Jesusan jiwäwip amtaskani ukapachan jukʼamp yatiyañatak chʼamachasipxañäni
1. ¿Kunatsa marzo, abril ukat mayo phaxsinakan jukʼampi yatiyañatakix chʼamachasiñasa?
1 ¿Jesusan jiwäwip amtaskani ukapachan jukʼamp yatiyañatak jumax chʼamachasismati? Uka phaxsinakanxa, walja chiqanakanwa tiempox sumaxa ukat kawkhantï utjaskta uka chiqan inas ukhamarakïchi ukat inas irnaqäwimata jan ukax yatiqañ utat vacacionanïsta; taqi ukanakatwa yatiyir sarañatakix tiempo apstʼasisma. Jesusan jiwäwipaxa, abril 17 urunwa Inti jalantxaru amtasiskani. Ukatakisti, abril 2 urut qalltasinwa Jesusan jiwäwip amtañatakix invitacionanak lakiraskañäni. Ukat khitinakatï jutapxani ukanakarux wakiskir arstʼäwi istʼir jutapxañapatakiw invittʼañasa. Uka arstʼäwixa, abril 25 urut qalltki uka semananwa apasiskani. Ukhamasti, marzo, abril ukat mayo phaxsinakan jukʼamp yatiyañatak chʼamachasipxañäni.
2. ¿Kunjamsa uka phaxsinakan jukʼamp yatiysna?
2 Precursor auxiliarjam irnaqtʼaña: Uka phaxsinakan jukʼamp yatiyañatakixa precursor auxiliarjamaw irnaqtʼsna. Niyakixay taqinis jan tiemponik sarnaqstanxa, ukhamax janïräkipanwa uka phaxsinakan jukʼam yatiyañataki amtañasa ukat tiemps apstʼasiñasa (Pro. 21:5). Ukat sapür lurañanakasatsa, kawkïrinakas jan añcha wakisirïki uk inas yaqha tiempotak jittʼaysna (Fili. 1:9-11). Precursor auxiliarjam irnaqtʼañ munatamxa mayni jilat kullakanakarux yatiyarakismawa inas ukhamat jupanakax ukham irnaqtʼañ munapxarakchispa.
3. ¿Kunjamsa familjamax jukʼamp yatiyañatak chʼamachtʼasipxasma?
3 Familiana Diosar Yupaychañataki Aruma sat jutïr wakichäwinwa kuna amtanakanïpxtas uka phaxsinakatakix uk familjam amuykiptʼapxasma ukax wali askïspawa (Pro. 15:22). Ukat familjam yanaptʼasisax inas familiat maynisa jan ukax mä qhawqhanis precursor auxiliarjam mä phaxsi jan ukax jukʼamp phaxsinak irnaqtʼapxchispa. Ukampis janipun ukham irnaqtʼañ puedepkäta ukhaxa, familjamax yaqhip jaypʼunakaw yatiyir mistuñatak chʼamachasipxasma jan ukax inas sabadomp domingompix jukʼamp horanak yatiyapxchisma.
4. ¿Jesusan jiwäwip amtaskani ukapachan jukʼamp yatiyañatak chʼamachasiñäni ukhax kuna askinaksa jikxatañäni?
4 Taqi kuntï lurasktan uk Jehová Diosaw uñjaski ukat chʼamachasitassa wali askitwa uñjaraki (Heb. 6:10). Jehová Diosar luqtañasa ukat jaqi masisar yanaptʼañax kusisiyistuwa (1 Cró. 29:9; Hech. 20:35). ¿Jesusan jiwäwip amtaskani ukapachan jukʼamp yatiyañatak jumax chʼamachasismati? Ukhamtï lurätaxa, kusisitaw jikxatasïta ukat bendicionanaksa katuqarakïtawa.