¿Khitinakas Jehová Diosan munañap lurasipki? sat folletompejja, ¿kunjamsa yatichsna?
Bibliat yateqerinakaru Diosan markapar irpaniñatakiw machaq folletojj yanaptʼistani
1. ¿Kuna kimsa amtampisa machaq folletojj wakichasiwayi?
1 ¿Khitinakas Jehová Diosan munañap lurasipki? sat folletompejj ¿yatichañ qalltjjtanti? Uka folletojj aka amtanakamp wakichtʼatawa: 1) yateqerinakajj Jehová Diosan markap uñtʼapjjañapataki, 2) Diosan markapajj kunsa lurasiski uk yateqapjjañapataki ukat 3) Diosan markapajj kunjamsa irnaqaski uk uñachtʼayañataki. Niyakejjay folleton yatichäwinakapajj mä janankakchejja, phesqa, jan ukajj tunka minutonakanwa yateqerimp yateqsna.
2. ¿Aka folletojj kunjam lurtʼatasa?
2 ¿Kunjam lurtʼatasa? Aka folletojja, Jehová Diosan markapajj kunjamasa ukjja, kimsa toqetwa qhanañchi, kunjamtï nayrïr tʼaqan qhanañchasiwayki ukhamarjama. 28 yatichäwinakan pʼeqeñchäwinakapajja, jisktʼanakäpjjewa ukat chʼiyartʼayat jiskʼa pʼeqeñchäwinakapajj uka jisktʼanakaruw qhanañchi. Ukat taqpach folletonjja, 50 jila markanakan fotonakapwa uñstaraki, ukat kuna markäpjjesa uksa qhanañchasirakiwa. Ukhamatwa Diosan markapajj Oraqpachan yatiyaskatap uñachtʼayi. Ukat yaqhep yatichäwinakapanjja, “Jukʼamp yatjjatañamataki” sat recuadrow utjaraki, ukanakasti yateqerin jukʼamp yatjjatañapatakiwa.
3. ¿Kunjamsa machaq folletompejj yatichsna?
3 ¿Kunjamsa folletompejj yatichsna? Pʼeqeñchäwin jisktʼapampiw qalltsna. Ukat tʼaqanakap liytʼkasajja, jiskʼa pʼeqeñchäwinakwa qhanstayañasa. Ukjjarusti, sapa jana tukuyapan amtañatak jisktʼanak utjki ukwa jisktʼañasaraki. Ukat mä yatichäwit yatjjatasajja, qalltat tukuykam liyiñasa, jan ukajj qhanañchañataki jukʼat jukʼat liyiñasa jiwasatäjjaniwa. Ukat Bibliat kawkïr jiskʼa tʼaqanakas liytʼasini uksa amuytʼañasarakiwa. Ukat fotonaka, ukhamarak “Jukʼamp yatjjatañamataki” sat recuadrot yatjjatañsa janiw armasiñasäkiti. Cheqansa, folletojj kunjam waktʼayatasa ukhamarjam yatichañajj wali askiwa, ukampis mä toqet jukʼamp yatjjatañ wakischinejja, yaqha yatichäwitjja yatjjatasirakispawa. Sañäni: mä jachʼa tantachäwitï utjani ukhajja, 11 yatichäwitwa yateqerimp yatjjatsna.
4. Mä machaq yanaptʼaniñajj wali kusiskañawa sasajja, ¿kunatsa sissna?
4 Maynimp Bibliat yatjjatktan ukhajja, alajjpachankir Awkisar uñtʼañapatakiw yanaptʼtanjja. Ukampis Jehová Diosan markapatjja yatichañasarakiwa (Pro. 6:20). Taqe ukanak lurañatakejj mä suma yanaptʼanïñajj ¡wali kusiskañawa!