Һикмәтли кими јашајын
1 Дөрд балыгчы Исадан онун давамчылары олмаг дә’вәтини аланда онлар јубанмадан, «һәмин анда... Онун ардынҹа ҝетдиләр» (Мат. 4:18-22). Тарсуслу Шаул да һәгигәти гәбул едәндән вә ҝөзләри ачыландан сонра вахт итирмәди, «дәрһал синагогларда Иса һаггында тәблиғ етмәјә башлады» (Һәв. иш. 9:20). Вахт јериндә дурмур, о ҝетдисә, һеч вахт гајытмыр. Буна ҝөрә дә, вахтымыздан һикмәтлә истифадә етмәјимиз олдугҹа зәруридир (Ефес. 5:15, 16).
2 Тәсадүф. Јеһоваја хидмәт етмәк имканымыз бу ҝүн варса, ола билсин, сабаһ олмасын (Јаг. 4:14). Һеч ким «тәсадүф»үн гурбаны олмагдан сығорталанмајыб (Ваиз 9:11, КМ). Үстәлик, һамымыз ҝетдикҹә јашланырыг, һәмчинин гоҹалыгла ҝәлән вә Јеһоваја хидмәтимизә мәһдудијјәт гојан «пис ҝүнләр» бу системдә гачылмаздыр (Ваиз 12:1). Буна ҝөрә дә, Аллаһа һәср олунмағы ләнҝитмәк вә хидмәтимизи мүмкүн гәдәр ҝенишләндирмәк үчүн индикиндән даһа идеал шәраитимизин олаҹағыны ҝөзләмәк мүдрик һәрәкәт олмазды (Лука 9:59-62). Ибраһим аһыл јашларында сүлһ вә әмин-аманлыг ичиндә јашады вә «узун өмүр сүрәрәк һәјатдан дојмуш һалда өлүб әҹдадларына гошулду», чүнки о, һәјатыны тамамилә Јеһоваја һәср едәрәк вахтдан мүдрикликлә истифадә етмишди (Јар. 25:8).
3 Вахт азалмышдыр. Биз һәр саатымызы мүдрикликлә истифадә етмәк истәјирик, чүнки «вахт азалмышдыр» (1 Кор. 7:29-31). Чох тезликлә јашадығымыз көһнә систем өз сонуна чатаҹаг. «Јер үзүнүн бичини» әрәфәсиндә гојуна бәнзәр инсанларын бөјүк бичининдә иштирак етмәк имканымыз даһа һеч вахт олмајаҹаг (Вәһј 14:15). Диггәтли олмалыјыг ки, һәјатын гајғылары вә о гәдәр дә ваҹиб олмајан ишләр хидмәтә сәрф едә биләҹәјимиз вахты әлимиздән алмасын (Лука 21:34, 35). Кечмишә бахыб, бичин ишиндә там иштирак етдијимиз ҝүнләри хатырлајанда севинҹимиз ашыб-дашаҹаг!
4 Хидмәтдә севинҹлә иштирак етмәк имканымызы әлдән вермәмәлијик. Нә гәдәр ки вахт вар, ҝәлин Јеһоваја хидмәтдә әлимиздән ҝәләни әсирҝәмәјәк (Ибр. 3:13). Белә етмәклә, һәгигәтән дә һикмәтли олдуғумузу ҝөстәрәҹәјик, чүнки «Аллаһын ирадәсини јеринә јетирән әбәди јашајыр» (1 Јәһ. 2:17).