Jichhatpachwa wakichasjjañasa
1. ¿Jesusan jiwäwip amtaskani uka phajjsejj kun lurañatakis chʼamañchistu, ukat kunjamsa wakichassna?
1 Sapa mara Jesusan jiwäwip amtaski ukapachajja, khuyapayasir Jehová Diosar jachʼañchañatakiw chʼamañchtʼistu (Sal. 109:30). Jesusajj jiwasanakar qhespiyañatakiw jiwawayi, ukhamajj yuspärañatakejja, taqe chuymaw marzo phajjsejj Diosan arunakap jukʼamp yatiyañatak chʼamachasiñasa. Ukatakejj jichhatpachwa wakichasiñäni (Pro. 21:5).
2. Abril phajjsejj 30 horanakakiw precursor auxiliarjam irnaqtʼapjjaspa sasin yatiyaskän ukhajja, ¿kamsapjjänsa yaqhep jilat kullakanakajja? ¿Jumajj kunjamas jikjjatasiyäta?
2 Precursor auxiliarjam irnaqtʼañäni. Pasïr marajja, precursor auxiliarjam irnaqtʼañ munirinakajj 30 jan ukajj 50 horanakwa abril phajjsin yatiyapjjaspa sasaw yatiyasïna. Ukajj kusiskañänwa. Mä waynajj akham sasaw qellqatayna: “Escuelankasktwa ukatwa jan precursor regularäkti. Ukampis abril phajjsejj precursor auxiliarjam 30 horanak phoqañatakiw apstʼasï, ukat 50 horanak phoqañatakiw chʼamachasirakï” sasa. Ukat sapür trabajir mä kullakajja, akham sarakitaynawa: “¿30 horanakaki? ¡Nayajj uk phoqheristwa!” sasa. Ukat 80 jila maran mä kullakajja, uka suma yatiyäw istʼasajj akham sarakitaynawa: “¡Nayajj wasitampi precursorjam irnaqtʼañjj walpun munaskayäta! Kunja kusisitas precursor regularjam nayrajj irnaqerïta uk Jehová Diosajj sum yati” sasa. Ukat precursor auxiliarjam jan irnaqtʼirjamäpki uka jilat kullakanakajja, uka phajjsejj jukʼamp yatiyañatakiw chʼamachasiwayapjje.
3. ¿Kunatsa marzo, abril ukat mayo phajjsinakan precursor auxiliarjam irnaqtʼañajj wakisispa?
3 Marzo phajjsinjja, 30 horanaka jan ukajj 50 horanakaw wasitampi precursor auxiliarjam loqtañajj utjani. Ukhamajj uka phajjsin precursor auxiliarjam irnaqañajj wali askïniwa. Ukampis marzo 17 urutjja, Jesusan jiwäwip amtañatakiw invitacionanak lakirañajj qalltasini. Jesusan jiwäwipajja, abril 5 uru saraqataruw amtasiskani. Ukhamasti, marzo phajjsin precursor auxiliarjam irnaqtʼasajja, abril ukat mayo phajjsinakajj 50 horanak phoqañatakiw chʼamachasiraksna.
4. ¿Jehová Diosatak jukʼamp irnaqtʼañatakejj kuns lursna? ¿Ukham lurasajj kuna askinaks jikjjatañäni?
4 Familiana Diosar Yupaychañataki Aruma sat jutïr wakichäwinwa, kunjamatsa uka phajjsinakajj familjam Diosatak jukʼamp irnaqtʼapjjasma uk amuyapjjañamaw wakisispa (Pro. 15:22). Jehová Diosaruw yanaptʼa mayisipjjañama (1 Juan 3:22). Ukampisa ukham jukʼamp irnaqtʼasajja, Jehová Diosaruw jachʼañchañäni ukat kusisiyarakiñäni (2 Cor. 9:6).