Мәһәббәт чох зәруридир
ЈАШЫНДАН, мәдәнијјәтиндән, дилиндән вә иргиндән асылы олмајараг бүтүн инсанлар мәһәббәтә сусамышлар. Әҝәр бу сусузлуг јатырылмазса, хошбәхтлик олмаз. Тибб саһәсиндә тәдгигатчы ишләјән бир нәфәр демишдир: “Хәстәләнир вә ја сағалырыгса, кәдәрләнир вә ја севинириксә, изтираб чәкир вә ја шәфа тапырыгса — бунларын һамысы илк нөвбәдә мәһәббәтдән вә сәмими дујғулардан, ја да онларын олмамасындан асылыдыр. Әҝәр мәһәббәт кими тә’сирли дәрман ихтира олунсајды, демәк олар ки, һәр бир һәким һәмин дәрманы хәстәләринә төвсијә едәрди. Бу дәрманы јазмамаг хәстәнин диггәтсиз мүалиҹәси оларды”.
Лакин буҝүнкү ҹәмијјәт — хүсусилә дә, күтләви информасија васитәләри вә мәшһур адамлар чох вахт инсанларын мәһәббәтә вә сәмими мүнасибәтә олан тәләбатларындан чох зәнҝинлијә, һакимијјәтә, шөһрәтә вә ҹинси әлагәјә хүсуси әһәмијјәт верир. Мүәллимләрин чоху шаҝирдләри мадди мәгсәдләрә вә карјера гурмаға тәшвиг едирләр, чүнки елә дүшүнүрләр ки, бунларсыз һәјатда һеч нәјә наил олмаг мүмкүн дејил. Дүздүр, тәһсил алмаг вә исте’дад инкишаф етдирмәк ваҹибдир, лакин аиләмизә вә достларымыза тамамилә вахт ајырмадан, өзүмүзү бу ишләрә бүтүнлүклә һәср етмәјимизә дәјәрми? Кечмишдә јашамыш вә инсан тәбиәтинә јахшы бәләд олан зијалы бир адам исте’дады олан, лакин мәһәббәтә малик олмајан инсанлары “ҹинҝилдәјән мисә вә ја сәсләнән синҹә” бәнзәтмишдир (1 Коринфлиләрә 13:1). Белә адам зәнҝин, һәтта мәшһур да ола биләр, лакин о, һеч вахт һәгиги мә’нада хошбәхт ола билмәз.
Аллаһа вә јахынына олан мәһәббәт — инсанлары дәрин баша дүшән вә онлары хүсусилә гијмәтләндирән Иса Мәсиһин тә’лиминин мәғзини тәшкил едирди. О бујурмушдур: “Аллаһын олан Рәбби бүтүн үрәјинлә, бүтүн ҹанынла вә бүтүн дүшүнҹәнлә сев. [...] Гоншуну [“јахыныны”, ЈД] өзүн кими сев” (Матта 22:37-39). Мәсиһин һәгиги давамчылары јалныз бу сөзләрә мүвафиг јашајан инсанлар ола биләрди. Буна ҝөрә дә Мәсиһ демишдир: “Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк” (Јәһја 13:35).
Бәс буҝүнкү дүнјада мәһәббәти неҹә инкишаф етдирмәк олар? Валидејнләр мәһәббәти өз өвладларына неҹә ашылаја биләрләр? Бу суаллар нөвбәти мәгаләдә мүзакирә олунур.
[3-ҹү сәһифәдәки шәкилләр]
Тамаһкарлыгла долу бир дүнјада мәһәббәт инкишаф етдирмәк асан дејил.