32 SARNAQÄWI

10 jan waltʼäwinaka

AKA dibujonak uñxatma. Jehová Diosax Egiptxaru jan waltʼäwinak apankän ukanakawa. Nayrïr dibujonxa Aaronaw Nilo sat jawirar thujrupampi ayantaski. Ukat umax wilaruw tuküna, ukat chawllanakax jiwarasinxa wal jawir thujstayäna.

Payïr jan waltäwinxa, Faraonajj kʼayranakaruw ikiñapat apaqaski

Ukatxa, Jehová Diosax kʼayranakwa Nilo sat jawirat mistuyanïna. Tʼantʼa lurañ hornonakapana, llatanakapana, ikiñanakapana, taqi chiqanwa kʼayrax utjäna. Ukat kunapachatï kʼayranakax jiwarxapxäna ukhaxa, wal montontʼapxäna, ukat markax wal thujsäna.

Ukat Aaronax thujrupamp jawqʼatatasaw uraqit laqʼa sartayäna, ukatsti ukax jiskʼa chhichhillankhanakaruw (chhichhirankha) tuküna, ukanakax michʼisirinakänwa. Ukax kimsïr jan waltʼäwinwa.

Kimsïr jan waltʼäwinxa, jiskʼa chhichhillankhanakaw mä warmir michʼintaski

Ukat yaqha jan waltʼäwinakax egipcionakarukiw tʼaqhisiyäna, janiw israelitanakaruxa. Pusïrix akarakïnwa, jachʼa chhichhillankhanakaw egipcionakan utanakapar mantapxäna. Ukat phisqïr jan waltʼäwix uywanakaruw usuntayäna. Egipcionakan walja vacanakapa uwijanakapa cabritonakapaw jiwarapxäna.

Ukatxa Moisesampi Aaronampixa qhill jachʼtasin willtapxäna, ukat ukax jaqinakaru animalanakaruw qarachtatayäna. Akasti suxtïr jan waltʼäwïnwa.

Ukatsti Moisesax alaxpach luqtäna, ukat Jehová Diosaxa qʼixu qʼixumpi chhijchhimpi apayanïna. Wal chhijchhintäna, janipuniw nayrax Egipton ukhamax utjirïkänti.

Pusïr jan waltʼäwinxa, egipcionakax jachʼa chhichhillankhanakat escapañwa yantʼasipki

Phesqëri jan waltʼäwinxa, egipcionakan animalanakapaw jiwarapxi

Kimsaqallq jan waltʼäwinxa, tʼiju tʼijunakampiw phuqantayäna. Janipuniw ukham tʼiju tʼijunakax nayrasa ukat uka qhipatsa utjkänti. Chhijchhit jiltʼkäna ukanak tukuyxäna.

Llätunk jan waltʼäwisti akarakïnwa: walpun chʼamakrantäna. Kimsüruw markpach chʼamakrantäna, israelitanakan utjäwipakiw qhanaskänxa.

Qhip qhiparuxa, ‘uwij qallun jan ukax cabrit qallun wilapampiwa uta punku lawaru jawsupxäta’ sänwa Diosaxa. Ukatsti Diosan angelapaw Egiptnam pasäna, wilampi jawsut uñjäna ukhaxa, janiw khitirus uka utanxa jiwaykänti. Ukampis jan wilampi jawsut utanakanxa, jilïr wawaru jan ukax jilïr animalaruw jiwayäna. Ukaw tunkïr jan waltʼäwïnxa.

Aka jan waltʼäwxarusti, Faraonax israelitanakarux khitxänwa, ukat jupanakax mistuñatak wakichatäxapxarakïnwa, uka arumpachaw Egiptot mistxapxäna.

Éxodo 7-12.

Jukʼamp yatiñatak jisktʼanaka