Febrero

Ti lonco ülmen Ezequías rume cutrancülefui, fei llellipufi ta Chau Ngünechen ñi tremoltuaeteu, fei Jehová tremoltueyu (2 Rey. 20:1-6). Ti apostol Pablo ca llellipufi ta Jehová ñi müntuñmayaeteu “quiñe chacai reque” felelu. Huelu Jehová tremoltulafi (2 Cor. 12:7-9). Ti lonco ülmen Herodes ayüniefui ñi langümafiel Santiago engu Pedro. Fei quiñe cüme püllü montulfi ta Pedro ñi layal, huelu Santiago langümngei (Hech. 12:1-11). Ramtuhuafuiñ: “¿Chumngelu chi cai Jehová montulfi ta Pedro, huelu montul-lafi ta Santiago?”. Biblia ta feipilai. Huelu rüf maneluuqueiñ ta Chau Jehová “norngenochi dungu femquelai” (Deut. 32:4). Quiñeque mu, Jehová huiñoldunguqueiñmu taiñ llellipun huelu chumngechi taiñ ayünienofel. Huelu maneluuliyiñ Jehová ñi norngen ca ñi piuqueyechequen, cüme llohuaiñ chumngechi taiñ huiñoldungueteu taiñ llellipun (Job 33:13). w23.11 pag. 21 parr. 6

Santiago feipi tati quimche “eluucülequei ñi femal tañi feipingeel”, feimu ¿chumaiñ? Eluucüleaiñ taiñ feyentuafiel feichi pu che Jehová ñi elueteu autoridad. Huelu cuñiutucuhuaiñ. Quiñe che feipieliyiñmu taiñ femal chem ñi ayüquenoel ta Jehová, femlayaiñ (Hech. 4:18-20). Chau Jehová ñi ngülam norngei, feimu cüdautuquelaiñ taiñ inayafiel (Sal. 19:7). Pu che huelulcaquei, feimu cüdaungei ñi inangeal ñi ngülam. Femngele rume, Chau Jehová eluyefi autoridad tati pu chau, pu gobernante ca pu loncolelu (Prov. 6:20; 1 Tes. 5:12; 1 Ped. 2:13, 14). Taiñ feyentuafiel Jehová, duamfali taiñ inayal ñi feipin tüfachi pu che. w23.10 pag. 6 parr. 2, 3

Raquiduamliyiñ fente ñi nehuen-ngen ta Jehová, doi maneluhuaiñ quisu meu. Jehová niei com nehuen ñi femal ñi feipicünuel (Job 42:2; Mar. 10:27; Efes. 3:20). Jehová feipifi Abrahán engu Sara ñi nieal engu quiñe püñeñ, füchalen mu rume engu (Gén. 17:15-17). Ca feipifi Abrahán ñi pu cüpanche ñi eluafiel ti mapu Canaán pingelu. Fentren tripantu mu, Abrahán ñi pu cüpanche esclavongequefuingün Egipto mapu mu, feimu huechutriparpualu reque felelafui ñi feipicünuel ta Jehová, huelu huechutriparpui llemai. Jehová ca feipicünufi ta María ñi choyümafiel ta Jesús fütangenofulu rume. Femngechi ca femtriparpui quiñe dungu ñi feipicünuel Jehová jardin de Edén mu fentren tripantu cuifi mu (Gén. 3:15). Raquiduamliyiñ Jehová chumngechi ñi femtriparpun tañi feipicünuel, fei quimtucuaiñ Jehová ñi fente nehuen-ngen. Tüfa quelluaiñmu taiñ doi maneluhual ñi acual ti hue mapu (Jos. 23:14; Is. 55:10, 11). w23.04 pag. 28 parr. 10-12

Jehová allcütuñmaquefi David ñi llellipun ca montulquefi tañi pu caiñe meu (1 Sam. 19:10, 18-20; 2 Sam. 5:17-25). Iñchiñ ca femngechi maneluhuafuiñ taiñ quelluaeteu Jehová. Quiñeque mu, Jehová huiñoldungulayaiñmu chumngechi taiñ ayüniefel. Pablo quiñe cutrancahun dungu niefui, ca cüla rupa llellipufi ta Jehová tañi entuñmayaeteu feichi huesa dungu. Jehová allcütuñmaeyu ñi llellipun, huelu entuñmalaeyu ñi cutrancanieteu, huelu nehuentucueyu femngechi tañi serfinieafiel Jehová (2 Cor. 12:7-10). Quiñeque mu, Jehová ca lloudungulayaiñmu taiñ llellipun chumngechi taiñ ayüniefel, huelu mülei taiñ maneluucüleal Jehová mu quisu quimnielu am chem taiñ duamnieel. Feimu chem taiñ llellipuel ca chem taiñ raquiduamqueel “Chau Ngünechen doi fütra dungu femafui” (Efes. 3:20). Jehová lloudungulayafeiñmu chi chumngechi taiñ ayüqueel, feimu Jehová allcütuquelai chi piafuiñ, huelu quimnieiñ taiñ allcütuaeteu. w23.05 pag. 8, 9 parr. 4-6

Cümei taiñ raquiduamal ñi feipin ta Biblia ñi huiñomongetual pu lachi che. ¿Chumngelu am? Cüpalechi antü mu, conturumeafeiñmu quiñe huesa cutran cam larumeafui quiñe taiñ pu che (Ecl. 9:11; Sant. 4:13, 14). Rüf maneluucüleliyiñ ti huiñomongetun mu, chaftuafiyiñ feitachi huesaque dungu (1 Tes. 4:13). Biblia feipi Jehová cüme quimnieiñmu ca rume piuqueyenieiñmu (Luc. 12:7). Feimu laliyiñ rume, huelu Jehová huiñomongeltuaiñmu, femngechi chengeaiñ müten ca femngechi raquiduamnieaiñ müten. Ca Jehová elueiñmu quiñe cüme maneluhun: taiñ rumel mongeleal, laliyiñ rume huelu huiñomongeltuaiñmu. ¿Chumngelu maneluhuafuiñ ñi huiñomongetual lachi che? Quimnieiñ Jehová rüf ayüniei ñi huiñomongeltuafiel pu layelu ca pepiluucülei ñi femal. w23.04 pag. 8, 9 parr. 2-4

José engu María quiñehun cüdahuingu ñi fülconcüleal Jehová meu. Quimniefuingu ñi rume falin-ngen quiñentrür poyeafiel Jehová (Luc. 2:22-24; 4:16). Tüfa inayentufali ñi femün engu. Eimün nielmu pu püñeñ, doi cüdautuqueimün chi amual trahun mu cam tamün quiñentrür estudiayal Biblia. Ca doi cüdautuqueimu chi quiñentrür tamu llellipual ca papeltuafiel Biblia. Huelu rume falin-ngei tamu quiñentrür poyeafiel Jehová. Femngechi doi fülconcüleaimu ta Jehová mu, ca eimu doi quiñeucüleaimu. Feimu doyelchi poyeniefimu ta Jehová. Nielmu yafcahun dungu, feimu ayülayafuimu chi tamu quiñentrür estudiayal Biblia. Fei, ¿chumafuimu? Quiñentrür pichi inaduamafuimu chem tamu ayühuelqueteu Biblia mu. Tüfa quelluafeimu tamu doi cümelcautual ca tamu doi piuqueyehual. Ca femngechi doi ayünieafuimu tamu poyenieafiel Jehová. w23.05 pag. 22 parr. 7, 8

Abdías fente tañi yamniefiel mu Jehová, manelfalngefui ca nor huentrungefui. Feimu ti rey elfalcünueyu tañi ülmen ruca (ca ngüneduamnge Nehemías 7:2). Abdías ca nehuen piuquengefui. Abdías ñi antü mu ngüneniequefui ti rey Acab (1 Rey. 16:30). Cafei Acab ñi domo Jezabel pingelu, poyequefui ti coila dios Baal. Ca fente tañi üdefiel mu Jehová, Jezabel ayüquelafui tañi poyengeal ta Jehová Israel mu, langümfi cütu fentren profeta (1 Rey. 18:4). Quiñechi, Jezabel inacafi Jehová tañi pu profeta ñi langümafiel engün, fei ¿chumi Abdías? Ellcafi pataca profeta: quiñe püle ellcafi 50 profeta, cañpüle ca 50, fei eluhui tañi eluafiel co ca cofque (1 Rey. 18:13, 14). Jezabel quimfule tañi femün ta Abdías, langümafui. Fei Abdías, ¿llicalepelafui? Ayülafui tañi langümngeal. Huelu doi piuqueyefui Jehová ca tañi pu serfiqueteu cuñiutucufulu rume ñi mongen. w23.06 pag. 15, 16 parr. 9, 10

Cuifi mu reque, Jehová amulei ñi adniefiel tañi troquiñche Biblia mu ca Jesús ñi loncolen mu. Ca femngechi Jehová dulliquefi quiñeque huentru ñi adnieafiel tañi troquiñche. ¿Chumngelu feipiafuiñ? Raquiduamnge 1870 tripantu püle chem ñi rupan. Feichi mu, Russell ca tañi pu quelluqueteu adümürpuingün 1914 tripantu mu ñi rupayal quiñe falin dungu Chau Dios ñi Gobierno mu (Dan. 4:25, 26). ¿Chumngelu femngechi raquiduamingün? Papeltufiel mu ti profecia mülelu Biblia mu. Ca Jehová llemai elueyu quimün tañi adümafiel. Fei 1914 tripantu mu rupai fentren huesaque dungu. Coni ti Primera Guerra Mundial, fütraque nüyün, ngüñün ca fill huesaque cutran. Com tüfachi dungu pengeli ñi ngünenien huenu mu Chau Dios tañi Gobierno (Luc. 21:10, 11). Femngechi felerpui ñi adümfiel Russell ca tañi pu quelluqueteu. Fei quimfalcünungei Jehová ñi adniefiel tüfachi pu huentru ñi quelluafiel tañi troquiñche. w24.02 pag. 22 parr. 11

Quimnieiñ Jehová taiñ piuqueyeteu mu, feimu ayüquei taiñ nieal quiñe cüme mongen (Rom. 8:35-39). Ca quimnieiñ inaliyiñ Chau Jehová tañi ngülam, cümelcayaiñmu (Is. 48:17, 18). Huelu, ¿chumafuiñ ruparumeliyiñ huesaque dungu mu? Quiñeque taiñ familia huesa duamelafeiñmu cam cutrancüleiñ chi, feimu cüdahuelquelafiyiñ Jehová chumngechi taiñ ayüquefel. Taiñ mapu mu rupai chi quiñe fütra nüyün cam cürüftucu mahun, fei rume huesalcaeiñmu. Cam inacangequeiñ chi taiñ testigongen mu. Femngechi dungu mu rupaliyiñ, ramtuhuafuiñ: “¿Chemu am fente huesaque dungu ta ruparupangen? ¿Huesa fempen mai? ¿Culpapefiñ mai ta Jehová? ¿Feimu chi quelluhuelaeneu?”. ¿Femngechi ramtuuqueimi eimi? Femülmi, huesa duamquilnge. Fentrequen pu che poyequefilu Jehová cuifi, femngechi dungu mu rupaquefuingün (Sal. 22:1, 2; Hab. 1:2, 3). w23.04 pag. 14 parr. 1, 2

Conpan mu huesaque raquiduam taiñ lonco mu, pürüm famentufemafiyiñ ca femlayaiñ chem no rume tañi püntünentuaeteu Jehová mu. Jehová ayüquei taiñ ‘com piuque mu feyentuleal’ (Rom. 6:17). Com taiñ feipieteu Jehová cümelcaqueiñmu ca tañi ley dungu cambiangequelai (Is. 48:17, 18; 1 Cor. 6:9, 10). Huecüfü ayülei taiñ huesalcayaeteu ca taiñ huesa duamelaeteu, femngechi taiñ nehuencülehuenoal. Fei quintuyahulquei taiñ püntünentuaeteu Jehová mu (1 Ped. 5:8). Hunen siglo mu, pu cristiano tañi feyentuniefiel mu Jehová, aneltungeingün, hulelcangeingün ca langümngeingün cütu (Hech. 5:27, 28, 40; 7:54-60). Ca femngechi Huecüfü inacaqueiñmu fachantü. Taiñ pu peñi ca pu lamngen Rusia mapu mu ca caquelu pais mu rume huesalcangequeingün. Ca fill püle pu testigo caquerumei chumngechi tañi caiñetungequen. Quiñeque mu Huecüfü caiñetuquelaeiñmu, huelu ayüquei taiñ huelulcayaeteu taiñ ngüneduamnon mu rume (Efes. 6:11). w23.07 pag. 15 parr. 6-9

Chillcatumequelu eimi Biblia, doi piuqueyerpufimi ta Jehová. Feimu inafimi tami quimürpuel. Ca inafimi Biblia ñi ngülam, femngechi tami cüme femal. Norcünutuimi tami mongen ca tami raquiduam, femngechi tami ayühuelafiel Jehová. Ca femngechi eimi inayenturpufimi Jehová chumngechi quiñe pichiche inayentuquefi tañi chau (Efes. 5:1, 2). Ramtuhuaiñ: “Feichi antü tañi fautizahun ca fantepu mu, ¿doi piuqueyerpufiñ ta Jehová? ¿Doi piuqueyepefiñ mai tañi pu peñi ca pu lamngen Jehová reque?”. Ngüneduamülmi tami fente piuqueyehuenofiel Jehová ca tami pu peñi ca pu lamngen, huesa duamcülelayaimi. Femngechi dungu mu rupaingün pu hunenque cristiano, huelu Jesús quiñepülecünulafi engün, iñchiñ mu ca femlayai (Apoc. 2:4, 7). Quimniei taiñ huiño rume piuqueyetuafiel ta Jehová ca taiñ pu peñi ca pu lamngen, chumngechi taiñ femquefel cuifi hue quimlu ti rüf dungu. w23.07 pag. 8 parr. 2, 3

Ti apostol Pedro fentren rupa huelulcahui. Hunelu mu quisutu maneluhui, feipi: “Caquelu apostol püntütripale Jesús mu, iñche femlayan” pi (Mar. 14:27-29). Fei hula, mufü rupa umaunagi (Mar. 14:32, 37-41). Malocontueteu Jesús tañi pu caiñe, Pedro püntütripai, quisucünufi ta Jesús (Mar. 14:50). Fei hula, cüla rupa quimlafiñ Jesús pi (Mar. 14:66-71). Pedro ngüneduamuulu tañi fütra culpan, rume cutrantupiuquei fei ngümacahui (Mar. 14:72). Jesús huesa pilafi ta Pedro tañi huelulcan mu, doi mai elufi falinque cüdau (Juan 21:15-17). Pedro quimfui tañi huesa culpan, huelu famentuulai Jehová mu. ¿Chumngelu am? Quimnielu cai Jesús tañi petu piuqueyenieteu. ¿Chem quimeltuqueiñmeu? Jehová duamquei taiñ quimtucunieal taiñ piuqueyenieteu ca cüpa perdonaqueteu (Rom. 8:38, 39). w24.03 pag. 18 parr. 13-15

¿Chem dungu mu rupaquei pu conquelu pod cudumuhun mu? Yehueafuingün chi, quisu falintuhuequelaingün. Domongele, niepüñeñafui tañi ayünofiel rume. Ca huesalcaquefi tañi pu familia. Ca conturumeafeyu huesa cutran, fei langümafeyu. Ca hueniyehuelafingün rume ta Jehová (Prov. 7:23). Feimu Proverbios 9:18 feipi ti quim raquiduamnochi domo tañi pu mangelel “ñi mülen Rüngan mu”. Feimu quim raquiduamnieliyiñ, famentuafiyiñ ñi mangelün ti domo cüme raquiduamquenolu. Huelu, ¿chumngelu am fentrenque che allcütuquefingün? (Prov. 9:13-18). Fentrequen che pequei pornografia, femngechi allcütuquefingün ti quim raquiduamnochi domo ñi mangelün. Quiñeque che raquiduamquei huesa dungu no peafiel podngechi adentun, huelu felelai. Pequefilu podngechi adentun quisu huesalcahuingün, quisu falintuuhuequelaingün ca rume cüdautuquei ñi elcünuafiel. Quiñe che pequefilu podngechi adentun, rume cüdaungei ñi ngoimayafiel ca ñi nentuafiel ñi raquiduam mu. Pengen mu podngechi adentun, doi huesaque illutun niei pu che (Col. 3:5; Sant. 1:14, 15). Femngechi fentren pu che conquei podngechi cudumuhun mu. w23.06 pag. 23 parr. 10, 11

Petu ñi ngüneniemequen Estados Unidos ca Reino Unido, Chau Ngünechen apümcayafi com pu gobierno, Chau Dios müten ngünenietuai mapu. ¿Chumngelu quimnieiñ tüfa? Biblia feipi “ti cura”, tüfa ta Ngünechen ñi Gobierno, atemcayafi ti adentun ñi namun (Dan. 2:34, 35, 44, 45). Quiñeque mu caquelu pais caiñetuafi Estados Unidos ca Reino Unido, huelu hueulayafingün. Chau Ngünechen müten apümcayafi. Daniel feipicünui ñi chumngeal ti adentun ñi namun. ¿Eimi maneluucüleimi ñi rüfngen tüfachi dungu? Femngechi femülmi, pengelaimi tami mongen mu. Quimülmi ñi pichilehuen mapu müleyechi dungu, doyümlayafimi ti plata (Luc. 12:16-21; 1 Juan 2:15-17). Cafei adümliyiñ tüfachi profecia, doi falintuafiyiñ taiñ amuldungun cüdau ca doi quelluafiyiñ pu che ñi discipulongeal (Mat. 6:33; 28:18-20). Feula deu inaduamfilu tüfachi dungu, cümeafui taiñ ramtuhual: “¿Chem pengelquen tañi femquen mu? ¿Maneluucülepen mai Chau Dios ñi Gobierno mu, fei ñi apümcayafiel mapu mülechi gobierno pichiñma mu?”. w23.08 pag. 11 parr. 13, 14

Taiñ füchalen mu, taiñ cutrancülen mu cam caquelu dungu taiñ rupaquen mu, pepi femlayafuiñ com taiñ femquefel cuifi. Quimtuculiyiñ tüfa, pengelaiñ taiñ ñom piuquengen. Inayentuafiyiñ Barzilái. Cüdautuliyiñ quiñeque cüdau taiñ femnoafel, taiñ cutrancülen mu cam taiñ füchalen mu, lloulayaiñ (2 Sam. 19:35, 36). Inayentuafiyiñ Moisés, eluhuaiñ taiñ quellungeal. Iñchiñ taiñ pepi femnoel, eluafiyiñ caquelu ñi femal (Éx. 18:21, 22). Ñom piuquengeliyiñ, raquiduamcülelayaiñ taiñ pepi femquenon, femngechi cansalelayaiñ. Cafei culpatuulayaiñ ñi femquen huesaque dungu caquelu. Iñchiñ feipilayafuiñ caquelu che chem tañi femal engün. Huesa femle engün, catrütulayafuiñ ñi huesa rupalen engün. Quiñeque chau rume cutrantupiuqueafuingün tañi pu yall elcünufile ta Jehová. Huelu pu chau culpatuule ñi huesa femün tañi yall, yenieafuingün quiñe fanechi dungu reque tañi cuden mu. Jehová ayüquelai femngechi dungu tañi rupaleal engün. w23.08 pag. 29 parr. 11, 12

Quiñe rupa Sansón ayüfui ñi nieafiel quiñe Filistea domo. ¿Chumngelu femi? Jehová tañi adnieteu mu. Jehová ayüquefui tañi huehuafiel pu Filistea che, feimu adcünufi ta Sansón tañi nieafiel tüfachi domo. Ca rupa mu, Sansón amui quiñe cüri domo ñi ruca mu Filistea mapu mu. Feichi mu, Jehová nehuentucufi Sansón ñi ngedunentuafiel ti huaria ñi puerta ca ñi meñcu yeafiel, femngechi inei rume lefcontuafui ti huaria (Juec. 14:1-4; 16:1-3). Huelu quiñe rupa quintulai Jehová tañi quelluaeteu. Sansón “ayüfi quiñe domo mülelu Sorec ñi laf mapu mu. Tüfachi domo Dalila pingei”. Dalila, ¿Israel tuhun-ngepelafui? Feimu nieule engu, quellulayafeyu ta Sansón tañi chaftuafiel pu Filistea che. Ñi femün ta Sansón quisu tañi ngünehun mu, Jehová tañi quellun mu no. Müna huesa tripai ñi femün ta Sansón. Pu Filistea che feipifingün ta Dalila ngünencafilmi Sansón, cullihuaiñ pingei. Fei Dalila femi. w23.09 pag. 5 parr. 12, 13

Quim ngüneduamliyiñ, quelluaiñmu taiñ ñom piuquengeal. Quiñe che ramtueliyiñmu taiñ feyentun mu, loncontucuaiñ tüfa: iñchiñ quimlaiñ chumngelu am taiñ ramtucamequeteu. Feimu ngüneduamliyiñ chumngelu taiñ ramtucamequeteu, ngüneucüleaiñ taiñ lloudungufemnoafiel (Prov. 16:23). Peafiyiñ ñi femün ta Gedeón. Gedeón amulu ñi hueichameafiel pu Madián che, feipifi quiñeque troquiñ Israel tañi compañaeteu, huelu feipilafi pu Efraín che ñi compañaeteu. Feimu pu Efraín che rume illcuingün. “¿Chumngelu feipimulaiñ?” pifingün ta Gedeón. Huelu, ¿chumngelu fente illcuingün? ¿Mallmaupelaingün? Huelu Gedeón eluhui ñi ngüneduamal chemu tañi illculen, feimu yamün mu huiñoldungufi engün. Femngechi dungufilu, “quisu engün tüngcülehueingün” (Juec. 8:1-3). w23.09 pag. 16 parr. 8, 9

Jehová ca tañi Fotüm rume quiñeucüleingu. Feimu Jehová rume hueñancüi pefiel mu tañi Fotüm ñi hulelcangen, illamcangen ca fente ñi cutrantulen. Quiñe chau, ñuque lan mu tañi püñeñ, rume cutrantupiuqueafui. Trürümngelayafui chem hueñancün no rume. Maneluucüleliyiñ rume iñchiñ taiñ huiño petuafiel taiñ piuqueyenieelchi che, hueñancüleafuiñ mai. Feimu lalu Jesús nisan 33 tripantu meu, ¿ca femngechi hueñancüpelai Jehová pefiel mu tañi cutrancahun ca ñi lan mu tañi poyen Fotüm? (Mat. 3:17). Petu ñi acunon ti Trahun Jesús tañi lan ñi acordangeal, ¿chumafuimi? Quisulen cam tami familia eimün papeltuafuimi Biblia mu ñi femün Jesús taiñ montulaeteu. Ca feichi antü ñi acordangeal Jesús tañi lan, peafimi ti falin video feipilu pulihuen taiñ poyeafiel ta Jehová. Pepicaliyiñ taiñ piuque, quelluafiyiñ caquelu che tañi ca quelluaeteu feitachi falin trahun (Esd. 7:10). w24.01 pag. 11 parr. 10-12

¿Chumaiñ taiñ llohual Jehová tañi nehuen? Llellipuqueafiyiñ ta Jehová, fei quisu eluaiñmu taiñ nehuentuleal (2 Cor. 4:7). Cafei papeltuqueafiyiñ tati Biblia ca raquiduamaiñ taiñ papeltupeel mu (Sal. 86:11). Chau Dios ñi huercün dungu “nehuen-ngei” (Heb. 4:12). Feimu ngillatulmi ca papeltufilmi Biblia, Jehová nehuentucuaimu. Femngechi ayühun mu serfiafimi ca huechunentuaimi chem cüdau rume tami elfalcünungeel. Feula peaiñ chumngechi Jehová yafültucufi ta Jonás. Jonás elfalcünungei quiñe falin cüdau, huelu llicai. Fei cañpüle amutui, farcu mu pürapui. Ñi femün mu Jonás, tripai quiñe cürüftucu mahun, fei epe laingün com pu mülelu farcu mu. Fei pu cüdauquelu farcu mu lafquen mu ütrüfentufingün ta Jonás, fei quiñe fütra challhua ñi pütra meu puhui, com dumiñcülefui. ¿Llicapelafui Jonás? Jonás quisulefui ti fütra challhua ñi pütra meu, fei ¿chumi ñi nehuencüleal? Llellipufi ta Chau Jehová (Jon. 2:1, 2, 7). w23.10 pag. 13 parr. 4-6

Jehová elcünui ñi huirintucuel ti apostol Pedro Biblia mu taiñ quelluaeteu (Rom. 15:4). Fentren che feyentuquelai ñi feipin Biblia ñi rupayal cüpalechi antü mu. Iñchiñ fentren tripantu mu feipiquefiyiñ pu che ñi afal huesaque dungu, huelu quiñeque che ayentuqueiñmu, turpu cüpalayai feichi antü piqueiñmu (2 Ped. 3:3, 4). Amuldungun mu, cüdau mu cam taiñ familia mu femngechi feipingeliyiñ, fei hueluraquiduamelafeiñmu. ¿Chem quelluafeiñmu? Peafiyiñ ñi feipin Pedro. Quiñeque che raquiduamquei Chau Jehová alüñmaquei ñi apümafiel huesaque dungu. Huelu ñi feipin Pedro quelluafeiñmu taiñ femngechi raquiduamnoal (2 Ped. 3:8, 9). Jehová ñi adquiñ mu, huaranca tripantu quiñe antü reque felei. Cafei Jehová ñochi duamngei, ayünielai inei no rume ñi apümcangeal. Femfulu rume, tañi antü acuai llemai, fei apümcayafi com huesaque dungu. w23.09 pag. 26, 27 parr. 2-5

Ti apostol Pablo, ¿chumngelu huirintuculelfi pu cristiano Judea mu mülelu? Epu dungu mu peno. Hunelu mu, tañi yafültucuafiel. Petu tañi cristianongenon engün, quisu engün coneltuquefuingün pu judio ñi religion mu. Cristianongerpulu engün, tañi pu lonco ñi niequefel ¿ayentupelaeyu engün? ¿Chemu? Pu cristiano niequelafui quiñe ngillatuhue ruca cheu ñi poyengeal ta Jehová. Niequelafuingün quiñe altar, femngechi chalintucual culliñ engün, sacerdote no rume niequelafuingün. Femngechi dungu rupalu, feitachi pu cristiano ¿huesa duampelafuingün? Müte maneluucülehuelafuingün chi Jehová mu (Heb. 3:12, 14). Quiñeque ayüfuingün chi ñi huiñotual tañi cuifi religion. Pablo, ¿ca chem dungu mu huirintuculelfi pu cristiano Judea mu? Pablo feipi quisu engün eluucülelai ñi quintuafiel doi falinque quimeltun Biblia meu “fütaqueche ñi iyael” reque felelu (Heb. 5:11-14). Quiñeque engün petu inaquefui Moisés ñi ley. w23.10 pag. 24, 25 parr. 3, 4

Quiñeque domo eluucülequei tañi fütangenoal (Mat. 19:10-12). Raquiduamlayaimi tañi fütangenon mu Jehová ca Jesús falintuquelaeneu pilayaimi. Tati pu domo fütangenolu, rume inayentufalngeingün trahunche mu. Quisu engün rume piuqueyechequeingün ca duamtuchequeingün, feimu ñuque reque, lamngen reque troquingequeingün (Mar. 10:29, 30). Quiñeque lamngen fill antü cüdahuelquefingün ta Jehová. Com mapu püle, pu lamngen doi cüdauquei amuldungun mu (Sal. 68:11). ¿Ayüafuimi tami doi cüdahuelafiel ta Jehová? Precursorangeafuimi, cüdahuafuimi deumarucan mu cam Betel mu. Llellipuafimi ta Jehová tami femal. Nütramcayafimi caquelu peñi, lamngen deu conlu cam hue conlu feitachi cüdau mu. Quisu engün feipiafeimu chumngechi tami pepicahual. Rupan nütramcafilmi, raquiduamaimi chumngechi tami huechunenturpual. Acule feichi antü tami fill antü cüdahuelafiel ta Jehová, fei fillque dungu femafuimi Jehová ñi troquiñche mu. w23.12 pag. 22 parr. 16, 17

Püllelepai ti fütra cutrancahun. Feimu doi falintufali taiñ amuldungun cüdau. Huelu nienoliyiñ plata cam caiñetungeliyiñ, cüdautuafuiñ ñi doyümafiel ti amuldungun. ¿Chem quelluaiñmu ñi hunentucuafiel Jehová ñi ayünieel? Maneluuqueaiñ taiñ quelluaeteu “Jehová Ñidolcülelu pu hueichafe mu”. Doyümfiliyiñ taiñ mongen meu Jehová ñi cüdau, fei quisucünulayaiñmu, femngechi llicalayaiñ (Ageo 2:4). Jehová ayüniei taiñ doyümafiel ti amuldungun, femngechi ñi montual pu che ñi mongen. Ageo yafültucufi pu judio ñi huiño deumatuafiel Jehová ñi ruca. Eluufule ñi cüdahual engün, Jehová cümelcayaeyu (Ageo 2:18, 19). Cafei iñchiñ doyümliyiñ Jehová ñi cüdau, quisu cümelcayaiñmu llemai. w23.11 pag. 16 parr. 8; pag. 17 parr. 11

Apostol Pablo feipi com che culpaquei, feimu iñchiñ taiñ duam mu nor chengelayafuiñ. Fei Jehová ñi adquiñ mu, ¿chumngechi am nor che troquingeafuiñ? Ca, ¿chumngechi ayühuelafuiñ? Taiñ quimal, peafiyiñ ñi feipin Pablo Abrahán mu. Canaán mapu mülelu Abrahán, nor che pieyu Jehová. ¿Chumngelu am nor che pingei Abrahán? ¿Ñi cüme inaniefiel Moisés ñi ley pemai? Femlai (Rom. 4:13). Feichi mu, ngelafui feichi ley, 400 tripantu rupalu hula hulngei tüfachi ley. Fei, ¿chumngelu Jehová nor che feipifi ta Abrahán? Cutranpiuqueyefi ca inaduamüñmafi tañi feyentulen (Rom. 4:2-4). w23.12 pag. 3 parr. 4, 5

Ti profeta Natán feipifi ti rey David taiñ peel ti texto fachantü. Huelu feichi pun müten, Jehová feipifi ta Natán David ñi deumanoal ti ngillatuhue ruca. Fei Natán feipimefi ta David tañi feipieteu Jehová. Huesa duamfui chi ta David (1 Crón. 17:3, 4, 11, 12). ¿Chumi David? Pürüm trapümfi com tañi duamafel ñi deumangeal ti ngillatuhue ruca (1 Crón. 29:1-5). Rupan feipifilu ta David ñi deumanoafiel ti ngillatuhue ruca, Jehová feipicünufi quiñe tañi yomelche ñi rumel reyngerpual (2 Sam. 7:16). Fei ti hue mapu mu David quimai Jesús, quiñe tañi yomelche, ñi ngüneniefiel ti mapu, feimu rume ayühuai. ¿Chem quimeltueiñmu ñi rupan David? Iñchiñ pepi cüdahuel-layafuiñ chi ta Jehová chumngechi taiñ ayüquefel. Huelu Jehová ca cümelcayafeiñmu, raquiduamlayafuiñ rume chumngechi taiñ cümelcayafeteu Jehová. w23.04 pag. 16 parr. 8-10

Quiñeque troquiñ Biblia doi yafültucuafeiñmu llicaleliyiñ. Quiñeque tüfa: Job, Salmos, Proverbios cam ñi feipin ta Jesús Mateo capitulo 6 mu. Llellipufiliyiñ ca papeltufiliyiñ Biblia, Jehová yafülduamelaiñmu. Rupaliyiñ huesaque dungu mu, maneluucüleaiñ Jehová taiñ quelluaeteu. Chumcaunorume quisucünulayaiñmu (Sal. 23:4). Jehová incañpeaiñmu, quelluaiñmu taiñ cüme foliluucüleal reque, nehuentucuaiñmu ca yafülduamelaiñmu. Isaías feipifi ta Jehová: “Eimi incañpeafimi pu recüluulu com piuque eimi mu, eimi eluafimi ñi tüngcüleal, maneluulu cai engün eimi mu” (Is. 26:3). Feimu maneluhuaiñ Jehová mu, eluucüleaiñ taiñ quelluaeteu. Femngechi chem huesa dungu rupale rume taiñ mongen mu, nehuentuleaiñ. w24.01 pag. 25 parr. 16, 17

Ñi feipicünuel Chau Dios fachantü femngechi femtriparpuquei. Isaías ca feipicünui: “Com tami pu fotüm ca pu ñahue enseñanietuaeyu ta Jehová, ca quisu engün rume cüme feletuaingün. Cüme nehuencüleaimi tati nor dungu mu. [...] Chem rume llicalcalayaimu. Tati llican dungu fülcontulayaimu rume” (Is. 54:13, 14). Com feitachi dungu huechutripamequei fachantü. Tati Huecüfü ngünenielu rume ti mapu, pepi catrütuquelaeiñmu taiñ quimeltucheal Chau Jehová mu (2 Cor. 4:4). Jehová tañi pin mu, turpu fentecünulayaiñ taiñ serfiafiel catrütungeliyiñ rume. w24.02 pag. 4 parr. 10

Iñchiñ feipicünufiyiñ ta Jehová taiñ serfiafiel, feimu eluucülequeiñ taiñ femürpual chem dungu meu rume taiñ mongen meu. Eluquefiyiñ taiñ pu che chem tañi duamnieel ca ayüqueiñ taiñ tuteafiel engün, huelu doyümqueiñ taiñ ayühuelafiel ta Jehová (Mat. 10:35, 36; 1 Tim. 5:8). Quiñeque mu taiñ familia ayülayafui chi quiñeque dungu taiñ femel, huelu ayühuelquefiyiñ ta Jehová. Quisu am deumafilu pu familia, feimu ayüfui tañi ayüucüleal (Efes. 3:14, 15). Taiñ rüf ayüucüleal, femaiñ Jehová taiñ feipieteu. Felei llemai, iñchiñ yafüluuqueiñ taiñ serfiafiel ta Jehová, huelu ca femngechi eluuqueiñ taiñ cuidayafiel taiñ pu che ca taiñ piuqueyenquechi troquiafiel. Jehová com peniei ca rume falintuñmaqueiñmu (Rom. 12:10). w24.02 pag. 18 parr. 11, 13