‘Дүнјанын нурундан’ инсанлары хәбәрдар ет
1. Аллаһын Кәламында һансы мөһтәшәм ишыг һаггында пејғәмбәрлик едилмишдир вә бу ишыға хүсуси диггәти һансы тәдбир јөнәлдир?
1 Јеһова Јешаја васитәсилә пејғәмбәрлик етмишдир: «Зүлмәтдә јашајан халг мөһтәшәм бир ишыг ҝөрдү. Өлүм көлҝәси дијарында мәскунлашанларын үзәринә нур доғду» (Јешаја 9:2). ‘Мөһтәшәм ишыг’ Аллаһын Оғлу Иса Мәсиһин ҝөрдүјү ишләрдә өзүнү бүрузә верди. Онун јердә јашајаркән һәјата кечирдији тәблиғ иши вә өзүнү гурбан вермәси сајәсиндә әлдә едилән хејир-дуалар руһани гаранлыгда оланлары ишыға чыхартды. Бизим ҝүнләрдә дә руһани зүлмәтә гәрг олмуш инсанларын мәһз белә бир ишыға еһтијаҹы вар. Рәббин ахшам јемәји инсанларын диггәтини ‘дүнјанын Нуруна’ јөнәлтмәк үчүн бизә хүсуси бир имканы тәгдим едир (Јәһ. 8:12). Кечән ил Исанын «буну, Мәни јада салмаг үчүн един» әмрини јеринә јетирмәкдә милјонларла инсанлар бизә гошулараг иман нүмајиш етдирдиләр (Лука 22:19). Хатирә Ҝеҹәси јахынлашдыгҹа, Јеһованын сајәсиндә сачан мөһтәшәм ишыға инсанларын диггәтини неҹә јөнәлдә биләрик? (Филип. 2:15).
2. Биз фидијә гурбанлығына ҝөрә үрәкдән ҝәлән миннәтдарлығымызы неҹә артыра биләрик вә бу бизә неҹә тә’сир едәҹәкдир?
2 Үрәкдән миннәтдар ол. Хатирә Ҝеҹәси әрәфәси, Јеһованын вә Иса Мәсиһин бәшәријјәтә фидијә гурбаны тәгдим етмәклә ҝөстәрдикләри бөјүк мәһәббәт үзәриндә дүшүнмәк үчүн чох ҝөзәл вахтдыр (Јәһ. 3:16; 2 Кор. 5:14, 15). Бу мүгәддәс тәдбир үзәриндә дәриндән дүшүнмәклә, үрәјимиздә олан миннәтдарлыг даһа да артаҹагдыр. Бизләрдән һәр биримиз «Мүгәддәс Јазылары ҝүндәлик арашдырмаг» брошүрасында ҝөстәрилән Хатирә Ҝеҹәси илә әлагәдар Мүгәддәс Китаб һиссәләрини охујуб, үзәриндә дүшүнмәјә вахт ајырмаг истәјирик. Фидијә тәгдим етмәклә мөһтәшәм шәкилдә тәзаһүр етдирдији бәнзәрсиз хүсусијјәтләри үзәриндә дүшүндүкҹә, Јеһованын Аллаһымыз олмасындан гүрур һисси дујаҹағыг. Фидијәнин шәхсән бизим үчүн һансы мә’на дашыдығы үзәриндә дүшүнмәк Аллаһа вә Онун Оғлуна олан сәмими мәһәббәтимизи артырыр вә бизи Аллаһын ирадәсини јеринә јетирмәк үчүн әлимиздән ҝәләни етмәјә тәшвиг едир (Галат. 2:20).
3. Хатирә Ҝеҹәсинә ҝөрә миннәтдарлығымызы неҹә нүмајиш етдирә биләрик?
3 Јеһованын хиласымызла бағлы ҝөрдүјү тәдбирә ҝөрә миннәтдарлығымызы артырсаг, Хатирә Ҝеҹәси илә әлагәдар шөвгүмүз Мүгәддәс Китаб өјрәтмәләринә, тәкрар баш чәкдијимиз инсанлара, гоһумлара, гоншулара, мәктәб вә иш јолдашларына, о ҹүмләдән, бу хүсуси тәдбирә дә’вәт етдијимиз һәр бир кәсә сирајәт едәҹәкдир (Лука 6:45). Буна ҝөрә дә һамыны дә’вәт етмәјә чалыш вә јаддан чыхармасынлар дејә онлара Хатирә Ҝеҹәсинә дә’вәтнамә вер. Һеч кими унутмамаг үчүн бә’зи тәблиғчиләр мүнтәзәм олараг дә’вәт етдикләри адамларын сијаһысыны тутур вә һәр ил јениләрини әлавә едирләр. Буну јахшы тәшкил етмәк вә мараглананлары дә’вәт етмәкдә сә’ј ҝөстәрмәклә Јеһова Аллаһа «сөзлә тәсвир едилә билмәјән һәдијјәси үчүн» миннәтдарлығымызы ҝөстәрә биләрик (2 Кор. 9:15).
4. Март вә апрел ајларында хидмәтдә даһа чох иштирак етмәјимизә нә көмәк едә биләр?
4 Тәблиғдә даһа чох иштирак ет. Март вә апрел ајларында хидмәтә даһа чох вахт ајыра биләрсәнми? Башгалары илә ‘Мәсиһин иззәти һаггындакы Мүждәни’ бөлүшмәкдә ҝөстәрдијин сә’ј, сөзсүз ки, Јеһованын хејир-дуасыны бәхш едәҹәк. Руһани маарифләнмәнин мәнбәји олан Јеһова дејир: «Гаранлыгдан ишыг парлајаҹагдыр» (2 Кор. 4:4-6). Лазым ҝәлдикдә, ағсаггаллар даһа чох хидмәт етмәк истәјән тәблиғчиләрә көмәк мәгсәдилә мүнасиб вахт вә јерләрдә тәблиғ хидмәти үчүн әлавә ҝөрүшләр тәшкил едәҹәкләр. Бундан әлавә, сәһәр тездән күчәдә вә ишҝүзар әразидә, ҝүнорта вә ја ахшамүстү телефон васитәсилә дә тәблиғ етмәк олар. Хидмәтдә даһа чох иштирак етмәк үчүн дүшүнҹәли шәкилдә мүәјјән саат нормасына наил олмағы планлашдыр вә она чатмаға ҹан ат. Чохлары үчүн Јеһоваја ән јахшысыны вермәк, көмәкчи пионер кими хидмәт етмәкдир (Колос. 3:23, 24).
5. Көмәкчи пионерләрин саат нормасынын азалмасы чохларына һансы фајданы ҝәтирди?
5 Көмәкчи пионер кими хидмәт едә биләрсәнми? Једди илдән чохдур ки, көмәкчи пионерләрин саат нормасы азалдылыб. Бу дәјишиклик бир чохларына, көмәкчи пионер хидмәтинин ҝәтирдији хејир-дуалары дујмаг имканы вермишдир. Бәс сән буну дујмусанмы? Бә’зиләри үчүн һәр ил көмәкчи пионер кими хидмәт етмәк артыг вәрдиш һалыны алыб. Хатирә Ҝеҹәси әрәфәсиндә бир чох тәблиғчиләр бирликдә көмәкчи пионер хидмәти ҝөтүрүрләр. Бу ајлар, јығынҹағын ил әрзиндәки фәалијјәтинин ән севинҹли анларыдыр. Хатирә Ҝеҹәси әрәфәсиндә көмәкчи пионер кими хидмәт етмәк үчүн график тута биләрсәнми? Апрелдә беш шәнбә вә беш базар ҝүнүнүн олмасы, хидмәти ҝенишләндирмәјә ҝөзәл имкан јарадыр.
6. Көмәкчи пионерләр үчүн һансы ҝөзәл имканлар јарадылыб?
6 Јығынҹағыныза март вә апрел ајларында рајон нәзарәтчисинин баш чәкмәси планлашдырылыбми? Әҝәр беләдирсә, онда сәнин үчүн хүсуси бир имкан ачылыр. Әввәлҹәдән е’лан олундуғу кими, 2006-ҹы хидмәт илиндә рајон нәзарәтчисинин баш чәкдији ај көмәкчи пионер кими хидмәт едән һәр бир тәблиғчи даими пионерләрлә кечириләҹәк ҝөрүшүн биринҹи һиссәсиндә иштирак етмәјә дә’вәт олунаҹаглар. Шүбһә јохдур ки, бу ҝөрүшдә тәгдим олунан руһани ҹәһәтдән мөһкәмләндирән програм көмәкчи пионерләрә даими пионер хидмәтинә башламаға көмәк едәҹәк. Бундан әлавә, март ајы әрзиндә «Билик» китабы васитәси илә инсанлары руһани ишыға ҹәлб етмәк имканымыз вар. Нә үчүн бу китабын көмәјилә Мүгәддәс Китаб өјрәнмәсинә башламағы гаршына мәгсәд гојмајасан?
7, 8. а) Көмәкчи пионер кими хидмәт етмәк үчүн график һазырламагда бизә нә көмәк едә биләр? б) Аилә үзвләринин әмәкдашлығы неҹә көмәк едә вә бундан бүтүн аилә неҹә фајдалана биләр?
7 Билдијимиз кими, көмәкчи пионерләр ај әрзиндә 50 саат тәблиғ етмәлидирләр. Һәфтәдә 12 саат тәблиғ едәрәк һәгигәт нуруну јајмаг үчүн һансы графикин сәнә әл вердијини мүәјјән ет. Хидмәтин бу нөвүндә уғур газананларла, о ҹүмләдән, диҝәр баҹы-гардашларла бу барәдә сөһбәт ет. Еһтимал ки, онларда сәнә гошулмаг һәвәси ојана биләр. Һәм јашлы, һәм дә ҝәнҹ вәфтиз олунмуш тәблиғчиләр, јахшы планлашдырма сајәсиндә бу тә’рифәлајиг мәгсәдә чатмағын чох да чәтин олмадығыны баша дүшмүшләр. Бу һагда дуа ет. Сонра исә әҝәр мүмкүндүрсә, планлашдыр вә көмәкчи пионер хидмәтинә башла! (Мал. 3:10).
8 Бир чох аиләләр диггәт јетирмишләр ки, бүтүн аилә көмәклик ҝөстәрдикдә, һеч олмаса бир нәфәр бу мәгсәдә чата биләр. Бир аилә гәрара ҝәлмишди ки, беш вәфтиз олунмуш аилә үзвләринин һамысы көмәкчи пионер кими хидмәт етсин, вәфтиз олунмамыш диҝәр ики ушаглары исә өз тәблиғ фәалијјәтләрини ҝенишләндирмәк үчүн хүсуси сә’ј ҝөстәрсинләр. Ҝөстәрдикләри хүсуси сә’јләр аиләјә һансы хејир-дуалары ҝәтирди? Онлар јазмышлар: «Бу ај бизим үчүн хүсусилә севиндириҹи бир ај иди, биз аилә телләринин даһа да мөһкәмләндијини һисс етдик. Јеһованын белә ҝөзәл хејир-дуаларына ҝөрә Она сон дәрәҹә миннәтдарыг!»
9. Хатирә Ҝеҹәси әрәфәсиндә нурумузун сачмасы үчүн нә едә биләрик?
9 Бизим март вә апрел ајларындакы хүсуси фәалијјәтимиз шөвг верәрәк, бизи сәмави Атамыза јахынлашдыраҹагмы? Аллаһа вә Онун Оғлуна олан мәһәббәтимизи ҝүҹләндирмәк вә хидмәтимизи ҝенишләндирмәк үчүн ҝөстәрдијимиз шәхси сә’јләрдән чох шеј асылыдыр. Ҝәлин биз дә «мәним дилим Рәббә бол-бол шүкүр сөјләјәҹәк, халг ичиндә Она һәмд едәҹәк» сөјләјән мәзмурчу кими гәтијјәтли олаг (Мәз. 109:30). Јеһова Хатирә Ҝеҹәси әрәфәсиндә бизим сә’јлә иҹра етдијимиз хидмәти, сөзсүз ки, хејир-дуаландыраҹаг. Беләликлә, даһа чох адамын зүлмәтдән чыхараг ‘һәјат нуруна’ малик ола билмәси үчүн, ҝәлин мөһтәшәм ишығын бундан сонра да сачмасына јол верәк (Јәһ. 8:12).