Әсаслы сурәтдә шаһидлик етмәјә өјрәдилмишик
«Јерусәлимдә, бүтүн Јәһудеја вә Самаријада, һәтта дүнјанын ән узаг јерләринә гәдәр Мәнә шаһид олаҹагсыныз» (ҺӘВАРИЛӘРИН ИШЛӘРИ 1:8).
1, 2. Петерә һансы тапшырыг верилмишди вә бу тапшырығы она ким вермишди?
«НАЗАРЕТЛИ Иса... “Дириләрин вә өлүләрин Аллаһ тәрәфиндән тә’јин олунан Һакими Одур”, — дејә халга тәблиғ едиб [«әсаслы сурәтдә», ЈД] шаһидлик етмәји бизә әмр етди» (Һәвариләрин ишләри 10:38, 42). Һәвари Петер мүждәчи кими алдығы тапшырығы Корнелиуса вә онун аилә үзвләринә бу сөзләрлә изаһ етди.
2 Иса бу тапшырығы нә заман вермишди? Ҝөјә галхмаздан әввәл һәјата гајтарылмыш Мәсиһ өзүнүн садиг шаҝирдләринә демишди: «Јерусәлимдә, бүтүн Јәһудеја вә Самаријада, һәтта дүнјанын ән узаг јерләринә гәдәр Мәнә шаһид олаҹагсыныз» (Һәвариләрин ишләри 1:8). Еһтимал ки, Петер мәһз бу һадисәни нәзәрдә тутурду. Лакин Петер, Мәсиһин шаҝирди кими она олан иманы һаггында башгаларына данышмалы олаҹағыны әввәлҹәдән билирди.
Үч иллик тә’лим
3. Иса һансы мө’ҹүзәни ҝөстәрди вә Петерлә Андрејә нә тәклиф етди?
3 Б. е. 29-ҹу илиндә вәфтиз олунандан бир нечә ај сонра Иса Галилеја дәнизинин јахынлығында ики балыгчыја — Петерә вә онун гардашы Андрејә тәблиғ етмишдир. Гардашлар бүтүн ҝеҹәни чалышмыш, лакин һеч нә тута билмәмишдиләр. Иса онлардан биринә деди: «Дәрин јерә сүрүн вә ов үчүн торларынызы суја атын». Онлар Мәсиһи динләјиб «чохлу балыг тутдулар; һәтта торлары јыртылырды». Петер бу мө’ҹүзәни ҝөрән заман горхуја дүшдү, анҹаг Иса ону сакитләшдирәрәк деди: «Горхма, бу ҝүндән е’тибарән инсанлары тутаҹагсан» (Лука 5:4-10).
4. а) Иса шаҝирдләрини шаһидлик етмәјә неҹә һазырлады? б) Мәсиһин шаҝирдләринин хидмәтини онларын Мүәллимләринин хидмәти илә мүгајисә етдикдә нә демәк олар?
4 Петерлә Андреј, һәмчинин Зеведејин оғуллары Јагуб вә Јәһја орадаҹа өз гајыгларыны сахлајыб, Исанын ардынҹа ҝетдиләр. Тәхминән үч ил әрзиндә Мәсиһлә бәрабәр шәһәрләри вә кәндләри ҝәзиб долашыр, мүждәчи олмағы ондан өјрәнирдиләр (Матта 10:7; Марк 1:16, 18, 20, 38; Лука 4:43; 10:9). Ерамызын 33-ҹү илинин 14 нисан ҝүнүндә, онларын тә’лими сона јетәндә Иса демишди: «Мәнә иман едән, ҝөрдүјүм ишләри өзү дә ҝөрәҹәк. Бунлардан даһа бөјүк шејләр дә едәҹәкдир» (Јәһја 14:12). Мәсиһин шаҝирдләринин гаршысында Мүәллимләри кими әсаслы сурәтдә, амма даһа бөјүк мигјасда тәблиғ етмәк иши дурурду. Онлар тезликлә билдиләр ки, өзләри вә ҝәләҹәк шаҝирдләрин һамысы «бүтүн халглара» тәблиғ етмәли вә бу иши «дөврүн сонуна гәдәр» јеринә јетирмәлидирләр (Матта 28:19, 20).
5. Исанын шаҝирдләринә вердији һазырлыгдан биз неҹә фајда әлдә едә биләрик?
5 Биз «дөврүн сон»а чатдығы вахтда јашајырыг (Матта 24:3). Биринҹи әсрдәки шаҝирдләрдән фәргли олараг, бизим Иса илә ҝәзмәк вә онун неҹә тәблиғ етдијини мүшаһидә етмәк имканымыз јохдур. Амма буна бахмајараг, Исанын неҹә тәблиғ етдији вә өз давамчыларына һансы ҝөстәришләри вердији һагда Мүгәддәс Китабдан охујараг онун тә’лиминдән фајда әлдә едә биләрик (Лука 10:1-11). Бу мәгаләдә Исанын шаҝирдләринә вердији олдугҹа ваҹиб дәрси, тәблиғ ишинә неҹә јанашмаг мәсәләсини мүзакирә едәҹәјик.
Инсанлара гајғы
6, 7. Исанын етдији шаһидлик нәјә ҝөрә јахшы тә’сир бағышлајырды вә биз ону бу саһәдә неҹә тәглид едә биләрик?
6 Исанын етдији шаһидлик нәјә ҝөрә јахшы тә’сир бағышлајырды? Сәбәбләрдән бири, онун инсанлара ҝөстәрдији дәрин мараг вә гајғы иди. Мәзмурчу габагҹадан демишдир ки, Мәсиһ «јохсула, фәгирә» рәһм едәҹәк (Мәзмур 72:13). Сөзсүз ки, Иса бу пејғәмбәрлији јеринә јетирирди. Мүгәддәс Китаб бир һадисә илә бағлы бунлары сөјләјир: «Издиһамы ҝөрдүкдә Исанын онлара јазығы ҝәлди; чүнки чобансыз гојунлар кими тагәтсиз вә дағыныг идиләр» (Матта 9:36). Һәтта ҹидди ҝүнаһ ишләдән инсанлар да онун гајғысыны дујур вә она јахынлашмаға ҹан атырдылар (Матта 9:9-13; Лука 7:36-38; 19:1-10).
7 Әҝәр бизи дә инсанлара олан гајғы һәрәкәтә ҝәтирирсә, онда хидмәтимиз фајдалы олаҹагдыр. Тәблиғә ҝетмәздән әввәл, сөјләјәҹәјин хәбәрин инсанлар үчүн нә гәдәр ваҹиб олмасы һаггында нәјә ҝөрә бир анлыға дүшүнмәјәсән? Онларын пајына дүшән вә анҹаг Аллаһын Падшаһлығынын һәлл едә биләҹәји чәтинликләр һагда фикирләш. Раст ҝәлдијин һәр бир инсана мүсбәт мүнасибәтлә јанаш, чүнки хош хәбәрә кимин һај верәҹәјини билмирсән. Бәлкә дә, јахынлашаҹағын нөвбәти инсан сәнин кими бирисинин ҝәлиб она көмәк етмәси һагда дуа едиб?!
Мәһәббәт тәшвиг едир
8. Мәсиһи хош хәбәри тәблиғ етмәјә тәшвиг едән нә иди вә мәсиһчиләр бу саһәдә өз Мүәллимләрини неҹә тәглид едирләр?
8 Исанын бәјан етдији хош хәбәр бәшәријјәт үчүн ән ваҹиб мәсәләләрлә — Јеһованын ирадәсинин јеринә јетирилмәси, Онун адынын иззәтләндирилмәси вә һакимијјәтинә бәраәт газандырылмасы илә бағлы иди (Матта 6:9, 10). Атаја мәһәббәт Исаны тәшвиг едирди ки, Она олан сәдагәтини сонадәк горусун вә бүтүн бу ваҹиб мәсәләләри һәлл едәҹәк Падшаһлыг һаггында әсаслы сурәтдә шаһидлик етсин (Јәһја 14:31). Бу ҝүн дә Мәсиһин давамчыларыны мәһәббәт тәшвиг етдији үчүн онлар хидмәтдә бүтүн сә’јлә чалышырлар. Һәвари Јәһја демишди: «Аллаһы севмәк, Аллаһын әмрләринә риајәт етмәк демәкдир». Онун әмрләриндән бири дә хош хәбәри тәблиғ етмәк вә инсанлара Мәсиһин шаҝирди олмагда көмәк етмәкдир (1 Јәһја 5:3; Матта 28:19, 20).
9, 10. Аллаһа мәһәббәтдән башга даһа һансы мәһәббәт бизи әсаслы сурәтдә шаһидлик етмәјә тәшвиг едир?
9 Иса давамчыларына демишди: «Әҝәр Мәни севирсинизсә, әмрләрими јеринә јетирин. Ким әмрләримә малик олуб онлара риајәт едәрсә, Мәни севән одур» (Јәһја 14:15, 21). Беләликлә, мәһз Исаја мәһәббәт бизи һәгигәтә шаһидлик етмәјә вә онун әмр етдији һәр шејә риајәт етмәјә тәшвиг етмәлидир. Дирилдикдән сонра һәвариләринә ҝөрүнәрәк, Иса Петерә мүраҹиәт едиб деди: «Гузуларымы отар. [...] Гојунларымы отар. [...] Гојунларымы отар». Петер буну һансы һиссләрдән ирәли ҝәләрәк етмәли иди? Ҹаваб Исанын һәваријә вердији суаллардан ајдын олур: «Мәни... чох севирсәнми? [...] Мәни севирсәнми? [...] Мәни севирсәнми?» Беләликлә, Петер мәһз Исаја олан мәһәббәтдән ирәли ҝәләрәк әсаслы сурәтдә шаһидлик етмәли, Исанын «гојунларыны» тапмалы вә онлары «отармалы» иди (Јәһја 21:15-17).
10 Петердән фәргли олараг биз Иса илә шәхсән таныш дејилик. Бунунла белә, Исанын бизим үчүн етдикләрини јүксәк гијмәтләндиририк. Бизи онун «һәр бир адам наминә өлүм» дадараг тәзаһүр етдирдији бөјүк мәһәббәти риггәтә ҝәтирир (Ибраниләрә 2:9; Јәһја 15:13). Биз дә нөвбәти сөзләри јазан Павелин кечирдији һиссләрә шәрикик: «Мәсиһин мәһәббәти бизи мәҹбур [«тәшвиг», ЈД] едир... Мәсиһ һамы үчүн өлдү ки, јашајанлар артыг өзләри үчүн јох... [онун] үчүн јашасынлар» (2 Коринфлиләрә 5:14, 15). Әҝәр биз Мәсиһин мәһәббәтинә ҝөрә миннәтдарыгса вә ону севириксә, онун әсаслы сурәтдә шаһидлик етмәк тапшырығыны сә’јлә јеринә јетирәҹәјик (1 Јәһја 2:3-5). Һеч вахт јол вермәк олмаз ки, биздә тәблиғ ишинә е’тинасыз мүнасибәт јарансын, ахы биз Исанын гурбаныны ади бир шеј һесаб етмәк истәмирик (Ибраниләрә 10:29).
Мәгсәдинизи унутмајын
11, 12. Иса јер үзүнә һансы мәгсәдлә ҝәлмишди вә бүтүн диггәтини бу мәгсәдә јөнәлтдијини неҹә ҝөстәрирди?
11 Понти Пилатын гаршысында дураркән Иса деди: «Мән бунун үчүн доғулмушам вә бунун үчүн дүнјаја ҝәлмишәм ки, һәгигәтә шәһадәт едим» (Јәһја 18:37). О, һеч нәјә ону мәгсәдиндән јајындырмаға јол вермирди. Аллаһын Онун үчүн олан ирадәси бундан ибарәт иди.
12 Шејтан бу саһәдә Исаны дәфәләрлә сынаға чәкмишди. Исанын вәфтизиндән бир аз сонра Иблис она бу дүнјада ҝөркәмли шәхсијјәт олмағы вә «дүнјанын бүтүн өлкәләрини вә онларын шан-шөһрәтини» тәклиф етди (Матта 4:8, 9). Даһа сонра јәһудиләр ону падшаһ етмәк истәдиләр (Јәһја 6:15). Бә’зиләри, бәлкә дә елә дүшүнүрләр ки, ҝәрәк Иса бу тәклифләрә разы олајды, чүнки онларын фикринә ҝөрә, Иса јер үзүндә рәһбәрлик етсәјди инсанлар үчүн чохлу јахшылыглар едә биләрди. Лакин Иса башга ҹүр дүшүнүрдү. Онун мәгсәди һәгигәтә шәһадәт етмәк иди.
13, 14. а) Исаны мәгсәдиндән нә јајындыра билмәди? б) Иса мадди ҹәһәтдән јохсул олса да, нәји едә билди?
13 Бундан әлавә, һеч бир вар-дөвләт Исаны Аллаһын ирадәсини иҹра етмәкдән јајындыра билмәди. Буна ҝөрә дә о, варлы инсан олмамышды. Онун һәтта өз еви дә јох иди. Иса бир дәфә демишди: «Түлкүләрин һини вә ҝөј гушларынын јувасы вардыр; Инсан Оғлу исә башыны сөјкәмәјә јер тапмыр» (Матта 8:20). Мүгәддәс Китаба әсасән, Исадан галан јеҝанә гијмәтли шеј, Рома әсҝәрләринин кимин олаҹаг дејә пүшк атдыглары палтар иди (Јәһја 19:23, 24). Онда демәк олармы ки, Иса әбәс јерә јашамышды? Әлбәттә ки, јох!
14 Иса ән варлы хејријјәчинин едә биләҹәјиндән дә чох шеј етмишдир. Павел дејирди: «Сиз Рәббимиз Иса Мәсиһин лүтфүнү билирсиниз; О зәнҝин олдуғу һалда сизин уғрунузда јохсуллашды ки, сиз Онун јохсуллуғу илә зәнҝинләшәсиниз» (2 Коринфлиләрә 8:9; Филипилиләрә 2:5-8). Мәсиһ мадди ҹәһәтдән јохсул олса да, тәвазөкар инсанларын камиллијә чатараг әбәди һәјата наил олмаларына јол ачды. Биз она неҹә дә миннәтдарыг! Вә биз неҹә дә шадыг ки, Иса диггәтини Аллаһын ирадәсини јеринә јетирмәјә јөнәлтмәклә мүкафат алмышдыр! (Мәзмур 40:8; Һәвариләрин ишләри 2:32, 33, 36).
15. Вар-дөвләтдән даһа гијмәтли олан нәдир?
15 Бу ҝүн Мәсиһи тәглид етмәјә чалышан мәсиһчиләр дә вар-дөвләт далынҹа гачмағы рәдд едирләр (1 Тимотејә 6:9, 10). Онлар пулун сајәсиндә даһа раһат јашамағын мүмкүн олдуғуну инкар етмәсәләр дә, әбәди ҝәләҹәјин вар-дөвләтдән асылы олмадығына әминдирләр. Иса өлән заман палтарынын онун үчүн һеч бир әһәмијјәт кәсб етмәдији кими, мәсиһчи өләндә дә онун вар-дөвләти һеч бир әһәмијјәт кәсб етмир (Ваиз 2:10, 11, 17-19; 7:12). Мәсиһчи үчүн әсл гијмәтли шеј — Јеһова вә Иса Мәсиһлә олан мүнасибәтдир (Матта 6:19-21; Лука 16:9).
Мүгавимәт манеә дејил
16. Иса мүгавимәтләрә неҹә јанашырды?
16 Мүгавимәтләрә бахмајараг, Иса мәгсәдјөнлү шәкилдә һәгигәт һаггында шәһадәт едирди. Иса јер үзүндәки хидмәтинин өзүнү гурбан вермәси илә баша чатаҹағыны билсә дә, руһдан дүшмүрдү. Павел демишди: «[Мәсиһ] гаршысына гојулан севинҹ уғрунда, рүсвајчылыға е’тинасызлыг ҝөстәриб, чармыха тәһәммүл етди вә Аллаһын тахтынын сағында отурду» (Ибраниләрә 12:2). Диггәт јетирәк ки, Иса ‘рүсвајчылыға е’тинасызлыг ҝөстәрди’. Дүшмәнләрин онун һаггында дүшүндүкләри Исаны һеч дә нараһат етмирди. Онун үчүн башлыҹа олан иш Аллаһын ирадәсини иҹра етмәк иди.
17. Исанын тәһәммүлүндән биз нә өјрәнә биләрик?
17 Исанын тәһәммүлүндән һансы ибрәт дәрсини ҝөтүрә билдијимизи ҝөстәрәрәк, Павел мәсиһчиләри тәшвиг едирди: «Ҝүнаһкарлар тәрәфиндән Она гаршы олан бу гәдәр мүхалифәтә таб ҝәтирән Шәхси фикирләшин ки, ҹаныныз јорулуб, тагәтдән дүшмәјәсиниз» (Ибраниләрә 12:3). Мүгавимәт вә ја истеһзалара ҝүндән-ҝүнә таб ҝәтирмәк доғрудан да асан дејил. Бу дүнјада «мүвәффәгијјәтли» олаҹағымызы ҝөзләјән доғмаларын истәкләринә зидд давранараг, дүнјәви еһтираслары даима рәдд етмәк дә асан дејил. Лакин Мәсиһ кими биз дә көмәк үчүн Јеһоваја мүраҹиәт едир вә гәтијјәтлә илк нөвбәдә Аллаһын Падшаһлығыны ахтарырыг (Матта 6:33; Ромалылара 15:13; 1 Коринфлиләрә 2:4).
18. Исанын Петерә вердији ҹавабдан һансы ибрәт дәрсини ҝөтүрә биләрик?
18 Мәсиһин мәгсәдјөнлү олмасы өлүмүнүн јахынлашдығы барәдә шаҝирдләрини хәбәрдар етдији заман өзүнү даһа ајдын бирузә верди. Петер Исадан хаһиш етди ки, ‘өзүнә јазығы ҝәлсин’ вә ‘бу әсла онун башына ҝәлмәсин’. Иса Јеһованын ирадәсини јеринә јетирмәкдән ону јајындыра биләҹәк һеч бир шеј барәдә ешитмәк белә истәмирди. О, үзүнү Петердән јан чевириб деди: «Рәдд ол Мәндән, шејтан! Сән Мәнә мане олурсан. Чүнки сәнин фикирләрин Аллаһын дејил, инсан фикирләридир» (Матта 16:21-23). Биз дә инсан фикирләрини бу ҹүр гәтијјәтлә рәдд едәҹәјик. Гој бизим һәјатымыза һәмишә Аллаһ һаггындакы фикирләр рәһбәрлик етсин.
Әсл фајда
19. Иса мө’ҹүзәләр ҝөстәрсә дә, онун хидмәтинин әсасыны тәшкил едән нә иди?
19 Мәсиһ олдуғуну сүбут етмәк үчүн Иса чохлу мө’ҹүзәләр ҝөстәрмишдир. О, һәтта өлүләри дә дирилдирди. Мө’ҹүзәләр чох инсанлары ҹәлб едирди, лакин Иса јер үзүнә иҹтимаи проблемләрлә мәшғул олмаг үчүн ҝәлмәмишдир. О, һәгигәтә шәһадәт етмәк үчүн ҝәлмишдир. О билирди ки, етдији мө’ҹүзәләрин сајәсиндә инсанларын алдығы фајда мүвәггәтидир. Һәтта онун дирилтдији инсанлар да әввәл-ахыр өлүрдүләр. Амма јалныз һәгигәтә шәһадәт етмәклә инсанлара әбәди һәјаты алмаға көмәк едә билди (Лука 18:28-30).
20, 21. Јахшы ишләрә мүнасибәтдә мәсиһчиләр һансы таразлығы тәзаһүр етдирирләр?
20 Бу ҝүн ајры-ајры инсанлар хәстәханалар ачараг, јахуд касыблар үчүн јахшылыглар едәрәк Исанын хејирхаһ ишләрини тәглид етмәјә чалышырлар. Һәрдән белә инсанлар бунун үчүн бөјүк фәдакарлыг ҝөстәрирләр вә онларын сәмими гәлбдән чалышмалары тә’рифә лајигдир. Лакин онларын ҝөрдүкләри ишин ҝәтирдији фајда нә гәдәр јахшы олса да, мүвәггәтидир. Јалныз Аллаһын Падшаһлығы сөзүн әсл мә’насында көмәк едәҹәк. Бу сәбәбдән, Иса кими, Јеһованын Шаһидләри дә гүввәләрини Падшаһлыг һаггындакы һәгигәтә шәһадәт етмәјә јөнәлдирләр.
21 Мәсиһчиләр, әлбәттә ки, инсанлара башга саһәләрдә дә көмәк едирләр. Павел јазырды: «Нә гәдәр фүрсәтимиз варса, һамыја, хүсусән иманлылар аиләсинә јахшылыг едәк» (Галатијалылара 6:10). Һансыса бир фәлакәт үз верәндә вә ја кимсә еһтијаҹ ичиндә оланда, биз тәрәддүд етмәдән јахынларымыза, о ҹүмләдән мәсиһчи баҹы-гардашларымыза ‘јахшылыг едирик’. Бунунла белә, биз һәгигәтә шәһадәт етмәји ән башлыҹа мәсәлә һесаб едирик.
Мәсиһин нүмунәсиндән өјрән
22. Нәјә ҝөрә мәсиһчиләр јахынларына тәблиғ едирләр?
22 Павел јазырды: «Мүждәни... тәблиғ етмирәмсә, вај һалыма!» (1 Коринфлиләрә 9:16). О, хош хәбәрә ҹидди јанашырды, чүнки ону тәблиғ едәрәк һәм өзүнү, һәм дә она гулаг асанлары хилас едирди (1 Тимотејә 4:16). Биз дә хидмәтимизә ејнилә јанашырыг. Биз јахынларымыза көмәк етмәк истәјирик. Јеһоваја мәһәббәтимизи ҝөстәрмәк истәјирик. Исаја олан мәһәббәтимизи сүбут етмәк вә онун бизә тәзаһүр етдирдији бөјүк мәһәббәтә ҝөрә миннәтдарлығымызы билдирмәк истәјирик. Бүтүн бунлары нәзәрә алараг хош хәбәри тәблиғ едир вә «артыг бәшәри еһтираслара ҝөрә дејил, Аллаһын ирадәсинә ҝөрә» јашајырыг (1 Петер 4:1, 2).
23, 24. а) Мө’ҹүзәли балыг ову илә бағлы һансы ибрәт дәрсини алырыг? б) Бизим ҝүнләрдә кимләр әсаслы сурәтдә шаһидлик едирләр?
23 Башгалары бизә истеһза едәндә вә ја ҝәтирдијимиз хәбәри гәзәблә рәдд едәндә, Мәсиһи тәглид едәрәк руһдан дүшмүрүк. Биз Исанын Петерлә Андреји онун далынҹа ҝетмәјә чағыраркән ҝөстәрдији мө’ҹүзәни хатырлајырыг. Бурадан өзүмүз үчүн ибрәт дәрси ҝөрүрүк: әҝәр Мәсиһин ҝөстәришләринә риајәт едир вә мәҹазларла десәк, санки балығын олмадығы јерләрә тор атырыгса, мүкафатымыз бол ов ола биләр. Бир чох мәсиһчиләр илк бахышдан бәһрәсиз ҝөрүнә билән әразиләри илләрлә ишләјәрәк ҝөзәл бәһрәләр әлдә етмишләр. Башгалары «балығын» даһа чох олдуғу јерләрә ҝедиб, орада чохлу «балыглар» тутмушлар. Һәр неҹә олса да, мәҹази мә’нада десәк, торларымызы атмаға сон гојмајаҹағыг. Иса јер үзүнүн һансыса һиссәсиндә тәблиғ ишинин баша чатдығы һагда һәлә һеч нә демәјиб (Матта 24:14).
24 230-дан артыг өлкә вә әразидә алты милјондан чох Јеһованын Шаһидләри сә’јлә чалышырлар. «Ҝөзәтчи Гүлләси»нин 2005-ҹи ил 1 феврал сајында 2004-ҹү хидмәт или үчүн онларын үмумдүнја һесабаты дәрҹ олунуб. Бу һесабат Јеһованын тәблиғ ишинә бол-бол хејир-дуа вердијини ҝөстәрир. Бу системдә галан вахт әрзиндә исә Павелин тәшвиг едән мәсләһәтинә риајәт едәҹәјик: «Аллаһын кәламыны тәблиғ ет, вахтлы ја вахтсыз һазыр ол» (2 Тимотејә 4:2). Јеһова бу ишин сона чатдығыны дејәнә гәдәр, ҝәлин әсаслы сурәтдә шаһидлик етмәјә давам едәк.
Бу илдән е’тибарән Јеһованын Шаһидләринин иллик үмумдүнја һесабаты «Ҝөзәтчи Гүлләси»нин 1 јанвар сајында дејил, 1 феврал сајында дәрҹ олунаҹаг.
Ҹаваб верә биләрсинизми?
• Исанын өз шаҝирдләринә вердији һазырлыгдан биз неҹә фајда әлдә едә биләрик?
• Иса тәблиғ етдији инсанлара неҹә јанашырды?
• Бизи әсаслы сурәтдә шаһидлик етмәјә тәшвиг едән нәдир?
• Иса кими, биз дә диггәтимизи Аллаһын ирадәсини јеринә јетирмәјә неҹә јөнәлдә биләрик?
[15-ҹи сәһифәдәки шәкил]
Әҝәр биз дә Иса кими инсанлара гајғы ҝөстәрәриксә, хидмәтимиз даһа чох фајда ҝәтирәҹәк.
[16 вә 17-ҹи сәһифәләрдәки шәкил]
Иса јер үзүнә башлыҹа олараг һәгигәтә шәһадәт етмәк үчүн ҝәлмишдир.
[17-ҹи сәһифәдәки шәкилләр]
Јеһованын Шаһидләринин башлыҹа мәгсәди әсаслы сурәтдә шаһидлик етмәкдир.