Jesusan jiwäwip amtaskani uka phajjsinakan ¿kunjamsa jukʼamp kusisitäsna?
1. Jesusan jiwäwip amtaskani uka phajjsinakanjja, ¿kunjamsa jukʼamp kusisitäsna?
1 ¿Marzo, abril ukat mayo phajjsinakan jukʼamp kusisitäñ munasmati? Diosan arunakap jukʼamp yatiyasaw kusisitäsna, yamas precursor auxiliarjam irnaqtʼsna ukhajj jukʼamp kusisitäsnawa. ¿Kunatsa ukajj jukʼamp kusisiyistaspa?
2. Jukʼamp yatiyañatak chʼamachastan ukhajj ¿kunatsa jukʼamp kusisitarakïtanjja?
2 Jukʼamp kusisitäñatak chʼamachasiñäni. Jehová Diosajj Jupar yupaychasa, ajay toqet chʼamañchtʼasisa kusisit jikjjatasiñasatakiw lurawayistu (Mat. 5:3). Ukat mayninakar yanaptʼasas kusisitäñasatakiw lurawayistu (Hech. 20:35). Cheqas yatiyir sarasakiw Diosarojj yupaychsna ukat jaqe masisarus yanaptʼsna. Jiwasatï Diosan arunakap jukʼamp yatiyañäni ukhajja, jukʼamp kusisitäñäniwa, suma yatiyirïñaniwa ukat yatiyañsa janirakiw ajjsarayaskañäniti. Maysa toqetjja, walja jaqenakaruw yatiyañäni ukat waljanirurakiw Bibliat yatichañ qalltañäni. Taqe ukanakaw yatiykasajj jukʼamp kusisiyistani.
3. ¿Kunatsa marzo ukat abril phajjsinakajj precursor auxiliarjam irnaqtʼañatakejj wali askïni?
3 Marzo ukat abril phajjsinakajj precursor auxiliarjam irnaqtʼañajj wali askïniwa, kunattejj 30 jan ukajj 50 horanak irnaqtʼañatakiw utjani. Ukatjja, marzo 22 urut qalltasin abril 14 urukamaw invitacionanak lakirasiskani. Abril 14, lunes uruw Jesusan jiwäwip amtaskañäni. Tamanakajj wali kusisitaw territoriopan taqenir invitación lakirañatak waljani mä wawaki irnaqtʼasipkani (Sof. 3:9).
4. Precursor auxiliarjam irnaqtʼañ munsta ukhajja, ¿kuns lurañama?
4 Jichjatpachwa wakichtʼasiñama. Janiratï precursorjam irnaqtʼañatak wakichtʼaskstajja, mä phajjsikisa jan ukajj walja phajjsinak jukʼampi yatiyañatakejj kunanaksa lurasma uk jichjatpachwa amuytʼasiñama. Ukat Diosaruw uka toqet mayisiñama (Sant. 1:5). Familiamampisa ukat tamankir jilat kullakanakampis parltʼañamarakiwa (Pro. 15:22). Inas usutästa jan ukajj walja lurañanakanïsta, ukampis precursor auxiliarjam irnaqtʼasajj kusisitarakïsmawa.
5. Jesusan jiwäwip amtaskani uka phajjsinakan jukʼamp yatiyañatak chʼamachasiñäni ukhajja, ¿kunjamänisa?
5 Servirinakapajj kusisitäpjjaspa ukwa Jehová Diosajj muni (Sal. 32:11). Jiwasatï Jesusan jiwäwip amtaskani uka phajjsinakan jukʼampi yatiyañatak chʼamachasiñäni ukhajja, janiw jiwasak kusisitäkañäniti, jan ukasti alajjpachankir Awkisarus kusisiyarakiñäniwa (Pro. 23:24; 27:11).