Junio

Pu cristiano huesa dungu mu rupalu rume engün, eluhuingün tañi cüme femal, feimu Jehová cümelcaeyu. Pu cristiano inacangequeingün, quiñeque mu raquiduamquelafuingün rume tañi inacangeal. Peaiñ ñi rupan Pablo ca Bernabé. Amuldunguyaulu engu Listra mapu mu, pu che ayühunquechi allcütueyu, huelu tañi pu caiñe “ngüchaltucufingün ti pu che ñi caiñetuafiel ta Pablo”, feimu quiñeque tañi amuldungulelfiel curatucaeyu ca lalu troquieyu (Hech. 14:19). Huelu Pablo ca Bernabé fentecünulai tañi amuldungual engu, cañpüle amuingu ñi amuldungual. Fei ¿chum tripai ñi femün engu? “Quimeltufingün fentren che ñi inayafiel ta Jesús” ca yafültucufingu pu peñi ca pu lamngen tañi femün mu ca tañi feipin mu (Hech. 14:21, 22). Inacangefulu rume engu, Pablo ca Bernabé fentecünulaingu tañi amuldungual, femngechi quellufingu fentren pu che. Fentecünunoliyiñ taiñ cüdahuelafiel Jehová, rume cümelcayaiñmu. w23.04 pag. 16, 17 parr. 13, 14

Ti rey David com tañi mongen mu niequefui fentren caiñe, feimu rumel ngillatuquefui Jehová tañi quelluaeteu. David quimniefui Jehová ñi allcütuñmaquefiel tañi llellipun ca tañi lloudunguquefiel. Eimi ca maneluhuafuimi fei mu. Biblia cüme pengeli Jehová eluqueiñmu quimün ca quelluqueiñmu taiñ aguantayal. Jehová ca pünequefi pu peñi ca pu lamngen ca quiñeque testigongenolu taiñ quelluaeteu. Quiñeque mu, Jehová lloudunguquelayaiñmu chumngechi taiñ llellipufiel, huelu quimnieiñ taiñ allcütuqueteu. Eluaiñmu taiñ duamnieel puuchi antü meu, feimu maneluucüleaiñ Jehová müten ca ngillatunieafiyiñ. Quimnieiñ taiñ quelluaeteu famülque mu ca ti hue mapu mu eluaiñmu com taiñ ayüqueel (Sal. 145:16). w23.05 pag. 8 parr. 4; pag. 13 parr. 17, 18

Raquiduamnge fente tami cümelcayaeteu dirpufilmi tami ayünieel. Por ejemplo, ayülmi tami doi cüme papeltual Biblia cam doi cümeal tami ngillatun, raquiduamnge tüfa chumngechi quelluaimu tami doi hueniyeafiel Jehová (Sal. 145:18, 19). Ayülmi tami doi cüme cristianongeal, raquiduamnge ca tami doi cüme yeniehual caquelu cristiano engün (Col. 3:14). ¿Ca chem femafuimi? Ayülmi tami dirpuafiel tami ayünieel, huirintucunge chumngelu tami femal. Fei müchaique inaduamafimi tami huirintucuel, femngechi afeluulayaimi. Cafei trahuluunge pu peñi, pu lamngen engün tami quelluaeteu (Prov. 13:20). Quiñeque antü müte niequelaiñ yafüluhun. ¿Tüfa quimeltupeiñmu mai taiñ elcünual tañi dirpuafiel taiñ ayünieel? Felelai. Cüdaungele rume, huelu ayüucüleaiñ taiñ dirpufiel taiñ ayünieel. w23.05 pag. 27, 28 parr. 5-8

Huesa femliyiñ, rume huesa duamcüleafuiñ, fei culpatuhuafuiñ. Huelu tüfa quelluafeiñmu taiñ entudungual, taiñ norcünutual ti huesa femün ca taiñ femhuenoal ti huesa dungu. Tüfa quelluaiñmu taiñ amuleal ti cuden mu. Huesa femliyiñ, fente raquiduamlayaiñ taiñ huesa femün mu ca rume huesa duamcülelayaiñ. Culpantuculayafiyiñ ta caquelu ca huesa dungu femlan pilayaiñ. Feipiaiñ taiñ culpan ca eluhuaiñ taiñ cüme elcünutuafiel. Huesa duamcüleliyiñ taiñ femün mu, ñom piuque mu llellipuafiyiñ ta Jehová, feipiafiyiñ taiñ culpan ca taiñ perdonayaeteu (Sal. 25:11; 51:3, 4). Huesa duamelfiliyiñ ta quiñe che, perdonaen piafiyiñ. Duamfalngefule, fülconafuiñ tati pu loncolelu taiñ quelluaeteu (Sant. 5:14, 15). Huesa femliyiñ, entuafuiñ falinque dungu taiñ rupan mu taiñ huiño huesa femhuenoal. Maneluhuaiñ Jehová taiñ quelluaeteu ca taiñ cutranpiuqueyeaeteu (Sal. 103:8-13). w23.08 pag. 28, 29 parr. 8, 9

Huechengelu Jehoás, eluhui ñi poyeafiel Jehová tañi quellueteu mu Jehoiadá. Huelu lalu ta Jehoiadá, Jehoás eluhui ñi allcütuafiel pu loncolelu Judá mu, huelu fei engün serfihuelafingün ta Jehová (2 Crón. 24:4, 17, 18). Cutrantupiuquefeteu rume tüfa, Jehová fentecünulai tañi huercülelafiel profeta tañi pu che. Por ejemplo, ti profeta Zacarías. Quisu ca sacerdotengefui, Jehoiadá tañi fotüm fel ca Jehoás tañi primo. Femfulu rume, allcütulafingün. Jehoás langümfalfi cütu ta Zacarías (2 Crón. 22:11; 24:19-22). Jehová feipi ñi illamcangeal tañi pu illamcaeteu (1 Sam. 2:30). Jehoás yamniehuelafi ta Ngünechen, feimu rume huesalcahui. Pu Siria hueichafe pichin-ngefulu rume, hueufingün Jehoás ñi fütra ejercito, fei Jehoás allfülcangefui (2 Crón. 24:24, 25). Jehoás epu tañi cüdaufe langümeyu tañi langümfiel mu ta Zacarías. w23.06 pag. 18 parr. 16, 17

Ti apostol Pablo amuldunguyaufui ti cümeque dungu Éfeso mu (Hech. 19:1, 8-10; 20:20, 21). Pablo müna piuqueyefi tañi pu peñi ca lamngen, feimu ayüfui tañi quelluafiel ñi serfinieafiel ta Jehová engün. Pu Éfeso che fentren coilaque quimeltun niequefuingün ca conquefuingün pod cudumuhun mu. Yehuequelafuingün rume tañi yenien mu femngechi mongen. Tati obra de teatro ca fiesta ñi femqueel tati religion nüucülequefui tati pod cudumuhun mu (Efes. 5:3). Tati pu che “duamcülelai engün chem ñi cümen ca chem ñi cümenon” (Efes. 4:17-19). Quimquenofulu engün am chem tañi cümen ca chem tañi cümenon Jehová tañi adquiñ meu, huesa duamquelafuingün tañi huesa femün meu. Feimu Pablo feipi “dumiñmalei tañi raquiduam engün. Fei lloulayaingün ti mongen Chau Ngünechen ñi feipicünuel”. Huelu quiñeque tati pu Éfeso che tripaingün feichi huesaque dungu mu. w24.03 pag. 20 parr. 2, 4; pag. 21 parr. 5, 6

Ñi juezngeal Israel mu, Gedeón mülefui ñi rume cüdahual. Pu Madián che lefmaulu rangi pun, Gedeón inantucueyu engün Jezreel ñi lür mapu mu ñi puhual Jordán leufü mu (Juec. 7:22). Fei, ¿chumi Gedeón? ¿Fentecünui ñi inantucuniefiel pu Madián che? Femlai. Gedeón ca tañi 300 hueichafe cansalefulu rume engün, rumeingün ti leufü mu ca inantucuniefingün müten pu Madián che, fei dirpufingün ca hueufingün (Juec. 8:4-12). Gedeón maneluhui Jehová tañi elueteu nehuen, ca Jehová femngechi femi (Juec. 6:14, 34). Quiñe rupa Gedeón ca tañi pu hueichafe namuntu inantucufi epu rey Madián mapu mu tuulu, ¿camello mu lefmaupelafuingu tüfachi epu rey? (Juec. 8:12, 21). Huelu Jehová ñi quellun mu pu Israel che dirpufingün tati epu rey ca hueufingün. Fachantü pu loncolelu ca maneluhuafuingün Jehová mu. Jehová “afeluuquelai ca ngañhuadquelai”, feimu quelluaeyu engün ñi nehuencüleal (Is. 40:28, 29). w23.06 pag. 6 parr. 14; pag. 7 parr. 16

Inchiñ nehuencüleafui taiñ piuque, femngechi chaftuafuiñ chem huesaque dungu rume. Feimu maneluhuaiñ Jehová mu. Peafiyiñ ñi femün ti Juez Barac ca chumngechi ñi inafiel tañi huercüeteu ta Jehová. Feichi mu pu Israel che pepicaucülelafuingün tañi hueichayal engün, chem hueichahue rume nielafuingün tañi quehuayal. Femfulu rume, Jehová feipifi ta Barac tañi hueichameafiel pu Canaán che. Tüfa ta Sísara ca tañi ejercito. Quisu engün queta pepicaucülefuingün, niefuingün fentren arma (Juec. 5:8). Barac ca tañi pu hueichafe mülefuingün ti huincul Tabor pingelu, fei ti profetisa Débora feipifi ta Barac ñi nagpayal huincul mu, fei laf mapu mu ñi quehuayafiel ta Sísara ca tañi 900 carro. Feitachi laf mapu mu tati pu nielu carro cüdautulayafuingün tañi huehuafiel pu Israel che. Femfulu rume, Barac inafi tañi huercüeteu ta Jehová. Fei, ¿chem rupai? Petu nagcülelu huincul mu engün, Jehová quiñe fütra mahun cüpali. Fente tañi mahunün, re fotralehuetui. Feimu pu Canaán che ñi carro pepi nengümulafuingün ti fotra mu. Femngechi Jehová quellufi ta Barac ñi huehual (Juec. 4:1-7, 10, 13-16). Famülque mu, iñchiñ ca femngechi maneluhuaiñ Jehová mu ca inayafiyiñ taiñ huercüeteu tañi troquiñche mu, femngechi quelluaiñmu taiñ hueutripayal reque. w23.07 pag. 18, 19 parr. 17, 18

Taiñ afnoachi mongen taiñ nieal, mülei taiñ ñochi duamngeal. Nieliyiñ paciencia, cüme duam mu esperaleaiñ Chau Dios ñi femtripayal ñi feipicünuel chumngechi ñi femquefel cuifiqueche (Heb. 6:11, 12). Biblia feipi taiñ üngümcüleal chumngechi ñi femquen quiñe che cüdauquelu mapu (Sant. 5:7, 8). Ti cüdauquelu mapu nehuentu cüdauquei, sembraquei ca huitrucoquefi, huelu quimlai chumül ñi noyüal ti quetran. Feimu ñochi duam mu üngümcülequei, quimnielu am ñi huefpayal ti quetran. Iñchiñ ca femngechi quimlaiñ ‘chem antü ñi cüpayal taiñ Ñidol’, huelu nehuentu cüdauqueiñ Chau Jehová mu (Mat. 24:42). Quimnieiñ Jehová ñi femtripayal tañi feipicünuel, feimu ñochi duam mu esperaniefiyiñ. Huelu nienoliyiñ paciencia, ¿chem rupayafui? Cansayafuiñ taiñ esperayal ca ñochiquechi famtripayafuiñ Jehová mu. Cafei doyümafuiñ taiñ cüme rupaleal müten. Huelu ñochi duamngeliyiñ, nehuentuleaiñ puule ñi afal ti müleyechi dungu mapu meu, fei montuaiñ (Miq. 7:7). w23.08 pag. 21 parr. 7

Daniel 2:41-43 ñi feipin trürümfiliyiñ Daniel ca Apocalipsis mu, quimürpuaiñ ti namun adentulei Estados Unidos ca Reino Unido quiñeucülelu. Tüfa engu tati doi fütra gobierno mülelu famülque mu. Daniel quimelelfilu ta Nabucodonosor chem pin tañi peuma, feipicünui tüfachi fütra gobierno mu: “Quiñeque dungu mu nieai nehuen ca quiñeque mu nielayai”. ¿Chumngelu feipiafuiñ? Feitachi gobierno pañillhue reque felei, huelu reyülei fotra engu. ¿Chem pi tüfa? Ti pu che fotra mu adentulelu eluquelafi tüfachi gobierno ñi pengelal tañi nehuen-ngen. Ñi feipin Daniel ti adentun, quelluqueiñmu taiñ adümal falinque dungu. Hune, ti fütra gobierno Estados Unidos ca Reino Unido pengeli tañi nehuen-ngen. Por ejemplo, Estados Unidos ca Reino Unido quelluntucui ñi huehual ti Hunen ca tati Epungechi Fütra Hueichan com mapu püle. Huelu tüfachi fütra gobierno nehuen-ngehuelai ca amuleai ñi nehuen-ngehuenon. ¿Chemu? Fente tañi pofolcaumequen quisu tañi pu che. Epu, ngelayai quiñe gobierno Estados Unidos ca Reino Unido reque. Petu ñi ngüneniemequen Estados Unidos ca Reino Unido, Chau Ngünechen apümcayafi com pu gobierno, Chau Dios müten ngünenietuai mapu w23.08 pag. 10, 11 parr. 12, 13

Fentren huesaque dungu ñi rupan David, quiñeque mu cutrantupiuquelefui (Sal. 18:4, 5). Huelu ngüneduamlu Jehová tañi cutranpiuqueyenieteu, nehuencontui. Chumngechi quiñe camañfe yequefi tati pu ufisa cheu ñi mülen “carü cachu” ca “alün co”, ca femngechi Jehová cüme duamelfi ta David. Feimu David yafüluhui, ca ayühun mu amulefui ñi serfiniefiel ta Chau Dios (Sal. 18:28-32; 23:2). Rupan mu huesaque dungu, iñchiñ ca feipiafuiñ: “Chau Jehová taiñ nor piuqueyenieteu mu petu nieiñ mongen” (Lam. 3:22; Col. 1:11). Fütraque caiñe nierquei David, fei fentren rupa epe langümngei. Huelu quimnielu am Jehová tañi piuqueyenieteu, feimu maneluucülefui. Jehová ñi afcadinieteu troquihui, fei ülcantui: “Quisu ta montuleneu com tañi llicalcaqueteu mu” (Sal. 34:4). Quiñeque mu, David llicalefui, huelu nehuencontui Jehová tañi piuqueyenieteu mu. w24.01 pag. 30 parr. 15-17

Inayentuquefilnge Jehoás ñi femürpun huesaque dungu. Deu lalu ti hunen lonco sacerdote Jehoiadá, Jehoás dullifi huesaque hueni ñi nieal (2 Crón. 24:17, 18). Jehoás eluhui ñi allcütuafiel ti pu principe Judá mu mülelu poyequenofilu ta Jehová. Müna huesa, fei engün femquelafui cümeque dungu, fei Jehoás ngelafui ñi allcütuafiel. Huelu Jehoás huesa femi ñi allcütufiel ti huesaque hueni. Tañi primo Zacarías ayüfui ñi norümtuafiel ta Jehoás, huelu Jehoás allcütulai, fei eluhui ñi langümafiel ta Zacarías (2 Crón. 24:20, 21; Mat. 23:35). Müna huesa, hueluduami. Ellaca mu cüme yeniequefui tañi mongen, fei hula caiñetufi ta Chau Ngünechen Jehová mu ca langümchefengerpui. Rume huesalcalerpui tañi mongen, feimu cüpalechi antü mu quisu tañi cüdahuelqueteu langümeyu (2 Crón. 24:22-25). Jehoás püntütripanole Jehová mu, cüme mongen nierpuafui. w23.09 pag. 9 parr. 6

Jesús piuqueyenquechi feipifi ta Pedro: “Llicahuelayaimi”. Pedro turpu ngoimalai Jesús tañi maneluucülen quisu mu. Rupachi antü mu, Pedro ca tañi peñi, Andrés pingelu, elcünuingu ti cüdau tañi niequefel engu, fei coningu Jesús tañi amuldungun mu. Femngechi Jehová rume cümelcaeyu engu (Mar. 1:16-18). Pedro inafilu ta Jesús, pei afmatufalchi dungu Jesús mu. Pefi Jesús chumngechi ñi tremoltufiel pu cutran, ñi huemünentuquefiel huesaque püllü ca ñi huiñomongeltufiel quiñeque che (Mat. 8:14-17; Mar. 5:37, 41, 42). Cafei quiñe vision mu, Pedro pei Jesús ñi lonco ülmencüleal Jehová tañi Gobierno mu. Pedro turpu ngoimanentulai tañi peel (Mar. 9:1-8; 2 Ped. 1:16-18). Pedro inanofule ta Jesús, pelayafui com feitachi afmatufalchi dungu. Feimu Pedro huelulcaufulu rume ca huesaque raquiduam niefulu rume, huelu com cüme chaftufi, feimu llohui com feitachi cümeque dungu. ¿Rume mañumcülepelafui ta Pedro? w23.09 pag. 21 parr. 4, 5

Ti apostol Pedro ca feipi taiñ ‘rume piuqueyehual’. Femngechi femliyiñ, ‘rumel eluucüleaiñ ñi perdonacheal’ (1 Ped. 4:8). Huirintuculu tüfa, Pedro ¿acordapelai ñi feipin ta Jesús? Quiñe rupa Pedro feipi tañi perdonacheal regle rupa, ¿rume cümecünulu troquiupelafui? Huelu ¿chem pieyu Jesús? Feipi ñi perdonacheal “77 rupa”. ¿Chem pi Jesús? Taiñ rumel perdonacheal (Mat. 18:21). ¿Cüdautuqueiñ taiñ perdonacheal? Quiñeque mu com iñchiñ cüdautuqueiñ, huelu fentecünulayaiñ taiñ femal. Eluucüleaiñ taiñ perdonacheal ca cümelcautuaiñ taiñ pu peñi ca pu lamngen iñchiñ. w23.09 pag. 29 parr. 12

Ti fütra challhua ñi pütra meu Jonás repentiutui. Feimu maneluhui Jehová tañi allcütuaeteu ca ñi eluaeteu nehuen. Fei Jehová montuleyu tañi huesa rupan mu, fei hula pepicaucülefui ñi femürpual tañi elfalcünungeel (Jon. 2:10–3:4). Rupan mu quiñe huesa dungu, yafüngehuelayafuiñ. Pepi ngillatulayafuiñ chi ca cüdautuafuiñ chi taiñ papeltuafiel Biblia. Jehová cüme quimniei taiñ rupamequen. Alüñmanole rume taiñ ngillatuqueel, maneluhuafuiñ taiñ allcütuñmayaeteu (Efes. 3:20). Fente taiñ cutrancülen cam hueñancülen, doi cüdaungeafui taiñ papeltual ca estudiayal. Feimu cümeafui taiñ allcütual ti papeltun Biblia grabangelu cam taiñ fillque papel. Ca cümeafui allcütual quiñe ayüfalchi ül ca peal fillque video mülelu jw.org. Ngillatufiliyiñ ta Jehová ca ngüneduamliyiñ chem quellu taiñ elueteu, “füreneen eluen nehuen” feipimequeiñ. w23.10 pag. 13 parr. 6; pag. 14 parr. 9

Caquelu ngillatuhue ruca deumangelu Jerusalén huaria mu ponhui trürcülefui ñi femngen ti ngillatuhue tolto ruca meu. Ponhui mülefui epu pieza. Quiñe, “Yamfal Mülehue” pingefui. Cangelu, “Doi Yamfal Mülehue”. Quiñe cortina püntülefui feichi epu mülehue (Heb. 9:2-5; Éx. 26:31-33). ¿Chem mülefui Yamfal Mülehue mu? Mülefui quiñe candelabro oro deumangelu, quiñe altar cheu lüpümngequen incienso ca tati mesa ti yamfal cofque engu. Pu dullingeelchi sacerdote müten conquefui tüfa mu ñi femal tañi cüdau (Núm. 3:3, 7, 10). ¿Chem mülefui tati Doi Yamfal Mülehue mu? Ti falin caja pengelquelu Chau Dios ñi eldungu re orongelu, fei adentulei ñi mülen Jehová tüfa mu (Éx. 25:21, 22). Ti hunen lonco sacerdote müten conquefui ti Doi Yamfal Mülehue mu quiñe rupa tripantu meu, feichi Antü ñi Liftungeal ti Culpan. Ti sacerdote yeniefui ti mollfüñ culliñ, fei cortina püle rupaquefui. Femngechi liftual quisu ñi culpan ca tati pu che ñi culpan (Lev. 16:2, 17). ¿Chem adentulefui ti mülelu ngillatuhue tolto ruca mu? Rupachi tripantu mu, Chau Jehová cüme quimfalcünui tüfachi dungu (Heb. 9:6, 7). w23.10 pag. 27 parr. 12

Fentren rupa papeltuiñ Biblia mu tüfachi huercün dungu: “Hueluquentu piuqueyehuaimün” (Juan 15:12; Rom. 13:8; 1 Tes. 4:9; 1 Ped. 1:22; 1 Juan 4:11). Huelu ti piuqueyen tremquei piuque mu, inei no rume pequelafi. Fei, ¿chumngechi pengelafuiñ taiñ piuqueyefiel pu peñi ca pu lamngen? Taiñ dungun mu ca taiñ femün mu. Fentren dungu femafuiñ taiñ pengelelafiel pu peñi, pu lamngen taiñ piuqueyefiel. Biblia feipi chem femafuiñ. Feipi: “Caque quiñeque eimün mülei ñi rüf dunguafiel tañi chafche” (Efes. 4:25). “Hueluquentu cüme tuteucülemün” (Mar 9:50). “Huneleaimün tamün huelucontu yamuhual” (Rom. 12:10). “Hueluquentu llouniehuaimün ayühun mu” (Rom. 15:7). “Hueluquentu perdonahuaimün” (Col. 3:13). “Hueluconque quelluniehuaimün cüdaungechi dungu mu” (Gál. 6:2). “Hueluconque yafültucuniehuaimün” (1 Tes. 4:18). “Hueluquentu nehuentucuhuaimün” (1 Tes. 5:11). “Hueluconque […] ngillatuñmahuaimün” (Sant. 5:16). w23.11 pag. 9 parr. 7, 8

Duamnieiñ taiñ nieal cüme maneluhun taiñ cüme dullial taiñ femal. Por ejemplo, inei taiñ hueniyeafiel, chumngechi taiñ cüme rupaleal, chem educacion taiñ nieal, inei engu taiñ niehual, taiñ nieal pichiqueche cam taiñ nienoal ca chem cüdau taiñ nieal. Ramtuhuaiñ: “Tañi femquen, ¿chem pengeli? ¿Pengelquepen mai pichiñma mu ñi afal huesaque dungu ca ñi acual ti hue mapu? Cam pu poyequenofilu Jehová reque, ¿pengelquepen mai turpu ñi acunoal ti hue mapu?” (Mat. 6:19, 20; Luc. 12:16-21). Maneluuliyiñ Chau Dios pichiñma mu ñi cüme elcünutuafiel ti mapu, fei cüme raquiduamaiñ taiñ femal. Ca duamnieiñ taiñ maneluhual rupaliyiñ huesaque dungu mu. Inacangeafuiñ, contuafeiñmu quiñe huesa cutran cam rupayafuiñ caquelu huesaque dungu. Alün tripantu mu rupayafuiñ femngechi dungu mu, feimu duamnieiñ taiñ doi maneluhual Jehová mu. Femliyiñ, nehuencüleaiñ ca ayühunquechi serfinieafuiñ Jehová (1 Ped. 1:6, 7). w23.04 pag. 27 parr. 4, 5

Deu llellipuliyiñ, re anücünuulayaiñ. Raquiduamnge tüfa mu, quiñe peñi cüpa amui fütra trahun cüla antüngequelu, fei llellipufi Jehová, femngechi tañi jefe ñi eluaeteu ta permiso. ¿Chumngechi quelluafeyu Jehová? Quelluafeyu ñi nehuen piuquecünuhual, fei ñi nütramcayafiel tañi jefe. Huelu ti peñi ngelai ñi anücünuhual, mülei ñi nütramcameafiel tañi jefe ca ñi ramtuafiel: “¿Eluafen permiso tañi amual fütra trahun mu?”. Quiñe rupa müten no, doi rupachi mülei ñi nütramcalelafiel, ca feipiafui: “Elueli permiso, cullilayaen rume”. Cam “ca antü cüdahuafun” piafui. Jehová ayüniei taiñ rumel llellipunieafiel. Jesús ñi feipin Lucas 11:9 mu pengeli llellipuliyiñ, pürüm huiñoldungungelayaiñ chi. Feimu fentecünulayaimi, com piuque mu ngillatuniefinge ta Jehová (Luc. 18:1-7). Femliyiñ, pengelaiñ taiñ rüf duamtuniefiel chem taiñ llellipuqueel. Ca pengelqueiñ taiñ maneluuquen fei tañi quellun mu. w23.11 pag. 22 parr. 10, 11

Jehová feipicünufi tañi hueni Abrahán ñi nieal quiñe fotüm. Ca feipi tañi fotüm ñi duam mu, com pu che llohuai cümelcan (Gén. 15:5; 22:18). Abrahán rume maneluuquefui Chau Dios mu, feimu quimniefui ñi femtripayal tañi feipin. Abrahán puhul-lu 100 tripantu, ca tañi domo 90 tripantu, petu nielafui yall (Gén. 21:1-7). Huelu Biblia feipi: “Abrahán maneluhui. Fei feyentui ñi chaungerpual fentren troquiñche meu, chumngechi feipicünungei: ‘Alün-ngeai tami cüpanche’” (Rom. 4:18). Fei femtripai tañi feipicünungeel, chaungerpui tañi fotüm Isaac mu. ¿Chumngelu chi cai fente maneluucülefui ñi feipicünueteu Chau Jehová? Abrahán cüme quimnierquefui ta Jehová, feimu “rume maneluhui Chau Ngünechen ñi femürpual tañi feipicünuel” (Rom. 4:21). Abrahán ayühuelfi ta Jehová tañi feyentulen mu, feimu Jehová nor che troquieyu (Sant. 2:23). w23.12 pag. 8 parr. 1, 2

Manelfal chengelmi, cüme femaimi com tami elfalcünungeel. Raquiduamaimi ñi femün ta Jesús. Jesús femi com tañi feipieteu tañi Chau, cüdaungefulu rume. Quisu rume piuqueyequefui com che, doyelchi mai tañi pu discipulo, feimu eluhui tañi hulal ñi mongen com pu che mu (Juan 13:1). Jesús reque, eluhuaimi tami femal com cüdau tami feipingeel. Quimnolmi chumngechi tami femal, ñom piuque mu feipiafimi quimque peñi tami quelluaeteu. Re tami feipingeel müten femlayaimi (Rom. 12:11). Cüme huechunentuaimi tami cüdau Jehová ngealu reque, pu huentru no (Col. 3:23). Quiñeque mu, huelulcahuaimi. Huelu femülmi, ñom piuque mu feipiaimi tami huelulcahun (Prov. 11:2). w23.12 pag. 26 parr. 8

Quiñe che fautizaulu conelturpuquei Jehová tañi familia mu. Tati hueniyefilu Jehová rume ayühun-ngei. David reque, feipiquefingün ta Jehová: “Ayüucüleaiñ tami cümeque dungu taiñ llouqueel tami ruca meu, eimi tami ngillatuhue ruca” (Sal. 65:4). Jehová dulliquefi inei tañi hueniyeaeteu. Fei fülcontuquefi pu che eluulu tañi hueniyeaeteu (Sant. 4:8). Hul-lu iñchiñ taiñ mongen Jehová mu ca fautizaulu ta iñchiñ, fei Jehová eluaiñmu fentren cümelcan (Jer. 17:8; Mal. 3:10). Fautizahulmi eimi, eluhuaimi tami serfinieafiel ta Jehová, fentecünulayaimi. Mülei tami femürpual tami feipicünufiel ta Jehová ca püntütripalayaimi Jehová mu, dicümtucungelmi rume tami huesa femal cam huesaque dungu rupalmi rume (Ecl. 5:4, 5). Ca inayafimi ta Jesús ca tañi huercün dungu (Mat. 28:19, 20; 1 Ped. 2:21). w24.03 pag. 8 parr. 1-3

Quiñeque curehuen ayüquelai tañi quiñe mu müleal engu. Eimu femngechi rupalmu, ¿chumafuimu? Raquiduamaimu chi cütral mu ñi pichi üicülen. Ñi üicüleal chi cütral, pichique amultuculelngeai mamüll, ca pichi pichi mülei ñi tuculelngeal doi fütraque mamüll. Ñi doi amuleal tamu piuqueyehun, pichi pichi quiñehun müleaimu. Quintumu chem tamu quiñehun ayüqueel (Sant. 3:18). Amulele pichiquen dungu mu, tremcüleafui tamu piuqueyehun. Tati cürüf pimuniefile chi cütral, amuleai ñi üicülen. Ngenole cürüf, chongnagafui chi cütral. Ca femngechi ti curehuen yamuunole engu, chongnagafui reque tañi piuqueyehun. Huelu yamnieule engu, doi tremai tañi piuqueyehun. Huelu eimi feipiafuimi tami yamniefiel tami afcadi, huelu ¿chem pilei quisu? ¿Yamniengelu troquiucülei? w23.05 pag. 22 parr. 9; pag. 24 parr. 14, 15

Biblia mu quiñeque poyequefilu Jehová cuifi müllmüllcülefuingün, ca llicalequefuingün caiñetungen mu cam rupamequen mu huesaque dungu (Sal. 18:4; 55:1, 5). Iñchiñ ca femngechi rupayafuiñ. Caiñetuafeiñmu taiñ pu che, taiñ pu compañ cüdau, colegio mu cam ti gobierno. Contuafeiñmu quiñe huesa cutran, fei llicayafuiñ taiñ layal. Femngechi rupaliyiñ, quiñe pichiche reque ngenolu quellu troquihuafuiñ. ¿Chumai Jehová taiñ quelluaeteu? Yafülduamelaiñmu ca tüngduamelaiñmu. Feimu rumel müleaiñ Jehová mu, llellipunieafiyiñ ca papeltuaiñ tañi Dungu (Sal. 77:1, 12-14). Fei rupaliyiñ huesaque dungu mu, quelluen feipifemafiyiñ taiñ Huenu Chau Jehová. Feipiafiyiñ ta Jehová chem taiñ huesa duamelnieteu ca taiñ llicalcanieteu. Ca allcütuafiyiñ papeltufiel mu tañi Dungu, femngechi yafülduamelaiñmu (Sal. 119:28). w24.01 pag. 24, 25 parr. 14-16

Ayüliyiñ taiñ dirpuafiel cümeque dungu taiñ doi cüme serfiafiel Jehová, mülei taiñ eluucüleal taiñ cüdahual. Iñchiñ doi eluucüleliyiñ taiñ cüdahual, fei dirpuafuiñ taiñ ayünieel. ¿Chem quelluaimu tami doi eluucüleal tami femal? Ngillatufinge Jehová tami eluaeteu nehuen. Jehová tañi nehuen mu nehuentucuafeimu tami dirpuafiel tami ayünieel. Quiñeque mu raquiduamiyiñ taiñ femal quiñe dungu huelu taiñ müte ayünofiel mu rume, piuque mu tripalai taiñ femün. Raquiduamnge com tañi femquen ta Jehová eimi mu (Sal. 143:5). Apostol Pablo raquiduamquefui chumngechi ñi cutranpiuqueyequeteu Jehová. Femngechi ñi raquiduamün mu, fei nehuentu cüdahuelquefi ta Jehová (1 Cor. 15:9, 10; 1 Tim. 1:12-14). Ca femngechi doi raquiduamülmi chumngechi tami quelluqueteu Jehová, doi yafüluucüleaimi tami dirpuafiel tami ayünieel (Sal. 116:12). w23.05 pag. 27 parr. 3-5

Taiñ Huenu Chau Jehová ayüquei ñi püramyengeal tañi üi (Sal. 119:108). Tati pu che ayüquei ñi saquingeal tañi cüme duamcüleal. ¿Ca femngechi femquepei mai ta Chau Dios? Femlai. Huecüfü ca coila dalluntucueiñmu iñchiñ. Feipiquei chem che rume rupale huesaque dungu, püntütripayai Chau Jehová mu. Huecüfü ca feipiquei pu che elcünuafi ñi serfiafiel ta Dios ñi quisutu cümelcahual müten (Job 1:9-11; 2:4). Huelu ti huentru Job püntütripalai Jehová mu, fei pengeli ñi coilatufengen tati Huecüfü. Püramyefiliyiñ ta Jehová, pengelaiñ Huecüfü ñi coilatufengen. ¿Chumaiñ cai iñchiñ? Amulele taiñ serfiniefiel Jehová, incayafiyiñ taiñ Chau ñi üi, fei ayühuelafiyiñ (Prov. 27:11). w24.02 pag. 8, 9 parr. 3-5

Fei hula Moisés ca Josué ñi antü mu, Jehová elcünui quiñeque jueces ñi adnieafiel tañi troquiñche. Ca quiñeque tripantu rupalu, mülerpui lonco ülmen Israel mu. Fei Jehová elcünui profeta ñi adnieafiel tañi pu che. Tati pu lonco ülmen nor piuquengelu allcütufingün pu profeta. Quiñe tüfa ta David. Ñom piuque mu eluhui ñi norümtuaeteu ti profeta Natán (2 Sam. 12:7, 13; 1 Crón. 17:3, 4). Cangelu ejemplo fei tati lonco ülmen Jehosafat. Quisu inafi ñi feipieteu ti profeta Jahaziel ca yafültucufi pu Judá che ñi maneluhual pu profeta mu (2 Crón. 20:14, 15). Ca rupalu engün cüdaungechi dungu mu, ti lonco ülmen Ezequías feipifi ta Isaías ñi quelluaeteu (Is. 37:1-6). Jehová cümelcaquefi ca cuñiutucuquefi pu lonco ülmen inafiel mu ñi feipin (2 Crón. 20:29, 30; 32:22). Cüme quimfalcünungei Jehová ñi elcünufiel ti pu profeta ñi adnieafiel tañi pu che. w24.02 pag. 21 parr. 8

Huecüfü ayüquei taiñ nieal huesaque compañ, femngechi taiñ doi cüdautual taiñ poyeafiel ta Jehová. Iñchiñ doi mülefui taiñ cuñiutucuhual pu Éfeso che mu. ¿Chumngelu? Fachantü ca conafuiñ redes sociales mu taiñ cüme rupayal caquelu che iñchiñ. Tati pu che feipifule rume “tati pod cudumuhun huesa dungu no tati”, iñchiñ quimnieiñ tañi huesa dungungen. Eluulayaiñ taiñ ngünencangeal (Efes. 4:19, 20). Ramtuhuaiñ: “¿Cuñiutucuuquen tañi huenicantunoafiel tañi pu compañ cüdau mu, colegio mu cam caquelu che respetaquenofilu Jehová tañi ngülam? ¿Nehuencünuuquen ñi incayafiel Jehová tañi huercün dungu feipingeli rume ñi yamchequenon?”. Ca cuñiutucuhuaiñ inei taiñ hueniyeafiel ti trahunche mu (2 Tim. 2:20-22). Acordayaiñ, quiñeque che mülelu ti trahunche mu quellulayafeiñmu taiñ püntütripanoal Jehová mu. w24.03 pag. 22, 23 parr. 11, 12

¿Raquiduamqueimi mai chem ad niei ta Chau Jehová? Chau Jehová pengequelai, huelu Biblia trürümquefi fillque dungu mu. Biblia feipi “pelontuqueiñmu ti Antü reque, ca incañpequeiñmu quiñe escudo reque”. Ca feipi “Chau Ngünechen trürümfali quiñe cütral apümcaquelu” (Sal. 84:11; Heb. 12:29). Ca trürümfi quiñe falichi cura reque, zafiro pingelu. Ca quiñe huilüf pañillhue reque. Ca trürümngei quiñe relmu reque (Ezeq. 1:26-28). Pequenofilu am iñchiñ ta Chau Dios, ¿piuqueyepeneu mai? piafuiñ. Taiñ rume huesa rupan ta mongen mu, ¿chem piuqueyeafeneu ta Chau Dios? piafuiñ. Jehová cüme quimniei taiñ chum duamcülen, cafei quimi chumngelu cüdaungei taiñ fülconal quisu meu. Feimu Biblia mu feipicünui tañi chumngechi chengen, femngechi taiñ quelluaeteu taiñ fülmayafiel. Biblia feipi “Chau Ngünechen fei ta piuqueyen” (1 Juan 4:8). Com tañi femün ta Chau Dios pengelquei tañi piuqueyechen. Fente alün-ngen tañi piuqueyechen, feichi pu che ñi piuqueyenoeteu rume, piuqueyequefi (Mat. 5:44, 45). w24.01 pag. 26 parr. 1-3

Jehová üitufi ta Moisés ñi lifrenentuafiel pu Israel che Egipto mapu mu. Ca cüme pengeli tüfa. ¿Chumngechi femi? “Antü mu adniefi engün quiñe tromü mu ca pun meu adniefi engün cütral mu” (Éx. 13:21). Moisés inafi feichi cütral ca ti tromü, femngechi puhuingün ti Quelü lafquen mu. Pu Israel che pefilu ñi hualloñmanieteu pu Egipto che, rume llicaingün. Huelu Moisés huelulcaulai, Jehová mai adnieyu cheu püle tañi amual (Éx. 14:2). Fei Jehová femi quiñe afmatun dungu ñi montulafiel pu Israel che (Éx. 14:26-28). Pu Israel che rupaingün 40 tripantu ti huellin mapu mu, feimu Moisés inaniefi ti tromü tañi adnieaeteu (Éx. 33:7, 9, 10). Femngechi Jehová dunguquefi ta Moisés, fei Moisés ngülamtuquefi pu Israel che. Feimu pu Israel che cüme pefingün chumngechi Jehová adniefi ta Moisés. w24.02 pag. 21 parr. 4, 5