Суаллар гутусу

◼ Јығынҹаг ҝөрүшләринин вахтында башланыб, вахтында гуртармасына неҹә көмәк едә биләрик?

Хош тәәссүрат бағышлајан шәраитдә вахт тез өтүб-кечир. Ола билсин, елә мәһз буна ҝөрә дә чыхыш едәркән ајрылан вахта риајәт етмәк асан олмур. Буна наил олмагда бизә нә көмәк едә биләр?

Ҝөрүшү вахтында башла. Ҝөрүшүн башланмасына бир-ики дәгигә галмыш һамыдан јерләринә әјләшмәји хаһиш етмәк олар. О заман ҝөрүшү вахтында вә интизамлы шәкилдә башламаг олар (Ваиз 3:1). Кичик груплардан ибарәт олан ҝөрүшләри, мисал үчүн, тәблиғ хидмәти үчүн ҝөрүшү тә’јин олунан вахтда башламаг, ҝеҹикәнләрә ҝөрә јубатмаг лазым дејил.

Јахшы һазырлаш. Јахшы һазырлыг, програмын бәндләринин вахтында гуртармасында ваҹиб рол ојнајыр. Чыхышынын мәгсәдини һәмишә јадында сахла. Әсас фикирләри гејд ет вә там ајдын шәкилдә вурғула. Чалыш фикрин ҹүз’и тәфсилатлара јајынмасын. Материалы мүмкүн гәдәр садә тәгдим ет. Әҝәр чыхышына сәһнәҹик вә ја мүсаһибә дахилдирсә, габагҹадан мәшг ет. Һазырлашан заман материалы имкан дахилиндә уҹадан оху вә чыхышынын нә гәдәр вахт алдығыны гејд ет.

Материалы вахт үзрә бөлүшдүр. Әҝәр сәнә нитг вә ја динләјиҹиләрлә мүзакирә тапшырылыбса, материалы бир нечә һиссәјә бөлмәк фајдалыдыр. Һәр бир һиссә үчүн мүәјјән вахт ајыр вә үзәриндә ишләдијин вәрәгин кәнарында гејд ет. Сонра, чыхыш едәндә етдијин гејдләрә әсасән вахта нәзарәт ет. Динләјиҹиләрлә мүзакирә кечирәндә исә, чалыш ки, чох шәрһләр динләјәрәк ҝириш абзасларда јубанмајасан, әкс тәгдирдә сонракы абзаслардакы даһа ваҹиб олан материалы мүзакирә едәркән тәләсмәк лазым ҝәләҹәк. “Ҝөзәтчи Гүлләси” өјрәнмәсинин рәһбәрләри тәкрар үчүн суалларын мүзакирәсинә кифајәт гәдәр вахт сахламалыдырлар. Һәмчинин онлар диггәт јетирмәлидирләр ки, јекун маһны вә дуа үчүн ајрылан вахты журналын мүзакирәсинә истифадә етмәсинләр.

Вахтында гуртар. Әҝәр ҝөрүш бир нечә бәнддән ибарәтдирсә (мисал үчүн, хидмәти ҝөрүш) чыхыш едәнләрин һамысына чыхышларынын нә вахт башланаҹағыны вә гуртараҹағыны билмәк ваҹибдир. Әҝәр чыхышлар узанырса, нә етмәк олар? Бир вә ја бир нечә гардаш чыхышларында икинҹи дәрәҹәли мәсәләләри өтүрүб, јалныз даһа әһәмијјәтли фикирләри мүзакирә етмәклә вәзијјәти дүзәлдә биләрләр. Бу ҹүр чевиклик, јахшы мүәллимә хас олан сәҹијјәви хүсусијјәтләрдән биридир.

Биз, бир иштиракчы кими, гыса вә дәгиг ҹаваблар вермәклә мүзакирәнин апарыҹысына көмәк едә биләрик. Беләликлә бизим һәр биримиз ҝөрүшләримизин “әдәблә вә низамла” кечирилмәсинә көмәк едә биләрик (1 Кор. 14:40).