Јеһованын јоллары илә јеримәк бол-бол хејир-дуалар ҝәтирир
НӘ ВАХТСА јүксәк бир даға галхмысанмы? Әҝәр галхмысанса, јәгин ки, сән о ан өзүнү дүнјанын зирвәсиндә имиш кими һисс етмисән. Гәрибә һиссләрдир! Тәмиз дағ һавасы, зирвәдән ҝөрүнән ҝөзәл мәнзәрә... Ҝүман ки, сән орада ҝүндәлик нараһатчылыглары бир мүддәт унутмушдун.
Әксәр инсанлар дағларда надир һалларда олурлар. Амма әҝәр сән Аллаһа һәср олунмуш мәсиһчисәнсә, демәк олар ки, артыг бир мүддәтдир ки, руһани мә’нада дағлыг әрази илә јеријирсән. Гәдимдә мәзмурчунун етдији кими, сөзсүз ки, сән дә, белә дуа етмисән: “Ја Рәбб, јолларыны мәнә билдир; јолларыны мәнә өјрәт” (Мәзмур 25:4). Илк дәфә Јеһованын евинин дағына галхыб, јеримәјә башладығын ан кечирдијин һиссләри хатырлајырсанмы? (Мика 4:2; Һабаггуг 3:19). Шүбһәсиз ки, чох тезликлә тәмиз ибадәтин јүксәк јолларынын сәнин үчүн мүдафиә олдуғуну дәрк етдин. О јолларла јеријәрәк, сән дә: “Севинҹ сәсини билән халг нә бәхтијардыр! Үзүнүн нурунда јеријирләр, ја Рәбб”, дејә нида едән мәзмурчунун севинҹинә малик олдун (Мәзмур 89:15).
Лакин бә’зән зирвәјә галхмаг үчүн, јорғунлуг вә ајаг ағрысына бахмадан, дағын дик јамаҹлары илә дырмашмаг лазым ҝәлир. Аллаһа хидмәт едәрәк, биз дә мүгавимәтләрлә гаршылаша биләрик вә мәҹази мә’нада десәк, чәтинликлә јеримәјә башлајырыг. Белә олдугда јенидән гүввә әлдә едәрәк, итирилмиш севинҹи неҹә гајтара биләрик? Бунун үчүн, Јеһованын јолларынын нә дәрәҹәдә јүксәк олдуғуну дәрк етмәк лазымдыр.
Јеһованын јүксәк ганунлары
Јеһованын јоллары инсан јолларындан јүксәкдир, буна ҝөрә дә тәмиз ибадәт дағларын башына гојулуб, тәпәләрдән јүксәкдә дурур (Ишаја 55:9; Мика 4:1). Јеһованын һикмәти — “јухарыдан назил олан һикмәт”дир (Јагуб 3:17). Онун ганунлары мүгајисәолунмаз дәрәҹәдә јүксәкдир. Мәсәлән, кән’анлылар ушагларыны гурбан ҝәтирдикләри вахт, Јеһова исраиллиләрә, јахшылыға тәшвиг едән јүксәк әхлаг ганунлары верди. О, онлара деди: “Фағыра үзҝөрәнликлә јанашма вә бөјүк адама үстүнлүк вермә... Гәриб аранызда јерли кими олаҹаг вә ону өзүн кими севәҹәксән” (Левилиләр 19:15, ЈД; 34).
Мин беш јүз илдән сонра Иса, Јеһованын ганунларынын мүкәммәл олдуғуну даһа ајдын сурәтдә ҝөстәрди (Ишаја 42:21). Дағүстү тәблиғиндә о, шаҝирдләринә деди: “Дүшмәнләринизи севин... [сизи] тә’гиб едәнләр үчүн дуа един ки, сиз, ҝөјләрдә олан Атанызын оғуллары оласыныз” (Матта 5:44, 45). Сонра әлавә етди: “Буна ҝөрә, инсанларын сизинлә неҹә рәфтар етмәсини истәјирсинизсә, сиз дә онларла елә рәфтар един. Чүнки Мүгәддәс Ганун вә пејғәмбәрләр белә хүласә едилир” (Матта 7:12).
Бу јүксәк ганунлар сәмими инсанларын үрәјинә јол тапыр вә онлары тәшвиг едир ки, ибадәт етдикләри Аллаһы тәглид етсинләр (Ефеслиләрә 5:1; 1 Салониклиләрә 2:13). Павеллә баш верәнләри хатырлајын. Мүгәддәс Китабда бу инсан һаггында илк дәфә охудугда, ҝөрүрүк ки, о, “Стефанын өлдүрүлмәсинә разы олмушду”, бундан башга мәсиһчи јығынҹағы илә гәддарҹасына давранырды. Лакин ҹәми бир нечә ил кечдикдән сонра о, Салоник шәһәриндә јашајан гардашларла “ушагларыны бағрына басыб әмиздирән ана кими” давраныр, онлара мәһәббәтлә мәсләһәт верирди. Аллаһ тәрәфиндән алдығы билик Павели әһәмијјәтли дәрәҹәдә дәјишилмәјә вадар етди. Әввәлләр тә’гибчи олан бу инсан, инди гајғыкеш бир мәсиһчи иди (Һәвариләрин ишләри 8:1, 3; 1 Салониклиләрә 2:7). Шүбһәсиз ки, Павел Мәсиһин тә’лиминин онда етдији дәјишикликләрә ҝөрә миннәтдар иди (1 Тимотејә 1:12, 13). Бу ҹүр миннәтдарлыг һисси Јеһованын јүксәк јоллары илә ҝетмәјә давам етмәкдә бизә неҹә көмәк едә биләр?
Миннәтдарлыг тәзаһүр етдирин
Ҝөзәл дағ мәнзәрәсиндән сонсуз дәрәҹәдә зөвг алмаг олар. Лакин ајры-ајры гәрибә формалы дашларын, инҹә ҝүлләрин, вәһши һејванларын ҝөзәллији дә инсаны өзүнә ҹәлб едир. Јеһованын јоллары илә јеријәркән алдығымыз кичик вә бөјүк хејир-дуалары руһани мә’нада ҝөрмәји дә өјрәнмәлијик. Бу ҹүр давранараг, мәҹази мә’нада десәк, ајагларымызы сүрүмәјә сон гојуб, даһа ҝүмраһ јеријәҹәјик. Биз, Давудун сөзләрини тәкрар едә биләҹәјик: “Сәһәр инајәтини мәнә ешитдир; чүнки мән сәнә ҝүвәнирәм; ҝедәҹәјим јолу мәнә билдир” (Мәзмур 143:8).
Артыг узун илләрдир ки, Јеһованын јоллары илә јеријән Мери дејир: “Јеһованын јаратдыгларыны нәзәрдән кечирәркән, јалныз онларын неҹә мө’ҹүзәли шәкилдә јарадылдыгларыны дејил, һәм дә Аллаһын мәһәббәтини ҝөрүрәм. Һәр бир һејван, гуш вә ја һәшәрат балаҹа, лакин мө’ҹүзәли бир аләми тәгдим едир. Илләр кечдикҹә даһа ајдын руһани һәгигәтләри анладыгҹа да ејни тәрздә зөвг алырам”.
Миннәтдарлығымызы неҹә артыра биләрик? Биринҹиси, Јеһованын бизим үчүн етдији ишләри, санки О, буну етмәјә борҹлу имиш кими гәбул етмәли дејилик. Павел јазмышдыр: “Дурмадан дуа един. Һәр шәраитдә шүкүр един” (1 Салониклиләрә 5:17, 18; Мәзмур 119:62).
Миннәтдарлыг һиссини артырмаға шәхси өјрәнмә дә көмәк едир. Павел Колос шәһәриндә јашајан мәсиһчиләри тәшвиг едирди: “Онун [Иса Мәсиһин] јолунда јеријин; өјрәдилдијиниз кими иманда мөһкәмләнин” (Колослулара 2:6, 7). Мүгәддәс Китабы охујуб, үзәриндә дүшүндүјүмүз заман иманымыз мөһкәмләнир вә бу китабын Мүәллифи илә мүнасибәтимиз даһа да е’тибарлы олур. Мүгәддәс Китабын һәр сәһифәсиндә иманы мөһкәмләдән бу ҹүр дәјәрли фикирләр јерләшир.
Бундан әлавә, бу јолу давам етдирмәк бизә она ҝөрә асандыр ки, Јеһоваја гардашларымызла бирҝә хидмәт едирик. Мәзмурчу охујурду: “Сәндән горханлара мән јолдашам” (Мәзмур 119:63). Мәсиһчи јығынҹаглары вә достлуг ҝөрүшләри бизә унудулмаз дәгигәләр бәхш едир. Ону да анлајырыг ки, Јеһова вә Онун јүксәк јоллары олмасајды, үмумдүнја мәсиһчи аиләси мүмкүн олмазды (Мәзмур 144:15б).
Миннәтдарлыг һисси инкишаф етдирәрәк, биз ајыг галмағын да ваҹиблијини унутмалы дејилик. Бу кејфијјәт, даһа сонра да Јеһованын јүксәк јоллары илә јеримәкдә бизә көмәк едәҹәкдир.
Ајыг вә мәс’улијјәтли олун
Азмамаг вә ја учурумдан јыхылмамаг үчүн ајыг олмаг дағда хүсусилә ваҹибдир. Јеһова бизи ирадә азадлығы илә јарадыб вә гәрар гәбул етмәји бизим ихтијарымыза бурахыб. Мәсиһчи вәзифәләрини иҹра едәркән, бизә верилмиш азадлыгдан ҝәрәк “ајыг” шәкилдә, јә’ни мәс’улијјәтлә истифадә едәк.
Јеһова, хидмәтчиләринин өз вәзифәләринә мәс’улијјәтлә јанашаҹагларына е’тибар едир. О бизә, мәсиһчи хидмәтинә нә гәдәр гүввә вә вахт сәрф етмәли, нә гәдәр пул вә ја башга шејләр вермәли олдуғумуза даир ҝөстәришләр вермир. Әксинә, Павелин Коринф шәһәриндәки јығынҹаға дедији сөзләри бизә дә аиддир: “Һәр кәс үрәјиндә нијјәт етдији кими версин” (2 Коринфлиләрә 9:7; Ибраниләрә 13:15, 16).
Мәс’улијјәтли олмаг о демәкдир ки, хош хәбәри башгалары илә бөлүшмәк, һәмчинин Падшаһлығын үмумдүнја иши үчүн пул ианә етмәк лазымдыр. Мәсиһчи јығынҹағынын ағсаггалы олан Герһарт изаһ едир ки, Шәрги Авропа өлкәләриндән бириндә кечирилән конгресдә иштирак етдикдән сонра, арвады илә бирликдә даһа чох ианә етмәјә башладылар. О дејир: “Биз ҝөрдүк ки, һәмин өлкәдә јашајан гардашларымыз олдугҹа касыб јашадыгларына бахмајараг, Мүгәддәс Китаба әсасланан әдәбијјаты јүксәк гијмәтләндирирләр. Буна ҝөрә дә гәрара алдыг ки, нә гәдәр имканымыз чатыр башга өлкәләрдә еһтијаҹ ичиндә јашајан гардашларымыза пул ианә етмәклә көмәк әлимизи узадаг”.
Дөзүмлү олмаға давам един
Дағлыг әразидә јеримәк дөзүмлүлүк тәләб едир. Узун сәјаһәтә һазырлашмаг үчүн, чохлары мүнтәзәм олараг физики мәшгләр едир вә гыса мәсафәли ҝәзинтиләрә чыхырлар. Бунун кими, руһани ҹәһәтдән мөһкәм галмаг үчүн дә, биз, һәвари Павелин мәсләһәтинә әсасән, һәмишә теократик ишләрлә мәшғул олмалыјыг. “Рәббә лајиг шәкилдә һәрәкәт” етмәк истәјәнләр, ҝәрәк “һәр ҹүр хејирли ишдә сәмәрә” версинләр (Колослулара 1:10, 11).
Нәзәрдә тутулан јери, мәсәлән, узагда јерләшән дағын тәпәсини ҝөрмәк сәјаһәтчијә дөзүмлә ирәлиләмәкдә көмәк едир. Јолун јарысыны гәт едиб, ҝеријә бојланараг севинҹлә дејә биләр ки, һәдәф даһа јахындадыр.
Әбәди һәјата олан үмид дә бизи мәсиһчи јолунда мөһкәмләдир, бизә көмәк едир (Ромалылара 12:12). Јеһованын јоллары илә ҝетмәклә, гаршымыза мәгсәдләр гојур вә онлара наил олмаг бизә севинҹ ҝәтирир. Јеһоваја сәдагәтлә хидмәт етдијимиз илләрә нәзәр салдыгда, јахуд өзүмүздә етдијимиз дәјишикликләри хатырладыгда неҹә дә дәрин мәмнунлуг һисси дујуруг (Мәзмур 16:11).
Узун мәсафәни пијадә гәт едиб, гүввәдән дүшмәмәк үчүн, дүзҝүн темп сечмәк ваҹибдир. Мүнтәзәм олараг јығынҹагларда вә тәблиғдә иштирак етмәји өзүнә дахил едән јахшы дүшүнүлмүш шәхси ҹәдвәл, гаршымыза гојдуғумуз мәгсәдләрә гәтијјәтлә чатмагда бизә көмәк едәҹәк. Павел һәмиманлыларыны тәшвиг едирди ки, “әјара ҝөрә” һәрәкәт етмәјә давам етсинләр (Филипилиләрә 3:16).
Јеһованын јоллары илә јеримәкдә биз тәк дејилик. Павел јазыр: “Бир-биримизи мәһәббәтә вә хејирли ишләрә неҹә тәшвиг едәҹәјимизин гајғысына галаг” (Ибраниләрә 10:24). Там дәјәрли руһани үнсијјәтин сајәсиндә, һәмиманлыларымызла бирликдә мәсиһчи јолу илә јеримәк үчүн темпи сахламаг бизә асан олаҹаг (Сүлејманын мәсәлләри 13:20).
Нәһајәт, ән ваҹиби исә одур ки, һеч заман Јеһованын вердији гүввәни унутмалы дејилик. Јеһоваја ҝүвәнәнләр “ҝетдикҹә гүввәтләнирләр” (Мәзмур 84:5, 7). Бу јолда һәрдән мүгавимәтләрлә үзләшәҹәјимизә бахмајараг, Јеһованын гүввәси сајәсиндә биз онларын өһдәсиндән ҝәлә биләҹәјик.