Noviembre

¿Chumngechi am quelluqueimu ta Jehová? Amuldungun mu quiñe che huesa pielmu, Jehová quelluaimu tami tüngcüleal. Ca femngechi quelluqueimu tami loncontucunieal quiñeque troquiñ Biblia mu tami amuldungual. Ca femngechi quelluqueimu tami amuldunguleal pinole rume ta che tañi allcütual (Jer. 20:7-9). Jehová pepicaqueiñmu ta amuldungual, femngechi pengelqueiñmu ñi cüme piuquengen iñchiñ mu. ¿Chumngechi pepicaqueiñmu Jehová? Taiñ trahun mu quimeltungequeiñ chem taiñ feipiafiel tati pu che amuldungun mu, fei iñchiñ inayafuiñ tüfachi ngülam. Hune pichi müllmüllcüleafuiñ chi, huelu eluuliyiñ taiñ femal, peafuiñ ñi cüme tripalen. Cafei trahun mu ca fütraque trahun mu ngülamtungequeiñ ñi caquerumeal taiñ amuldunguchen. Tüfa ca müllmüllelafeiñmu chi, huelu femliyiñ, Jehová cümelcayaiñmu. w21.08 pag. 27 parr. 5, 6

Quiñe rupa Pablo huirintuculelfi quiñe carta ti pu Corinto che, fei norümtufi engün, elufi ngülam. Rupan huirintuculu feitachi carta. Femngechi huercüfi ta Tito ñi amual fei engün mu. Fei Pablo quimürpui tati pu Corinto che cüme lloufingün ti ngülam. Rume ayüucülepelafui ta Pablo (2 Cor. 7:6, 7). Pu loncolelu cümeafui ñi inayentuafiel ñi femün tati apostol Pablo. Fei elcünuafuingün tiempo ñi nütramcayal tañi pu peñi ca pu lamngen engün. ¿Chumngechi femafuingün? Doi temprano puhuafuingün ta trahun mu, femngechi yafültucuafuingün tañi pu peñi ca pu lamngen. Quiñeque mu, quiñe pichi nütramcan mu pu loncolelu yafültucucheafui (Rom. 1:12). Pu loncolelu, Pablo reque, Biblia mu yafültucuafingün tati pu peñi ca pu lamngen. Cafei quimfalcünulelfingün Jehová ñi rume piuqueyeteu engün. Pu loncolelu rumel saquiquefi pu peñi ca pu lamngen. Cafei ngülamtule quiñe loncolelu, Biblia mu tripayai ñi ngülam. Adümfalngeai, huelu piuqueyenquechi hulai ti ngülam, femngechi ñi cüme lloungeal (Gál. 6:1). w22.03 pag. 28, 29 parr. 11, 12

Jehová famülque mu quelluqueiñmu ca eluqueiñmu nehuen. ¿Chumafuiñ taiñ quelluaeteu Jehová? Pablo ngülamtueiñmu taiñ rumel llellipuleal (Efes. 6:18). Femngechi femliyiñ, Jehová quelluaiñmu. Quiñeque mu, müna huesa duamcülequeiñ. Quimquelaiñ chem piafiel Jehová llellipun mu. Jehová feipiqueiñmu llellipuafiel müten, quimnofuliyiñ rume tañi pial (Rom. 8:26, 27). Jehová ca quelluqueiñmu tati Biblia mu. Pablo papeltui Jehová ñi huirintucun, feimu yafültucueyu. Iñchiñ ca duamnieiñ femngechi femal (Rom. 15:4). Ngüneduamfiliyiñ Biblia, Chau Dios eluafeiñmu tañi nehuen taiñ quelluaeteu (Heb. 4:12). w21.05 pag. 22 parr. 8-10

Iñchiñ quimnieiñ fente falin-ngen taiñ enseñacheal. Huelu rume ayüniefuliyiñ rume taiñ quimeltucheal, mülei quiñeque dungu taiñ catrütuafeteu. Quiñeque mu pepi enseñachequelaiñ chi tunte taiñ ayüqueel. Quiñeque iñchiñ füchaleiñ ca cutranchengeiñ, fei ¿chem quelluafeiñmu? Raquiduamaiñ, ¡internet mu ca telefono mu enseñacheafuiñ! Fei eimi ca femafuimi. Eimi tami ruca mu, internet mu cam telefono mu, estudialelafuimi quiñe che. Huelu fei ca müten no. Fentren che ayüafui tañi estudiayal Biblia, huelu rume ocupaucüleingün. Pepi estudiaquelaingün feichi hora mu taiñ amuldunguquen iñchiñ, fei doi temprano cam pun meu chi ta estudialelafuiñ. Raquiduamnge: cuifi mu, Nicodemo pun meu pemefi ta Jesús, fei Jesús eluhui ñi quimeltuaeteu (Juan 3:1, 2). w21.07 pag. 5 parr. 10, 11

Cuifi mu Juan el Bautista ñi pu discipulo afmatuingün ñi ayunaquenon Jesús ñi pu inanieteu, fei Jesús feipieyu duamfalngelai ñi ayunayal che petu ñi mongelen ta Jesús (Mat. 9:14-17). Feingelu rume, pu fariseo condenafingün ta Jesús ñi inanofiel mu tañi huimtun engün. Cafei quiñeque caiñe pefilu Jesús ñi tremolfiel quiñeque che sabado antü mu, fei engün rume illcutufingün ta Jesús (Mar. 3:1-6; Juan 9:16). Fei engün feipiquefuingün: “Iñche cumpliquen ti Ley sabado antü mu”. Huelu catrütuquelafuingün tati pu che ñi fendeal fillque chemcün ti ngillatuhue ruca mu, fei Jesús feipieyu ñi huesalcamequen engün. Feimu rume illcuingün (Mat. 21:12, 13, 15). Cafei tati pu che mülelu Nazaret mu, quisu duamuuquefuingün ca feyentuquelafingün ta Jesús. Fei Jesús conpulu ti ngillatuhue ruca mu, trürümfi ñi femün engün tati pu israelche mu ca feipifi ñi huesalcamequen engün (Luc. 4:16, 25-30). Jesús inanofilu fei engün ñi huimtun, feimu famentungei (Mat. 11:16-19). w21.05 pag. 5, 6 parr. 13, 14

Chau Jehová quimeltueiñmu ñi rume cuñihun-ngen taiñ mallmachengeal ca diñmatufengeal. Ñi rupan poyequefulu Jehová cuifi pengeli tüfa. Ellaca mu cüme püllüngefulu Huecüfü, llouquepelafui falinque cüdau Jehová tañi elueteu. Huelu Huecüfü doi troquiufui. Huecüfü ayüfui quisu tañi poyengeal, Jehová tañi femngeafel. Huecüfü ca femngechi raquiduamelqueiñmu taiñ doi nieal, quisu reque. Ellaca mu femngechi raquiduamelfi ta Eva. Jehová feipifi ta Adán engu Eva ñi iyafiel com pu anümca ñi fün, huelu quiñe müten tañi inoafiel (Gén. 2:16). Huelu Huecüfü encañafi ta Eva ca raquiduamelfi ñi illutuafiel ti fün. Eva falintulafui tañi niefel, doi ayüfui tañi nierpual. ¿Chum tripai tañi femün? Culpai ca larpui (Gén. 3:6, 19). w21.06 pag. 14 parr. 2, 3; pag. 17 parr. 9

Jehová elufi quiñe falin cüdau ñi femal Adán engu Eva, feimu feipifi ñi pütrün nieal püñeñ ca ñi cuidayafiel ti Mapu. Adán engu Eva feyentufule ta Jehová, quisu engu ca tañi cüpanche petu coneltuleafui Jehová tañi fütra familia mu. Jehová elufi ta Adán engu Eva ñi müleal quisu tañi fütra familia mu, feimu rume cümelcafi. Ti Salmo 8:5 mu David feipi chumngechi ñi deumafiel Jehová tati huentru, fei feipi: “Pichi cacünufimi tati che tati pu cümeque püllü mu, ca elufimi ñi püramyengeal ca ñi saquingeal engün”. Tati pu che fente nehuen-ngelai ca fente adümuhun-ngelai tati pu püllü reque (Sal. 103:20). Fentren nehuen-ngefulu rume, pu cümeque püllü pichi doicüleingün iñchiñ mu. Adán Eva engu huesacünuingu, feyentulafingu Jehová. Feimu coneltulehuelaingu Jehová ñi pu che mu. Ñi femün mu engu re huesaque dungu contupaeyu tañi pu cüpanche. Femfulu rume engu, Jehová ayüniei com pu che quisu tañi familia mu müleal engün. w21.08 pag. 2, 3 parr. 2-4

Fachantü fentren pu che poyequefilu ta Jehová caiñetuqueyu caquelu pu che. Quiñeque pais mu, quiñeque taiñ pu peñi ca pu lamngen presungequeingün ca yengequeingün pu lonco ülmen gobierno mu, femngechi ñi nütramcayal engün ñi maneluucülen Jehová meu (Mat. 10:17, 18). Caquelu pais pu peñi ca pu lamngen cüme poyequefingün ta Jehová, huelu caiñetuqueyu ñi pu familia engün, femngechi tañi cüdahuelhuenoafiel ta Jehová (Mat. 10:32-36). Huelu fentrenque rupa taiñ poyeniequefiel mu müten ta Jehová, fentecünuqueingün taiñ caiñetuaeteu engün. Ca quiñeque mu, taiñ familia taiñ caiñetuquefeteu, cüpalechi antü meu ayühunquechi poyerpufingün ta Jehová. Eimi femngechi dungu mu rupalmi, fentecünuquilnge tami poyeafiel Jehová. Nehuencüleaimi. Quisulelaimi, Jehová quellunieimu tañi nehuen mu. Llicalequilnge. w22.03 pag. 16 parr. 8

Tati Biblia feipi Jehová üdequefi ‘tati nge mallmangelu, quiñe quehun coila dunguquelu, ca tati cuhu langümquefilu ti che nienolu culpan’ (Prov. 6:16, 17). Jehová ca “üdequefi pu che quehuatufengelu ca ngünencachequelu” (Sal. 5:6). Noé tañi antü mu, tati pu che femngechi huesaque dungu femquefuingün feimu Jehová apümcaeyu engün (Gén. 6:13). Cafei ti profeta Malaquías mu, Jehová feipi ñi üdequefiel tati pu füta ca domo raquiduamquelu chumngechi ñi hudayafiel tañi afcadi. Quiñe tüfa poyefile Jehová, Jehová famentuaeyu ca juzgayaeyu (Mal. 2:13-16; Heb. 13:4). Jehová ayüquei taiñ ‘üdeafiel huesaque dungu’ (Rom. 12:9). Raquiduamlayaiñ rume taiñ femal huesaque dungu. Ünufalngelu troquiafiyiñ. w22.03 pag. 4, 5 parr. 11, 12

Pichiñma mu, Jehová ñi Gobierno eluaiñmu alün cümelcan. Com pu maneluucülelu Jehová mu llohuaingün fentren cümelcan fachantü ca cüpalechi antü meu. Famülque mu fill huesaque dungu contuqueiñmu, huelu ti hue Mapu meu femngechi dungu mu rupahuelayaiñ. Ngehuelayai norngenochi dungu ca cutrancahun ngehuelayai (Apoc. 21:4). Nietuaiñ com taiñ duamnieel, feimu fill raquiduam niehuelayaiñ (Sal. 72:16; Is. 54:13). ¡Müna cüme dungu! Jehová quelluqueiñmu taiñ elcünual taiñ huesa femqueel ca quelluqueiñmu taiñ cüme piuquengeal, femngechi pepicaqueiñmu taiñ conpual ti hue Mapu mu. Feimeu nehuentuleaiñ ca fentecünulayaiñ taiñ cüdahuelafiel Jehová. ¡Fülcülepai doi cüme mongen! Petu ñi rupanon com tüfachi dungu, ayühunquechi esperaleaiñ Jehová tañi femal tañi feipicünuel. w21.08 pag. 13 parr. 17-19

Feitachi pu cristiano rupayechi tripantu mu lloufilu tüfachi carta, mülefui ñi elcünual tañi ruca engün, tañi negocio, fei ñi lefmautripayal Jerusalén mu (Mat. 24:16). Elcünulu am com tañi niequefel engün, feimu mülefui tañi huelucontu quelluhual engün. Feitachi pu cristiano huimtulefule ñi hueluconque eluuquefel tañi nieelchi chemcün, müte cüdautulayafuingün nienole rume engün fentren chemcün tañi ruca mu. Taiñ pu peñi ca pu lamngen feipilayaiñmu chi chem tañi duamnieel engün. Feimu rumel eluucüleaiñ taiñ quellucheal. Trahunche mu, mülei quiñeque peñi ca lamngen eluucülelu ñi quellucheal. Chem dungu mu rume rupamequele quiñe peñi cam quiñe lamngen, eluucülequei ñi quellucheal. Iñchiñ ca femngechi ayüafuiñ taiñ femngechi chengeal quisu engün reque. w22.02 pag. 23, 24 parr. 13-15

Pichi rupachi tripantu mu, huiño adcünungetui tati trahunche ca tati circuito. Feipingerumeliyiñ taiñ amual ca trahunche mu, cüdautuafuiñ taiñ amual, el-lu am iñchiñ hueni, familia chi elafuiñ. ¿Jehová mai feipiquepefi pu loncolelu taiñ feipiaeteu cheu taiñ trahuluhual? Femlai llemai. Feimu, cüdautuafuiñ taiñ inayal taiñ feipieteu pu loncolelu. Huelu Jehová maneluuquei pu loncolelu mu, iñchiñ ca mülei taiñ femal. Quiñeque mu, pu loncolelu dulliafui quiñeque dungu taiñ müte ayüquenoel. Huelu quelluntucufiliyiñ engün, ca quelluntucuaiñ ñi quiñeucüleal Jehová tañi troquiñche. Com ti trahunche quelluntucufile pu loncolelu, feimu cüme amuleai (Heb. 13:17). Huelu doyelchi mai, pengelaiñ taiñ maneluucülen Jehová mu (Hech. 20:28). w22.02 pag. 4, 5 parr. 9, 10

Eimi peñi eluucülenge tami doi cüme hueupifengeal, cüme papeltual ca tami doi cüme quimeltucheal. Femülmi, rume quelluafimi com tami pu allcütuqueteu (1 Tim. 4.15). ¿Chem quelluaimu? Feipiafimi tami quelluaeteu tati consejero auxiliar cam caquelu loncolelu cüme hueupiquelu ca enseñachequelu (1 Tim. 5:17). Estudiayafuimi ti papel Eluwnge tami küme papeltual ka kimeltucheal. Inaduamafuimi caque quiñeque quimeltun. Quisu tami ruca mu pepicahuafuimi, fei trahun mu inayaimi tami quimürpuel. Re inalayafimi tati quimeltun tami papeltuel, huelu mai quelluafimi tami pu allcütueteu ñi doi maneluhual Jehová mu ca ñi inayal tañi quimürpuel engün. Femülmi, eimi ta ayüduamaimi ca femngechi tami pu allcütuqueteu. w21.08 pag. 24 parr. 17

Raquiduamnge, mülei quiñeque peñi ca quiñeque lamngen doi adümuulu. Huelu inafiliyiñ Pablo tañi ngülam, eluulayaiñ taiñ doicülelu troquingeal. Huelu mai ayühuaiñ quisu engün tañi doi adümuhun mu, doyelchi mai eluule engün tañi serfiafiel ta Jehová. Feimu llemai, com iñchiñ inafiliyiñ Pablo tañi ngülam quiñeucüleaiñ. ¿Chumafuiñ taiñ ütrirnoafiel taiñ pu peñi, pu lamngen? Loncontucuaiñ, quiñeque mu com cüme tripaquelai taiñ femquen. Ñom piuquengeliyiñ, doi adümuulu caquelu mu troquiulayaiñ. Doi mai, eluhuaiñ taiñ quimeltuaeteu taiñ pu peñi, pu lamngen doi adümuulu iñchiñ mu. Por ejemplo, quiñeque peñi hulquei cümeque hueupin trahunche mu, feimu ramtuafuiñ chumngechi ñi pepicauquen. Quiñeque lamngen müna pepiluhui ñi deumayal cümeque iyael, femngechi ramtuafuiñ chumngechi tañi cüme femqueel. w21.07 pag. 16 parr. 8, 9

Biblia feipi quiñe huentru ngümitumamüllmelu sabado antü mu. Ñi femün mu tüfa, Jehová condenaeyu ñi layal. Rupachi tripantu mu, David cudumfi ca huentru ñi domo ca langümfalmafi ñi füta, huelu Jehová perdonaeyu (Núm. 15:32, 35; 2 Sam. 12:9, 13). Fei iñchiñ ramtuhuafuiñ: “¿Chemu Jehová perdonafi ta David fütra culpalu? Huelu, ¿chumngelu condenafi ñi layal tati huentru ngümitumamüllquiyaulu?”. Quiñeque mu, Biblia feipiquelai com ñi rupan. Por ejemplo, quimnieiñ David ñi rüf repentiuhun tañi huesa femün mu (Sal. 51:2-4). Huelu, ¿chem piafuiñ cai ti huentru ngümitumamüllmelu? ¿Huesa duampei mai tañi femün mu? ¿Ca femquefui cuifi mu? Ngülamtungelu tañi femhuenoal, ¿feyentupei mai? Biblia feipilai. Huelu maneluuqueiñ ta Chau Jehová norngei “com tañi femquen mu” (Sal. 145:17). w22.02 pag. 3 parr. 3, 4

Tati ñom piuquengelu eluuquelai tañi femal tañi pepi femquenoel, feimu ayüucülequei ca nehuentu cüdaucülequei. Quiñe che ñom piuquengelu trürümfalngeafui quiñe che manejafilu quiñe auto püramequelu quiñe huincul mu. Ñi pürayal ti huincul matu püralayafui, ñochiquechi amulnieafui tañi auto. Ñochilele rume, puhuai llemai. Ca femngechi tati ñom piuquengechi che füchale, ca mülei tañi ñochiyahual femngechi tañi cüdahuelnieafiel ta Jehová (Filip. 4:5). Inaduamaiñ ñi rupan ta Barzilái. Nielu 80 tripantu tüfachi huentru, ti rey David elueyu quiñe falin cüdau tañi palacio mu. Huelu Barzilái lloulai ti cüdau. ¿Chumngelu? Quisu quimniefui ñi femnoafel quiñeque cüdau. Feimu chalintuculelfi ta David quiñe huentru doi huechelelu, Kimham pingelu (2 Sam. 19:35-37). Barzilái reque, fachantü pu füchalelu ayühunquechi eluquefi tati pu doi huechelelu ñi doi cüdahual ti trahunche mu. w21.09 pag. 10 parr. 6, 7

¿Cüdautuqueimi tami peafiel ta Chau Dios ñi poyechefengen? Quiñeque iñchiñ pichicalu, niefuiñ chi quiñe chau poyechefengenolu. Feimu cüdautuafuiñ taiñ peafiel ta Chau Dios ñi poyechefengen. Rume ayühun-ngei taiñ quimal chumngechi Jehová tañi quimnien taiñ felen. Jehová ayülei taiñ fülcontuafiel, feimu Biblia quimeltui: “Fülconmün ta Ngünechen meu, fei quisu fülconai ta eimün meu” (Sant. 4:8). Jehová poyenieiñmu, fei taiñ doi cüme Chau taiñ nieal. Jesús quelluafeiñmu taiñ doi fülcontuafiel ta Chau Dios Jehová. Jesús cüme quimniefi ta Chau Dios, feimu cüme inayentuquefi chumquen ta Jehová. Feimu feipi ‘pequeteu ta iñche, ca femngechi pequefi ta Chau’ (Juan 14:9). Jesús quimeltueiñmu chumngechi taiñ respetayafiel ca taiñ feyentual taiñ Chau. Ca quimeltueiñmu chem taiñ femal taiñ ayühuelafiel ta Jehová ca taiñ rumel hueniyeafiel. Jesús ca quelluqueiñmu taiñ quimürpual Jehová rume piuqueyechequei ca hulquei cümelcan. w21.09 pag. 21 parr. 4, 5

Jehová tañi pu che quiñeucüleingün tañi serfiquefiel mu ta Jehová. Jehová manelfi pu loncolelu ti falin cüdau: ñi lifcüleal ti trahunche. Feimu quiñe cristiano fütra culpale, tati pu loncolelu mülei ñi cüme ngüneduamafiel tañi mülenagal ti trahunche mu. Por ejemplo, mülei tañi cüme inaduamal ñi rüf repentiucületun tañi huesa femün mu. Tati che feipiafui tañi repentiucülen, huelu ¿rüf üdefi tañi huesa femün mu? ¿Eluucülei tañi huiño femhuenoal? Tañi pu huesaque hueni ñi duam mu culpale, ¿eluucüleafui tañi hueniyehuenoafiel? Tati pu loncolelu ngillatuquefi ta Jehová ca cüme ngüneduamquefi chem tañi rupan ca chem pin ta Biblia. Cüme inaduamafingün tañi chumngechi llouquefiel tañi ngülamtungeel. Fei hula, pu loncolelu raquiduamaingün tañi chumal: tañi mülenagal trahunche mu cam quechanentungeal (1 Cor. 5:11-13). w22.02 pag. 5 parr. 11, 12

Chumten tripantu yeniefuliyiñ rume taiñ fautizahun, com iñchiñ mülei taiñ cüme yenieal taiñ mongen chumngechi ñi ayüqueel ta Jehová. Taiñ femal, mülefui taiñ cüme ngüneal taiñ raquiduam. ¿Chemu? Taiñ raquiduam yeafeiñmu taiñ cümeque dungu femal cam huesaque dungu femal. Re huesaque dungu mu raquiduamcüleliyiñ, huesaque dungu feipiaiñ ca femaiñ (Efes. 4:17-19). Huelu re raquiduamcüleliyiñ cümeque dungu mu, nütramcayaiñ cümeque dungu ca femaiñ chumngechi ñi ayüqueel ta Jehová (Gál. 5:16). Quiñeque mu conturumeafeiñmu huesaque raquiduam taiñ lonco mu, fei com famentulayafuiñ chi. Huelu ngünehuafuiñ taiñ inanoafiel feitachi huesaque raquiduam. Petu taiñ fautizaunon, mülefui taiñ elcünual chem huesaque dungu rume ñi ayüquenoel ta Jehová. Tüfa quelluaiñmu taiñ elcünual taiñ cuifi huesa mongen. Huelu re elcünulayafiyiñ müten taiñ cuifi huesa mongen. Ca mülei taiñ nietual “tati hue mongen”, femngechi ayühulafiyiñ ta Jehová. w22.03 pag. 8 parr. 1, 2

Pu loncolelu cüdautuafui ñi quimal ñi rüf repentiucülepen mai quiñe che, ¿chumngelu? Pu loncolelu peñmaquelafi ñi piuque ti culpachi che. Feimu mülei ñi cüme ngüneduamal chem dungu pengeli ti culpachi che ñi elcünutun tañi huesa femün ca ñi rüf üdefiel. Pu loncolelu mülei ñi cüme ngüneduamal ñi nor raquiduamtun ti che, ñi huesa duamcülepen mai tañi femün meu ca ñi femhuenon feichi huesa dungu. Ti che alüñmayafui ñi cüme elcünutual tañi mongen. Quiñe huemünentuelchi che trahunche mu, mülei ñi fill trahun mu ñi amual. Ca mülei ñi papeltunieafiel Biblia ca ñi ngillatuleal. Ca mülei ñi cuñiutucuhual ñi femhuenoafiel feiti huesa dungu. Com tüfachi dungu femle, femngechi pengelcünuai tañi rüf repentiucülen. Ti huemünentungechi che eluule ñi cümelcautual Jehová engu, Jehová perdonayaeyu. Cafei pu loncolelu quelluaeyu tañi huiñotual Jehová ñi troquiñche mu. w21.10 pag. 5, 6 parr. 16-18

Jesús mülelu huenu mu ca mülepalu Mapu mu, fente ñi piuqueyefiel ta Jehová quisu müten poyeniefi (Luc. 4:8). Fei Jesús quimeltufi tañi pu inanieteu ñi ca femngechi femal. Jesús ca tañi pu inanieteu pünequelafingün chem adentun no rume ñi püramyeafiel ta Jehová. Chau Jehová quiñe püllüngei, feimu pu che adentucünulayafui ñi chumngen ta Jehová (Is. 46:5). Huelu fachantü fentren che adentucünuquefi ta quiñeque che, santo troquiquefingün, fei llellipuquefingün. ¿Cümepei mai tüfa? Femlai. Jehová feipifi pu israelche chem ñi feipin taiñ peelchi texto fachantü. Feimu pu rüfngechi cristiano ayüqueingün ñi ayühulafiel ta Jehová, feimu poyequelafingün adentun. Fachantü pu Dunguquelu Ineingen Jehová inayentuquefingün ñi femqueel pu hunenque cristiano mülequefulu cuifi. w21.10 pag. 19, 20 parr. 5, 6

Jesús feipifi feitachi pu cristiano mülelu Judea mapu mu Jerusalén huaria ñi hualloñmayaeteu fentren soltau (Luc. 21:20-24). Rupale tüfa, tati pu cristiano mülefui ñi lefmahual huincul püle. Femngechi femle engün, montuafuingün. Huelu ca elcünuafuingün tañi falinque fillem. Cuifi mu tüfachi revista feipi: “Feichi cristiano elcünuingün tañi mapu, ñi ruca ca yelafingün rume tañi nieel ruca mu. Maneluucülefuingün Jehová tañi cuidayaeteu ca quelluaeteu, feimu doyümfingün ñi poyefiel”. Ca feipi: “Cüpalechi antü meu, rupayaiñ huesaque dungu mu. Fei, ¿chem doi falintuafiyiñ? ¿Tati falinque fillem taiñ nieel cam taiñ poyefiel ta Jehová? Puule ñi afal huesaque dungu, chaftuafiyiñ cüdaungechi dungu. Iñchiñ ca femngechi chumaiñ rume taiñ montuluhual”. w22.01 pag. 4 parr. 7, 8

Pu israelita tripatulu Egipto mapu mu, Jehová feipifi ta Moisés ñi chumngen ta quisu. Feipifi: “Jehová, Jehová, quiñe Ngünechen cutranduamyechequelu, cutranpiuqueyechequelu, ca lladcüfemquenolu, rume piuqueyechequelu ca rüfngelu, nor piuqueyequefilu ta huarancaquechi pu che, huiñoduamtuquefilu huelulcan, huesa femün ca ti culpan” (Éx. 34:6, 7). Femngechi Jehová pengelelfi ta Moisés quiñe rume falin dungu. ¿Chem dungu? Jehová feipi ñi rume piuqueyechequen. Tati Biblia alünquechi feipiquei Jehová ñi rüf piuqueyechefengen (Núm. 14:18; Neh. 9:17; Sal. 86:15; 103:8; Joel 2:13; Jon. 4:2). Afmatufali ta Chau Jehová mufüchi rupa feipiquelu tañi rüf piuqueyechefengen. w21.11 pag. 2, 3 parr. 3, 4

Ti apostol Pedro ca tañi domo rume inayentufalfuingu. Pedro challhuaquefui femngechi ñi nieal ta plata ca ñi eluafiel tañi domo tañi duamnieel. Quiñe rupa, Jesús feipifi ta Pedro ñi elcünual tañi challhuaquen fei tañi inayafiel. Fei Pedro nütramcapelafi tañi domo (Luc. 5:1-11). Fei, ¿chumi Pedro? Eluhui tañi inayafiel ta Jesús. Fei tañi domo compañnieyu. ¿Chumngechi quimiyiñ tüfa? Biblia pengeli Pedro tañi domo tañi compañnieteu (1 Cor. 9:5). Pedro tañi domo cüme cristianangequefui, poyequefui Jehová. Feimu peno Pedro ngülamtufi tati pu curehuen (1 Ped. 3:1-7). Pedro ca tañi domo maneluucülequefuingu Jehová tañi cuidayaeteu, feimu doyümfingu ñi poyeafiel ta Jehová (Mat. 6:31-34). w21.11 pag. 18 parr. 14

Tati apostol Pablo rume piuqueyequefui tañi pu peñi ca pu lamngen. Rume cüdauquefui ñi cuidayafiel engün (Hech. 20:31). Tañi femquen mu Pablo, com pu peñi ca pu lamngen piuqueyeyu engün. Quiñe rupa, pu loncolelu Éfeso huaria mu quimlu ñi pehuenoafiel ta Pablo, ngümaingün (Hech. 20:37). Famülque mu, Pablo reque, pu loncolelu rume piuqueyequefingün tañi pu peñi ca pu lamngen ca eluucüleingün tañi quelluafiel engün (Filip. 2:16, 17). Huelu quiñeque mu, tati pu loncolelu cüdautuafuingün ñi huechunentual com ti cüdau ñi nieel engün. ¿Chem quelluafeyu engün? Cümeafui pu loncolelu ñi raquiduamal Pablo tañi femün meu. Pablo com pepiluhun-ngelafui, culpafengefui, cüdautuquefui ñi femal cümeque dungu (Rom. 7:18-20). Huesaque dungu rupalu rume ta Pablo, ayüucülequefui ca fentecünulai tañi quelluafiel pu peñi ca pu lamngen. Ti pu loncolelu inayentufile ta Pablo, ayühunquechi cüdahuelnieafingün ta Jehová rupan mu rume huesaque dungu mu. w22.03 pag. 26 parr. 1, 2

Levítico 19:3 quimeleiñmu pu israelita ñi chumquefel ti sabado antü meu. Feichi antü mu, elcünuquefuingün ñi cüdau tañi poyeafiel Jehová. Feichi antü meu, Jesús amuquefui ta sinagoga meu ñi papeltual Chau Dios ñi huirintucuel (Éx. 31:12-15; Luc. 4:16-18). Fachantü iñchiñ taiñ cristianongen, coneltuquelaiñ tati Ley dungu meu. Huelu, ¿chem quimeltuafeiñmu ñi feipin? Tunte fentren cüdau nieafuiñ rume, huelu mülei taiñ elcünual antü taiñ poyeafiel Jehová. ¿Eimi cai? Doi tiempo elcünuafuimi tami poyeafiel Jehová. Femülmi, doi cüme hueniyerpuafimi Jehová. Tüfa ca quelluaimu tami lifngeal. w21.12 pag. 5 parr. 13

Mülepalu mapu mu, Jesús dullintuchequelafui. Com che engün trahuluuquefui, ricu cam pofre ngepe rume. Cafei feiti culpafe che pingequelu Jesús cutrantupiuqueyequefi. Ñi femün mu ta Jesús fentren che famentueyu. Doi mai ramtufingün ta Jesús ñi pu discipulo: ‘¿Chumngelu am ipeimün ca putupeimün fei ti cofraquelu impuesto ca ti pu culpafe eimün?’. ¿Chem pieyu ta Jesús? Jesús feipi taiñ peelchi texto fachantü (Luc. 5:29-31). Petu ñi cüpanon Mapu mu tati Mesías, Biblia feipicünui ñi cüme lloungenoal. Feipi: “Quisu illamcangei ca famentueyu ti pu che, [...] quisu ellcalequefui reque tañi ange iñchiñ mu. Illamcangei ca falinolu troquifiyiñ” (Is. 53:3). Tüfachi profecia pengeli ti Mesías ñi famentungeal. Pu Judio quimniefuingün tüfa, feimu ngelafui ñi afmatulehueal engün. w21.05 pag. 8, 9 parr. 3, 4  

Hunen siglo mu, quiñeque cristiano cüdautuquefui ñi inayafiel Chau Dios ñi dungu (Sant. 1:22). Caquelu dullintuquefui tati pu cüme felen che, nielu ta plata (Sant. 2:1-3). Ca quiñeque cristiano müte ngüneuquelafui tañi quehun engün (Sant. 3:8-10). Femfulu rume engün feitachi huesaque dungu, huelu Santiago maneluucülefui tañi femhuenoal engün. Santiago piuqueyenquechi ngülamtufi engün huelu ca feipifi ñi huesa femmequen engün. Santiago ca yafültucufi pu nehue maneluucülenolu Jehová mu, femngechi tañi feipiafiel engün pu loncolelu tañi quelluaeteu (Sant. 5:13, 14). ¿Chem quimeltun entuafuiñ? Quimtucuaiñ ñi rupamequen pu estudiante ca cüme raquiduamanieafiyiñ. Alünque estudiante cüdautuquei ñi inayafiel ñi chem pin ta Biblia (Sant. 4:1-4). Alüñmayafui tañi elcünual tañi huesaque huimtun tañi niequefel engün ca cüdautuafuingün tañi inayafiel ñi chumngen ta Jesús. Iñchiñ ca nehuencünuhuafuiñ taiñ feipiafiel pu papeltuquelu Biblia ñi cüme elcünutual ñi mongen engün. Cafei maneluucüleaiñ Jehová müten cüpalafi com pu ñom piuquengechi che ca eluafi nehuen tañi cüme elcünutual ñi mongen (Sant. 4:10). w22.01 pag. 11 parr. 11, 12

Com iñchiñ ayüqueiñ taiñ cutranpiuqueyechefengeal, Jehová reque. ¿Chemu? Jehová allcütulayafi tati cutranpiuqueyechequenolu. Iñchiñ ayüqueiñ taiñ allcütuñmayaeteu taiñ ngillatufiel ta Jehová, feimu duamtuchequeiñ ca cuñillchequeiñ. Iñchiñ eluucülequeiñ taiñ quelluafiel taiñ pu peñi ca pu lamngen sufrilelu. Cafei raquiduamtucuniequefiyiñ ñi feipin Santiago 2:13: ‘Tüfei engün tati cutranpiuqueyenofilu ta caquelu ramtucadungungeai’. Com iñchiñ duamnieiñ taiñ cutranpiuqueyengeal. Loncontuculiyiñ tüfa, cutranpiuqueyeafiyiñ ta caquelu. Doi mai cutranpiuqueyeafiyiñ feiti culpachi che huiñotulu Jehová ñi troquiñche mu. Ñi rupan quiñeque che mülelu Biblia mu, quelluafeiñmu taiñ cutranpiuqueyechefengeal. w21.10 pag. 12 parr. 16, 17

Quiñelehuechi pun petu ñi lanon ta Jesús, ca quiñe rupa amui cheu ñi tüngcüleal femngechi ñi llellipuafiel Jehová ca raquiduamal. Amui ta Getsemaní pingechi jardin mu. Feiti mu, Jesús quimeltufi tañi pu discipulo quiñe falin dungu. Puulu engün Getsemaní pingechi jardin mu, doi rangi punpelai. Jesús feipifi tañi pu discipulo ñi trepeleal, fei amui ñi llellipual (Mat. 26:37-39). Huiñotulu, umaucülei engün. Fei ca huiño feipifi: “Trepelemün, ca ngillatulemün” (Mat. 26:40, 41). Jesús quimniefui tañi pu discipulo ñi rume cansalen. Feimu Jesús cutranpiuqueyefi ca feipifi engün: “Tamün cuerpo yafüngelai”. Tunte ngülamtungefui engün rume, ca epu rupa Jesús peeyu ñi umautulen engün (Mat. 26:42-45). w22.01 pag. 28 parr. 10, 11