Јәһуди гадын јени етигады барәдә данышыр

Зәһмәт олмаса, өзүнүз һаггында бир гәдәр мәлумат верин.

Мән 1979-ҹу илдә Бирләшмиш Штатларда анадан олмушам. Үч јашым оланда валидејнләрим бошандылар. Анам мәни јәһуди дининин адәт-әнәнәләринә ујғун тәрбијә едирди вә буна ҝөрә дә мән «јешива» адланан јәһуди мәктәбиндә тәһсил алмаға башладым. Једди јашымда Исраилә көчдүк. Орада «киббутс» адланан мәктәбә ҝедирдим. Амма Исраилдә ҹәми бир ил јашадыг. Сонра анамла Мексикаја көчдүк.

Јашадығымыз әразидә синагог јох иди, амма мән јәһуди адәт-әнәнәләринә садиг идим. Һәр шәнбә шам јандырырдым, Төвраты охујурдум, «сиддур» адланан дуа китабчасынын көмәјилә дуалар едирдим. Синиф јолдашларыма тез-тез хатырладардым ки, мәним диним ән гәдим вә дүзҝүн диндир. Мән һәлә Иса Мәсиһин хидмәтиндән вә тәлимләриндән бәһс едән Инҹили охумамышдым. Анам да тапшырмышды ки, мәбада Инҹили охујасан. Горхурду ки, мән онун тәлимләринин тәсири алтына дүшәрәм, напак оларам.

Нә үчүн Инҹили охумаг гәрарына ҝәлдиниз?

17 јашым оланда тәһсилими давам етдирмәк үчүн АБШ-а гајытдым. Бир мәсиһи танышым мәнә деди ки, Исасыз һәјатымда һәмишә нә исә чатышмајаҹаг.

«Исаја инананлар јанлыш јолдадырлар», — дејә ҹаваб вердим.

«Һеч нә вахтса Инҹили охумусан?» — дејә сорушду.

«Хејр, охумамышам», — дејә ҹаваб вердим.

«Елә исә билмәдијин мөвзу һагда фикир ирәли сүрмәјин нә дәрәҹә дүзҝүндүр? Јанылан елә өзүн дејилсәнми?» — дејә о деди.

Онун сөзләри мәнә ағыр ҝәлди. Өзүм дә һәмишә о фикирдә олмушам ки, инсан ҝәрәк билмәдији шеј һагда гәти фикир билдирмәсин. Хәҹаләт чәкә-чәкә ондан Мүгәддәс Китабы ҝөтүрүб евә ҝетдим вә Инҹили охумаға башладым.

Охудугларыныз сизә неҹә тәсир еләди?

Сән демә, Инҹили јазанлар да јәһудиләр иди. Бу мәним үчүн јенилик олду. Бу китабы охудугҹа санки Иса илә таныш олурдум. Онун хејирхаһ, тәвазөкар, инсанлара зүлм јох, көмәк етмәк истәјән бир јәһуди олдуғуну ҝөрдүм. Китабханадан Исанын һәјаты һагда китаблар ҝөтүрүб охумаға башладым. Анҹаг бу китаблар мәни Исанын Мәсиһ олдуғуна инандыра билмәди. Онлардан бәзиләри ону Аллаһ адландырырды. Бу фикир һеч ҹүр бејнимә сығышмырды. Иса Аллаһдырса, бәс онда кимә дуа едирди, өзүнә? Бундан әлавә, Иса өлдү. Амма Мүгәддәс Китабда Аллаһ һагда дејилир: «Сән өлмәзсән!»a

Бу суаллара неҹә ҹаваб тапдыныз?

Һәгигәт өзү-өзүнә зидд ҝедә билмәз вә мән гәти гәрар вердим ки, һәгигәти тапаҹағам. Аллаһа үрәкдән, ҝөз јашлары илә дуа етдим, илк дәфә сиддурун көмәји олмадан. Дуамы һәлә гуртармамыш гапы дөјүлдү. Ҝәлән ики Јеһова Шаһиди иди. Онлар мәнә Мүгәддәс Китабы арашдырмаг үчүн бир нәшр вердиләр. Бу нәшр, һәмчинин Шаһидләрлә етдијим сонракы сөһбәтләр мәни инандырды ки, онларын етигады Мүгәддәс Китаба әсасланыр. Мәсәлән, Шаһидләр Исанын Аллаһ олдуғуна инанмыр, ону Аллаһын Оғлуb вә «Аллаһын хилгәтинин илки»c кими гәбул едирләр.

Бундан сонра мән Мексикаја гајытдым вә Јеһованын Шаһидләри илә Мәсиһә аид пејғәмбәрликләри өјрәнмәјә давам етдим. Мүгәддәс Китабда нә гәдәр пејғәмбәрлик вармыш! Анҹаг һәлә дә там инана билмирдим. Елә һеј өзүмдән сорушурдум: «Бу тәсвирләрә јалныз Иса ујғун ҝәлирди? Бәлкә о өзүнү Мәсиһ кими апаран бир фырылдагчы иди?»

Сизин үчүн дөнүш нөгтәси нә олду?

Шаһидләр мәнә елә пејғәмбәрликләр ҝөстәрдиләр ки, онларын иҹрасы инсанын өзүндән асылы дејилди. Мәсәлән, Микә пејғәмбәр 700 ил өнҹәдән Мәсиһин Јәһудијјәнин Бејтләһм шәһәриндә дүнјаја ҝәләҹәјини хәбәр вермишдиd. Кимсә өз доғулаҹағы јери мүәјјән едә биләр? Әшија пејғәмбәр јазмышды ки, Мәсиһ ҹинајәткар кими едам олунаҹаг, анҹаг варлы-һаллы адам кими дәфн едиләҹәкe. Бүтүн бу пејғәмбәрликләр Исанын үзәриндә јеринә јетди.

Мәни инандыран ән сон дәлил Исанын нәсил шәҹәрәси олду. Мүгәддәс Китабда дејилирди ки, Мәсиһ Давуд падшаһын нәслиндән ҝәләҹәкдиf. Јәһудиләр нәсил шәҹәрәләрини гејдә алыб сахлајырдылар. Иса Давудун нәслиндән олмасајды, онун дүшмәнләри бу барәдә бар-бар бағырардылар! Анҹаг онлар буну едә билмирдиләр, чүнки Исанын Давудун нәслиндән ҝәлдији данылмаз иди. Һәтта ҹамаат белә, ону «Давуд Оғлу» дејә чағырырдыg.

Ерамызын 70-ҹи илиндә, Исанын өлүмүндән 37 ил сонра Рома ордусу Јерусәлими дармадағын етдиләр. Нәсил шәҹәрәләриндән итән итди, диҝәрләри дә мәһв олуб ҝетди. Демәли, Мәсиһ ерамызын 70-ҹи илиндән әввәл пејда олмалыјды ки, онун әсил-нәҹабәти билинсин.

Бүтүн бунлар сизә неҹә тәсир етди?

Ганунун тәкрары 18:18, 19 ајәләриндә пејғәмбәрлик едилмишди ки, Аллаһ Исраилә Муса кими бир пејғәмбәр ҝөндәрәҹәк. Аллаһ демишди: «Мәним сөзләримә, Онун Мәним адымла сөјләдикләринә гулаг асмајан адам Мәнә ҹаваб вермәли олаҹаг». Мүгәддәс Китабы башдан-ајаға кими дәриндән тәдгиг етмәјим мәни әмин етди ки, нәсрани Иса вәд едилмиш һәмин о пејғәмбәрдир.