Marzo

¿Chem quelluafeiñmu taiñ doi feyentuleal? Inaduamfiliyiñ Jehová ñi deumael: huangülen, anümca, pu culliñ ca ti pu che. Jehová petu ñi deumanofiel chem no rume, tüfachi dungu ngequelafui, huelu com taiñ pequefiel Jehová tañi deumael (Gén. 1:1, 26, 27). Ca femngechi Jehová feipicünui ñi huecünutuafiel ti mapu, fei femtripayai tañi feipicünuel. Ti hue mapu mu, pu che nieai afnoachi mongen ca rumel nieaingün cüme mongen. Feimu maneluucüleafuiñ Jehová ñi cüme elcünutuafiel tüfachi mapu ti medin antü meu (Is. 65:17; Apoc. 21:3, 4). Petu ñi acunon ti hue mapu, eluucüleaiñ taiñ doi feyentuleal. ¿Chumngechi femafuiñ? Falintuafiyiñ Jesús ñi hulün ñi mongen, raquiduamaiñ Jehová ñi nehuen mu ca femaiñ cümeque dungu taiñ fülmanieafiel Jehová. Femliyiñ, pengelaiñ taiñ feyentulen ca taiñ ñom piuquengen, feimu llohuaiñ taiñ feipicünungeel (Heb. 6:11, 12). w23.04 pag. 31 parr. 18, 19

Jesús ayüniefui ñi püramyengeal ta Jehová, feimu quintupürai huenu fei nehuentu ngillatui, fei hula feipi: “¡Lázaro, tripapatunge!” (Juan 11:43). Fei Lázaro trecalen tripapai. Jesús femi quiñe afmatufalchi dungu inei no rume ñi femnoafel. Tüfa doi eluqueiñmu maneluhun ñi huiñomongetual pu lachi che. ¿Chumngelu? Loncontucuaiñ Jesús ñi feipifiel ta Marta: “Tami lamngen huiñomongetuai” pifi (Juan 11:23). Jesús ayüniefui ca niefui ta pepiluhun ñi huiñomongeltuafiel ta Lázaro. Cafei Jesús tañi ngüman mu pengeli ñi ayülen ñi huiñomongeltuafiel com pu layelu ca ñi hueñancülehuenoal pu layeluulu. Cafei Lázaro trecalen tripapatulu ti rüngan mu, pengeli Jesús niei ta pepiluhun ñi huiñomongeltuafiel pu layelu. Ca raquiduamaiñ Jesús ñi feipifiel ta Marta taiñ peelchi texto fachantü. Feimu rüf maneluuqueiñ ñi huiñomongetual com pu layechi che. w23.04 pag. 11, 12 parr. 15, 16

Quiñeque mu, mülei taiñ cacünutual chem taiñ llellipuquefiel ta Jehová, ¿chumngelu am? Doi cüme quimafuiñ chem tañi ayüquefel Jehová taiñ femal. Llellipufiliyiñ Jehová, acordayaiñ quisu feipicünui ñi apümafiel huesaque dungu puuchi antü meu. Apümafi com taiñ cutrancaqueteu, apümafi fütraque nüyün, cürüftucu mahun, huesaque cutran ca ti lan dungu. Ngünenietule tüfachi mapu, com huechutripayai tañi feipicünuel (Dan. 2:44; Apoc. 21:3, 4). Huelu petu ñi puunon feichi antü, eluñmangei ti Huecüfü ñi ngünenieafiel ti mapu (Juan 12:31; Apoc. 12:9). Apümcangele chi huesaque dungu famülque mu, raquiduamün-ngeafui Huecüfü ñi cüme ngüneniefiel ti mapu. Feimu Jehová apümcanofile rume huesaque dungu famülque mu, raquiduamlayafuiñ taiñ quellunoaeteu. Jehová rüf quelluqueaiñmu llemai. w23.05 pag. 8 parr. 4; pag. 9, 10 parr. 7, 8

¿Chumafuiñ caquelu che ñi cümelcayaeteu ti falin trahun? Hunelu mu, mülei taiñ mangelafiel. Amuldungun mu mangelafiyiñ pu che. Ca huirintucuafuiñ inei taiñ mangelafiel: taiñ pu che, compañ cüdau ca colegio cam caquelu che. Niehuenoliyiñ pichique papel taiñ mangelafiel, huercülelafuiñ quiñe enlace telefono mu, femngechi tañi peafiel. Afmatuafuiñ chi fentren che tañi amual (Ecl. 11:6). Mangelfiliyiñ quiñe che ñi acordayal Jesús tañi lan, fentren dungu ramtuafeiñmu chi, doi mai pu hue amulu. Feimu raquiduamafuiñ chem taiñ ramtuaeteu ca pepicahuafuiñ taiñ huiñoldungual. Deu rupalu ti trahun, ti che doi ramtun nieafui. Petu puunolu ti Trahun Jesús tañi lan ñi acordangeal, feichi antü ca rupachi antü mu, com nehuen mu quelluafiyiñ pu “ayünielu ñi llohual ti rüf dungu”. Femngechi quelluaeyu feitachi falin trahun (Hech. 13:48). w24.01 pag. 11 parr. 13; pag. 12 parr. 15, 16

Biblia mu huirintuculei ñi huiñomongetun pura che. Fei cüme ngüneduamafuiñ caque quiñeque. Raquiduamaiñ chem dungu quimürpuafuiñ ca raquiduamaiñ Jehová ñi ayülen ca ñi nien ta pepiluhun ñi huiñomongeltuafiel pu layelu. Ca ngüneduamaiñ ti doi falin-ngechi huiñomongetun, Jesús ñi huiñomongetun. Loncontucuaiñ fentren pu che peeyu ñi huiñomongetun. Jesús ñi huiñomongetun quelluqueiñmu taiñ doi maneluhual ñi huiñomongetual pu lachi che (1 Cor. 15:3-6, 20-22). Rume mañumniefiyiñ Jehová ñi huiñomongeltuafiel pu layelu. Jehová ayüniei ca niei pepiluhun ñi huiñomongeltuafiel pu la, feimu maneluucüleiñ ñi femtriparpual ñi feipin. Jehová feipieiñmu reque caque quiñeque iñchiñ: “Huitrañpüramafiñ tami piuqueyenqueche lalu”. Amuleai taiñ doi maneluhun ti huiñomongetun mu, femliyiñ doi fülconaiñ Chau Jehová mu taiñ elueteu feitachi cüme maneluhun (Juan 11:23). w23.04 pag. 8 parr. 2; pag. 12 parr. 17; pag. 13 parr. 20

Ñom piuquengechi che rume falintuuquelai ca quimniei chem dungu ñi pepi femnoal. Cafei respetaquefi ca doicülelu troquiquefi caquelu pu che (Filip. 2:3). Gedeón ñom piuquengefui. Cuifi mu pu Israel che ngüneniequefeyu pu Madián che, feimu Jehová feipifi ta Gedeón ñi lifrecünuafiel pu Israel che. Huelu Gedeón ñom piuque mu feipi: “Tañi troquiñche fei tati doi pichingelu Manasés ñi troquiñche mu, ca iñche tati doi falin-ngenolu tañi chau ñi ruca meu” (Juec. 6:15). Gedeón müte falintuuquelafui, feimu raquiduamquefui ñi femnoafiel ti cüdau Jehová ñi feipieteu. Huelu Jehová quellueyu, femngechi montulfi pu Israel che. Pu loncolelu eluucülequei ñi ñom piuquengeal engün (Hech. 20:18, 19). Pu loncolelu mallmauquelaingün doi cümeque cüdau ñi femquen ti trahunche mu. Cafei ñi huelulcahun mu engün, falinolu troquiufemquelaingün. w23.06 pag. 3 parr. 4, 5

Petu faltai doi huaranca tripantu tañi pünoñmangeal tañi lonco ta Satanás (Apoc. 20:7-10). Huelu petu ñi rupanon tüfa, Biblia feipi ca dungu tañi rupayal. Hunelu mu pu troquiñche “¡com cümelcalei, ngelai chem dungu rume!” piaingün (1 Tes. 5:2, 3). Fei tati pu troquiñche lefconturumeafi tati coilaque religion, femngechi conai tati fütra cutrancahun (Apoc. 17:16). Rupale tüfa, Jesús juzgayafi com tati pu che. Tati ufisa reque felelu quiñepülecünuafi, tati capüra reque felelu cañpülecünuafi (Mat. 25:31-33, 46). Huelu Huecüfü mafülcuhucünuulayai. Fei rume illculelu am ngüchaltucuafi pu troquiñche Gog tuulu Magog pingelu ñi caiñetuafiel Jehová ñi pu che (Ezeq. 38:2, 10, 11). Fei com pu dullinque cristiano huenu mu trahuluucületuaingün, trahulutuaingün Jesús ca pu cümeque püllü engün, fei hueichayaingün Armagedón mu, femngechi afai ti fütra cutrancahun (Mat. 24:31; Apoc. 16:14, 16). Femngechi Jesús ngünenietuafi com ti mapu huaranca tripantu mu (Apoc. 20:6). w23.10 pag. 20, 21 parr. 9, 10

Famülque mu, fentrenque testigo cheu tañi mülen catrütungequei tañi amuldungual engün. Fei, ¿chumingün? Respetaquefilu rume pu autoridad, Abdías reque fentecünuquelai tañi serfiafiel Jehová engün (Mat. 22:21). Doi yamquefingün Chau Dios engün pu huentru mu, femngechi pengelquefingün tañi yamniefiel Chau Dios (Hech. 5:29). Fei engün fentecünuquelaingün tañi amuldungual ca trahuluhual, ellcaquechi femquefulu engün rume (Mat. 10:16, 28). Ca raquiduamaniequefi tañi pu peñi ca pu lamngen ñi nieal com tañi duamnieel, femngechi ñi hueniyenieafiel ta Jehová. Peafiyiñ ñi rupan Henri, África mapu mu. Cheu ñi mülen taiñ peñi catrütungequefui ñi amuldunguhuenoal pu testigo. Feichi mu, Henri eluhui ñi yelelafiel tañi pu peñi, pu lamngen fillque lifru ca papel. Fei feipi: ‘Iñche yehuen chengefun. Jehová nehuencünuuquen’ pi taiñ peñi. Eimi ca nehuencünuhuafuimi yamnierpufilmi ta Jehová. w23.06 pag. 15 parr. 9; pag. 16 parr. 11

Chau Jehová ayüniefui ñi apolal ti mapu re nor che culpaquenolu. Huelu Adán ca Eva caiñetufilu ta Chau Dios, ¿catrütungepei mai Chau Dios ñi ayünieel? Femtripalayai Jehová ñi feipicünuel ¿pipelai ta Huecüfü? Fei, ¿chumafui Chau Dios? ¿Langümafui Adán ca Eva, fei ñi deumayal quiñe hue curehuen ñi femürpual tañi ayüqueel mapu mu? Chau Jehová femfule tüfa, Huecüfü feipiafui ñi coilatufengen. ¿Chemu? Génesis 1:28, Chau Jehová feipifi Adán ca Eva ca tañi pu yall ñi apolal ta mapu. Huecüfü ca raquiduamquefui chi Jehová eluafi yall ta Adán ca Eva, huelu feitachi yall culpafengelleai mai. Rumel culpafengeaingün piafui chi (Ecl. 7:20; Rom. 3:23). Rupafule tüfa, Huecüfü dalluntucuafui ta Jehová ñi femtripanon tañi ayünieel. Ti mapu apolngelayafui culpaquenochi che mu piafui ta Huecüfü. w23.11 pag. 6 parr. 15, 16

Biblia mu ca tañi troquiñche mu Jehová eluqueiñmu huercün dungu, doi amulcünulayafiyiñ taiñ huercüqueteu Jehová (Prov. 3:5-7). Feimu llemai, doi amulcünulayafiyiñ tañi feipin Biblia ca feipilayafiyiñ ñi chumal pu peñi ca lamngen tripanole Biblia mu. Huecüfü ngünencaquefi ti pu che “coilaque raquiduam” mu cafei ti “mapu müleyechi dungu mu”, femngechi ñi quiñeucülenoal ta pu che (Col. 2:8). Hunen siglo mu, inangequefui che ñi quimün ca inangequefui pu judio ñi quimeltun cüpanolu Chau Dios ñi Dungu mu. Cafei feipingequefui pu cristiano ñi inayafiel Moisés tañi ley. Com tüfa coilaque raquiduamfel, pu che inaquelu tüfachi raquiduam allcütuquelafuingün ti rüfngechi quimün cüpalu Jehová mu. Fachantü ca femngechi femquei Huecüfü. Television mu, radio ca internet mu feipifeipingequei coilaque raquiduam cüpalu pu politico mu. w23.07 pag. 16 parr. 11, 12

Adán engu Eva ca ti Huecüfü caiñetufilu rume ta Jehová, fei Jehová eluhui ñi huechunentual ñi ayüqueel. Chau Jehová elufilu Adán ca Eva ñi nieal yall, pengeli ñi coilatufengenon. Rumel femtripaquei ñi feipin. Chau Jehová feipile ñi femal quiñe dungu, chem no rume catrütulafeyu. ¿Chem femi? Eli quiñe cüpanche ñi montulafiel pu cümeque che Adán ca Eva tuulu, femngechi amulei ñi femtripamequen ñi ayünieel (Gén. 3:15; 22:18). Feiti cüpanche hulafui tañi mongen com pu che ñi duam mu. Huecüfü turpu raquiduamquelafui tüfa. ¿Chumngelu? Chau Jehová femngechi montulfilu pu che, pengeli tañi fütra piuqueyechen (Mat. 20:28; Juan 3:16). Huecüfü ta piuqueyechequelai, re quisutu duamuuquei müten. Fei, ¿chem dungu rupayai Chau Dios adniefilu ñi montulngeal ta che? Afle huaranca tripantu, ayüfalngeai ti mapu. Üyeu müleaingün re cümeque che culpaquenolu, Adán engu Eva mu tuulu. Fei tañi ayüniefel Chau Jehová ellaca mu. w23.11 pag. 6 parr. 17

Iñchiñ yamquefiyiñ tati mollfüñ ca tati mongen. Ti mollfüñ adentulei ta mongen Jehová taiñ elueteu (Lev. 17:14). Jehová elufilu ti pu che ñi iyafiel ti ilo, feipifi ñi inoafiel tañi mollfüñ (Gén. 9:4). Ca femngechi feipi Moisés tañi ley mu (Lev. 17:10). Ca hunen siglo mu, ti cuerpo gobernante feipifi pu cristiano ñi famentuafiel ti mollfüñ (Hech. 15:28, 29). Iñchiñ inaquefiyiñ tüfachi huercün dungu, femngechi taiñ cüme dullial chem tratamiento taiñ lahuentuhual. Inchiñ ca eluuqueiñ taiñ connoal pod cudumuhun mu. Ti apostol Pablo feipieiñmu: “Com quiñepülecünuafimün tamün cuerpo ñi illutuel”. Feimu nehuencüleaiñ taiñ famentuafiel huesaque raquiduam. Ca adquintuquelaiñ ca femquelaiñ chem huesa dungu no rume, femngechi taiñ connoal pod cudumuhun mu (Col. 3:5; Job 31:1). w23.07 pag. 15 parr. 5, 6

Sansón ayüniefilu am ta Dalila, fei quisu ngüneduamlafui tañi chumaeteu. Dalila fentrenque rupa ramtufi ta Sansón cheu tañi entuel ñi nehuen, fei Sansón feipieyu. Ñi femün ta Sansón rume huesalcahui, nehuen-ngehuelai ca Jehová ayüucülehuelai quisu mu (Juec. 16:16-20). Sansón rupafui rume huesaque dungu tañi maneluhun ta Dalila mu. Pu Filistea che nüfingün ta Sansón ca traumacünufingün. Ca presuntucufingün Gaza huaria mu, quiñe esclavo reque yengei. Feipingei ñi huaichüfafiel ti cura rüngümquetranquelu. Rupachi antü mu, pu Filistea che fiestañmafingün ti coila dios Dagón. Raquiduamingün Dagón ñi quellun mu nüfingün ta Sansón, feimu cüpalingün ta Sansón fiesta mu, fei ayentufingün (Juec. 16:21-25). w23.09 pag. 5, 6 parr. 13, 14

Quiñe compañ cüdau cam colegio mu ramtuafeiñmu chumngelu taiñ inaniefiel ñi feipin Biblia chem ñi cümen ca chem ñi cümenon. Iñchiñ huiñoldunguafuiñ, huelu ca yamnieafiyiñ chem ñi raquiduamquen caquelu che (1 Ped. 3:15). Femngechi ramtungeliyiñ, ¿re ayüpelai ñi notucadungual? pilayaiñ. Doi mai raquiduamaiñ chumngelu taiñ ramtueteu ti che ca chem ñi raquiduamelnieteu. Chem ramtungeliyiñ rume, cüme lloudunguaiñ. Femngechi femliyiñ, cacünutuafui chi ñi raquiduam ti che. Feimu llemai loncontucuaiñ: huesa pieliyiñmu rume ti che, rumel mülei taiñ cüme lloudunguafiel. Raquiduamaiñ quiñe taiñ compañ cüdau mu ramtueliyiñmu chumngelu anta fiestaquelaiñ cumpleaño mu. ¿Chem raquiduamafuiñ petu taiñ huiñoldungunon? Raquiduamaiñ chumngelu taiñ ramtueteu. ¿Raquiduamafui chi taiñ religion eluquelaeiñmu taiñ cüme rupayal? Cam raquiduamafui chi taiñ celebraquenon cumpleaño, cüme yeucülehuelayafuiñ taiñ pu compañ iñchiñ. Feimu, ¿chumafuiñ? Mañumafuiñ taiñ raquiduamanieteu. Ca feipiafuiñ: “Iñche ca ayüquen com taiñ cüme yeucüleal”. Taiñ feipifiel mu feitachi che, cüme duamelafuiñ chi ca cüme nütramcayafuiñ ñi feipin Biblia cumpleaño mu. w23.09 pag. 16, 17 parr. 10, 11

Petu ñi acunon Jehová ñi antü, mülei taiñ amuldungulelafiel itrocom pu che. Rume falin cüdau tüfa. Ti apostol Pedro feipiqueiñmu taiñ ‘raquiduamtucunieafiel Chau Jehová ñi antü’ (2 Ped. 3:11, 12). ¿Chem quelluafeiñmu taiñ femal? Fill antü raquiduamafuiñ cüme mongen taiñ nieal ti hue mapu mu. Peniehuaiñ reque fentren cümeque dungu taiñ femal: iyaiñ cümeque iyael, taiñ piuqueyenieelchi che lalu huiñomongetuai, fei huiño pancocayafiyiñ, cafei pu cuifiqueche quimeltulelafiyiñ chumngechi ñi femtripan Biblia ñi feipin. Loncontucuniefiliyiñ tüfa, llihuatuleaiñ ca maneluucüleaiñ pichiñma mu ñi acual Jehová ñi antü, femngechi chem no rume huelulcalayaiñmu. w23.09 pag. 27 parr. 5, 6

Fantepu meu, fentren hueche allcütuquelafingün tañi pu chau (2 Tim. 3:1, 2). ¿Chumngelu chi cai? Quiñeque chau ngülamtuquefingün tañi pu yall ca püñeñ, huelu inaquelaingün quisu tañi ngülam. Feimu pu hueche pefiel mu ca dungu ñi femquen tañi pu chau, allcütuquelafingün. Caquelu hueche feipiquei: “Müna cuifi tuhun-ngei ñi ngülamtuel tañi pu chau, catrütuqueneu tañi ayüqueel” piqueingün. Eimi hueche, ¿ca femngechi raquiduamqueimi? Cüdaungeafui tami inayal ñi feipin Jehová mülelu ti texto taiñ inaduampeel fachantü. ¿Chem quelluafeimu tami inayal tüfachi huercün dungu? Tami feyentuafiel tami pu chau, inayentufinge ta Jesús (1 Ped. 2:21-24). Jesús turpu culpalai, huelu tañi pu chau culpafengefuingu. Fei engu huelulcauquefui quiñeque mu, ca pepil-lafuingu ta Jesús. Femlu rume, Jesús yamquefeyu engu (Éx. 20:12). w23.10 pag. 7 parr. 4, 5

Ti apostol Pablo feipieyu engün feiti chalintucun ñi feipin ti ley liftuñmangelayafui pu che ñi culpan, feimu mülefui ñi inahuenoafiel engün ti ley. Feimu Pablo quimelelfi doi falinque quimeltun Biblia mu. Feipifi Jesús ñi lan mu “doi cüme maneluhun” nieafuingün, femngechi doi fülconafuingün Jehová mu (Heb. 7:19). Pablo feipifi pu cristiano chumngechi ñi poyequefiel Jehová feichi mu doicülei tañi femquefel cuifi mu pu judio. Chumngechi ñi poyequefiel Jehová pu judio cuifi mu ‘adentulefui tati felelu ñi cüpayal, huelu feichi dungu rüf femtripayai Cristo meu’ (Col. 2:17). ¿Chumngelu am feipi Pablo? Pu judio inaquefuingün ti ley ñi poyeafiel Jehová ca ñi perdonangeal tañi culpan. Huelu hunen siglo mu, Jehová doi cüme adcünui chumngechi tañi poyengeal. Feimu mülei taiñ quimtucual chumi Jehová taiñ perdonañmangeal taiñ culpan, femngechi taiñ cüme poyeafiel. w23.10 pag. 25 parr. 4, 5

Daniel capitulo 11 nütramcai ñi mülen epu lonco ülmen cam gobierno, epuñpüle hueichamequei engu fei ñi ngünenieafiel ti mapu. Trürümfiliyiñ tüfachi dungu ca caquelu dungu feipilu Biblia, quimnieiñ fachantü “ti lonco ülmen norte mapu mu” feita Rusia ca tañi quelluqueteu. Ca “ti lonco ülmen ngünenielu sur mapu mu” feita Estados Unidos ca Reino Unido, tüfa tati doi fütra gobierno. “Ti lonco ülmen norte mapu mu” inantucuniefi Chau Dios ñi pu che mülelu fei mu. Quiñeque testigo hulelcangei ca presuntucungei tañi feyentun mu. Huelu eluulaingün ñi llicalcangeal, doi mai, nehuentui tañi feyentun. ¿Chumngelu? Quimnieingün ñi inantucungeal, chumngechi feipicünungei Daniel ñi lifru mu (Dan. 11:41). Raquiduamtuculiyiñ chumngechi ñi femtripalen tüfachi dungu, quelluqueiñmeu iñchiñ taiñ doi maneluucüleal ca püntütripanoal Chau Jehová mu. w23.08 pag. 11 parr. 15, 16

Jehová trürümeiñmu quisu tañi curalnge mu. Ti nge rume falin-ngei ca tuntucufal-lai. Feimu Jehová feipieiñmu reque: “Eimün rume falimün. Inei rume huesalcaelmu, iñche ta huesalcaeneu”. Chau Jehová piuqueyeiñmeu, feimu duamtuñmaqueiñmu taiñ chum duamcülen ca cuñiutucuqueiñmu. Cutrancaulu iñchiñ, ca cutrancauquei. Feimu feipiafiyiñ: “Cuñiutucuen tami curalnge reque” (Sal. 17:8). Jehová ayüquei tami rüf maneluhual quisu tami piuqueyenieteu. Jehová quimniei huesaque dungu taiñ rupan mu, cüdautuafuiñ taiñ maneluhual fei taiñ piuqueyenieteu. Fei, ¿chem quelluafeiñmu? Ngüneduamaiñ Chau Jehová chumngechi pengelelfi tañi piuqueyefiel ta Jesús, pu dullingelu ca com iñchiñ. w24.01 pag. 27, 28 parr. 6, 7

Esdras ngüneduami Jehová ñi quellufiel tañi pu che cuñihun dungu mu. Feichi 484 tripantu ti lonco ülmen Asuero huercüi ñi langümngeal pu judio mülelu cheu tañi ngünenieel. Feichi mu, Esdras ¿Babilonia mu mülepelafui? (Est. 3:7, 13-15). Esdras ca com pu judio cuñihun mu mülerquei tañi mongen. Fente tañi cutrantupiuquelen, cüpa ihuelaingün, ca ngüman mu llellipufingün ta Chau Jehová tañi quelluaeteu (Est. 4:3). Fei, ¿chem rupai? Pu judio ñi pu caiñe langümngeingün. ¿Müna cüme duampelaingün pu judio ñi montun engün? (Est. 9:1, 2). Tüfachi dungu ñi rupan pepicafi Esdras ñi chem rupayal cüpalechi antü mu, ca quellueyu ñi doi maneluhual Jehová mu ñi incañpeafiel tañi pu che. w23.11 pag. 17 parr. 12, 13

Romanos 3 ca 4 Pablo nütramcai Moisés tañi ley mu (Rom. 3:21, 28). Pablo ñi antü mu, quiñeque judio rume falintuquefuingün Moisés ñi ley, feimu petu mülei ñi inangeal piquefuingün. Feimu Pablo nütramcalelfi engün Abrahán ñi femün mu. Quimeltui ñi nor chengeal quiñe che, duamfal-lai ñi inayafiel Moisés ñi ley, huelu mai tañi feyentual Jehová mu. ¿Chem quimeltuqueiñmu iñchiñ tüfa? Taiñ nor che piaeteu Jehová, mülei taiñ feyentual quisu meu ca Jesús mu. Santiago capitulo 2 nütramcalai ti ley dungu mu Pablo reque, feimu Santiago feipilu “nor che troquingei ta che tañi femün mu”, ¿chem cüpa feipifui tüfa? Tüfa ta com ñi femquen quiñe cristiano tañi mongen mu (Sant. 2:24). Ñi femqueel mu pengeli ñi rüf feyentulen Jehová mu. w23.12 pag. 3 parr. 8; pag. 4, 5 parr. 10, 11

Pu lamngen ayülu ñi fütangeal, cüme dullipe inei tañi fütayeafiel. Ti huentru tami fütayeafiel loncoleai eimi mu (Rom. 7:2; Efes. 5:33). Fei fütayeafilmi quiñe huentru, hune ramtuhuafuimi: “¿Inayentuquepefi mai ta Jesús? ¿Hunelu mu mai quintuquepefi tañi poyeafiel ta Jehová? ¿Cüme femquepei mai tañi mongen mu? ¿Huesa femün mu huelulcahun tati piquepei mai? ¿Yamquefi tati pu domo? ¿Quelluafeneu tañi doi hueniyeafiel ta Jehová? ¿Elupeafeneu mai com tañi duamnieel? ¿Cüme hueningepeafui mai iñche mu?”. Loncontucuaimi, ayünielmi tami peal quiñe cüme füta, eimi ca cüme domongeaimi. Quiñe cüme domo quelluntucuquei tañi füta (Gén. 2:18). Ca ti domo am piuqueyefilu Jehová, feimu quelluquei ñi cüme nütramcayal ta che tañi füta mu (Prov. 31:11, 12; 1 Tim. 3:11). Pepicahuaimi ta fachantü. Doi piuqueyeafimi Jehová, quelluntucuaimi tami ruca mu ca ti trahunche mu. w23.12 pag. 22, 23 parr. 18, 19

Jehová feipicünui taiñ eluaeteu quimün taiñ cüme femal, doi mai taiñ femal falinque dungu taiñ mongen mu. Quisu ca quelluqueiñmu taiñ aguantayal. Jehová chumngechi ñi quellufiel Pablo, ca femngechi eluaiñmu nehuen taiñ chaftuafiel huesaque dungu (Filip. 4:13). Jehová ca pünequefi taiñ pu peñi ca pu lamngen taiñ quelluaeteu. Feichi pun petu ñi lanon ta Jesús, fütra ngillatufi ta Jehová. Feipifi ñi huesa dunguyengenoal tañi lan mu, huelu Jehová huercülelfi quiñe cüme püllü tañi nehuentucuaeteu (Luc. 22:42, 43). Jehová ca femngechi quelluafeiñmu. Taiñ pu peñi ca lamngen mütrümafeiñmu cam pemeafeiñmu chi taiñ ruca mu taiñ nehuentucuaeteu. Com iñchiñ raquiduamafuiñ chumngechi ñi yafültucuafiel taiñ pu peñi ca pu lamngen (Prov. 12:25). w23.05 pag. 10, 11 parr. 9-11

Pu amuhuenolu trahun mu, amulu engün ñi acordayal Jesús tañi lan, ¿raquiduampelafuingün chumngechi tañi llohuaeteu tañi pu peñi, pu lamngen? Feimu ramtucadungulayafiyiñ taiñ yehuelcanoafiel. Chem no rume feipilayafiyiñ tañi huesa duamelnoafiel. Feitachi pu amuhuenolu trahun mu iñchiñ taiñ peñi, lamngen-ngeingün. Ayüucüleiñ taiñ trür poyenieafiel ta Jehová (Sal. 119:176; Hech. 20:35). Quimnieiñ fente ñi falin-ngen acordayal Jesús tañi lan. Feimu Jesús feipieiñmu ñi femal fill tripantu. Amun mu feitachi trahun, rume cümelcaqueiñmu iñchiñ ca caquelu che (Is. 48:17, 18). Quelluqueiñmu taiñ doi piuqueyeafiel ta Jehová ca tañi Fotüm Jesús. Amun mu pengelqueiñ fente ñi mañumniefiel com ñi femün engu iñchiñ mu. Doi quiñeucülequeiñ taiñ pu peñi, pu lamngen iñchiñ. Quelluafiyiñ caquelu che ñi chumal engün, femngechi ñi cümelcayaeteu Jesús tañi lan. Feimu eluucüleaiñ taiñ pepicahual ñi acordayal Jesús tañi lan, fei tati doi falin trahun tripantu meu. w24.01 pag. 13, 14 parr. 18, 19

¿Chumngechi adniequeiñmu Jehová? Biblia mu. Ca pünequefi quiñeque huentru taiñ adnieaeteu, quiñeque tüfa “tati quim manelfal cüdaufe”. Feitachi pu peñi quimeltuqueiñmu taiñ cüme femal (Mat. 24:45). Ca mülei pu loncolelu ca pu huitran-ngepaquechi loncolelu. Feitachi pu peñi yafültucuqueiñmu ca quelluqueiñmu taiñ chaftuafiel chem huesaque dungu rume. Felei llemai, Jehová adnieiñmu feitachi pichilehuechi antü mu, feimu rume mañumniefiyiñ. Jehová quelluqueiñmu taiñ hueniyenierpuafiel ca taiñ amuleal ñi rüpü mu. Quiñeque mu cüdautuafuiñ taiñ inayal ñi feipin pu huentru Jehová tañi elcünuel. Femngechi raquiduam nieliyiñ, doi mülei taiñ maneluhual Jehová mu taiñ adniequeteu. Ca maneluucüleaiñ ñi rumel cüme tripaquen Jehová tañi ngülam. w24.02 pag. 20 parr. 2, 3

Taiñ doi piuqueyeafiel Jehová, mülei taiñ cüme chillcatuafiel Biblia. Petu papeltumequefiliyiñ Biblia, raquiduamaiñ chem quimeltueiñmu Jehová mu. Ramtuhuaiñ: “¿Chumngechi pengeli tüfachi huirintucun ñi piuqueyenieteu Jehová? ¿Chumngechi quelluqueneu doi piuqueyeafiel Jehová?”. ¿Ca chem quelluaiñmu taiñ doi piuqueyeafiel Jehová? Fill antü nülanentulelafiyiñ taiñ piuque llellipun mu (Sal. 25:4, 5). Femngechi Jehová huiñoldungulelaiñmu taiñ llellipun (1 Juan 3:21, 22). Ca mülei taiñ doi piuqueyeafiel taiñ pu peñi ca pu lamngen. Rupalu quiñeque tripantu ñi cristianongerpun Pablo, quimfi ti hueche huentru Timoteo. Timoteo rume piuqueyequefui Jehová ca pu peñi ca pu lamngen. Feimu Pablo feipifi pu Filipos che: “Nielan inei no rume Timoteo reque. Raquiduamcülequei tamün duamnieelchi dungu meu” (Filip. 2:20). Pablo fente falintuquefui Timoteo ñi piuqueyefiel pu peñi ca pu lamngen. Feimu pu trahunche, ¿rume ayüquepelafuingün ñi pemeaeteu Timoteo? (1 Cor. 4:17). w23.07 pag. 9 parr. 7-10

Moisés adniequefui tati pu Israel che, huelu lai petu ñi conpunon engün ti Feipicünuelchi Mapu mu. ¿Quisulehuepeingün mai? Femlai llemai. Tañi femmequen mu engün cümeque dungu, Jehová elcünulaeyu. Jehová feipifi ta Moisés ñi pepicayafiel ta Josué ñi adnieafiel pu Israel che. Fentren tripantu quiñentrür cüdahuingu (Éx. 33:11; Deut. 34:9). Ca mülefui fentrenque quimque huentru adniefilu doi pichique troquiñ Israel che (Deut. 1:15). Feimu feipiafuiñ, lalu rume ta Moisés, Jehová tañi pu che niefuingün tañi adnieteu. Ca femngechi dungu rupai Elías ñi antü mu. Fentren tripantu mu Elías quellufi pu Israel che ñi poyeafiel ta Chau Jehová. Huelu rupachi tripantu mu Jehová huercüeyu ca mapu mu (2 Rey. 2:1; 2 Crón. 21:12). ¿Quisulehuepeingün mai pu Israel che? Femlai llemai. Fentren tripantu mu Elías pepicamequefui ta Eliseo. Jehová amulniei ñi cüdau ca cuidaniefi tañi pu che. w24.02 pag. 5 parr. 12

Pu cristiano Éfeso mu mülelu inafingün Jehová tañi dungu, feita quiñe pelontuhue reque adnieyu engün (Sal. 119:105). Famentufingün com tati coilaque religion ca ti pod cudumuhun, inayenturpufingün ta Jehová ca eluhuingün ñi poyeafiel ca ayühuelafiel (Efes. 5:1). Ca femngechi iñchiñ petu taiñ quimnofiel ti rüf dungu, ca dumiñ mu reque mülequefuiñ. Quiñeque iñchiñ coneltuquefuiñ coilaque religion ñi fiesta mu, ca quiñeque pod mongen yeniequefui. Huelu quimfilu ta Jehová iñchiñ, norcünutuiñ taiñ raquiduam, fei yenietuiñ taiñ mongen chumngechi ñi ayüqueel ta Jehová. Fei tüfa rume cümelcaqueiñmu (Is. 48:17). Mülei taiñ famtripaleal ti dumiñ mu ca rumel miyahual ti pelon mu. w24.03 pag. 21 parr. 6, 7

Raquiduamafuimi chi tami petu pepicaucülenon tami fautizahual. Petu mülefui chi tami cüme elcünutuafiel tami mongen tami ayühuelafiel ta Jehová. Cam doi duamniefuimi chi ta tiempo tami doi maneluhual Chau Jehová mu (Col. 2:6, 7). Quiñeque estudiaquelu Biblia ca quiñeque huechequeche doi alüñmayafui tañi piuqueyerpuafiel ta Jehová, feimu doi duamnieingün tiempo ñi pepicaucüleal. Feimu ngüneduamuhuafuimi tami chumal tami fautizahurpual, huelu trürümuulayaimi caquelu mu (Gál. 6:4, 5). Raquiduamülmi tami petu pepicaucülenon tami fautizahual, amuleaimi tami femürpual. Llellipuafimi Jehová tami quelluaeteu tami cüme elcünutuafiel tami mongen (Filip. 2:13). Rüfcünu llemai, Jehová allcütuaimu ca quelluaimu (1 Juan 5:14). w24.03 pag. 5 parr. 9, 10

Quiñe rupa Sara rume lladcüluucülefui, feipifi ta Abrahán ñi illculen ca culpatufi tañi huesa rupalen. Abrahán quimniefui ñi chumngen ta Sara, tañi yamniequeteu ca tañi quelluqueteu, feimu allcütui tañi domo ca eluhui ñi cüme elafiel chi huesa dungu (Gén. 16:5, 6). ¿Chem quimeltueiñmu tüfa? Tati huentru loncolei tañi familia mu (1 Cor. 11:3). Huelu piuqueyenielu am ñi domo, feimu eluuquei ñi cüme allcütuñmayafiel ñi feipin, doi mai raquiduamle ñi femal quisu mu ca tañi domo meu (1 Cor. 13:4, 5). Ca quiñe rupa acurumei huitran, fei Abrahán ayüfui ñi atendeafiel. Feipifi ta Sara ñi elcünual caquelu cüdau, fei ñi deumayal cofque (Gén. 18:6). Sara feyentufemi. Eimün pu domo, ¿chumngechi inayentuafuimün Sara? Quelluntucuafimün ñi feipin tamün füta, femülmün doi quiñeucüleaimün (1 Ped. 3:5, 6). w23.05 pag. 24, 25 parr. 16, 17

Jehová üitufilu ta Gedeón ñi juezngeal, elfalcünufi ñi teifücayafiel quiñe altar cheu ñi püramyengequefel ta Baal (Juec. 6:25, 26). Cafei Gedeón trahulfilu ñi pu hueichafe ñi hueichayafiel pu Madián che, Jehová epu rupa feipieyu ñi nieal pichin hueichafe (Juec. 7:2-7). Fei Jehová ca feipifi ta Gedeón ñi hueichayafiel pu Madián che rangi pun meu (Juec. 7:9-11). Feimu Gedeón duamniefui ñi nehuen piuquengeal ca ñi feyentual. Pu loncolelu mülei ñi ‘eluucüleal ñi femal tañi feipingeel’. Pu loncolelu mülei ñi inanieafiel chem ñi quimeltun ta Biblia ca ñi feipieteu Jehová ñi troquiñche, femngechi inayentuaeyu caquelu pu che. Huelu quiñeque mu cüdaungeafui pu loncolelu ñi feyentual, ¿chumngelu? Jehová tañi troquiñche hulquei fentren huercün dungu ca quiñeque mu calerumetuquei, feimu pu loncolelu cüdautuafui ñi inayafiel. Cafei Jehová ñi troquiñche huercüle ñi femal quiñe dungu, pu loncolelu ramtuhuafuingün: “¿Rüf cüme tripapeai mai ta tüfa?”. Pu loncolelu ca feipingeafui ñi femal quiñe dungu, huelu femle presuntucungeafui. Feimu cüdautuafuingün tañi feyentual. ¿Chumngechi inayentuafuingün ta Gedeón? Allcütuafimün tamün feipingeel ca inanieafimün. w23.06 pag. 4, 5 parr. 9-11