যীচু কোন হয়?

যীচু এজন পৰিচিত ব্যক্তি। কিন্তু বহুতোলোকে কেৱল তেওঁৰ নামহে জানে আৰু তেওঁৰ বিষয়ে বেলেগ বেলেগ মন্তব্য দিয়ে। কিন্তু যীচু প্ৰকৃততে কোন হয়? আহক, বাইবেলৰপৰা চাওঁ।

১. যীচু কোন হয়?

যীচু এজন শক্তিশালী স্বৰ্গদূত আৰু তেওঁ স্বৰ্গত থাকে। সৰ্বপ্ৰথমে যিহোৱাই যীচুক সৃষ্টি কৰিছিল, সেইবাবে বাইবেলত তেওঁক “গোটেই সৃষ্টিৰ প্ৰথমজাত” বুলি কোৱা হয়। (কলচীয়া ১:১৫) যীচুক ঈশ্বৰৰ ‘একমাত্ৰ পুত্ৰ’ বুলিও কোৱা হৈছে, কিয়নো যিহোৱাই তেওঁক নিজে সৃষ্টি কৰিছিল। (যোহন ৩:১৬) বাকী সকলো বস্তু সৃষ্টি কৰিবলৈ যীচুৱে নিজৰ পিতৃ যিহোৱাক সহায় কৰিছিল আৰু আজিও যীচু যিহোৱাৰ লগত কাম কৰি আছে। (হিতোপদেশ ৮:৩০, ৩১ পঢ়ক।) যীচুক “বাক্য” বুলিও কোৱা হৈছে। কিয়নো এজন বিশ্বাসী সেৱক হিচাপে তেওঁ যিহোৱাৰ বাৰ্তা আৰু নিৰ্দেশনা আনক দিয়ে।—যোহন ১:১৪.

২. যীচুৱে পৃথিৱীলৈ কিয় আহিছিল?

আজিৰপৰা প্ৰায় ২,০০০ বছৰ আগতে যীচুৱে স্বৰ্গৰপৰা পৃথিৱীলৈ আহিছিল। কিন্তু কেনেকৈ? যিহোৱাই নিজৰ পবিত্ৰ শক্তিৰ যোগেদি এটা আচৰিত কৰ্ম কৰিলে। তেওঁ যীচুৰ জীৱন মৰিয়ম নামৰ এগৰাকী তিৰোতাৰ গৰ্ভত দিয়াৰ ব্যৱস্থা কৰিলে। এইদৰে যীচুৱে মানুহ হিচাপে এই পৃথিৱীত জন্ম হৈছিল। কিন্তু তেতিয়ালৈকে মৰিয়মৰ বিয়া হোৱা নাছিল। (লূক ১:৩৪, ৩৫ পঢ়ক।) লোকসকলৰ জীৱন ৰক্ষা কৰিবলৈ যীচুৱে মচীহ হিচাপে এই পৃথিৱীলৈ আহিছিল।a বাইবেলত মচীহৰ বিষয়ে বহুতো ভৱিষ্যতবাণী কৰা হৈছে আৰু সেইবোৰ যীচুৰ ওপৰত পূৰ হৈছে। সেইবাবে, লোকসকলে বুজিব পাৰিলে যে যীচুৱেই হৈছে “অভিষিক্ত জনা, জীৱনময় ঈশ্বৰৰ পুত্ৰ।”—মথি ১৬:১৬.

৩. যীচু এতিয়া কʼত আছে?

যীচুৰ মৃত্যুৰ পাছত যিহোৱাই তেওঁক মানুহ হিচাপে নহয়, কিন্তু অদৃশ্য প্ৰাণী হিচাপে জীয়াই তুলিলে আৰু পৃথিৱীত কিছু দিন থকাৰ পাছত তেওঁ স্বৰ্গলৈ উভতি গʼল। স্বৰ্গত ঈশ্বৰে “তেওঁক অতি ওখ পদ দিলে।” (ফিলিপীয়া ২:১০) যিহোৱাৰ পাছত যীচুৱেই হৈছে আন সকলো স্বৰ্গদূততকৈ বেছি শক্তিশালী আৰু অধিকাৰ থকা স্বৰ্গদূত।

৪. যীচু সৰ্ব্বশক্তিমান ঈশ্বৰ নহয়

বাইবেলত লিখা আছে যে যীচু এজন শক্তিশালী স্বৰ্গদূত হয় আৰু তেওঁৰ ওচৰত এক মহান অধিকাৰ আছে। তথাপি তেওঁ নিজৰ পিতৃ যিহোৱা ঈশ্বৰৰ সকলো কথা শুনে। কিয় বাৰু? বাইবেলত উল্লেখ আছে যে যীচু আৰু যিহোৱাৰ মাজত কি পাৰ্থক্য আছে। ভিডিঅʼখন চাওক।

ভিডিঅʼ: যীচু খ্ৰীষ্ট ঈশ্বৰ নে? (৩:২২)

তলত দিয়া পদবোৰ পঢ়িলে আপুনি বুজিব পাৰিব যে যিহোৱা আৰু যীচুৰ মাজত কি সম্বন্ধ আছে। প্ৰত্যেকটো পদ পঢ়ক, তাৰ পাছত নিম্নলিখিত প্ৰশ্নবোৰ আলোচনা কৰক:

লূক ১:৩০-৩২ পঢ়ক।

• যীচু আৰু ‘সৰ্ব্বোপৰি জনা’ যিহোৱাৰ মাজত থকা সম্পৰ্কৰ বিষয়ে স্বৰ্গদূতে কি কৈছিল?

মথি ৩:১৬, ১৭ পঢ়ক।

• যীচুৰ বাপ্তিষ্মাৰ সময়ত স্বৰ্গৰপৰা কি শুনিবলৈ পোৱা গৈছিল?

• আপুনি কি ভাবে, সেই কথাষাৰ কোনে কৈছিল?

যোহন ১৪:২৮ পঢ়ক।

• এটা পৰিয়ালত কোন ডাঙৰ আৰু কাৰ ওচৰত বেছি অধিকাৰ থাকে, পিতৃ নে পুত্ৰৰ ওচৰত?

• যীচুৱে যিহোৱাক পিতৃ বুলি কৈছিল। ইয়াৰপৰা কি বুজিব পাৰি?

যোহন ১২:৪৯ পঢ়ক।

• যীচুৱে ভাবেনে যে পিতৃ আৰু তেওঁৰ মাজত কোনো পাৰ্থক্য নাই? আপুনি কি ভাবে?

৫. যীচুৱেই মচীহ হয়

ভিডিঅʼ: যীচুৰ ওপৰত পূৰ হোৱা ভৱিষ্যতবাণী (৩:০৩)

বাইবেলত দিয়া ভৱিষ্যতবাণীবোৰ পঢ়ক, তাৰ পাছত নিম্নলিখিত প্ৰশ্নবোৰ আলোচনা কৰক:

মচীহ কʼত জন্ম হʼবলগীয়া আছিল, এই বিষয়ে জানিবলৈ মীখা ৫:২ পঢ়ক।b

• যীচুৰ জন্ম কʼত হʼবলগীয়া আছিল আৰু তেওঁৰ জন্ম কʼত হʼল?—মথি ২:১.

মচীহৰ মৃত্যুৰ বিষয়ে আগতীয়াকৈ কি কোৱা হৈছিল, তাৰ বিষয়ে জানিবলৈ গীতমালা ৩৪:২০ আৰু যিচয়া ৫৩:৫ পঢ়ক।

• এই ভৱিষ্যতবাণীবোৰ পূৰ হʼল নে?—যোহন ১৯:৩৩-৩৭.

• আপুনি কি ভাবে, যীচুৱে নিজৰ শত্ৰুসকলক কʼব পাৰিলেহেঁতেন নে যে তেওঁৰ মৃত্যুৰ আগত আৰু পাছত তেওঁৰ লগত কি কি কৰা হʼব?

• ইয়াৰপৰা আপুনি যীচুৰ বিষয়ে কি জানিব পাৰে?

আমি কি শিকিলোঁ

যীচু এজন শক্তিশালী স্বৰ্গদূত। তেওঁ ঈশ্বৰৰ পুত্ৰ আৰু মচীহ হয়।

আপুনি কেনেকৈ উত্তৰ দিব?

• যীচুক “গোটেই সৃষ্টিৰ প্ৰথমজাত” বুলি কিয় কোৱা হৈছে?

• যীচুৱে পৃথিৱীলৈ অহাৰ আগতে কি কৰিছিল?

• যীচুৱেই মচীহ হয় বুলি আমি কিয় কʼব পাৰোঁ?

বেছিকৈ জানক

যীচুৱেই মচীহ হয় বুলি আমি কিয় কʼব পাৰোঁ।

“মচীহৰ বিষয়ে কৰা ভৱিষ্যতবাণীবোৰে প্ৰমাণ কৰেনে যে যীচু মচীহ হয়?” (ৱেবছাইটত দিয়া লেখ)

মানুহে যিদৰে সন্তানক জন্ম দিয়ে, ঠিক সেইদৰে ঈশ্বৰেও নিজৰ পুত্ৰক জন্ম দিয়াৰ ব্যৱস্থা কৰিছিল বুলি বাইবেলে শিকায় নে? আহক চাওঁ।

“যীচুক ঈশ্বৰৰ পুত্ৰ বুলি কিয় কোৱা হয়?” (ৱেবছাইটত দিয়া লেখ)

ত্ৰিয়েকৰ শিক্ষাটো বাইবেলৰপৰা হয়নে? আহক চাওঁ।

“যীচু ঈশ্বৰ নে?” (প্ৰহৰীদুৰ্গ লেখ)

বাইবেলৰপৰা যীচুৰ বিষয়ে জানি এগৰাকী তিৰোতাৰ জীৱন কেনেকৈ পৰিৱৰ্তন হʼল? আহক চাওঁ।

“নিজৰ ধৰ্মৰ বিষয়ে এগৰাকী যিহূদী তিৰোতাই নিজৰ দৃষ্টিভংগী কিয় সলনি কৰিলে?” (সচেতন থাকক! লেখ)