Mayo

Hunen siglo mu fentren che rupaingün filla dungu mu, pu cristiano ca femngechi dungu mu rupaingün. Pu chau ramtuuquefuingün chumngechi ñi eluafiel tañi familia tañi duamnieel engün. Pu hueche ayüafuingün chi tañi amuldungual engün, huelu rupale hula ti filla fei hula amuldunguan piafuingün chi. Femngechi dungu mu rume rupalu engün, eluucülefuingün müten tañi amuldungucheal ca com tañi nieel engün quellufingün pu cristiano mülelu Judea mapu mu (Hech. 11:29, 30). Pu cristiano rupalu filla mu engün, Jehová quellueyu ca elueyu com tañi duamnieel (Mat. 6:31-33). Cafei com pu peñi ca pu lamngen ñi quellueteu engün, doi fülcontufingün ca com tati quelluntuculu rume ayüucülefuingün (Hech. 20:35). w23.04 pag. 16 parr. 12, 13

Jehová püneafui pu che tañi poyequenoeteu rume, femngechi taiñ quelluaeteu. Peafiyiñ ñi rupan ta Nehemías. Quiñe rupa Jehová nengümüñmafi ñi piuque ti rey Artajerjes, femngechi ñi eluafiel ta Nehemías huiñotual ta Jerusalén ca ñi cüme elcünutuafiel ti huaria (Neh. 2:3-6). Llellipufiliyiñ Jehová taiñ quelluaeteu, quiñeque mu Jehová nengümüñmaquefi ñi piuque quiñeque che ñi poyequenoeteu rume, femngechi taiñ quellungeal. Cafei mülei taiñ cüme ngüneduamal chumngechi taiñ quelluaeteu. ¿Chemu? Quiñeque mu, ngüneduamlayafuiñ rume chumngechi taiñ quelluqueteu ta Jehová. Jehová femlayafui chi fütraque dungu taiñ quelluaeteu, huelu eluaiñmu com taiñ duamnieel taiñ fülconcüleal quisu meu. Feimu cümei taiñ raquiduamal chumngechi taiñ huiñoldunguqueteu Jehová (Sal. 66:19, 20). Chumngechi rume lloudungufeliyiñmu Jehová, cüme llohuafiyiñ femngechi pengelaiñ taiñ maneluucülen quisu mu (Heb. 11:6). w23.05 pag. 11 parr. 13; pag. 12, 13 parr. 15, 16

Hulcünulu iñchiñ taiñ mongen Jehová mu, feipicünufiyiñ taiñ rumel püramyeafiel ca taiñ femal quisu ñi ayünieel. Mülei taiñ femal taiñ feipicünufiel. Rume falin dungu tüfa. Com femafuiñ, Jehová am com deumaeteu iñchiñ taiñ femal quisu ñi ayünieel (Apoc. 4:11). Quisu deumaeiñmu taiñ quimafiel, poyeafiel ca taiñ inayentuafiel. Tüfa pengeli iñchiñ fülconafuiñ Chau Jehová mu ca ayühunquechi femafuiñ quisu tañi ayüqueel. Cafei femliyiñ Jehová ñi ayüqueel ca inayentufiliyiñ ta Jesús, rume ayüucüleaiñ (Mat. 11:28-30). Feimu eluucüleaiñ taiñ doi piuqueyeafiel ta Jehová. ¿Chumngechi femafuiñ? Raquiduamaiñ chumngechi taiñ cümelcaqueteu Jehová ca cümeque dungu taiñ eluaeteu cüpalechi antü mu. Doi piuqueyefiliyiñ ta Jehová, doi eluucüleaiñ taiñ feyentuafiel (1 Juan 5:3). Jesús ngillatuquefui Jehová tañi quelluaeteu ca raquiduamtucuquefui chumngechi ñi cümelcangeal, tüfa quellueyu ñi femal Jehová ñi ayüqueel (Heb. 5:7; 12:2). Jesús reque, feipiafiyiñ Jehová taiñ eluaeteu ta nehuen ca acordanieaiñ Jehová taiñ eluaeteu afnoachi mongen. w23.08 pag. 27, 28 parr. 4, 5

Com iñchiñ ayüqueiñ taiñ trür müleal ñochi duamngechi che iñchiñ. Feitachi che illcufemquelaingün feimu respetafali. Ca falintufiyiñ taiñ nieleteu mu paciencia huelulcahun mu iñchiñ. Ca mañumtuquefiyiñ ti che taiñ enseñaeteu mu Biblia. Quiñeque mu cüdautuiñ chi taiñ inayal Biblia ñi feipin, huelu nieleiñmu ta paciencia taiñ enseñayaeteu. Doi mai mañumtuquefiyiñ ta Jehová taiñ nieleteu mu paciencia. Iñchiñ falintuquefiyiñ ñochi duamngechi che, huelu cüdautuafuiñ taiñ femngechi chengeal. Por ejemplo, alüñma esperaliyiñ ti micro fei aporiaucüleliyiñ, cüdautuafuiñ taiñ nieal ta paciencia. Cafei quiñe che huesa pieliyiñmu, cüdautuafuiñ taiñ illcufemnoal. Ca femngechi cüdautuafuiñ taiñ ñochi duam mu esperayal ñi acual ti hue mapu. Fei llemai, com iñchiñ duamnieiñ taiñ ñochi duamngeal. w23.08 pag. 20 parr. 1, 2

Jehová feipifi ta Gedeón ñi huercüafiel tañi ruca mu epe com tañi pu hueichafe. Huelu Gedeón ramtuupelai: “¿Felepei mai tüfa ñi femal? ¿Cüme tripapeai mai?”. Ñi femün mu rume, feyentui. Pu loncolelu, ¿chumngechi inayentuafingün ta Gedeón? Mülei ñi inanieafiel engün com dungu rume, calerumetule Jehová ñi troquiñche mu (Heb. 13:17). Cuñihun-ngefui rume ca llican-ngefui rume, huelu Gedeón femi Jehová tañi elfalcünueteu (Juec. 9:17). Jehová pengelelfi ta Gedeón ñi quelluafiel, feimu maneluuquefui Jehová ñi quellun mu ñi cuidayafiel tañi pu che. Quiñeque loncolelu müleingün cheu ñi catrütungequen taiñ cüdau, huelu Gedeón reque nehuen piuquengeingün. Adcünuquefingün ti trahun ca amuldungun ñi quimnien mu rume tañi presungeal, ñi quechanentungeal ñi cüdau mu ca ñi huimacangeal. Acule ti fütra cutrancahun, pu loncolelu mülei ñi nehuen piuquengeal ñi inayal ñi feipieteu Jehová tañi troquiñche cuñihun-ngele rume. w23.06 pag. 5, 6 parr. 12, 13

Jehová adcünufi ñi huirintucungeal com ñi femün Jehoiadá Biblia mu, femngechi taiñ inayentuafiel (Rom. 15:4). Ca lalu Jehoiadá, rüngaltucungei cheu ñi rüngalngen pu rey (2 Crón. 24:15, 16). Ñi rupan ta Jehoiadá quelluqueiñmu taiñ yamnieafiel ta Jehová. Pu loncolelu Jehoiadá reque, cüme inaduamnieafui pu trahunche, femngechi tañi quelluafiel (Hech. 20:28). ¿Pu füchalu cai? ¿Chem quimürpuafingün Jehoiadá mu? Yamniefile engün Jehová, Jehová quelluaeyu ñi femal cümeque dungu. Pu huechequeche quimürpuafingun Jehová ñi cüme troquifiel ta Jehoiadá. Femngechi ca femafui pu huechequeche, yamnieafui pu füchalelu, doi mai fentren tripantu yenielu ñi serfiquefiel Jehová (Prov. 16:31). Feimu cüme inayafiyiñ taiñ pu adnieteu (Heb. 13:17). w23.06 pag. 17 parr. 14, 15

Trahun mu, müchaique huitrañpüramfiliyiñ taiñ cuhu, fei ti peñi plataforma mu doi comentario eluafeiñmu taiñ huesa duamelnoaeteu. Caquelu peñi ca lamngen huesa duamafuingün tañi elungenon ta comentario, fei huitrañpüramhuelayafui ñi cuhu (Ecl. 3:7). Feimu cüme raquiduamaiñ tunten rupa taiñ huitrapüramal taiñ cuhu. Trahun mu fentren peñi ca lamngen huitrañpüramle tañi cuhu engün, fei iñchiñ huiñoldungulayafuiñ tunte taiñ ayüfel. Quiñeque mu quiñe rupa no rume huiñoldungulayafuiñ, fei huesa duamafuiñ. Huelu illculayaiñ elungenoliyiñ ta comentario (Ecl. 7:9). Elungenoliyiñ ta comentario fente taiñ ayüniefel, cüme allcütuafiyiñ tati huiñoldunguquelu ca feipiafiyiñ tañi cüme tripan tañi huiñoldungun. Femngechi ca yafültucuafiyiñ huiñoldungunofuliyiñ rume. w23.04 pag. 23, 24 parr. 14-16

Papeltuafiyiñ Jehová tañi Dungu ca raquiduamaiñ taiñ papeltuel mu. Quiñe anümca mülei ñi alüconal tañi folil tañi nehuencüleal. Ca femngechi iñchiñ cüme feyentuleliyiñ Jehová mu, nehuencüleaiñ. Tremün mu quiñe anümca, doi foliluucülequei. Papeltuliyiñ Biblia ca raquiduamliyiñ taiñ papeltuel mu, doi maneluhuaiñ Jehová mu ca tañi huercün dungu mu (Col. 2:6, 7). Raquiduamaiñ cuifique che poyequefilu Jehová ca inaquefilu tañi huercün dungu. Tañi femün mu engün, rume quellueyu engün. Peafiyiñ ñi femün Ezequiel. Quiñe vision mu, Ezequiel leliniefi quiñe cüme püllü chumngechi ñi medifiel ti templo. Tañi peel ta Ezequiel müna yafültucueyu. ¿Iñchiñ cai? ¿Chumngechi quelluafeiñmu? Estudiafiliyiñ, quimeltuafeiñmu taiñ inayafiel ñi feipin ta Jehová chumngechi tañi poyengeal (Ezeq. 40:1-4; 43:10-12). Iñchiñ inaduamfiliyiñ cüdaungechi dungu tañi feipin Biblia ca raquiduamliyiñ tüfa mu, rume quelluaiñmu. Inchiñ nehuencünuhuafuiñ taiñ piuque taiñ maneluhual Jehová mu (Sal. 112:7). w23.07 pag. 17, 18 parr. 15, 16

Biblia nütramcai quiñeque huentru inayentufalngelu. Fei engün rume piuqueyequefingün ta Jehová, ca femingün fillque dungu ñi cuidayafiel Jehová tañi pu che. Trahunche mu ca tami familia mu ca mülei peñi cüme cristianongelu (Heb. 13:7). Doi mai inayentuafimi ta Jesús (1 Ped. 2:21). Inaduamafimi tañi femquefel engün ca chem dungu doi ayüumaquefimi (Heb. 12:1, 2). Fei raquiduamnge chumngechi inayentuafuimi. Quiñe huentru cüme raquiduamquelu matucauquelai, hune cüme raquiduamquei tañi chumal. Feimu eluunge tami femngechi chengeal. Hune, Biblia mu inaduamaimi chem raquiduamquei Jehová. Fei ramtuunge: “Inafili tüfa, ¿chumngechi quelluafeneu iñche?”. Fei femaimi cümeque dungu tami ayühuelafiel Jehová (Sal. 119:9). Tüfa quelluaimu tami cüme cristianongeal (Prov. 2:11, 12; Heb. 5:14). w23.12 pag. 24, 25 parr. 4, 5

Pu chau mülei ñi quelluafiel tañi pu yall chumngechi ñi incañpeafiel tañi feyentun ñom piuque mu (Sant. 3:13). Pu chau, papeltumequelmün tamün familia eimün, quelluafimün tamün pu yall ñi quimcantual ramtungerumele engün colegio mu. Ca quelluafuimün ñi adümcantual chumngechi tañi huiñoldungual. Ca quelluafimün ñi ñom piuque mu dungual, femngechi doi ayüafuingün ñi quimal tañi pu compañ. Pu familia trür pepicaule, tüfa quelluafui pu hueche hune quisu tañi doi feyentual ca ñi nütramcayafiel caquelu ñi feyentun mu. ¿Chem püneafui pu hueche tañi pepicahual? Jw.org mu huincadungun mu mülei ti troquiñ “Jóvenes” ca ti troquiñ “Ponlo por escrito” pingelu. Feita quelluquefi pu hueche tañi feipial quisu tañi adümuhun mu chem ñi feyentun. Pu familiahuen ca peafuingün ti troquiñ “Pu huechequeche ñi ramtuqueel”, feita quelluaeyu tañi incayafiel tañi feyentun ñom piuque mu, fei pu che eluhuafui ñi allcütual. w23.09 pag. 16 parr. 10; pag. 18 parr. 15, 16

¿Eluuquefuimi tami dirpuafiel cümeque dungu femngechi tami doi serfiafiel ta Jehová, huelu cüdautuimi tami femal? Ca quiñeque peñi ca lamngen cüdautuquei ñi femal femngechi dungu. Raquiduamnge ñi rupan mu ta Philip. Quisu ayüquefui ñi doi llellipuafiel ta Jehová ca ñi doi cüme tripayal tañi llellipun, huelu fei cüdautuquefui tañi femal. Quiñe lamngen Erika pingelu ayüquefui ñi doi temprano puhual ti trahun amuldungun mu. Femfulu rume, huelu tarde puuquefui amuldungun mu. Eimi ayülmi tami dirpuafiel cümeque dungu huelu dirpunofilmi, ngelai tami huesa duamal. Acordanienge pichiquen dungu mu rume mülei taiñ nieal ta paciencia. Eimi fentecünunolmi tami femal cüdaungele rume, pengelaimi tami ayülen tami hueniyenieafiel ta Jehová ca tami rüf ayühuelafiel. Jehová falintuñmaqueimu tami femquen ca turpu feipilayaimu tami femal pepilnoelchi dungu (Sal. 103:14; Miq. 6:8). Feimu eluucülenge tami femal rüf pepilnieelchi dungu, femngechi tami doi serfiafiel ta Jehová. w23.05 pag. 26 parr. 1, 2

Pu che nehuen piuquengelu llicayafuingün. Femlu rume, eluuqueingün ñi femal cümeque dungu. Femngechi femi Daniel, quisu pengeli ñi nehuen piuquengen. Daniel huimtulefui ñi chillcatual chem ñi huirintucuel Chau Dios ñi pu huerquen, quiñe tüfa Jeremías. Femngechi Daniel quimürpui ñi fülcülepan ñi lifrengetual pu judio Babilonia ñi huaria mu (Dan. 9:2). Daniel ngüneduamlu chumngechi ñi huechutripamequen ti profecia, doi maneluhui Jehová mu. Fei quiñe che maneluulu Jehová mu, doi nehuen piuquecünuuquei (ca ngüneduamafuimi Romanos 8:32, 37-39). Cafei Daniel rume llellipuquefi tañi Huenu Chau, tüfa rume quellueyu (Dan. 6:10). Feipiquefi ñi huelulcan ca ñi chum duamcülen ca quelluen piquefi (Dan. 9:4, 5, 19). Com che mülei ñi quimürpual chumngechi nehuen piuquengeal, Daniel ca femi. ¿Chem quellueyu? Ñi chillcatual, llellipual ca maneluhual Jehová mu. w23.08 pag. 2 parr. 4; pag. 4 parr. 7

Inaliyiñ ñi feipin pu autoridad, quisutu cümelcauqueiñ ca quelluquefiyiñ caquelu. ¿Chumngelu feipiqueiñ? Hunelu mu, castigangelayaiñ taiñ inanofiel ti ley (Rom. 13:1, 4). Inaliyiñ ñi feipin pu autoridad quimngeai pu testigo ñi cümeque chengen. Femngechi dungu rupai Nigeria mapu cuifi. Quiñe troquiñ soltau quintuyahulfui pu che culliquenolu impuesto. Fei conpuingün Trahunhue Ruca mu. Huelu ti loncolechi soltau feipieyu engün: “Tripatumün, pu testigo culliquei ti impuesto”. Feimu llemai, inaliyiñ ñi feipin ti autoridad, quelluntucuaiñ ñi cüme dungungeal pu testigo. Femngechi incayafiyiñ taiñ pu peñi ca pu lamngen. w23.10 pag. 9 parr. 13

Quiñeque testigo yeniei fentren tripantu ñi esperaniefiel ti hue mapu. Quiñeque che raquiduamquei deu ñi acuafel ti hue mapu. Jehová quimniei chum duamcülen tañi pu che, feimu feipifi ta Habacuc: “Medin antü mu mupiai iñche tami pengelelmequefiel, pürüm amulei ñi femtripayal ca coilatulayai. Alüñmafule rume, ¡llihuatulenge fei mu! Tüfa rüf femtripayalu am. ¡Alüñmalayai!” (Hab. 2:3). ¿Jehová feipifi Habacuc müten? Iñchiñ ca femngechi feipieiñmu taiñ yafültucuaeteu, ¿chumngechi quimfiyiñ? Jehová ñi duam mu, Pablo feipifi tüfachi dungu com pu cristiano ayülelu ñi cüme elcünungetual ti mapu (Heb. 10:37). Raquiduamliyiñ rume ñi alüñmalen ñi acunon ti hue mapu, huelu Jehová ñi feipicünuel ‘femtripayai, ¡alüñmalayai!’. w23.04 pag. 30 parr. 16

Quimfalcülefui rume Jehová ñi adniefiel ta Moisés, fentren pu Israel che famentufingün (Núm. 14:10, 11). Feimu Jehová elulafi engün ñi conal ti Feipicünuelchi Mapu mu (Núm. 14:30). Huelu quiñeque Israel che inafingün Jehová tañi adnieteu. Quiñe tüfa ta Caleb. Jehová feipi: “Com tañi piuque mu inanieneu” (Núm. 14:24). Feimu Jehová cümelcafi ca elufi ñi dullial cheu ñi mülenagal Canaán mapu mu (Jos. 14:12-14). Pu caquelu Israel che mülelu Caleb ñi antü mu ca eluhuingün ñi adnieaeteu Jehová. Lalu ta Moisés, Jehová loncocünufi ta Josué pu Israel che mu. Fei “tunte puulu ñi mongen Josué, pu Israel che rume yamnieyu” (Jos. 4:14). Feimu Jehová cümelcafi ca elufi ñi conal engün ti Feipicünuelchi Mapu mu (Jos. 21:43, 44). w24.02 pag. 21 parr. 6, 7

Quiñe doctor ngüneduamafui chumngechi trefcüquei quiñe che ñi piuque, femngechi quimai ñi cümelcalen cam ñi cümelcalenon tañi piuque. Ca femngechi ngüneduamliyiñ tunte taiñ piuqueyefiel caquelu che, ca quimaiñ tunte taiñ piuqueyefiel ta Chau Jehová. Ngüneduamliyiñ taiñ nehue piuqueyenofiel pu peñi, pu lamngen, ca nehue piuqueyelayafuiñ chi ta Chau Jehová. Huelu pengelelfiliyiñ pu peñi, pu lamngen tunte taiñ piuqueyefiel, ca pengelaiñ taiñ rume piuqueyefiel ta Chau Jehová. Müte piuqueyenofiliyiñ pu peñi, pu lamngen, ¿chumngelu cuñihun-ngei? Femngechi hueniyehuelayafuiñ ta Chau Jehová. Tüfachi dungu pengeli ñi huirintucuel ti apostol Juan, feipi: “Quiñe che peniefi tañi peñi, huelu piuqueyequelafi. Fei, ¿chumngechi piuqueyeafui ta Chau Dios tañi pequenofiel?” (1 Juan 4:20). ¿Chem quimeleiñmu? Tuteafiyiñ ta Chau Jehová, hueluquentu piuqueyeuliyiñ (1 Juan 4:7-9, 11). w23.11 pag. 8 parr. 3; pag. 9 parr. 5, 6

Huechengelu lonco ülmen Jehoás, femi cümeque dungu. Pichicalu Jehoás, ñi chau lai. Ti hunen lonco sacerdote Jehoiadá tremümeyu ca quimeltueyu Jehová mu. Jehoás allcütufi ti ngülam tañi elueteu ta Jehoiadá, femngechi quimchengerpui. Eluhui ñi serfiafiel ta Jehová ca ñi quelluafiel pu che ca femngechi ñi serfiafiel engün ta Jehová. Jehoás ca cümelcacünutufi Jehová tañi ngillatuhue ruca (2 Crón. 24:1, 2, 4, 13, 14). Quimelngelmi tami piuqueyeafiel ta Jehová ca tañi huercüelchi dungu, elungeimi ta quiñe falin dungu (Prov. 2:1, 10-12). Tami pu chau femafuingün fillque dungu tami quimeltuaeteu. Inaniefilmi ti ngülam tami elueteu tami pu chau, ayühuelafimi engün, doi mai ayühuelafimi ta Jehová ca cüme hueniyerpuafimi (Prov. 22:6; 23:15, 24). Feimu rume cümei tami inayentuafiel ta Jehoás tami huechengen mu. w23.09 pag. 8, 9 parr. 3-5

Jehová feipieiñmu taiñ allcütuñmayaeteu taiñ llellipun. Chau Jehová rume piuqueyeniefi tañi pu serfiqueteu, feimu rulpacünuquelai taiñ llellipuquefiel (Sal. 10:17; 37:28). Tüfa, ¿feipipei mai taiñ eluaeteu itrocom taiñ llellipuquefiel? Femlai. Quiñeque dungu ti hue mapu mu müten llohuafiyiñ. Allcütulu taiñ llellipun, Jehová raquiduamtucuniei quisu tañi ayünieel (Is. 55:8, 9). Jehová ayüniei tati mapu ñi apoleal fentren che quiñehun eluucülelu ñi ngüneaeteu Chau Ngünechen. Huelu ti Huecüfü feipiquei pu che quisu ngüneucülele, doi cümelcaleai (Gén. 3:1-5). Ñi feipin ti Huecüfü re coila tati. Feimu ñi pengelcünual Huecüfü ñi coilatun, Jehová elcünufi pu che ñi quisutu ngüneniehual. Feimu mülei fentren huesaque dungu pu gobierno ñi duam mu (Ecl. 8:9). Iñchiñ quimnieiñ Jehová müñtüñmalayafeiñmu com taiñ huesaque rupan fantepu mu. w23.11 pag. 21 parr. 4, 5

Jehová feipifi ta Abrahán fentren troquiñche cümelcangeai quisu tañi duam meu. Huelu Abrahán 100 tripantu niefui, Sara 90 tripantu niefui, petu nielafuingu familia. Turpu nielayafuingu yall piafui pu che. Cüdaungefui Abrahán mu, huelu maneluhui müten. “Fei feyentui ñi chaungerpual fentren troquiñche meu” (Rom. 4:18, 19). Rupachi antü meu, huechutriparpui ñi üngümnieel, fei nierpui ti fotüm ñi feipicünueteu Chau Ngünechen (Rom. 4:20-22). Abrahán reque, iñchiñ ca nor che troquiaiñmu Jehová ca tañi hueni piaiñmu. Feita quimeltui Pablo. Quisu feipi Abrahán “nor che pingetui”, huelu ‘Abrahán müten feipingelai’, com iñchiñ nor che pingeafuiñ, ¿chumngelu? Pablo feipi: “Com iñchiñ feyentuqueiñ Chau Ngünechen ñi huiñomongeltufiel taiñ Ñidol Jesús rangiñ tati pu la, feimu nor che pingeaiñ” (Rom. 4:23, 24). Abrahán reque, mülei taiñ feyentuleal Jehová mu, taiñ femal cümeque dungu ca taiñ maneluucüleal Jehová ñi huechuenturpual com ñi feipicünuel. w23.12 pag. 7 parr. 16, 17

Rupaliyiñ cuñihun-ngechi dungu mu, fei llicaleliyiñ ¿chumaiñ? Loncontucuaiñ Jehová quimniei chem taiñ rupamequen ca taiñ chum duamcülen. Pu Israel che esclavongefulu Egipto mu, Jehová cüme quimniefui tañi cutrancaumequen engün (Éx. 3:7). Rupaliyiñ huesa dungu mu, inaduamlayafuiñ chumngechi Jehová taiñ quellumequeteu. Fei, ¿chumafuiñ? Pengelelen mai chumngechi tami quellumequeteu piafiyiñ ta Chau Jehová (2 Rey. 6:15-17). Fei ramtuhuaiñ: ¿Nehuentucuqueiñmu quiñeque hueupin, comentario hulngequelu trahun mu? ¿Cam quiñeque publicacion, video, ülcantun yafültucuqueiñmeu? ¿Quiñe peñi tañi feipin mu, quiñe texto mu yafültucuqueiñmu? Quiñeque mu, ngoimayafuiñ chi Jehová taiñ quelluqueteu taiñ pu peñi ca pu lamngen mu, ca chumngechi yafültucuqueiñmu Chau Dios tañi Dungu meu (Is. 65:13; Mar. 10:29, 30). Com taiñ eluqueteu mu Jehová pengelquei taiñ duamtunieteu. Feimu maneluuqueiñ quisu mu (Is. 49:14-16). w24.01 pag. 4, 5 parr. 9, 10

Jesús petu ñi amutunon huenu mu, feipifi tañi pu inanieteu: “Huldunguaimün iñche meu Jerusalén püle, com Judea, Samaria ca huall mapu püle” (Hech. 1:8; Luc. 24:46-48). Rupachi antü mu, pu loncolechi judio presuntucufingün Pedro ca Juan, yengeingu Sanedrín meu. Fentecünuaimu tamu amuldungun pingeingu ca aneltungeingu (Hech. 4:18, 21). Pedro ca Juan feipifingu pu loncolechi religioso: “Chau Dios ñi adquiñ mu, ¿cümepei mai allcütuafiel ta eimün, huelu allcütunoafiel ta Chau Dios? Eimün ta huiñoldungumün. Huelu iñchiñ fentecünulayaiñ taiñ huldungual chem taiñ peel ca chem taiñ allcütuel” (Hech. 4:19, 20). Lifrecünungelu engu, Pedro ca Juan trahuluhuingün caquelu pu discipulo engün. Fei llellipufingün ta Jehová, femngechi tañi femal Jehová tañi ayüqueel. Jehová allcütueyu ñi llellipun engün (Hech. 4:31). w23.05 pag. 5 parr. 11, 12

Jehová ca tañi Fotüm Jesús raquifal-lai tunten tripantu trür ñi mülen engu. Feimu rume piuqueyehuingu ca quiñeucüleingu. Ti texto mu taiñ ngüneduamal fachantü, Jehová cüme quimfalcünui fente ñi piuqueyeniefiel tañi Fotüm. Jehová feipilai müten: ‘Tüfa iñche tañi ayühuelqueteu’. Jehová ayüquefui com iñchiñ taiñ quimal fente ñi piuqueyeniefiel tañi Fotüm, feimu feipi: “Tüfa iñche tañi poyen Fotüm”. Chau Jehová saquiuquefui Jesús mu, quisu am eluulu ñi hulal tañi mongen iñchiñ mu (Efes. 1:7). Jesús maneluuquefui ñi piuqueyenieteu tañi Chau, feimu mufüque rupa feipi ñi piuqueyenieteu (Juan 3:35; 10:17; 17:24). w24.01 pag. 28 parr. 8

Raquiduamnge tüfa: huesa dunguyeimu quiñe che coila dungu mu. Fei caquelu che feyentueyu, doi mai huall püle puhui ti coilatun. ¿Chum duamelafeimu tüfa? Rüfcünu mai hueñancülafeimu. Ca femngechi duamcülefui taiñ Huenu Chau Jehová. Quiñe tañi fotüm huenu mu mülelu, huesa dunguyeyu coilatun mu. Eva feyentui ti coila, feimu taiñ hunenque chau püntütripaingu Chau Jehová mu. Femngechi coni ti culpan, feimu com culpaqueiñ ca laqueiñ (Gén. 3:1-6; Rom. 5:12). Feichi coilatun dungu ñi duam mu huall mapu püle puhui ti huesaque dungu, fei ta lan, hueichan ca cutrancahun. Ñi rume huesa tripan Huecüfü ñi coilatun, rume hueñancüleyu ta Chau Jehová. Femngechi rupalu rume, illcuchefengelai, doi mai Biblia feipi ñi ‘ayühun-ngechi Chau Ngünechen ngen’ (1 Tim. 1:11). w24.02 pag. 8 parr. 1, 2

¿Chumngechi inayentuafuiñ José ñi famentuafiel huesaque raquiduam? Petu taiñ nienon huesaque raquiduam, raquiduamafuiñ taiñ chumafel (Sal. 97:10; 119:165). Pepicahuaiñ taiñ famentufemafiel Jehová ñi üdequeel. Ngüneduamimi chi tami quimfiel ti rüf dungu ca ayünieimi tami serfiafiel ta Jehová, huelu petu pepicaucülenolu troquiuqueimi chi. Fei, ¿chumafuimi? Inayentuafuimi ta David, quisu llellipufi ta Jehová: “Cüme ngüneduamnieen, ahuem Chau Ngünechen, ca quimnieñmaen tañi piuque. Inaduamnieen, ca quimnieñmaen tañi raquiduamelnieteuchi dungu. Peñmaen chem huesa raquiduam rume niefuli tañi piuque mu. Yenieaen afquenochi rüpü mu” (Sal. 139:23, 24). Hulcünulmi tami mongen Jehová mu ca fautizahulmi, pengelaimi tami cüpa serfiniefiel ta Jehová com tami piuque mu, fei cümelcayaimu (Heb. 11:6). w24.03 pag. 6 parr. 13-15

Ti hunen lonco sacerdote dunguñpequefui ti pu che Jehová ñi adquiñ mu. Feichi elcünungelu ti ngillatuhue tolto ruca, dullingei ta Aarón ñi hunen lonco sacerdotengeal, tüfa tati hunelu. Huelu ti apostol Pablo feipi: “Lalu pu sacerdote fentecünui tañi cüdau engün, feimu fentren sacerdote hueluconingün tañi cüdau mu” (Heb. 7:23-26). Pu sacerdote culpan chengefuingün, feimu hune mülefui ñi hulal chalintucun quisu tañi culpan mu. Huelu Jesús doicülei tañi hunen lonco sacerdotengen, ¿chumngelu feipiafuiñ tüfa? Jesús tañi hunen lonco sacerdotengen ‘serfiquei ti rüfngechi tolto ruca Chau Jehová ñi deumael. Che ta deumalafi’ (Heb. 8:1, 2). Pablo feipi: “Jesús afquelai ñi mongen, feimu inei no rume hueluconquelai tañi sacerdotengen mu”. Cafei “lif chengei, püntütripalei pu culpafe che meu”. Ca “duamfal-lai ñi fill antü hulal chalintucun” chumngechi ñi femquefel pu sacerdote cuifi mu. w23.10 pag. 26 parr. 8, 9

“Ti cuifi huenu” adentulei com pu gobierno ñi adnieteu tati Huecüfü ca tati huesaque püllü (Mat. 4:8, 9; 1 Juan 5:19). Ca ti “mapu” adentulei tati pu che, chumngechi feipilei tati Biblia (Gén. 11:1; Sal. 96:1). Feimu “ti cuifi mapu” adentulei tati pu huesaque che. Chau Jehová cüme elcünuafi ti huenu ca ti mapu. Huelu feica müten no, liftuafi ca huecünutuafi. Feimu “ti cuifi huenu” ca “ti cuifi mapu” huelucünungetuai, fei mületuai “hue huenu” ca “hue mapu”. Feimu llemai, ti “hue huenu” feita Chau Dios ñi ngünenietual mapu. Ca ti “hue mapu” feita re nor che ñi mületual mapu meu. Chau Jehová cüme elcünutuai ti mapu ca quelluafi pu che ñi culpafengehuenoal. Chumngechi feipi Isaías, com ti mapu ayüfalngetuai Edén reque. Cafei Chau Jehová huecünutuaiñmeu, fei cutranhuelayaiñ ca cülfüncületuaiñ. Tremotuai pu cüntro, pu trauma ca pu pilu, cafei huiñomongetuaingün pu la (Is. 25:8; 35:1-7). w23.11 pag. 4 parr. 9, 10

Acurumeai ti “fütra cutrancahun” (Mat. 24:21). Fütra cuifi mu Jesús feipi taiñ cüme pepicaucüleal. Feimu acule feichi antü afmatulayaiñ. Cüme pepicaucüleliyiñ, cüdaungelayai taiñ montual ca quelluafuiñ caquelu ñi femal (Luc. 21:36). Mülei taiñ maneluhual Jehová mu taiñ quelluaeteu, feimu duamnieaiñ taiñ nehuencüleal. Fütra cutrancahun mu taiñ pu peñi ca pu lamngen ñamümle engün com tañi nieel, cutranpiuqueyeafiyiñ fei quelluafiyiñ chem ñi faltalen engün (Hab. 3:17, 18). Pu troquiñque gobierno quiñeucülele fei caiñetueliyiñmu, müleaiñ chi taiñ pu peñi ca pu lamngen iñchiñ quiñe pichi rupachi ruca mu. Feimu duamnieaiñ taiñ rume piuqueyeafiel taiñ pu peñi ca pu lamngen (Ezeq. 38:10-12). w23.07 pag. 2 parr. 2, 3

Pu curehuen inaduamafui ñi cümeque femün Áquila engu Priscila (Rom. 16:3, 4). Fei engu quiñehun cüdauquefuingu ca quiñehun amuldunguquefuingu ca quelluquefingu caquelu che (Hech. 18:2, 3, 24-26). Cafei Biblia üitufiyüm Áquila ca Priscila, rumel quiñehun mülequeingu. Pu curehuen, ¿chumngechi inayentuafuingün engu? Raquiduamnge quisuque eimu chem cüdau tamu fementual. Tamu püntülenoal, quiñeque cüdau epuñma femafuimu. Chumngechi ñi femün Áquila ca Priscila, quiñehun amuldunguquefuingu, ¿eimu ca femqueimu? Cafei Áquila engu Priscila quiñehun cüdaucülequefuingu. Eimu ca femngechi cüdau nielafuimu chi, huelu eimu quiñehun femafuimu fillque duam tamu ruca mu (Ecl. 4:9). Quiñehun cüdaucülelmu, doi fülmaucüleaimu ca doi nütramcahuaimu. w23.05 pag. 22, 23 parr. 10-12

Quiñeque mu, com iñchiñ llicaqueiñ. Femngechi rupai ta David. Ti rey Saúl ayüniefui ñi langümafiel, feimu David lefmahui. Pu Filistea che ñi huaria mu puhui, Gad pingefui. Gad huaria ñi lonco ülmen Akís pingefui. Akís feipingei feiti David quiñe fütra hueichafe tati, langümfi fentren Filistea huentru. Fei “David rume llicafi ta Akís” (1 Sam. 21:10-12). Llicalefui ñi chem femaeteu tati lonco ülmen, ¿chem quellueyu ñi nehuen piuquecünuhual? David huirintucui tañi chum duamcülen Salmo 56 mu. Tüfa mu, feipi chumngelu llicalefui ca chumngechi tañi maneluucülen Jehová mu quellueyu (Sal. 56:1-3, 11). Jehová ñi quellun mu, David quimürpui tañi chem chumal: hueluduamcülechi che reque femfaluhui. Feimu ti lonco ülmen cüpa langümlafi, ayüfui tañi amutual müten ta David. Fei David lefmahui (1 Sam. 21:13–22:1). w24.01 pag. 2 parr. 1-3

¿Inei engün am tati feipilelu taiñ texto fachantü? Tüfa engün tati pu dullinque cristiano huenu mu mülelu. Feimu com puule pu dullinque cristiano huenu mu, feipingeai tañi hueichayal engün. Huelu huenu mülepule engün, quiñehuai Jesús ca pu cümeque püllü engün ñi hueichayafiel Chau Dios tañi pu caiñe. Quiñeque tati pu dullinque cristiano petu mülelu mapu mu müna füchafuingün, nehuen-ngehuelafuingün. Huelu amule ta huenu mu engün, lahuelayaingün, rume nehuen-ngetuaingün, feimu hueichayaingün Jesús engün. Deu rupale Armagedón, quelluafingün tati pu che ñi culpan chengehuenoal engün. Felei llemai, tati pu dullinque cristiano mülepule huenu mu engün, doi cüme quelluafingün tañi pu peñi ca pu lamngen mapu mu. w24.02 pag. 6, 7 parr. 15, 16

Quiñeque che pepicaucülefui ñi fautizahual, huelu eluucülelaingün tañi femal. ¿Chemu am? Quiñeque raquiduamafuingün: “Fütra culpali, huemünentungeafun trahunche mu”, feimu llicaqueingün tañi fautizahual. Huelu Biblia feipi Jehová eluaiñmu com taiñ duamnieel taiñ cüme miyahual tañi rüpü mu ca taiñ ayühuelafiel (Col. 1:10). Feimu llicalelayaimi, doi mai maneluucüleaimi tami quelluaeteu Jehová tami cüme femal. Jehová deu quellufi fentrenque che ñi famtripanoal tañi rüpü mu (1 Cor. 10:13). Feimu feipiafuiñ pichiquen che müten huemünentungequei trahunche mu. Jehová quelluquefi llemai tañi pu che. Com iñchiñ am culpafe chengelu, feimu quiñeque mu huesa raquiduamafuiñ (Sant. 1:14). Huelu quisuque iñchiñ dulliafuiñ taiñ inayafiel feichi huesaque raquiduam cam taiñ famentuafiel. Quiñeque che feipiquei pepi ngünengequelai taiñ raquiduam, huelu rüfngelai. Iñchiñ ngüneafuiñ llemai taiñ raquiduam. w24.03 pag. 5 parr. 11, 12