Jesusan jiwäwip amtaskani uka phajjsinakan ¿kunjamsa Jehová Diosata, Jesusat yateqasis taqe chuyma irnaqtʼsna?

1. Jesusan jiwäwip amtaskani uka phajjsinakanjja, ¿kunjamsa Jehová Diosan Qhanañchirinakapajj chʼamachasipjje?

¹ Jehová Diosajj amtap phoqañatakejj taqe chuymaw chʼamachasi. Reinopajj kuna bendicionanaktï apankani uka toqet parlkasajja, Isaías 9:7 qellqatajj akham siwa: “[Jehová] Tatitun sinti jachʼa munasiñapaw ukhamjja lurani” sasa. Jesusajj cheqa yupaychäwit taqe chuymaw arjjatarakïna (Juan 2:13-17; 4:34). Jesusan jiwäwip amtaski uka phajjsinakanjja, sapa maraw millón millón Diosan Qhanañchirinakapajj aka oraqpachan Jehová Diosjama, Jesusjam jukʼamp irnaqtʼañatak chʼamachasipjje. ¿Jumajj ukhamti lurarakïta?

2. Marzo phajjsit 7 uru saraqatarojj ¿kunsa lurañäni, ukat kunsa taqe chuym irnaqtʼasajj jikjjatañäni?

² Jesusan jiwäwip amtañatak irnaqtʼañäni. Aka marajja, marzo phajjsit 7 uru saraqataruw invitación lakirañajj qalltasini. Taqe chuyma yatiyañatakejj jichjatwa wakichtʼasiñasa. Taqe tamanakanwa territoriopan taqenir invittʼañatak wal irnaqtʼapjjani. Ukhamajj Bibliat yateqerinakasaru, revisitanakasaru, irnaqer masinakasaru, familiaranakasaru ukat yateqer masinakasar invitación churañataki jan ukajj Internetan jw.org toqe uñjjattʼayañatakiw wakichtʼasiñasa.

3. ¿Kunsa marzo, abril phajjsinakajj jukʼamp yatiyañatak lursna?

³ Precursor auxiliarjam irnaqtʼañäni. Taqe chuyma irnaqañ munatasajj walja horanak yatiyañatakiw chʼamañchistani. Marzo, abril phajjsinakan waljaniw precursor auxiliarjam irnaqañäni, kunattejj 30 horanak irnaqtʼañaw utjarakini. Familjam Diosar yupaychkasa jan ukajj sapak Bibliat yatjjatkasaw kunjamsa uka phajjsinakan jukʼamp yatiysna uk oración toqe amuykiptʼsna (Pro. 15:22). Taqe chuyma irnaqtʼañatak chʼamachasiñänejja, mayninakajj ukhamarakiw chʼamachasipjjani. Ukat jukʼamp horanak yatiyañatak chʼamachasiñäni ukhajja, Jesusat yateqasitaswa uñachtʼayarakiñäni (Mar. 6:31-34).

4. Jehová Diosat, Jesusat yateqasis taqe chuym irnaqañäni ukhajja, ¿kuna askinaksa jikjjatañäni?

⁴ Jesusan jiwäwip amtaskani uka phajjsinakanjja, Jehová Diosat Jesusat yateqasis taqe chuyma irnaqañäni ukhajja, wali askinakwa jikjjatañäni. Territoriosan waljaniruw Diosan arunakap yatiyañäni. Jehová Diosar servisasa, jaqenakar yanaptʼasasa kusisitaw jikjjatasirakiñäni (Hech. 20:35). Jukʼampis Jehová Diosaru ukat Yoqaparuw wal kusisiyañäni.