Suma yatiyäwinak taqinir yatiyapxañäni
1. ¿Kuna suma yatiyäwinaksa yatiytanxa?
1 Akapachanxa jan wali yatiyäwinakakiw utjaski, ukampis jiwasax “Diosan munasiñap” khuyaptʼayasiñap tuqitwa wali suma yatiyäwinak taqinitakix aptanxa (Hech. 20:24). Akanak yatiytanxa, niyaw ‘qhipa urunakax’ tukusxani, ukat Jehová Diosax arskäna uka suma jutïrpacharuw mantxañäni sasa, ukapachawa: ‘Taqi kunanakatï nayrax utjkäna ukanakax tukusxani’ sasax sañäni (2 Tim. 3:1-5; Apo. 21:4). Janiw usuntañas utjxaniti (Isa. 33:24); kawkïr jiwatanakatix Diosan amtatäsipki uka jaqinakax wasitampiw familianakapampi amigonakapampi jikisxapxani (Juan 5:28, 29); ukat aka Uraqpachaw suma paraisor tukuyatäxani sasa (Isa. 65:21-23), ¡ukat walja suma yatiyäwinakampwa yatiytanxa!
2. Jesusan jiwäwipax amtaskani ukapachanakaxa, ¿kunatsa suma yatiyäwinak jukʼampi yatiyir mistsuñatakix wali askïnixa?
2 Marzo, abril ukat mayo uka phaxsinakaxa wali askïniwa suma yatiyäwinak yatiyañatakixa, kunattix walja chiqanakanxa suma tiempowa, janiw jallus purkiti ukat urunakas jaya urunakarakiwa ukatwa jukʼampi horanaka yatiyañatakix wali askïnixa. Ukhamaraki, aka Uraqpachan wali amtat uruxa, mä arunxa, Jesusan jiwäwip amtäwixa, marzo phaxsit 22 urunak saraqat sabadow inti jalantxaru amtasini. Ukhamasti, ukapachanakan jukʼamp irnaqtʼañatakixa jichjatwa wakichtʼasipxañasa.
3. ¿Familpacha jukʼampi irnaqtʼañatakix kunas yanaptʼaspa?
3 Precursor auxiliar. ¿Mä phaxsi jan ukax kimsa phaxsi precursor auxiliarjam irnaqtʼañataki tiemp apstʼasismati? Jutïrin Bibliat familiamamp yatxatapkäta ukhaxa, ¿janit uka tuqit familiamampi parltʼañax askïkaspa? Maynit maynikam yanaptʼasipxasmaxa, maynis jan ukax waljanis familiamatxa precursorjam irnaqtʼaspawa (Pro. 15:22). Ukatakix Jehová Diosaruw yanaptʼap maytʼasiñama, ukhamatwa jupax chʼamachasitamarux bendicini (Pro. 16:3). Inas familiamat jan khitis precursorjam irnaqtʼirjamäkchi, ukampis taqiniwa mä jukʼampi irnaqtʼañatakix chʼamachtʼasiñasa, ukhamat precursorjam irnaqtʼapkani ukanakar yanaptʼañataki.
4. Jurnälpach irnaqkasasa, ¿kunjamsa precursor auxiliarjam irnaqtʼañatakix wakiyassna?
4 Jurnälpach irnaqsta ukhasa, sum waktʼayasisax precursor auxiliarjam irnaqtʼasmawa. Sañäni, manqʼasiñ horasaw jaqinakamp Bibliat parltʼasma. Jan ukaxa, irnaqäwim jakʼan yatiyañatakiwa jan ukax utam jakʼan yatiyañatakiwa territorio mayisisma, ukhamat janïr irnaqkasa jan ukax irnaqäwi tukuyasa Diosat parltʼañamataki. Ukatxa, inas jan wakiskir amtäwinak yaqha phaxsitak jittʼaychisma, jan ukax sabadompi domingompiwa jurnäl jurnäla Diosatak irnaqasma. Yaqhipanakax yatiyir mistsuñatakix vacación apsusipxi ukhamat mayürsa jan ukax payürsa yatiyir mistuñataki.
5. ¿Kunjamsa chuymanskiptata ukhamarak usuntat jilat kullakanakaruxa precursoräpxañapatakix yanaptʼsna?
5 Jumaxa, ¿chuymankipstatäxtati, usutätati jan ukax chʼamach jan utjxi? Sapür mä jukʼa mistsusasa, jumax precursorjam irnaqtʼarakismawa. Jehová Diosat ‘jachʼa chʼamap’ maytʼasïta (2 Cor. 4:7). ¡106 marani mä kullakaw ukham precursorjam irnaqtʼäna! Amuytʼapxañäni, cristianüpki uka familiaranakapan yanaptʼapampixa, utat uta yatiyäna, ukat kuttʼarakïna, ukhamarak Bibliat yatiqirinakarus yaticharakïna ukat yaqha qullan luräwinakampwa phuqarakïna. Tunka jaqinakaruw Bibliat yatichañsa qalltarakïna. Uka kullakax akham siwa: “Precursorjam irnaqtʼawayta uka tuqit amtasta ukhaxa jukʼampi Jehová Diosarusa, Yuqaparusa, markaparusa munasta ukhamaraki wal yuspärta. Taqpach chuymajampipuniw Jehová Diosar yuspärta” sasa.
6. Janïr yatiqañ utar sarañ tukuyapki uka bautisat waynitunaka tawaqitanakaxa, ¿kunjamatsa precursor auxiliarjam irnaqtʼapxaspa?
6 Bautisatäxsta ukat janir yatiqañ utar saran tukuyksta ukhaxa, precursor auxiliarjam irnaqtʼarakismawa. Jurnälpach irnaqapkixa, ukhamarakiw jumax tiemp asptʼasisma, sabadonaka domingonaka, jan ukax yaqhürunakas mä horaksa yatiyir mistsurakismawa. Awisax feriadonakaw utji, ¿janit ukürunak mistsuñax wakiskaspa? Precursor auxiliarjam irnaqtʼañ munsta ukaxa, awkimampi taykamampiwa uka tuqit parltʼañama.
7. Jesusan jiwäwipax amtaskani ukhaxa, ¿taqini yatiyir mistsupxañapatakixa irpir chuymaninakax kamachapxañapasa?
7 Ukham lurapxañapatakix chʼamachtʼañasawa. Ukham lurañataki irpir chuymaninakax chʼamachtʼapxani ukhaxa wali askïniwa, ukhamatwa mayninakax jupanakat yatiqasipxani (1 Ped. 5:2, 3). Khitinakatix wali alwata yatiyir mistupkani, ukhamaraki khitinakatix yatiqañ utat mistusa jan ukax irnaqäwit mistusa yatiyir sarapkani uka jilat kullakanakatak yaqha tantachäwinak waktʼayañaw wakisispa. Khiti yatxattʼat yatiyir jilatanakasa irpsuni ukatakix yatiyañ tuqit irpir chuyman jilatawa (superintendente de servicio) sum waktʼayaskani, ukat kawkjanakans yatiyasiskani, ukhamaraki uka phaxsinakax revistanakasa, yaqha qillqatanakasa jan faltañapatakixa uka jilatawa sum waktʼayaskani.
8. ¿Kunjamsa mä taman lurapxatayna ukax kunsa yatichistu?
8 Mä tamanxa, irpir chuymaninakax janïr Jesusan jiwäwip amtaña phaxsi purinkipanwa jilat kullakanakarux precursor auxiliarjam irnaqtʼapxañapatakix chʼamañchapxatayna, ukat sapa semanawa khitinakas precursorjam irnaqtʼaskani ukxa yatiyapxarakitayna. Ukhamatwa khiti jilat kullakanakatix jukʼampi irnaqtʼañatakix amtasipkäna ukanakax chʼamachtʼasipxatayna, kunattix yanaptʼirinakax waljaw utjäna. Ukatxa irpir chuymaninakax yaqha tantachäwinakwa wali alwa misturinakataki ukhamaraki jaypʼu misturinakatakisa waktʼayapxatayna. Ukat uka tamanxa 53 jilat kullakanakaw precursor auxiliarjam irnaqtʼapxatayna, ¡niya chikatpachaw precursorjamax irnaqtʼapxatayna!
9. Khitinakatix suma yatiyäwinak yatiyir mistuñ munapki uka yatiqirinakatakixa, ¿kunatsa Jesusan jiwäwipat amtañäki uka jakʼa phaxsinakax wali askixa?
9 Yatiyapxañapataki mayninakar yanaptʼapxañäni. Kunapachatï yatiqirinakasa jan ukax jilat kullakanakan wawanakapasa, yatiyir mistuñataki mayitanaka phuqxapxchi ukhaxa, yatxattʼat yatiyirinakampiwa mistsupxañapax wakisispa. Jesusan jiwäwipax amtaskani uka uru jakʼanakanxa waljanixay yatiyir mistupxchinixa, ukhamasti jupanakampiw mistupxaspa. ¿Yatiqirimax sumti yatxataski ukat Jehová Diosan mayitanakaparjamat sarnaqaski? ¿Janïrat wawamax yatiyir mistki ukat sumti sarnaqaski ukat Bibliat sumti yatxataski? Ukat janïr bautisaskasa yatiyir mistsuñ munchi ukat mayitanakar phuqatap amuysta ukhaxa, irpir chuyman jilatanakampiw parlañama. Irpir chuymaninakan pʼiqtʼiripawa pä irpir chuyman jilatarux parltʼani, ukhamat jumampi wawamampi jan ukax yatiqirimampi parltʼapxañapataki.
10. Yatiyir jan mistsupki uka jilat kullakanakar yanaptʼañatakixa, ¿kunsa irpir chuymaninakax kamachapxaspa?
10 Khitinakatix tama taypin jan yatiyir mistxapxi uka jilat kullakanakar yanaptʼañatakix jutïr phaxsinakax wali askirakikïniwa. Uka jilat kullakanakar visittʼañatakisa irpsuñatakisa Librot Yatiqañataki Taman Tantachäwip irpir chuyman jilatanakampi ukat mayni irpir chuymaninakampiwa chʼamachtʼasipxani. Walja tiempo jan yatiyir mistxchi ukhaxa, pä irpir chuymaniwa nayraqat parltʼapxani, ukhamat mayitanak phuqaskiti janicha uk amuytʼañataki (km-S 11/00 pág. 3).
11. ¿Kunjamatsa Diosax jachʼa khuyapayasiñap uñachtʼayistu?
11 Jesusan jiwäwip amtañataki wakichasipxañäni. Qhispiyasawa Diosax jachʼa ‘munasiñapa’ khuyaptʼayasiñapa uñachtʼayistu (Hech. 20:24). Marzo phaxsit 22 urunak saraqat sábado arumthapiwa yuspärasir millón millón jaqinakax aka Uraqpachan Jesusan jiwäwip amtañatakix tantachasipxani. Suma chuyman taqi jaqinakaruw jawsanipxañasa Jehová Diosan khuyaptʼayäwip amuyapxañapataki, ukhamaraki yanaptʼapxañasaw uka amtäwir jutapxañapatakixa.
12. Jesusan jiwäwip amtañatakixa, ¿khitirus jawsaniñäni?
12 Khitinakarus uka tantachäwirux jawsanïta ukanak mä papelar qillqtʼasismax wali askipunïspawa. ¿Khitinakar jawsaniñatakisa qillqtʼasisma? Familiaranakaru, utam jakʼankirinakaru, irnaqäwin jan ukax yatiqañ utan uñtʼat jaqinakaru, Bibliat yatiqirinakaru, nayrax yatichaskayäta ukanakaru, ukhamaraki sapa kuti parltʼapkta uka jaqinakan sutinakapsa qillqtʼasiñamawa. Jesusan jiwäwip amtktan uka tuqit maynix yatxatañ munani ukhaxa, Kunsa yatichi sat librowa yatichtʼañatakix yanaptʼistaspa, 206-208 jananakanwa Santa Cenat parlaski. Uka tuqit yatxatkasaxa, Bibliat yatiqirïñapatakix yanaptʼaraksnawa, kunattix ukhaw kawkïr librompisa Bibliat yatichtan ukxa uñachtʼayasma.
13. Jesusan jiwäwip amtäwiru jawstʼañataki chʼamachtʼasipkatayna uka kullakarusa uka jilatarusa, ¿kunjamsa Jehová Diosax yanaptʼatayna?
13 Mä kullakax 48 familianakaru jawsaniñatakiw qillqasitayna. Sapa familiaru invitación churasaxa, kunürus churatayna uka qillqtʼasisaxa sutip rixtʼatayna. ¡Jawsatanakapatxa 26 jaqinakaw jutapxatayna ukatxa wali kusisitapuniw jikxatasitayna! Ukat mä jilataxa tiendapan irnaqir mä jaqiruw invitación churatayna uka jaqix nayrax tatakurätaynawa. Iyaw sasaw uka jaqix saratayna ukat akham sasaw qhipat sarakitayna: “Kimsa tunka mara Católica iglesiar sarkayät ukat sipansa mä horanakwa Bibliat sum yatiqtxa” sasa. Uka qhipatxa, Kunsa yatichi sat librompiwa Bibliat yatxatañ qalltawayi.
14. Marzo qallta sábado urutxa, ¿kunampis irnaqtʼaskañäni?
14 Jawsäwi. Marzo qallta sábado uruta marzo phaxsi 22 urunak saraqatkamaxa, aka Uraqpachanwa mä qillqatax lakirasini. ¡Taqpach yatiyirinakawa uk lakirañxa yanaptʼapxañäni! Ukat amtapxañäni, utankirinakaruw qillqatanakxa churapxañasa, janiw punkuruk jaytawayañasäkiti, ukham lurañaw wali askixa. Ukampis walja chiqanakaru lakirir sarañax utjaskani ukhaxa, inas irpir chuymaninakax waktʼayapxchini uka qillqatanakax wali amuyump jan utanix ukankkchi uka utanakar jaytasiñapataki. Semana tukuyanakax revistanakamp kunaw irnaqtʼaskarakiñäni.
15. Jesusan jiwäwip amtäwiru jutapxañapatakixa, ¿kunjamsa arxtʼayañasa?
15 Lakirañatakixa janiw tiempox añch utjkaniti, ukhamasti parltʼäwisaxa janiw wali jayäñapäkiti, mä qhawqha arunakampikiwa munasiñampi kusisit chuymampi jaytawayañasa. Akham sasaw sasmaxa: “Aka phaxsinxa 22 urunak saraqatarux mä suma tantachäwiw utjani, ukatak taqinir jawstʼiriw jutawayapxtxa. Aka qillqat jumar jayttʼawayarakïma. Akanwa uka tuqit jukʼampi parlaski” sasa. Inas yaqhip jaqinakax jisktʼchistani; ukat yaqhip jaqinakax jutäwa sasaw katuqtʼasipxistani. Ukhamasti, khitisa ukat kamsisa ukanakxa qillqaqtʼasiñamawa, ukat yatxatañ wal munchi ukhaxa visitämawa sasaw saniwayañama.
16. Kawkjanakantix yatiyktan ukawjanakanxa taqiniruwa Jesusan jiwäwip amtañatak invitación jaytapxañasa, ¿kunas uk sum amuytʼayistu?
16 Pasïr maranxa, mä soldadox uta punkupatwa mä qillqat aptatayna. Ukat Jesusan jiwäwip amtäwiru jutañwa amtatayna, ukampis nayraqatxa (sargento) jilïriparuw permiso mayiñapäna. Ukat kunapachatï jilïripax uka qillqat uñxatatayna ukhaxa, amukiw musphatayna; ukatxa awkij taykajax Jehová Diosan Qhanañchirinakapawa ukat nayax awisax tantachäwinakar saririyätwa sasaw satayna. Ukhamasti janiw permiso mayak churkataynati, jan ukasti soldadomp chikawa uka tantachäwiru saratayna.
17. Ukhamax kunatsa Diosax khuyaptʼayasistu ukxa, ¿kunjamatsa phuqsna?
17 Yuspäratas uñachtʼayapxañäni. Sapürutjamwa 2008 maran Jesusan jiwäwip amtañax jakʼachasiniski, ukhamasti taqiniw Jehová Diosan khuyaptʼayasiñapat amuykiptʼapxañasaxa. Apóstol Pablox akham sasaw qillqatayna: “Jumanakarux achiktʼapxsmawa, jan ina chʼusaru aptʼapxamti kuna khuyapayasiñtï Diosax uñachtʼayapktam ukxa” sasa (2 Cor. 6:1). Ukhamax kunatsa Diosax khuyaptʼayasistu ukxa phuqapxañasawa, ¿kunjamatsa? Pablox akham sistuwa: “Ukat sipansti taqinirus uñachtʼayañ munapxta chiqpachansa nanakax Diosar servirinakäpxataxa” sasa (2 Cor. 6:4). Ukhamasti, Jehová Diosan jiwasat khuyaptʼayasitaparuxa sum sarnaqasa ukhamarak taqi chuyma suma yatiyäwinak yatiyasawa yuspärtanxa. Ukhamax Jesusan jiwäwip amtañäki ukapach phaxsinakawa suma yatiyäwinak jukʼampi yatiyir sarañatakix wali askïnixa.
[3 janan recuadropa]
¿Khitinakas precursor auxiliarjam irnaqtʼañ amtapxaspa?
◼ Familpacha
◼ Jurnälpach irnaqirinaka
◼ Usuntatanaka, chuymankipstatanaka
◼ Yatiqañ utar saririnaka
[4 janan recuadropa]
Jesusan jiwäwip amtañatak qillqatanak lakirasaxa:
◼ Mä qhawqha arunakampikiwa kusisit chuymampi churañama
◼ Yatxatañ munirinak tuqit qillqtʼasipxañasawa ukat kuttʼapxarakiñasawa
◼ Semana tukuyanakaxa revistamp kunaw yatiyarakiñäni