucünuafiel ta Noemí, feimu amuingu ta Belén mu. Noemí rume ayühui tañi compañaeteu tañi nanüng (Rut 1:7, 8, 18). Tüfa mür cümelcaeyu engu (Rut 4:13-16). Pu fütaqueche ñom piuquengelu inayentuafi ñi chumün ta Noemí. w21.09 pag. 10, 11 parr. 9-11

Jehová cüme quimniei chem taiñ pepi femqueel iñchiñ. Eimi doi cüdahuelquefimi chi ta Jehová tami pu hueni mu. Cam müte femquelaimi chi tami füchalen mu, tami cutrancülen, cam fente tami cuidaquefiel tami pu che. Femngechi dungu mu rupalmi, huesa duamquilnge (Gál. 6:4). Jehová turpu ngoimalayai eimi tami femqueel. Eimi fente tami piuqueyefiel mu Jehová cüdahuelfilmi com piuque mu, quisu rume ayüucüleai. Jehová quimniei iñchiñ ayüafuiñ taiñ doi cüdahuelafiel, huelu quisu ayüquei taiñ ayüucüleal quisuque iñchiñ taiñ femün meu. Ca femngechi fachantü tüngduamcülequeiñ, ¿chumngelu? Quimnieiñ Chau Jehová quelluqueiñmu rupan mu huesaque dungu mu (Is. 41:9, 10). Iñchiñ quimnieiñ Jehová mülei ñi poyengeal. Huelu ca quimnieiñ poyefiliyiñ Jehová, rume ayüucüleaiñ (Apoc. 4:11). w22.03 pag. 24 parr. 16; pag. 25 parr. 18

Cüpa inayentufiyiñ Jesús, huelu quiñeque mu com cüme inayentulayafuiñ ta Jesús ñi femquefel (Sant. 3:2). Huelu raquiduamnge tüfa: quiñe estudiante trürümngelayafui tañi enseñalqueteu. Huelu ti estudiante inafile tañi enseñalngeel quimürpuai, fei doi cüme inayafui ñi femün tañi profesor. Ca femngechi iñchiñ inafiliyiñ taiñ quimürpuel Biblia mu, ca eluucüleliyiñ taiñ doi cüme chengeal fill antü, doi cüme inayentuafuiñ ñi femquefel ta Jesús (Sal. 119:59). Fachantü fentrenque che eluucülelai ñi quelluafiel ta caquelu che. Huelu Jehová tañi pu che femquelai. Iñchiñ inayentuquefiyiñ ta Jesús, quisu am ayühunquechi quelluquefilu ta caquelu pu che (1 Ped. 2:21). Femngechi femliyiñ, ayühulafiyiñ ta Jehová, fei rume ayüucüleaiñ. w22.02 pag. 24 parr. 16; pag. 25 parr. 18

Fachantü, Jehová adniequeiñmu Biblia mu. Elcünuliyiñ tiempo taiñ raquiduamal taiñ feipicünueteu Jehová Biblia mu, doi cüme inayafiyiñ tañi feipin ca cüme cüdaucüleaiñ amuldunguliyiñ (1 Tim. 4:15, 16). ¿Ca chumngechi adniequeiñmu Jehová? Adniequeiñmu “ti quim manelfal cona” mu, esclavo fiel y prudente ca pingelu (Mat. 24:45). Quiñeque mu feipiafeiñmu taiñ femal quiñe dungu, huelu iñchiñ müte adümlayafuiñ chi. Por ejemplo, feipingeafuiñ taiñ pepicahual ruparumele quiñe fütra cürüftucu mahun cam nüyün. Huelu iñchiñ raquiduamafuiñ: “Cheu tañi mülemum femngechi dungu rupaquelai” piafuiñ chi. Cümenolu troquifiliyiñ taiñ feipieteu ti quim manelfal cona, ¿chumafuiñ? Raquiduamaiñ ñi rupan quiñeque che poyequefilu ta Jehová cuifi mu. Fei engün ca feipingefui tañi femal, müte cümenolu troquifingün chi. Femlu rume, femingün, fei tüfa montuleyu engün (Juec. 7:7; 8:10). w22.03 pag. 18, 19 parr. 15, 16

Jesús rume maneluuquefui Jehová ñi acordanieaeteu fei ñi huiñomongeltuaeteu. Feimu feipi taiñ peelchi texto fachantü. ¿Chem quimeltueiñmu Jesús ñi feipin? Com piuque mu maneluhuaiñ Jehová mu, femngechi nor piuqueyeafiyiñ lafuliyiñ rume (Prov. 3:5). Ngüneduamaiñ ñi rupan quiñe peñi, Joshua pingei. Huechengelu müten huesa cutrancülefui. Taiñ peñi famentufi chem tratamiento rume chaftuquefilu Jehová tañi ngülam. Epe puulu ñi layal, taiñ peñi feipifi tañi ñuque: “Jehová acordanieaeneu. Rüf maneluucülen tañi huiñomongeltuaeteu. Jehová quimniei chem tañi nieel piuque mu ca quimniei tañi piuqueyeniefiel” pi taiñ peñi. Quiñeque mu, conturumeafeiñmu huesaque dungu, fei latripayafuiñ. Feimu cümeafui taiñ ramtuhual feula: “Femngechi dungu rupafuli, ¿nor piuqueyepeafiñ mai Jehová? Ca, ¿maneluupeafun mai tañi huiñomongeltuaeteu?”. w21.04 pag. 12, 13 parr. 15, 16

Jehová nehuentucuquefi ñi pu che ti amuldungun cüdau mu. Amuldunguyahun mu iñchiñ rume cüme duamelqueiñmu, allcütungenoliyiñ rume. Raquiduamafuiñ chi taiñ müte amuldunguquenon. Huelu loncontucuaiñ: cüdahuelfiliyiñ Jehová com taiñ nehuen mu, fei ayüucüleai. Jehová quimniei taiñ cüpa amuldunguquen, pepi tripanoliyiñ rume taiñ ruca mu. Jehová quelluafeiñmu taiñ amuldunguafiel taiñ pu cuidanieteu, pu doctor ca enfermera. Raquiduamliyiñ taiñ femquefel cuifi ca taiñ femhuequenon feula, hueñancüafuiñ. Doi mai, mülei taiñ raquiduamal chumngechi taiñ quellunieteu Jehová feula. Femliyiñ, ayühunquechi chaftuafiyiñ chem huesa dungu rume rupafuliyiñ. Pütrünque che amuldungulelquefiyiñ, huelu quimlaiñ inei ñi puhual ñi piuque mu feitachi falinque dungu, femngechi tañi poyerpuafiel ta Jehová (Ecl. 11:6). w21.05 pag. 24, 25 parr. 14-17

Peafiyiñ ñi rupan ti rey David. Jehová elufi ta David ñi nieal fentren chemcün, ñi cüme üitunchengeal ca ñi huehuafiel tañi pu caiñe. Pütrünque dungu ñi niefel ta David rume mañumcülefui ta Chau Jehová mu (Sal. 40:5). Huelu hueluletui tañi raquiduam ta David, ngoimanentui reque tañi elueteu Jehová. David niefulu rume fentren domo, ayütufi ca huentru ñi domo. Feitachi domo Bat-Seba pingequefui, Urías ñi domo. Fei David quisu mu müten raquiduami, fei cudumfi ta Bat-Seba ca niepüñeñelfi. Huelu fei müten femlai, ¡ca mandalangümfi ta Urías! (2 Sam. 11:2-15). Rume huesalcai ta David, fei ramtuhuafuiñ: ¿Chem raquiduamcülefui David? ¿Chumngelu femi? ¿“Penielaeneu Jehová” pipefui mai? Pütrün tripantu mu poyequefui rume ta Jehová, huelu David quisu mu müten raquiduamurpui ca doi ayürpui ñi nieal. Ñi femün mu rume sufri. Rupachi antü mu David huiñoduamtui ca feipi ñi culpan ta Chau Jehová mu, fei Jehová perdonaeyu. Rume mañumtupelai ta David ñi perdonaeteu Jehová (2 Sam. 12:7-13). w21.06 pag. 17 parr. 10

Müte adümuucülenolu troquihuafuiñ chi. “Müte nielan quimün” ca “cüme quimeltuchefengelan” piafuiñ chi. Femngechi raquiduamliyiñ, ¿chem quelluafeiñmu? Inaduamaiñ cüla dungu. Quiñe, Jehová adümuucülelu troquiqueiñmu. Epu, Jesús elungei autoridad com dungu mu, fei elfalcünueiñmu iñchiñ taiñ quimeltucheal. Fei maneluucülei iñchiñ mu (Mat. 28:18). Ca cüla, quisulelaiñ. Jesús reque maneluucüleaiñ Jehová mu taiñ quelluaeteu chem pial (Juan 8:28; 12:49). ¿Ca inei engün quelluafeiñmu? Taiñ superintendente de grupo, quiñe precursor cam quiñe peñi, lamngen cüme enseñachequelu. Fei engün quelluafeiñmu taiñ empezayal quiñe estudio. Compañfiliyiñ engün ñi enseñachemeal, quimürpuaiñ chumngechi taiñ doi cüme quimeltucheal. w21.07 pag. 6 parr. 12

Pichilehuei ñi afal com ti huesaque dungu, feimu mülei taiñ doi maneluhual Jehová tañi cüme femquen mu. ¿Chumngelu? Acule ti fütra cutrancahun, feipingeaiñ taiñ chumal fei müte ayülayafuiñ chi taiñ feipingeal cam cüdautuafuiñ taiñ feyentual. Femngechi dungu mu rupaliyiñ, ngelai taiñ ramtuhual: “¿Rüf cüpapei mai Jehová mu ñi feipin pu loncolelu?” pilayaiñ. Inafemafiyiñ llemai. Loncontucuaiñ: Jehová dungunacümpalayaiñmu. Pu loncolelu mu feipiaiñmu taiñ chumal. Feimu famülque mu cüme inaliyiñ taiñ feipieteu pu loncolelu, ca femaiñ cüpalechi antü meu. w22.02 pag. 6 parr. 15

Jehová quellufi ta Gedeón ca tañi pu 300 hueichafe ñi huehuafiel tañi pu caiñe. Tañi huehun mu, quisu engün mallmahuafuingün chi. Fei ¿chem rupai? Pu efraimita pemefingün ta Gedeón. Huelu amulaingün tañi saquimeafiel, doi mai illcutufingün. ¿Chemu fente illculefuingün? Gedeón mangel-laeyu ñi amual hueichan mu (Juec. 8:1). Fei ¿chumi Gedeón? Ñom piuque mu raquiduamelfi pu efraimita Jehová ca quellueyu engün tañi femal fütraque dungu. Feipieteu ta Gedeón tüngduamnagingün (Juec. 8:3). Felei llemai, Gedeón eluhui ñi ñom piuquengeal, femngechi ñi quiñeucüleal Jehová tañi pu che. ¿Chem quimeltuafeiñmu ti pu efraimita ñi femün? Quintuyaulayaiñ iñchiñ taiñ falintungeal, doi mai Jehová tañi püramyengeal. Pu loncolelu familia mu ca pu loncolelu trahunche mu, ¿chumngechi inayentuafuingün ta Gedeón? Quiñe che illcutunieliyiñmu, mülei taiñ raquiduamal chumngelu tañi felen. Rume falin-ngei taiñ ñom piuquengeal. Loncontucuaiñ: doi falin-ngei taiñ quiñeucüleal, feimu feipilafiyiñ ti che ñi huelulcaucülen. Doi mai, eluhuaiñ taiñ saquiafiel tañi cüme femquen mu. w21.07 pag. 16, 17 parr. 10-12

Jehová deumaeiñmu taiñ inayentuafiel, feimu falintuqueiñmu. Iñchiñ pengelafuiñ taiñ piuqueyechefengen, taiñ duamtuchequen, taiñ nor piuqueyechequen ca nor dungu femafuiñ Jehová reque (Sal. 86:15; 145:17). Femün mu ta tüfa, püramyequefiyiñ ta Jehová ca pengelelquefiyiñ taiñ mañumcülen (1 Ped. 1:14-16). Cafei cümeque dungu femliyiñ fei ayühulfiliyiñ Jehová, cüme duamcüleaiñ ca ayüucüleaiñ. Cafei inafiliyiñ Jehová tañi chumngen, coneltuafuiñ quisu tañi fütra familia mu. Jehová pepicafi ti Mapu cheu taiñ müleal. Jehová petu ñi deumanofiel ta Adán, hune deumafi tati Mapu (Job 38:4-6; Jer. 10:12). Fei Jehová fente tañi cüme piuquengen mu deumafi itrofillem iñchiñ taiñ ayühulaeteu (Sal. 104:14, 15, 24). Petu deumafilu ti Mapu huitracünuupelai ñi raquiduamal tañi deumael mu, fei “rume cümelcalei tañi deumael” pi (Gén. 1:10, 12, 31). w21.08 pag. 3 parr. 5, 6

Com iñchiñ elfalcünungeiñ taiñ amuldungual ca quellucheal ñi discipulongerpual (Mat. 28:19, 20; Rom. 10:14). ¿Ayüafuimi tami doi adümuucüleal tüfachi falin cüdau mu? Estudiayafimi ti papel Kimeltucheal pingelu ca inayafimi tami quimürpuel amuldungun mu. Turpu ngoimalayaimi tami femal quiñe doi falin dungu: eluunge tami doi cümechengeal femngechi tami ayühulafiel ta Jehová (Col. 3:12; 2 Ped. 1:5-8). Com iñchiñ ayüqueiñ taiñ doi cüdahuelafiel Jehová. Huelu quiñeque mu pepi femquelaiñ. Ngünenietule Chau Dios Mapu mu, pepi femafuiñ llemai. Huelu ¿chem femafuiñ famülque mu? Eluhuaiñ taiñ cüdahuelafiel Jehová tunte taiñ rüf pepi femafel. Femngechi doi ayüucüleaiñ taiñ serfifiel mu ta Jehová. Huelu doyelchi mai püramyeafiyiñ taiñ ayühun-ngechi Chau Ngünechen, Jehová (1 Tim. 1:11). Feimu llemai, chem cüdau rume femliyiñ Jehová ñi troquiñche mu, ayüucüleaiñ. w21.08 pag. 25 parr. 18-20

Tami chau ca tami ñuque poyefile Jehová, enseñalpelaeimu Jehová mu petu pichicalu eimi. Enseñalngepelaimi com ñi deumael ta Jehová ca ñi cüme elcünutuafiel ti Mapu. Ca feipingepelaimi ñi chumngen ta Jehová (Gén. 1:1; Hech. 17:24-27). Pütrüquen che feyentuquelai Chau Dios mu ca ñi deumafiel com ti mülelu. Doi mai, quisu engün feyentuquei evolucion mu. Feipiqueingün ñi quisutu triparumen ta che ca ñi tripalerpuquen hueque mongen. Tüfachi pu che niefui alüquen educacion. Quiñeque engün feipiqueingün ñi huelulcaucülen ta Biblia, ca feipiqueingün pu nienolu educacion müten feyentuquei Chau Dios ñi deumafiel com mülelu. Chumten tripantu yeniefuliyiñ rume taiñ Dunguquelu Ineingen Jehová ngen, com iñchiñ duamnieiñ taiñ nehuentu feyentuleal Chau Dios mu. Femliyiñ encañalayaiñmu feichi pu che feipiquelu ñi huelulcaucülen ta Biblia (Col. 2:8). w21.08 pag. 14 parr. 1-3

Abel, Noé, Abrahán ca Job respetaquefingün ca piuqueyefingün ta Jehová. ¿Chumngechi? Femingün tañi feipieteu Jehová, maneluhuingün quisu mu, ca famentufingün tañi ayüqueel engün Jehová ñi duam mu. Eluhuingün ñi femal chem rume ñi yamafiel ta Jehová, fei Jehová cüme llohueyu engün. Rupachi tripantu mu, Jehová elufi pu israelche Moisés tañi Ley. Feitachi Ley mu, Jehová feipi chumngechi tañi poyengeal.Lalu ta Jesús ca huiñomongetulu, Jehová feipihuelafi tañi pu che ñi inayafiel Moisés tañi Ley (Rom. 10:4). Doi mai, pu cristiano mülefui ñi inayal ‘Cristo tañi ley dungu’ (Gál. 6:2). Fei engün ngelafui ñi nieal tañi raquiduam mu fentren ley dungu, huelu mai mülefui ñi inayentuafiel ta Jesús ca inayafiel tañi quimeltun. Famülque mu, pu cristiano eluucüleingün ñi inayentuafiel ta Jesús, femngechi ñi cüme poyeafiel Jehová ca ñi ayüucüleal engün (Mat. 11:29). w22.03 pag. 20, 21 parr. 4, 5

Jehová allcütuquefi tañi pu yall. Jehová rume fentren ngillatun allcütuñmafi ta Jesús. Jesús ñi femal falin-ngechi dungu, Jehová allcütuñmaeyu tañi ngillatun ñi dullial tañi mari epu apostol (Luc. 6:12, 13). Jehová ca femngechi allcütuñmafi tañi ngillatun ta Jesús ñi hueñancülen. Pichilehuelu tañi fendengeal ta Jesús, fei ngillatufi tañi Chau Jehová ñi rupayal cutrancahun-ngechi dungu mu. Jehová allcütuñmafi tañi ngillatun ta Jesús, ca huercülelfi quiñe püllü tañi eluaeteu nehuen (Luc. 22:41-44). Fachantü ca femngechi Jehová allcütuñmafi tañi ngillatun tañi pu che. Fei huiñoldunguquei quiñe antü doi tañi duamniengen mu (Sal. 116:1, 2). Peafiyiñ ñi rupan quiñe lamngen India mapu mu mülelu. Fei niefui quiñe emocional cutran. Fei taiñ lamngen rume ngillatuquefui ta Jehová tüfachi dungu mu. Fei feipi: “Ti programa JW Broadcasting^® mayo cüyen meu 2019 tripantu meu, quimeltueneu chem tañi femal nieli quiñe preocupaucülenchi dungu. Tüfa ta iñche tañi duamniefel. Chau Dios allcütuñmaeneu tañi ngillatun”. w21.09 pag. 21, 22 parr. 6, 7

Feitachi pu cristiano hunen siglo mu, ¿cüdautupelafuingün tañi elcünual ñi nieel fei ñi mülepual cañpüle? Fei engün duamniefuingün ñi maneluhual Jehová mu tañi cuñiutucuaeteu. ¿Chem quellueyu engün tañi maneluhual Jehová mu? Quechu tripantu cuifi petu ñi hualloñmangenon Jerusalén, Pablo feipieyu feitachi cüme ngülam: “Huesa ayütuquefilmün ta plata ca itrofill chemcün. Ayüucülemün tunten tamün nieel ta feula, fei Ngünechen am feipilu: ‘Chumcaunorume quisucünulayayu ca elcünulayayu rume’. Feimeu mülei taiñ feipial ta maneluhun meu: ‘Ñidol Ngünechen quelluqueneu ta iñche, feimeu llicalayan. ¿Chem chumaeneu anta che?’” (Heb. 13:5, 6). Pu cristiano inafilu Pablo tañi ngülam petu ñi apümcangenon Jerusalén huaria, quellueyu tañi pepicaucüleal. Fei mülepulu engün cañpüle, cüdautulaingün ñi ayüucüleal tañi pichin nieel mu. Maneluuquefuingün Jehová tañi eluaeteu com ñi duamnieel engün. w22.01 pag. 4 parr. 7, 9

Quiñe che cutranpiuqueyechefengelu feipiafuiñ ñi cüme piuquengen ca eluucülequei ñi quellucheal. Tati cüme samaritano ñi nütramcael ta Jesús pengeli tañi rüf cutranpiuqueyechefengen. Feitachi huentru pefi quiñe judio saltiangelu ca hulelcangelu, fei cutrantupiuqueyefi. Feitachi samaritano quellufi tati judio fei piuqueyenquechi cuidafi (Luc. 10:29-37). Feitachi nütram mu pengeleleiñmu Jehová ñi cutranpiuqueyechefengen. Chau Jehová rume piuqueyeiñmu, feimu fill antü pengeleleiñmu taiñ cutranpiuqueyequeteu. ¿Ca chumquei tati cutranpiuqueyechefengelu? Quiñe che huesa femle, mülefui müten tañi castigangeal, huelu ti cutranpiuqueyechefengelu perdonayafeyu. Ca femngechi femquei ta Jehová. Cutranpiuqueyequeiñmu fei perdonaqueiñmu taiñ culpan (Sal. 103:10). Huelu quiñeque mu, Jehová norümtuafui quiñe che huesa culpalu. w21.10 pag. 8 parr. 1, 2

Chau Jehová rüf piuqueyeniefi tañi pu serfiqueteu. David ca Daniel feipingu tüfa. David feipi Jehová rüf piuqueyefi tañi pu rüf quimeteu ca tañi yamnieteu. Daniel ca feipi Chau Jehová rüf piuqueyefi tañi piuqueyenieteu ca inaniefilu tañi feipin (Sal. 36:10; 103:17; Dan. 9:4). Tati pu che ñi rüf serfinieteu Jehová ta rüf piuqueyequefi. Cuifi mu, petu taiñ poyerpunofiel Jehová, Jehová deu pengelelquefeiñmu taiñ piuqueyenieteu (Sal. 104:14). Huelu cristianongerpulu iñchiñ, doi piuqueyerpueiñmu. w21.11 pag. 4 parr. 8, 9

Chem rume rupale, iñchiñ inayafiyiñ chem pin Jesús taiñ peelchi texto fachantü. Fachantü alün pu che ayühunquechi inaquefingün quiñeque loncolechi religioso, quiñe dios reque troquiquefingün. Amuqueingün tañi iglesia mu, ngillañmaquefingün tañi lifru ca quelluntucuquefingün fentren plata mu. Com ñi feipiqueteu pu loncolechi religioso feyentuquefingün. ¡Pefile engün rume ta Jesús, fente afmatulayafuingün! Huelu iñchiñ pu rüf poyequefilu ta Jehová femngechi femquelaiñ, püramyequelafiyiñ tati pu huentru. Iñchiñ yamquefiyiñ tati pu loncolelu, huelu ca cüme quimnieiñ Jesús ñi feipin taiñ peñihuen-ngen com iñchiñ (Mat. 23:8-10). Iñchiñ poyequelafiyiñ tati pu loncolechi religioso ca pu politico. Quelluntucuquelaiñ quisu tañi ayüqueel engün ca reyülconquelaiñ tüfachi Mapu mu müleyechi dungu. Com tüfachi dungu meu iñchiñ pu testigo trürümngelayafuiñ ñi femqueel caquelu religion mu (Juan 18:36). w21.10 pag. 20 parr. 6, 7

Com iñchiñ ayünieliyiñ taiñ lif chengeal, mülei taiñ doyümnieafiel taiñ hueniyeniefiel Jehová. Iñchiñ am Dunguquelu Ineingen Jehová ayüquelaiñ femal huesaque dungu taiñ podümnoafiel Chau Jehová tañi üi (Lev. 19:12; Is. 57:15). Pu israelita feyentuquefilu Chau Jehová ñi feipin pengelquefuingün tañi Diosyefiel, quisu müten. Levítico 18:4 feipi: “Inanieafimün com tañi ley dungu ca feyentuafimün iñche tañi huercün dungu. Iñche ta Jehová tamün Ngünechen”. Quiñeque tüfachi huercün dungu mülei Levítico 19 mu. Por ejemplo, ti versiculo 5 puulu 8, 21 ca 22, pengeli pu israelita chumngechi mülefui ñi chalintucual culliñ. Fei engün mülefui ñi cüme femal chumngechi ñi feipicünueteu Jehová. Papeltufiel mu feitachi versiculo, quelluafeiñmu taiñ cüme poyeafiel Jehová chumngechi tañi ayüqueel, ca femngechi inayafiyiñ ñi feipin Hebreos 13:15. w21.12 pag. 5 parr. 14, 15

Eimün pu hue curehuen, fentren dungu quimürpuafuimün caquelu peñi ca pu lamngen maneluuquelu Jehová mu. Quiñeque curehuen alün tripantu yeniequei tañi precursorngen engün. Feimu eimün pu hue curehuen raquiduamülmün tamün doi cüdahuelafiel Jehová, feipiafuimün tamün ngülamtuaeteu. Femngechi pengelaimün tamün maneluucülen Jehová mu (Prov. 22:17, 19). Loncontucuaimün: Chau Jehová eli ñi niehual ta che femngechi ñi curehuen-ngeal, ca ayüquei ñi ayüucüleal engün (Mat. 19:5, 6). Eimün pu hue curehuen, ¿chummequeimün am tamün mongen mu? Jehová elueimünmu fentren cümeque dungu. ¿Pengelquepeimün mai tamün mañumcülen? Ngillatuafimün ta Jehová, quintufimün falinque ngülam mülelu Biblia mu ca inayafimün. Loncontucuaimün: doyümfilmün tamün cüdahuelafiel ta Jehová, ayüucüleaimün tamün curehuen-ngen. w21.11 pag. 18 parr. 16; pag. 19 parr. 18

Santiago quimfalcünui tañi culpanchengen. Santiago feipilai: “Iñche ta Jesús ñi peñi, loncolen trahunche mu, feimu doi mülefui tañi falintungeal” pilai. Santiago doicülelu troquiuquelai tañi caque pu peñi mu, feimu feipifi engün: “Iñche ñi saquin pu peñi ca lamngen” (Sant. 1:16, 19; 2:5). Santiago raquiduamel-lafi ta caquelu tañi huelulcauquenofel. ¿Chem quimeltun entuafuiñ? Loncontucuaiñ, com iñchiñ huelulcauqueiñ. Raquiduamlayaiñ taiñ doicülen taiñ pu estudiante mu. Raquiduamelfiliyiñ taiñ turpu huelulcauquenon, huesa duamafuingün. Feipiafuingün: “Iñche turpu poyelayafun ta Jehová” piafuingün. ¿Chumngechi quelluafuiñ engün ñi femngechi raquiduamnoal? Feipiafuiñ taiñ estudiante iñchiñ quiñeque mu ca cüdautuqueiñ taiñ inayal Biblia ñi ngülam. Ca feipiafuiñ chumngechi Jehová taiñ quellueteu taiñ cüme elcünutual taiñ mongen. Femngechi quellufiliyiñ engün, “iñche ca serfiafun Jehová” piaingün tañi raquiduam mu. w22.01 pag. 11, 12 parr. 13, 14

Doi eluucüleliyiñ taiñ raquiduamal chumngechi ñi raquiduamquen ta Jesús, cümeque dungu femaiñ ca cüme chengeaiñ Jesús reque (Heb. 1:3). Huelulcauquenolu am Jesús, iñchiñ feipiafuiñ: “Chumngechi ñi femquen ta Jesús, iñche turpu femnoalu troquiuquefun” piafuiñ. Femngechi raquiduam nieliyiñ, acordayafiyiñ cüla dungu. Quiñe, iñchiñ deumangeiñ taiñ inayentuafiel ta Jehová ca Jesús, fei eluhuafuiñ taiñ inayentuafiel engu culpanchengeliyiñ rume (Gén. 1:26). Epu, nieiñ Chau Jehová ñi nehuen. Fei ta quelluaiñmu taiñ femürpual fentren dungu. Nienofuliyiñ Chau Jehová ñi nehuen, femürpulayafuiñ. Ca cüla, Jehová quimniei quiñeque mu huesalcayafuiñ, fei cüme inayentulayafuiñ. Turpu feipilayaiñmu taiñ huelulcaunoal. Jehová elcünui huaranca tripantu taiñ culpafe chengehuenoal (Apoc. 20:1-3). Huelu Jehová feipieiñmu quiñe dungu: com nehuen mu taiñ inayentuafiel ca taiñ maneluucüleal taiñ quelluaeteu. w22.03 pag. 9 parr. 5, 6

Taiñ doi cüme hueniyeafiel Jehová, llellipulayafiyiñ müten. Ca mülei taiñ chillcatual ta Biblia ca amual taiñ trahun mu. Fei, petu papeltuliyiñ Biblia ca müleliyiñ taiñ trahun mu, ¿chumafuiñ taiñ ngünamcanoal taiñ tiempo? Ramtuhuaiñ: “¿Chem catrütuñmayafeneu tañi papeltual ca cüme allcütual trahun mu?”. Mütrümngerumeafuiñ telefono mu, llohuafuiñ quiñe correo cam quiñe mensaje. Petu papeltuliyiñ Biblia taiñ ruca mu cam müleliyiñ trahun mu, fei cañpüle miyaule taiñ raquiduam, llellipufemafiyiñ ta Jehová taiñ quelluaeteu. Cüdautuafuiñ taiñ cüme papeltuafiel Biblia. Fei, ¿chumafuiñ? Llellipuafiyiñ Jehová taiñ eluaeteu tañi cüme tüngün, femngechi cuñiutucuaiñmu taiñ piuque ca taiñ raquiduam (Filip. 4:6, 7). w22.01 pag. 29 parr. 12-14

Ti rey Uzías conpui ti ngillatuhue ruca mu, lüpümi incienso ñi chalintuculelafiel ta Jehová. Huelu tüfa ñi femafel pu sacerdote müten. Feimu pu sacerdote feipieyu: “Uzías eimi ta ngelai tami lüpümal incienso fau”. Uzías allcütufile ti ngülam, tripatule ti ngillatuhue ruca mu, Jehová perdonayafeyu ñi huesa femün. Huelu Uzías femlai. Doi mai rume illcui, feyentulafi ñi feipieteu pu sacerdote. ¿Chumngelu feyentulafi Uzías ñi feipingeel? Quisu raquiduampelafui tañi reyngen femafui chem rume ñi ayüqueel. Huelu Jehová femngechi raquiduamquelai. Ñi huesa femün mu Uzías, lepra cutran contueyu tunte puhun ñi mongen (2 Crón. 26:16-21). ¿Chem quimeltueiñmu ñi femün Uzías? Inei rume allcütunofile ti ngülam mülelu Biblia mu, Jehová ta hueniyehuelayaeyu. w22.02 pag. 9 parr. 7

Quiñe che huesa mongen yenielu, ¿chumquei? Quisutu duamuuquei, illcufemquei, mañumquelai ca mallmangei. Rume ayüuquei ñi pefiel pornografia ca pelicula pengelquelu huesaque cudumuhun ca quehuan dungu. Tunte cüme piuquengefule rume ca huesa duamcülele rume tañi huesa femquen mu, huelu eluucülelai tañi cüme elcünutual tañi mongen (Gál. 5:19-21; 2 Tim. 3:2-5). Taiñ culpanchengen mu com famentulayafuiñ taiñ huesaque raquiduam, feimu quiñeque mu huelulcahuafuiñ taiñ feipin mu cam taiñ femün mu (Jer. 17:9; Sant. 3:2). Huelu eluucüleliyiñ taiñ famentuafiel taiñ cuifi huesa mongen, ngüneniehuelayaiñmu taiñ huesaque raquiduam, doi cüme chengetuiñ (Is. 55:7). w22.03 pag. 3 parr. 4, 5

Eimün pu loncolelu tunte huelulcaufule rume tamün pu peñi ca pu lamngen, raquiduamaimün ti cümeque dungu ñi femquen engün. Quiñeque mu, müleafui chi tamün norümafiel quiñe peñi cam quiñe lamngen. Huelu inayentufimün ta Pablo, fei re raquiduamlayaimün müten ñi huesa femün mu ti che. Doi mai, raquiduamaimün feiti peñi cam ti lamngen piuqueyefi Jehová, püntütripaquelai quisu mu, ca doi cüme cristianongerpuafui. Pu loncolelu raquiduamle ñi cüme piuquengen tañi pu peñi ca pu lamngen, quelluaingün ñi cüme duamcüleal com ti trahunche. Loncontucuaimün: Jehová feipiquelaeimu tamün turpu huelulcaunoal. Huelu mai feipiqueimu tamün cüme huechunentual tamün cüdau trahunche mu (1 Cor. 4:2). Jehová falintucuquefi eimün tamün cüdau. Quisu turpu “ngüyünentulayai eimün tamün femelchi dungu ca ti piuqueyehun tamün pengelelfiel femngechi tamün quellufiel meu tati feyentulechi pu peñi ca lamngen. Fei petu amulei tamün femngechi femal” (Heb. 6:10). w22.03 pag. 31 parr. 19, 21