Милад вә Јени ил бајрамы. Үмидләриниз һәјата кечәҹәкми?
«Бөјүк Пјотр Јени ил бајрамы илә әлагәдар јанварын 1-и бүтүн килсәләрдә хүсуси дини ајинләрин кечирилмәсини әмр етмишди. Бундан әлавә, евләрин өн гапыларыны бајрамсајағы һәмишәјашыл шам ағаҹынын будаглары илә бәзәмәји вә Москва сакинләринин Јени ил ҝүнү бир-бирләрини “Јени илиниз мүбарәк!” дејә уҹадан гышгырараг тәбрик етмәләрини әмр етмишди» («Бөјүк Пјотрун һәјаты вә аләми»).
МИЛАД вә Јени ил бајрамларындан сиз нә ҝөзләјирсиниз? Бу бајрамлар декабрын сонундан башлајараг јанварын ортасынадәк давам едир. Ушаглар гыш тә’тилинә, валидејнләр исә мә’зунијјәтә чыхдыгларындан бир чохлары елә һесаб едир ки, аилә илә бирликдә вахт кечирмәк үчүн бу бајрамлар ә’ла фүрсәтдир. Милад бајрамы ән’әнәви олараг, Иса Мәсиһин доғум ҝүнү кими гәбул едилиб. Бә’зиләри бу бајрамы Исаја еһтирамларыны билдирмәк истәдикләри үчүн гејд едирләр. Ола биләр, сиз дә Милад бајрамына бу ҹүр јанашырсыныз.
Бу бајрамлары һансы мәгсәдлә гејд етмәјиниздән асылы олмајараг, дүнјанын һәр јериндә јашајан милјонларла ата, ана вә ушаглар онлары сизин кими сәбирсизликлә ҝөзләјирләр. Ҝөрәсән, бу ил бајрамлар неҹә кечәҹәк? Әҝәр аиләнизлә бирликдә јығышаҹагсынызса, бајрама бағладығыныз үмидләр һәјата кечәҹәкми? Бәс Аллаһ үчүн бу бајрамларын хүсуси бир әһәмијјәти вармы?
Исаја еһтирамларыны билдирмәк истәјәнләр фикир верибләр ки, Милад бајрамы илә Јени ил шәнликләриндә Исаја аид олан бир шеј галмајыб. Әксинә, бу бајрамлар һәдијјә вериб һәдијјә алмаг вә гонаглыглара ҝетмәк үчүн бир бәһанәјә чеврилиб. Чох заман белә гонаглыгларда Мәсиһи рүсвај едән һәрәкәтләрә јол верилир. Бајрам масасы архасында јығышан аилә үзвләриндән бә’зиләри јемәкдән вә спиртли ичкиләрдән суи-истифадә етдикләри үчүн, бајрам ахшамы дава-далашсыз кечинмир. Онлар мүбаһисәләрә ҝиришир, бу да өз нөвбәсиндә чох вахт зоракылыға ҝәтириб чыхарыр. Ола биләр, сиз өзүнүз бунун шаһиди олмусунуз вә ја мәһз белә бир һадисә сизин дә башыныза ҝәлиб.
Ҝөрдүјүмүз кими, рус чары Биринҹи Пјотрун ҝүнләриндән бу јана аз шеј дәјишиб. Јаранан вәзијјәт бир чохларыны нараһат едир. Онлар бөјүк мәмнунијјәтлә бу шәраити дәјишәрдиләр. Бә’зиләри бајрам ҝүнләрини дәрин руһани шејләр үзәриндә дүшүнмәк вә аиләләри илә сағлам үнсијјәтә сәрф етмәк истәдикләри үчүн «Бајрамын сәбәбкары Исадыр» кими шүарлар алтында тәблиғат иши апарырлар. Сизҹә, дәјишикликләр баш верәҹәкми? Онлар Исаја шәрәф ҝәтирәҹәкми? Бу бајрамлара башга нөгтеји-нәзәрдән бахмаг олармы?
Бу суаллара ҹаваб тапмаг үчүн, ҝәлин бу бајрамын Русијада кечдији тарихи јолуна нәзәр салаг.