¿Khitinakas Jehová Diosan munañap lurasipki?
1. ¿Khitinakas Jehová Diosan munañap lurasipki sat folletompejj kunaratutsa yatjjataskañäni ukat kunjamsa yanaptʼistani?
1 ¿Khitinakas Jehová Diosan munañap lurasipki? sat folletompiw octubre 28 semanat Taman Bibliat Yatjjatañataki sat tantachäwin yatjjatasiskani. Aka machaq qellqatajj “Chuymas jarkʼaqasipjjañäni” sat pʼeqeñchäwin Kimsa Uru Jachʼa Tantachäwin apsusiwayi, aka qellqatasti, Bibliat yateqerinakar Jehová Diosan markapar uñtʼapjjañapatak wakichtʼatawa. Uka toqet sumpach yatjjatasajj kunja askis Diosan markapankañajj uk wali askit uñjañatakisa ukat jaqenakar aka qellqatamp sumpach yatiyañatakis yanaptʼarakistaniwa (Sal. 48:13).
2. ¿Kunjamsa aka folletompejj taman yatjjatasiskani?
2 Kunjamsa yatjjatasini. Khitinakatï tantachäwin aka qellqatamp sarayapkani, ukanakajj sapa yatichäwinakatakiw tiemp sum jalanoqtʼapjjañapa. Ukat aka folleton sapa 28 yatichäwinakapajj qalltan uñstki, uka jisktʼanak liytʼasaw qalltasiñapa. Ukat liytʼirejj qallta tʼaq liytʼjjani ukhajja, tantachäw sarayir jilataw uka tʼaqatak jisktʼa apsuñapa. Ukjjarusti, sapa tʼaqan chʼiyartʼayat letranakamp qalltaski ukhat yaqha chʼiyartʼayat letranak qalltki ukhakamaw liytʼasiñapa, ukat ukarjam arstʼanipjjañapatakiw tantachasirinakar mayisiñapa. Ukat kunjamsa uka tʼaqajj pʼeqeñchäwi jisktʼarojj qhanañchi sasaw sarayirejj tantachasirinakar jisktʼañapa. Tiempotï utjaskanejja, Bibliat kawkïr apstʼat jiskʼa tʼaqanakajjay wakiskirïchi ukanakas liytʼasirakispawa. Niyakejjay folleton walja uñachtʼäwinakajj utjchejja, ukanakat arstʼasirakispawa. Janïr yaqha yatichäwir paskasajja, sapa janan aynach toqen jisktʼanakajj jikjjataski, ukanak jisktʼasaw sum amtapjjañapatak sarayir jilatajj jisktʼañapa. Ukat “Jukʼamp yatjjatañataki” sat recuadro utjani ukhajja, liytʼiriruw liytʼañapatak mayisiñapa, ukat kunjamsa Bibliat yateqerinakarojj yanaptʼaspa uk qhanañchtʼapjjañapatakiw tantachasirinakar mayisiñapa. Tiempotï utjaskanejja pʼeqeñchäwi jisktʼat wasitamp jisktʼasiñapa. Cheqansa aka ewjjtʼanakajj Taman Bibliat Yatjjatañataki sat tantachäwitak wakichtʼatawa, ukampis Bibliat yateqerinakasampejj janiw ukhampun lurañajj wakiskapunispati.
3. ¿Kunjamatsa aka folletot yatjjatkasajj wali askinak apssna?
3 Aka folletot askinak apsuñatakejj wali sum wakichtʼasiñasawa, ukat arstʼañatakis chʼamachasiñasarakiwa. Ukat yatjjatkasajj kunjamsa aski yatichäwinakapajj yateqerinakasar yanaptʼaspa uk sum amuytʼañasawa. Ukat ukhamarakiw yaqhanakar Diosan munañap lurapjjañapataki yanaptʼistani, ukhamat wiñay jakañ suytʼäwinïpjjañapataki (1 Juan 2:17).